 |
|
Azərbaycan Avtomobil Yolları Dövlət Agentliyi hərəkətdə olan iriqabaritli və (və ya) ağırçəkili nəqliyyat vasitələrinin çəki və kütlə parametrlərini ölçən texniki vasitələrin (elektron tərəzilərin və çiplərin) ümumi istifadədə olan avtomobil yollarında quraşdırılması ilə əlaqədar yolda hərəkətin məhdudlaşdırılması barədə hərəkət iştirakçılarına (sürücülərə) müraciət edib.
Yol-xeber.az-ın məlumatına görə, müraciətdə deyilir ki, Bakı-Şamaxı-Yevlax avtomobil yolunun 55,3-cü kilometrində (Cəngi ərazisi) quraşdırılması nəzərdə tutulan elektron tərəzi sistemi işlərinin başladılması ilə əlaqədar bu gündən başlayaraq təqribən 2 ay müddətində nəqliyyat vasitələrinin hərəkətinin qismən (fasilələrlə) məhdudlaşdırılaraq 500 metr məsafədə kənardankeçmə yolu ilə təşkil ediləcək.
"Sürücülərdən aparılan işlərə anlayışla yanaşmaları, qeyd olunan müddət ərzində sözügedən hissədə hərəkətdə olarkən diqqətli olmaları, ərazidə qoyulacaq müvəqqəti yol nişanlarının tələblərinə və yol hərəkəti qaydalarına riayət etmələri xahiş olunur", - deyə agentlik bəyan edib.
Noyabr ayında Azərbaycanda keçirilən COP29 tədbiri müddətində bağçaların fəaliyyəti ilə bağlı yanaşmamız ondan ibarətdir ki, həmin təhsil müəssisələri işləsin.
Trend xəbər verir ki, bunu elm və təhsil naziri Emin Əmrullayev jurnalistlərə açıqlamasında deyib.
Nazir bildirib ki, işləyən analar üçün bağça önəmlidir.
“Ona görə də bağçalar həmin ərəfədə fəaliyyətini davam etdirəcək. Sadəcə xüsusi hallarda ümumi proses üçün bu fəaliyyət üçün hər hansı problem yaradacağı təqdirdə müdaxilə oluna bilər.
Çünki normalda bağçalarda məcburi davamiyyət yoxdur. Misal olaraq, adətən valideynlər məzuniyyətə gedirsə, övladlarını özləri ilə götürür”,- deyə o qeyd edib.
Daxili İşlər Nazirliyi və aidiyyəti qurumlarla birgə respublikanın ayrı-ayrı şəhər və rayonlarında, meşə, park, müalicə-sağlamlıq, turizm zonalarının ərazilərində, Xəzər dənizinin sahil zolağında, çimərliklərdə məişət tullantılarının urnalardan kənar yerlərə atılması, sənaye və məişət tullantılarının qalaqlanması hallarının qarşısının alınması məqsədilə gündəlik olaraq nəzarət-profilaktik tədbirlər keçirilir.
DİN-in Mətbuat Xidmətinin əməkdaşı Nurlan Əliyev BAKU.WS-in sorğusuna cavab olaraq bildirib ki, tədbirlər zamanı İnzibati Xətalar Məcəlləsinin 271-ci, yəni sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl etməyən fiziki şəxslər beş yüz manatdan səkkiz yüz manatadək məbləğdə, vəzifəli şəxslər iki min manatdan üç min manatadək məbləğdə, hüquqi şəxslər altı min beş yüz manatdan səkkiz min manatadək məbləğdə, həmçinin İnzibati Xətalar Məcəlləsinin 266.3-cü maddəsinə əsasən məişət tullantılarının tutumlardan (urnalardan) kənar yerlərə atılmasına əməl etməyən şəxslər barəsində əlli manat məbləğində cərimə edilməsi diqqət mərkəzində saxlanılır:
"Vətəndaşlarımızı təmizsaxla şüarı ilə keçirilən bu tədbirlər zamanı əraziləri çirkləndirməməyi, məişət tullantılarını tutumlardan kənar yerə atmamağı və sanitar-gigiyena qaydalarına əməl etməyə çağırırıq".
ƏVVƏLİ BURADA
Bugünkü buraxılışımızda Azərbaycanda keçirilmiş Parlament seçkiləri, ölkəmizdə COP29-la bağlı aparılan hazırlıq işləri, eləcə də ölkə ictimaiyyətini maraqlandıran bir sıra digər mövzular barədə aia.az-ın suallarını Milli Məclisin deputatı, Azərbaycan Ağsaqqallar Şurasının sədri, iqtisad elmləri doktoru, professor Eldar Quliyev cavablandırır.
- Eldar müəllim, bilirik ki, bu gün Azərbaycanın xarici siyasətində Mərkəzi Asiya ölkələri ilə münasibətləri ən yüksək səviyyədə sürətlə inkişaf etdirilməsi də prioritet istiqamətlərdən biridir.Bu baxımdan Prezident İlham Əliyevin avqustun 9-da Qazaxıstanın paytaxtı Astanada keçirilən Mərkəzi Asiya və Azərbaycan Respublikasının Dövlət Başçılarının görüşündə iştirakı ilə bağlı nə deyə bilərsiniz?
- İlk növbədə qeyd edim ki, bu səfər Azərbaycan Prezidentinin Mərkəzi Asiya Dövlət Başçılarının Sammitində ilk iştirakı deyildi. Belə ki, keçən il dövlətimizin başçısı Tacikistan Prezidentinin dəvəti ilə Düşənbədə keçirilən Sammitdə iştirak etmişdi. Cənab Prezident İlham Əliyevin Astana Sammitində etdiyi çıxışda qeyd olunduğu kimi, Azərbaycanın bu görüşlərə davamlı olaraq dəvət olunması ölkələrimiz arasında mövcud dostluq, qardaşlıq münasibətlərindən və inkişaf etməkdə olan əməkdaşlıqdan xəbər verir. Son iki ildə Azərbaycan Prezidenti Mərkəzi Asiya ölkələrinə artıq 17 dəfə səfər etmişdir. Həmin müddətdə Qazaxıstan, Qırğızıstan, Tacikistan və Özbəkistanın dövlət başçıları da Azərbaycanı ümumilikdə 15 dəfə ziyarət ediblər. Məlumdur ki, Azərbaycanı və Mərkəzi Asiya ölkələrini xalqlarımızın çoxəsrlik qardaşlıq münasibətləri bağlayır. Ortaq mədəni köklər dövlətlərarası əlaqələrin möhkəm bünövrəsini təşkil edir. Ölkələrimizin otuz ildən artıq müddət ərzində müstəqil dövlətlər kimi həm ikitərəfli, həm də çoxtərəfli formatda səmərəli qarşılıqlı fəaliyyət göstərmələri, bir-birilərinin müstəqilliyini, suverenliyini və ərazi bütövlüyünü dəstəkləmələri, iqtisadi əlaqələri fəal şəkildə inkişaf etdirmələri səmərəli əməkdaşlığın siyasi göstəriciləridir.
- Mən növbəti sualımda Azərbaycanın Mərkəzi Asiya ölkələri ilə münasibətləri mövzusuna təkrar qayıdacağam. Amma bundan əvvəl istərdim ki, ölkəmizin digər bir müttəfiqi, şimal qonşumuz Rusiya ilə əlaqələri barədə fikirlərinizi alım. Necə bilirsiniz, Rusiya Prezidenti Vladimir Putinin avqust ayında Azərbaycana etdiyi dövlət səfəri bu əlaqələrin daha sürətli inkişafına nə dərəcədə təsir edəcək?
- Bugünkü gündə istər dünyada, istərsə də Azərbaycanın mövcud olduğu regionda kifayət qədər mürəkkəb bir vəziyyətin formalaşdığı, dünyanın ən böyük güc mərkəzlərinin maraqlarının bir-birilə ziddiyətə girdiyi bir dövrdə Azərbaycan cənab Prezident İlham Əliyevin rəhbərliyi ilə tamamilə müstəqil xarici siyasət yürüdür və bu siyasətin əsasında ölkənin milli maraqları durur. Əlbəttə ki, bu siyasətin prioritet istiqamətlərindən biri də dost qonşu ölkələrlə, o cümlədən Rusiya ilə münasibətlərin inkişaf etdirilməsidir. Bu baxımdan 2022-ci ildə “Azərbaycan Respublikası və Rusiya Federasiyası arasında qarşılıqlı müttəfiqlik fəaliyyəti haqqında” Bəyannamənin imzalanması da ilk növbədə dövlət başçımızın həyata keçirdiyi uzaqgörən və çox incə siyasətin nəticəsi kimi qiymətləndirilməlidir. Qeyd edək ki, Azərbaycanla Rusiya arasında da münasibətlərin kifayət qədər qədim tarixi kökləri mövcuddur və bu münasibətlərdə Azərbaycan şimal qonşusuna qarşı loyallığını hər zaman nümayiş etdirib. Bu gün də Azərbaycan rus xalqına, ölkəmizdə yaşayan rus millətinin on minlərlə nümayəndəsinə qarşı dostluq münasibətlərini qoruyub saxlayır. Bu insanlar Azərbaycanda tam təhlükəsiz şəraitdə, bütün hüquq və imtiyazlradan digər millətlərin nümayəndələri ilə eyni dərəcədə yararlanaraq, azad yaşayırlar. Hesab edirəm ki, Rusiya Prezidentinin Azərbaycana etdiyi dövlət səfəri də ölkələrimiz arasında əlaqələrin ən yüksək səviyyədə olduğunu bir daha təsdiq edir.
- Düşünürəm, mənimlə razılaşarsınız ki, Azərbaycan-Rusiya münasibətləri eyni zamanda bütün regionda sülhün və sabitliyin qorunması baxımından da böyük önəm kəsb edir...
- Tamamilə sizinlə razıyam. Cənubi Qafqazda sabitlik bütün dövlətlərin və region xalqlarının köklü maraqlarına tam cavab verir. Bu isə o deməkdir ki, bu sabitliyin qorunması üçün Rusiya-Azərbaycan münasibətləri daha da möhkəmləndirilməlidir. Rusiyanın dövlət başçısı Azərbaycana səfərinin yekunlarından məmnunluğunu ifadə edərək, aparılan danışıqların və əldə olunan razılaşmaların Rusiya-Azərbaycan strateji tərəfdaşlığının gələcəkdə də möhkəmlənməsinə xidmət edəcəyinə əminliyini bildirdi. Bu fikirlər öz təsdiqini cənab Prezident İlham Əliyevin çıxışında da tapmışdır. Dövlətimizin başçısı birmənalı olaraq bildirmişdir ki, Rusiya Prezidentinin Azərbaycana dövlət səfəri ikitərəfli münasibətlər üçün müstəsna əhəmiyyətə malikdir. Eyni zamanda da cənab Prezident Azərbaycan və Rusiyanın müttəfiqlər, dostlar, yaxın tərəfdaşlar və qonşular kimi fəaliyyət göstərdiyini vurğulamış və bildirmişdir ki, bu münasibətlər ümumilikdə Cənubi Qafqazda sabitliyin qorunub-saxlanması üçün ən mühüm amillərdən biri kimi çıxış edir.
- Eldar müəllim, qayıdaq Azərbaycanın Mərkəzi Asiya ölkələri və Türk dövlətləri ilə münasibətləri mövzusuna. Məlum olduğu kimi, avqust ayında Azərbaycan ilə Özbəkistan da öz müansibətlərini artıq müttəfiqlik səviyyəsinə yüksəltdilər. Bu barədə hansı fikirlərinizi paylaşmaq istərdiniz?
- Azərbaycanın Türk dövlətləri ilə dostluq və əməkdaşlıq əlaqələri istər Türk Dövlətləri Təşkilatı çərçivəsində, istərsə də təşkilata üzv ölkələrlə ikitərəfli formatda davamlı şəkildə genişlənir və inkişaf edir. Bu baxımdan Azərbaycan-Özbəkistan ikitərəfli münasibətlərinin intensivliyi də diqqəti cəlb etməyə bilməz. Təsadüfi deyil ki, Ölkə Prezidenti cənab İlham Əliyev Şavkat Mirziyoyevin keçən il yenidən Özbəkistan Prezidenti seçilməsindən sonra ilk dövlət səfərini məhz Azərbaycana etməsini qardaşlıq və dostluğun göstəricisi kimi qeyd etmişdi. Əlbəttə ki, dövlət başçımızın cari ilin 22 avqust tarixində Özbəkistana etdiyi dövlət səfəri də ölkələrimiz və xalqlarımız arasında dostluq və əməkdaşlıq əlaqələrinin inkişafına böyük töhfələr verəcək. Xatırladaq ki, hələ 2022-ci ildə Azərbaycan və Özbəkistan arasında Strateji tərəfdaşlığın dərinləşdirilməsi və qarşılıqlı fəaliyyətin genişləndirilməsi haqqında siyasi Bəyannamə imzalanmışdı. Məhz həmin tarixi sənəd bu istiqamətdə son iki illik fəaliyyətin əsas yol xəritəsi rolunu oynayırdı. Keçən il Azərbaycan və Özbəkistan Prezidentləri arasında keçirilən təkbətək və geniş tərkibli görüşlər, aparılan danışıqlar çərçivəsində mahiyyətcə münasibətlərin inkişafının gələcəyi müəyyən edilmişdi. O cümlədən ölkələrimiz arasında imzalanan Ali Dövlətlərarası Şuranın yaradılması barədə sənəd də münasibətlərin yüksək səviyyəsinin göstəricisi idi. Bütün bu proseslər nəticə etibarı ilə bu gün Azərbaycan-Özbəkistan münasibətlərinin artıq ən yüksək mərhələyə keçidini təmin etdi. “Azərbaycan Respublikası ilə Özbəkistan Respublikası arasında müttəfiqlik münasibətləri haqqında Müqavilə”nin imzalanması ilə Azərbaycan və Özbəkistan rəsmən müttəfiq oldular. Təsadüfi deyil ki, cənab Prezident İlham Əliyev özbəkistanlı həmkarı Şavkat Mirziyoyevlə mətbuata bəyanatında bu məqamı xüsusi vurğuladı. Dövlətimizin başçısı bildirib ki, artıq ölkələrimiz rəsmən müttəfiqlər oldular və bu, həqiqətən də tarixi məqamdır.
(ardı var...)
Söhbətləşdi: Azər Məmmədov
Sentyabrın 10-da Bakıda və Abşeron yarımadasında hava şəraiti əsasən yağmursuz olacaq. Lakin gecə və səhər bəzi şəhərətrafı ərazilərdə qısamüddətli az yağış yağacağı ehtimalı var. Mülayim cənub-şərq küləyi əsəcək.
Bu barədə Milli Hidrometeorologiya Xidmətindən məlumat verilib.
Bildirilib ki, havanın temperaturu gecə 18-22° isti, gündüz 27-32° isti olacaq. Atmosfer təzyiqi 761 mm civə sütunundan 758 mm civə sütununa enəcək. Nisbi rütubət gecə 70-80 %, gündüz 50-55 % olacaq.
Azərbaycanın rayonlarında hava şəraiti əsasən yağmursuz keçəcək. Lakin gündüz bəzi dağlıq ərazilərdə qısamüddətli leysan xarakterli az yağış yağacağı, şimşək çaxacağı gözlənilir. Gecə və səhər bəzi yerlərdə zəif duman olacaq, mülayim şərq küləyi bəzi şərq rayonlarında arabir güclənəcək.
Havanın temperaturu gecə 15-20° isti, gündüz 30-35° isti, dağlarda gecə 8-13° isti, gündüz 13-18° isti olacaq.
Görünüşü dəbdəbəli, qiyməti ucuz olsa da, keyfiyyəti sual altındadır.
Xezerxeber.az xəbər verir ki, söhbət "makler” evləri kimi tanınan həyət evlərindən gedir.
Real bazar qiymətindən dəfələrlə ucuz satılan bu evlərə son zamanlar tələbat da çoxdur. Lakin ekspertlər ev almaq istəyənlərə bu məsələdə diqqətli olmağı tövsiyə edirlər.
Əmlak üzrə ekspert Ülvi Əliyevin sözlərinə görə, 100 kvadratlıq ev tikmək üçün təxminən 60 min manat pul lazımdır. Amma elan saytlarında bu ölçüdə olan makler evlərinin qiyməti 45 mindən başlayır.
Ekspertlərin sözlərinə görə, belə evlərin ucuz olmasının digər səbəbi əmlakın çıxarışının olmamasıdr.
Əksər hallarda ucuz satılan evlər kənd təsərrüfatı təyinatlı torpaqlarda inşa edilir.
“2024 Formula-1 Azərbaycan Qran Prisi” ilə əlaqədar paytaxt ərazisində yol hərəkəti təhlükəsizliyinin təmin edilməsi və nəqliyyat sıxlığının qarşısının alınması ilə bağlı Bakı Şəhər Dövlət Yol Polisi İdarəsinin hərəkət iştirakçılarına müraciət edib.
Bu barədə "Bakı şəhər Dövlət Yol Polisindən məlumat verilib.
Bildirilib ki, Bakı şəhərində keçiriləcək “2024 Formula-1 Azərbaycan Qran Prisi” ilə əlaqədar paytaxtda nəqliyyat sıxlığının qarşısının alınması məqsədilə sentyabr ayının 13-dən 15-dək Bakı şəhərinə bitişik kənd və qəsəbələrdən, həmçinin respublikanın digər şəhər və rayonlarından paytaxta gələn vətəndaşlarımızdan ictimai nəqliyyat vasitələrindən istifadəyə üstünlük vermələri tövsiyə olunur.
Eyni zamanda paytaxt sakinlərindən isə yarışın keçirildiyi müddət ərzində fərdi minik avtomobillərindən mümkün qədər az istifadə etmələri, şəhərin mərkəzi hissəsinə yalnız ictimai nəqliyyat vasitələri ilə hərəkət etmələri, istismar müddəti çox olan və nasaz nəqliyyat vasitələri ilə ümumiyyətlə yola çıxmamaları xahiş olunur.
Bakıda ictimai nəqliyyatın effektivliyini artırmaq və yollarda hərəkəti tənzimləmək məqsədilə avtobuslar üçün xüsusi zolaqlar ayrılıb.
Bu zolaqlar əsasən avtobusların hərəkətini sürətləndirmək və sərnişinlərin vaxtında çatdırılmasını təmin etmək üçün nəzərdə tutulub.
Avtobus zolaqlarına daxil olmaq isə müəyyən qaydalar çərçivəsində tənzimlənir.
Sürücülər hansı halda avtobus zolağına daxil olarsa onları cərimə gözləmir? Bəzi avtobus zolaqlarının girişində qoyulan nişanlara saatlar yazılıb, bəzilərində isə yox. Bu, hansı mənanı verir? Məsələ ilə bağlı Baş DYP İdarəsinin inspektoru polis leytenantı Hacıyev Elvin BAKU.WS-ə bildirdi ki, bəzi hallarda sürücülər avtobus zolaqlarına daxil olarsa, onları cərimə gözləmir:
"Yol hərəkəti haqqında" Qanunun 48-ci maddəsinə əsasən 5.9 (Ümumi istifadədə olan nəqliyyat vasitələri üçün zolaq) nişanı və 1.23 ("BUS" yazısı) nişanlanması ilə işarələnən zolaqlarda digər nəqliyyat vasitələrinin hərəkəti məhdudlaşdırılır. Zolaq 1.1 bütöv nişanlanma xətti ilə digər hərəkət zolaqlarından ayrılmışdırsa, digər nəqliyyat vasitələrinin bu zolağa bütün hallarda daxil olması qadağandır.
Lakin istisnalar var:
1. Əgər zolaq digər zolaqlardan 1.5 qırıq-qırıq nişanlanma xətti ilə ayrılarsa , başqa nəqliyyat vasitələrinin bu zolaqla hərəkəti qadağan edilsə də, ümumi istifadədə olan nəqliyyat vasitələrinə maneə yaratmadan yalnız sərnişini mindirmək və ya düşürmək üçün bu zolağa keçib dayanmaq və dərhalda hərəkətə başlayıb zolağı tərk etmək olar.
2. Yalnız yoldan çıxış və yola giriş yerlərində 1.11 nişanlanma xətti ilə işarələnən yerlərdə bu zolağa qismən daxil olub oradan müvafiq manevri etmək olar.
Digər nəqliyyat vasitələrinin sürücüləri giriş-çıxış yerlərində tətbiq edilmiş 1.11 xəttini kəsərək həmin zolağa daxil olduqda mütləq yoldan çıxmalıdırlar. Həmin zolağa daxil olub giriş-çıxış yerini düz keçərək bu zolaqla hərəkəti davam etdirmək, o cümlədən növbəti 1.11 xətti olan yerdə həmin zolağı tərk edənədək davam etdirmək qadağandır".
İdarənin inspektoru əlavə etdi ki, bəzi küçələrdə qadağa yalnız günün müəyyən saatlarında qüvvədədir:
"Hansı ərazidə, küçədə qoyulmuş nişanda saat qeyd edilibsə, həmin yerdə qadağa yalnız həmin saatlarda qüvvədədir. Hazırda quraşdırılan nişanlarda avtobus zolağına giriş səhər saat 07:00-10:00 və saat 17:00-20:00-da qadağandır. Saatın qeyd edildiyi nişanlar olmayan küçələrdə qadağa bütün gün üçün qüvvədədir.
Xatırladaq ki, avtobus zolağına qaydalardan kənar daxil olan şəxslərə 100 manat məbləğində cərimə və 2 cərimə balı qeydə alınır".
"Baş nazir mənzil kirayəsinə görə pul kompensasiyalarının verilməsi ilə bağlı qərar imzalayıb. Həmin qərarla Vergi Xidmətində çalışanlar və mənzil kirayəsindən istifadə edən vətəndaşlarımıza aylıq pul kompensasiyaları veriləcək".
Bu sözləri BAKU.WS-ə açıqlamasında 6-cı çağırış Milli Məclisin deputatı, iqtisadçı alim Vüqar Bayramov deyib.
Onun sözlərinə görə, mənzil Bakı şəhərində kirayə olunubsa, bu zaman 150 manat, Gəncə, Naxçıvan, Sumqayıt, Xırdalan və Abşeron rayonlarında kirayə üçün 100 manat, digər şəhər və rayon mərkəzlərində 75 manat, eləcə də digər yaşayış məntəqələrində 55 manat ödənilməsi nəzərdə tutulub:
"Burada məqsəd kirayədə qalan vətəndaşlarımıza pul kompensasiyanın ödənilməsi və onların kirayə xərclərinin bir hissəsinin dövlət tərəfindən kompensasiya edilməsindən gedir. Bu Vergi Xidmətində vətəndaşlarımıza şamil olunacaq.
Ödənişlər plastik kartlar vasitəsilə həyata keçiriləcək və yalnız nağdsız şəkildə ödəniş həyata keçiriləcək. Məlum xidmətin əməkdaşları müraciət edərək nağdsız şəkildə həmin ödənişləri almaq imkanına malik olacaqlar".
Bu günlərdə Azərbaycan 2020-ci ildə apardığı Vətən müharibəsində əldə etdiyi tarixi Qələbəsinin parlaq təzahürlərini bir daha bütün dünyaya nümayiş etdirmək imkanı əldə etdi və imkanı böyük ruh yüksəkliyi ilə reallaşdırdı. 1 sentyabr 2024-cü il tarixində Ölkə Prezidenti cənab İlham Əliyevin müvafiq Sərəncamına uyğun olaraq Azərbaycanda növbədənkənar Parlament seçkiləri uğurla keçirildi. Bu ilin fevral ayında keçirilmiş Prezident seçkiləri kimi, bu Parlament seçkiləri də müasir müstəqil Azərbaycanın dövlətçilik tarixində ən əhəmiyyətli hadisələrdən biri kimi yer aldı. İlk növbədə ona görə ki, müstəqilliyimizin 30 ildən artıq tarixində ilk dəfə olaraq Parlament seçkiləri ölkənin istisnasız bütün suveren ərazilərində keçirildi. Digər tərəfdən isə, həm Cənubi Qafqaz regionunda, həm də qlobal miqyasda cərəyan edən müxtəlif ziddiyyətli proseslərin fonunda bu seçkilər Azərbaycanda hökm sürən sabitliyin və inkişafın daha bir nümayişi oldu. Əlbəttə ki, bütün bu proseslərin fonunda Azərbaycanın beynəlxalq nüfuzunun durmadan yüksəldiyini tədiq edən hadisələr getdikcə daha çox diqqəti cəlb edir.
Bugünkü buraxılışımızda Azərbaycanda keçirilmiş Parlament seçkiləri, ölkəmizdə COP29-la bağlı aparılan hazırlıq işləri, eləcə də ölkə ictimaiyyətini maraqlandıran bir sıra digər mövzular barədə aia.az-ın suallarını Milli Məclisin deputatı, Azərbaycan Ağsaqqallar Şurasının sədri, iqtisad elmləri doktoru, professor Eldar Quliyev cavablandırır.
- Xoş gördük Sizi, Eldar müəllim. Yenidən Sizinlə görüşmək bizə çox xoşdur və ilk növbədə Sizi bütün redaksiyamız adından Parlament seçkilərində əldə etdiyiniz inamlı qələbə münasibətlə ürəkdən təbrik edirik. Elə ilk sualımız da məhz bu seçkilər barədə olacaq. Nədən ibarət idi bu seçkilərin özəlliyi və mahiyyət etibarı ilə bu hadisənin ölkəmizin ictimai-siyasi həyatına, gələcək inkişafına təsirinin nə dərəcdə olacağını gözləməliyik..?
- Mən də sizi ürəkdən salamlayıram və yenidən görüşməyimizdən məmnun olduğumu bildirmək istəyirəm. Əlbəttə ki, səmimi təbriklərinizə görə də sizə təşəkkür edirəm. Azərbaycan xalqı bu il sentyabrın 1-də həqiqətən də növbəti dəfə möhtəşəm bir ilkə imza atdı. Cənab Prezident İlham Əliyevin müvafiq Sərəncamına əsasən ölkəmizdə Milli Məclisə keçirilmiş növbədənkənar seçkilərin unikallığı ondan ibarətdir ki, Azərbaycan öz dövlət müstəqilliyini 1991-ci ildə bərpa etdikdən sonra ilk dəfə olaraq Parlament seçkiləri ölkənin istisnasız bütün suveren ərazisində, o cümlədən Qarabağ və Şərqi Zəngəzurda keçirildi. Biz hamımız bu ilin fevral ayında keçirilmiş Prezident seçkilərində yaşadığımız sevinc və qürur hissini yaxşı xatırlayırıq. Və budur həmin tarixi hadisədən cəmi yarım il sonra xalqımız bu möhtəşəm hissləri yenidən yaşadı. Növbədənkənar Parlament seçkiləri artıq öz dədə-baba yurdlarında səs verən keçmiş köçkün vətəndaşlarımız üçün ikiqat önəm kəsb etmiş oldu. Çünki bu seçkilərdə onları səsvermə hüquqlarının bərpa olunması reallığı bir daha öz təsdiqini tapdı. Əlbəttə ki, bütün bunlar Azərbaycan xalqının böyük ruh yüksəkliyi ilə iştirak etdiyi seçkilərlə bağlı yaşananların mənəvi aspektləridir. Digər tərəfdən isə, sentyabrın 1-də keçirilmiş növbədənkənar Parlament seçkiləri milli maraqlarımız baxımından müstəsna siyasi əhəmiyyət kəsb edən bir hadisədir. İlk növbədə bu seçkilər Azərbaycandakı sabitliyin və inkişafın daha bir nümayişi oldu. Eyni zamanda da bu gün ölkədə müasir dövrün tələblərinə uyğun, artıq bütün dünyada getdikcə daha intensiv şəkildə səsləndirilən müxtəlif çağırışlara cavab verə biləcək yeni parlamentin formalaşdırılmasının tam zamanıdır və növbədənkənar seçkilərin təyin edilməsində əsas məqsəd də məhz bu hədəfə nail olmaqdır.
- Eldar müəllim, məlumdur ki, Ölkə Prezidenti cənab İlham Əliyevin həyata keçirdiyi uğurlu və praqmatik xarici siyasət kursu bu gün Azərbaycanı qlobal arenada, o cümlədən Avropada gedən geosiyasi proseslərin önəmli iştirakçılarından birinə çevirib. Bu baxımdan dövlət başçımızın iyulun 18-də İngiltərənin Oksford şəhərində keçirilmiş “Avropa Siyasi Birliyi” 4-cü Zirvə toplantısında iştirakını necə dəyərləndirməliyik?
- Bildiyiniz kimi, cənab Prezident İlham Əliyev həmin tədbirə Böyük Britaniya və Şimali İrlandiya Birləşmiş Krallığının Baş naziri Kir Starmer tərəfindən dəvət olunmuşdu. Bu bir daha təsdiq edir ki, hazırda Azərbaycanın hər hansı bir məsələ ilə bağlı mövqeyi artıq sadəcə regionumuzda deyil, həm də qlobal miqyasda nəzərə alınması vacib olan amil kimi qəbul edilir. Sammit çərçivəsində keçirilmiş “Enerji və bağlantı” mövzusunda dəyirmi masada iştirak edən cənab Prezident İlham Əliyev öz çıxışında Avropa İttifaqına üzv olan ölkələrin enerji təhlükəsizliyinin təminatı məsələsində Azərbaycanın önəmli rolunu bir daha diqqət mərkəzinə gətirmiş və tərəfdaş ölkələrlə gələcək əməkdaşlığın perspektivlərinə dair mühüm açıqlamalar təqdim etmişdir. Azərbaycan Avropa ölkələri ilə əməkdaşlığı şaxələndirməklə bütün Avrasiya məkanında mövqelərinin daha da möhkəmlənməsini təmin edir. Bu gün Azərbaycandan təbii qaz alan ölkələr arasında beş Avropa İttifaqı üzvü və iki üzvlüyə namizəd ölkə vardır. Hadisələrin gedişi bunu deməyə əsas verir ki, bu say getdikcə daha da artacaq. Çünki hazırda Avropa interkonnektor layihələri icra olunduqca Azərbaycan qazının daha çox Avropa ölkəsinə ixrac edilməsi üçün əlavə imkanlar açılır. Əlbəttə ki, ölkəmiz bu imkanlardan öz maraqlarının təmin olunması, mövqelərinin daha da gücləndirilməsi üçün maksimum yararlanmalıdır. Cənab Prezident İlham Əliyevin qeyd etdiyi kimi, Azərbaycan hər zaman etibarlı təchizatçı olub. Son 20 il ərzində ölkəmiz tarixdə ilk dəfə olaraq Xəzər dənizini Aralıq dənizi ilə birləşdirən kəmər təşəbbüsü ilə çıxış edib və qonşu ölkələrlə birlikdə bu layihəni reallaşdırıb. Hazırda Aralıq dənizində Türkiyənin Ceyhan limanından Azərbaycan nefti müxtəlif təyinat nöqtələrinə, o cümlədən bu məhsuldan əhəmiyyətli dərəcədə asılı olan çox həssas nöqtələrə nəql edilir. Azərbaycanın Avropa miqyasında mühüm qaz təchizatçısına çevrilməsindən isə artıq 3 ildən artıq zaman keçib və bu müddət ərzində Azərbaycan özünü bu sahədə də etibarlı tərədaş kimi təsdiləyib.
- Son vaxtlar bəzi Qərb dairələri tərəfindən Azərbaycana qarşı mediada böhtan və iftira kampaniyaları təşkil etmək kimi sifarişlərin olunması artıq heç kim üçün sirr deyil. Həm də bu tendensiyanın təkcə bizim ölkəyə qarşı gücləndirilmədiyini də deyə bilərik. Bu baxımdan cari ilin iyul ayında Şuşada keçirilmiş “Yalan məlumatların ifşası: Dezinformasiyaya qarşı mübarizə” mövzusunda 2-ci Şuşa Qlobal Media Forumunun işini necə xarakterizə edə bilərsiz?
- İlk növbədə onu deyim ki, Şuşa Azərbaycanın həm strateji, həm siyasi və həm də mənəvi cəhətdən xüsusi önəm kəsb edən mühüm bir şəhəri, ölkənin rəsmi Mədəniyyət Paytaxtı və ən əsası da bizim tarixi Qələbəmizin rəmzidir. Bu şəhərdə mütəmadi olaraq keçirilən qlobal əhəmiyyətli tədbirlər qədim Şuşanın beynəlxalq nüfuzunu daha da yüksəldir. Təqdirəlayiq haldır ki, bu tədbirlərdən bəziləri zaman keçdikcə ənənəvi xarakter almağa başlayır. O cümlədən qeyd etdiyiniz Qlobal Media Forumu da artıq ənənəvi beynəlxalq tədbirə çevrilmişdir. Bildiyiniz kimi, ilk dəfə bu tədbir Şuşada bir il bundan öncə keçirilmişdir. Bu il isə, artıq ikinci Forum uğurla keçirildi. Ölkə Prezidenti cənab İlham Əliyev tədbirdə çıxış edərək Şuşa Qlobal Media Forumunun bizim ölkəmiz və Qarabağ bölgəsi üçün çox əhəmiyyətli bir tədbir olduğunu qeyd etməklə bu Forumun işini yüksək qiymətləndirdiyini nümayiş etdirdi. Azərbaycanın xüsusilə işğal dövründə Qərbdə olan anti-Azərbaycan qüvvələrin iradəsi ilə intensiv şəkildə qərəzli informasiya hücumlarına məruz qoyulması, ermənilərin və onlara havadarlıq edən məlum Avropa dövlət başçılarının sifarişi ilə ölkəmizin “demonizasiya”sının həyata keçirilməsi heş kim üçün sirr deyil. Sizin də qeyd etdiyiniz kimi, hətta bu günün özündə də belə cəhdlərə Qərb mətbuatında kifayət qədər rast gəlirik. Təbii ki, bütün bunlar 2-ci Şuşa Qlobal Media Forumunun mövzusunu ölkəmiz üçün çox aktual etmişdir. Xüsusilə də bu il Azərbaycanın COP29-a ev sahibliyi etməsi barədə qəbul edilmiş qərarın bir çox qərb dairələrində qısqanclığa səbəb olduğunu nəzərə alsaq, ölkəmizə qarşı hələ bir müddət də dezinformasiya və yalan məlumatlarla dolu kampaniyaların keçiriləcəyini proqnozlaşdıra bilərik.
- Yeri gəlmişkən, Prezident İlham Əliyev Forumun açılış mərasimindəki çıxışında Azərbaycan-ABŞ münasibətləri barədə də maraqlı fikirlər səsləndirmişdi...
- Tamailə düz deyirsiniz. Dövlət başçımız Azərbaycan-ABŞ əlaqələri barədə danışaraq bildirdi ki, müəyyən enişli-yoxuşlu dövrlər istisna olmaqla bu münasibətlər demək olar ki, hər zaman sabit olub. Problemli məqamların yaranmasına səbəb də bu olub ki, bəzən ABŞ tərəfindən Azərbaycanın siyasi həyatına müdaxilə etmək, siyasi müxalifəti maliyyələşdirmək cəhdləri göstərilib. Cənab Prezident bunu da vurğuladı ki, ölkəmizin məhz Respublikaçılar hakimiyyəti ilə əlaqələri daha nəzərəçarpacaq dərəcədə uğurlu və nəticəyönümlü olub. Eyni zamanda məhz Prezident Trampın prezidentliyi dövründə əməkdaşlığın çox səmərəli olduğu diqqətə çatdırılıb. Həmçinin qeyd olundu ki, hazırkı ABŞ Administrasiyasının fəaliyyəti, hərəkətləri dərindən məyusluq doğurur. Çünki bu administrasiya birtərəfli yanaşma sərgiləyir. Eyni zamanda ABŞ Dövlət katibi, Avropa Komissiyasının prezidenti və onların ali komissarı tərəfindən Brüsseldə Ermənistanın hərbi baxımdan maliyyələşdirilməsi məsələsinin müzakirə edilməsi və bunun müsbət dəyərləndirilməsi tamamilə qəbuledilməzdir. Cənab Prezident İlham Əliyev bu məsələ ilə də bağlı prinsipial mövqedən çıxış edərək bütün tərəflərə yenidən birmənalı mesaj verdi ki, Azərbaycanın maraqları Cənubi Qafqazda təmin edilməlidir. Kimsə ölkəmizin maraqlarını görməzdən gəlməyə çalışsa, əlbəttə ki, onlar yanılacaqlar və uğursuzluğa düçar olacaqlar.
(ardı var...)
Söhbətləşdi: Azər Məmmədov