 |
|
Milli Hidrometeorologiya Xidmətinin sentyabrın 13-ü saat 10:00-a olan məlumatına əsasən, əksər rayonlarda hava şəraiti əsasən yağmursuz keçib. Lakin bəzi dağlıq və dağətəyi rayonlarda arabir yağış yağıb, şimşək çaxıb, Böyük Qafqazın bəzi yerlərində leysan xarakterli intensiv olub. Şahdağın yüksək dağlıq ərazilərinə (3500 metr yüksəkliyə qədər) qar yağıb.
Bu barədə Milli Hidrometeorologiya Xidmətindən bildirilib.
Məlumata görə, düşən yağıntının miqdarı Şəkidə (Kişçay) 45 mm , Qrızda 7 mm, Zaqatala, Gədəbəy, Tovuz, Daşkəsən, Şəmkir, Balakən, Qax, Qusar, Şahdağ, Xınalıq, Tərtər, Astarada 3 mm-dək olub.
Sarı xəbərdarlığa uyğun olaraq şərq küləyi arabir Culfada 16 m/s-dək güclənib.
Sumqayıt, Göygöl, Daşkəsən, Şahdağ, Qrızda duman müşahidə olunub.
Havanın maksimal temperaturu Bakıda və Abşeron yarımadasında 30, Naxçıvan MR-da 37, Aran rayonlarında 35, dağlıq rayonlarda 25 dərəcəyədək isti qeydə alınıb.
"2024-cü ilin ilk 7 ayında Azərbaycanda nominal orta aylıq əmək haqqı 8.3 faiz artıb. Orta aylıq əmək haqqındakı artım faizi pensiyalardakı artımı müəyyənləşdirmək baxımından əsas meyardır. Belə ki, əmək pensiyaları hər il yanvar ayında indeksləşdirilir və bu, əvvəlki ildə orta aylıq əmək haqqıdakı artım faizinə uyğunlaşdırılır".
Bu sözləri Milli Məclisin deputatı Vüqar Bayramov deyib. Millət vəkili qeyd edib ki, bu ildəki orta aylıq əmək haqqıdakı artım faizinə uyğun olaraq, 2025-ci ilin yanvarın birindən etibarən bütün növ əmək pensiyalarında artımlar olacaq" 2024-cü il üçün yekun illik göstərici gələn ilin əvvəlində elan ediləcək. Eyni zamanda, bu ilin sonuna doğru maaş məbləğlərindəki potensial dəyişikliklər də orta illik əmək haqqı faizinə təsir göstərə bilər. Daha konkret rəqəmlər ilin sonuna doğru bəlli olacaq.
Əmək pensiyaları orta aylıq əmək haqqındakı artım faizinə, pensiya kapitalı isə inflyasiya səviyyəsinə uyğun olaraq artırılır. Bu baxımdan, gələn ildən etibarən pensiya kapitalı da indeksləşdirilərək artırılacaq".
Sünnət icbari tibbi sığorta hesabına təminata alınıb.
Bu barədə İcbari Tibbi Sığorta üzrə Dövlət Agentliyinin məlumatında bildirilib.
Qeyd edilib ki, cari ilin 6 ayı ərzində icbari tibbi sığorta ilə 15 mindən çox sünnət əməliyyatı icra olunub.
Bu əməliyyatlar icbari tibbi sığorta hesabına TƏBİB-in tabeliyindəki dövlət tibb müəssisələrində və Səhiyyə Nazirliyinin K.Y.Fərəcova adına Elmi-Tədqiqat Pediatriya İnstitutunda həkim göstərişi əsasında həyata keçirilir.
Avtomobil almaq bizi bir çox gündəlik əziyyətlərdən qurtarsa da, yanlış seçim bizim üçün daha ciddi problemlər yarada bilər.
Hazırda ikinci əl nəqliyyat vasitələrinə tələbat yenilərinə nisbətən daha yüksəkdir.
İkinci əl avtomobil alarkən isə bir sıra xoşagəlməz hallarla da qarşılaşırıq. Bəzən özümüz də bilmədən yeni, az işlənmiş adı altında qəza keçirmiş və yaxud əsas detalları dəyişdirilmiş avtomobillər alırıq.
"Maşının detallarını başqası ilə dəyişirlər. Oğurlayıb yerinə keyfiyyətsizini qoyurlar", - deyə sürücü Baku TV-yə mövzu ilə bağlı danışarkən deyib.
Bu kimi problemlərlə qarşılaşmamaq üçün digər ölkələrdə vahid reyestr sistemi fəaliyyət göstərir. Bəs bu sistemin xidmət göstəriciləri necə tənzimlənir?
"Belə bir sistem bir çox ölkələrdə yaradılıb. Bildiyim qədəri ilə, Azərbaycanda da bunun üçün tədbirlər görülür. Buna görə də aidiyyəti qurumlar qısqanclıq etməsə, bazanı versələr, bunu tez etmək mümkün olacaq", - deyə nəqliyyat-eksperti Elməddin Muradlı qeyd edib.
Daha ətraflı Baku TV-nin süjetində:
Bu gün Bakının üç rayonunun qaz təchizatında fasilə yaranacaq.
Bu barədə “Azəriqaz” İstehsalat Birliyi məlumat yayıb.
Bildirilib ki, Binəqədi rayonunun 8-ci mikrorayon, S.S.Axundov küçəsində siyirtmənin quraşdırılması, Yasamal rayonunun Hüseyn Cavid prospektində yeraltı qaz xəttində aşkarlanan sızmanın ləğv edilməsi, Sabunçu rayonunun Kürdəxanı qəsəbəsində yeni çəkilmiş xəttin mövcud şəbəkəyə qoşulması və qaztənzimləyici şkafın yerinin dəyişdirilməsi məqsədi ilə sentyabrın 12-də saat 10:00-dan etibarən qaz təchizatının dayandırılması planlaşdırılır.
Təmir işləri görülən müddətdə Binəqədi rayonunun S.S.Axundov, İ.P.Dadaşov, 7-ci mikrorayon, 31266-cı məhəllə, Ş.Məmmədova küçələrinin, Yasamal rayonunun Hüseyn Cavid prospektinin bir hissəsinin, Sabunçu rayonunun Ləhic bağları adlanan yaşayış ərazisinin və Nardaran qəsəbəsinin bir hissəsinin qaz təchizatında müvəqqəti fasilə yaranacaq.
Daxili İşlər Nazirliyi Baş Dövlət Yol Polisi İdarəsinin (BDYPİ) yeni tədris ilinin başlanması ilə əlaqədar əhaliyə müraciət edib.
BDYPİ-dən verilən xəbərə görə, müraciətdə deyilir:
"Yeni dərs ilinin başlanması təhsilalanların, xüsusilə uşaq və yeniyetmələrin yol hərəkəti ilə bağlı həyat və sağlamlıqlarının qorunması işində daha kəsərli tədbirlərin görülməsini tələb edir.
Daxili İşlər Nazirliyinin göstərişinə əsasən, bu sahədə həyata keçirilən qabaqlayıcı tədbirlərin effektivliyinin artırılması məqsədilə, cari ilin sentyabr ayının 10-dan oktyabr ayının 10-dək respublika ərazisində təhlükəsizlik aylığının keçirilməsinə başlanılıb.
“Diqqət, uşaqlar!” devizi altında keçiriləcək tədbirlər çərçivəsində təhsilalanların iştirakı ilə baş verə biləcək yol qəzalarının qarşısının alınması istiqamətində nəzarət-profilaktik tədbirlərin gücləndirilməsi, təhsil müəssisələrinin yerləşdiyi ərazilərdə yol şəraitinin müayinə edilməsi, çatışmazlıqların aradan qaldırılması, xüsusilə maarifləndirmə və tərbiyəvi-təbliğat xarakterli işlərin görülməsi nəzərdə tutulur".
DİN-in Baş Dövlət Yol Polisi İdarəsi yeni tədris ilinin başlaması ərəfəsində bütün təhsil ictimaiyyətinə uğurlar arzu edir, bununla yanaşı yollarda uşaq travmatizminin minimuma endirilməsində əhalini, xüsusilə qeyri-hökumət təşkilatlarını, media subyektlərini birgə iştirakçılığa çağırır.
Yol-xeber.az" xəbər verir ki, ADY-nin rayonlararası (şəhərlərarası) qatarları ilə səfər biletinin onlayn rəsmiləşdirilməsi zamanı
- sərnişinin ad, soyad və ata adının
- doğum tarixinin
- şəxsiyyəti təsdiq edən sənədin seriya və nömrəsinin, etibarlılıq müddətinin qatara minik zamanı təqdim olunan sənəddəki məlumatlarla eyni olması mütləqdir.
Elektron bilet və şəxsiyyəti təsdiq edən sənəddəki məlumatlar arasında uyğunsuzluq (fərqli hərflər, fərqli rəqəmlər və s.) aşkar edildikdə bilet etibarsız hesab olunur və sərnişin qatara buraxılmır.
Qatara minik zamanı çətinliklə üzləşməmək üçün məlumatları daxil edərkən diqqətli olmağınızı tövsiyə edirik.
Səfərləriniz uğurlu olsun!
2024-cü ilin sonuna yaxınlaşdıqca əhalini maraqlandıran əsas məsələlərdən biri də növbəti ildə maaş artımlarının olub-olmayacağıdır.
Hazırda minimum əmək haqqı 345 anat təşkil edir. Minimum əmək haqqı göstəricisinin dəyişməsi maaş artımlarına səbəb ola bilər.
İqtisadçı Rəşad Həsənov Baku TV-yə bildirib ki, minimum əmək haqqı 10-15 faiz ətrafında artırılacaq. Bu artım həm dövlət, həm də özəl sektorda çalışanların maaşlarına təsir göstərəcək.
Ətraflı süjetdə izləyə bilərsiniz:
Azərbaycanda çörəyin qiyməti arta bilər.
Buna səbəb ölkədə yanacağın qiymətinin artması, eləcə də Qazaxıstan və Rusiyadan idxal etdiyimiz buğda ilə bağlıdır.
Belə ki, Azərbaycan daxilində daşımalar, əkin-biçin, kənd təsərrüfatında, aqrar sahələrdə dizel yanacağından istifadə olunur. Azərbaycanda da iki aydır ki, dizel yanacağının qiyməti 25% artıb. Habelə Azərbaycanın əsas buğda aldığı ölkələrdə - Qazaxıstan və Rusiyada daşqınların olması, məhsuldarlığa ciddi təsir göstərib. Bu o deməkdir ki, dünya bazarında da taxılın qiymətinin artması gözlənilir.
Bəs çörəyin qiyməti hansı tarixdən bahalaşacaq?
Mövzu ilə bağlı "Operativ Məlumat Mərkəzi-OMM"-ə açıqlama verən iqtisadçı-ekspert Natiq Cəfərli deyir ki, Azərbaycanda un məmulatların qiyməti daha çox xarici bazarlardan asılıdır. Çünki bizim daxili tələbatımızı ödəmək üçün yerli istehsal cəmi 25%-ə kifayət edir. 75% əmtəəlik un məmulatlarında istifadə olunan buğdanı biz xaricdən alırıq.
“Keçən il yaz əkini zamanı Azərbaycanın əsas buğda aldığı ölkələrdə Qazaxıstan və Rusiyada daşqınların olması, məhsuldarlığa ciddi təsir göstərib. Sadəcə indi hamı payızlıq buğdanın miqdarına görə qiymət siyasətini müəyyənləşdirəcəyini düşünür.
Bir neçə aydan sonra payızlıq buğda bazara çıxacaq. Əgər buğdanın həcmi çox olacaqsa, bu qiymətlərin tənzimlənməsinə çox bahalaşmamasına səbəb ola bilər. Bu xarici amildir, daxili amil isə daha çox dizel yanacağı ilə bağlıdır.
Azərbaycanda da iki aydır ki, dizel yanacağının qiyməti 25% artıb. Birdən-birə 25% qiymət artımı təbii ki, daxili bazarda qiymət formalaşmasına təsir göstərir. Buğdanın əkilməsi, biçilməsi, yığılması fermerlərə təsir göstərir, daşınma xərcləri artır”, - deyə ekspert qeyd edib.
İqtisadçı-ekspert payız aylarında yeni ilə yaxınlaşdıqca çörəyin qiymətinin artmasını gözlədiyini vurğulayıb.
“Sadəcə Azərbaycanda bir özəllik də var ki, çörəyin qiyməti ən son artırılır. Azərbaycanda çörəyin qiymətinin artmasının başqa yolları da var. Bizdə çörəyin çəkisi azaldılır. Bu da əslində qiymət artımıdır. Yəni, çörəyin çəkisi azalır, amma satış qiyməti dəyişmir”.
Digər həmsöhbətimiz Əmək və Əhalinin Sosial Müdafiəsi Nazirliyi yanında İctimai şuranın sədri, professor Elşad Məmmədov məsələ ilə bağlı bildirib ki, çörəyin qiymətindəki sabitliyi qorumaq üçün ilk növbədə yerli istehsalı stimullaşdırmaq lazımdır. Çünki qeyri-müəyyən dünya iqtisadiyyatındakı şəraitlər, xüsusilə qiymətlərin dünya bazarında dəyişməsi idxaldan asılılıq şəraitində daxili bazara ciddi təzyiqlər göstərir.
“Digər tərəfdən biz Rusiya və Qazaxıstanla kifayət qədər konsktruktiv münasibətlər qurmuşuq və idxal baxımından bir qədər mövcud ola biləcək problemlərin qarşısını almışıq. Buna baxmayaraq, yerli istehsalın stimullaşdırılması dayanıqlı şəkildə qiymətlərin sabitliyinə müsbət təsirlər göstərə bilər”.
İqtisadçı-ekspert qeyd edib ki, dövlət müvafiq fiskal mexanizmlərdən istifadə edərək qiymətlərin sabitliyinə doğru müvafiq addımlar ata bilər.
“Digər tərəfdən, bir sıra hallarda sahibkarlar birbaşa qiymət artımına deyil, çörəyin çəkisinin onun keyfiyyət strukturunun dəyişdirilməsi vasitəsilə faktiki olaraq reallıqda qiymət artımına gedir ki, bunun da istehlakçılar bir çox hallarda görmür, amma reallıqda bu da qiymət artımıdır”.
Bütün bunlara əsaslanaraq ekspert qeyd edib ki, əgər dünya bazarında hansısa cüzi olmayan, xeyli böyük göstəricilərlə ifadə olunan qiymət dəyişiklikləri olarsa, onda Azərbaycanda da qiymətlərdəki dəyişkənlik qaçılmaz olacaq.
Ekspert düşünür ki, müvafiq mexanizmlər vasitəsilə dünya bazarında qiymətlər dəyişsə belə, ölkə rəhbərliyinin bu məsələyə həssas yanaşması nəticəsində maksimum çalışılacaq ki, qiymətlərin sabitliyi qorunsun.
MÜSAHİBƏNİN BİRİNCİ HİSSƏSİ
MÜSAHİBƏNİN İKİNCİ HİSSƏSİ
Bugünkü buraxılışımızda Azərbaycanda keçirilmiş Parlament seçkiləri, ölkəmizdə COP29-la bağlı aparılan hazırlıq işləri, eləcə də ölkə ictimaiyyətini maraqlandıran bir sıra digər mövzular barədə aia.az-ın suallarını Milli Məclisin deputatı, Azərbaycan Ağsaqqallar Şurasının sədri, iqtisad elmləri doktoru, professor Eldar Quliyev cavablandırır.
- Bəs bu hadisənin, yəni Azərbaycan ilə Özbəkistanın artıq müttəfiq ölkələrə çevrilmələrinin ümumilikdə regionlarımız üçün əhəmiyyəti barədə nə deyə bilərsiz?
- Əslində sizin bu sualınızın cavabı cənab Prezident İlham Əliyevin avqustun 23-də Daşkənddə mətbuata bəyanatla etdiyi çıxışında öz əksini aydın şəkildə tapmışdır. Dövlətimizin başçısı birmənalı olaraq vurğuladı ki, regionlarımızda müsbət proseslər Daşkənd ilə Bakı arasında səmərəli əməkdaşlıqdan çox asılıdır. Bu da ondan irəli gəlir ki, hazırda Mərkəzi Asiya, Cənubi Qafqaz, Xəzər regionları vahid geosiyasi regiona çevrilir. Məhz elə ölkələrimiz arasında əməkdaşlığın səmərəliliyinin artırılması, münasibətlərin möhkəmləndirilməsi məqsədilə dövlət başçıları səfər çərçivəsində bir çox önəmli məsələləri müzakirə etmiş, mühüm sənədlərə imza atmışlar. Müttəfiqlik münasibətlərinə dair müqavilə isə, iki ölkənin imzalaya biləcəyi ən ali səviyyədə beynəlxalq sənəddir. Bu müqavilənin imzalanması ilə iki qardaş xalq, iki müstəqil, güclü, suveren, nüfuzlu dövlət rəsmi müttəfiq oldu. Cənab Prezidentin dediyi kimi, bu, çox mühüm xarici siyasət addımıdır və gələcək illərdə münasibətlərimizi, həmçinin bir çox hallarda regional siyasəti müəyyən edəcək.
- Eldar müəllim, Prezident İlham Əliyevin həyata keçirdiyi xarici siyasətin növbəti uğurunun təzahürlərini biz hamımız bu günlərdə dövlət başçımızın İtaliyaya növbəti işgüzar səfəri zamanı cərəyan edən hadisələrdə də müşahidə etdik. Necə bilirsiniz Beynəlxalq Çernobbio Forumunda Azərbaycan Prezidentinin xüsusi dəvətlə iştirakı ölkəmizə hansı dividentləri qazandırır?
- İlk növbədə deməliyəm ki, cənab Prezident İlham Əliyevin İtaliya Respublikasına səfəri çərçivəsində sentyabrın 6-da “The European House – Ambrosetti” beyin mərkəzi tərəfindən “Gələcək qlobal çağırışlar və onların biznesə təsiri” mövzusunda keçirilmiş növbəti Beynəlxalq Çernobbio Forumuna əsas qonaq qismində dəvət olunması Avropa ölkələrinin Azərbaycanla tərəfdaşlıq və əməkdaşlıq əlaqələrini genişləndirməkdə maraqlı olduqlarının daha bir təsdiqidir. Bu hadisə eyni zamanda ölkəmizin beynəlxalq aləmdə yüksək nüfuzunun, etibarlı tərəfdaş statusunun, regionun aparıcı aktoru olmasının əyani təzahürü, eyni zamanda, Avropanın enerji təhlükəsizliyinə verdiyi əhəmiyyətli töhfənin beynəlxalq ictimaiyyət tərəfindən növbəti dəfə yüksək qiymətləndirilməsidir. Bu arada mən sizin yadınıza bir vacib və son dərəcə maraqlı məsələni salmaq istəyirəm. Xatırlayırsınızsa, dövlət başçımızın 2022-ci ildə keçirilən Çernobbio Forumundakı çıxışı və xarici media nümayəndələrinin suallarına verdiyi ətraflı cavablar Avropa ictimaiyyətinin böyük marağına səbəb olmuşdu. Həmin tarixi çıxışında cənab Prezident bildirmişdi ki, dünya fevraldan əvvəl olduğu vəziyyətdə heç vaxt olmayacaq. Dəyişikliklərin hansı axınla gedəcəyi isə Ukraynada müharibənin hələ nə qədər davam edəcəyindən, bu savaşın necə bitəcəyindən və bundan sonra dünyada güc balansının hansı şəkildə olacağından çox asılı olacaq. Son iki il ərzində baş verən hadisələr dövlət başçımızın nə qədər haqlı olduğunu bir daha sübut etdi.
- Yeri gəlmişkən, Azərbaycanın Rusiya-Ukrayna münaqişəsinin həlli məsələsində vasitəçi olma ehtimalı ilə bağlı moderatorun verdiyi suala dövlət başçımızın cavabı da kifayət qədər böyük maraq doğurmuşdu...
- Təbii ki, cənab Prezident İlham Əliyevin istər öz çıxışında, istərsə də ona ünvanlanan sualları cavablandırakən səsləndirdiyi fikirlərin hər biri istər tədbir iştirakçıları üçün, istərsə də ictimaiyyət üçün son dərəcə maraqlıdır və böyük önəm kəsb edir. Çünki bu fikirlər dərin təhlilə, sağlam düşüncəyə, güclü məntiqə əsaslanır və nəticə etibarı ilə obyektiv reallıqları əks etdirir. Rusiya – Ukrayna münaqişəsinin nizamlanmasında Azərbaycanın hansı rol oynaya biləcəyinə dair moderatorun sualına gəlincə isə, dövlətimizin başçısı bunun nəzəri cəhətdən mümkün olduğunu açıq şəkildə bəyan etdi. Həqiqətən də Azərbaycan Rusiya və Ukrayna ilə yanaşı 70 il ərzində Sovet İttifaqının tərkib hissəsi olub. Buna görə də hər iki ölkə ilə xalqlararası və siyasi səviyyədə şaxələndirilmiş münasibətlər mövcuddur. Ölkəmizin həm Rusiya ilə, həm də Ukrayna ilə çox yaxşı münasibətləri var. Azərbaycan Ukrayna da daxil olmaqla, bütün ölkələrin ərazi bütövlüyünü və suverenliyini güclü şəkildə dəstəkləyir. Bununla yanaşı, ölkəmiz Rusiyaya qarşı sanksiyalar kampaniyasına qoşulmayıb və cənab Prezident yenə də birmənalı olaraq bildirdi ki, Azərbaycanın belə bir niyyəti də yoxdur. Buna görə də Azərbaycan praqmatik münasibətlərin mövcudluğu fonunda rol oynaya bilər.
- Eldar müəllim, sonuncu sualım bu gün cəmiyyətimizdə ən çox müzakirə olunan mövzulardan biri, COP29-la bağlı olacaq. Bu tədbirin məhz Azərbaycanda keçirilməsi ölkəmiz üçün nə dərəcədə əhəmiyyətlidir?
- Keçən ilin dekabr ayında Azərbaycanın BMT-nin İqlim Dəyişikliyi üzrə Çərçivə Konvensiyasının Tərəflər Konfransının bu il keçiriləcək 29-cu sessiyasına (COP29) ev sahibliyi etmək hüququnu qazanması sözsüz ki, böyük uğurdur. Bununla əlaqədar Ölkə Prezidenti cənab İlham Əliyev dekabrın 15-də keçirdiyi müşavirədə çıxış edərkən bildirmişdir ki, bu qərarı bütün dünya ölkələri yekdilliklə qəbul etmişlər və beləliklə, Azərbaycana növbəti dəfə böyük etimad göstərilmişdir. Əlbəttə ki, bu qərar ölkəmizə beynəlxalq aləmdə olan hörmətin günbəgün artdığını təsdiq edir və biz birmənalı olaraq qeyd etməliyik ki, Azərbaycan bu hörməti və nüfuzu ilk növbədə cənab Prezident İlham Əliyevin gördüyü mühüm işlərin və həyata keçirdiyi son dərəcə uğurlu müstəqil xarici siyasət kursunun sayəsində qazana bilmişdir. Dövlət başçımızın hər zaman nümayiş etdirdiyi prinsipiallıq, qəbul olunan bütün qərarların, atılan addımların beynəlxalq hüquqa tam uyğunluğu və əlbəttə ki, ölkənin bütün ərazisində dövlət suverenliyinin bərpa edilməsi Azərbaycana olan bu hörməti daha da artırmışdır. Cənab Prezident İlham Əliyev öz çıxışında xüsusi olaraq vurğulamışdır ki, COP29 ölkəmizdə bu vaxta qədər keçirilmiş beynəlxalq tədbirlərlə müqayisəyə gəlmir. Gözlənilir ki, tədbirin davam edəcəyi iki həftə ərzində, təqribən 70-80 min xarici qonaq ölkəmizdə olacaq. Həmin müddətə Bakı dünyanın mərkəzinə çevriləcək. Əlbəttə ki, Azərbaycan bu beynəlxalq konfransı da ən yüksək səviyyədə keçirəcək və bu, ölkəmizin, xalqımızın növbəti böyük uğuru olacaq.
- Eldar müəllim, sonda Sizi bir daha deputat seçilməyiniz münasibətilə təbrik edirəm. Hər zaman olduğu kimi, səmimi və ətraflı müsahibənizə görə Sizə həm oxucularımız adından, həm də bütün redaksiya heyətimiz adından səmimi minnətdarlığımızı bildirirəm. Sağ olun, sağlıqla qalın.
- Mən də sizə dolğun və məzmunlu suallarınıza görə təşəkkür edirəm. Sağ olun.
Söhbətləşdi: Azər Məmmədov