 |
|
Azərbaycan Respublikasının Prezidenti İlham Əliyev aprelin 4-də Bayıl tikinti-quraşdırma sahəsində “Azəri-Mərkəzi-Şərqi” platformasının üst modullarının dənizə rəmzi yola salınması mərasimində iştirak edib.
Bununla bağlı AZƏRTAC məlumat yayıb.
Cari ilin hazırlıq planına uyğun olaraq Azərbaycan Hərbi Hava Qüvvələrinin (HHQ) aviasiya vasitələri təlim-məşq uçuşlarını davam etdirir.
Bu barədə Müdafiə Nazirliyindən məlumat verilib.
Bildirilib ki, bazalanma aerodromlarından gecə uçuşları icra edən aviasiya vasitələrinin ekipajları ərazinin qiymətləndirilməsi, hərəkət marşrutlarının öyrənilməsi və digər epizodlar üzrə müxtəlif tapşırıqları icra ediblər.
Uçuş heyətinin döyüş hazırlığının daha da artırılması məqsədilə keçirilən təlimdə qarşıya qoyulan tapşırıqlar müvəffəqiyyətlə yerinə yetirilib.
“Müalicəsi həkim nəzarətində davam edir. Artıq zənglərə də özü cavab verir”.
Bu sözləri Oxu.Az-a martın 28-də yaşadığı evin qarşısında sui-qəsd cəhdinə məruz qalan Milli Məclisin deputatı Fazil Mustafanın qardaşı İlqar Mustafayev deyib.
O bildirib ki, reabilitasiya prosesi müsbət irəliləyişlərə doğru davam edir:
“Qardaşımın vəziyyəti şükür yaxşıdır. Hər gün danışıram. Mobil telefonu artıq özündədir. Müayinə zamanları istisna olmaqla digər hallarda hətta zənglərə özü cavab verir. Bu, bizi də sevindirir. Qardaşımın vəziyyəti ilə maraqlanan hər kəsə təşəkkür edirik”.
Qeyd edək ki, hadisə martın 28-i saat 21:51 radələrində paytaxtın Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında qeydə alınıb. Belə ki, Milli Məclisinin deputatı Mustafa Fazil Qəzənfər oğluna yaşadığı evin qarşısında “Kalaşnikov” avtomat silahından atəş açılaraq terror aktı törədilib. Nəticədə F.Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası alıb. Ona zəruri tibbi xidmətlər göstərilib.
Xatırladaq ki, DİN-in mətbuat xidmətindən verilən məlumata görə, Fazil Mustafaya qarşı cinayət hadisəsi ilə əlaqədar Daxili İşlər Nazirliyi, Dövlət Təhlükəsizliyi Xidməti və Baş Prokurorluğun birgə keçirdiyi əməliyyat-axtarış, əməliyyat-istintaq tədbirləri çərçivəsində 4 nəfər müəyyən olunaraq saxlanılıb.
Bu gün Azərbaycanın Qarabağ iqtisadi rayonunda faydalı qazıntı yataqlarının qanunsuz istismarına qarşı Xankəndi-Laçın yolunda keçirilən etiraz aksiyası 114 gündür davam edir.
“Report”un hazırda ərazidə olan əməkdaşı xəbər verir ki, aksiya iştirakçıları ötən gecə boyu da yüksək fəallıq nümayiş etdiriblər.
Toplanış yerində gecə boyu da təhlükəsizlik qaydalarına yüksək səviyyədə əməl olunub və heç bir insident qeydə alınmayıb.
Həmişə olduğu kimi, etirazçılar bu səhəri də Azərbaycan Dövlət Himninin səsləndirilməsi ilə açıblar.
Onlar etirazlarını yüksək əhvali-ruhiyyə ilə davam etdirirlər.
Eyni zamanda ekofəallar yolun hər iki tərəfində, hərəkətə maneə törətmədən üzərində Azərbaycan, rus və ingilis dillərində yazılmış plakatlar qaldırıb, şüarlar səsləndirirlər.
Aksiya iştirakçılarının tələbləri ilk gündən olduğu kimi, dəyişməz olaraq qalır.
Etirazçılar aksiyanın keçirildiyi ilk gündən etibarən dünya ictimaiyyətini ekologiyanı qorumağa çağırırlar.
Belə ki, ekofəallar və gənc könüllülər “Azərbaycan oyaqdır, sərvətinə dayaqdır!”, “Azərbaycan vahiddir, sərvətinə sahibdir!”, “Ekoloji cinayətə son!”, “Stop ekoterror!”, “Берегите природу!”, “Экоциду нет! Мониторингу да!” şüarlarını səsləndirirlər.
Qeyd edək ki, Şuşa ərazisində Rusiya sülhməramlılarının nəzarətində olan yolun bir hissəsində etiraz aksiyası azərbaycanlı fəallar və ekologiya üzrə qeyri-hökumət təşkilatlarının (QHT) üzvləri tərəfindən Qarabağ iqtisadi rayonunda ekoloji terrora son qoyulması tələbi ilə keçirilir.
2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb.
2022-ci il dekabrın 12-dən etibarən isə etiraz aksiyası başlayıb.
Azərbaycan Respublikasının Prezidenti İlham Əliyev aprelin 3-də Türkiyənin “Baykar” şirkətinin texniki direktoru Selçuk Bayraktarı qəbul edib.
Selçuk Bayraktar Türkiyə Prezidenti Rəcəb Tayyib Ərdoğanın salamlarını dövlətimizin başçısına çatdıraraq Türkiyədə baş verən zəlzələnin fəsadlarının aradan qaldırılmasında göstərilən qardaşlıq yardımına görə Rəcəb Tayyib Ərdoğanın Azərbaycan Prezidentinə minnətdarlığını bir daha ifadə etdi.
Dövlətimizin başçısı salamlara görə təşəkkürünü bildirdi, onun da salamlarını Türkiyə Prezidentinə çatdırmağı xahiş etdi.
Prezident İlham Əliyev zəlzələ zamanı həlak olanlara bir daha Allahdan rəhmət diləyərək, Azərbaycanın Türkiyəyə yardımını qardaşlıq borcu kimi dəyərləndirdi.
Azərbaycan Prezidenti bu yaxınlarda Ankarada Türkiyə Prezidenti ilə görüşünü və Rəcəb Tayyib Ərdoğanın Azərbaycana səfərlərini məmnunluqla xatırlayaraq, Türkiyə Prezidentinin işğaldan azad edilmiş ərazilərimizə səfərlərinin xüsusi əhəmiyyət daşıdığını qeyd etdi.
Prezident İlham Əliyev Türkiyənin müdafiə sənayesinin son illərdə çox böyük nailiyyətlər əldə etdiyini deyərək, bu xüsusda “Baykar” şirkətinin fəaliyyətinin aparıcı rol oynadığını vurğuladı və bu şirkətin istehsal etdiyi məhsulların Vətən müharibəsi dövründə erməni işğalçılarının hərbi texnikasının məhv edilməsində oynadığı rolu bir daha qeyd etdi.
Söhbət zamanı Azərbaycanla Türkiyə arasında dostluq və qardaşlıq münasibətlərinin bütün digər sahələrdə olduğu kimi hərbi və müdafiə sənayesi sahələrində də uğurla inkişaf etdiyi vurğulandı, əməkdaşlığın perspektivləri ətrafında fikir mübadiləsi aparıldı.
Sonda dövlətimizin başçısına xatirə hədiyyəsi təqdim olundu.
“Ermənistanın mina terroru yüzminlərlə məcburi köçkünün öz evlərinə təhlükəsiz və layiqli şəkildə qayıtmaq kimi ayrılmaz hüququnun həyata keçirilməsinə mənfi təsir göstərir”.
Bu fikirlər Azərbaycanın qeyri-hökumət təşkilatlarının Ermənistanın mina terroru ilə əlaqədar qəbul etdiyi bəyanatda bildirilib.
Qeyd olunub ki, şanlı Zəfərimizlə yekunlaşan Vətən müharibəsindən iki ildən çox müddət keçməsinə baxmayaraq, Ermənistanın Azərbaycana qarşı törətdiyi mina terroru hələ də davam edir.
“Bunun nəticəsidir ki, zaman-zaman minaya düşən vətəndaşlarımız bəşəriyyət əleyhinə olan bu hərbi cinayətin qurbanına çevrilirlər. Təəssüf hissi ilə qeyd edirik ki, yaranmış bu hal bir çox göstəricilərinə görə faciəvi şəkil alır.
Ermənistan Respublikası, 10 noyabr 2020-ci il tarixli Üçtərəfli Bəyanatın 4-cü bəndinə zidd olaraq, Azərbaycan ərazilərində qanunsuz hərbi fəaliyyətini davam etdirərək, qüvvələrini nəinki Azərbaycan ərazisindən tam şəkildə çıxartmayıb, əksinə, təxribatçı fəaliyyətini hələ də davam etdirməkdədir. Azərbaycan ərazilərində külli miqdarda aşkarlanan piyada əleyhinə minalar bu təxribatçı fəaliyyətin əyani sübutudur.
Müşahidələr göstərir ki, bu kimi hallar yalnız keçmiş təmas xətti boyunca deyil, ölkənin işğaldan azad olunan digər ərazilərində də baş verir. Bəlli məsələdir ki, Ermənistan Azərbaycan tərəfinə mümkün qədər ziyan vurmaq niyyətindədir və bu çirkin amalını müxtəlif yollarla həyata keçirməyə çalışır. Ərazilərin minalarla çirkləndirilməsi həmin əməllərdən biridir. Məhz bunun nəticəsidir ki, minaya düşmə halları günbəgün artır. Belə ki, işğaldan azad olunmuş ərazilərimizdə 2020-ci il müharibəsinin sonundan bəri 288 azərbaycanlı minaya düşüb, onlardan 50-si həyatını itirib.
Təəssüf hissi ilə qeyd edirik ki, işğal dövründə ərazilərin Ermənistanın hərbi birləşmələri tərəfindən başdan-başa minalanması Azərbaycan hökumətinin son iki ildə başlatdığı bərpa və yenidənqurma planlarının həyata keçirilməsinə ciddi şəkildə mane olur. Ən əsası isə bu, yüzminlərlə məcburi köçkünün öz evlərinə təhlükəsiz və layiqli şəkildə qayıtmaq kimi ayrılmaz hüququnun həyata keçirilməsinə mənfi təsir göstərir. Prezident İlham Əliyevin çıxışlarının birində qeyd etdiyi kimi, “Mina təhlükəsi azad edilmiş ərazilərdə bərpa işlərinin aparılmasına və məcburi köçkünlərin evlərinə qayıtmasına əsas maneədir”.
Hazırda Şuşa-Xankəndi yolunda azərbaycanlı ictimai fəallar və ekoloji qeyri-hökumət təşkilatlarının üzvləri tərəfindən keçirilən etiraz aksiyası davam etdirilir. Ekoloji terrora son qoymaq şüarları altında keçirilən aksiyanın iştirakçıları Ermənistan ərazisindən Azərbaycana silah-sursatın, hərbçilərin daşınması, milli sərvətlərimizin ölkədən çıxarılması və digər qanunsuz əməllərin həyata keçirilməsi üçün istifadə olunan Laçın yoluna nəzarət edilməsini və bu cinayətlərə, qanunsuzluğa son qoyulmasını tələb edirlər. Bu aksiya həm də Ermənistanın mina terroruna qarşıdır.
Biz, Azərbaycanda fəaliyyət göstərən qeyri-hökumət təşkilatları, dünya ictimaiyyətinə bir daha müraciət edərək, Ermənistan tərəfindən beynəlxalq humanitar hüququn normalarına zidd olaraq Azərbaycan ərazilərində basdırdığı minaların insanların həlak olmasına, sağlamlığını itirməsinə və ya əlil qalmasına səbəb olduğunu, regionda ədalətli sülhün və təhlükəsizliyin təmin olunmasına ciddi təhdid yaratdığını diqqətə çatdırır və torpaqların minalarla çirkləndirilməsinin qarşısının qəti şəkildə alınmasına, dəqiqliyinə zəmanət verən mina xəritələrinin ölkəmizə təqdim olunmasına dəstək verməyə çağırırıq”.
Azərbaycan Respublikasının Prezidenti İlham Əliyev aprelin 3-də İtaliya Respublikasının xarici işlər və beynəlxalq əməkdaşlıq nazirinin müavini Edmondo Çiriellini qəbul edib.
"Dövlətimizin başçısı Azərbaycan-İtaliya ikitərəfli münasibətlərinin uğurla inkişaf etdiyini deyərək, bu baxımdan qarşılıqlı səfərlərin əhəmiyyətini vurğuladı və cari ilin əvvəlindən indiyədək, İtaliyanın 3 nazirinin, həmçinin bu gün nazir müavinin ölkəmizə səfərinin əlaqələrimizin çox yüksək səviyyədə olmasının göstəricisi kimi dəyərləndirdi.
Prezident İlham Əliyev ölkələrimiz arasında münasibətlərin strateji tərəfdaşlıq müstəvisində inkişaf etdiyini qeyd edərək, əlaqələrimizin böyük hissəsinin energetika sahəsi ilə bağlı olduğunu dedi, hazırda Avropanın enerji təhlükəsizliyi istiqamətində atılan addımların Azərbaycan-İtaliya əməkdaşlığını daha da gücləndirdiyini vurğuladı.
Dövlətimizin başçısı, eyni zamanda, İtaliyanın Azərbaycanın birinci ticarət tərəfdaşı olduğunu xatırladaraq, ticarət dövriyyəsinin əsas hissəsinin Azərbaycanın neft-qaz ixracını təşkil etdiyini dedi və bu baxımdan əməkdaşlığımızın strukturunun genişləndirilməsi ilə bağlı əlavə addımların atılmasının zəruriliyini qeyd etdi.
Prezident İlham Əliyev Ermənistanla Azərbaycan arasında münasibətlərin normallaşdırılması və sülh gündəliyi haqqında məlumat verərək ölkəmizin İkinci Qarabağ müharibəsindən dərhal sonra Ermənistanla sülh müqaviləsinin imzalanması ilə bağlı təkliflərlə çıxış etdiyini diqqətə çatdırdı.
Azərbaycan Prezidenti Edmondo Çiriellinin ölkəmizə səfərinin məhsuldar olacağına əminliyini bildirdi.
Azərbaycan-İtaliya əlaqələrinin minilliklərlə yaşı olduğunu qeyd edən Edmondo Çirielli münasibətlərimizin kökünün hətta antik dövrlərə gedib çatdığını vurğuladı. Azərbaycanın İtaliya üçün çox önəmli ölkə olduğunu deyən qonaq Cənubi Qafqazda sabitlik baxımından ölkəmizin strateji əhəmiyyətini qeyd etdi, Azərbaycanın regionda müstəqil və suveren siyasət apardığını vurğuladı. İtaliyanın xarici işlər və beynəlxalq əməkdaşlıq nazirinin müavini siyasi əlaqələrlə yanaşı, iqtisadi sahədə əməkdaşlığın da xüsusi əhəmiyyət kəsb etdiyini bildirdi.
Xəbər verdiyimiz kimi, aprelin 1-də müdafiə naziri general-polkovnik Zakir Həsənovun rəhbərliyi ilə xidməti müşavirə keçirilib.
Azərbaycan-Ermənistan şərti dövlət sərhədində və Qarabağ iqtisadi rayonunda mövcud əməliyyat şəraitini təhlil edən müdafiə naziri ehtimal olunan təxribatların qarşısının bundan sonra da qətiyyətlə alınması barədə müvafiq göstərişlər verib.
Müdafiə naziri qeyd edib ki, qarşı tərəfin, o cümlədən qeyri-qanuni erməni silahlı birləşmələrinin bütün qanunsuz fəaliyyətləri bundan sonra da fasiləsiz nəzarətdə saxlanılmalı və Azərbaycan ərazilərində gələcəkdə bu kimi addımların atılmasına imkan verilməməlidir.
General-polkovnik Z.Həsənov azad edilmiş ərazilərdə, həmçinin yeni nəzarətə götürülən yüksəklik və mövqelərimizdə mühəndis təminatı tədbirlərinin daha keyfiyyətli yerinə yetirilməsi barədə konkret tapşırıqlar verib.
Zəngəzurun Teğ-Kornidzor hissəsində Ermənistan və Azərbaycan nümayəndələri arasında görüş keçirilib və sərhədin dəqiqləşdirilməsi istiqamətində iş aparılıb, nəticədə bu hissədə vəziyyət xeyli yaxşılaşıb.
Bu barədə Ermənistan Milli Təhlükəsizlik Xidmətinin yaydığı məlumatda deyilir.
Ermənistan Milli Təhlükəsizlik Xidmətinin məlumatına görə, hazırda iş davam edir və onun nəticələri barədə əlavə məlumat veriləcək.
ABŞ-Çin qarşıdurması qlobal qütbləşməni hərbi-siyasi düşmənçilik mərhələsinə keçirib, hər iki tərəfin ətrafında nüvə dövlətləri mövcuddur... Əgər, yeni dünya müharibəsi başladılsa, belə bir qlobal savaşda nüvə silahından istifadə edilməyəcəyinə heç bir təminat yoxdur...
Dünya yeni müharibə təhlükəsi qarşısındadır. Hər halda, daha dağıdıcı qlobal savaşın anonsu artıq verilib. Ona görə də, hesab etmək olar ki, bütün dünya üçün olduqca ağır, hətta sonradan nəticələrinin aradan qaldırılması mümkün olmaya biləcək bu savaş hər an başlaya bilər. Və bu baxımdan, dünyanın gələcək taleyi üçün narahat olmaq üçün kifayət qədər ciddi əsaslar mövcuddur.
Maraqlıdır ki, Çin lideri Si Tsinpin ilk dəfə bu məsələ ilə bağlı şəxsən açıq şəkildə danışıb. Düzdür, indiyə qədər Çin lideri onun ölkəsinin savaşdan qorxmadığını və düşmən dövlətlərin hərbi təcavüzünü dəf etməyə həmişə hazır olduğunu bir neçə dəfə bəyan etmişdi. Ancaq bir müddət öncə öz hakimiyyət müddətini uzatmağa nail olmuş Çin lideri Si Tsinpin bu dəfə yeni savaş barədə daha konkret ifadələr dilə gətirib.
Məsələ ondadır ki, Si Tsinpin ölkəsinin bütün strukturlarını Çin ordusunu müharibəyə hazırlamağı tapşırıb. Çin lideri vurğulayıb ki, ordunun qlobal savaşa hazırlıq prosesi maksimum səviyyədə sürətli xarakter daşımalıdır. Onun fikrincə, Çin istənilən halda, ABŞ və Qərblə müharibə aparmalı olacaq. Ona görə də, Çin generalları savaş ehtimalından çəkinməyərək, yalnız ordunun döyüş qabiliyyətini gücləndirməklə məşğul olmalıdırlar.
Təbii ki, rəsmi Pekini narahat edən kifayət qədər ciddi qlobal proseslər mövcuddur. Çin dünyanın yenidən bölüşdürüldüyünü artıq qəbul etməyə başlayıb. Eyni zamanda, yeni dünya düzəninin qurulma prinsiplərindən olduqca narazıdır. Rəsmi Pekin dünyanın yenidən bölüşdürülməsi prosesində Çinin də küncə sıxışdırılacaq dövlətlərin sırasında yer aldığı qənaətinə gəlib. Və buna imkan vermək niyyətində olmadığını sezdirir.
Halbuki, Çin nüvə dövləti olsa da, adətən, hərbi ritorikadan uzaq dayanmağa üstünlük verən xarici siyasət yürütməsi ilə diqqəti çəkirdi. Rəsmi Pekin Çinin siyasi iradəsini dünyaya yaymaq üçün əsasən iqtisadi-ticari faktorlardan istifadə edirdi. Ona görə də, hazırda Çin ABŞ və Qərblə planetin bütün önəmli regionlarında rəqabət apara bilirdi. Üstəlik, iqtisadi-ticari rəqabət prinsiplərindən kənara çıxmamağa çalışırdı.
Ancaq Ukrayna savaşına uzun müddət müşahidəçi qalan rəsmi Pekin artıq fəallaşmağa başlayıb. Bu nəhəng ölkənin siyasi dairələrindən verilən son açıqlamalarda Ukrayna savaşının əsas hədəfinin məhz Çin olduğu qənaəti qətiyyən gizlədilmir. Bu isə rəsmi Pekini Ukrayna savaşının dayandırılması və ya heç olmasa, Rusiyanın tam məğlubiyyətinin əngəllənməsi istiqamətində fəallaşmağa stimullaşdırır.
Son vaxtlar Çin 12 maddəlik sülh təklifləri ilə Ukrayna savaşının siyasi platformasına yerləşməyə can atır. Çin lider Si Tsinpinin Rusiya səfərinin nəticələri Kremli tam məmnun buraxmasa da, rəsmi Pekin bu addımla ABŞ və Qərbə də müəyyən mesajlar verməyə nail oldu. Və aydınlaşdı ki, Çin bundan sonra dünyada baş verənlərə müşahidəçi qalmaq niyyətində deyil.
Artıq Qərbdə də tam əmindirlər ki, hələlik rəsmi Pekin Kremlin hərbi-siyasi gözləntilərini tam qarşılamağa tələsməsə də, Çin hər an Rusiyanın gücləndirilməsi ilə Ukrayna savaşına və onun sonrakı nəticələrinə müdaxilə etməyə hazırdır. Yəni, rəsmi Pekin ABŞ və Qərbə belə asanlıqla təslim olmaq barədə düşünmür. Savaş dayandırılmazsa və Çin iqtisadiyyatını sarsıtmaqda davam edərsə, rəsmi Pekin Kremlin ümid bağladığı hərbi dəstəyi Rusiyaya yönəldə bilər.
Hələliksə, Çin ABŞ-ın iqtisad-ticari tərəfdaşlarını öz ətrafına çəkməyə çalışır. Yaxın Şərq üzrə ABŞ-ın əsas müttəfiqlərindən hesab olunan Səudiyyə Ərəbistanı Çinin vasutəçiliyi ilə İranla münasibətlərini normallaşdırmağa başlayıb. İndi Çin və Səudiyyə Ərəbistanı arasında yuan üzərindən reallaşan ticarət dövriyyəsinin illlik həcmi 115 milyard dollara çatıb. Eyni proses Çin-Braziliya münasibətlərində də müşahidə olunur. Yəni, bu iki dövlət ticari ödəmələrdə dollarda tamamilə imtina etmək barədə anlaşma imzalayıblar.
Bütün bunlar onu göstərir ki, rəsmi Pekin ABŞ və Qərbin iqtisadi-ticari tərəfdaşlarını öz ətrafına çəkməkdə qətiyyən problem yaşamır. İndi rəsmi Pekin daha çox Çinin ətrafında Rusiya, İran, Səudiyyə Ərəbistanı, Braziliya, Şimali Koreya, Hindistan və s. ölkələrin birləşməsinə can atır. Rəsmi Pekin bu addımlarla ABŞ-ın “demokratiya sammiti” adı altına formalaşdırdığı koalisiyaya alternativ beynəlxalq qütbün yaradılmasına çalışır.
Belə anlaşılır ki, ABŞ və ən yaxın müttəfiqlərinin təkqütblü dünya modeli reallığa çevrilməyə də bilər. Hər halda, rəsmi Pekin Çini dünyanın yeni cazibə mərkəzinə çevirmək imkanlarını dəyərləndirməyə can atdığı inkaredilməz reallıqdır. Hələlik bu proses daha çox siyasi-iqtisadi faktor üzərindən yürüdülsə də, yaxın vaxtlarda hərbi amillərin də ön plana keçirilə biləcəyi qətiyyən istisna deyil. Və Çin liderinin savaş hazırlığı barədə təlimatı da bunun ilkin əlaməti hesab oluna bilər.
Təbii ki, ABŞ və Qərbin Çinlə münasibətlərinin ifrat şəkildə gərginləşməsi, hərbi qarşıdurma təhlükəsinin real görüntülər alması bəşəriyyətə yaxşı heç nə vəd edə bilməz. Çünki hər iki tərəfin təmsil etdiyi düşərgədə nüvə dövlətləri mövcuddur. Əgər, nə vaxtsa bu qarşıdurma siyasi-iqtisadi rəqabətdən Çin liderinin anonsunu verdiyi savaşa çevrilsə, bu, yeni dünya müharibəsi demək olacaq. Böyük ehtimalla onlarla dövlətin qatılacağı bu savaş nəticəsində qarşıdurma vəziyyətindəki iki qlobal qütbdən biri məhv olacaq. Və belə bir qlobal savaşda nüvə silahının istifadə edilməyəcəyinə isə heç bir təminat yoxdur.(Yeni Müsavat)