 |
|
ABŞ Ukraynaya hərbi dəstəyi tamamilə dayandıraraq, savaşın maliyyələşdirilməsini bütövlükdə Avropa Birliyinin üzərinə yükləyib... Avropa Birliyi isə ABŞ-ın "beşinci kolon" vasitəsilə göstərdiyi təzyiqlər nəticəsində Ukraynaya dəstək paketi ayırıb, dərhal da kənara çəkildi...
ABŞ və Qərb Ukrayna savaşına münasibətdə taktikasını və strateji hədəflərini dəyişməyə başlayıb. Belə ki, hazırda ABŞ Ukrayna savaşının bütün maliyyə yükünü Avropa Birliyinin üzərinə qoymağa çalışır və böyük ölçüdə buna nail olub. Üstəlik, Ağ Ev Ukraynanı ABŞ üçün olduqca ciddi hərbi-siyasi və maliyyə-iqtisadi yük hesab etdiyindən tədricən kənara çəkilməyə çalışır.
Hər halda, ABŞ Konqresində əvvəlki planlaşdırmaya zidd olaraq, İsrailə Ukrayna nəzərə alınmadan 17 milyard dollarlıq maliyyə yardımı ayrılması barədə sənəd müzakirəyə çıxarılıb. Bu, o deməkdir ki, Ukrayna artıq bununla barışmalı, ABŞ-ın dəstəyindən ümidini tamamilə kəsməli olacaq. Yəni, bundan sonra ABŞ-ın Ukraynaya maliyyə vəsaiti xərcləmə ehtimalı o qədər də yüksək deyil. Və bunu artıq Avropa ölkələri etmək məcburiyyətindədir.
Maraqlıdır ki, Qərbdə ABŞ-ın Ukrayna savaşına münasibətdə öz mövqeyini bu qədər radikal məzmunda dəyişməsi kifayət qədər ciddi narazılıqlara yol açıb. Hətta bəzi Qərb siyasi dairələrində Ağ Evin rəsmi Kiyevə hərbi dəstəyini kəsməsi ABŞ-ın Ukraynaya xəyanəti kimi dəyərləndirilir. Və bu, Ağ Evin Qərb siyasi məkanında nüfuzunu zədələməklə yanaşı, ABŞ-ı dolayısı tənqidlərə də tuş gətirir.
Məsələ ondadır ki, NATO-nun baş katibi Yens Stoltenberq ABŞ-ın Ukraynaya hərbi dəstəyinin əvəzolunmaz və vazkeçilməz xarakter daşıdığını vurğulayıb. Ancaq onu da qeyd edib ki, Ağ Evin Ukraynaya hərbi dəstəyini dayandırması savaş meydanında situasiyanı qəlizləşdirə biləcək faktordur. NATO baş katibi Ağ Evin Ukrayna savaşına ABŞ-ın hərbi büdcəsinin çox cüzi bir hissəsini sərf edib. Və bu, ABŞ-a yönəlik çox ehtiyatlı, üstüörtülü qınaq kimi də qəbul oluna bilər.
Məsələ ondadır ki, NATO baş katibi çox təcrübəli siyasi xadimdir. Onun ABŞ-ın Ukraynaya hərbi dəstəyinin əvəzolunmaz və vazkeçilməz kateqoriyaya aid etməsi Ağ Evin kənara çəkilməsinin doğrura biləcəyi neqativ situasiyaya eyhamdır. Eyni zamanda, NATO baş katibinin "ABŞ-ın hərbi büdcəsinin cüzi bir hissəsi" vurğusu Ağ Evin Ukraynaya dəstək vermək imkanları geniş olduğu halda, kənara çəkilməsinə üstüörtülü eyham sayıla bilər. Və bu baxımdan, Qərbdə ABŞ-ın davranışlarından məyusluq olduğu inkaredilməz reallıqdır.
Ancaq Ağ Ev ABŞ-ın tərəfdaşlarına əhəmiyyət verməyə o qədər də vərdişli deyil. Əksinə, Ağ Evdə öz müttəfiqlərini ABŞ-ın maraqlarına uyğun davranmağa məcbur buraxmaq ənənəsinə daha qətiyyətlə riayət olunur. Ona görə də, Qərbdən yüksələn dolayısı qonaqların ABŞ-ın mövqeyinə təsir göstərə biləcəyinə yalnız sadəlövhlər inana bilər. Və bu baxımdan, Ağ Evin Avropa Birliyini öz "beşinci kalonu" sayəsində Ukrayna savaşının bütün maliyyə yükünü çəkməyə məcbur edə biləcəyi qətiyyən şübhə doğurmur.
Təbii ki, bütün bunlar Avropa Birliyi daxilində kifayət qədər ciddi narazılıqlar da doğurur. Bu qurumun üzvü olan bəzi dövlətlər Avropa Birliyinin Ukrayna savaşını təkbaşına maliyyələşdirmək imkanına malik olmadığı qənaətindədir. Belə qənaətlərin açıq şəkildə gündəmə gətirilməsi isə Avropa Birliyi daxilində qarşıdurma meyillərini gücləndirir. Halbuki, ABŞ bu qurum daxilindəki "beşinci kolonu" üzərindən Avropa Birliyini Ukraynaya yeni maliyyə dəstəyi paketini təsdiqləməyə məcbur edə bilib.
Avropa Birliyinin Ukraynaya dəstək üçün ayırdığı 50 milyard avroluq maliyyə paketi indiki situasiyada rəsmi Kiyevə müəyyən ümidlər verə bilər. Ancaq bu, yaxın perspektivdən çox da uzağa gedə biləcək ümid qaynağı deyil. Çünki Avropa Birliyi bu 50 milyard avronu Ukraynanın hərbi ehtiyaclarına yaxın dörd il ərzində xərcləmək barədə də qərar qəbul edib. Bu ilin xərcləri 17 milyard avro çərçivəsindən kənara çıxmayacaq.
Avropa Birliyinin bu qərarından sonra Böyük Britaniyanın xarici işlər naziri Devid Kemeron “Zaman Ukrayna və onun müttəfiqlərinin tərəfindədir” desə də, bu, rəsmi Kiyevə o qədər də uzaqgedən planlar qurmaq imkanı vermir. Çünki Avropa Birliyinin Ukraynaya ayırdığı maliyyə yardımı həm də rəsmi Kiyevə yönəlik dolayısı mesaj xarakteri daşıyır. Belə ki, Avropa Birliyi 50 milyard avroluq vəsaiti dörd ilə bölməklə, Ukrayna savaşının davam etməli olduğu müddəti müəyyən mənada, rəsmi Kiyevin diqqətinə çatdırıb. Eyni zamanda, rəsmi Kiyevə dolayısı ilə mesaj verilib ki, yaxın dörd il ərzində Avropa Birliyindən daha artığını gözləmək tamamilə yersizdir.
Ona görə də, indi rəsmi Kiyevin narahat olmaq üçün daha çox əsasları mövcuddur. Belə ki, ABŞ Ukraynaya hərbi dəstəyi tamamilə dayandıraraq, bu məsələni Avropa Birliyinin üzərinə yükləyib. Digər tərəfdən, Avropa Birliyi də ABŞ-ın təzyiqləri ilə Ukraynaya dəstək paketi ayırıb. Ancaq Avropa Birliyi də verə biləcəyi maliyyə dəstəyinin çərçivəsini prinsipial olaraq, müəyyən edib. Yəni, Ukrayna Avropa Birliyindən yaxın dörd il üçün cəmisi 50 milyard avro ala biləcək. Və bu o deməkdir ki, ABŞ-ın ardınca, əslində, Avropa Birliyi də dörd illik "qaçış planı" quraraq, kənara çəkilib.
Belə anlaşılır ki, ABŞ və Qərb Avropa Birliyinin timsalında Ukraynaya sonuncu dəfə yardım göstərmiş oldu. Yəni, ABŞ və Qərb Rusiya istiqamətində son "atəşi" açdı. Bundan sonra Ukrayna təkbaşına hərəkət etməli olacaq. Avropa Birliyinin dörd il üçün ayırdığı 50 milyard avro heç bir illik savaş xərclərini ödəyə biləcək məbləğ deyil. Halbuki, Ukrayna bu il cəmisi 17 milyard avro ilə kifayətlənməli olacaq. Və bu, ABŞ-ın öz tərəfdaşı olan Avropa Birliyi ilə ortaq şəkildə humayə etməyi üzərinə götürdüyü bir ölkəni - Ukraynanı necə taleyin ümidinə buraxıb, qurban verdiyini açıq-aşkar hər kəsə göstərmiş oldu.(Yeni Müsavat)
Sabahdan növbədənkənar prezident seçkiləri ilə əlaqədar seçkiqabağı təşviqat başa çatacaq.
“Report”un xəbərinə görə, fevralın 6-da saat 8:00-da təşviqatın aparılması dayandırılacaq.
Qeyd edək ki, fevralın 7-də Azərbaycanda növbədənkənar prezident seçkiləri keçiriləcək. Yanvarın 9-da prezidentliyə namizədliyin qeydə alınması başa çatıb. Seçkidə 7 namizəd mübarizə aparacaq.
Prezidentliyə namizədliyi qeydə alınan şəxslər isə aşağıdakılardır:
1. Hakim Yeni Azərbaycan Partiyasının prezidentliyə namizədi İlham Əliyev;
2. Namizədliyi özü tərəfindən irəli sürülən Zahid Oruc;
3. Milli Cəbhə Partiyasının prezidentliyə namizədi Razi Nurullayev;
4. Böyük Quruluş Partiyasının prezidentliyə namizədi Fazil Mustafa;
5. Böyük Azərbaycan Partiyasının prezidentliyə namizədi Elşad Musayev;
6. Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev
7. Namizədliyi özü tərəfindən irəli sürülən Fuad Əliyev.
Azərbaycan və Ermənistan 2024-cü ilin birinci yarısında sülh sazişi imzalaya bilər.
Bu barədə “Fitç Solutions” reytinq agentliyinin ("Fitch Group"un bir hissəsi) analitiklərinin hesabatında bildirilib.
“Çox güman ki, sülh sazişinə Zəngəzur dəhlizinin yaradılması üzərində Azərbaycanın nəzarətinin gücləndirilməsi haqqında müddəalar daxil ediləcək”, - hesabatda vurğulanıb.
Onların proqnozuna görə, 2023-cü ilin sentyabrında həyata keçirilən lokal antiterror tədbirlərindən sonra Azərbaycan qısa və ortamüddətli perspektivdə regional təhlükəsizliyini gücləndirib.
Paşinyan hakimiyyəti ən qısa zamanda yekun sülh sazişinə əngəl törətməyə çalışan radikal-revanşist erməni siyasi dairələrinin müqavimətini qırmaq barədə düşünməli olacaq... Əks halda, Qərb analtik-təhlil mərkəzlərinin ehtimallarına görə, Ermənistan öz mövcudluğunu qorumaq üçün ehtiyac duyduğu yekun sülh sazişi əvəzinə, onun suverenliyini riskə atacaq yeni savaş təhlükəsi ilə qarşılaşa bilər...
Ermənistan cəmiyyətində yeni savaşın xofu yaşanmaqdadır. Erməni toplumu "xəyallar"dan ibarət olan "mifik keçmiş" ilə mövcud reallıqlar arasında çabalayır. Çünki "mifik keçmiş" erməni toplumuna heç vaxt reallaşmayacaq "xəyali iddialar"dan başqa heç nə buraxmayıb. Üstəlik, həmin "xəyali iddialar" erməni toplumunu müasir reallıqlardan uzaqlaşdırır və yeni fəlakətlərə sürükləyir. Mövcud reallıqlar isə erməni toplumunun gələcək taleyini müəyyən edə biləcək əsas faktordur. Əgər, bu faktora əhəmiyyət verilməzsə, erməni toplumu elə "mifik keçmiş"də ilişib, qala bilər. Və real gələcəkdən uzaq düşər.
Paşinyan hakimiyyəti Ermənistanı "mifik keçmiş"dən müasir reallıqlara daşımağın yolunu artıq tapmış kimi görünür. Hər halda, rəsmi İrəvan Ermənistan konstitusiyasını, gerbini və himnini dəyişməyin vacibliyi qənaətinə gəlib. Baş nazir Nikol Paşinyan və yaxın ətrafı erməni toplumuna bu dəyişikliyin Azərbaycanla sülh sazişinin imzalanması qarşısında əsas əngəllərdən biri olduğunu izah etməyə başlayıb. Və bu dəyişikliklər baş verməyəcəyi, sülh sazişi imzalanmayacağı təqdirdə, Ermənistanı mütləq yeni müharibənin gözlədiyini vurğulayır.
Məsələ ondadır ki, Paşinyan hakimiyyəti Azərbaycanın ərazi bütövlüyünü tanıdığını rəsmən bəyan edib. İndi bunu yekun sülh sazişinin imzalanması ilə də hüquqi sənədlə təsdiqləmək məcburiyyətindədir. Ermənistan konstitusiyasında yer alan Azərbaycan və Türkiyəyə qarşı ərazi iddiaları isə buna əngəl törədir. Hər halda, rəsmi İrəvanın sülh sazişi imzalayaraq, Azərbaycanın ərazi bütövlüyünü tanımasına paralel olaraq, Ermənistan konstitusiyasında və digər dövlət simvollarında qonşu ölkələrə qarşı ərazi iddialarının mövcudluğu kəskin hüquqi ziddiyyətlər yarada bilər. Və bu problem aradan qaldırılmadan yekun sülh sazişinin imzalanması elə bir ciddi önəm daşıya bilməz.
Maraqlıdır ki, Azərbaycan da Ermənistandan məhz bunu tələb edir. Rəsmi Bakı Azərbaycana Ermənistan konstitusiyasındakı ərazi iddiaları ləğv edilmədən yekun sülh sazişinin imzalanmasını mümkün hesab etmir. Azərbaycan Prezidenti İlham Əliyev də artıq bu barədə Paşinyan hakimiyyətinə açıq xəbərdarlıq mesajları ünvanlayıb. Və indi rəsmi İrəvan Azərbaycan ilə münasibətləri normallaşdırıb, blokadadan çıxmaq istəyirsə, Azərbaycanın həmin tələblərini yerinə yetirmək üçün mütləq tələsməlidir.
Onu da qeyd etmək lazımdır ki, bu mövzu Ermənistan cəmiyyətində kəskin siyasi-ictimai qarşıdurma yaradıb. Belə ki, radikal-revanşist siyasi dairələr, eləcə də, dini çevrələr Paşinyan hakimiyyətini erməni xalqının keçmişini məhv etməkdə, Ermənistanın maraqlarına xəyanətdə suçlayır. Qarabağ klanının liderlərindən olan keçmiş prezident və hərbi cinayətkar Robert Köçəryanın oğlu Kevin Köçəryan isə Paşinyan hakimiyyətini ümumiyyətlə, rəsmi Bakının siyasi direktivləri ilə hərəkət etməkdə suçlayıb: "Təəssüf ki, Ermənistanı de-fakto Bakıdan idarə edirlər".
Ancaq Paşinyan hakimiyyətinin təmsilçiləri radikal-revanşist erməni siyasi düşərgəyə fərqli arqumentlərlə cavab verməyə çalışırlar. Hakim partiyadan olan erməni deputat Vaaqn Aleksanyan "xəyallar"la irəli getmək cəhdlərinin heç də həmişə uğur gətirmədiyini vurğulayıb: "Ancaq bəzi "xəyallar"ın bizim heç vaxt suverenliyimizin olmaması üçün gündəmə gətirilməsi məyusluq doğurur. Bizim əsas hədəfimiz keçmişdə müəyyən olunmuş təhlükəli yolla irəliləmək əvəzinə müstəqil Ermənistanı qorumaq olmalıdır. Biz heç vaxt nail ola bilməyəcəyimiz hədəflərin arxasınca getsək, suverenliyimizi itirə bilərik. Anlamaq lazımdır ki, dünyada heç bir dövlət "Dağlıq Qarabağı" müstəqil Ermənistanın tərkib hissəsi kimi tanımayıb".
Bütün bunlar onu göstərir ki, Ermənistanın hakim siyasi dairələri Cənubi Qafqazda yaranmış yeni reallıqların əhəmiyyətini tədricən anlamağa başlayıblar. Ona görə də, Paşinyan hakimiyyəti istənilən halda, yekun sülh sazişinin yolunu "təmizləmək" məcburiyyətində qalmış kimi görünür. Çünki rəsmi İrəvan Ermənistanın beynəlxalq himayədarlarının indi göstərdiyi dəstəyin həlledici məqamda effektiv ola biləcəyinə qətiyyən əmin deyil. Və bu baxımdan, yekun sülh sazişinin imzalanma ehtimalını ehtiyat variant kimi gündəmdə saxlamağa üstünlük verir.
Maraqlıdır ki, «Fitch Solutions» Azərbaycan və Ermənistan arasında yekun sülh sazişinin bu ilin ilk yarısında imzalana biləcəyini proqnozlaşdırır. Bu nüfuzlu beynəlxalq qurumun ehtimalına görə, yekun sülh sazişində Zəngəzur dəhlizi üzərində Azərbaycanın nəzarətini gücləndirəcək maddələrin yer ala biləcəyi də qətiyyən istisna deyil. «Fitch Solutions» hesab edir ki, rəsmi Bakı ötən ilin sentyabrında Qarabağda uğurlu antiterror əməliyyatı aparmaqla, Azərbaycanın regional təhlükəsizliyini yaxın və orta perspektiv üçün möhkəmləndirə bilib.
Belə anlaşılır ki, Azərbaycanın Cənubi Qafqazda mütləq geopolitik iradə sahibi olduğunu artıq nüfuzlu beynəlxalq analitik-təhlil mərkəzləri də birmənalı şəkildə qəbul edirlər. Rəsmi İrəvanın da Ermənistanın gələcək taleyini məhz bu inkaredilməz reallıq üzərindən müəyyən etməyə çalışması qaçılmaz xarakter daşıyır. Paşinyan hakimiyyəti nə qədər istəməsə də, regional hədəflərini və siyasətini yeni situasiyanın diqtə etdiyi şərtlərə uyğunlaşdırmaq məcburiyyətində qalıb.
Ona görə də, Paşinyan hakimiyyəti ən qısa zamanda yekun sülh sazişinə əngəl törətməyə çalışan radikal-revanşist erməni siyasi dairələrinin müqavimətini qırmaq barədə düşünməli olacaq. Çünki əks halda, Ermənistan öz mövcudluğunu qorumaq üçün ehtiyac duyduğu yekun sülh sazişi əvəzinə, onun suverenliyini riskə atacaq yeni savaş təhlükəsi ilə qarşılaşa bilər. Və bu önəmli, taleyüklü məsələnin həlli rəsmi İrəvan üçün Ermənistanın beynəlxalq himayədarlarının reallıqdan uzaq vədlərindən daha aktual xarakter daşıyır.(Yeni Müsavat)
Son günlər Ermənistan ictimaiyyətinin müzakirə etdiyi mövzulardan biri də dövlət atributları olan gerb, bayraq və himnin dəyişdirilməsidir. Paşinyan tərəfindən ilk dəfə gündəmə gətirilən bu fikirləri Ermənistan parlamentinin spikeri Alen Simonyan da müdafiə edib. Diqqətçəkən əsas məsələ isə Ermənistanın bunu Azərbaycan və Türkiyənin təzyiqi ilə etməsi iddiasıdır. Simonyan deyir ki, “Hakimiyyətin Azərbaycanın təzyiqi əsasında ölkənin əsas qanununu dəyişmək istəməsi ilə bağlı iddialar həqiqətə uyğun deyil. İrəvanın hara getdiyini və hansı məqsədlər güddüyünü anlamalıyıq, Ermənistan Respublikası niyə mövcuddur, dərk etməliyik”. İlk növbədə qeyd etmək lazımdır ki, rəsmi Bakı və Ankara bu istiqamətdə Ermənistana təzyiq etmir, amma konstitusiya və gerbdə dəyişiklik edilməsini istəyir. Bunun da obyektiv səbəbləri var. Qeyd edək ki, Ermənistan konstitusiyasının 13-cü maddəsində deyilir: “Bu, Ermənistan Respublikasının gerbidir. Mərkəzdə, qalxanın üzərində tarixi Ermənistanın dörd krallığının gerbləri olan Ağrı dağı, Nuhun gəmisi təsvir edilib”.Politoloq Turan Rzayev "Sherg.az"a deyib ki, Ağrı dağı Ermənistanın beynəlxalq hüquqla tanınan ərazilərinə aid deyil. Ekspert vurğulayıb ki, bu, açıq-aşkar Türkiyəyə ərazi iddiasıdır:
"Gerbdəki “tarixi erməni krallıqlarının” əraziləri isə həm Türkiyə, həm də Azərbaycan torpaqlarını əhatə edir. Yəni Ermənistan konstitusiyasında və dövlət gerbində Türkiyə və Azərbaycana qarşı ərazi iddiası var. Erməni rəsmilərin Azərbaycan və Türkiyənin təzyiqini qabardaraq dövlət atributlarını, konstitusiyanı dəyişmək istəməsinin pərdə arxasında tamam fərqli məqsədlər var. Konstitusiya dəyişikliyi Paşinyana Türkiyə ilə münasibətləri normallaşdırıb sərhədlərin açılmasını təmin etmək, beləliklə də, Qərbə inteqrasiyanı sürətləndirmək üçün lazımdır. Bundan başqa, Nikol bununla həm də səlahiyyətlərini artıraraq ölkəsində bütün ipləri ələ almaq istəyir. Ermənistan xüsusilə dövlət atributlarını dəyişdirərək 1918-ci ildə qurulmuş Ermənistan Demokratik Respublikasından imtina etmək istəyir. Məsələ ondadır ki, Ermənsitanın bugünkü himni “Mer Hayrenik”(Ana vətənimiz) ilk himnləridir. Bəstəkarı Barseq Kanaçyan, sözləri isə Mikayel Nalbandyana aid olan himn 1918-ci ildə Ermənistan Demokratik Respublikasının himni kimi səsləndirilib. 1991-ci ildə yenicə müstəqil olan Ermənistanın himni qəbul edilib".
Analitik qeyd edib ki, Ermənistanın bugünkü gerbi və bayrağı da 1918-ci ildəki ilə eynidir:
"Ermənilər bunu qəbul etməsələr də, bir-iki kiçik dəyişiklik və rəng tonu fərqinin olduğu açıq-aşkar ortadadır. Ermənistanın 1918-ci ilə aid himn, gerb və bayrağı daşıması, dövlət atributu sayması həm də Demokratik Respublikanın varisi olduğunu göstərir. Lakin İrəvan anlayır ki, özünü Ermənistan Demokratik Respublikasının varisi və davamçısı sayaraq, sərhədlərin delimitasiya və demarkasiyasının 1970-1980-ci il xəritələri ilə müəyyən edilməsinə nail ola bilməyəcək. Buna görə də tədricən onlardan imtina edir".
“Ermənistanın Rusiya ilə Qərb arasında geosiyasi mübarizə poliqonuna çevrilməsi onun təhlükəsizliyini sual altına qoyacaq”.Bu sözləri politoloq Oqtay Qasımov “Cebhe.info”-ya açıqlamasında Ermənistan-Rusiya münasibətlərində hazırki vəziyyət barədə fikirlərini bölüşərkən bildirib.
O qeyd edib ki, yaxın dövrlərdə Emənistanın Kollektiv Təhlükəsizlik Müqavilə Təşkilatını (KTMT) tərk etməsi mümkün görünmür:
“Ermənistan nə qədər Qərbyönlü siyasət yürütsə də, İrəvanın tez bir zamanda Rusiyanın təsir dairəsindən çıxması mümkün olmayacaq. Bildiyimiz kimi, Rusiya ilə Ermənistan arasında bir çox istiqamətlərdə, xüsusilə hərbi-müdafiə və təhlükəsizlik sahələrində kifayət qədər sıx münasibətlər var. Ermənistan Azərbaycanla müharibəni bəhanə edərək Rusiyadan müəyyən qədər uzaqlaşmağa çalışıb.
Xüsusilə qeyd edim ki, keçən ilin sonlarında Baş nazir Nikol Paşinyan və ölkənin digər rəsmiləri KTMT-nin tədbirlərində iştirak etməkdən boyun qaçırıblar. Hətta onlar KTMT-yə qarşı ittiham səsləndirirdilər. Amma İrəvanın addımları heç bir nəticə verməyib. Yaxın zamanda da Ermənistanın bu istəkləri reallaşmayacaq. Həmin dövrdə İrəvanda hesab edirdilər ki, Rusiya Ukraynada məğlub olacaq və ondan sonra isə öz niyyətlərini həyata keçirə biləcəklər. Ancaq görürük ki, hazırda Rusiya Ukraynada müəyyən qədər təşəbbüsü ələ alıb. Bu baxımdan Rusiyanın Ukraynada məğlubiyyətindən danışmaq hələ tezdir. Ermənistan bu nüansları nəzərə almağa məcbur olub.
Eyni zamanda, Ermənistan Qərbdən umduğu real dəstəyi hələ ala bilməyib. Sözsüz ki, söhbət əsasən hərbi-müdafiə sahəsində əməkdaşlıqdan gedir. Doğrudur, Fransa müəyyən qədər Ermənistana hərbi texnika göndərib. Lakin Ermənistanın təlabatını qarşılayacaq səviyyədə deyil. Buna görə də Ermənistanın yaxın zamanda KTMT-ni bu və ya digər şəkildə tərk etməsi real görünmür”.
Politoloqun sözlərinə görə, Ermənistan Rusiya ilə Qərb arasında geosiyasi mübarizə poliqonuna çevrilməyə doğru gedir.
“Artıq bu proses başlayıb. Rusiyanın Ermənistanda iki hərbi bazasının mövcudluğunu, o cümlədən Ermənistanın Rusiyadan iqtisadi, enerji və strateji cəhətdən tam şəkildə asılılığını nəzərə alsaq, Moskvanın bu ölkədə xeyli təsir imkanlarının olduğunu görərik. Son bir neçə ildə Ermənistanın Qərblə münasibətləri inkişaf etdirməyə çalışması, xüsusilə Aİ-nın müşahidə missiyasını bölgəyə gətirməsi və onların sayını atırması, habelə keçən ilin sonunda Ermənistan ordusunun ABŞ və Fransa hərbçiləri ilə birlikdə təlimlərdə iştirak etməsi – bütün bunlar onu göstərir ki, Ermənistanda Rusiya ilə Qərb arasında geosiyasi rəqabət çoxdan başlayıb.
Onu da qeyd edim ki, Fransa Ermənistanın Zəngəzur bölgəsində konsulluq açmaq istəyir. Fransanın həqiqətən Ermənistan siyasətinə təsir etmək imkanları var. Fransa Ermənistan ordusunu silahlandırmaq üçün müxtəlif vasitələrdən istifadə edir. Bundan başqa, bir neçə ay bundan öncə həm Aİ-də, həm ABŞ-də, həm də Fransada Qarabağda rus sülhməramlıların Qərb qüvvələri ilə əvəzlənməsi ilə bağlı məsələ qaldırılmışdı. Amma bunun heç bir nəticəsi olmayacaq. Demək olar ki, Rusiya ilə Qərb arasında Cənubi Qafqaz üzərində geosiyasi rəqabət başlayıb. Bu rəqabətdə Ermənistan əsas plasdarm rolunu oynayır. Bu isə Ermənistanın təhlükəsizliyini sual altına qoyacaq”.
Azərbaycanda Ermənistanın dağ-mədən xəritəsi hazırlanır.
APA xəbər verir ki, bunu jurnalistlərə açıqlamasında Azərbaycan Kartoqraflar İctimai Birliyinin sədri Müqabil Bayramov deyib.
O bildirib ki, xəritənin 40%-i hazırdır: “Xəritə iki formatda hazırlanır. Bu xəritələr vasitəsilə bilmək olacaq ki, Ermənistanın harada faydalı qazıntıları var. Xəritə Ermənistanın Azərbaycanla sərhədində olan dağ-mədən sənayesinin yerləşdiyi yerləri deyil, bütün Ermənistanı ərazisini əhatə edəcək. Eyni zamanda, xəritədə ekoloji məlumatlar da yerləşdiriləcək. Hansı çaylar hansı maddələrlə çirkləndirilir və hara axıdılır. Xəritənin təqdimatı dörd aydan sonra planlaşdırılır. Xəritə Azərbaycan, ingilis və erməni dillərində olacaq”.
Müqabil Bayramov qeyd edib ki, xəritə Azərbaycan toponimləri ilə əsasında hazırlanacaq.
“Biz bu xəritələri ölkəmizdə keçiriləcək COP29 tədbirinin iştirakçılarına paylamağı da düşünürük”, - o əlavə edib.
Vətən müharibəsindən sonra 480 km-a qədər təmas xətti boyu 2 km dərinliyində ərazilər, o cümlədən Buzluq yüksəkliyindən Laçın dağınadək 100 km-ə yaxın ərazi Ermənistan silahlı qüvvələrinin hərbi qulluqçuları tərəfindən minalanıb.
Bu barədə Müdafiə Nazirliyindən bildirilib.
Qeyd olunub ki, Qarabağ iqtisadi rayonunda minalar asasan yaşayış məntəqələrinə və qəbiristanlıqlara yaxınlaşma istiqamətlərində, Xocalı və Şuşa ətrafında meşəlik ərazilərdə, eləcə da magistral yolların üzərində basdırılıb.
Xəbər verdiyimiz kimi, Azərbaycan Respublikasının Prezidenti İlham Əliyev "X" sosial şəbəkəsində Gənclər Günü münasibətilə təbrik ünvanlayıb.
Prezident paylaşımda Zəngilan rayonu Ağalı kənd tam orta məktəbinin gənc müəllimləri ilə çəkilmiş fotodan istifadə edib.
Qeyd edək ki, sözügedən məktəb rayon işğaldan azad edildikdən qısa müddət sonra tikilib istifadəyə verilib.
©Bizim.Media
Azərbaycan Respublikasının Birinci vitse-prezidenti Mehriban Əliyeva sosial şəbəkə hesablarında 2 fevral Azərbaycan Gəncləri Günü ilə bağlı paylaşım edib.
"Paylaşımda qeyd olunub:
"Hər bir Azərbaycan gəncinə möhkəm cansağlığı, tükənməz enerji, firavanlıq, bütün təşəbbüslərində uğurlar diləyirəm!".