 |
|
Ölkədə koronavirus infeksiyasına yoluxma hallarının artmasına görə İtaliya hökuməti diskotekaların, o cümlədən açıq havada keçirilən rəqs meydançaları və çimərliklərin bağlanmasına dair göstəriş verib.
APA xəbər verir ki, müvafiq əmrin imzalanması barədə Səhiyyə naziri Roberto Speranza özünün “Facebook” səhifəsində bildirib.
“Yeni sərəncam imzalanıb. Açıq və qapalı vəziyyətdə olan bütün rəqs meydançalarının fəaliyyəti dayandırılır. Sıxlıq olan istənilən ictimai yerlərdə maska taxmaq məcburiyyəti saat 18:00-dan səhər saat 06:00-dək tətbiq olunacaq”, - deyə nazir yazıb. O qeyd edib ki, sentyabrda məktəblərin açılması prioritet olaraq qalır.
Qeyd edək ki, diskotekalar iyul ayının ortalarında karantindən sonra açılmasına icazə verilən son məkanlar idi. Ancaq bəzi bölgələrdə yerli hakimiyyət orqanları onların fəaliyyətinə daha əvvəl icazə vermişdilər. Hökümətin bu qərarı bölgələrin sərbəst qərar verməsini qeyri-mümkün edir. Bütün diskotekaların azı 7 sentyabradək bağlı qalması tələb olunur.
Son iki həftədə İtaliyada infeksiyaya yoluxma hallarının sayında ciddi artım müşahidə olunur – iyun və iyul aylarında gün ərzində 200 yoluxmadan 15 avqustda 600 yoluxmayadək. Bu, hələ ki may ayının sonundan bəri rekord saydır, ancaq virusoloqların proqnozlaşdırdığı kimi, yalnız bir neçə gündən sonra gündəlik yoluxma halları 1000 nəfərdən çox ola bilər ki, bu da xəstəxanaya yerləşdirilənlərin və ölənlərin sayının artmasına səbəb olacaq.
Xatırladaq ki, İtaliyada pandemiya başlayandan bəri koronavirusa yoluxanların sayı 253 minə çatıb, onlardan 35 mindən çoxu dünyasını dəyişib
“Türk Hava Yolları” aviaşirkətinin uçuşların bərpası ilə bağlı sentyabr ayına nəzərdə tutulan planı açıqlanıb.
Azertac xəbər verir ki, plana əsasən iyunun 11-dən aviareysləri mərhələli şəkildə bərpa edən şirkət sentyabrın 1-dən etibarən Rusiya, Gürcüstan, İran, Kanada, Madaqaskar, Estoniya, Vyetnam, Səudiyyə Ərəbistanı, Əlcəzair, Əfqanıstan, İraq, Hindistan, Bəhreyn, İordaniya, Türkmənistan, Litva, Monqolustan, Yunanıstan, Mərakeş, Oman, Nigeriya, Cənubi Afrika və dünyanın bir sıra ölkələrinə uçuşlar həyata keçirəcək.
“Türk Hava Yolları”ın açıqlamasında istifadə edilməyən biletlərin dəyişdirilməsi ilə bağlı şirkətin rəsmi internet səhifəsində ətraflı məlumatın verildiyi bildirilir.
Ermənistanın Baş Naziri Nikol Paşinyan BBC telekanalında yayımlanan "HardTalk" verilişinin qonağı olub.
"Qafqazinfo" xəbər verir ki, verilişdə Paşinyan aparıcı Stiven Sakurun Dağlıq Qarabağ münaqişəsi ilə bağlı verdiyi suallara cavab verərkən çətin anlar yaşayıb.
Belə ki, aparıcının "Siz son münaqişəni Azərbaycanın başladığını iddia edirsiniz, qarşı tərəf isə əksini deyir, bu verilişdə bunu aydınlaşdıra bilməyəcəyik. Ancaq aydın olan odur ki, siz buna qədər vəziyyəti gərginləşdirən bir sıra təxribat xarakterli addımlar atmısınız. Məsələn, niyə ötən ilin avqustunda siz Stepanakertə (Xankəndi -red.) səfər edib çıxışınızda "Artsax Ermənistandır" demisiniz? Bu, açıq aşkar Azərbaycana qarşı təxribat idi" sualına cavabda erməni Baş Nazir yayınmağa çalışıb.
"Mən ona görə "Artsax Ermənistandır" demişəm ki, Dağlıq Qarabağda min illər boyu ermənilər məskunlaşıb və Artsax adı minilliklərlə tarixə sahibdir".
Aparıcı Ermənistan Baş Nazirinin sözünü kəsərək "Biz sizin tarixinizin minilliklərini indi araşdıra bilmərik, edə biləcəyimiz bu günün reallıqlarına baxmaqdır. BMT Baş Assambleyasının münaqişə ilə bağlı 4 qətnaməsi, hansı ki, işğal olunmuş Azərbaycan torpaqlarından bütün Ermənistan hərbi qüvvələrinin qeyd-şərtsiz çıxarılmasını tələb edir, pozmusunuz. Beynəlxalq hüquqa görə sizin qüvvələr işğal həyata keçirir və siz ora gedib bu ərazilərin sizə aid olduğunu elan edirsiniz. Aydındır ki, siz sülh qurucusu deyilsiniz" deyə bildirib.
Daha sonra Paşinyan qeyd edib ki, guya Azərbaycan 90-cı illərin əvvəllərində Qarabağda yaşayan ermənilərə qarşı etnik təmizləmə həyata keçirib və münaqişə bu andan başlayıb.
S.Sakur onun hakimiyyətə gəldiyi vaxt sülhə nail olacağına dair verdiyi sözü yerinə yetirib-yetirmədiyi ilə maraqlanıb: "Məsələn, mən bilirəm ki, sizin hökumətiniz Ermənistandan Dağlıq Qarabağa yol çəkir. Bu yol Azərbaycan ərazisindən keçir. Brüsseldə olan və Qafqaz üzrə siyasətdə ixtisaslaşan bir sıra Avropa parlamentariləri bu plana baxıblar və onu beynəlxalq hüququn pozulması kimi dəyərləndiriblər. Bunun Qarabağın qanunsuz işğalının möhkəmləndirəcəyini bildiriblər. Siz bu yolun tikintisini dayandıracaqsınızmı?"
Bu suala da cavab tapa bilməyən Baş Nazir sadəcə yolun Ermənistan hökuməti tərəfindən tikilmədiyini iddia edib.
Dünyada bu günə qədər koronavirusa yoluxanların sayı 21 milyonu ötüb.
Hazırda dünya üzrə yoluxanların ümumi sayı 21 milyon 72 min 427 nəfər təşkil edir. Dünyasını dəyişənlərin ümumi sayı 757 min 476 nəfərdir. 13 milyon 925 min 2 pasiyent isə COVID-19-a qalib gəlib.
Yoluxma və ölüm hallarının sayına görə birinci yerdə ABŞ (5 415 666 yoluxma, 170 415 ölüm ) qərarlaşıb.
Koronavirus statistikasına görə ABŞ-dan sonra ilk beşlikdə yer alan ölkələr: Braziliya (3 229 621 yoluxma, 105 564 ölüm), Hindistan (2 461 542 yoluxma, 48 153 ölüm), Rusiya (907 758 yoluxma, 15 384 ölüm), Cənubi Afrika (572 865 yoluxma, 11 270 ölüm), Meksika (505 751 yoluxma, 55 293 ölüm).
Son sutka ərzində Türkiyədə yeni növ koronavirus (COVID-19) infeksiyasından daha 21 nəfər ölüb.
Bu barədə ölkənin səhiyyə naziri Fəxrəddin Qoca sosial media hesabında məlumat verib.
Məlumatda deyilir ki, bu gün 1243 nəfərin koronavirus testinin cavabı pozitiv çıxıb. Həmçinin 968 xəstə sağalaraq evə buraxılıb.
Bununla da Türkiyədə ümumilikdə 245 635 nəfər yeni növ koronavirus infeksiyasına yoluxub, indiyədək onlardan 5912 nəfər ölüb.
İstixana qazlarının atmosferə buraxılmasına məhdudiyyətlər tətbiq edilməsə qlobal istiləşmənin təsiri böyüyəcək və anomal istilik milyonlara insanın ölümünə səbəb olacaq.
Bu barədə Rusiya İqtisadi Tədqiqatlar Milli Bürosunun bir qrup tədqiqatçısının əldə etdiyi nəticədə göstərilib.
Mütəxəssislər, bir sıra ölkələrdə son illər ərzində anomal istilikdən ölüm hallarının sayını müəyyənləşdirib və gələcəkdə baş verə biləcək fəsadları müəyyən ediblər.
Atmosferə atılan istixana qazların miqdarı eyni qalacağı təqdirdə, istilik dalğaları dünyadakı hər 100 min insandan 73-nün ölümünə səbəb olacaq. Ən isti ölkələrdə bu rəqəm hər 100 minə 200-ə çata bilər.
Həddindən artıq isti hava ən təhlükəli təbiət hadisələrindən biridir. İnsan təkcə günvurmadan deyil, infarktdan və müxtəlif xəstəliklərin ağırlaşmasından ölə bilər.
Yaşlı insanlar və xroniki xəstəliklərdən əziyyət çəkənlər daha tez dünyasını dəyişirlər. İsti ölkələrdə havanın temperaturu 50 dərəcəyə qalxa bilər.Report
COVİD-19 peyvəndi düşünüldüyü qədər effektli olmaya bilər.
Bunu ABŞ-ın baş infeksionisti Entoni Fauçi deyib.
“İlk COVİD-19 peyvəndinin 98 faiz təsiredici olması çətin məsələdir. Yanlız 60 faiz effekt verə bilər. Virusa qarşı hazırlanan peyvənd müalicə üsulu olaraq düşünülməməlidir”, – E.Fauçi bildirib. /Axar.az/
Məlum olduğu kimi, Belarusda keçirilən prezident seçkilərindən sonra baş tutan kütləvi etiraz aksiyalarına hakimiyyət tərəfindən sərt şəkildə müdaxilə olunub.
Ölkənin Daxili İşlər Nazirliyi min nəfəri Minskdə olmaqla, ölkə üzrə 3 minədək etirazçının saxlandığını, toqquşmalar zamanı 50-dən çox dinc sakinin, 39 hüquq-mühafizə əməkdaşının xəsarət aldığını rəsmən bəyan edib.
Müxalifətin əsas namizədi Svetlana Tixanovskaya isə Minskdə keçirdiyi mətbuat konfransında seçkinin qalibi olduğunu açıqlayıb. O, fikrinin seçki məntəqələrinin çoxundan əldə olunmuş real protokollara əsaslandığını, həmin sənədlərin onun seçkini udduğunu sübuta yetirdiyini söyləyib.
Tixanovskaya seçki komissiyasının elan etdiyi rəsmi nəticələrin saxtalaşdırıldığını iddia edib. Onun sözlərinə görə, etirazlar zamanı bir nəfərin öldüyü təsdiqlənərsə, bu, Lukaşenko hökumətinin sonunun başlanğıcı olacaq. DİN-in rəsmi sözçüsü isə bir nəfərin ölümü haqda məlumatın yalan olduğunu bildirib.
Prezident Aleksandr Lukaşenko isə öz növbəsində aksiyalarda iştirak edənləri sərt dildə tənqid və hətta təhqir edib. Lukaşenko etirazçılara “adekvat cavab veriləcəyini” bildirib. Prezident həmçinin etirazçıları telefon vasitəsilə xarici ölkələrdən idarə olunan “qoyunlar” adlandırıb: “Polşadan, Böyük Britaniyadan, Çexiya Respublikasından bizim, bu sözə görə üzr istəyirəm, qoyunları idarə etmək üçün telefon zəngləri olub. Onlar nə etdiklərini bilmirlər və başqaları onları idarə etməyə başlayır.”
Prezident aksiyalarda iştirak edən gənclərin valideynlərinə də xəbərdarlıq edərək, əgər sonradan peşman olmalarını istəmirlərsə, vaxtında övladlarına nəzarət etmələrini məsləhət görüb. Lukaşenko əlavə edib ki, Minskin mərkəzində “yanğın törətmək”cəhdi baş tutmayıb və o, ölkənin parçalanmasına imkan verməyəcək.
Onu da qeyd edək ki, Avropa Komissiyasının Prezidenti Ursula von der Leyen Belarusda baş verən zorakılığı pisləyib, hökuməti seçkinin nəticələrini dəqiq hesablayıb dərc etməyə çağırıb.
Avropa Birliyinin Xarici İşlər və Təhlükəsizlik Siyasəti üzrə Ali təmsilçisi Jozep Borrell və Avropa Komissiyasının Qonşuluq və Genişlənmə üzrə komissarı Oliver Varhelyi də zorakılığı pisləyib. Onlar da avqustun 10-da verdikləri bəyanatda Belarus hökumətini səsləri düzgün saymağa çağırıblar. /AzPolitika.info/
ABŞ prezidenti Donald Tramp Ağ Evdə mətbuat konfransı keçirərkən anidən şəxsi mühafizəsi tərəfindən konfrans salonundan çıxarıldı.
Amerika mediası xəbər verir ki, Ağ Evin mühafizəçiləri prezidenti salondan çıxarsalar da, müxbirlərin buraxılmasına icazə verməyiblər. D. Tramp bir neçə dəqiqə sonra geri qayıdaraq və Ağ Evin binası yaxınlığında bir nəfərin vurulduğunu deyib. Təhlükəsizlik əməkdaşları tərəfindən vurulan şübhəlinin silahlı olduğunu qeyd edən prezident şəxsin xəstəxanaya göndərildiyini bildirib.
Xəstəxanaya yerləşdirilən şübhəlinin vəziyyəti ilə bağlı dəqiq məlumat yoxdur. D. Tramp media nümayəndələrinə xüsusi xidmət orqanlarının araşdırma apardığını və hadisə ilə əlaqədar ətraflı açıqlama verəcəyini deyib.
Amerika prezidenti Ağ Evdə özünü güvəndə hiss etdiyini qeyd edərək, mətbuat konfransına davam edib. (modern.az)
Dünyada koronavirusa yoluxanların ümumi sayı 20 173 864 nəfərdir, 736 307 xəstə dünyasını dəyişib. “Qafqazinfo” bildirir ki, bu barədə “worldometers”də məlumat verilib.
Hazırda bütün dünyada 6 440 686 aktiv koronavirus xəstəsi var ki, onlardan da 64 740-nın vəziyyəti ağır qiymətləndirilir.
İndiyədək 12 996 871 nəfər koronavirusdan sağalıb.