 |
|
Azərbaycanın Birinci vitse-prezidenti Mehriban Əliyeva sosial şəbəkə hesabında Xocalı soyqırımının 32-ci ildönümü ilə bağlı paylaşım edib.
Paylaşımda "Xocalıya ədalət" şüarı yer alıb.
Azərbaycan Respublikasının Prezidenti İlham Əliyev özünün "X" hesabında Xocalı faciəsinin 32-ci ildönümü ilə bağlı paylaşım edib.
Paylaşımda "26 fevral 1992. Xocalı soyqırımı" sözləri yer alıb.
Göygölə yeni polis rəisi təyin olunub.
APA xəbər verir ki, bununla bağlı müvafiq əmr imzalanıb.
Əmrə əsasən, İsmayıllı rayon Polis Şöbəsinin rəisi polkovnik Şəmşir Kazımov tutduğu vəzifədən azad edilərək, Göygöl rayon Polis Şöbəsinə rəis təyin edilib.
Daxili işlər orqanlarında yeni təyinat olub.
Yol-xeber.az xəbər verir ki, DİN-də imzalanmış müvafiq əmrlə Oğuz Rayon Polis Şöbəsinin rəisi, polis polkovniki Vüqar Əliyev rotasiya qaydasında vəzifədən azad edilərək İsmayıllı Rayon Polis Şöbəsinin rəisi təyin olunub.
Saatlı rayon Polis Şöbəsinə yeni rəis təyin edilib.
Qaynarinfo-nun əldə etdiyi məlumata görə, daxili işlər naziri general-polkovnik Vilayət Eyvazovun müvafiq əmri ilə polis polkovnik-leytenantı Hikmət Vəliyev sözügedən vəzifəyə təyin olunub.
Qeyd edək ki, Hikmət Vəliyev sonuncu dəfə 2021-ci ilin sentyabr ayında Sabunçu Rayon Polis İdarəsinin (RPİ) İstintaq Şöbəsinin rəisi vəzifəsindən azad olunaraq Nərimanov Rayon Polis İdarəsinin (RPİ) əməliyyat üzrə rəis müavini təyin edilmişdi.
Xatırladaq ki, bir neçə gün əvvəl polkovnik Azər Tağıyev Saatlı Rayon Polis Şöbəsinin rəisi vəzifəsindən azad olunaraq İmişli Rayon Polis şöbəsinin rəisi təyin olunub.
Paşinyanın KTMT ilə bağlı son bəyanatı siyasi xarakter daşıyır. Çünki KTMT-nin nizamnaməsində bir ölkənin iştirak hüququnu dondurmasi məsələsi yoxdur. Ya özü çıxmaq niyyətində olmalıdır, ya da ki, onları bu təşkilatdan çıxartmalıdırlar.Bunu Teleqraf.com-a açıqlamasında Qərbi Kaspi Universitetinin professoru, politoloq Fikrət Sadıqov deyib.
Onun sözlərinə görə, Paşinyan çox sadə bir variant tapıb və bunu bəyan edir:
“Amma eyni zamanda KTMT-nin katibi də bəyan etdi ki, bizə Ermənistandan heç bir sənəd gəlməyib. Əgər Paşinyan hansısa tədbirlərdə iştirak etmirsə, bunu dondurma hesab edirsə, bu, artıq Ermənistanın öz işidir. Amma Ermənistan KTMT-dən çıxmayıb. Eyni zamanda da Ermənistan Rusiya ilə hərbi texniki əməkdaşlığın inkişafı ilə bağlı bir sıra addımlarda atıb. Görünən odur ki, bu reallıqları Ermənistanın rəsmiləri ya nəzərə almır, ya da hesab edirlər ki, belə bəyanatlarla kimlərisə guya aldatmış olurlar".
Politoloq bildirib ki, Rusiya hələ ki gözləmə vəziyyətindədir:
“Paşinyan bir çox bəyanatlarla çıxış edir. Hesab edir ki, Rusiya Ermənistana müharibə zamanı kənarda qaldı, köməklik etmədi. Digər tərəfdən də həqiqət odur ki, müharibə Ermənistan ərazisində getməyib. Ermənistan ikibaşlı siyasi addımlar atır. Onlar deyirlər ki, KTMT-nin tədbirlərində iştirak etmiyəcəklər. Digər tərəfdən də Rusiya ilə hərbi əməkdaşlığı davam etdirirlər. Əgər Paşinyan buna bir son qoyarsa, Rusiyanın gücü ilə üzləşəcək.
Rusiya tərəfi dəfələrlə bildirib ki, burada başqa dövlətlərin izi olmamalı və heç kəs bura müdaxilə edə bilməz. Paşinyanın məqsədi odur ki, sülh sazişini hələlik imzalamasın. Çünki Paşinyana həm xaricdən, həm də daxildən müəyyən təzyiqlər edilir. Belə halda sülh sazişini imzalasa, çox çətin və mürəkkəb vəziyyətə düşə bilər”.
Sabah Türkiyənin İstanbul şəhərində Bakı Təşəbbüs Qrupunun təşkilatçılığı ilə keçiriləcək “Dekolonizasiya: İntibahın oyanışı” mövzusunda beynəlxalq konfransda əlaqədar Fransa müstəmləkəsi altında yaşayan xalqlar dünyaya müraciət edəcəklər.
Türkiyənin “Haber Global” telekanalının “Dekolonizasiya: İntibahın oyanışı” mövzusunda keçiriləcək beynəlxalq konfransla əlaqədar hazırladığı süjetdə yer alıb.
Qeyd edilir ki, beynəlxalq tədbirdə dünyanın 13 ölkəsi və 4 beynəlxalq təşkilatdan 50-yə yaxın nümayəndəsi iştirak edəcək. Bakı Təşəbbüs Qrupu İstanbulda mühüm konfransa imza atacaq.
Bakı Təşəbbüs Qrupunun icraçı direktoru Abbas Abbasov bildirib ki, konfransın məqsədi Fransa müstəmləkəçilik siyasətindən zərər çəkən bütün regionların nümayəndələrinin iştirakı və onların regionlarda baş verən hadisələri, cari vəziyyəti, reallıqları dünya ictimaiyyətinə düzgün çatdırmaqdır: “Bakı Təşəbbüs Qrupu yarandığı ilk 4 ayda 5 beynəlxalq konfrans keçirdi. Konfransların məqsədi Fransanın regionlardakı siyasətinin dünya ictimaiyyətinə çatdırılması idi”.
Telekanal qeyd edib ki, konfransın iştirakçıları Fransa müstəmləkəçiliyindən əziyyət çəkən ölkələrin nümayəndələridir. İştirakçılar arasında Yeni Kaledoniya, Fransa Polineziyası, Fransa Qvineyası və digər ölkələrdən təmsilçilər var. Telekanala müsahibə verən iştirakçılar ölkələrinin 200 ildir Fransanın müstəmləkəsi altında yaşadığını, bu istiqamətdə mübarizənin hələ nəticə vermədiyini bildiriblər.
Onlar vurğulayıblar ki, Bakı Təşəbbüs Qrupu səslərinin dünya ictimaiyyətinə çatdırılması baxımından çox önəmlidir.
Konfrans iştirakçıları bununla belə, bir gün müstəqillik əldə edəcəklərinə əminliklərini ifadə ediblər.
Süjetdə qeyd edilir ki, “Bakı Təşəbbüs Qrupu müstəmləkə siyasəti altında yaşayanların müstəqillik mübarizəsinə hər zaman dəstək verir. Qrup müstəmləkəşiliyə qarşı mübarizə mövzusunda 6 konfrans keçirib.
Qeyd edək ki, Karib adaları, Cənubi Amerika, Sakit okean və Hind okeanındakı Fransanın müstəmləkələri olan dənizaşırı bölgələri - Yeni Kaledoniya, Fransız Polineziyası, Fransız Qvianası, Martinika və Qvadelupanın müstəqillik və millətçi hərəkatlarının nümayəndələri, digər bütün maraqlı tərəflər rəsmi Parisin müstəmləkəçilik siyasətinin müvafiq ölkələrdə fəsadlarına dair faktlarla İstanbuldan bütün dünyaya səslənəcək.
Xatırladaq ki, Fransa müstəmləkəçiliyinə qarşı Bakı Təşəbbüs Qrupu iyulun 6-da Bakıda Qoşulmama Hərəkatının Əlaqələndirmə Ofisinin Nazirlər Toplantısı çərçivəsində yaradılıb.
Bakı Təşəbbüs Qrupu Qoşulmama Hərəkatının müstəmləkəçilik və yeni-müstəmləkəçilik təcrübələrinə qarşı mübarizədə prinsipial mövqeyinin əsaslılığını və aktuallığını təsdiqləyib, Fransanın xaricdəki müstəmləkələrində ədalət və azadlıq uğrunda apardıqları mübarizədə öz həmrəylik şəbəkələrini strukturlaşdırmaq barədə razılığa gəliblər.
Politoloq Qabil Hüseynli Teleqraf.com-un suallarını cavablandırıb.Onunla müsahibəni təqdim edirik.
- Liderlərin Münxen görüşündən sonra həm Avropa Birliyi, həm də ABŞ-dən Bakı və İrəvana pozitiv mesajlar gəlməyə başlayıb. Hesab etmək olarmı ki, sülh prosesi yenidən Brüsselə qayıdır?
- İndiki məqamda belə görünür. Bəli, o ehtimal yaranır ki, Brüssel prosesi yenidən canlanır, Qərb, xüsusən də ABŞ prosesi ciddi nəzarətə almağa çalışır. Amma müəyyən səndələmələr də olur. Bütün bunlara baxmayaraq, düşünürəm ki, Azərbaycanla Ermənistan arasındakı sülh məsələsi Brüssel formatında həll ediləcək və münasibətlər tənzimlənəcək. Münxen görüşü prosesə yeni təkan verib. İndi Ermənistanın buna sadiq qalıb-qalmayacağını zaman göstərəcək.
- Fransa bundan əvvəl Brüssel prosesini öz təxribatçı fəaliyyətləri ilə pozmuşdu, bəs bu dəfə hansı yolu seçəcək?
- Prezident İlham Əliyevin bu məsələ ilə bağlı mövqeyi aydındır, Şarl Mişellə telefon danışığı zamanı bunu açıqlayıb. Blinkenlə də Makronun hər yerə burnunu soxması məsələsi müzakirə olunub. Zənnimcə, Makron bundan sonra prosesə qarışmayacaq. Amma Ermənistan baş naziri ilə əlaqələrini saxlayacaq, silah göndərəcək, bölgədə özünə yer etmək üçün ermənilərlə ənənəvi əlaqələrindən istifadə etməyə çalışacaq. Sülhyaratma prosesi isə Makronsuz davam edəcək və reallaşacaq.
Fikrimcə, proses Brüsseldə davam edəcəksə, vasitəçi Avropa Birliyi, müəyyən mənada da ABŞ olacaq. Yəni artıq masada Fransaya yer yoxdur.
- ABŞ dövlət katibi Entoni Blinkenin türkiyəli həmkarı Hakan Fidanla görüşündə Azərbaycan-Ermənistan sülh prosesi müzakirə olundu. Tərəflər arasındakı əvvəlki görüşlərdə də bu məsələdən danışılmışdı. ABŞ-nin Cənubi Qafqaz məsələsini aktiv şəkildə Türkiyə ilə müzakirə etməsi nədən xəbər verir?
- ABŞ yaxşı başa düşür ki, Türkiyənin Azərbaycan, eləcə də Cənubi Qafqazda güclü mövqeyi və yeri var. Üstəgəl, Azərbaycan və Türkiyə hərbi-strateji müttəfiqdir. Azərbaycan-Türkiyə əlaqələri digər sahələrdə də, dövlətlərarası münasibətlərin ən yaxşı formasını özündə əks etdirir. Bu baxımdan da, yəqin ki, Blinken Hakan Fidanla görüşündə sülh prosesinin bütün məqamları haqda danışıb. Nazirlər prosesin sürətləndirilməsinin vacibliyini də vurğulayıblar.
Cənab İlham Əliyev də bu günlərdə Ankarada sayın Rəcəb Tayyib Ərdoğanla görüşündə bildirdi ki, sülh prosesi sürətlə aparılmalı və başa çatdırılmalıdır. Prosesin başa çatdırılması Türkiyənin özü üçün də, iqtisadi-siyasi baxımdan prinsipial əhəmiyyətə malikdir. Bu, Türkiyənin bölgədəki mövqeyi və nüfuzunu gücləndirəcək. Hesab edirəm ki, Türkiyə bundan sonrakı mərhələdə prosesə daha fəal təsir göstərəcək.
- Britaniya kəşfiyyatının rəhbəri Riçard Mur Münxendə Ermənistan Baş naziri Nikol Paşinyanla görüşdü. Mur bundan əvvəl İrəvanda da olmuşdu. Britaniyanın Ermənistana yönəlik fəallığı nədən irəli gəlir və ya Azərbaycanla da sıx əlaqələri olan London prosesdə hansı rolu oynaya bilər?
- Britaniyanın bölgədə çox yaxından və uzun müddətdir əməkdaşlıq etdiyi ölkə Azərbaycandır. Britaniya Azərbaycanla münasibətlər xüsusi əhəmiyyət verir. Xüsusən də BP-nin Azərbaycanın enerji sektorundakı fəaliyyəti münasibətlərin yaxşı səviyyədə qurulmasına kömək edir.
Murun Paşinyanla görüşünə gəlincə, Britaniyanın bunda müəyyən maraqları ola bilər. Ümumiyyətlə, indi Qərb Ermənistan və Paşinyana onu izah etməyə çalışır ki, çəkinmədən, usanmadan Rusiya ilə əlaqələrdən imtina etsinlər, Moskvanın hərbi bazalarının çıxarılması ilə bağlı birmənalı mövqe ortaya qoysunlar. Bütövlükdə Rusiyanın Cənubi Qafqazla bir əlaqəsinin qalmamasına çalışırlar. Hesab edirəm ki, Britaniya kəşfiyyatının rəhbəri çəkinməməsi və Rusiyaya qarşı daha cəsarətli mövqe göstərməsi üçün Ermənistana müəyyən təminatlar verib. Bunlar da Rusiyadan uzaqlaşmaq istəyən Ermənistan üçün mühüm önəmə malikdir.
- Bütün bu gəlişmələr sülh müqaviləsinin yaxın gələcəkdə imzalanacağı ehtimalını gücləndirirmi? Məsələn, bunun üçün sərhəd, Ermənistan Konstitusiyasının dəyişdirilməsi və anklavlar məsələləri necə çözüləcək?
- Ermənistan sərhədin delimitasiyası məsələsini ön plana çəkmək istəyir. Bu fonda Ermənistan Konstitusiyasının dəyişdirilməsi məsələsi müzakirə olunur. Artıq Paşinyanın təlimatı ilə referendumla bağlı xüsusu şura və komissiya yaradılıb. Bu iki qurum Konstitusiya dəyişikliyi üzərində ciddi iş aparır. Hələlik rəsmi açıqlama verilməsə də, Ermənistan Konstitusiyasının dəyişdirilməsi prosesi sürətlə gedir. Yaxın zamanlarda bu proses baş tuta bilər.
Bir sözlə, sülh müqaviləsinin imzalanması üçün münbit zəmin var, bunun üçün iradə lazımdır.
Fikrət Məmmədov Konstitusiya Məhkəməsinin hakimi vəzifəsinə təyin edilib.
Parlamentin fevralın 23-də keçirilən plenar iclasında Azərbaycan Prezidenti İlham Əliyevin Fikrət oğlu Məmmədovun Konstitusiya Məhkəməsinin hakimi vəzifəsinə təyin edilməsi haqqında təqdimatına baxılıb.
Müzakirələrdən sonra təqdimat səsverməyə çıxarılaraq qəbul edilib.
Qeyd edək ki, F.Məmmədov bundan öncə ədliyyə naziri olub.
Azərbaycan Prezidenti İlham Əliyev Yaponiyanın İmperatoru Əlahəzrət Naruhitoya təbrik məktubu ünvanlayıb.
"Təbrikdə deyilir:
"Əlahəzrət,
Yaponiyanın milli bayramı – Təvəllüd Gününüz münasibətilə Sizi və Sizin simanızda bütün xalqınızı öz adımdan və Azərbaycan xalqı adından ürəkdən təbrik edirəm.
Bu bayram günündə Sizə ən xoş arzularımı çatdırır, dost Yaponiya xalqına daim əmin-amanlıq və rifah diləyirəm".