 |
|
Şəhərin mərkəzində dron qaldıran turistlər polisləri hərəkətə keçirib.
Bir neçə gün öncə, axşam saatlarında şəhərin mərkəzi Nizami küçəsində turistlərdən biri havaya dron qaldırıb.
Çox keçməyib ki, polislər hərəkətə keçib. Əraziyə 10-dan çox polis nəfəri gəlib və dronu idarə edən şəxsi axtarmağa başlayıblar. Sonradan dronu daha çox yüksəyə qaldıran şəxs onu gözdən itirməyi bacarıb və polislər həmin şəxsi aşkarlamağa müvəffəq olmayıblar.
Məsələ ilə bağlı danışan Milli İnternet Forumunun prezidenti Osman Gündüz dronlara qarşı münasibətin birmənalı olmadığını, dronların təyinatı üzrə istifadəsinə qadağanın qoyulmasının doğru olmadığını bildirib:
“Dronlar fərqli təyinatlar üçün nəzərdə tutulub. Hərbi məqsədlər üçün istifadə olunan dronlara qadağa qoyulması normal haldır. Lakin məişət üçün nəzərdə tutulan dronların istifadəsinə qadağa qoymaq düzgün deyil. Hazırda ölkəmizə dron gətirilməsi nəzarətdədir. Belə ki, siz dron gətirmək istəyəkən DİN, DTX və digər hüquq mühafizə orqanların razılığını əldə etməli olacaqsınız. O zaman dronu ölkəyə keçirə bilərsiniz. Lakin sirr deyil ki, dronu hissələrə ayıraraq müxtəlif yollarla keçirən, onu ölkəmizdə quraşdıraraq satışa çıxaran və yaxud istifadə edən insanlar var.
Düşünürəm ki, polislərin şəhər mərkəzində dron istifadə edən şəxslərə qarşı bu cür reaksiyası qəbuledilməzdir. Heç bir dünya ölkəsində drondan istifadəyə qadağa qoyulmayıb. Ola bilər ki, həmin dron vasitəsilə şəhərimizin misilsiz gözəlliyi lentə alınsın və hansısa bir telekanala ötürülsün və bu da ölkəmizin imici haqqında müsbət fikir formalaşdırsın. Bu zaman isə polislərin onlara mane olması heç doğru olmazdı”.
Yol nəqliyyat eksperti Elməddin Muradlı isə açıqlamasında bunun təhlükəsizlik məqsədi ilə atılmış bir addım olduğunu, lakin bu qədər sərt mövqe göstərməyin lazım olmadığını bildirdi:
“Dünyanın heç bir yerində belə bir qayda yoxdur. Camaat başqa ölkələrdə oyuncaq təyyarələr, qırıcılar uçurdur, texnolgiya günü-gündən inkişaf edir. Bu qədər sərt davranmaq doğru deyil. Xüsisilə qorunan dövlət obyeklərin ətrafında belə hal yaşanarsa müdaxilə olunması başadüşüləndir, lakin şəhərin mərkəzində, parklarda dronlardan istifadə olunması normal qarşılanmalıdır.
Dronlara nəzarət Xüsusi Dövlət Mühafizə Xidməti tərəfindən həyata keçirildiyi üçün polislər bu durumda hazırlıqsız yaxalanıb. Əgər gələcəkdə zərurət yaranarsa polislərə də səlahiyyətlərin verilməsi lazımdır. Həmin cihazlara kənardan müdaxilə imkanları, dronlardan istifadə edən şəxslərin yerinin təsbit edilməsi imkanları verilməlidir. Bu texniki məsələlərdir, gərək polislər xüsusi texnikalarla təchiz edilə”.
Daxili işlər naziri, general-polkovnik Ramil Usubov Gəncəyə gedəcək.
nazir oktyabr ayının 27-də saat 10:00-da Gəncə Şəhər Baş Polis İdarəsində bölgədən olan sakinləri qəbul edəcək. Qəbulda Gəncə, Göygöl, Samux, Kəlbəcər, Şəmkir, Ağstafa, Tovuz, Gədəbəy, Qazax, Daşkəsən şəhər və rayonlarının sakinləri iştirak edə bilər.
Vətəndaşlar daxili işlər orqanlarının əməkdaşlarının fəaliyyətinə və Daxili İşlər Nazirliyinin səlahiyyətlərinə aid məsələlərlə bağlı müraciət etməklə qəbula yazıla bilərlər.
bu dəqiqələrdə paytaxt yollarında, o cümlədən Azadlıq prospektinin 28 May küçəsi ilə kəsişməsi istiqamətində, Dilarə Əliyeva küçəsi- “Nizami” metro stansiyası istiqamətində, Rəşid Behbudov küçəsi- Bakıxanov istiqamətində, Vaqif küçəsi- Zorge parkı istiqamətində, Bəxtiyar Vahabzadə küçəsi-Mətbuat prospekti istiqamətində, Füzuli küçəsi- Qış parkı istiqamətində və Şah İsmayıl Xətai küçəsi- Heydər Əliyev Mərkəzi isitqamətində sıxlıq müşahidə edilir.
Yollardakı sıxlıq və tıxac səbəbindən avtobusların təyin olunmuş interval üzrə hərəkətində də ləngimələr qeydə alınır.
Hazırda yol polisi əməkdaşları bəzi küçə və prospektlərdə nəqliyyatın hərəkətini tənzimləməklə məşğuldur.
Oktyabrın 2-3-də, İran İslam Respublikasının paytaxtı Tehranda, Dəmir Yollarının Əməkdaşlıq Təşkilatının XI konfransı keçirilib. “ADY Konteyner” MMC-nin İrandakı nümayəndəliyi əməkdaşlarının da qatıldığı tədbir beynəlxalq yükdaşımalara həsr olunub. Konfransda Çin, Rusiya, Şərqi Avropa və bir sıra Asiya dövlətlərinin dəmir yolları təşkilatlarının rəhbərləri iştirak ediblər. Asiya və Sakit Okean regionu ölkələrinin Avropaya yük göndərmək potensialı, konteyner yüklərinin daşınması təcrübəsinin paylaşması, yükdaşımalarda yeni texnologiyaların tətbiqi kimi məsələlər müzakirə edilib. Konfransda, həmçinin Şimal-Cənub Beynəlxalq Nəqliyyat Dəhlizinin formalaşması istiqamətində atılan addımlar, iştirakçı ölkələrin potensialı və digər məsələlər ətrafında fikir mübadiləsi aparılıb. Tədbirdə Şimal-Cənub Beynəlxalq Nəqliyyat Dəhlizinin tərkib hissəsi olan Qəzvin-Rəşt-Astara(İran)-Astara(Azərbaycan) dəmir yolunun Rəşt-Astar hissəsində tikinti prosesinin gedişi də müzakirə olunub.
Qeyd etmək lazımdır ki, Şimal-Cənub Beynəlxalq Nəqliyyat Dəhlizi Cənub-Şərqi Asiya dövlətlərini Avropa ölkələri ilə əlaqələndirəcək. Cənub-Şərqi Asiya ölkələrindən yüklər İranın Sakit Okean sahilindəki Çabaha və Fars Körfəzindəki Bəndər-Abass limanlarına buradan isə dəmir yolu ilə Azərbaycan üzərindən Rusiya və Avropa ölkələrinə daşınacaq.
"Babək prospektinin açılması oktyabrın sonuna planlaşdırılır". Bu barədə “Qafqazinfo”ya Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli məlumat verib.
O qeyd edib ki, prospektdə kommunikasiya xətləri ilə bağlı işlər tam bitməyənə kimi təmsi etdiyi qurum tərəfindən işlər tam gücü ilə yerinə yetirilə bilməz: “İki həftə bundan əvvəl prospekt boyu kommunikasiya işləri demək olar ki bitib, bəzi hissələrdə isə hələ də qalıb. Bundan sonra biz tam güclə işə başlamışıq. Hazırda prospekt boyunca asfalt örtüyünün sonuncu 3-cü qatı döşənir. Bu proses 15-20 gün davam edəcək.Asfaltlanma işləri ərazilər boyu yekunlaşdıqca xətlənmə və yol nişanlarının quraşdırılması işləri aparılır. Tam olaraq da bu iş ayın sonuna kimi bitəcək”.
Qeyd edək ki, A. Nəcəfli bir müddət əvvəl verdiyi açıqlamada sözügedən prospektdə sentyabrın axırı, oktyabrın əvvəlində təmir işlərinin başa çatdırılacağını qeyd etmişdi.
Xatırladaq ki, paytaxtın böyük prospektlərindən olan Babək prospekti fevral ayından bağlıdır. Bu prospektin bağlı olmasına görə əsas yük Nobel prospektinin üzərinə düşür və pik saatlarda orada sıxlıq müşahidə olunur.
Bərdə rayonunda baş verən dəhşətli yol qəzasında ölənlərin şəxsiyyəti məlum olub.
Trend-in məlumatına görə, hadisə Goranboy rayonunun Dəliməmmədli kənd sakini Vəliyev Azər Məmməd oğlunun idarə etdiyi "VAZ-21011" markalı 22-BM-803 dövlət nömrə nişanlı avtomobillə Goranboy rayon sakini Nuriyev Raqib Səxavət oğlunun idarə etdiyi "HOVO" markalı 04-BN-914 markalı yük maşını ilə toqquşması nəticəsində baş verib.
Hadisə nəticəsində "VAZ-21011" markalı avtomobilin sürücüsü Azər Vəliyev və sərnişinləri 1950-ci il təvəllüdlü Rəcəbəliyeva Zeynəb Əbdülkərim qızı, 1970-ci il təvəllüdlü Rəcəbəliyeva Rəna Əli qızı və 2005-ci il təvəllüdlü Vəliyev Rəvan Azər oğlu hadisə yerində keçiniblər.
Faktla bağlı Daxili İşlər Nazirliyinin Baş İstintaq və Təhqiqat İdarəsində Cinayət Məcəlləsinin 263.3-cü (Yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) maddəsilə cinayət işi başlanıb
Bakıd Zaqulba yolu ilə Bilgəh qəsəbəsi istiqamətində hərəkətdə olan “10-TH-113” dövlət qeydiyyat nişanlı 171 saylı sərnişin avtobusu qarşıda gedən “90-DN-376” dövlət qeydiyyat nişanlı “Mercedes”lə toqquşub.
hadisə nəticəsində “Mercedes”in 1994-cü il təvəllüdlü sürücüsü Sarıyev Mərhəmət Məhəmməd oğlu xəsarət alıb.
Hadisədən dərhal sonra 3 saylı Şəhər Klinik Xəstəxanasına aparılan M.Sarıyevə ilkin tibbi yardım göstərildikdən sonra o, evə buraxılıb.
Məlumata görə, o, Milli Aviasiya Akademiyasını bitirib və hazırda bu sahə üzrə işləyir.
Avtobus sürücüsünün bildirdiyinə görə, qarşısında hərəkətdə olan “Mercedes” markalı minik maşınının sürücüsü sükan arxasında yatmış vəziyyətdə olub və qəza bu səbəbdən baş verib.
Faktla bağlı araşdırma aparılır.
Moskva prospektinin 20 Yanvar küçəsi ilə kəsişməsində, “Şamaxı yolu” adlanan ərazidə yeni asma piyada keçidinin inşasına start verilib.
Azərbaycan Avtomobil Yolları Dövlət Agentliyinə istinadən xəbər veririk ki, yerüstü piyada keçidi 3 giriş-çıxışlı olmaqla ümumi uzunluğu 134 metr təşkil edəcək. Keçid Moskva prospektini keçməklə avtomobil tuneli üzərində inşa edildiyi üçün orta dayaqsız olacaq. Keçidin tunelin üzərindən keçən və80 metr uzunluğa malik olan hissəsi hazırda prospektin 20 yanvar küçəsi ilə kəsişmədə inşası aparılan və 30 metr hündürlüyə malik olacaq pilona (dirək) bərkidilmiş xüsusi asqıların (tros) köməkliyi ilə saxlanılacaq.
Bundan əlavə sözügedən kəsişmədə yolun hər bir istiqaməti üzrə giriş-çıxış hissə inşa olunacaq. Asma keçidin yol səthindən hündürlüyü ortalama 6 metr, qalereyasının eni isə 3.5 metr təşkil edəcək.
İşlərin 2019-cu ildə yekunlaşdırılması nəzərdə tutulub.
Prezident İlham Əliyev Salyan rayonunun Arbatan-Marışlı-Seyidsadıqlı-Quyçu avtomobil yolunun tikintisi ilə bağlı tədbirlər haqqında sərəncam imzalayıb.
sərəncama əsasən on bir min nəfər əhalinin yaşadığı 4 yaşayış məntəqəsini birləşdirən Arbatan-Marışlı-Seyidsadıqlı-Quyçu avtomobil yolunun tikintisi məqsədi ilə Azərbaycan Respublikasının 2018-ci il dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 4,2 milyon (dörd milyon iki yüz min) manatı Azərbaycan Avtomobil Yolları Dövlət Agentliyinə ayrılıb.
Bakı şəhər Baş Polis İdarəsi və şəhər prokurorluğu bu gün baş verən qəzayla bağlı məlumat yayıb.
oktyabrın 2-də saat 10 radələrində Sumqayıt şəhər sakini Bəşirov Fəxrəddin Asif oğlu idarə etdiyi “İsuzu” markalı 90-XU-233 dövlət qeydiyyat nişanlı yük avtomobili ilə Binəqədi rayonu, Novxanı qəsəbəsi, Dəniz Kənarı küçəsində hərəkətdə olarkən yolu keçmək istəyən 2004-cü il təvəllüdlü Qasımov Ayxan Xəyyam oğlu və Bayramov Rasim Vüqar oğlunu vurub, nəticədə onlar aldıqları xəsarətlərdən hadisə yerində vəfat edib.
Fakta görə Binəqədi rayon Polis İdarəsinin İstintaq Şöbəsində Cinayət Məcəlləsinin 263.3-cü (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanıb.
İş üzrə hadisə yerinə baxış keçirilmiş, müvafiq ekspertizalar, o cümlədən məhkəmə-tibbi və məhkəmə yol-nəqliyyat hadisələri ekspertizaları təyin edilmiş, şahidlərin ifadəsi alınmış və digər zəruri istintaq hərəkətləri yerinə yetirilmişdir.
F.Bəşirov şübhəli şəxs qismində tutularaq istintaqa cəlb edilib.
Hazırda iş üzrə zəruri istintaq tədbirləri davam etdirilir.