Dövlət Avtomobil Nəqliyyatı Xidməti (DANX) daşıyıcı şirkət rəhbərlərinə və ictimai nəqliyyatı idarə edən sürücülərə xəbərdarlıq edib.
DANX-dan verilən məlumata görə, xəbərdarlıqda bildirilir ki, ictimai nəqliyyatda süni qiymət artımına yol verildiyi halda daşıyıcı şirkətlərə qarşı xidmət tərəfindən sərt tədbirlər görüləcək.

Həmçinin qeyd olunub ki, vətəndaşlar paytaxt istisna olmaqla respublikanın digər regionlarında şəhərdaxili, rayondaxili və Bakı-Sumqayıt istiqamətində hərəkət edən avtobuslarda süni qiymət artımı ilə qarşılaşdıqları zaman 012-566-52-58 nömrəli "Çağrı Mərkəzi" ilə əlaqə saxlaya bilərlər.

"Bu günə qədər süni qiymət artımı ilə bağlı daxil olan şikayətlərin 96%-nin müntəzəm marşrut xətlərinə aid olmadığı aşkarlanıb. Müntəzəm marşrut xətlərində rast gəlinən süni qiymət artımının isə sürücünün fərdi təşəbbüsü olduğu məlum olub. Bununla bağlı müvafiq daşıyıcı şirkətə məlumat verilərək problem həllini tapıb, gediş haqqı əvvəlki vəziyyətinə qaytarılıb".

Azərbaycanda ictimai nəqliyyatda yeni tarif mexanizimi tətbiq olunacaq.

Report-un xəbərinə görə, bu barədə Nazirlər Kabinetinin 2020-ci ilə dair hesabatında bildirilib.

Sənəddə qeyd olunub ki, bu zaman mütərəqqi beynəlxalq təcrübə nəzərə alınacaq.

Hazırda ictimai nəqliyyatdan güzəştli və nağdsız istifadə ilə bağlı qanunvericiliyin təkmilləşdirilməsi üçün hazırlıq işləri görülür.

Qeyd edək ki, hazırda avtobus və metro daşınması xidmətlərinin qiymətini Tarif şurası müəyyən edir.

Ermənistan Zəngəzur dəhlizinin açılmasını yubatmağa çalışır. Bunu Yeni Azərbaycan Partiyasının (YAP) son qurultayında ölkə başçısı İlham Əliyev də dilə gətirdi. Prezident onu da qeyd etdi ki, Azərbaycanın Ermənistanı Zəngəzur dəhlizini açmağa təhrik edəcək imkanları da kifayət qədərdir.

Bəs Azərbaycan Ermənistanın “Nuh deyib peyğəmbər demədiyi” halda rəsmi Bakı İrəvana qarşı hansı sərt addımları ata bilər. Yəni, hazırda Bakının əlində bu cür imkanlar varmı?

Rusiyalı ekspertlər hesab edir ki, Nikol Paşinyan Zəngəzur dəhlizini açmamaq üçün Bakıya və Moskvaya qarşı son kartlarını oynayır. Rusiyalı ekspertlər bu yolun gec-tez açılacağını dilə gətirirlər.

Azərbaycanlı politoloqlar isə hesab edir ki, Naxçıvanla dəhlizi açmaq, müharibədə məğlub olan ölkənin “qolunu burub yola gətirmək üçün” rəsmi Bakının əlində bir sıra rıçaqlar mövcuddur.

Millət vəkili Rasim Musabəyov Publika.az-a açıqlamasında söyləyib ki, Ermənistanın Zəngəzur dəhlizinin açılmasına törətdiyi maneələr ondan ibarətdir ki, İrəvan üçün məqbul sayılmayan, ancaq məcburən imzaladığı 10 noyabr üçtərəfli bəyanatını öz istədiyi şəkildə yozmağa çalışacaq. Deputatın fikrincə, hazırda Ermənistan öz ordusunu Azərbaycan torpağından çıxarmaq əvəzinə, çalışır ki, orduda vaxtı bitmiş hərbçilərinin yerinə bizim ərazilərə yenidən kontingent göndərsin:

“Yenidən yeni çağırışla hazırda Azərbaycanın nəzarətində olmayan ərazilərə hərbçilər göndərməyə cəhdlər göstərir. Bu isə bizim üçün məqbul deyil. Azərbaycan bunun qarşısını alır. Amma ermənilər bu cür cəhdlərinə davam edir. Ermənistan hesab edir ki, hələlik onların Rusiyaya daşıyacağı heç nələri yoxdur. Nə sənayesi, nə də iqtisadiyyatı var. Hər şey ölüb. İrəvan hesab edir ki, hazırda Zəngəzur dəhlizinin açılması daha çox Bakıya lazımdır. Ona görə də “yox” deməklə Zəngəzur dəhlizini alver predmetinə çevirmək istəyirlər”.

Rasim Musabəyov vurğulayıb ki, Naxçıvanla dəhlizin açılması məsələsi üçtərəfli bəyannamədə də öz əksini tapıb. Yəni, Naxçıvanla Azərbaycanı birləşdirən dəhliz olmalıdır:

“Bu avtomobil yoludursa, Qarints-Şahbuz yoludur. Bu yol sovetlər dönəmində də olub. Digər alternativ yol isə Mehridəndir. Onun da qarşısını “mız-mız”la almağa çalışırlar. Ortalıqda müəyyən resurslar mövcuddur. Erməniləri ağıla gətirmək üçün Azərbaycanın əlində müəyyən resurslar var. Birinci növbədə Rusiya bu yolun açılmasında maraqlıdır. Moskva sabitliyin qorunub-saxlanmasında da maraqlı olduğunu gizlətmir. Biz sülhməramlıların Azərbaycan ərazilərinə logistika daşınmasını çətinləşdirə bilərik”.

Deputatın sözlərinə görə, ermənilər çox “hoppanıb düşərsə”, Azərbaycanın Laçın dəhlizini də bağlaması mümkündür: “Təbii ki, bu gərginliyi artıracaq. Amma Ermənistanı ağıllandırmaq üçün Azərbaycan məcburiyyət qarşısında qalarsa, bu cür sərt addımları da ata bilər. Hələ ki, biz vəziyyətin bu cür ola biləcəyini göstərməyə çalışaraq Ermənistanı ağıllandırmaq yolunu tutmalıyıq. Həmin sərt addımları həyata keçirmək hələ ki, tezdir”.

Görünən odur ki, Naxçıvanla dəhlizin açılması və bölgənin ticari əlaqələrinin inkişafı üçün Zəngəzur dəhlizinin açılmasını çox gözləməyəcəyik. Ən azından burada Türkiyə və Rusiya amili də var. Rusiya öz for-postunun qulağını buraraq onu yola gətirəcək.

Türkiyə də Ermənistana qarşı müəyyən sərt tədbirlər almaqla İrəvanın Zəngəzur daşını ətəyindən tökəcək. Azərbaycanın Laçın dəhlizini bağlaması isə təkcə Ermənistanı yox, eləcə də Rusiyanı çətin vəziyyətə sala bilər. Bunu Kreml də, İrəvan da çox yaxşı anlayır.

Daha bir şəhid zabitimizin övladı dünyaya gəlib.

“Qafqazinfo” xəbər verir ki, Vətən Müharibəsi şəhidi, Xüsusi Təyinatlı Qüvvələrin kapitanı və dağ kəşfiyyatçısı Nurlan Mustafayevin oğlu doğulub.

Körpəyə atasının adını veriblər.

Qeyd edək ki, Mustafayev Nurlan Hamlet Vətən Müharibəsi zamanı Murovdağın, Füzulinin və Hadrutun azadlığı uğrunda gedən döyüşlərdə iştirak edib. O, oktyabrın 12-də Hadrut döyüşləri zamanı şəhid olub.

Şəhidimiz Prezident İlham Əliyevin sərəncamlarına əsasən, ölümündən sonra “Vətən uğrunda”, “Azərbaycan Bayrağı” və “Cəbrayılın azad olunmasına görə” medalları ilə təltif olunub.

 

Vətən müharibəsində işğaldan azad olunmuş torpaqlarımızda sarsıdıcı məğlubiyyətə uğramış Ermənistan ordusunun atıb qaçdığı silah-sursatın aşkar edilməsi istiqamətində tədbirlər davam etdirilir.
Daxili İşlər Nazirliyinin (DİN) Mətbuat xidmətinin Bərdə regional qrupundan verilən məlumata görə, Qubadlı və Cəbrayıl Rayon Polis Şöbələrinin (RPŞ) əməkdaşları aidiyyəti qurumların təmsilçiləri ilə birlikdə partladıcı vasitələrin, silah-sursatın aşkar edilməsi və istifadəyə yararsız olanların zərərsizləşdirilməsi məqsədi ilə xidməti ərazidə müntəzəm reydlər aparırlar.

Növbəti belə tədbir zamanı Qubadlı RPŞ əməkdaşları tərəfindən erməni hərbçilərin ataraq qaçdığı 1 ədəd minaatan qurğusu, 6 ədəd avtomat, 21 ədəd müxtəlif növ qumbaralar və alışdırıcıları, 12 ədəd qumbaraatan mərmisi və alışdırıcıları, 3760 ədəd müxtəlif çaplı patronlar aşkar edilərək götürülüb.

Cəbrayıl RPŞ-nin əməkdaşları tərəfindən isə 20 ədəd avtomat aşkar edilərək aidiyyəti üzrə təhvil verilib.

Ərizəçi İ. Azərbaycan Ombudsmanına müraciət edərək, həyat yoldaşının baş örtüyündən (hicabdan) istifadə etdiyini, Beynəlxalq Mülki Aviasiya Təşkilatının tələblərinə əsasən, üz görünüşünün fotoşəkil üçün uyğun olmasına baxmayaraq, Gədəbəy Rayon Polis Şöbəsinin qeydiyyat və şəxsiyyət vəsiqəsi bölməsi tərəfindən fotoşəklin çəkilməsindən imtina edildiyini bildirib, məsələnin qanunamüvafiq həllində köməklik göstərilməsini xahiş edib.

Bu barədə Azərbaycan Respublikasının İnsan Hüquqları üzrə Müvəkkilinin (Ombudsmanın) 2020-ci il üzrə məruzəsində bildirilib.

Ombudsmanın şikayətdə əks etdirilmiş halların yoxlanılması ilə bağlı Azərbaycan Respublikası Daxili İşlər Nazirliyinə ünvanladığı müraciətə verilmiş cavabda bildirilib ki, Azərbaycan Respublikası Prezidentinin 2013-cü il 23 oktyabr tarixli, 3 nömrəli Fərmanı ilə təsdiq edilmiş “Azərbaycan Respublikası vətəndaşının şəxsiyyət vəsiqəsi haqqında” Azərbaycan Respublikası Qanununun tətbiqi barədə Əsasnamə”nin 2.10-cu və Azərbaycan Respublikası Prezidentinin 2013-ci il 11 iyun tarixli, 908 nömrəli Fərmanı ilə təsdiq olunmuş “Pasportlar haqqında” Azərbaycan Respublikası Qanununun tətbiqi barədə Əsasnamə”nin 3.8-ci bəndlərinə əsasən, vətəndaşın Beynəlxalq Mülki Aviasiya Təşkilatının (ICAO) tələblərinə uyğun fotoşəklinin çəkilməsi müvafiq olaraq, vəsiqə və pasport verən orqanlarda həyata keçirilir. Həmin təşkilatın 9303 nömrəli sənədində fotoşəkillərin yol verilən və yol verilməyən nümunələri dəqiq göstərilib.
Nümunələrdə fotoşəklin çəkilməsi zamanı baş örtüklərindən istifadə edilməsinin yolverilməzliyi, istisna hal kimi isə səlahiyyətli dövlət orqanları tərəfindən konkret nəzərdə tutulmuş halların mövcudluğu qeyd olunub. Həmin hallara dini adətlər, tibbi göstərişlər və mədəni ənənələr aid edilib. Bununla belə, Azərbaycan Respublikasının qanunvericiliyi ilə yuxarıda göstərilən müstəsna hallar nəzərdə tutulmadığından şəxsiyyət vəsiqəsinin və ümumvətəndaş pasportunun alınması üçün baş örtüyü ilə fotoşəklin çəkilməsinin yolverilməz olduğu bildirilib.

Qeyd edilənləri nəzərə alaraq, Ombudsman “Azərbaycan Respublikası vətəndaşının şəxsiyyət vəsiqəsi haqqında” Azərbaycan Respublikası Qanununda şəxsiyyət vəsiqəsinin üzərində Beynəlxalq Mülki Aviasiya Təşkilatının (ICAO) tələblərinə uyğun fotoşəklin yerləşdirilməsinin nəzərdə tutulmasına baxmayaraq, həmin tələblərə aydınlıq gətirilmədiyi və bu halların şikayətlərə səbəb olduğu üçün fotoşəkillərin yol verilən nümunələrinin (baş örtüklərindən istifadə edilməsi və s.) əks etdirilməsi ilə bağlı müvafiq qanuna, habelə “Pasportlar haqqında” Azərbaycan Respublikası Qanununa əlavə və dəyişikliklərin edilməsini təklif edir.

"Ombudsman azadlıq hüququnun müdafiəsi ilə bağlı ünvanına daxil olmuş digər müraciətlərə də diqqətlə yanaşıb, pozulmuş hüquqların bərpasına nail olub" - məruzə sənədində bildirilib..

Azərbaycanda “Pasportlar haqqında” qanuna şəxsiyyət vəsiqəsində baş örtüklərindən istifadə edilməsi ilə bağlı əlavə və dəyişikliklərin edilməsi təklif edilir. Trend xəbər verir ki, bu, Azərbaycanda insan hüquqlarının qorunması haqqında İnsan hüquqları üzrə müvəkkilin (Ombudsmanın) 2020-ci il üzrə məruzəsində qeyd edilib.
Hesabatda bildirilir ki, “Azərbaycan Respublikası vətəndaşının şəxsiyyət vəsiqəsi haqqında” qanunda şəxsiyyət vəsiqəsinin üzərində Beynəlxalq Mülki Aviasiya Təşkilatının (ICAO) tələblərinə uyğun fotoşəklin yerləşdirilməsinin nəzərdə tutulmasına baxmayaraq, həmin tələblərə aydınlıq gətirilmir və bu hallar şikayətlərə səbəb olur. Bunun üçün də fotoşəkillərin yol verilən nümunələrinin (baş örtüklərindən istifadə edilməsi və s.) əks etdirilməsi ilə bağlı müvafiq qanuna, habelə “Pasportlar haqqında” qanuna əlavə və dəyişikliklərin edilməsi təklif edilir.
Bununla yanaşı təklif edilir ki, şəxsin ölkədən çıxışına məhdudiyyətin yalnız məhkəmə qərarı əsasında qoyulması və qəbul edilmiş qərara dair müvafiq şəxsin əlaqə vasitələrinə (mobil nömrəsinə, elektron poçt və ya ev ünvanına və s.) xəbərdarlıq bildirişinin göndərilməsi ilə bağlı müddəanın qanunvericiliyə əlavə edilsin.
“Yaşayış yeri və olduğu yer üzrə qeydiyyat haqqında” qanunda şəxsin yaşayış sahəsindən çıxarıldığı və ya yaşayış sahəsindən istifadə hüququna xitam verildiyi hallarda onun yaşayış yeri üzrə qeydiyyatdan çıxarılmasının mülkiyyətçinin (əmlak sahibinin) tələbinə əsasən inzibati qaydada həyata keçirilməsi mexanizminin hazırlanması və bununla əlaqədar həmin qanuna əlavə və dəyişikliklərin edilməsi də tövsiyə edilir.

Azərbaycan Müdafiə Nazirliyi Füzuli rayonunun Gorazıllı kəndinin görüntülərini yayımlayıb.

Həmin görüntüləri təqdim edirik:

Ombudsman Aparatı Azərbaycanda uşağın anadan olmasına görə ailələrə ödənilən müavinətlərin məbləğinin artırılmasını təklif edir.
“Report” xəbər verir ki, bu barədə Azərbaycan Respublikasının İnsan Hüquqları üzrə Müvəkkilinin (Ombudsmanın) 2020-ci il üzrə məruzəsində bildirilib.

Qeyd olunub ki, “Sosial müavinətlər haqqında” qanunla nəzərdə tutulan birdəfəlik müavinətlərin zəruri hallarda ödənildiyini nəzərə alaraq, uşağın anadan olmasına görə, radiasiya qəzası nəticəsində zərər çəkmiş şəxslərə hər il müalicə üçün, habelə dəfn üçün nəzərdə tutulmuş müavinətlərin, bununla yanaşı, ailə başçısını itirməyə görə və bir yaşınadək uşağı olan aztəminatlı ailələrə ödənilən müavinətlərin məbləği artırılmalıdır.

Qeyd edək ki, məruzə Milli Məclisin İnsan hüquqları komitəsinin sabah keçiriləcək iclasında müzakirəyə çıxarılacaq.

Hazırda ölkə qanunvericiliyinə görə “süd pulu” 200 manat təşkil edir.