 |
|
Azərbaycan xarici işlər naziri Ceyhun Bayramov və Ermənistan xarici işlər naziri Ararat Mirzoyan arasında Berlində Borsiq villasında sülh müqaviləsi layihəsi üzrə danışıqların ikinci günü başlayıb.
Bu barədə Azərbaycan XİN-in “X” hesabında paylaşım edilib.
***
Azərbaycan və Ermənistanın xarici işlər nazirləri Ceyhun Bayramov və Ararat Mirzoyan arasında danışıqlar bu gün Berlində davam etdiriləcək.
Ölkə.az xəbər verir ki, danışıqlar fevralın 28-də başlayıb.
Dünən əvvəlcə nazirlər arasında ikitərəfli görüş keçirilib. Görüş daha sonra Almaniyanın xarici işlər naziri Annalena Berbokun iştirakı ilə üçtərəfli formatda davam etdirilib.
Bundan başqa, almaniyalı nazir azərbaycanlı və erməni həmkarları ilə ayrı-ayrılıqda ikitərəfli görüşlər də keçirib.
Azərbaycan Respublikasının Prezidenti İlham Əliyev Macarıstanın yeni seçilmiş Prezidenti Tamaş Şuyoka təbrik məktubu ünvanlayıb.
Mətndə deyilir:
"Hörmətli cənab Şuyok,
Macarıstanın Prezidenti vəzifəsinə seçilməyiniz münasibətilə Sizi səmimi-qəlbdən təbrik edirəm.
Macarıstan Azərbaycanın yaxın dostu və etibarlı tərəfdaşıdır. Qarşılıqlı inam və etimada əsaslanan, gündən-günə yeni məzmunla zənginləşən Azərbaycan-Macarıstan münasibətlərinin hazırkı səviyyəsi məmnunluq doğurur.
Biz böyük potensiala malik dövlətlərarası əlaqələrimizin bütün sahələrdə genişlənməsinə, o cümlədən strateji tərəfdaşlığımızın daha da dərinləşməsinə xüsusi önəm veririk. İnanıram ki, xalqlarımızın mənafelərinə uyğun olaraq Azərbaycan ilə Macarıstan arasında ənənəvi dostluq münasibətlərinin möhkəmləndirilməsi, çoxşaxəli əməkdaşlığın bundan sonra da uğurla davam etdirilməsi naminə birgə səylər göstərəcəyik.
Sizə ən xoş arzularımı çatdırır, dost Macarıstan xalqının rifahı naminə qarşıdakı məsul fəaliyyətinizdə müvəffəqiyyətlər diləyirəm".
"Bu gün Xankəndidəyik. Bundan gözəl, bundan fəxarətli, bundan şərəfli nə var ki?!"
Bu sözləri Gənclər və İdman Nazirliyinin Azərbaycan Atletika Federasiyası ilə birgə təşkil Xankəndi–Bakı ultra marafonunun açılış mərasimində Azərbaycan Atletika Federasiyasının prezidenti Cavid Qurbanov deyib.
Prezident İlham Əliyev XII Azərbaycan-Rusiya Regionlararası Forumunun iştirakçılarına müraciət ünvanlayıb.
Müraciətdə deyilir:
“Hörmətli Forum iştirakçıları.
İlk növbədə, sizi XII Azərbaycan-Rusiya Regionlararası Forumunun açılışı münasibətilə təbrik etmək istərdim. Artıq yaxşı ənənəyə çevrilmiş bu tədbirin keçirilməsi Azərbaycan Respublikası ilə Rusiya Federasiyası arasında ikitərəfli münasibətlərin inkişafına mühüm töhfə verir.
Bu formatda regionlararası forumlar artıq öz səmərəliliyini sübuta yetirib. Hakimiyyət nümayəndələrinin, işgüzar və ekspert dairələrinin Forum çərçivəsində görüşləri keçirilir, konstruktiv və açıq dialoq aparılır. Bu, əlaqələr qurmağa, gələcək birgə fəaliyyət naminə səylərimizi əyani surətdə koordinasiya etməyə, əməkdaşlığın genişləndirilməsi perspektivlərini müzakirə etməyə imkan verir. Forum, Azərbaycan Respublikasının regionları ilə Rusiya Federasiyasının subyektləri arasında birbaşa qarşılıqlı faydalı əlaqələrin yaradılması üçün tələbat duyulan platformadır.
Məmnuniyyətlə qeyd etmək istərdim ki, qarşılıqlı hörmət və etimad prinsiplərinə əsaslanan tərəfdaşlığımız çoxşaxəlidir və demək olar ki, bütün sahələri əhatə edir. Bu gün ölkələrimiz arasında iqtisadi-ticari əməkdaşlıq dinamik şəkildə inkişaf edir, ticarət dövriyyəsi artır, yeni istiqamətlər üzrə işlər davam etdirilir. Forum çərçivəsində nəqliyyat-logistika, sənaye, kənd təsərrüfatı və ekoloji sahələrdə qarşılıqlı fəaliyyətin müzakirəsi iki ölkənin regionlararası səviyyədə əlaqələri daha da dərinləşdirmək istəyini əyani şəkildə nümayiş etdirir.
Əlamətdar haldır ki, bugünkü Forum Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında Bəyannamənin imzalanmasının ikinci ildönümündə keçirilir. İki il bundan əvvəl - 2022-ci ilin fevralında xalqlarımız arasında tarixi dostluq və mehriban qonşuluq ənənələrinə, dərin mədəni və humanitar əlaqələrə əsaslanaraq, dövlətlərarası münasibətlərimizi keyfiyyətcə yeni, müttəfiqlik səviyyəsinə qaldıran bu mühüm sənəd imzalanıb.
Əminəm ki, bu Forum əvvəlkilər kimi, yaradıcı atmosferdə keçiriləcək, ümumi yanaşmaların işlənib hazırlanması üçün əlamətdar hadisə olacaq və dost ölkələrimizin rifahı naminə nəzərdə tutulan bütün məqsədlərə nail olmağa kömək edəcək.
Forumun bütün iştirakçılarına uğurlu və səmərəli iş arzulayıram!”
Ermənistanın ərazi bütövlüyü və suverenliyi pozulacağı təqdirdə Avropa Birliyi buna reaksiya verəcək.Axar.az xəbər verir ki, bu sözləri AB-nin xarici əlaqələr və təhlükəsizlik siyasəti üzrə rəsmi nümayəndəsi Piter Stano erməni mediasına deyib.
Onun sözlərinə görə, AB Ermənistana hücumun olmayacağına, danışıqlar zamanı bütün təhdidlərin aradan qaldırılacağına inanır.
“AB-nin qırmızı xətti və Azərbaycana qarşı sanksiyaların tətbiqi üçün məcburi şərt nədir” sualına Stano belə cavab verib:
“Biz hər şeyi həll edən yeganə sehrli çubuq kimi yalnız sanksiyalara diqqət yetirə bilmərik. AB sanksiyalarının tarixinə nəzər salsaq, görərik ki, biz adətən son çarə olaraq onlara müraciət edirik. Sanksiyalar 27 üzv dövlətin əlində bir alətdir və onlar əvvəlcə bir araya gəlib yekdil qərar qəbul etməlidirlər.
Sanksiyalar özlüyündə bütün problemlərin həlli deyil. Bu, AB-nin problemlərin həlli, təhdid və çağırışların aradan qaldırılması üçün istifadə etməyə üstünlük verdiyi digər alətlərlə birlikdə dəstəkləyici tədbirdir.
Sanksiyalar həmişə bizim istifadə etdiyimiz digər vasitələrlə birlikdə istifadə olunur. Biz adətən bütün digər vasitələr istənilən nəticələrə gətirib çıxarmayanda sanksiyalar tətbiq etməyə başlayırıq”.
Stano qeyd edib ki, AB yeni tərəfdaşlıq çərçivəsində Ermənistana onun təhlükəsizliyini təhdid edən şəraitdə daha güclü və istənilən problemə qarşı daha davamlı olmağa kömək edəcək. Eyni zamanda, AB Azərbaycanla işləməyə davam edəcək, güc təhdidi və beynəlxalq hüququn pozulması kimi birtərəfli hərəkətlərin irəliyə doğru yol olmadığı və nəticələrinin olacağı mesajını çox güclü şəkildə çatdırmağa çalışacaq:
“Biz Azərbaycanla münasibətlərin elə mərhələsindəyik ki, təhdidlərdənsə, iştirakçı olmağa üstünlük veririk. Amma vəziyyət mənfi istiqamətdə inkişaf etməkdə davam edərsə, üzv dövlətlər Azərbaycana təzyiq göstərəcəklər”.
Ermənistanın KTMT ilə bağlı qəbul etdiyi qərar təşkilatın nizamnaməsi ilə ciddi ziddiyyət təşkil edir. Onlar təşkilatın tərkibində fəaliyyətlərini dondurmaları barədə qərar qəbul ediblər. Əslində isə İrəvan təşkilatdan çıxdığını bəyan etməlidir. Ermənistanın indiki şəraitdə belə bir qərarın qəbul etməsi təşkilatın qüvvədə olan nizamnaməsi baxımdan anlaşılan deyil. Sadəcə olaraq, Ermənistan Rusiya tərəfindən bu qərara münasibətdə atıla biləcək addımlardan sığortalanmaq üçün belə bir mövqe sərgiləyir.Bunu Teleqraf.com-a açıqlamasında politoloq Elşən Manafov deyib.
Onun sözlərinə görə, Ermənistan vaxt qazanmaq və Qərbdən təhlükəsizliklə bağlı müəyyən dəstək almaq istəyir:
"Rusiyanın məlum qərara mövqeyi açıqlanacaq. Onsuz da Ermənistanın Rusiyada olan səfiri Xarici İşlər Nazirliyinə çağırılıb. Rusiya Ermənistandan təcili olaraq məlum qərarla bağlı konkret mövqe sərgiləməsini tələb edib. Paşinyan hələ ki susur. Sakit qalması anlaşılandır. Paşinyan okeanın o tayına boylanır və Qərbdən olan havadarları tərəfindən bu məsələdə dəstək istəyir. Digər tərəfdən, Paşinyan yəqin düşünür ki, Rusiya tərəfindən bununla bağlı daha fərqli və sərt mövqe sərgilənəcəyi təqdirdə Fransa işə qarışacaq. Müəyyən addımlar ataraq məsələni həll edəcək. Ermənistan təhlükəsizliyini təmin etmək üçün də Fransaya müraciət edə bilər. Ancaq məsələ bundadır ki, Fransa və Ermənistan arasında təhlükəsizliklə bağlı hər hansı ciddi razılıq yoxdur. Fransa Ermənistanın təhlükəsizliyinə zəmanət verə biləcək dövlətlərdən deyil. Hələ ki, Fransa Ermənistanı silah-sursatla təmin edir. Bu məsələyə aydınlıq gətirmək olar. Məsələn Almaniya bu günlərdə Ukraynaya Taurus raketlərini göndərməkdən imtina etdi. Almaniyanın mövqeyi bundan ibarət oldu ki, biz Ukraynanın silah-sursat təminatında tərəf olsaq da, Rusiya ilə birbaşa müharibədə iştirak etmək mövqeyimiz yoxdur. Bu onu göstərir ki, NATO üzvü olan Almaniya belə Rusiya ilə birbaşa müdaxilədən və qarşıdurmadan çəkinir.
Düşünürəm ki, eyni fikirləri Fransaya da aid etmək olar. Fransa sadəcə bölgədə eskalasiyanı gücləndirmək istəyir. Nəzərə almaq lazımdır ki, indiki şəraitdə eskalasiyanın güclənməsi müəyyən mənada Rusiyanın maraqlarına cavab verir. Çünki eskalasiyanın güclənməsi və Ermənistan Rusiya arasında münasibətlərin gərginləşməsi, Azərbaycan qarşısında öz öhdəliklərini yerinə yetirməyən Ermənistanı cəzalandırmaq üçün bu və ya digər şəkildə rəsmi Bakının da maraqlarına cavab verir. Etiraf edək ki, Ermənistan 2020-ci ilin Moskva razılaşmasının şərtlərini birtərəfli şəkildə yerinə yetirməkdən imtina edir. Söhbət bölgədə nəqliyyat, kommunikasiya xətləri ilə bağlı əldə edilmiş razılıqdan gedir. Bakı da təbii ki, beynəlxalq hüququn normalarından çıxış edərək öz imzasına hörmət etməyən Ermənistanla münasibətləri beynəlxalq hüququn müəyyən etdiyi normativ aktlar əsasında qura bilər. Ona görə də Ermənistan sadəcə Qərbdəki havadarları vasitəsilə bölgədə eskalasiyanı gücləndirib. Düşünür ki, burada Rusiyanı Şərqi Avropadan əlavə, yəni Ukrayna ilə birlikdə daha fərqli münaqişəyə cəlb edə bilərlər.
Rusiyanın hərbi güc nümayiş etdirmədən Ermənistanı cəzalandırmaq üçün kifayət qədər rıçaqları və imkanları var. Bundan ötrü Rusiyanın Ermənistana enerji təhlükəsi ilə bağlı məsələlərdə təsir etmək imkanları güclüdür. Ermənistanın özünün və sərhədlərin təhlükəsizliyi 1992-ci ilin müqaviləsinin şərtləri Rusiya tərəfindən təmin olunur. Sadəcə olaraq Paşinyan çox təəssüflər olsun ki, Qərb tərəfdən bəlli mesajların müqabilində Rusiya ilə münasibətlərin kəskinləşməsi istiqamətində addımlar atır. Bu addımların kəskinləşəcəyi təqdirdə indiki şəraitdə ABŞ belə Ermənistana ciddi dəstək vermək iqtidarında olmayacaq. Ermənistan unutmamalıdır ki, bölgənin təhlükəsizlik problemləri ilə bağlı məsələlərlə münasibətdə bölgə dövlətlərinin maraqları üstə-üstə düşür".
Politoloq bildirib ki, Azərbaycan Prezidenti İlham Əliyevin irəli sürdüyü prinsip var:
"Regionda təhlükəsizlik problemləri 3+2 formatında həll olmalıdır. Ermənistan bunu unutmamalıdır. Bu formatda təhlükəsizlik problemlərinin həllində bölgə dövlətləri əməkdaşlıq etməyə hazırdır. Söhbət Rusiya, İran və Türkiyədən gedir. Adı çəkilən ölkələr qərb dövlətlərinin bölgəyə müdaxiləsinin birmənalı şəkildə əleyhinədir. Ermənistan bunu da nəzərə almalıdır. Bu kontekstdə nəzərə alsaq ki, İran hazırda Rusiya ilə Ukrayna münaqişəsi ətrafında ciddi əməkdaşlıq edir. İran Qərbin bölgəyə nüfuz etməməsi üçün Rusiya ilə birlikdə hərəkət edəcəyi də istisna olunmur, İrəvan bunu da nəzərə almalıdır".
Elşən Manafov qeyd edib ki, Fransanın Ermənistanla yaxınlaşması, Azərbaycanın Avrasiya bloku ilə yaxınlaşmasına müəyyən mənada ciddi təsir göstərə bilər:
"Bakıya Qərbdən olan təhdidlərə Azərbaycan Prezidenti andiçmə mərasimi zamanı konkret cavab verdi ki, gedib öz işləri ilə məşğul olsunlar. Bu, Qərb dövlətlərinin Azərbaycanla münasibətləri təhdid qurmaq istəklərinə Prezidentimizin konkret cavabıdır. Azərbaycanın mövqeyi bəllidir. Ermənistanla münasibətlərdəki problemlərin nizama salınması bağlı beş məlum şərt irəli sürülüb. Azərbaycan kifayət qədər güclü dövlətdir. Azərbaycanın Ermənistana qarşı apardığı savaşda da ordumuzun gücü və imkanları bunu göstərir. Azərbaycan ordusunun maliyyəsi Ermənistanın dövlət büdcəsinə bərabərdir. Bunu Fransa ilə yanaşı, Ermənistan da bilir. Ermənistanın Fransa tərəfindən silahlandırılması Azərbaycan qardaş Türkiyə, o cümlədən bölgədə geosiyasi konfederasiyanın Qərbin xeyrinə dəyişməsinə maraqlı olmayan Rusiyanın da ciddi nəzarəti altındadır. Ermənistan artıq KTMT-nin timsalında hərbi baxımdan özünün sonuncu qarantını da itirmiş olur. Bunu da Azərbaycan izləyir. Düşünürəm ki, Azərbaycan Rusiya və Türkiyə tərəfindən də ciddi dəstəyə malik olacaq".
İki gün əvvəl Ermənistan Milli Məclisində Baş nazir Nikol Paşinyanla hökumətyönlü deputatlar arasında qapalı görüş baş tutub.Bu görüş üç saatdan çox davam edib.
“Cebhe.info” xəbər verir ki, “Johovurd” qəzeti belə yazıb.
Ermənistanın Baş naziri Münxen danışıqlarının nəticələrini, xüsusilə də Azərbaycan Prezidenti ilə görüşü barədə məlumatları təqdim edib.
“Əslində, Paşinyan öz tərəfdaşlarına danışıqlar prosesində xüsusi irəliləyiş olmadığını deyib. Bildirib ki, Münxen görüşü sadəcə növbəti görüşdür və bu görüşdə mühüm heç nə əldə olunmayıb”.
Xatırladaq ki, fevralın 17-də Münxendə Almaniyanın təşkilatçılığı ilə keçirilən Azərbaycan-Ermənistan danışıqlarından sonra tərəflərin bir sıra məsələlərin müzakirəsini davam etdirmək barədə razılığa gəldiyi barədə məlumat verilmişdi.
Azərbaycan və Ermənistan xarici işlər nazirlərinin fevralın 28-29-da Berlində baş tutacaq görüşü isə Almaniyanın dəstəyi ilə sülh prosesinin irəliləməsinə ümidləri artırıb. Ceyhun Bayramov və Ararat Mirzoyanın rəhbərlik etdiyi nümayəndə heyətləri sülh müqaviləsinin mətninə dair müəyyən məsələlər üzrə razılığa gələ bilsə, bu danışıqlarda Berlin platformasının yaranmasına gətirib çıxaracaq.
Bu isə Azərbaycan və Ermənistan liderlərinin növbəti görüşünün Almaniyanın paytaxtında keçirilməsi üçün yeni siyasi baza yarada bilər. Son vaxtlar Olaf Şolts hakimiyyətinin Azərbaycan-Ermənistan danışıqlar prosesinə ev sahibliyi etmək üçün diplomatik fəallığını artırması Almaniyanın Cənubi Qafqazda strateji maraqlarının artmasından xəbər verir.
Almaniya Bundestaqının hüquqi məsələlər komissiyasının sədri Elizabet Vinkelmayer-Bekkerin başçılıq etdiyi nümayəndə heyətinin Ermənistana səfəri rəsmi Berlinin bölgəyə diqqətinin təzahürüdür.
Lakin Paşinyanın açıqlaması Ermənistanın Berlin formatına marağının yüksək olmadığını deməyə əsas verir. Paşinyan hökiməti sülh müzakirələrinin daha çox Fransanın iştirak etdiyi siyasi format çərçivəsində aparılmasına tərəfdardır. Çünki belə platformalarda birmənalı şəkildə Ermənistanın mənafeyi üstün tutulur.
Ancaq Fransanın vasitəçilik təşəbbüslərindən Azərbaycanın imtina etməsi Ermənistanın istəyini reallaşdırmaq cəhdlərinin qarşısını alır. Ona görə də Fransa Ermənistanı silahlandırmaq və bölgədə eskalasiyaya şərait yaratmaqla Azərbaycana təzyiq etməyə çalışır.
Azərbaycan isə fevralın 17-də Münxendə keçirilmiş görüşdən sonra Almaniyanın təşkilatçılıq etdiyi müzakirələrə maraq göstərir. Çünki 2023-cü il oktyabrın 5-də Avropa İttifaqı Şurasının İspaniyanın Qranada şəhərində baş tutan sammitində Azərbaycanın iştirakı olmadan dördtərəfli formatda Ermənistanın xeyrinə bəyanatın qəbuluna imza atan Almaniyanın mövqeyində indi ciddi dəyişiklik müşahidə olunur.
Şolts hökuməti Azərbaycan və Ermənistan arasında ikitərəfli danışıqlar formatına üstünlük verir və tərəflərin qəbul edəcəyi sülh prosesini dəstəkləməyə hazır olduğunu bəyan edir. Bununla da Almaniya neytral mövqeyə keçməklə Azərbaycanla yaranmış narazılığın aradan qalxmasına tərəfdar olduğunu, Cənubi Qafqaz Fransanın siyasi aləti olmaq istəmədiyini nümayiş etdirir.
Azərbaycan və Ermənistan xarici işlər nazirlərinin görüşünün Berlində təşkili də Almaniyanın danışıqlar prosesindən kənarda qalmış Fransa ilə müqayisədə diplomatik üstünlüyü deməkdir. Ona görə də Nikol Paşinyanın Münxendən sonra dərhal Fransaya çağırılması və İrəvana qayıtdıqdan sonra Azərbaycanla mühüm razılaşmanın olmadığına dair dediyi sözlər sülh prosesində Almaniyanın rolunu bir növ azaltmağa yönəlib.
Paşinyanın alman deputatları qəbul edərkən Kansler Olaf Şoltsun Ermənistan və Azərbaycan arasında sülh prosesinə verdiyi töhfədən söz açarkən Münxen görüşündən və son təşəbbüslərdən deyil, daha çox Qranada bəyanatından söz açması məhz Fransanın rolunu və Ermənistanın maraqlarını qabartmaq məqsədi daşıyır.
Onun ötən ilin payızında Almaniya Kansleri, Fransa Prezidenti, Avropa İttifaqı Şurasının Prezidentinin Ermənistanın Baş naziri ilə birlikdə Qranadada qəbul etdiyi birgə dördtərəfli bəyanatda əksini tapmış prinsiplərin əhəmiyyətini vurğulaması məhz bu mesajı özündə ehtiva edir.
Paşinyan Almaniyanın Qranadada Fransanın mövqeyindən çıxış etdiyi yanaşmanı son günlər Azərbaycanın da maraqlarının nəzərə alındığı balanslı siyasətdən üstün tutduğunu demək istəyir.
Müşfiq Abdulla
“Cebhe.info”
Fevralın 28-də Azərbaycan Respublikasının Prezidenti İlham Əliyev Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini qəbul edib.
Almaniya Federativ Respublikasının aparıcı şirkətlərinin rəhbərlərindən ibarət nümayəndə heyətinə Almaniya-Azərbaycan Xarici Ticarət Palatasının icraçı direktoru Tobias Baumann, “Falk” konsaltinq şirkətinin icraçı direktoru Tomas Falk, “Uniper Global Commodities SE” şirkətinin birinci vitse-prezidenti Uve Fip, “Rhenus Group” beynəlxalq nəqliyyat şirkətinin layihələr üzrə idarə heyətinin direktoru Heinrix Kerstgens, “VNG” Səhmdar Cəmiyyətinin İdarə Heyətinin sədri Ulf Heitmüller, “Rohde & Schwarz” şirkətinin regional satış direktoru Viktoriya Gerasimova və “HHLA International” şirkətinin icraçı direktoru Filip Sveens daxildir.
Bu gün Azərbaycan və Ermənistan xarici işlər nazirləri görüşəcək.
Görüş Berlində baş tutacaq.
Ceyhun Bayramov və Ararat Mirzoyan arasında “Sülh və dövlətlərarası münasibətlərin qurulması haqqında ikitərəfli saziş” layihəsi üzrə danışıqların növbəti raundu keçiriləcək.
“İqlim dəyişiklikləri və onların canlı aləmə təsiri dünya birliyini getdikcə daha çox narahat etməkdədir. Ölkəmiz də qlobal iqlim dəyişmələrinin təsirindən kənarda qalmayıb. Kənd təsərrüfatı, su resursları, enerji, meşə, turizm, səhiyyə sektoru və sahilyanı zonaları Azərbaycanda iqlim dəyişikliyinə həssasdır”.
Bunu Təbii ehtiyatlar, energetika və ekologiya komitəsinin sədri Sadiq Qurbanov Milli Məclisdə təşkil olunan “Ölkənin su təsərrüfatı: problemlər və yeni çağırışlar” mövzusunda dinləmələr zamanı deyib
Onun sözlərinə görə, bu problemə qarşı mübarizədə diqqətin artması, beynəlxalq həmrəyliyin gücləndirilməsi məqsədilə Azərbaycan Respublikasının Prezidenti cənab İlham Əliyev 25 dekabr 2023-cü il tarixdə 2024-cü ilin “Yaşıl dünya naminə həmrəylik ili” elan edilməsi haqqında sərəncam imzalayıb. “Bu sərəncam Azərbaycanın qlobal təşəbbüslərə ilk qoşulan ölkələrin sırasında olduğunu bir daha sübut edir. Digər tərəfdən dövlət başçımızın 2024-cü ili “Yaşıl dünya naminə həmrəylik ili” elan etməsi bütün il ərzində bu sahədə fəaliyyətimizi genişləndirəcəyimizdən və ətraf mühitin qorunması istiqamətində görüləcək işlərin xeyli dərəcədə intensivləşəcəyindən xəbər verir”, - o qeyd edib.
Komitə sədri əlavə edib ki, etibarlı su təchizatına nail olunması yeni minillikdə hər bir ölkənin qarşısında duran strateji məsələdir: “Bu gün etibarlı su təchizatının qayğısına qalmağın hər bir ölkə üçün həyati əhəmiyyətli məsələ olduğundan su təhlükəsizliyinin ölkənin milli təhlükəsizliyi olduğunu demək mümkündür. Su qlobal əhəmiyyətə malik strateji silahdır. Lakin dünya əhalisi artdıqca bu nemət tükənməyə başlayır.
Cənubi Qafqazdakı ümumi su ehtiyatının 62 faizi Gürcüstanın, 28 faizi Ermənistanın, 10 faizi isə Azərbaycanın payına düşür. Orta illik yerüstü su ehtiyatı isə 32,3 milyard kubmetrdir. Respublikamızın ərazisinin dörddə üç hissəsi Kür çayı hövzəsinə düşür və bu çay ölkə əhalisi üçün əsas içməli su mənbəyidir. Azərbaycana Kür çayı vasitəsilə daxil olan suların çox hissəsi Gürcüstan və Ermənistan ərazisində formalaşır. Təəssüf ki, bu sular da qonşu ölkələr tərəfindən daim çirkləndirilir. Yeri gəlmişkən, qeyd edək ki, Ermənistan və Gürcüstan hələ də Ətraf Mühitin Mühafizəsi üzrə Beynəlxalq Konvensiyaya qoşulmayıb. Azərbaycan isə bu sahədə 17 müxtəlif beynəlxalq konvensiyanın, o cümlədən transsərhəd suların mühafizəsi üzrə konvensiyanın iştirakçısıdır. Şirin su ehtiyatlarımızın kiçik bir qismi də Araz çayı hesabına formalaşır ki, bu da İran və Ermənistan tərəfindən çirkləndirilir. Şimaldan-Rusiyanın Dağıstan ərazisindən gələn Samur çayı da normalara uyğun deyil”.