 |
|
Türkiyədə karantin tədbirləri yenidən tətbiq edilib.
Bu barədə ölkənin Daxili İşlər Nazirliyi açıqlama yayıb. Məlumatda bildirilir ki, bu gün saat 09:30-dan etibarən 32 əyalət, 4 şəhər, 37 kənd, 39 məhəllə və 3 kənd daxil olmaqla ümumilikdə 83 yaşayış məntəqəsində karantin tədbirləri həyata keçirilir.
Bildirilib ki, bu karantin tədbirləri ölkə əhalisinin 54 min 53 nəfərini əhatə edir.
Açıqlamada, həmçinin qeyd olunub ki, ölkədə koronavirus epidemiyası zamanı bu günə qədər 68 əyalət, 5 rayon (3 rayon və 2 rayon mərkəzi), 24 şəhər, 354 kənd, 352 məhəllə və 53 yaşayış məntəqəsi daxil olmaqla ümumilikdə 788 yaşayış məntəqəsində 623 766 nəfərə karantin tətbiq edilib.
Xatırladaq ki, Türkiyədə karantin rejimi iyulun 1-dən etibarən ləğv olunmuşdu. Ölkədə karantin rejiminin ləğvinə qədər gündəlik yoluxma sayı 1000-dən aşağı düşsə də son günlər də bu göstərici yenidən 1000-i keçmişdi. Mütəxəssislər xüsusilə Qurban bayramı ərəfəsində yaşanan toplu yığışma hallarının yoluxma sayının daha da artmasına yol açacağını proqnozlaşdırır.
ABŞ Prezidenti Donald Tramp "TikTok" və "WeChat" tətbiqləri ilə bağlı fərmanlar imzalayıb.
Bu barədə Ağ Ev açıqlama yayıb. Fərmana görə tətbiqetmələrin aid olduğu Çinin "Bytedance" və "Tencet" şirkətləri ilə hər hansı bir sazişə qadağa qoyulacaq. Fərmanlarda, "TikTok" və "WeChat" tətbiqlərinin ABŞ-ın milli təhlükəsizliyinə, iqtisadiyyatına və siyasətinə təhlükə törətdiyi qeyd olunub. Tətbiqlərdə istifadəçi məlumatları, o cümlədən məkan məlumatları və axtarış tarixi toplandığı bildirilib.
"Bu, potensial olaraq Çinə federal işçilərin və müqavilə işçilərinin yerini izləməyə, şantaj üçün şəxsi məlumatların saxlanılmasına və sənaye kəşfiyyatı aparmağa imkan verir",-deyə fərmanda qeyd olunub. Trump, tətbiqləri həmçinin senzurada günahlandırıb.
Qeyd edək ki, daha əvvəl ABŞ Prezidenti "Microsoft" və ya başqa bir Amerika şirkətinin 15 sentyabr tarixinədək "TikTok'u satın alınmalı olduğunu, əks təqdirdə tətbiqin ölkədə qadağan ediləcəyini bildirmişdi. "Microsoft" şirkəti isə tətbiqin alınması ilə bağlı danışıqlar apardığını açıqlamışdı.
Türkiyənin Şanlıurfa vilayətinin Siverek rayonunda təsərrüfat işçilərini daşıyan avtobus aşıb.
“Hürriyet” xəbər verir ki, qəza avtobusun idarəetməni itirməsi səbəbindən baş verib. Nəticədə avtobusun yol qırağına aşması ilə 26 nəfər xəsarət alıb. Yaralananlardan 1 nəfər- 15 yaşlı İbrahim Küçük xəstəxanada dünyasını dəyişib.
Qəza ilə əlaqədar başladılan istintaq zamanı mikroavtobus sürücüsü 19 yaşlı Ramazan Tayboğanın sürücülük vəsiqəsinin olmadığı məlum olub. Hadisə ilə bağlı araşdırma davam etdirilir.
Avropa İttifaqının maliyyə dəstəyi ilə Ümumdünya Səhiyyə Təşkilatı tərəfindən həyata keçirilən “Sağlamlıq üçün Həmrəylik Təşəbbüsü” layihəsinin birinci mərhələsi çərçivəsində Səhiyyə Nazirliyinin İctimai Səhiyyə və İslahatlar Mərkəzində “Təlimçilər üçün təlim”lərə start verilib.
Bu barədə ÜST-nin Azərbaycandakı nümayəndəliyi məlumat verib. Məlumatda qeyd olunur ki, layihənin məqsədi Şərq Tərəfdaşlığı ölkələrində ictimai səhiyyə sahəsində fövqəladə halların qarşısını almaq, hazırlıq və mübarizə imkanlarını gücləndirməkdir.
Qeyd edək ki, Avropa İttifaqı Azərbaycan da daxil olmaqla Şərq qonşuluğundakı altı ölkəyə COVID-19 pandemiyasına qarşı mübarizəyə yardım etmək məqsədilə 30 milyon investisiya ayırıb. /bakupost.az/
Avropa Birliyi (AB) ölkələri Türkiyə ilə mövcud qeyri-qənaətbəxş gedişatı dəyişmək və ikitərəfli əlaqələri gücləndirmək istəyir.
Bu barədə Avropa Birliyinin (AB) bəyanatında deyilib.
“Türkiyə AB üçün önəmli ortaqdır”, – deyə bəyanatda bildirilib.
Qeyd edək ki, bundan öncə Türkiyə Xarici İşlər naziri Mövlud Çavuşoğlu və Avropa Birliyinin Xarici siyasət və təhlükəsizlik məsələləri üzrə ali nümayəndəsi Borrell arasında müzakirə aparılmışdı. /Axar.az/
Avqustun 4-də Beyrutun dəniz limanında baş vermiş partlayış nəticəsində ölənlərin sayı atır.
Beyrutda azı 149 nəfər ölüb, 5 mindən çox insan yaralanıb. Daha əvvəl 145 nəfərin öldüyü bildirilirdi. Partlayış dalğası Beyrutda yüzlərlə binanı dağıdıb və ya zədələyib. Habelə 300 mindən çox insan evsiz qalıb.
Livan Daxili İşlər Nazirliyinin yaydığı məlumata görə, partlayış 2 min 750 ton ammonium nitratın qaynaq işləri zamanı yanması səbəbindən baş verib. Altı il öncə gömrük xidmətinin müsadirə etdiyi ammonium nitrat limanın anbarında saxlanılırmış. Hadisə ilə əlaqədar liman administrasiyasının 16 əməkdaşı, o cümlədən direktoru saxlanılıb.
“Microsoft”un banisi Bill Qeyts nəticələri koronavirus pandemiyasının ziyanını üstələyəcək iqtisadi böhrandan xəbər verib.
O, ən yaxın bir neçə onillikdə planetin iqlim dəyişikliyinin səbəb olacağı qlobal böhranla qarşılaşacağını proqnozlaşdırır.
"Pandemiya nə qədər ağır olsa da, iqlim dəyişikliyi daha da pis ola bilər", - milyarder öz bloqunda yazıb.
Qeyts hesab edir ki, fəlakətdən qaçmaq üçün atmosferə istilikxana qazlarının tullantılarının miqdarını əhəmiyyətli dərəcədə azaltmaq lazımdır.
“Microsoft”un banisi koronavirus pandemiyası ilə ekoloji böhranın nəticələrini müqayisə edib. İnfeksiyadan ölüm sayı orta hesabla hər 100 000 əhaliyə 14 nəfər təşkil edib. Sahibkarın hesablamasına görə, yaxın 40 ildə Yerdəki yüksələn temperaturdan ölüm eyni sayda olacaq, 2100-cü ilə qədər isə bu rəqəm beş dəfə artacaq.report
Türkiyənin Afyonkarahisar vilayətində yerləşən Beyyazı qəsəbəsinə giriş-çıxış nəzarətə götürülüb.
Publika.az xəbər verir ki, 3300 nəfər əhalisi olan qəsəbədə bir neçə gün əvvəl keçirilən toy mərasimindən sonra koronavirusa yoluxma halları kəskin artıb. Belə ki, bir gün içində 48 nəfərin koronavirusa yoluxduğu məlum olub. Həmin şəxslərin ailələrində və ətrafındakı ümumilikdə 800 nəfər risk qrupuna düşdüyü üçün yerli qurumlar qəsəbəni ümumilikdə karantinə almaq qərarına gəlib.
Artıq qəsəbənin giriş-çıxışlarında postlar qurulub.
Beyrutda baş verən partlayışda ölənlərin sayı 137 nəfərə çatıb.
Bu barədə “Əl-Cəzirə” telekanalı Livan Səhiyyə Nazirliyinə istinadən məlumat yayıb. Bildirilir ki, yaralıların sayı 5 minə çatıb, onlarla insan hələ də itkindir.
Xatırladaq ki, avqustun 4-ü Beyrut limanında yerləşən pirotexniki anbarda güclü partlayış olub. Livan Daxili İşlər Nazirliyinin məlumatına görə, partlayışa səbəb anbarda saxlanılan 2,7 min tondan çox ammonium nitratın qaynaq işləri zamanı baş verən yanğın olub. Partlayış zamanı zərbə dalğası paytaxtın bir çox məhəlləsində onlarla evlərə, avtomobillərə ciddi ziyan vurub, binaların şüşələrini sındırıb. 300 mindən çox insan evsiz qalıb.
Türkiyədə Qurban bayramından sonra yoluxmaların sayında artım müşahidə olunub. Bu barədə ölkənin Səhiyyə naziri Fəxrəddin Qoca tvitter hesabında açıqlama verib.
“Yeni yoluxma sayında ciddi artım müşahidə olunur. İki gün arasında olan fərq, son zamanlarda ilk dəfə bu qədər aydındır. Bayram və tətildə yaranmış sıxlıqların ağır nəticələrə yol açmasının qarşısını almalıyıq. Hamımız bir-birimizə görə məsuliyyət daşıyırıq. Tədbirlərdə birliyə ehtiyacımız var”,- deyə nazir vurğulayıb.
Mütəxəssislər yoluxma hallarının xüsusilə istirahət zonalarında artdığını və yaxın gələcəkdə bu halların böyük şəhərlərə keçəcəyini bildirib. Elmi Komitə üzvü, prof. dr. Tevfik Özlü tətil zamanı ortaya çıxan bir çox görüntünün üzücü olduğunu bildirib:
“Yaxın günlərdə və həftələrdə yeni yoluxma hallarının sayında ciddi artım olacaq. Tətil dövründə ciddi bir sıxlıq var idi və vətəndaşlar təəssüf ki, lazımi xəbərdarlıqlara qulaq asmadılar. Tətildən qayıdan vətəndaşlarımız çox diqqətli olmalı, ən kiçik bir simptom olduğu təqdirdə tibbi qurumlara müraciət etməlidirlər”.
Rəsmilər vəziyyət kəskinləşəcəyi təqdirdə məhdudiyyətlərin bərpa oluna biləcəyini açıqlayıb.
Qeyd edək ki, Türkiyədə bu günə qədər 234 min 934 nəfər koronavirusa yoluxub 5 765 nəfər isə xəstəlik səbəbindən həyatını itirib.