 |
|
Yol-xeber.az" xəbər verir ki, 19-20 sentyabr 2024-cü il tarixində Bakıda keçirilən “Avrasiya Nəqliyyat Marşrutu” Beynəlxalq Assosiasiyasının qurulmasına dair dəmiryol administrasiyaları rəhbərlərinin məşvərət toplantısı çərçivəsində “Azərbaycan Dəmir Yolları” QSC-nin sədri Rövşən Rüstəmov “Özbəkistan Dəmir Yolları” SC-nin İdarə Heyətinin sədri Zufar Narzullayevlə görüşüb.
Görüşdə Azərbaycan və Özbəkistan arasında nəqliyyat sahəsində əməkdaşlığın əsas istiqamətləri, hər iki tərəfi maraqlandıran digər mühüm məsələlər müzakirə edilib. Həmçinin bu ilin iyun ayında iki ölkənin dəmiryol administrasiyaları arasında imzalanmış Anlaşma Memorandumu çərçivəsində müştərək səylərin gücləndirilməsinin vacibliyi vurğulanıb.
Bununla yanaşı, görüşdə iki ölkə arasında Orta Dəhlizin inkişafı üzrə birgə fəaliyyətin şaxələndirilməsi barədə ətraflı fikir mübadiləsi aparılıb. Özbəkistan–Qırğızıstan–Çin yeni dəmir yolu layihəsinin icrası ilə Özbəkistan tərəfinin Avrasiya Nəqliyyat Marşrutunun inkişafına mühüm töhfə verəcəyi qeyd olunub.
Azərbaycan Respublikasının Prezidenti İlham Əliyev və oğlu Heydər Əliyev sentyabrın 19-da Ağdam rayonunun Kəngərli kəndində aparılan bərpa işləri ilə tanış olublar.
Yol-xeber.az-ın xəbərinə görə, bu barədə Prezidentin Mətbuat Xidməti məlumat yayıb.
Azərbaycan Respublikasının Prezidenti İlham Əliyev və oğlu Heydər Əliyev sentyabrın 19-da Ağdam rayonunun Eyvazxanbəyli kəndinin təməlqoyma mərasimində iştirak ediblər.
Yol-xeber.az-ın xəbərinə görə, bu barədə Prezidentin Mətbuat Xidməti məlumat yayıb.
Müdafiə nazirinin birinci müavini - Azərbaycan Ordusunun Baş Qərargah rəisi general-polkovnik Kərim Vəliyevin rəhbərlik etdiyi nümayəndə heyətinin İtaliya Respublikasına rəsmi səfəri başlayıb.
Bu barədə Müdafiə Nazirliyindən məlumat verilib.
Bildirilib ki, səfər çərçivəsində Azərbaycan Ordusunun Baş Qərargah rəisi İtaliyanın hərbi rəhbərliyi ilə bir sıra görüşlər keçirəcək və müdafiə sənayesi şirkətini ziyarət edəcək.
Azərbaycanda Dövlət Suverenliyi Günü təsis edilib.
Bununla bağlı Prezident İlham Əliyev Sərəncam imzalayıb.
Sərəncama əsasən, hər il sentyabrın 20-si Azərbaycanda Dövlət Suverenliyi Günü kimi qeyd ediləcək.
Eyni zamanda Sərəncamda bildirilir ki, Ermənistan Respublikası 1990-cı illərin əvvəllərindən başlayaraq Birləşmiş Millətlər Təşkilatının Nizamnaməsinin tələblərini kobud şəkildə pozaraq Azərbaycana qarşı işğalçılıq siyasəti həyata keçirmiş və hərbi gücdən istifadə edərək ölkəmizin beynəlxalq səviyyədə tanınmış ərazisinin 20 faizini işğal etmişdir. Ermənistanda və işğal olunmuş Azərbaycan torpaqlarında azərbaycanlılara qarşı etnik təmizləmə aparılmış, insanlıq əleyhinə cinayətlər və hərbi cinayətlər nəticəsində şəhər və kəndlərimiz viran edilmiş, ölkəmizin təbii resursları talan olunmuş, dövrümüzün ən dəhşətli faciələrindən olan Xocalı soyqırımı törədilmişdir.
Ermənistanın yeni işğalçılıq planlarına, növbəti hərbi təcavüz cəhdinə və ardıcıl təxribatlarına cavab olaraq 2020-ci il sentyabrın 27-də başlamış 44 günlük Vətən müharibəsi nəticəsində Azərbaycan Silahlı Qüvvələri Ermənistan ordusunu darmadağın etmiş və tarixi Zəfər qazanmışdır. Azərbaycan öz torpaqlarını 30 illik işğaldan azad edərək ərazi bütövlüyünün bərpasına və BMT Təhlükəsizlik Şurasının qətnamələrinin yerinə yetirilməsinə nail olmuşdur.
2023-cü il sentyabrın 19-da Azərbaycanın Qarabağ iqtisadi rayonunda törədilən genişmiqyaslı təxribatların qarşısının alınması və Ermənistan silahlı qüvvələrinin qalıqlarının tərksilah edilərək torpaqlarımızdan çıxarılması, həmin ərazilərdə Azərbaycan Respublikası konstitusiya quruluşunun bərpa edilməsi məqsədilə antiterror əməliyyatına başlanmışdır. Cəmi 23 saat davam etmiş və sentyabrın 20-də başa çatmış əməliyyat nəticəsində rəşadətli Azərbaycan Ordusu qarşısına qoyulmuş bütün vəzifələri yüksək peşəkarlıqla yerinə yetirmişdir. Beləliklə, növbəti parlaq Qələbə nəticəsində Azərbaycan Respublikasının suverenliyi tam bərpa edilmişdir. Azərbaycan xalqının həyatında müstəsna əhəmiyyət kəsb edən şanlı Zəfər sayəsində bu gün Azərbaycan Respublikasının Dövlət Bayrağı suverenliyimizin bərqərar olduğu bütün ərazilərdə əzəmətlə dalğalanmaqdadır.
Hər bir xalq üçün öz taleyinə sahib olmaq, müstəqil dövlətini yaradaraq inkişaf etdirmək onun ən böyük nailiyyətidir. Tarixin müxtəlif mərhələlərində üzləşdiyi çətinliklərə, işğala, məhrumiyyətlərə baxmayaraq, heç bir qüvvə xalqımızın müstəqillik, dövlətçilik əzmini sarsıda bilməmişdir. Azərbaycan xalqı bu gün öz müstəqil dövlətinə sahibdir, qəhrəman əsgər və zabitlərimizin, şəhidlərimizin qanı hesabına əldə edilmiş ərazi bütövlüyümüz, suverenliyimiz xalqımızın milli sərvətidir.
Azərbaycan Ordusunun Qarabağda keçirdiyi lokal xarakterli antiterror tədbirlərindən bir il ötür.
Lokal xarakterli antiterror tədbirlərindən bir neçə ay əvvəl Azərbaycanın Qarabağ bölgəsindəki Ermənistan silahlı qüvvələrinin birləşmələri tərəfindən Azərbaycan Ordusunun mövqelərinin müxtəlif çaplı silahlardan sistemli şəkildə atəşə tutulması, ərazilərimizin minalanmasının davam etdirilməsi, döyüş mövqelərinin mühəndis cəhətdən təkmilləşdirilməsi, eləcə də səngər və sığınacaqların sayının artırılması gərginliyin artmasına səbəb olub.
Bu xüsusda, döyüş mövqelərinin şəxsi heyət, zirehli texnika, artilleriya qurğuları və digər atəş vasitələri ilə gücləndirilməsi, bölmələrin yüksək döyüşə hazırolma səviyyəsinə gətirilməsi, səfərbərlik üzrə əlavə bölmələrin yaradılması, Azərbaycan Ordusunun bölmələrinə qarşı kəşfiyyat fəaliyyətlərinin genişləndirilməsi, mövqelərimizin dərinliyinə sızaraq minalardan təmizlənmiş ərazilərin və mülki təyinatlı yolların terror-təxribat məqsədilə yenidən minalanması kimi əməllər aparılan müşahidələrlə təsbit edilib.
Sentyabrın 19-da Ermənistan silahlı qüvvələrinin Azərbaycanın Qarabağ bölgəsindəki birləşmələrinin kəşfiyyat-diversiya qrupları tərəfindən Əhmədbəyli-Füzuli-Şuşa avtomobil yolunda terror məqsədilə əvvəlcədən quraşdırılmış minanın partlaması nəticəsində Azərbaycan Avtomobil Yolları Dövlət Agentliyinə məxsus nəqliyyat vasitəsi sıradan çıxmış və mülki şəxslər həlak olub. Həmin gün Daxili İşlər Nazirliyinin Daxili Qoşunlarının hərbi qulluqçularını daşıyan nəqliyyat vasitəsinin də Ermənistan silahlı qüvvələrinin kəşfiyyat-diversiya qrupları tərəfindən quraşdırılmış minaya düşməsi nəticəsində hərbi qulluqçularımız həlak olub və yaralanıb.
Azərbaycan Respublikası Müdafiə Nazirliyi dəfələrlə bəyan edirdi ki, 10 noyabr 2020-ci ildə imzalanmış üçtərəfli bəyanatın müddəalarına zidd olaraq Azərbaycanın Qarabağ bölgəsindəki Ermənistan silahlı qüvvələrinin birləşmələrinin mövcudluğunu davam etdirməsi regional sülh və sabitlik üçün ciddi təhlükə mənbəyidir.
Üçtərəfli bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycan Respublikasının konstitusiya quruluşunun bərpa edilməsi məqsədilə sentyabrın 19-da bölgədə lokal xarakterli antiterror tədbirlərinə başlanılıb.
Tədbirlər çərçivəsində Ermənistan silahlı qüvvələrinin birləşmələrinin ön xətt və dərinlikdə olan mövqeləri və uzunmüddətli atəş nöqtələri, eləcə də döyüş vasitələri və hərbi təyinatlı obyektləri yüksək dəqiqlikli silahların tətbiqi ilə sıradan çıxarılıb.
Azərbaycanın Qarabağ bölgəsində keçirilən lokal xarakterli antiterror tədbirləri zamanı mülki əhali və mülki infrastruktur obyektləri hədəfə alınmayıb.
Silah-sursatı tükənən Ermənistan silahlı qüvvələri birləşmələrinin hərbi qulluqçuları pərakəndə şəkildə təşviş içində döyüş mövqelərini tərk ediblər.
2023-cü il sentyabrın 20-də saat 13:00-da aşağıdakı şərtlər altında lokal xarakterli antiterror tədbirlərinin dayandırılması barədə razılıq əldə olunub:
1. Azərbaycan Respublikasının Qarabağ bölgəsində yerləşən Ermənistan silahlı qüvvələrinin birləşmələri, qeyri-qanuni erməni silahlı dəstələri silahı yerə qoyur, döyüş mövqelərindən və hərbi postlardan çıxır və tam şəkildə tərksilah olunurlar. Ermənistan silahlı qüvvələrinin birləşmələri Azərbaycan ərazilərini tərk edir, qeyri-qanuni erməni silahlı dəstələri buraxılır.
2. Paralel şəkildə bütün silah-sursat və ağır texnika təhvil verilir.
3. Yuxarıda qeyd olunan proseslərin Rusiya sülhməramlı kontingenti ilə əlaqələndirilmiş şəkildə həyata keçirilməsi təmin edilir.
Sentyabrın 20-də Azərbaycan Respublikasının Prezidenti İlham Əliyev xalqa müraciət edib.
Prezident İlham Əliyevin xalqa müraciətində bəyan edib ki, 19 sentyabr 2023-cü il tarixində təxminən saat 13:00 radələrində antiterror tədbirlərinin başlanması və uğurla başa çatması nəticəsində Azərbaycan öz suverenliyini bərpa edib.
“Qeyd etməliyəm ki, antiterror tədbirləri nəticəsində bizim hərbçilərimiz böyük qəhrəmanlıq, şücaət, peşəkarlıq göstərmişlər. Ağır relyef şəraitində, düşmən tərəfindən uzun illər böyük mühəndislik işləri nəticəsində istehkamların mövcudluğu şəraitində, düşmən mövqelərinin təpələrdə, əlverişli yerlərdə yerləşdirilməsinə baxmayaraq, bizim hərbçilərimiz bir daha qeyd etdiyim kimi, qəhrəmanlıq, peşəkarlıq göstərmişlər və qısa müddət ərzində bütün istiqamətlər üzrə əhəmiyyətli dərəcədə hərbi uğurlar əldə etmişlər. Ermənistan dövlətinin Azərbaycan ərazisində qanunsuz yerləşdirilmiş və Ermənistan dövlətinin öhdəliyinə baxmayaraq, bu günə qədər çıxarılmamış ordunun böyük hissəsi tamamilə məhv edilmişdir. Hərbi texnika məhv edilmişdir və sıradan çıxarılmışdır.
Əməliyyat başlamazdan əvvəl mənim tərəfimdən bütün hərbi birləşmələrimizə bir daha ciddi tapşırıq verilmişdir ki, aparılan antiterror tədbirləri nəticəsində Qarabağ bölgəsində yaşayan erməni əhalisi zərbə altına düşməməlidir və mülki əhali qorunmalıdır. Biz həm yüksək dəqiqliyə malik silahlardan istifadə edərək buna nail olduq, eyni zamanda, Silahlı Qüvvələrimizin peşəkarlığı nəticəsində mülki vətəndaşlar tamamilə özlərini sığortalanmış vəziyyətdə hiss etmişlər. Eyni zamanda, göstəriş verilmişdir ki, mülki infrastruktura da heç bir zərbə dəyməməlidir, ancaq hərbi infrastruktur sıradan çıxarılmalıdır. Bir daha demək istəyirəm ki, ordumuzun, bütün Silahlı Qüvvələrimizin peşəkarlığı, texniki imkanları bizə bu vəzifəni şərəflə yerinə yetirməyə şərait yaratmışdır və bir daha Azərbaycan əsgəri, zabiti həm yüksək peşəkarlıq, həm də yüksək mənəvi keyfiyyətlər göstərmişdir.
Bir daha qeyd etmək istəyirəm ki, aparılmış qısamüddətli lokal xarakterli antiterror tədbirləri nəticəsində, düşmənin silah və texnikalarının böyük hissəsi sıradan çıxarılmışdır”, - Azərbaycan Prezidenti çıxışında qeyd edib.
Təəssüf ki, antiterror tədbirləri zamanı şəhidlərimiz olub. Lokal antiterror tədbirləri zamanı Azərbaycan Ordusunun 192 hərbçisi şəhid olub.
Azərbaycanın Qarabağ bölgəsində əraziyə baxış zamanı içərisində xeyli sayda müxtəlif təyinatlı mina və kustar üsullarla hazırlanmış əldəqayırma partlayıcı qurğularla dolu anbarlar Ordumuzun mühəndis-istehkam bölmələri tərəfindən aşkar edilib. Aşkar edilmiş anbarlarda mövcud minaların bir qisminin 2021-ci ildə Ermənistanda istehsal olunduğu, əldəqayırma partlayıcı qurğuların isə artilleriya mərmilərindən kustar üsullarla hazırlandığı müəyyən edilib.
Azərbaycanın Qarabağ bölgəsində keçirilən lokal xarakterli antiterror tədbirləri başa çatdıqdan sonra müsadirə edilmiş döyüş texnikası, silah və sursat barədə oktyabrın 2-si saat 18:00-a olan məlumata görə, atıcı silahlar (2608), qumbaraatanlar (235), top və haubitsalar (60), minaatanlar (64), tank əleyhinə silahlar (58), HHM silahları (165), zirehli texnika (31), avtomobil texnikası (265) qoşqular (23), yardımçı texnika (9), raketlər (1700), top və haubitsa mərmiləri (5177) zenit top mərmiləri (31771), minaatan mərmiləri (12806), qumbaralar (5880), əl qumbaraları (3068), patronlar (2009970) digər sursatlar (5778), optik cihazlar (314), digər cihazlar (38), fərdi təchizat vasitələri (1027), müxtəlif silahların qurğuları (15) və digər təchizat vasitələri (3323) aşkarlanıb.
2023-cü il sentyabrın 28-də Azərbaycanın Qarabağ bölgəsindəki qondarma qurum özünü buraxdığını elan edib. Bu barədə qondarma quruma rəhbərlik etmiş Samvel Şahramanyan qərar verib. Qərara əsasən, qondarma rejimin bütün qurumları və təşkilatları 2024-cü il yanvarın 1-dən fəaliyyətini tam dayandırır. Bununla da "Dağlıq Qarabağ respublikası" öz mövcudluğuna son verib.
Bundan başqa Azərbaycanın hüquq-mühafizə orqanları Qarabağda qondarma qurumun “prezidentləri” olmuş Arkadi Qukasyan, Bako Saakyan, Araik Arutyunyan, sabiq "xarici işlər naziri" David Babayan, eləcə də “parlament sədri” David İşxanyan, generallar Lyova Mnatsakanyan, David Manukyan və keçmiş “dövlət naziri” Ruben Vardanyanı həbs edərək Bakıya gətirib.
Eyni zamanada, Azərbaycan Respublikası Qarabağ bölgəsində yaşayan erməni sakinlərin reinteqrasiyası ilə bağlı əməli fəaliyyətə başlayıb.
Qeyd edilib ki, reinteqrasiya Azərbaycan Respublikasının ərazi bütövlüyü və suverenliyi çərçivəsində Azərbaycan Respublikasının Konstitusiyası, qanunları və beynəlxalq öhdəlikləri əsasında həyata keçirilir.
Etnik, dini və ya dil mənsubiyyətindən asılı olmayaraq, hər kəsin hüquq və azadlıqlarının bərabərliyinə, o cümlədən hər kəsin təhlükəsizliyinə təminat verilir.
Azərbaycan Respublikasının Prezidenti İlham Əliyev 2023-cü il oktyabrın 15-də Ağdərə şəhərində, Xocalı şəhərində, Xocalı rayonunun Əsgəran qəsəbəsində, Sərsəng su anbarının ərazisində və Xankəndi şəhərində Azərbaycan Respublikasının Dövlət Bayrağını ucaldıb.
Həmin tarixdə dövlət başçısı İlham Əliyev Xankəndidə çıxış edib. Prezident bildirib ki, bu gün tarixi bir gündür.
“Ordumuzun gücləndirilməsi işində yorulmadan çalışdıq. Elə bir güclü ordu yaratdıq ki, bu gün Azərbaycan Silahlı Qüvvələri istənilən vəzifəni şərəflə yerinə yetirə bilər və biz bunu döyüş meydanında sübut etdik, həm üç il bundan əvvəl Vətən müharibəsi dövründə cəmi 44 gün ərzində düşməni kapitulyasiya aktına imza atmağa məcbur etdik, eyni zamanda, keçən ay cəmi 23 saat davam edən antiterror əməliyyatı bizim gücümüzü göstərdi və yenə də düşmən ağ bayraq qaldıraraq təslim oldu. Biz haqlı olaraq Silahlı Qüvvələrimizlə fəxr edirik”, - Azərbaycan Prezidenti vurğulayıb.
Onu da qeyd edək ki, 2023-cü il noyabrın 8-də Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi parad keçirilib. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev, birinci xanım Mehriban Əliyeva və oğulları Heydər Əliyev paradda iştirak ediblər.
Antiterror tədbirlərinin məntiqi nəticəsi olaraq Türkiyə Respublikası ilə Rusiya Federasiyası arasında imzalanan Memoranduma əsasən, Qarabağ bölgəsində atəşkəs rejiminə nəzarət etmək və qanun pozuntularının qarşısının alınması məqsədi ilə 2021-ci il yanvarın 30-da Azərbaycanın Ağdam şəhərində yaradılan 2024-cü il aprelin 26-dan etibarən Türkiyə-Rusiya Birgə Monitorinq Mərkəzi fəaliyyətini dayandırıb.
Rusiya Sülhməramlı Kontingenti isə Azərbaycanı tam tərk edib.
Prezident İlham Əliyevin ötən gün imzaladığı Sərəncama əsasən, 20 sentyabr – Xankəndi, Xocalı, Xocavənd və Ağdərə şəhərləri günü kimi qeyd olunacaq.
Politoloq Cümşüd Nuriyev Teleqraf.com-un suallarını cavablandırıb.Onunla müsahibəni təqdim edirik:
- ABŞ Dövlət katibi Entoni Blinken ötən gün Azərbaycan Prezidenti İlham Əliyevə zəng edib. Ağ evin Zəngəzur dəhlizi ilə yanaşı, sülh müstəvisində aparılan danışıqlara bu qədər maraq göstərməsi nə ilə bağlıdır?
- Əslində Amerikanın Azərbaycana və Ermənistana qarşı heç bir istəyi yoxdur. Ağ evin burada öz maraqları var. Bu ilin noyabrın 5-də ABŞ-da prezident seçkiləri keçiriləcək. Prezidentliyə “Respublikaçılar” partiyasının namizədi Donald Tramp bu ya digər formada “Demokratlar”ın namizədi olan Kamala Harrisi üstələyir. Trampa qarşı ikinci dəfə edilən sui-qəsdən sonra onun yenidən mövqeyi güclənib, siyasi çəkisi artıb. İndi də bir növ onu zərərsizləşdirməyə çalışırlar. Eyni zamanda Amerika bu məsələlərdə Rusiya və Çini də dövriyyədən çıxarmaq istəyir. Ağ ev bu istiqamətdə əsas işləri İranın əli ilə görür. İranın yeni prezidenti Məsud Pezeşkianın bu məsələlərə başqa cür yanaşacağı ehtimal edilsə də, bunun əksi baş verir.
- Pezeşkianın Azərbaycanla və bölgə ilə bağlı ziddiyyətli mövqe sərgiləməsinə səbəb nədir?
- İranda Pezeşkianın addım atmasına SEPAH imkan vermir. Demək olar ki, SEPAH onu saymır. İşləri, gücləri Azərbaycanı hədələməkdən ibarətdir. Azərbaycanın bölgədə və qlobal miqyasda güclənən mövqeyi Tehran rejimini narahat edir. Amerikanın bölgə ilə bağlı artan fəallığı da bununla bağlıdır. Vaşinqton öz əlaltılarını yenidən oyuna qoşur. Eyni zamanda SOROS-un əlaltıları da dirçəlir. Gürcüstandan Azərbaycana keçmək istəyirlər.
- Zəngəzur dəhlizi ilə bağlı Amerikanın əsas hədəfi nədən ibarətdir?
- Amerika bu bölgədə özünün iqtisadi maraqlarını güdür. Zəngəzur dəhlizinin açılması Çinin Avropa bazarına girişini təmin edəcək. Rusiya da bundan böyük fayda götürəcək. Kreml buradan ucuz xammal əldə edəcək. Çinin isə artan innovativ məhsullarının Avropaya çatdırılması daha da asanlaşacaq. Beləliklə, Çin məhsulları Avropa bazarlarına Zəngəzur dəhlizi ilə cəmi 8 günə çatdırılacaq.
- Ermənistan razılaşdırılmış məsələləri əhatə edəcək razılaşmaya imza atmağın mümkünlüyünü gündəmə gətirir. Azərbaycanın yarımçıq sülh sənədinə imza atması nə dərəcədə realdır?
- Burada söhbət çərçivə sülh sənədindən gedir. Çünkin ilkin razılaşma məhz bunu ehtiva edir. Ermənistanda referendum keçirilmədən də bunu etmək mümkündür. Erməni tərəfi də konstitusiya ilə bağlı əsassız idialarla çıxış edir. Azərbaycan Konstitusiyasında qeyd edilib ki, Azərbaycan Respublikası Azərbaycan Xalq Cumhuriyyətinin siyasi varisidir. Erməni tərəfi isə bunu başqa müstəviyə keçirmək istəyir. Burada siyasi varislik Azərbaycan adının davam etməsi ilə bağlıdır. Konstitusiyada Azərbaycanın Xalq Cumhuriyyəti dövründəki ərazi qeydi yoxdur. Ermənistan konstitusiyasında isə Azərbaycana və Türkiyəyə qarşı açıq şəkildə ərazi iddiaları yer alıb. Bunlar aradan qalxmayınca yekun sülh sənədinin imzalanması mümkün deyil.
Rəsmi İrəvan ya həm ABŞ və Qərbin, həm də Rusiyanın sərt təzyiqlərinə eyni vaxtda məruz qalmaq variantını seçməlidir... Ya da bu iki supergüc mərkəzindən yalnız hansısa birinin sarsıdıcı zərbələrini öz üzərinə çəkmək məcburiyyətilə barışmalıdır...
Cənubi Qafqazda dünya nəhənglərinin sərt qarşıdurması artıq real nəticələrini göstərməyə başlayıb. Belə ki, Ermənistan dünya nəhənglərinin qarşıdurmasının əsas poliqonuna çevrilib. Ən əsasısa, rəsmi İrəvanın bilərəkdən Ermənistanı geopolitik savaş poliqonuna çaevrilməsinə yönəlik siyasi kursu planlaşdırarkən apardığı hesablamalar artıq iflasa uğramaq üzrədir. Çünki indi məlum olur ki, rəsmi İrəvanın həm ABŞ və Qərb, həm də Rusiya ilə səhnəarxası əməkdaşlıqdan faydalanma niyyətləri hazırda Ermənistana qarşı bumeranq effekti verir. Və belə davam edərsə, Ermənistan yeni “geopolitik fəlakət zonası”na düşməkdən yayına bilməyəcək.
Onu da qeyd etmək lazımdır ki, rəsmi İrəvan Qərblə Rusiya arasında manevrlər edərkən, ilk növbədə hər iki qütbdən fərqli istiqamətlər üzrə faydalana biləcəyinə ümid bəsləyirdi. Yəni, Paşinyan hakimiyyəti Ermənistanın iqtisadi-ticari cəhətdən Rusiyadan tamamilə asılı olduğunu nəzərə alırdı. Ona görə də, olduqca önəmli iqtisadi-ticari güzəştlər aldığı Avrasiya İqtisadi İttifaqından və Rusiyanın xüsusi həssaslıqla yanaşdığı KTMT-dan çıxmağı qətiyyən düşünmürdü. Və rəsmi İrəvanın Ermənistanı Qərbə inteqrasiya etdirmək barədə bəyanatları ən yaxşı halda, manipulyasiya xarakteri daşıyırdı.
Eyni zamanda, Paşinyan hakimiyyəti bütün bunlara paralel olaraq, Qərblə strateji tərəfdaşlıq imitasiyaları ilə Ermənistana ABŞ, Avropa Birliyi və Fransanın həm siyasi, həm də hərbi-texniki dəstəyini təmin etməyi hədəfləyirdi. Üstəlik, rəsmi İrəvan Rusiya ilə siyasi qarşıdurma imitasiyasının Ermənistana Qərbin maliyyə kanallarını aça biləcəyini də öz məkrli hesablamalarına qatmışdı. Və baş tutmuş olsaydı, Ermənistan hər iki tərəfin paralel dəstəyindən maksimum səviyyədə faydalanmaq şansı qazana bilərdi.
Ancaq son vaxtlar baş verən hadisələr Cənubi Qafqazda geopolitik proseslərin Ermənistanın planlarına uyğun inkişaf etmədiyini göstərir. Belə ki, Paşinyan hakimiyyətinin “iki stul” taktikası ümidverici nəticələrdən çox-çox uzaqdır. Əksinə, rəsmi İrəvanın məhz bu “taktika” ilə Ermənistanı geopolitik kollapsa düçar etmək üzrə olduğu müşahidə edilməyə başlayıb. Və bu, o deməkdir ki, rəsmi İrəvanın kəskin qarşıdurma vəziyyətində olan Rusiya ilə Qərbdən eyni vaxtda faydalanmaq planları artıq iflasa uğramaq üzrədir.
Məsələ ondadır ki, həm Rusiya, həm də ABŞ və Qərb Ermənistana rəsmi İrəvanın umduğu dəstəyi verir. Yəni, Ermənistan həm Rusiyadan, həm də buna paralel olaraq, Qərbdən istədiyi yardımları almağa nail olmaqdadır. Ancaq bu paralellik son vaxtlar Paşinyan hakimiyyətinin hesablamalarında kəskin ziddiyyətlər də yaratmağa başlayıb. Və indi bundan sonrakı mərhələ Ermənistan üçün faydalı dəstəyin sərt təzyiqlərlə əvəzlənməsinə də yol aça bilər.
Səbəblər isə olduqca sadədir. Belə ki, hazırda həm ABŞ və Qərb, həm də Rusiya Ermənistana verdiyi dəstəklərin əvəzini rəsmi İrəvandan tələb etmək qərarına gəliblər. Kremldə hesab edirlər ki, Rusiyanın for-postu olan Ermənistanda ABŞ və Qərbin yerləşmə imkanları qazanması yolverilməzdir. Ona görə də, Kreml Ermənistandan Qərbin dərhal bloklanmasını tələb edir. Paşinyan hakimiyyətinin Rusiyanın maraqları çərçivəsində xarici siyasət kursu qurmasında israrlı davranır. Və rəsmi İrəvan Kremlin bu istiqamətdə göstərdiyi sərt təzyiqlərə uzun müddət tab gətirmək şansına sahib deyil.
Digər tərəfdən, ABŞ və Qərb də rəsmi İrəvandan Rusiyanı Ermənistandan çıxartmağı tələb edir. Qərbdə hesab edirlər ki, Ermənistana geniş dəstək paketləri təqdim olunduğu bir şəraitdə rəsmi İrəvanın səhnəarxasında Kremllə əməkdaşlığı davam etdirməsi yolverilməzdir. Hətta bəzi məlumatlara görə, Qərb siyasi dairələri bu məsələdə olduqca səbrsiz davranmaları ilə diqqəti çəkirlər. Və Paşinyan hakimiyyətindən dərhal Qərbin xeyrinə seçim edilməsini tələb edirlər.
Təbii ki, rəsmi İrəvan ABŞ və Qərbin də sərt təzyiqlərinə tab gətirmək şansına sahib deyil. Ona görə də, əvvəl-axır ya Rusiyanın, ya da ABŞ və Qərbin xeyrinə seçim etmək məcburiyyətində qala bilər. Halbuki, bu Ermənistan üçün əsl fəlakətin başlanğıcı anlamı daşıyardı. Çünki əgər, Qərbin xeyrinə seçim edilərsə, onda Rusiyanın Ermənistana qarşı iqtisadi-ticari zərbə mexanizmlərini işə salacağı qətiyyən şübhə doğurmur. Və Rusiyanın xeyrinə seçim isə Ermənistanı Qərbin həm siyasi, həm də hərbi-texniki dəstəyindən məhrum buraxa bilər.
Göründüyü kimi, rəsmi İrəvan əsl geopolitik labirintin içərisində qalmış kimi görünür. Üstəlik, bu labirintdən itkisiz çıxmaq şansı isə ümumiyyətlə, qeyri-real xarakter daşıyır. Hətta hesab etmək olar ki, Ermənistanın qarşısında həlli mümkün olmayan və dağıdıcı zərbələr vəd edən geopolitik problem mövcuddur. İndi rəsmi İrəvan hansı tərəfə çevrilsə, əks istiqamətdən sərt reaksiya ilə üzləşəcək. Yəni, Rusiya və Qərblə eyni vaxtda “geopolitik rəqs” bundan sonra mümkün olmayacaq. Onlardan hansındansa imtuna isə digərinin düşmənə çevrilməsinə yol açacaq.
Ona görə də, indi rəsmi İrəvan prinsipial seçim etməli olacaq. Yəni, rəsmi İrəvan ya həm ABŞ və Qərbin, həm də Rusiyanın sərt təzyiqlərinə eyni vaxtda məruz qalmaq variantını seçməlidir. Ya da onlardan yalnız hansısa birinin sarsıdıcı zərbələrini üzərinə çəkmək məcburiyyətilə barışmalıdır. Halbuki, nəhənglərin ortaq təzyiqlərinin, yoxsa onlardan yalnız birinin cəza zərbələrinin daha dağıdıcı olacağı da hazırda qeyri-müəyyən xarakter daşıyır. Və bu baxımdan, rəsmi İrəvanın “ortaq stuk siyasəti” artıq Ermənistan üçün taleyüklü mərhələni sürətlə yaxınlaşdırmağa başlayıb.(musavat.com)
Zəngəzur dəhlizi üzərindən Tehran-Moskva qarşıdurması İran Təhlükəsizlik Şurasının katibi Əli Əkbər Əhmədianın Rusiyaya səfəri ilə də həll edilmədi. Bu kontekstdə əsas diqqətçəkən məqam Şoyqunun “Rusiya Zəngəzur dəhlizi ilə bağlı İranla əvvəlki razılaşmalara sadiqdir” açıqlaması idi. Bu, İranın istədiyi “dəhliz layihəsinin gündəmdən çıxarılması” yox, Rusiyanın “dəhliz İranın regiondakı maraqlarına təhlükə yaratmır” mövqeyinin davam etdirilməsidir.Və Əhmədianın Moskva səfərindən sonra baş verənlər də İran rəsmisinin “əliboş” qayıtdığını deməyə əsas verir. Rusiya XİN-in sözçüsü Mariya Zaxarovanın “Moskva Zəngəzur dəhlizi ilə bağlı öz arqumentlərini təqdim edib və İranın bunu başa düşəcəyinə ümid edir” açıqlaması, kommunikasiyanın açılması üzrə Üçtərəfli İşçi Qrupunun Rusiyadan olan həmsədri Aleksey Overçukun İrəvana səfəri və verdiyi bəyanatlar da bu ehtimalı gücləndirir. İran isə “müharibə edəcəm” təhdidini davam etdirməkdədir, SEPAH-a bağlı informasiya resursları təbliğatı bu yöndə aparır. Son olaraq, İran Elmi Hövzələrin rəhbəri, İran Konstitusiyasının Keşikçilər Şurasının üzvü Ayətullah Əlirza Ərafi “Rusiyaya xəbərdarlıq edirik: Zəngəzur dəhlizinin mülkiyyət məsələsi bizim qırmızı xəttimizdir” açıqlamasını verdi.
Baş verənlər üç ana sualı ön plana çıxarır:
- İran niyə Zəngəzur dəhlizinə qarşıdır?
- İranın dəhlizə qarşı təbliğatı nədən ibarətdir və reallıqla nə qədər uzlaşır?
- Niyə indi məhz Rusiyanın üzərində fokuslanırlar?
İran Zəngəzur dəhlizi ilə bağlı narahatlığının təməl səbəblərini rəsmi şəkildə elan etmir. İranın özü üçün “təhlükə” kimi qəbul etdiyi bir neçə məqama toxunmaq olar:
- Qarabağın azad edilməsindən sonra İranın Cənubi Qafqaza giriş imkanları böyük ölçüdə məhdudlaşdı: Tehranda düşünürlər ki, Zəngəzur dəhlizi 10 noyabr bəyanatına uyğun açılarsa, Ermənistana, bütövlükdə bölgəyə girişi bloklanacaq;
- Zəngəzur dəhlizi reallaşması bu layihənin də bir hissəsi olduğu Orta dəhlizin perspektivini gücləndirəcək və bu, İranın Avrasiyanın nəqliyyat şəbəkəsindəki rolunu müəyyən qədər azalda, yaxud ona qarşı alternativləri önə çıxara bilər;
- İranın əsas hədəfi praktiki icrası nə qədər qeyri-mümkün görünsə də, Fars körfəzi-Qara dəniz marşrutunu reallaşdırmaqdır. Ki, Mehridən keçəcək dəhliz bu layihəni tamamilə rəfə qaldıra bilər;
- Və ən mühüm məqamlardan biri Zəngəzur dəhlizi ilə bölgədə Türkiyənin rolunun artması, Azərbaycanın güclənməsi Tehranda narahatlıq yaradır;
Hərçənd, rəsmi Bakı dəfələrlə Tehrana “bölgədəki maraqlarına təhlükə olmadığını” izah edib, regional əməkdaşlıq platformasını (3+3) irəli sürüb, hətta dəhlizin İran marşrutunun da açılmasına razılaşaraq, niyyətini praktiki müstəvidə nümayiş etdirib. Eyni izahı Moskva və Ankara da paylaşır. Tehran isə əməkdaşlıq imkanlarını dəyərləndirmir, əksinə, pozucu mövqeyindən əl çəkmir, halbuki, İran bu prosesdə “ofsaytda” qalan tərəfdir və müdaxilə imkanları məhduddur.
İranın Zəngəzur dəhlizinə qarşı kampaniyasının iki xətt üzrə aparıldığı müşahidə edilir.
1. Zəngəzur dəhlizi “NATO-Turan” dəhlizidir;
2. İran bu layihəyə qarşı “lazım olarsa, hərbi müdaxiləyə” əl atacaq, “ikinci cəbhədə döyüşmək gücündədir”, “İranın hərbi rəhbərliyi hərbi ssenari üzərindən düşünür” və s.
“NATO-Turan dəhlizi” İranda Azərbaycana qarşı çıxışları ilə tanınan ekspert Akef Kazemi tərəfindən ortaya atılıb, lakin bu iddianın müəlliflik hüquqları daha uzağa gedir. Hələ 80-ci illərdə Naxçıvanı Azərbaycana birləşdirəcək Mehri yolu layihəsi gündəmə gələndə erməni terrorçu Zori Balayan bunu “NATO-Turan dəhlizi” adlandırıb (bu fakt Cəmaləddin Quliyevə məxsusdur). Kazemi Balayanın iddiasını yenidən gündəmə gətirdi və İranın Zəngəzur dəhlizini “NATO və Turan”a bağlaması həm Rusiyaya, həm də dəhlizi “Bir kəmər bir yol” layihəsinin Orta dəhlizində birləşdirici keçid olaraq görən Çinə ünvanlanan təbliğatdır. Türkiyənin NATO üzvü olmasına və Turanın qurulması planına diqqət çəkməyə çalışır, “təhlükəni” Pekin və Moskvaya göstərirlər. Halbuki, dəhliz 10 noyabr razılaşmasına uyğun açılarsa, orada təhlükəsizliyi NATO ilə qlobal qarşıdurma yaşayan Rusiya qoruyacaq. Rusiya “NATO-Turan dəhlizi”ndə dayanacaq?! Yəni İranın təbliğatı gülüncdür. “Hərbi müdaxiləyə” əl atacaqları haqda dedikləri isə blefdir. İran da bunu anlayır, lakin bəlkə alınar düşüncəsi ilə “strateji çəkindirmə” taktikasını tətbiq edir.
Zəgəzur dəhlizinə görə adətən Azərbaycanı təhdid edən İranın indi Bakıya yox, Moskvaya xitab etməsinin iki səbəbi var.
Birincisi, Rusiya dəhliz layihəsinin reallaşması istiqamətində aktivləşib və proses Moskvanın planına uyğun davam edərsə, Bakı və Ankaranın mövqeləri güclənəcək, Tehranın bölgədə “ikinci dərəcəli” oyunçu mövqeyi sabitlənəcək;
İkicisi və ən əsas məqam Zəngəzur dəhlizində Rusiyanın iştirakına qarşı olan Qərbə “regionda sizin maraqları İran qoruyur” mesajını verməkdir: Ermənistanın sərhədlərini “qırmızı xətti” elan edəndə İranın hədəflərindən biri Qərbdən dəstək əldə etmək, yaxud ən azı sanksiyalar məsələsində qazanclı çıxmaq idi, buna görə Azərbaycanı hədəf olaraq seçmişdi; indi hədəfi daha böyükdür – Rusiya;
Qarabağdan çıxdıqdan sonra Zəngəzur dəhlizini əsas dayaq nöqtəsi olaraq görən Rusiyanın geri çəkilməyəcəyi bəllidir. İranın nə edəcəyi, dəhliz layihəsinə hansı formada qarşı çıxacağı maraqlıdır: “NATO-Turan dəhlizi” təbliğatı və “hərbi müdaxilə” blefinin işə yarayacağı ehtimalı zəifdir, bu baxımdan, İran nəticə əldə edə bilməsə də, yenidən Azərbaycanın üzərinə fokuslana bilər.
Asif Nərimanlı
Publika az
Sentyabrın 16-da ABŞ dövlət katibi Entoni Blinken Azərbaycan Prezidenti İlham Əliyevə zəng edib. Blinken Ermənistanla Azərbaycan arasında davamlı sülhün əldə olunmasının vacibliyini vurğulayaraq, Amerika Birləşmiş Ştatlarının bu məqsədə nail olunması üçün bundan sonra da səylərini əsirgəməyəcəyini bildirib. O, Ermənistanla Azərbaycan arasında sərhədlərin delimitasiyası sahəsində əldə edilmiş nailiyyətləri, o cümlədən dövlət sərhədinin delimitasiyası üzrə komissiyaların birgə fəaliyyəti haqqında Əsasnamənin müvafiq qaydada 2024-cü il avqustun 30-da imzalanmasını müsbət addım kimi qiymətləndirib. Regionda artıq sülhün mövcud olduğunu deyən dövlətimizin başçısı vurğulayıb ki, məhz Azərbaycanın səyləri nəticəsində bölgəmizdə ədalətə və beynəlxalq hüquqa əsaslanan yeni reallıqlar və status-kvo yaranıb. Prezident İlham Əliyev Ermənistanla Azərbaycan arasında sülh müqaviləsinin təşəbbüskarının da məhz ölkəmiz olduğunu qeyd edərək bu müqavilənin imzalanması üçün Ermənistanın öz konstitusiyası və digər qanunverici aktları əsasında Azərbaycana qarşı olan ərazi iddialarına soy qoymasının, həmçinin keçmişin qalığı olan ATƏT-in Minsk Qrupu və onunla bağlı olan bütün təsisatların fəaliyyətinə son qoyulmasının vacibliyini vurğulayıb. Sərhədlərin delimitasiyası məsələsinə toxunan Prezident İlham Əliyev ikitərəfli proses çərçivəsində əldə olunmuş müsbət nəticələri qeyd edib və əsasnamə əsasında bu prosesin aparılacağını bildirib.Telefon söhbəti zamanı COP29-un ölkəmizdə keçirilməsi məsələsinə toxunulub.
Blinken COP29-un uğurla keçirilməsi üçün ölkəsinin Azərbaycana dəstək göstərdiyini qeyd edərək Azərbaycan ilə ABŞ-ın COP komandalarının və heyətlərinin yaxından əməkdaşlıq etdiklərini vurğulayıb.
Bu əməkdaşlıqdan məmnunluğunu ifadə edən Prezident İlham Əliyev COP çərçivəsində iqlim maliyyələşdirilməsi ilə əlaqədar mühüm qərarların qəbul edilməsi ilə bağlı xüsusilə inkişaf etmiş dövlətlər tərəfindən konsensusun əldə ediləcəyinə ümidvar olduğunu deyib.
Telefon danışığı zamanı Azərbaycanla ABŞ arasında ikitərəfli münasibətlərə dair fikir mübadiləsi aparılıb.
Qeyd edək ki, bir neçə gün əvvəl ABŞ dövlət katibi Ermənistanın baş naziri ilə də sülh prosesini müzakirə etmişdi.
Prezidentin telefon söhbətində dediyi bir fikir xüsusilə müşahidəçilərin diqqətini cəlb edib. “Məhz Azərbaycanın səyləri nəticəsində bölgəmizdə ədalətə və beynəlxalq hüquqa əsaslanan yeni reallıqlar və status-kvo yaranıb”, - deyə Prezident bildirib.
ABŞ sülh prosesində maraqlı olduğunu dəfələrlə vurğulasa da, Ermənistana ən müxtəlif, həm də maddi kanallarla təsir imkanları olsa da, bu istiqamətdə addımları nəzərə çarpmır. Məsələn, İrəvana Minsk Qrupunun buraxılması məsələsində təsir edə bilər.
Ədalət Partiyasının sədr müavini Mütəllim Rəhimli “Yeni Müsavat”a bildirdi ki, dünyanın yenidən bölüşdürülməsi, nüfuz dairələri uğrunda açıq savaş gedir: “Bəzi regionlarda bu silahlı qarşıdurma, digərlərində isə informasiya müharibəsi səviyyəsində üzə çıxır. ABŞ Cənubi Qafqaza nəinki biganə yanaşır, burada baş verənlərə olduqca həssas reaksiya verir. Gürcüstanla münasibətlərdə yaşanan anlaşılmazlıq ABŞ-ı məcbur edir ki, özünün regional maraqlarını Ermənistan vasitəsilə reallaşdırsın. Ona görə də son vaxtlar Qərbin Ermənistana silah-sursat yardımları artır, birgə hərbi təlimlər keçirilir. Açıq şəkildə görünür ki, ABŞ Ermənistanı Qərbə tərəf çəkir. Son vaxtlar baş nazir Paşinyanın və komandasının Avropaya inteqrasiya ilə bağlı bəyanatları da təsadüfi sayıla bilməz. Görünür, ABŞ və Qərb ictimaiyyət üçün açıq olmayan danışıqlarda Ermənistana daha çox vədlər veriblər. İndi Ermənistan rəhbərliyinin BRİKS və digər birliklərə qoşulmaq barədə açıqlamaları ilə Rusiya ilə münasibətlərdə tarazlıq yaratmaq niyyətindədirlər. Bunlar bir yandan Rusiyanı qıcıqlandırmamaq şərtilə, digər tərəfdən Qərbə inteqrasiyanı ləngitmədən aparırlar. Ermənistan rəhbərliyi Qərblə əməkdaşlığa ölkənin sosial, iqtisadi və təhlükəsizlik problemlərinin həlli kimi yanaşırlar. Çox güman ki, həm də Azərbaycan və Gürcüstanı Qərbin maraqlarına zidd mövqe tutan, rusiyapərəst ölkələr kimi təqdim edərək, öz reytinqini qaldırır, lazımlılığını artırır”.
ABŞ-ın dövlət katibi Blinkenin Azərbaycan Prezidentinə zəngi prosesləri nəzarətdə saxlamağa xidmət edir: “Düşünürəm ki, bu zəng daha çox sülh müqaviləsinin Ermənistanın mənafelərinə uyğunluğu və ABŞ-ın maraqlarını qorumağa hesablanıb. Çünki müşahidələr göstərir ki, Ermənistan sülh müqaviləsinin hazırlanması ilə bağlı əvvəlki mövqeyini xeyli dəyişib. Artıq müəyyən şərtlər irəli sürür. Əgər Ermənistanı gizlində müdafiə edən olmasaydı, o reallığa bu qədər zidd mövqe sərgiləyə bilməzdi. Blinken sülh müqaviləsinin imzalanmasını Zəngəzur dəhlizinin açılmasından kənar təsəvvür etmir. Bu prosesdə isə yeganə hədəfi dəhlizə nəzarətin Qərbin əlində olmasıdır. Buna görə də Ermənistanın öz ərazisindəki bütün kommunikasiya və logistika sistemlərinə birbaşa nəzarəti məsələsini müdafiə edir”.
Ekspertin fikrincə, ABŞ düşünür ki, Rusiyanın regionda ayağını kəsmək üçün Azərbaycan böyük üstünlüyə malikdir. Ona görə ABŞ ölkəmizə qarşı təzyiq dilində danışır. Bir tərəfdən sülh prosesini dəstəklədiyini bildirir, digər tərəfdən bunun altında geosiyasi maraqlarını reallaşdırmaq üçün manevrlər edir: “Belə görünür ki, sülh müqaviləsindən danışmaq ABŞ-ın həqiqi maraqlarını pərdələmək üçün lazımdır. Məhz bütün bunlara görə Konqresdə sentyabrın 19-da Azərbaycana qarşı dinləmələr keçirilməsini planlaşdırır. Bu addım həm də Ermənistana siyasi dəstəkdir. Ona görə də Azərbaycan sülh müqaviləsinin hazırlanmasında milli maraqlarından geri çəkilməyəcək”.
“Atlas” Araşdırmalar Mərkəzinin rəhbəri Elxan Şahinoğlu isə bildirib ki, ABŞ dövlət katibinin Bakıya zəngi Vaşinqtonun Bakı ilə İrəvan arasında sülh sazişinin qısa müddətdə, yaxın aylarda imzalanması marağından irəli gəlir: “Blinken tərəflər arasında növbəti görüş təşkil etməyi planlaşdırır. Blinken Nyu-Yorkda işə başlayan Birləşmiş Millətlər Təşkilatının (BMT) Baş Assambleyasının sessiyasının növbəti günlərində Azərbaycan və Ermənistan xarici işlər nazirlərinin görüşünü təşkil etmək istəyir. Blinken oxşar görüşü ötən il də BMT sessiyası çərçivəsində təşkil etmişdi.
Vaşinqton Rusiya prezidenti Vladimir Putinin avqust ayında Azərbaycana səfərindən sonra Moskvanın Zəngəzur dəhlizinə artan marağından narahat olub. Vaşinqton da bu dəhlizi dəstəkləyir, sadəcə nəqliyyat yolunun Rusiyanın nəzarətində olmasını istəmir. Rusiya hərbçilərinin Zəngəzur dəhlizinə nəzarət etməsi Azərbaycanla Ermənistanın da maraqlarına cavab vermir. Bütün hallarda Vaşinqton qısa müddətdə Azərbaycanla Ermənistan arasında sülh sazişinin imzalanmasını istəyirsə, İrəvanı konstitusiyada zəruri dəyişiklik etməyə inandırmalıdır. Prezidentin telefon söhbətində dediyi “Azərbaycanın səyləri nəticəsində bölgəmizdə ədalətə və beynəlxalq hüquqa əsaslanan yeni reallıqlar və status-kvo yaranıb” fikri Bakının istənilən halda mövqeyinin daha üstün olması gerçəyidir. Vaşinqton da bu reallığı qəbul etməlidir".