 |
|
“Bu gün Azərbaycanın strateji tərəfdaşlıq və müttəfiqlik səviyyəsində münasibətlərini sürətlə dərinləşdirdiyi dost ölkələrdən biri də Qazaxıstandır. Mərkəzi Asiya ölkələri, o cümlədən regionun Türk dövlətləri ilə əlaqələrin genişləndirilməsi və möhkəmləndirilməsi Azərbaycanın xarici siyasət kursunun prioritet istiqamətlərindən biridir. Türkdilli ölkələrin xalqlarının etnik və mədəni kökləri, dil və ortaq keçmiş amili bugünkü münasibətlər üçün kifayət qədər möhkəm təməl rolunu oynayır.”Bu sözləri mətbuata verdiyi açıqlamasında Milli Məclisin deputatı Kamaləddin Qafarov deyib.
Deputat qeyd edib ki, son illər Prezident İlham Əliyevin Mərkəzi Asiya ölkələrinə, region dövlətlərinin başçılarının isə Azərbaycana səfərləri müntəzəm xarakter alıb. “Dövlət başçımızın Qazaxıstana son səfəri 2023-cü il noyabrın 2-də olub. Qazaxıstan Prezidenti Kasım-Jomart Tokayev isə ötən il noyabrın 24-də Bakıda keçirilən BMT-nin Mərkəzi Asiya Ölkələrinin İqtisadiyyatları üçün Xüsusi Proqramının – SPECA-nın iştirakçı ölkələrinin dövlət və hökumət başçılarının Zirvə görüşündə iştirak etmək üçün ölkəmizdə işgüzar səfərdə olub. Bu ilin mart ayının 11-də isə, Qazaxıstan Prezidenti növbəti dəfə ölkəmizə rəsmi səfərə gəlib. Dövlət başçılarının görüşü zamanı bir çox vacib məsələlər müzakirə olunub, ikitərəfli əlaqələrin inkişaf perspektivlərinin əsas istiqamətlərinə dair fikir mübadilələri aparılıb.”
K.Qafarov hazırda Azərbaycan-Qazaxıstan iqtisadi əlaqələrinin yüksələn xətlə inkişaf etdiyini vurğulayaraq deyib: “ Prezident İlham Əliyevin mətbuata verdiyi bəyanatda qeyd olunur ki, Azərbaycan ilə Qazaxıstan arasında qarşılıqlı iqtisadi-ticari fəaliyyət sahəsi böyük inkişaf potensialına malikdir. TransXəzər nəqliyyat dəhlizinin artıq reallığa çevrilməsi, onun özlüyündə böyük dərəcədə regional əməkdaşlığın səviyyəsini müəyyən etməsinin rəmzlərindən biridir. Məsələ bundadır ki, qonşularla yaxşı münasibət olmadan tranzit ölkə olmaq mümkün deyil. TransXəzər nəqliyyat dəhlizi bu gün öz potensialını tam şəkildə açır. Dövlət başçımızın dediyi kimi, Xəzər bu gün təkcə Azərbaycan ilə Qazaxıstan arasında yox, həm də bir çox ölkələr arasında körpü rolunu oynayır. TransXəzər nəqliyyat marşrutu möhkəm bazaya malikdir. Bu bazanı formalaşdırmış əsas amil də budur ki, həm Qazaxıstanda, həm də Azərbaycanda əvvəlki illərdə bu sahəyə böyük investisiyalar yatırılıb. Hər ikisi zəngin təbii ehtiyatlara malik olmalarına baxmayaraq, bu ölkələr nəqliyyat infrastrukturlarının bu gün beynəlxalq standartlara tam uyğun gəlməsini qarşılarına məqsəd qoyublar və buna nail olublar. Həm Qazaxıstanda, həm də Azərbaycanda dəmir yolları, aeroportlar, avtomobil yolları, dəniz limanları daxil olmaqla, irimiqyaslı nəqliyyat layihələri həyata keçirilib və bu gün həmin layihələrin nəticələrindən bütün region ölkələri də bəhrələnə bilirlər.”
Daha sonra K.Qafarov Azərbaycanın işğaldan azad edilmiş ərazilərində görülən işlərə qardaş ölkənin verdiyi töhfənin səmimi dostluğun təzahürü olduğunu qeyd edib: “Möhtərəm dövlət başçımızın təqdim etdiyi açıqlamalarda xüsusilə diqqəti cəlb edən məqamlardan biri də Qazaxıstanın ölkəmizə etdiyi hədiyyənin yüksək dəyərləndirilməsi oldu. Məlum olduğu kimi, Azərbaycan Vətən müharibəsi başa çatdıqdan dərhal sonra özünün işğaldan azad olunmuş ərazilərində genişmiqyaslı bərpa-quruculuq işlərinə başlayıb. Qeyd etmək lazımdır ki, Azərbaycan bütün bu işləri yalnız öz vəsaitləri hesabına, heç bir maliyyə yardımı almadan, kredit götürmədən həyata keçirir. Prezident İlham Əliyev öz çıxışında işğaldan azad edilmiş Füzuli şəhərində Qazaxıstan hökuməti tərəfindən Kurmanqazı adına Uşaq Yaradıcılıq Mərkəzinin tikildiyini bir daha diqqətə çatdırdı. Dövlət başçısı vurğuladı ki, bu addım Azərbaycan Prezidenti və xalqı tərəfindən yüksək qiymətləndirilir. Şübhəsiz bu Mərkəz ölkələrimizin və xalqlarımızın dostluğunun, qardaşlığının, qarşılıqlı dəstəyinin daha bir simvoluna çevriləcək. Bu münasibətlər isə, əlbəttə ki, bütün Türk dünyasının daha da möhkəmlənməsinə xidmət edir” .
Yol-xeber.az" xəbər verir ki, Azərbaycanın 2030-cu ilə qədər sosial-iqtisadi inkişafa dair beş milli prioritetindən biri “Təmiz ətraf mühit və yaşıl artım ölkəsi” kimi müəyyən edilmişdir. Həmin prioritetə uyğun olaraq, ətraf mühitin sağlamlaşdırılması, yaşıllıqların bərpası və artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində çox mühüm işlər aparılır. BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası – COP29 kimi mötəbər bir tədbirin Azərbaycanda keçirilməsi ilə əlaqədar yekdil qərarın verilməsi beynəlxalq ictimaiyyət tərəfindən Azərbaycana böyük hörmət və etimadın, eləcə də ölkəmizin milli, regional və qlobal səviyyədə ətraf mühitin qorunması, iqlim dəyişmələrinin qarşısının alınması işinə töhfəsinin təqdir olunmasının bariz nümunəsidir.
Bu məqsədlə Azərbaycan Respublikasının Prezidentinin 25 dekabr 2023-cü il tarixli Sərəncamı ilə 2024-cü il ölkəmizdə “Yaşıl dünya naminə həmrəylik ili” elan edilmişdir.
Azərbaycan Avtomobil Yolları Dövlət Agentliyi tərəfindən bu çərçivədə M-1 Bakı-Quba-Rusiya Federasiyası ilə dövlət sərhədi avtomobil yolunun 33,0 - 35,0-ci km-nin mühafizə zolağında1500 ədəd Eldar şamı ağacları əkilmişdir.
Ağacəkmə aksiyası Agentliyin “Avtomobil Yollarının Yaşıllaşdırması” Məhdud Məsuliyyətli Cəmiyyətləri tərəfindən respublika əhəmiyyətli avtomobil yollarının mühafizə zolaqlarında da keçirilmişdir. Bakı-Ələt-Qazax-Gürcüstan Respublikası ilə dövlət sərhədi avtomobil yolunun Hacıqabul-Gəncə-Qazax hissəsininin, Yevlax-Zaqatala-Gürcüstan Respublikası ilə Dövlət sərhədi, həmçinin Bakı-Ələt-Astara-İran İslam Respublikası ilə dövlət sərhədi avtomobil yollarının mühafizə zolaqlarında, eyni zamanda Bakı şəhərinin Zığ dairəsi-Heydər Əliyev Hava Limanı avtomobil yolunun mühafizə zolağında, paytaxt ərazisindəki digər yolötürücüləri və yolqovşaqlarının ərazilərində xeyli miqdarda müxtəlif növ ağac tingləri və kol bitkisi əkilmişdir. Əkilən ağaclara üzvi gübrə verilərək suvarılmışdır. Əkilən ağacların böyük hissəsi Azərbaycan Avtomobil Yolları Dövlət Agentliyi Avtomobil Yollarının Yaşıllaşdırılması MMC-lərinin tinglik sahələrində yetişdirilmişdir.
Qeyd edək ki, bu yaşıllıqlara qulluq zamanı onların vəziyyəti öyrənililir, xəstəlik və zərərvericilərdən mühafizə olunması məqsədilə müntəzəm müşahidələr aparılır. Aqrotexniki qulluq zamanı isə torpaqda yumşaltma işləri aparılır, alaq otları və digər yabanı kollar sahədən götürülür, yaşıllıqlar suvarılır və mineral gübrə ilə yemləmə, habelə xəstəlik və zərərvericilərdən mühafizəsi üzrə profilaktik və fitosanitar mübarizə tədbirləri aparılır.
Bu tədbirlərin vaxtlı-vaxtında və aqrotexniki müddətlərdə aparılması yaşıllıqların bioloji inkişaf faizinin yüksəlməsinə və normal inkişaf etməsinə şərait yaradır.
2024-cü ilin “Yaşıl dünya naminə həmrəylik ili” elan edilməsi çərçivəsində Azərbaycan Avtomobil Yolları Dövlət Agentliyi tərəfindən bu kimi tədbirlər uğurla davam etdiriləcəkdir.
YOLUNUZ AÇIQ OLSUN...
Bakıda daha bir ərazidə fərdi evlərin söküntüsünə başlanılacaq.
BAKU.WS-in əldə etdiyi məlumata görə, söhbət paytaxtın Nəsimi rayonunda yerləşən "Kubinka" adlanan ərazidən gedir. Bu ərazidə söküntü işləri aparılması barədə məlumat vermişdik. İndi isə "Kubinka"nın yeni məhəlləsində söküntü işləri aparılacaq.
Belə ki, Cəlil Məmmədquluzadə küçəsində, daha dəqiq desək keçmiş 2 nömrəli çörək zavodunun ərazisindəki evlər plana düşəcək. Söküləcək fərdi evlərin yerində hündürmərtəbəli binaların tikilməsi nəzərdə tutulub.
Artıq tikinti işlərini aparan şirkət rəsmiləri sakinlərlə danışıqlara başlayıb. Uzun illər ikimərtəbəli binalarda yaşayan vətəndaşlara yeni tikiləcək binalardan mənzillər təklif olunur. Yeni inşa olunacaq binalardan mənzil almaq istəyən vətəndaşlar əvvəlki evlərindən 20 kvadratmetr əlavə mənzilə sahib olacaqlar.
İnşaat işləri getdiyi müddətdə isə sakinlər kirayə pulları ilə təmin ediləcəklər. Evlərinin kavdratından asılı olaraq sakinlər 400-500 manat arasında kirayə pulu alacaqlar.
Qeyd edək ki, tikinti işlərinə ikimərtəbəli binalarda yaşayan sakinlərin hər biri ilə razılaşma əldə olunduqdan sonra başlanılacaq. "Kubinka"da bəzi vətəndaşların həddən artıq kompensasiya tələbi tikinti işlərinin yarıda qalması ilə nəticələnb. Buna görə, pilot layihənn icra edilməsi üçün 100 faiz sakinlərlə razılıq əldə olunması gərəkdir.
Filologiya üzrə fəlsəfə doktoru, professor Kamran Kazımov Astara Pedaqoji Kollecinin direktoru vəzifəsinə təyin edilib.
Bu barədə Elm və Ali Təhsil üzrə Dövlət Agentliyindən (EATDA) məlumat verilib.
Bildirilib ki, Kamran Kazımov bu vəzifəyədək Lənkəran Dövlət Universitetinin sosial məsələlər üzrə prorektoru vəzifəsində çalışıb.
Həmçinin qeyd edək ki, K.Kazımov şəhid Vüsal Kazımovun atasıdır. Sözügedən islahatların davamı olaraq Kollecin tədris işləri üzrə direktor müavini Yusif Şahnamazov Agentliyin 29 fevral 2024-cü il tarixli əmri ilə tutduğu vəzifədən azad edilib və Kollecin coğrafiya müəllimi Əsgərzadə Aynur Aydın qızı tədris işləri üzrə direktor müavini vəzifəsinə təyin olunub.
Qeyd edək ki, Astara Pedaqoji Kollecində keçirilən monitorinq zamanı Kollecdə tədrisin təşkili ilə bağlı çoxsaylı nöqsanlar aşkar edilib və bu nöqsanların aradan qaldırılması üçün EATDA tərəfindən kadr və struktur islahatlarına başlanılıb.
Nəqliyyat Əlaqələndirmə Şurasının qərarına əsasən, bu gündən metronun "28 May" stansiyasının qarşısına şəxsi avtomobillərlə giriş qadağan edilib.
BAKU.WS xəbər verir ki, ərazidə müvafiq nişanlar quraşdırılıb.
Hazırda ərazidə Azərbaycan Yerüstü Nəqliyyat Agentliyinin və Dövlət Yol Polisi (DYP) əməkdaşları xidmət göstərir.
Əraziyə yalnız ictimai nəqliyyatın girişinə icazə var.
Şəxsi avtomobili ilə sözügedən əraziyə daxil olanlar müvafiq olaraq 80 manat cərimə edilir.
Həmçinin, maşını parklanma ərazisində uzunmüddətdir qalan avtomobillərin çıxarılması üçün vətəndaşlara şərait yaradılır.
Əvvəl parklanma yeri kimi istifadə olunan ərazi isə boşaldılıb.
“Bakı Metropoliteni” QSC-nin “28 May” stansiyası ətrafında mikromobillik infrastrukturunun qurulması nəzərdə tutulur.
Bu barədə Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi məlumat yayıb.
Bildirilib ki, ərazidə aidiyyəti qurumlarla birlikdə abadlaşdırma işləri həyata keçiriləcək. Bu işlər çərçivəsində asfalt örtüyünün dəyişdirilməsi, mikromobillik infrastrukturunun qurulması, o cümlədən velosiped zolaqlarının təşkil edilməsi nəzərdə tutulur. Bakı Dəmiryol Vağzalına gəlib-gedənlər üçün qarşılama və yolasalma zonası da təşkil olunacaq.
Bu gün rəqəmsal inkişaf və nəqliyyat nazirinin müavini Rəhman Hümmətov Milli Məclisin İqtisadi siyasət, sənaye və sahibkarlıq komitəsinin iclasında Bakıya 20 min taksinin kifayət etdiyini bildirib. O, həmçinin taksi sayının yaydan bəri 67 mindən 60 minə azaldıldığını qeyd edib. Yerüstü Nəqliyyat Agentliyinin İdarə Heyətinin sədri Anar Rzayev isə Bakıda taksilərin sayının digər ölkələrdə olan saydan 4 dəfə çox olduğunu vurğulayıb. Görünən odur ki, taksilərin sayının getdikcə daha da azaldılması prirotitet məsələlərdəndir.
Nəqliyyat məsələləri üzrə ekspert Eldəniz Cəfərov İqtisadiyyat.az-a açıqlamasında deyir ki, qeyd olunan 60 min taksinin ən azı 50%-i bu sahədə fəaliyyət göstərməyə uyğun deyil.
Onun sözlərinə görə, müəyyən xəstəlikləri, problemləri olan, eləcə də yaşı 21-dən və sürücülük təcrübəsi 2 ildən az olan insanlar taksi fəaliyyəti ilə məşğul olmamalıdır:
"Bundan əlavə, avtomobillərə olan tələblər çox vaxt yerinə yetirilmir. Onların əksəriyyəti nasaz, yararsız vəziyyətdədir və taksi fəaliyyətinə uyğun gəlməyən nəqliyyat vasitələridir. Ona görə də taksilərin sayının azalmasına ehtiyac var. Yəni burada meyarlara cavab verməyən taksi sürücüləri və taksi fəaliyyətində istifadə olunan avtomobillərin kənarlaşdırılması nəzərdə tutulur. Həmçinin avtomobillərin rəngi, seqmenti,onun sazlığı məsələsinə də ayrıca diqqət edilməlidir".
Ekspert həmçinin AYNA-nın artıq bir müddətdir taksi sürücüləri üçün xüsusi kurslar təşkil etdiyini xatırladıb. O bildirib ki, sürücülər mütləq həmin kurslardan keçməli, onların səhhəti, sürücülük təcrübəsi, eləcə də avtomobili meyarlara cavab verməlidir.
E.Cəfərov söyləyib ki, peşəkar taksi sürücüləri bugünkü meyarlara cavab verən avtomobilləri ilə fəaliyyətlərini əvvəlki kimi davam etdirəcəklər: "Taksi fəaliyyətində istismar olunan avtomobillərin istehsal ilinin də rolu olacaq. Hesab edirəm ki, köhnə, məsələn 30 ilin avtomobilləri artıq taksi fəaliyyətində istismar olunmayacaq və olunmamalıdır. Ümumiyyətlə, taksi bu gün vətəndaşlarımız üçün təhlükəsiz və keyfiyyətli olmalıdır".
Bu gündən müsəlman aləminin müqəddəs ayı sayılan Ramazan daxil olub.
Ramazan bayramının 10-11 aprel tarixlərinə təsadüf edəcəyi gözlənilir.
Bu məqsədlə də Baş nazir Əli Əsədovun Qərarına əsasən, Ramazan bayramında ardıcıl 5 qeyri-iş günü olacaq.
Belə ki, Qərara əsasən, iş və istirahət günlərinin ardıcıllığını təmin etmək məqsədilə aprelin 12-si həftənin cümə gününə təsadüf etdiyindən aprelin 6-sı şənbə günü ilə yerləri dəyişdirilib.
Bu da o deməkdir ki, ardıcıl 5 gün - aprelin 10,11,12,13 və 14-ü iş olmayacaq. Aprelin 6-sı isə rəsmi iş günü elan edilib.
"Xəzər dənizinin səviyyəsi onun su balansından asılıdır”.
Bu sözləri "AzTV Xəbər”ə müsahibəsində Coğrafiya elmləri doktoru Səid Səfərov deyib.
O bildirib ki, son 10 il ərzində bir metrdən çox su itkisi qeydə alınıb ki, buna da səbəb səthə düşən yağıntının miqdarının azalması, buxarlanma prosesinin isə artmasıdır.
Ətraflı süjetdə:
“Yaxşı olar ki, yazın gəlişi ilə avtomobilinizin mühərrikindəki yağı dəyişdirəsiniz”.
Bu barədə “Za Rulem” jurnalının avtomobil eksperti Aleksey Revin məlumat verib.
“Əgər avtomobil ildə 10 min kilometrdən az yol qət edirsə, o zaman məhz yazda yağı dəyişdirməyin mənası var. Fakt budur ki, qışda yağ temperatur fərqləri 120 dərəcə Selsiyə çata bilər. Avtomobil soyuq mühərriklə hərəkət edərkən yağ yanacaqla doyur. Nəticədə yağ öz xüsusiyyətini yayda olduğundan daha tez itirir”, - deyə Revin izah edib.
Avtomobil ekspertinin sözlərinə görə, qışda mühərrik daha çox çirklənir. Bundan əlavə, yağ filtri aşınma məhsulları səbəbindən tıxanır:
“Bu baxımdan, yağ yazda dəyişdirilə bilər və yayda dinamik istifadədən qorxmadan avtomobili daha tez-tez idarə edə bilərsiniz”.
Mütəxəssis qeyd edib ki, avtomobil ildə 10 min kilometrdən çox yol qət edirsə, mühərrik yağını yaz və payızda dəyişmək daha yaxşıdır.
© Oxu.az