 |
|
Cəbhənin Ağdərə-Tərtər istiqamətində mühasirəyə alınan erməni qüvvələrinin artilleriya vasitələri ilə məhv edilməsi və ərazinin təmizlənməsi əməliyyatı keçirilir.
Bu barədə "Ölkə.Az"a Azərbaycan Müdafiə Nazirliyinin Mətbuat Xidmətindən bildirilib.
Hazırda bütün cəbhə boyu hərbi əməliyyatlar davam edir.
Rusiya tərəfinin təşəbbüsü ilə Azərbaycan Respublikasının Rusiyadakı fövqəladə və səlahiyyətli səfiri Polad Bülbüloğlu Rusiya Federasiyası Xarici İşlər Nazirliyində Rusiya Daxili İşlər nazirinin birinci müavini Aleksandr Qorovoy və Rusiya Xarici İşlər nazirinin müavini Andrey Rudenko ilə görüşüb.
Azərbaycanın Rusiyadakı (Moskva) səfirliyindən “Report”un Rusiya bürosuna verilən məlumata görə, A.Rudenko Rusiyada yaşayan, yeni iş yerləri açaraq ölkə iqtisadiyyatına əvəzsiz töhfə verməkdə davam edən çox sayda azərbaycanlının xüsusi rolunu qeyd edib.
Eyni zamanda, Dağlıq Qarabağ münaqişəsi zonasında mövcud hərbi əməliyyatların artması ilə əlaqədar Rusiya Federasiyası ərazisində yarana biləcək millətlərarası gərginliyin qarşısını almaq üçün tədbirlər görmək lazım olduğu qeyd edilib.
Aleksandr Qorovoy isə bildirib ki, Rusiya Daxili İşlər Nazirliyi hər iki icmanın nümayəndələri tərəfindən yerlərdə ola biləcək təxribatların qarşısını almaq üçün ən sərt tədbirlər görəcək. Bura xüsusən, saxlanılma, həbs, vətəndaşlıqdan məhrum etmə və ölkədən çıxarılma daxilidir.
Onlara həmçinin Rusiya ərazisində qalan, Rusiya Federasiyasının vətəndaşlığını qəbul etmiş, müvəqqəti yaşamaq üçün icazə, yaşayış icazəsi və patent almış Azərbaycan vətəndaşlarının sayı, habelə Rusiya ərazisindən deportasiya edilən şəxslərin sayı barədə statistik məlumatlar verilib.
“Görüş zamanı Rusiya tərəfi Səfirliyin Rusiyadakı azərbaycanlılara və diaspora təşkilatlarına ölkənin qanunlarına riayət etmələri üçün müraciətləri müsbət qiymətləndirib. Səfirlik bir daha Rusiya Federasiyasında yaşayan bütün həmvətənlərini hər hansı bir qanunsuz hərəkətdən çəkinməyə, Rusiya qanunvericiliyinə riayət etməyə və müstəsna qanun çərçivəsində fəaliyyət göstərməyə çağırır.
Paytaxtda koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə elan edilən xüsusi karantin rejim qaydalarının təmin olunması məqsədilə gücləndirilmiş nəzarət profilaktik-maarifləndirmə tədbirləri davam etdirilir.
Daxili İşlər Nazirliyindən "Report"a verilən məlumata görə, mövcud sanitar-epidemioloji vəziyyətdən irəli gələrək virusa yeni yoluxma hallarına yol verməmək, bu virusla mübarizədə dövlətimiz tərəfindən əldə edilən müsbət dinamikanın qorunub-saxlanılması üçün tətbiq olunan karantin rejiminin tələblərinə, tibbi-profilaktik qaydalara əməl olunması üçün qapalı yerlərdə, ictimai nəqliyyatda nəzarət diqqət mərkəzində saxlanılır.
İctimai iaşə obyektlərində, mağazalarda, ictimai nəqliyyatda polis və Daxili Qoşunların hərbi qulluqçuları xidmətin qəbul edilən sanitar-epidemioloji normalara uyğun qurulması və aparılması, sosial məsafənin təmin edilməsi, eləcə də qapalı yerlərdə tibbi maskadan istifadənin zəruriliyi bağlı profilaktik maarifləndirici söhbətlər aparırlar, şəhər sakinlərinin məsuliyyət hissinin artırılması ilə bağlı tövsiyələr verilir, qanunun tələbləri izah edilir. Aşkarlanan hər bir hüquqazidd əmələ görə qanunvericiliyin tələblərinə uyğun olaraq, müvafiq tədbirlər görülür.
Qeyd edək ki, COVID-19 infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə Azərbaycan Respublikasının ərazisində xüsusi karantin rejiminin müddəti 2020-ci il 2 noyabr saat 06:00-dək uzadılıb.
Müdafiə Sənayesi naziri Mədət Quliyevin qayını da hərbi xidmətə yollanıb.
Bu barədə M.Quliyevin həyat yoldaşı Zəhra Quliyeva məlumat verib:
“Qardaşım artıq ikinci dəfə həqiqi xidmətə, elini-obasını, vətənini qorumağa getdi. Yaşasın Azərbaycan! Yaşasın Ali Baş Komandan! Allah bütün hərbçilərimizi qorusun”. (Mediapost.az)
Bakı Şəhər Baş Polis İdarəsi (BŞBPİ) Dövlət Yol Polisi İdarəsinin bölmə rəisi, polis polkovniki Vaqif Əsədovun oğlu könüllü olaraq döyüşə gedib. Avtosfer.az xəbər verir ki, V.Əsədov oğlunu bu gün cəbhəyə yola salıb.
Polis polkovnikinin oğlu Pərvin Əsədov döyüşə bu gün könüllü olaraq gedib.
Məsələ ilə bağlı Vaqif Əsədovla əlaqə saxladıq. O bildirdi ki, oğlunu bu gün yola salıb: "Bəli, bu gün cəbhəyə əsgər yola saldım. Hesab edirəm ki, oğlum Qarabağın azad edilməsində iştirak etməlidir. Ya Qarabağ, ya ölüm! Bunu onun özü də belə istəyir. Ya Qarabağda bayrağımızı dalğalandıracaq, ya da şəhid olacaq".
Xatırladaq ki, Pərvin Əsədov Fövqəladə Hallar Nazirliyinin əməkdaşıdır. 29 yaşı var. Pərvin Əsədov hərbi xidmətdə Ağdamda ön cəbhədə olub.
V.Əsədovun sözlərinə görə, oğlu aidiyyəti üzrə ərazilərdə Qarabağın işğaldan azad edilməsi üçün canından belə keçməyə hazırdır. "İnşallah ki, itirdiyimiz torpaqları qaytararıq. Oğlum da qələbə xəbəri ilə qayıdar. İnanıram və arzulayıram ki, oğlum qələbə bayrağını sancacaq. Ali Baş Komandan bu gün əmr versə, özüm də Vətən uğrunda döyüşlərə hazıram və son damla qanıma qədər mübarizə apararam", - deyə Vaqif Əsədov bildirib.
"Mən cəbhəyə bir əsgər yola salmışam. Hərbi xidməti də cəbhə zonasında keçmişdi. İndi də cəbhəyə getdi. Qələbə bizimdir, qoy o da bu müqədəş döyüşdə iştirak etsin. Mən də döyüşlərdə iştirak etməyə hazıram".
Sentyabrın 30-da gözlənilən hava şəraiti açıqlanıb.
Milli Hidrometeorologiya Xidmətindən verilən məlumata görə, sentyabrın 30-da Bakıda və Abşeron yarımadasında havanın dəyişkən buludlu olacağı, əsasən yağmursuz keçəcəyi gözlənilir.
Cənub-şərq küləyi əsəcək. Havanın temperaturu Bakıda və Abşeron yarımadasında gecə 15-17, gündüz 22-25 dərəcə isti olacaq. Atmosfer təzyiqi 767 mm civə sütunundan 763 mm civə sütununa enəcək, nisbi rütubət gecə 60-70, gündüz 40-45 faiz olacaq.
Sentyabrın 30-da Azərbaycanın rayonlarında havanın əsasən yağmursuz keçəcəyi, lakin axşam bəzi yerlərdə şimşək çaxacağı, yağış yağacağı gözlənilir. Səhər bəzi yerlərdə duman olacaq. Mülayim şərq küləyi əsəcək. Havanın temperaturu gecə 12-17, gündüz 23-28, dağlarda gecə 7-11, gündüz 13-16 dərəcə isti olacaq.
Tibbi-meteoroloji proqnoz
Sentyabrın 30-u, oktyabrın 1-də Abşeron yarımadasında komfort temperatur şəraiti gözlənilir ki, bu da meteohəssas insanlar üçün əlverişlidir.
Azərbaycan Respublikası Ərazilərinin Minalardan Təmizlənməsi üzrə Milli Agentliyi (ANAMA) 27 sentyabr tarixindən etibarən cəbhəboyu ərazilərdə operativ və təxirəsalınmaz əməliyyat çıxışlarını həyata keçirmək məqsədilə çevik mobil əməliyyat qrupları yerləşdirib.
'Bu barədə qurumun açıqlamasında bildirilib.
Qeyd olunan qruplar eyni zamanda sakinlərə yerlərdə təhlükəsiz hərəkət qaydaları, Mina Təhlükəsinə dair maarifləndirmə və xəbərdarlıq istiqamətində fəaliyyəti həyata keçirirlər.
Son günlərdə ermənilər tərəfindən davamlı olaraq artilleriya atəşinə məruz qalan yaşayış məntəqələri və əkin sahələri sursatlarla çirklənmiş ərazilərdir və atəşə tutulan bu ərazilər təhlükəli ərazi hesab olunur.
Bu səbəbdən agentlik cəbhəboyu ərazilərdə yaşayan sakinləri naməlum əşyalara toxunmamağı, xüsusilə də uşaqları tanımaqdıqları əşyalara əl vurmamağı və dərhal aidiyyəti üzrə müraciət etməyə çağırır.
Sakinlərə tövsiyə olunur ki, təhlükəli və ya şübhəli əşyalar barədə dərhal Azərbaycan Respublikası Daxili İşlər Nazirliyinin (DİN) “102” Xidməti-Zəng Mərkəzinə, Azərbaycan Respublikasının Fövqəladə Hallar Nazirliyinin (FHN) “112” Xidməti-Zəng Mərkəzinə, Rayon Polis Şöbələri (RPŞ), eləcə də Rayon İcra Hakimiyyəti orqanlarına məlumat versinlər.
Aparılan əməliyyat-axtarış tədbirləri barədə ictimaiyyətə davamlı olaraq məlumat veriləcək.
Xankəndidə mülki əhalinin kortəbii təxliyyəsinə başlanılıb.
“Qafqazinfo” xəbər verir ki, bu barədə “İzvestiya” qəzeti məlumat verib. Nəşrin məlumatına görə, insanlar kütləvi şəkildə İrəvana göndərilir.
“Onlar dərhal göndərilirlər, orada heç bir yaxınları yoxdur. Təkcə avtobuslarla deyil, polis yoldan keçənləri dayandırır və özləri ilə İrəvana aparırlar ”,-deyə qəzetin müxbiri bildirib.
Bildirilib ki, hazırda Azərbaycan ordusu Füzuli şəhəri istiqamətində Dağlıq Qarabağa hücumlarını davam etdirir.
"Horadiz şəhərində yerləşən Füzuli rayon xəstəxanasına baş çəkən zaman iki hadisə məndə çox qürur hissi yaratdı. Əvvəlla, böyük qürur hissi ilə qeyd edim ki, yaralılarımızın bir çoxu ilkin tibbi yardım aldıqdan sonra cəbhə bölgəsinə qayıdacaqlarını bildirirdilər".
“Qafqazinfo” xəbər verir ki, bu sözləri millət vəkili Vüqar Bayramov öz feysbuk hesabında yazıb. Deputat qeyd edib ki, həkimlər onlara daha bir neçə gün xəstəxanada qalıb müalicə olunmağı təklif etsələr də, mərd əsgərlərimiz döyüş xəttində öz əsgər yoldaşlarının yanında olmağa, vətən uğrunda döyüşü davam etdirməyə üstünlük verərək yenidən döyüşə qayıdıblar:
“İkinci qürurverici fakt. Xəstəxananın yanında özəl aptek yerləşir. Sentyabrın 27-si erməni təxribatı baş verəndən sonra aptek sahibi aptekin açarını xəstəxanın baş həkiminə verib və deyib ki, nə qədər dərman lazım olarsa, pulsuz götürün. Həkimlər də əlavə dərman lazım olanda aptekdən istifadə edirlər".
Deputat qeyd edib ki, bu fakt milli birliyin, xalqın orduya dəstəyinin təsdiqidir.
Mingəçevirdən olan şəhid qardaşlar Əhmədov Əli İlqar oğlu və Əhmədov İslam İlqar oğlu dəfn edilib.
Qeyd edək ki, İlqar sentyabrın 27-də, İslam isə 28-də Ermənistan Silahlı Qüvvələrinin təxribatı nəticəsində şəhid olub.
"Ölkə.Az" dəfn mərasimindən çəkilmiş vidoenu təqdim edir.