Müharibənin bir qızıl qaydası var: xarici hərbi təcavüzkarın hücumunu dəf edə, əks-hücuma keçə, onu öz sərhədlərindən kənara çıxa bilirsənsə, gərək sona qədər gedəsən və o aqressiya yuvasını darmadağın edəsən, barbar güruhun ocağını söndürəsən.
Bu, elə işdir ki, onu yarımçıq qoymaq olmaz. Tarixdə bu cür nəticələnən müharibələr çox olub.
Məsələn, fransızların tərifli imperatoru Napoleon Bonopartı belə ediblər. Müttəfiq ölkələr bütün Avropanı işğala, istilaya məruz qoyan Napoleonu birinci dəfə məğlub edəndə işi başa çatdırmayıblar, o bir azdan sonra yenidən ayağa qalxıb, hakimiyyətə gəlib, müharibəyə başlayıb. O zaman onu tam məğlub ediblər, müttəfiq qoşunlar sözün hər iki mənasında yenilmiş Parisdə at oynadıblar, imperatorun özünü isə Atlantik okeanının dərinliklərindəki Müqəddəs Yelena adasına sürgün ediblər.
Əgər müttəfiq qoşunlar Napoleonun işini tam bitirməsəydilər, Fransaya müdaxilə etməsəydilər, bu, bir neçə ildən sonra başqa bir qanlı müharibəyə səbəb olacaqdı. Napoleon yenə toparlanacaqdı, yeniyetməlikdən yenicə ayrılmış gəncləri səfərbər edib, yeni ordu formalaşdıracaqdı və yeni-yeni hərbi kampaniyalara başlayacaqdı.
Ötən əsrin 44-45-ci illərində eyni strategiyanı “dünya ağalığı” sevdasına düşmüş Hitlerə də tətbiq ediblər. Onu da Berlinə qədər qovublar, həm Hitler faşistlərinin (Milli Sosialist Alman Fəhlə Partiyası), həm nasizmə könül vermiş alman xalqının əzmini və gözünü tam qırıblar. ABŞ, SSRİ və Böyük Britaniya bu ölkəni iki yerə, iki işğal zonasına parçalamaqla almanların toparlanmasını, tezliklə revanş niyyətinə düşməsini əngəlləyiblər. Çünki onlar bilirdilər ki, dəqiqliyi, dürüstlüyü, elmliliyi, işgüzarlığı, məqsədyönlülüyü ilə fərqlənən bu Avropa xalqı tezliklə özünə gələcək. Əslində elə də olub. Müharibədən cəmi 20 il sonra dağılmış, yanmış, zorlanmış Almaniyanın küllərindən yeni bir Almaniya doğulub və Avropanın 3 qüdrətli dövlətindən birinə çevrilib. Fəqət artıq bu dövlətin azı-köpək dişləri sındırılmışdı, daha heç kəsə ağız atmaq, parçalamaq fikrində deyildi.
Bəs müttəfiq qoşunlar Almaniya ərazisinə daxil olmadan, Berlini tutmadan Hitleri sağ buraxsaydılar, necə olardı? Təsəvvür etmək çətin deyil. Hitler və alman xalqı məğlubiyyətlə barışmayacaq, müharibəni davam etdirəcəkdi.
1991-ci ildə ABŞ-ın başçılıq etdiyi hərbi koalisiya Küveytə soxulmuş Səddam Hüseyni eləcə İraq ərazisindən çıxarmaqla kifayətləndi, işi yarmçıq saxladı. Qısa müddətdə biabırçılıqla məğlub olmuş, təcavüzkar ordusu ilə birlikdə “Səhrada tufan”dan güc-bəla canını qurtararaq öz ovalığına çəkilmiş Səddam Hüseyn rəsmi təbliğatda özünü “pələng öldürmüş pəhləvan” kimi aparırdı. Sanki müharibədən qalib çıxan tərəf özüdür. Bu, ona görə beləydi ki, adam hakimiyyətdə qalırdı, ərazisi işğal olunmamışdı, yeni, effektiv silahlar əldə etmək, müharibəni qaldığı yerdən davam etdirmək şansı vardı.
Səhradakı tufan, tozanaq yatandan, hərbi ehtiraslar səngiyəndən sonra ABŞ fərqinə vardı ki, iş yarımçıq qalıb, Səddam Hüseyn elə bir diktator və hərbi canidir ki, o, tam məğlub edilməlidir.
ABŞ Səddam Hüseynlə bağlı səhvini 12 il sonra, 2003-cü ilin martında düzəltmək qərarına gəldi. Maraqlıdır ki, S.Hüseyn sona qədər başına nə gələcəyini kəsdirməyib. Hərbi əməliyyatların başlanması ərəfəsində Rusiyanın sabiq baş naziri, şərqşünas Yevgeni Primakov Rusiya prezidenti Vladimir Putinin şəxsi tapşırığına əsasən Bağdada səfər edib, Səddam Hüseynlə görüşüb və ona deyib ki, əgər ölkəsini və xalqını sevirsə, onu qaçılmaz qurbanlardan qorumaq istəyirsə, İraq prezidenti vəzifəsindən istefa versin. Səddam Hüseyn sakitcə ona qulaq asıb və axırda deyib ki, birinci Körfəz müharibəsi zamanı da onu hakimiyyəti tərk etmək üçün dilə tutublar, amma müharibə qaçılmaz olub. Daha sonra o, müdrik əda ilə “bir şey olmaz, heç nə edə bilməzlər” mənası verən tərzdə əlini Primakovun çiyninə vuraraq sağollaşıb, gedib. Sonra ABŞ hücum edib, Bağdad işğal olunub. Səddam gizlənib, lap axırda da saqqal basmış halda tutulub, mühakimə edilib, asılıb və bir aqressorun kitabı beləcə bağlanıb.
Biz Azərbaycan dövləti olaraq 2020-ci ildəki hərbi kampaniyanı, prinsipcə, İrəvanda başa çatdırmalıydıq - orta əsrlər dövründə olsaydıq, belə olardı. Ermənistan bizə hücum etmiş, ərazimizin 20 faizini 28-30 il boyunca işğalda saxlamış, özünü bizim legitim hərbi hədəfimizə çevirmişdi. Ancaq hər kəsə bəlli səbəblərdən biz yalnız işğal altında olan ərazilərimizin böyük hissəsini azad edə bildik, hətta qondarma “de-qe-er”in sərəncamında olan ərazidən yalnız Şuşa və Hadrutu qaytardıq. Dünyanın qüdrətli dövlətləri, sırasında “ermənilərin yüngülvari şapalaqlanması”na göz yuman Rusiya da olmaqla, ayağa qalxdılar, bizi çox qabağa getməyə qoymadılar. Necə deyərlər, işimiz yarımçıq qaldı.
2023-cü ilin sentyabrında bir dəfə “ya Allah, bismillah” deməklə bir sutkanın içində bu işi də başa çatdırdıq.
İndi məlum olur ki, aqressor öz paytaxtına qədər qovulmalı, tam məğlub edilməli, darmadağın olunmalıymış. Çünki bu kiçik Qafqaz dövləti yenə xarici havadarlarından aldığı güclə, onların qalxanıyla cəngə qalxmaq, revanş etmək eşqinə düşüb və sərhədlərimizə qoşun yığır, yeni hərbi kampaniya başlatmaq istəyir.
Müharibəyə aid bir pritçada deyildiyi kimi, gəlsinlər, gələcəkləri varsa, görəcəkləri də var.
Araz Altaylı, Musavat.com
 |
|
Aprel ayında baş nazir Nikol Paşinyanın Ermənistanda başlatdığı etirazların altı ili tamam olur. 2018-ci il aprelin 12-də “Serji rədd et” və ya Nikol tərəfindən “məxməri inqilab” adlandırılan hərəkat aprelin 23-də o zamankı baş nazir Serj Sarkisyanın postunu tərk etməsinə gətirib çıxardı. Mayın 1-də hökumət başçısı postuna yiyələnən N.Paşinyan o vaxtdan ölkənin lideridir. Ermənistanda Qarabağ klanına nifrətin pik həddi uğursuzluqlarına rəğmən onun hakimiyyətdə qalmasına imkan verir. Azərbaycan Ordusunun Qarabağı işğaldan azad etməsi, 30 ildən çoxdur bu bölgədə yuva quran erməni separatçı-terrorçu rejiminə son qoyulması belə Ermənistan vətəndaşlarının Nikola inamını azaltmayıb. İkinci Qarabağ müharibəsində biabırçı məğlubiyyət, minlərlə erməni əsgərinin məhvi, imzaladığı kapitulyasiya aktı belə onun devrilməsinə gətirib çıxarmayıb. Əksinə, müharibədən sonra növbədənkənar seçkilərdə qalib gəlib.
Bununla yanaşı, N.Paşinyan hakimiyyətinə münasibətdə getdikcə fərqli fikirləşənlərin sayı artır. Ən maraqlı olan odur ki, Qarabağı artıq yada salan yoxdur. Əvəzində Rusiya ilə gərginlik fonunda Ermənistanın Ukraynaya çevrilə biləcəyindən ehtiyatlananların sayı artır.
Müstəqil və müxalifət mediası N.Paşinyanın altı illik idarəçiliyinə fərqli mövqedən yanaşır. Daha çox onu məsuliyyətsiz bəyanatlar səsləndirməkdə, verdiyi sözlərə əməl etməməkdə ittiham edirlər - bütün bunlar baş nazirin idarəçiliyini xarakterizə edən əsas cəhətlər kimi vurğulanır. Son günlərin ən aktual məsələsi - Rusiya ilə yaşanan gərginlik fonunda Ermənistanın Avropa ailəsinin bir üzvünə çevriləcəyi az qala illüziya kimi qəbul edilir.
Əksər müstəqil və müxalifət mediası iddia edir ki, Nikolun altı illik idarəçiliyi yalan vədlər üzərində qurulub. Əsas arqumentlər də ondan ibarətdir ki, 2018-ci il “məxməri inqilabın”dan sonra ölkənin problemləri azalmaq əvəzinə, daha da artıb. Vəd olunan proqramların heç biri yerinə yetirilməyib - işsizlik, miqrasiya sürətlə artır. N.Paşinyanın vəd etdiyi “iqtisadi möcüzə” planı da reallaşmayıb.
Əvvəla, Nikol Paşinyan vəd edir ki, Ermənistan Avropa İttifaqının üzvü olacaq. Lakin bir qədər fərqli düşünən kəsim hesab edir ki, bu, çox təhlükəli yalandır. Əsas iddia da ondan ibarətdir ki, Qərbin özünün belə İrəvanın Avropa İttifaqına qoşulması ilə bağlı planı yoxdur. Brüsselin Ermənistanı sadəcə Ukraynasayağı özünə inteqrasiya edəcəyi vurğulanır. Bu vədin nəticələri isə göz önündədir. Kiyevə vəd edilən üzvlük reallaşmayıb.
Ölkə ərazilərinin xeyli hissəsini itirib. Milyonlarla insan ev-eşiyini tərk edərək Avropaya sığınıb. Müharibənin də tezliklə başa çatacağı gözlənilmir. Analoji ssenari Ermənistan üçün də keçərlidir. Ölkənin sürətlə Rusiyadan uzaqlaşması, Kreml əleyhinə bəyanatları gücləndirməsinin cavabsız qalmayacağı şəksizdir. Hətta gözləmək olar ki, vəziyyət Ukraynadan da ağır ola bilər. Ermənistanda yerləşən Rusiya hərbi bazası hər an partlaya bilən mina rolunu oynayır. Digər təhlükəli ssenari Metsamor Atom Elektrik Stansiya ilə bağlıdır. Onsuz da qəzalı vəziyyətdə olan stansiyada hər an nəsə baş verə bilər. Ermənistan hələ də anlamaq istəmir ki, Qərbin şirnlikləndirici vədləri ona baha başa gələ bilər.
Erməni mediası bir məsələni də xüsusi qabardır. Qeyd olunur ki, Ermənistanın yeganə vəzifəsi Rusiya və İranla mübarizəsində “vasitə” rolunu oynamaqdır. Qərb də bunu gizlətmir. Nikol Paşinyan da buna razılıq verib. İrəvanın tezliklə Avropa İttifaqı ailəsinin üzvü olacağı, sadəcə sadəlövhlər üçün nəzərdə tutulub.
Erməni mediasında yer alan ikinci məsələ isə Kollektiv Təhlükəsizlik üzrə Müqavilə Təşkilatı ilə bağlıdır. Hakimiyyət iddia edir ki, Ermənistan Rusiyanın himayəsi ilə qurulan hərbi təşkilatı tərk edərsə, Qərb və NATO Ermənistanın təhlükəsizliyinə təmin edəcək. Erməni mediası bunu da yalan adlandırır. Əsas faktor kimi də NATO-nun Baş katibi Yens Stoltenberqin Bakı və İrəvana səfəri göstərilir. Bildirilir ki, bu səfər bir çox mətləblərə aydınlıq gətirdi. Onlar sadəcə Ermənistanın təhlükəsizliyini təmin etməyəcəklər.
Üçüncü məsələ yenə də KTMT ilə bağlıdır. Məhz N.Paşinyan hakimiyyəti ilk gündən qurumu tərk etməyə qərar verib. 2022-ci il oktyabrın 6-dan baş nazir rəsmən KTMT-dən çıxmaq, Rusiya qoşunlarının Qarabağ və Ermənistandan çıxmasını, Rusiyanın Türkiyə ilə əvəzlənməsi siyasətini yürüdür. Ermənistan müxalifətində belə bir fikir hökm kəsilib ki, hakimiyyət Qərbə doğru istiqamət götürməyib, əksinə, ölkəni Türkiyənin nəzarəti altına salmağa çalışır.
Dördüncüsü, Azərbaycanla Ermənistana arşında sərhədlərin delimitiasiya və demarkasiyasına gəldikdə, Nikol Paşinyan hakimiyyətinin bu məsələdə də yalan danışdığı vurğulanır. “Axı sərhədlərin təhlükəsizliyinin təminatçısı kim olacaq? Fransa prezidenti Emmanuel Makron, yaxud Avropa ittifaqı Şurasının prezidenti Şarl Mişelmi? Bu iki şəxs Praqa görüşündən sonra necə keçmiş separatçı DQR rejiminə qarant olmuşdular, Ermənistan üçün də elə olacaqlar”, - erməni mediası yazır.
Maraqlıdır ki, müxalif olan erməni mediasında da türkofobiya azalmayıb. Hər vəchlə iddia edirlər ki, Paşinyan Ermənistanı Türkiyənin ağuşuna sürükləyir. Ölkənin avrointeqrasiyasını isə yalan adlandırır. Əksinə, vurğulanır ki, erməni vətəndaşların Avropa İttifaqına ölkələrinə viza alması çətinləşib və korrupsiya mənbəyinə çevrilib. Avropa dəyərlərini geosiyasi vektorla qarışdırmaq gərək deyil. Ukrayna nümunəsi göz önündədir.
Beləliklə, Ermənistan cəmiyyəti bir müddət sonra “məxməri inqilab”ın növbəti ildönümünü təmtəraqla qeyd edəcək. Bəs görəsən, baş nazir hesabat çıxışında hansı nailiyyətləri qeyd edəcək? Yaxın gələcəkdə ermənilərin Avropa ailəsinin bir üzvünə çevriləcəyini iddia etməyə isə çox güman ki, cürət etməyəcək.
“Report” İnformasiya Agentliyi
Ermənistanda Birinci Qarabağ müharibəsi zamanı işğal olunan 4 Azərbaycan kəndinin qaytarılması ilə bağlı ehtiraslar qızışır. Hər şey onu göstərir ki, hakimiyyət bu kəndləri Azərbaycana qaytarmaq qərarı qəbul edib, amma Moskvanın dəstəklədiyi müxalifətin nümayəndələri buna kəskin etiraz edir.Ermənistan Milli Məclisinin sədri Alen Simonyan martın 27-də parlamentdə jurnalistlərlə söhbəti zamanı 4 kəndin Azərbaycana verilməsi məsələsinə toxunaraq deyib ki, Tavuş vilayətində Azərbaycana verilməsi müzakirə olunan bir dənə də erməni kənd yoxdur.
“İndi biz bu 4 kəndi Ermənistan ərazisi hesab edən adamları axtarırıq. Mən o adamları axtarıram ki, gələcəklər və Ermənistan ərazisində olduqlarını sübut edəcəklər. Ermənistan Sovet İttifaqının yaradılmasından tutmuş Ermənistanın müstəqilliyinə qədər bütün xəritələrdə öz ərazisini hər metrinə kimi göstərə bilər”, – Simonyan bildirib.
Onun fikrincə, müxalifət növbəti dəfə yanlış addım atır və bundan nəticə əldə etməyə çalışır. “Əvvəlcədən deyirəm – bu işləməyəcək. Ermənistan ərazisinin heç bir hissəsi sövdələşmə mövzusu deyil”, – parlament sədri vurğulayıb.
Bu zaman o, Ermənistanın 4 kəndi qaytarmaqdan imtina etdiyi təqdirdə Azərbaycanın hücuma keçə biləcəyini də istisna etməyib. Onun sözlərinə görə, azərbaycanlılar bu barədə açıq deyiblər.
Simonyan əmin edib ki, Ermənistan hakimiyyəti müxalifətin iddia etdiyi kimi guya hər şeyi qurban verməyə hazır olduğu məntiqindən çıxış etmir. “Xeyr, gəlin birdəfəlik qeyd edək ki, biz ərazilərimizi sövdələşmə obyektinə çevirmirik. Artıq iki ildir ki, Zəngəzur dəhlizindən danışırlar. Niyə biz bu məsələdə güzəştə getmədik? Çünki aydındır ki, bu, bizim yurisdiksiyamızdadır”, – deyə spiker əlavə edib.
Onun sözlərinə görə, sərhədin delimitasiyasına Tavuşdan başlamaq ən düzgün addımdır. Çünki orada mübahisəli ərazilər xeyli azdır. “Düşünürəm ki, bu proses nəticəsində biz sərhədin tam konturunu əldə edəcəyik. Ümumiyyətlə götürdükdə, bu ərazidə ciddi mübahisə yoxdur. Qalan ərazilərlə bağlı mübahisələr var”, – deyə o, yekunlaşdırıb.
Təbii ki, bu bəyanat əks siyasi düşərgədə dərhal reaksiya doğurub.
“Ermənistan” blokundan olan deputat Qarnik Danielyan spikeri ölkənin maraqlarını satmaqda ittiham edib: “Əslində müharibəyə çağıran onlardır. Milli Məclisin sədri bəyan edib ki, o, bu ərazilərin Ermənistan ərazisi olduğunu söyləyəcək adamları axtarır. Onun sözlərinə görə, Ermənistan Azərbaycan ərazilərini “işğal edib” və Bakı onları geri qaytarmaq bəhanəsi ilə istənilən vaxt hücuma keçə bilər. Bu, Azərbaycana Ermənistana hücum etmək üçün qanuni əsas verir.
Milli Məclisin bu sədri Ermənistanı faktiki olaraq işğalçı dövlət hesab edir, öz rəhbəri kimi heç bir delimitasiya və demarkasiya prosesi olmadan Ermənistan Respublikasının bu və ya digər hissəsinin düşmənə məxsus olduğunu bəyan edir.
Ölkənin ən yüksək rütbəli məmurlarından biri düşmənə birbaşa xəbər verir ki, bizim ordumuz Azərbaycan ərazisində dayanır. Azərbaycan da rahatlıqla girib sərhədi qoruyan yüzlərlə erməni əsgərini əsir götürə bilər.
Həqiqətən də müharibəyə çağıran və müharibə gətirən onlardır.
P.S. Axtarmağa ehtiyac yoxdur: o adamlar Tavuşdadırlar və onu gözləyirlər”.
“Demokratik Konsolidasiya Partiyasının” rəhbəri Suren Petrosyan isə dostları ilə bir yerdə artıq Tavuş bölgəsinə gedib və orada qalmağı planlaşdırır. Onun artıq Voskepar kəndində olduğu bildirilir.
Petrosyanın sözlərinə görə, kənd sakinləri ilə gündəlik təmaslar mövcud problemləri daha qabarıq göstərir. O, Voskeparda yaşayacağını və sona qədər kənd camaatının yanında olacağını bildirib. “Burada dövlətçilik məsələsi həll olunur və bunu Voskeparda hamı başa düşür. Ən əsası onların dedikləridir: biz heç bir şəraitdə təslim olmayacağıq. Bizim hamımız voskeparlıların yanında dayanıb əsaslı dəyişikliklərə buradan başlamalıyıq. Bu son dərəcə vacibdir”, – Petrosyan bildirib.
Beləliklə, Ermənistanın hazırkı vəziyyəti necə qiymətləndirmək olar? Hakimiyyət orqanlarının Azərbaycan kəndlərini Bakının yurisdiksiyasına qaytarmaqla bağlı atacaqları əməli addımlar hansı reaksiyaya səbəb olacaq? Bunun həqiqətən də kütləvi etirazlarla səbəb olmaq və hətta Ermənistanda dövlət çevrilişinə gətirib çıxarmaq ehtimalı varmı? Yoxsa yenə hay-küy salıb, sakitləşəcəklər?
Siyasi şərhçi, hüquqşünas və ictimai xadim Fuad Ağayev Pressklub.az-a açıqlamasında bildirib ki, Ermənistan ictimaiyyətinin mütləq əksəriyyətinin 4 sərhəd kəndinin beynəlxalq hüquq nöqteyi-nəzərindən ölkələrinə aid olmaması faktını inkar etməməsi çox şeyi göstərir.
“Koçaryanın “Hayastan” blokuna gəlincə, hamıya məlumdur ki, bu siyasi qüvvə Kremlin qüllələrinin birindən idarə olunur və təbii ki, onlar hər fürsətdə ölkələrində ictimai-siyasi vəziyyəti gərginləşdirməyə çalışırlar. Bunlar qan üzərində varlanan insanlardır. Yəni, hələ 90-cı illərdə hərbi cinayətləri təşkil edənlər, Azərbaycana qarşı təcavüzə rəhbərlik edənlər olub. Azərbaycanın Ağdam, Füzuli və s. kimi bütöv rayonlarını, şəhərlərini yerlə-yeksan edən, sözün əsl mənasında səhraya çevirən insanlardır. Təbii ki, mövcud vəziyyət onları qane etmir”, – ekspert qeyd edib.
Onun sözlərinə görə, bunlar Azərbaycanla Ermənistan arasında müharibə vəziyyətinə son qoyulması ilə bağlı məsələnin hüquqi həlli perspektivini hədsiz dərəcədə bəyənməyən revanşist qüvvələrdir.
“Bunlar onlarla, hətta yüz minlərlə ermənini qurban verməyə hazırdırlar. Buna görə də, onların tərəfindən bəzi kəskin addımlar atılması mümkündür.
Amma burada əsas odur ki, həmin qüvvələrin Ermənistanda nə dərəcədə nüfuzu var? Bu, mənim üçün sualdır. Amma Ermənistan, Rusiya, Qarabağ ermənilərinin teleqram kanallarından əldə etdiyim təəssüratlara əsasən deyə bilərəm ki, onların təşkil etdiyi hər hansı etiraz aksiyası ciddi heç nəyə səbəb olmayacaq”, – Ağayev hesab edir.
Prezident İlham Əliyev “Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidməti” publik hüquqi şəxsin yaradılması və fəaliyyətinin təmin edilməsi haqqında” Fərman imzalayıb.
Fərmana əsasən, “Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidməti” publik hüquqi şəxs yaradılır və “Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin Nizamnaməsi” təsdiq edilir.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidməti adları çəkilən şəhərə və rayonlara əhalinin qayıdışı ilə əlaqədar mövcud mənzil fondunun qorunması və saxlanılması, yeni çoxmənzilli bina və fərdi yaşayış evlərinin tikintisinin təşkili, habelə onların idarə edilməsi, eləcə də müvafiq ərazidə abadlaşdırma, yaşıllaşdırma və mənzil-kommunal təsərrüfatı sahələrində fəaliyyət göstərən publik hüquqi şəxsdir.
Fərmanda qeyd edilib ki, Xidmətin fəaliyyətinə ümumi rəhbərliyi və nəzarəti həyata keçirmək üçün sədr də daxil olmaqla, 5 üzvdən ibarət Müşahidə Şurası yaradılır.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin fəaliyyətinə cari rəhbərliyi Xidmətin Müşahidə Şurasının vəzifəyə təyin və vəzifədən azad etdiyi İcraçı direktor həyata keçirir.
Xidmətin nizamnamə fondu 500 min manatdır və dövlət büdcəsinin vəsaiti hesabına formalaşır.
Aydın Zöhrab oğlu Kərimov Şuşa rayonunda Azərbaycan Respublikası Prezidentinin xüsusi nümayəndəsi təyin edilib.
Bu barədə Azərbaycan Prezidenti İlham Əliyev sərəncam imzalayıb.
Sərəncama əsasən, “Azərbaycan Respublikası Prezidentinin Şuşa rayonunda xüsusi nümayəndəsinin təyin edilməsi haqqında” Azərbaycan Respublikası Prezidentinin 2021-ci il 27 yanvar tarixli 2460 nömrəli Sərəncamı (Azərbaycan Respublikasının Qanunvericilik Toplusu, 2021, № 1, maddə 76 (Cild I) ləğv edilib.
Azərbaycan Respublikasının Prezidenti İlham Əliyev aprelin 1-də Rumıniyanın energetika naziri Sebastiyan İoan Burdujanı qəbul edib.
"Bu barədə Prezidentin Mətbuat Xidməti məlumat yayıb.
ABŞ və Avropa Birliyinin Ermənistana təhlükəsizlik təminatı vermək üçün rəsmi İrəvanın hərbi təxribatlarında maraqlı ola biləcəyi qətiyyən istisna deyil... Ancaq rəsmi Bakının Ermənistanla yanaşı, onun beynəlxalq himayədarlarının da məsuliyyətini qabartması, o deməkdir ki, hərbi təxribat törədərək, günahı Azərbaycanın üzərinə atmaq niyyəti qətiyyən baş tutmayacaq...
Ermənistanın yeni hərbi təxribatlara hazırlaşdığı barədə məlumatlar artıq təsdiqlənməyə başlayıb. Belə ki, rəsmi İrəvanın son vaxtlar konstruktiv mövqe tutmağa üstünlük verməsi daha çox aldadıcı manevr təsiri bağışlayır. Hər halda, Paşinyan hakimiyyətinin bəyanatları ilə davranışları kəskin ziddiyyət təşkil edir. Və son günlər bu kəskin ziddiyyətlər daha qabarıq şəkildə müşahidə olunmaqdadır.
Məsələ ondadır ki, Ermənistan baş naziri Nikol Paşinyan fevral ayının sonlarında erməni toplumuna gələcəyə yönəlik "böyük ümidlər" paylamağa çalışırdı. Erməni baş nazir mart və aprel aylarında baş verəcək hadisələrin Ermənistanın gələcək taleyi və təhlükəsizliyi üçün həlledici xarakter daşıyacağını bildirmişdi. O, xüsusilə də, aprel ayında Ermənistanın təhlükəsizliyinin təmin edilməsi istiqamətində önəmli addımların atılacağını vurğulamışdı. Və həmin vaxt erməni baş nazirin dedikləri müəyyən mənada, şəxsi maraqlara hesablanmış piar kimi görünürdü.
Bütün bunların ardınca baş nazir Nikol Paşinyan gözlənilmədən Azərbaycanın dörd kəndinin geri qaytarılmasının vacibliyini gündəmə gətirdi. Ardınca həmin kəndlərin sakinləri ilə görüşüb, əks halda, Azərbaycanın yeni müharibəyə başlayacağını sübut etməyə çalışdı. Əlbəttə, hələ də Ermənistanın işğalı altında qalan dörd kəndin geri qaytarılmasının vacibliyi barədə deyilənlər konstruktiv mövqe təsiri bağışlayır. Ancaq erməni baş nazirin rəsmi Bakının yeni savaş üçün bəhanə axtardığı barədə iddiaları isə Azərbaycana qarşı böhran atmaqdan başqa bir şey deyildi.
Düzdür, həmin vaxt erməni baş nazirin bu ziddiyyətli açıqlamaları daha çox rəsmi İrəvanın Ermənistan cəmiyyətini Azərbaycanla yeni müharibə təhlükəsi ilə qorxudaraq, dörd kəndin qaytarılmasına daxili müqaviməti qırmaq cəhdi kimi də izah olunurdu. Ancaq indi məlum olur ki, bu, heç də belə deyilmiş. Əksinə, baş nazir Nikol Paşinyan həmin ziddiyyətli açıqlamalarla aldadıcı manevrlər edərək, hansısa önəmli proses üçün əlavə zaman qazanmağa çalışırmış. Və artıq erməni baş nazirin manipulyasiyalarının arxasında gizlənən əsas niyyət ifşa edilmiş durumdadır.
Baş nazir Nikol Paşinyanın eyham vurduğu Ermənistan üçün taleyüklü aprel gözləntisinin məhz ayın 5-də keçirilməsi planlaşdırılan ABŞ, Avropa Birliyi və Ermənistan arasında ortaq konfransının olduğu artıq məlumdur. Erməni baş nazirin manipulyasiyaları da elə bu ortaq konfransa hesablanıb. Belə ki, rəsmi İrəvan bu müddətə qədər Ermənistanı konstruktiv tərəf kimi təbliğ etməyə çalışır. Eyni zamanda, baş nazir Nikol Paşinyan ortaq konfrans çərçivəsində ABŞ və Avropa Birliyindən Ermənistan üçün sənədləşdirilmiş təhlükəsizlik təminatı qoparmağı da hədəfləyir. Bu səbəbdən də, Azərbaycanın "konstruktiv" Ermənistana qarşı yeni savaşa hazırlaşması barədə uydurma iddialara ehtiyac duyur.
Ancaq erməni baş nazir ABŞ və Avropa Birliyini Azərbaycanın yeni savaşa hazırlaşdığına inandırmağın qətiyyən asan olmayacağını da anlamamış deyil. Üstəlik, bəzi erməni mənbələri rəsmi İrəvanın böyük ümidlərinə baxmayaraq, ABŞ və Avropa Birliyinin Ermənistana təhlükəsizlik təminatı verməyə o qədər də həvəsli olmadığını vurğulayırlar. Onların qənaətinə görə, Qərbdə bundan tam imtina olunmasa da, hər halda, müəyyən tərəddüdlər hələ qalmaqdadır. Və indi baş nazir Nikol Paşinyan üçün bu tərəddüdləri arxa plana keçirtmək əsas hədəfə çevrilib.
Təbii rəsmi İrəvan indiki situasiyada qısamüddətli hərbi toqquşmaların Ermənistana Qərbin təhlükəsizlik təminatını qazandıra biləcəyi qənaətindədir. Ona görə də, Paşinyan hakimiyyəti aprelin 5-də baş tutacaq ortaq konfransa qədər mütləq sərhəd toqquşmalarına can atır. Rəsmi İrəvan çalışır ki, Azərbaycana qarşı hərbi təxribat törətsin, sonradan isə rəsmi Bakını günahlandıra bilsin. Bu haldasa, Ermənistanın yeni savaş vəziyyəti ilə üzə-üzə olduğunu qabardaraq, ABŞ və Avropa Birliyindən təhlükəsizlik təminatı qopara biləcəyinə ümid bəsləyir.
Maraqlıdır ki, Paşinyan hakimiyyəti aprelin 5-nə qədər planlaşdırdığı hərbi təxribatların hazırlıq prosesinə də başlayıb. Belə ki, Ermənistanın Azərbaycanla sərhəd bölgəsinə yenə canlı qüvvə və hərbi texnika topladığını sübut edən video görüntülər yayılıb. Yəni, Paşinyan hakimiyyətinin manipulyativ planları müəyyən mənada, artıq ifşa edilib. Üstəlik, ortaq konfrans ərəfəsində belə bir uğursuzluq rəsmi İrəvan üçün "böyük ümidlər"in boşa çıxmasına da yol aça bilər.
Ona görə də, Ermənistan Müdafiə Nazirliyi isterik şəkildə əl-ayağa düşüb, canlı qüvvə və hərbi texnikanın Azərbaycanla sərhədə doğru hərəkətini təkzib etməyə çalışır. Ancaq Ermənistan Müdafiə Nazirliyinin verdiyi izahat və gətirdiyi arqumentlər məntiqsizdir. Çünki əsas izah ondan ibarətdir ki, guya bu, Ermənistanın sərhədə qoşun toplaması yox, sadəcə, yeni hərbi sürücülərin təlim prosesinin video görüntülərdir.
Ancaq Ermənistan Müdafiə Nazirliyi yeni sürücülərə təlim keçərkən, niyə hərbi avtomobilin silahlı əsgərlərlə dondurulduğuna heç bir aydınlıq gətirməyib. Digər tərəfdən, yeni sürücülərə təlim keçmək üçün avtomobilin qoşquları üzərində zirehli hərbi texnikaya, artilleriya qurğularına hansı səbəbdən ehtiyac duyulması da suallar doğurur. Ən əsası isə yeni sürücülərin təlim keçməsi üçün hansı səbəbdən canlı qüvvə və hərbi texnika yüklənmiş avtomobil karvanının Azərbaycanla sərhəd bölgəsinə istiqamət alması da izah olunmalıdır. Və belə anlaşılır ki, rəsmi İrəvan məntiqsiz yalanlar uydurarkən, hər kəsi onlara inandıra biləcəyi qədər sadəlövh hesab edir.
Təbii ki, rəsmi Bakı bütün fəaliyyəti təxribatlardan ibarət olan Ermənistanın uydurma izahatlarına inanmamaqda tamamilə haqlıdır. Çünki rəsmi İrəvanın dediklərinin əksinə olaraq, mövcud sübutlar tamamilə fərqli niyyətlərdən xəbər verir. Hər halda, Ermənistanın aprelin 5-nə qədər Azərbaycana qarşı hərbi təxribat törətməyə hazırlaşdığı açıq-aşkar nəzərə çarpır.
Hətta ola bilər ki, ABŞ və Avropa Birliyi də Ermənistana təhlükəsizlik təminatı vermək üçün rəsmi İrəvanın hərbi təxribatlarında maraqlı olsun. Bu səbəbdən də, Azərbaycanın Müdafiə Nazirliyi rəsmi İrəvanın törətməyə hazırlaşdığı hərbi təxribatlara görə həm Ermənistanın, həm də onun beynəlxalq himayədarlarının məsuliyyət daşıyacağını bəyan edərkən, tamamilə məntiqə əsaslanır. Və bütün bunlardan sonra Ermənistanın hərbi təxribat törədərək, günahı Azərbaycanın üzərinə atmaq niyyəti baş tutmayacaq.(Yeni Müsavat)
Son zamanlar Ermənistan-Azərbaycan şərti sərhədinin müxtəlif istiqamətlərində Ermənistan silahlı qüvvələrinin canlı qüvvəsi, zirehli texnikası, artilleriya qurğuları, habelə digər ağır atəş vasitələrinin cəmləşdirilməsi və qoşunların intensiv hərəkəti müşahidə olunur.
Bu barədə Müdafiə Nazirliyindən bildirilib.
Son vaxtlar Ermənistanda Azərbaycanı müharibə ilə hədələyən revanşist qüvvələrin daha da fəallaşması, ölkəmizə qarşı aqressiv ritorikanın yüksək həddə çatması və təxribat cəhdlərinə hazırlıq məqsədilə informasiya məkanında vəziyyətin gərginləşməsinə xidmət edən təhrikçi məlumatların sayının artması özünü büruzə verir.
Xəbərdarlıq edirik ki, Ermənistan silahlı qüvvələri tərəfindən Azərbaycana qarşı hər hansı hərbi təxribat cəhdi olarsa, onun qarşısı Azərbaycan Ordusu tərəfindən qətiyyətlə alınacaqdır.
Bir daha bəyan edirik ki, vəziyyətin gərginləşməsinə və baş verə biləcək hər hansı təxribata görə bütün məsuliyyət tamamilə Ermənistan və onun havadarlarının üzərinə düşəcəkdir.
Martın 30-da Azərbaycan Respublikasının müdafiə naziri general-polkovnik Zakir Həsənovun rəhbərliyi ilə Mərkəzi Komanda Məntəqəsində xidməti müşavirə keçirilib.
Bu barədə Müdafiə Nazirliyi məlumat yayıb.
Nazir müavinləri, qoşun (qüvvə) növləri komandanları, nazirliyin baş idarə və idarə rəisləri, eləcə də hərbi hissə komandirlərinin bilavasitə və videobağlantı vasitəsilə iştirak etdiyi müşavirədə əvvəlcə xalqımızın ümummilli lideri Heydər Əliyevin və ölkəmizin ərazi bütövlüyü, müstəqilliyi uğrunda şəhid olanların, həmçinin 31 mart soyqırımı qurbanlarının xatirəsi bir dəqiqəlik sükutla yad edilib.
Silahlı Qüvvələrin Ali Baş Komandanı İlham Əliyevin Azərbaycan Ordusu qarşısında qoyduğu tapşırıqları müşavirə iştirakçılarının diqqətinə çatdıran müdafiə naziri Azərbaycan Respublikasının Prezidentinin martın 18-də Xankəndi şəhərində Novruz bayramı münasibətilə xalqımızı təbrik edərkən İkinci Qarabağ müharibəsi və antiterror əməliyyatı zamanı Ordumuzun döyüş qabiliyyəti ilə bağlı səsləndirdiyi fikirlərin Azərbaycan Ordusuna verilən yüksək dəyərin göstəricisi olduğunu qeyd edib.
Müşavirədə Azərbaycan-Ermənistan şərti sərhədindəki mövcud əməliyyat şəraiti təhlil edilib, hərbi hissələrin döyüş hazırlığının yüksək səviyyədə saxlanılması, xidməti-döyüş fəaliyyətinin təkmilləşdirilməsi barədə vəzifəli şəxslər qarşısında tapşırıqlar qoyulub.
General-polkovnik Z.Həsənov silahlanmaya yeni qəbul edilmiş müasir silah, texnika və digər döyüş vasitələrinin tətbiqi ilə real döyüş şəraitinə uyğun keçirilən təlimlərin və praktiki məşqlərin intensivliyinin daha da artırılmasının vacibliyini vurğulayıb.
Müdafiə naziri şəxsi heyətin sağlamlığının qorunmasının daim diqqət mərkəzində saxlanılması, xüsusilə Azərbaycan Respublikası Prezidentinin Sərəncamı ilə 2024-cü ilin aprel ayının 1-dən 30-dək müddətli həqiqi hərbi xidmətə yeni çağırılacaq gənc əsgərlərin fərdi-psixoloji xüsusiyyətlərinin öyrənilməsi, onların adaptasiya prosesinə həssaslıqla yanaşılması və xidmət müddətini başa vurmuş hərbi qulluqçuların planlı şəkildə yola salınması ilə bağlı müvafiq göstərişlər verib.
Ali Baş Komandan İlham Əliyev və Birinci vitse-prezident Mehriban Əliyevanın diqqət və qayğısı sayəsində hərbi qulluqçuların sosial-məişət şəraitinin yaxşılaşdırılması, qayğı və problemlərinin həlli istiqamətində görülən işlərin davam etdirildiyi qeyd olunub. Bunun bariz nümunəsi olaraq dövlətimizin başçısının 28 dekabr 2011-ci il tarixli “Azərbaycan Respublikası Silahlı Qüvvələrinin hərbi qulluqçularının sosial müdafiəsinin gücləndirilməsi tədbirləri barədə” Fərmanının icrasının təmin edilməsi məqsədilə 20 təqvim ili və daha çox qüsursuz xidmət etmiş hərbi qulluqçulara daimi mənzillərin verilməsinin hərbi qulluqçularda böyük ruh yüksəkliyi yaratdığı xüsusi vurğulanıb.
Gündəlik xidməti fəaliyyətdə təhlükəsizlik qaydalarının şəxsi heyətə mütəmadi olaraq çatdırılması və bu qaydalara onlar tərəfindən əməl olunmasına ciddi nəzarət edilməsinin, eləcə də silah, döyüş və xüsusi texnikanın istismarı zamanı iqlim şəraitinin xüsusiyyətlərinə diqqət yetirilməsinin vacibliyi qeyd olunub.
Müdafiə naziri qoşun xidməti və ideoloji işin yüksək səviyyədə təşkilinə, hərbi qulluqçuların sosial-məişət şəraitinin daha da yaxşılaşdırılmasına, həmçinin mühəndis və tibbi təminat üzrə həyata keçirilən zəruri tədbirlərə xüsusi diqqət yetirilməsi ilə bağlı vəzifəli şəxslər qarşısında konkret tapşırıqlar qoyub.
Sonda general-polkovnik Z.Həsənov 31 Mart - Azərbaycanlıların Soyqırımı Günü ilə əlaqədar anım və maarifləndirici tədbirlərin keçirilməsi barədə göstərişlər verib.
Azərbaycan və Ermənistan sülhə heç vaxt olmadığı qədər yaxındır, lakin təəssüf ki, buna mane olurlar.
Bunu Azərbaycan Respublikası Prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyev Çinin "Phoenix” telekanalına müsahibəsində deyib.
Lakin onun fikrincə, bu vəziyyətə çatana qədər Azərbaycan BMT Nizamnaməsinin 51-ci maddəsinə uyğun olaraq özünümüdafiə hüququndan istifadə etməli, ərazi bütövlüyünü və suverenliyini bərpa etməli oldu: "Azərbaycan həqiqətən də bunu etməyə məcbur idi, çünki biz ikili standartlarla, xarici hərbi təcavüz və hərbi işğal siyasətinə bəraət qazandırmaqla yanaşı, separatizmin təşviqi ilə də üzləşmişdik. Yenə də hər bir ölkə kimi bu, Azərbaycan üçün də qəbuledilməz idi”.
"Biz sülhü və təhlükəsizliyi təmin etmişik. İndi Ermənistan və Azərbaycan sülhə heç vaxt olmadığı qədər yaxındırlar. Son altı ayda Ermənistan-Azərbaycan sərhədində iki ölkə tarixində ən sakit dövrlərdən biri olub", - Prezidentin köməkçisi vurğulayıb.
"Biz (Azərbaycan və Ermənistan) sülh sazişi ilə bağlı irəliləyiş əldə edirik. Azərbaycanın yanaşması ondan ibarətdir ki, sülh Azərbaycanla Ermənistan arasındadır, çünki bu region bizə məxsusdur. Vaşinqtonda, Brüsseldə, Parisdə yox, iki ölkə arasında Cənubi Qafqaz regionunda sülh təmin edilməlidir”, - o bildirib.
H.Hacıyevin fikrincə, Bakı və İrəvan qarşıdurma səhifəsini çevirib irəli getməli, həmçinin sülh sazişinə görə məsuliyyəti gücləndirməlidir: "Ola bilsin ki, bu, uzun proses olacaq”.
O, həmçinin qeyd edib ki, Azərbaycanın hədəfi Cənubi Qafqaz regionunu sülh və əməkdaşlıq regionuna çevirməkdir: "Biz hərbi işğalın hədəfi olmasına baxmayaraq, sülh sazişinin mətnini hazırladıq, sülh sazişinin 5 fundamental prinsipini də formalaşdırdıq. Görürük ki, biz irəliləyirik, amma təəssüf ki, regional əməkdaşlığa, sülh gündəliyinə mənfi təsir göstərən müəyyən siyasət yürüdənlər var”.