 |
|
Azərbaycan açıq şəkildə genişmiqyaslı hücuma hazırlaşır. Ehtiyatda olan hərbçilərin səfərbər edilməsi, irimiqyaslı döyüş sursatı alınması, istehkamların və cəbhə yollarının çəkilməsi, qoşunların toplanması və irəliləməsi, döyüşçü ritorikası və təbliğatı aparılır.
Bunu erməni siyasi elmlər doktoru Armen Ayvazyan deyib.
Onun sözlərinə görə, qeyd etdikləri Ermənistan və Qarabağ ətrafında mövcud vəziyyətin əsas konturlarıdır.
“Qərb “blokada” ilə bağlı yanlış və dişsiz bəyanatlar verir. Rusiya Xarici İşlər Nazirliyinin sözçüsü Mariya Zaxarova şəffaf şəkildə eyham vurur ki, Azərbaycanın Rusiyanın müttəfiqi Ermənistana hücumu onu çox narahat etmir və onun tərəfdən heç bir əks-hücum almayacaq”, - Ayvazyan deyib.
Həmçinin bildirib ki, Ermənistanın hazırkı hakimiyyətinin ölkənin müdafiə qabiliyyətinin kəskin şəkildə artırılması istiqamətində nələr etdiyi isə heç də aydın deyil: “Komandirlərin bir qismi həbsdədir (general Yuri Xaçaturov, polkovnik Norayr Aslanyan), İrəvanda və rayonlarda konsertlərlə məşğuldurlar. Bölgələr də, media da hərzamankı kimi işləyir, sanki hər şey normaldır”.
Sosial şəbəkələrdə Azərbaycan Respublikasının Silahlı Qüvvələri ilə bağlı videomateriallar yaymaq ciddi hüquqi məsuliyyət yaradır.
"Bu barədə Dövlət Təhlükəsizliyi Xidmətinin Mətbuat xidmətinin yaydığı açıqlamada bildirilib.
Qeyd edilib ki, son günlər “Telegram” kanallarının Ermənistan xüsusi xidmət orqanları ilə əlaqəli olan seqmentində Azərbaycan Ordusunun hərbi birləşmələri, onların dislokasiyası, yerdəyişmələri, döyüş və səfərbərlik hazırlığı, silahları, hərbi texnikası ilə bağlı videokadrların çəkilib sosial şəbəkələr vasitəsilə yayılmasına təhrik edən çağırışlar yer almaqdadır:
"Dövlət Təhlükəsizliyi Xidməti tərəfindən bu kimi hallar nəzarətə götürülüb və analoji hərəkətləri etməyə təşəbbüs göstərən şəxslər barəsində zəruri tədbirlərin görülməsi təmin ediləcək.
Bildiririk ki, ölkəmizin milli təhlükəsizliyinə və müdafiə qabiliyyətinə ciddi ziyan vuran, Azərbaycan Respublikasının Silahlı Qüvvələrinə aid və dövlət sirri təşkil edən məlumatları özündə ehtiva edən videoçəkilişləri apararaq yaymaq qətiyyən yolverilməzdir və vətəndaşları belə əməlləri etməkdən çəkinməyə çağırırıq.
Eyni zamanda vurğulayırıq ki, qeyd olunan hüquqazidd hərəkətlərə qəsdən yol verilməsi dövlət sirrini yayma, bəzi hallarda isə dövlətə xəyanət cinayət əməllərinin törədilməsi şübhəsi üzrə araşdırma predmeti kimi çıxış edir və müvafiq hüquqi məsuliyyət tədbirlərinə səbəb olur".
Ermənistan hakimiyyəti Qarabağdakı qondarma rejimin keçmiş “tş” rəhbəri Samvel Babayanın simasında öz “əlaltıları” vasitəsilə fikir ayrılıqlarına səbəb olmağa və “hakimiyyət” dəyişikliyini puç etməyə çalışır.
Bu barədə Ermənistanın “Hraparak” qəzeti yazır.
Nəşr Babayanı Paşinyana yaxın adam kimi təqdim edir və Şahramanyanın “seçkisini” pozmaq, daha doğrusu, Qarabağda iğtişaşlar yaratmaq üçün hər şeyi edəcəyini qeyd edir.
Məqalədə bildirilir ki, onlar öz tərəfdarları ilə fəal görüşlər keçirir və “prezident seçkiləri” ərəfəsində, sentyabrın 8-də Xankəndidə etiraz aksiyaları keçirmək niyyətindədirlər.
“Nəhayət, Azərbaycan Paşinyanın Azərbaycanın ərazi bütövlüyünün tanınması ilə bağlı bəyanatına arxalanaraq, öz ərazisində iğtişaşların qarşısını ala və Artsaxa qoşun yeridə bilər”, - qəzet yazır.
Milli Məclisin vəzifəli şəxsi vəfat edib.
Milli Məclis Aparatının Vətəndaş Qəbulu və Müraciətlərlə İş Şöbəsinin baş məsləhətçisi Fuad Piriyev dünyasını dəyişib.
Onun hansı səbəbdən vəfat etdiyi qeyd olunmayıb.
Daxili İşlər Nazirliyinin Daxili Qoşunları Ali Hərbi Məktəbinin rəisi general-mayor İlqar Məmmədov vəzifədən azad edilib.
Qafqazinfo xəbər verir ki, bununla bağlı daxili işlər naziri general-polkovnik Vilayət Eyvazov müvafiq əmr imzalayıb.
İ.Məmmədovun yerinə hələlik təyinat yoxdur.
Qeyd edək ki, Prezidentin sərəncamı ilə 2014-cü ildə general-mayor rütbəsi verilən İ.Məmmədov elə həmin ildən Daxili Qoşunları Ali Hərbi Məktəbinin rəisi vəzifəsini tuturdu.
“Qarabağda yaşayan ermənilər dünyada hansı proseslərin getdiyini anlamır və buna adekvat addımlar ata bilmirlər. Odur ki, uğursuzluq sindromundan “bəhrələnməkdə” davam edəcəklər. Onlar indi status əldə etmək məqsədilə son çırpıntılarını edirlər. Düşünürlər ki, bəlkə nəsə əldə edə bilərlər. Amma nəticə olmayacaq. Necə ki, son 30 ildəki işğalçılıq, ərazi qəsbetmə, saxta dövlət qurmaq kimi siyasətlərinin nəticəsi sıfır oldu. Bir daha deyirəm ki, hazırda ermənilər dünyada gedən konyukturanın mahiyyətini tuta və prosesləri təhlil edə bilmirlər. Bu səbəbdən də belə vəziyyətə düşüblər və indi nəsə əldə etməyə çalışırlar”.
Bunu Reyting.az-a Azərbaycan Demokrat Partiyasının (ADP) sədri Sərdar Cəlaloğlu Xankəndi şəhərində baş verən son prosesləri şərh edərkən deyib.
S. Cəlaloğlu bildirib ki, bu gedişlə Qarabağ erməniləri hər hansı uğur əldə edə bilməyəcəklər: “Onlar bir müddət sonra konkret seçim qarşısında qalacaqlar: ya Azərbaycan vətəndaşlığını qəbul edib burada yaşamaq, ya da Qarabağdan Ermənistana köçmək. Mən hesab edirəm ki, Qarabağ ermənilərinin bir hissəsi köçüb gedəcək, bir hissəsi isə Azərbaycan vətəndaşlığını qəbul edərək normal yaşamağa başlayacaq. Çünki üçüncü yol yoxdur”.
S. Cəlaloğlu Ermənistan baş naziri N. Paşinyanın Qarabağla bağlı son hüquqa zidd davranışlarını şərh edərək deyib ki, Ermənistan lideri hazırda ikili oynayır:
“Əvvəla, Paşinyan bilir ki, onun mövqeyi əvvəlki dövrlə müqayisədə sarsılıb. Odur ki, Qarabağ erməniləri ilə bağlı reveranslar edir. Niyə? Çünki bilir ki, Moskva onu yıxmaq istəyir və bunu Qarabağdakı erməni faktorundan istifadə etməklə reallaşdırmağa çalışır. Odur ki, mümkün qədər Qarabağ kartı ilə oynamaq və bu platforma ilə hakimiyyətini qorumaq istəyir. Yəni Paşinyanın hazırda əsas məqsədi hakimiyyətini qorumaqdır. Bu məqsədlə Qarabağdakı ermənilərin saxta “müstəqillik günü”nü təbrik edir, gah onlara maliyyə yardımı ayırır, gah da statusla bağlı sərsəm açıqlamalar verir. Əsas məqsədi isə Qarabağ kartı ilə hakimiyyətinin “vurulmasının” qarşısını almaq, bu elektoratda mümkün qədər rəğbət qazanmaqdır”.
Partiya sədri faktiki olaraq, danışıqların aparılmadığını desə də, bir müddətdən sonra fəallığın olacağını ehtimal edir:
“Danışıqlar üçün mövzu lazımdır. Mövzu sülh sazişi, komunnikasiyaların açılmasıdır. Amma bu məsələ Ermənistana sərf etmir. Buna baxmayaraq, bir müddət sonra danışıqlar başlayacaq”.
S. Cəlaloğlu sonda əlavə edib ki, ağıllı erməni siyasətçiləri bilir ki, Qarabağda yaşayan ermənilər Azərbaycanın dövlət bayrağını qəbul etməlidirlər və əks halda orada yaşamaq mümkün olmayacaq.
Ermənistanın baş naziri Nikol Paşinyanın 2023-cü il sentyabrın 2-də qondarma “Dağlıq Qarabağın müstəqillik bəyannaməsi”nin ildönümü ilə əlaqədar “təbriki” Azərbaycana qarşı ərazi iddiasından vaz keçmədiklərinin təsdiqidir.Bu, əslində Paşinyanın Azərbaycanın ərazi bütövlüyünü tanıması barədə bəyanatının deklarativ olduğunun, həm də siyasi ikiüzlülüyünün göstəricisidir. Baş nazirin bu mövqeyi beynəlxalq hüququn norma və prinsiplərinə hörmətsizlik olmaqla yanaşı, bu ölkənin siyasi riyakarlığı göstərdi.
Baş nazir Paşinyanın separatçılığı açıq dəstəkləyən son bəyanatı onu göstərir ki, onun Azərbaycanın ərazi bütövlüyünü tanıması barədə bəyanatları, sadəcə, Ermənistanın hazırda apardığı irimiqyaslı silahlanma proqramını başa çatdırmaq və Azərbaycanın Qarabağ bölgəsində hərbi mövcudluğunu maksimum gücləndirmək üçün vaxt udmaq məqsədi daşıyırmış. Ermənistanda və Qarabağda erməni separatçılarının hələ də qaldığı ərazilərdə gedən proseslər bunu göstərir. Paşinyan son olaraq İtaliyanın “La Repubblica” qəzetinə müsahibəsində yenə də “ağızdolusu” sülh müqaviləsindən danışıb.
“Biz Praqada və Brüsseldə razılığa gəldik ki, Azərbaycan və Ermənistan bir-birinin ərazi bütövlüyünü tanıyaraq sülh müqaviləsi imzalamalıdır. Bəzi məsələlərdə irəliləyişlərimiz oldu, sonra ən çətin məsələlərdə fikir ayrılıqları meydana çıxdı. İrəvan və Bakının sülh sazişinə nə qədər yaxın olduğunu demək çətindir. Ermənistan sülh gündəliyini təbliğ edir. Sülh üçün nə lazımdırsa, etməyə çalışırıq” deyən Paşinyanın Azərbaycan ərazisindəki separatçılara “təbrik məktubu” onun sözləri ilə əməllərinin bir-birinə uyğun gəlmədiyini göstərdi. Ermənistanın baş naziri unutmamalıdır ki, təxminən 4 il əvvəl “Qarabağ Ermənistandır və nöqtə” bəyanatı onun ölkəsinə necə baha başa gəldi...
Bəs sülh müqaviləsi danışıqları bitdimi? Ermənistan lideri “valı” niyə dəyişdi?
Deputat Bəhruz Məhərrəmov ermənilərlə yenidən onların anladığı dildə danışmağa ehtiyacın olduğunu söylədi: “Paşinyanın Azərbaycan ərazisindəki separatçılara "təbrik məktubu", o cümlədən hökumətin iclasındakı son açıqlamaları göstərir ki, Azərbaycanla şərti sərhədlərdə və Qarabağda hərbi təxribatlarının arxasında Ermənistan dayanır. Cəmi 4 ay əvvəl Azərbaycanın ərazi bütövlüyünü rəqəmlərdə ifadə edərək, tanıdığını bəyan etməsinin ardınca indi Paşinyanın yenidən Qarabağa dair Vətən müharibəsinə qədərki ritorikasına qayıtması ərazi bütövlüyü məsələsində İrəvanın heç vaxt səmimi olmadığını, hayların riyakarcasına yenidən təcavüzkar niyyətlər üçün fürsət gözlədiyini göstərir.
Görünən odur ki, qalib Azərbaycanın ardıcıl sülh ritorikası, əməkdaşlıq çağırışları İrəvanda lazımınca qiymətləndirilmir, yaxud fərqli anlaşılır. Deməli, Ermənistanla yenidən onların anladığı dillə, “Dəmir yumruq”la danışmağa ehtiyac var. Xüsusən İrəvanda Köçəryan-Sərkisyan cütlüyünün, Qarabağda isə onların himayəsi altında Arkadi Qukasyan və Bako Saakyanın yenidən aktivləşməsi onu göstərir ki, ermənilər öz havadarlarının təşviqi ilə artıq revanş niyyətlərini reallaşdırmaq niyyətindədirlər. Aydındır ki, Azərbaycanın yaratdığı reallıqları dəyişməyə Ermənistanın gücü, imkanları və şansı yoxdur. Lakin çoxsaylı havadarlarının təşviqi fonunda Köçəryan-Sərkisyanın simasında Xocalı qatilləri situasiyadan hakimiyyətin zəbti üçün istifadə etmək istəyirlər. Paşinyan isə iqtidarını qorumaq üçün Azərbaycana münasibətdə radikal davranmalı olduğunun fərqindədir.
Təbii ki, Azərbaycanın bu prosesin gedişatına dözmək niyyəti yoxdur. Bəli, möhtərəm Prezidentin ifadə etdiyi kimi, biz qisasımızı 44 günlük savaşda almışıq, lakin İrəvanın start verdiyi ardıcıl təxribatları fonunda Bakı da BMT Nizamnaməsinin 51-ci maddəsini rəhbər tutaraq hərbi əməliyyatlarla təhlükəsizliyini təmin etmək hüququnu özündə saxlayır. Təbii ki, əgər bu təxribatlar əsgərimizin yaralanması ilə müşayiət olunursa, təhlükəsizliyimiz təhdid edilirsə, cəza tədbirləri kimdəsə sual doğurmamalıdır. Bu il iyunun 23-də Prezident İlham Əliyev Müdafiə Nazirliyinin komando hərbi hissələrindən birinə baş çəkərkən Ermənistanla şərti sərhəd boyunca bütün əlverişli mövqelərdə möhkəmləndiyimiz, yüksəkliklərdə olmağımızın bizə strateji üstünlük təmin etdiyi, Ordumuzu isə böyük dərəcədə gücləndirdiyimiz barədə hər kəsi xəbərdar etmişdi. Möhtərəm Prezidentin dediyi kimi, “Əgər bütün bu amilləri Ermənistan və onun arxasında dayanan xarici qohumları başa düşmürlərsə, onda günah onların boynundadır”.
Güman etmək olar ki, Ermənistan mümkün hakimiyyət dəyişikliyi ərəfəsindədir və İrəvan məhz siyasi mübarizə fonunda mövcud hərbi-siyasi təxribat ritorikasına əl atmaqdadır. Lakin Ermənistan da, havadarları da dərk etməlidir ki, Azərbaycanın İrəvanın subyektiv niyyətini araşdırmağa nə vaxtı, nə də həvəsi var. Heç bir əsas və səbəb Ermənistanın hərbi-siyasi təxribatlarına haqq qazandıra bilməz. Azərbaycana doğru açılan hər gülləyə görə İrəvan məsuliyyət daşıyır və cəzasını alacaq. İrəvanın ümid etdiyi havadarlarının dəstəyinə gəlincə, cənab İlham Əliyevin avqustun 26-da Laçında, Həkəri çayının sahilindən bəyan etdiyi kimi, “heç kim bizim iradəmizə təsir edə bilməz”.
BAXCP sədrinin müavini, politoloq Elçin Mirzəbəyli düşmən cəbhədə gedən prosesləri bir neçə amillə izah etdi: “Araik Arutyunyanın kölgəyə çəkilməsi çoxdan planlaşdırılırdı və buna hazırlıq gedirdi. Lakin onun kiminlə əvəzlənəcəyi, əsasən də Ermənistanda müzakirə mövzusu idi. Arutyunyanı, Birinci və İkinci Qarabağ müharibələrində fəal şəkildə iştirak etmiş, müharibə cinayətlərində əli olan şəxslərin əvəzləməsi Ermənistanın da, separatçıların da manevr imkanlarını azaldacaqdı, onları himayə edənlərin də həmçinin. Samvel Şahramanyanın üzərində dayanılmasının əsas səbəblərindən biri də sözügedən şəxsin həm Birinci Qarabağ müharibəsində, işğal prosesində iştirak etməməsi, həm də sərt xətt tərəfdarı olması ilə bağlıdır. Onun vasitəsilə İrəvanın 44 günlük müharibədən sonra ortaya atdığı "mövcudluq hüququ" strategiyası üzərindən hərəkət etmək daha əlverişli ola bilər. İndi Ermənistan və təlimatçıları “mövcudluq hüququ” strategiyasını Şahmaranyan və onun ətrafına topladıqları şəxslər üzərindən həyata keçirəcəklər. Şahmaranyanın aid olduğu qrupun, guya Araik Arutyunyan və Paşinyandan fərqli bir xətt tutduğu, onların iradəsinə zidd hərəkət etdiyi barədə təsəvvürlər tamamilə yanlışdır. Şahmaranyan və ətrafı, rəsmi İrəvanın əlində ehtiyat variantı kimi saxlanılırdı və onlara sülh prosesinə, əsasən də Qarabağda yaşayan ermənilərin Azərbaycan cəmiyyətinə reinteqrasiya olunmalarına maneə yaratmaq, bununla bağlı “ictimai müqaviməti təşkil etmək” həvalə olunmuşdu. Araik Arutyunyan tamamilə tükəndikdən və əsasən də xarici müdaxilələr nəticəsində sülh prosesi dalana dirəndikdən sonra açıq “sərt xətt” tərəfdarı kimi çıxış edən ehtiyat oyunçular “meydana buraxıldı”. Köçəryan və Sərkisyanın “dirilməsinə” gəldikdə isə bu adamlar müstəqil şəxslər deyillər və onların ənənəvi sahiblərinin göstərişi olmadan siyasi arenaya atılmaları inandırıcı deyil. Hər iki şəxsin yenidən görünmələrinin əsas səbəbi dəhşətli faciələrə, ağır müharibə cinayətlərinə səbəb olan separatçı hərəkatın ildönümü ilə bağlı idi. Hər iki şəxsin siyasi mövcudluğunu təşkil edən amil separatçı hərəkat olduğu üçün görünməyə bilməzdilər".
“Yeni Müsavat”
Ermənistanın Baş naziri Nikol Paşinyan yenidən Azərbaycana qarşı ərazi iddiaları və separatçılığa dəstəklə bağlı absurd bəyanatlar verib. Bu, sözsüz ki, Laçın sərhəd-buraxılış məntəqəsi ilə bağlıdır. Çünki əsas səbəb kimi Laçın sərhəd-keçid məntəqəsinin yaradılması önə çəkilir. Fakt odur ki, Laçında Azərbaycan tərəfindən sərhəd-buraxılış məntəqəsinin yaradılması prosesdə dinamikanı tamam dəyişib.
Bunu Teleqraf.com-a Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev deyib.
O qeyd edib ki, erməni tərəfinin blokada və humanitar vəziyyətlə bağlı qaldırdığı məsələlər mənasızdır:
“Görünən odur ki, Paşinyan konkret addım atmağa cəsarət etmir. Ona görə də, Ermənistan tərəfindən sülh sazişinə doğru heç bir hərəkətlilik müşahidə edilmir. Fakt odur ki, Paşinyanın bu ilin may ayında vermiş olduğu bəyanatından sonra prosesdə konkret mövqe sərgilənmədi”.
Mərkəz sədri bildirib ki, Ermənistan tərəfi yenidən Qarabağ məsələsini ortaya atır: “Ona görə də, prosesdə hər hansı bir proqres müşahidə etmək mümkün olmur. Bunun fonunda isə sülh istiqamətindəki proses ləngiyir. Belə olan halda onlar Ermənistan Azərbaycan tərəfindən edilən təzyiqi hiss edir. Ermənistan Azərbaycanın bu təzyiqini Qərbin təsiri ilə neytrallaşdırmağa çalışır. Təbii ki, ermənilərə yardım yox, Laçın yolu lazımdır. Çünki Laçın yolu onlar üçün “Miatsum” yolu idi”.
“Macarıstanla Azərbaycan arasında dostluq iqtisadi vəziyyətdən asılı deyil. Macarıstan Azərbaycanın təbii qaz mənbələri aşkarlanmazdan daha əvvəl bu ölkə ilə dostluq edib”.
“Haqqin.az” xəbər verir ki, bunu Macarıstanın XİN rəhbəri Peter Siyarto azərbaycanlı həmkarı Ceyhun Bayramovla birgə keçirilən mətbuat konfransında deyib.
“Yadımdadır ki, 2010-2011-ci illərdə Azərbaycanla münasibətlər qurmağa başladıqda Avropada bizə yuxarıdan aşağı baxırdılar. Buna görə də, indi Qərbi Avropa liderlərinin Bakıda Prezident İlham Əliyevlə şəkil çəkdirmək üçün bir-birilərini necə itələdiklərini görmək gülməlidir”, - deyə Siyarto qeyd edib.
Prezident İlham Əliyev Yeni Qubadlı ‒ Laçın avtomobil yolunun layihələndirilməsi və tikintisi ilə bağlı tədbirlər haqqında Sərəncam imzalayıb.
"Yol-xeber.az" xəbər verir ki, Sərəncamla Xudafərin ‒ Qubadlı ‒ Laçın avtomobil yolunun 33-cü km-dən başlayan yeni Qubadlı ‒ Laçın avtomobil yolunun layihələndirilməsi və tikintisinin həyata keçirilməsi məqsədilə Azərbaycan Respublikasının 2023-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Avtomobil Yolları Dövlət Agentliyinə 20 milyon manat ayrılıb.
Maliyyə Nazirliyinə bu Sərəncamda göstərilən məbləğdə maliyyələşməni təmin etmək, Nazirlər Kabinetinə bu Sərəncamdan irəli gələn məsələləri həll etmək tapşırılıb.