 |
|
Portuqaliya millisinin və “Yuventus”un futbolçusu Kristiano Ronaldonun məhsuldar seriyası qırılıb.
Goal.az xəbər verir ki, ardıcıl 7 il 50 qol səddini fəth edən hücumçu 2010-cu ildən sonra ilk dəfə bunu bacarmayıb.
İtaliya çempionatının Sampdoria ilə matçında dubla imza atan Ronaldo qol sayını 49-a çatdırıb. “50”nin bir addımlığında qalan forvard son 7 ildə daha məhsuldar olub.
O, 2011-ci ildə 60, ardınca 63, 69 və 61, son üç ildə 57, 55 və 53 qola sevinib.
Özümü dünyanın ən ağıllı insanı hesab etmirəm. Amma əslində axmaq da deyiləm. "Liverpul"un artıq çempion olduğunu düşünmək ən azı axmaqlıq olar.
Goal.az xəbər verir ki, bu sözləri "Liverpul"un baş məşqçisi Yurgen Klopp İngiltərə Premyer Liqasının 20-ci turunda "Arsenal"ı 5:1 hesabı ilə məğlub etdikləri oyundan sonra keçirilən mətbuat konfransında deyib. Dünənki qələbədən sonra liderliyini möhkəmləndirən mersisaydlılar hazırda ən yaxın izləyicisi "Tottenham"i 9 xal qabaqlayır. Ancaq alman mütəxəssis bu fərqin heç bir önəm kəsb etmədiyini düşünür:
"9 xallıq fərq hələ heç nə demək deyil. Həqiqətən dekabrda komandanın neçə xalının olması vacib deyil. Çünki bütün suallara mövsümün sonunda aydınlıq gələcək".
Klopp "Arsenal"la matçdan əvvəl "Tottenhem"in xal itirməsindən xəbərdar olduqlarını söyləyib:
"Amma açığı, həmin vaxt daha çox öz oyunumuzu fikirləşirdik. Bizim həmin an şənlik təşkil etdiyimizi düşünürsünüz? Futbolçulardan hansınınsa buna görə paltardəyişmə otağında güldüyünü görmədim. Biz sadəcə, öz oyunumuza köklənməliyik".
Klopp sonda jurnaistlərə də söz atıb: "Əgər 3 xal itirsəydik, siz jurnalistlər o dəqiqə başlıq yazacaqdınız ki, "Onlar artıq əsəbləşirlər". Hər birinizin həqiqətən mənim yerimdə olmağını istərdim. Mən isə sizin yerinizdə olardım".
Qeyd edək ki, 54 xalı olan "Liverpul" hazırda 2-ci pillədəki "Tottenhem"i 9, 1 oyun az keçirən və 3-cü sırada qərarlaşan "Mançester Siti"ni isə 10 xal qabaqlayır.
Türkiyənin “Başakşəhər” klubunun son transferi yerli mediada müzakirələrə səbəb olub.
Axar.az-ın verdiyi məlumata görə, brazilyalı Robinyonun “Sivasspor”dan alınması suallar doğurub. Türk mediası ölkə komandalarının maliyyə problemi yaşadığı bir dövrdə “Başakşəhər”in Arda Turana ildə 5 milyon avro, Adebayora 4.5 milyon avro, Klişiyə 3 milyon avro maaşı hansı maliyyə qaynağından verdiyini sual edir.
Robinyonun transferinə isə 2 milyon avro ödənildiyi bildirilir. Klubun forma satışından, reklamdan, Avropadakı nəticələrdən hər hansı qazancı olmadığı yazılıb.
“Cümhuriyyət” qəzetinin idman yazarı Bilgin Gökbərk klubun başqanı Göksəl Gümüşdağın Prezident Tayyib Ərdoğanın xanımı Əminə Ərdoğanın qohumu olmasına diqqət çəkib.
Əfsanəvi futbolçu Dieqo Maradona baş məşqçisi olduğu Meksika "Dorados"unun düşərgəsində bir neçə gündür görünmür.
Report-un məlumatına görə, dekabrın 26-dan komandanın mövsümöncəsi məşqləri fiziki hazırlıq üzrə mütəxəssisin rəhbərliyi altında gerçəkləşir. Maradonanın kluba qayıdıb-qayıtmayacağı hələ bilinmir. Onun yeni transferlərdən və köməkçiləri ilə bitən müqavilənin uzadılması istiqamətində danışıqların aparılmamasından narazı olduğu deyilir. Argentinalı mütəxəssisin özünün "Dorados"la müqaviləsi 2019-cu ilin yayınadəkdir.
Qeyd edək ki, Dieqo Maradona mayda Belarusun "Dinamo" (Minsk) klubunda İdarə Heyətinin sədri postunu tutub. Lakin Maradona orada da uzun müddət görünməyib. O, "Dorados"a sentyabrın 7-də baş məşqçi təyin olunub.
Rusiyanın Sank-Peterburq şəhərində şahmatın rapid növü üzrə dünya çempionatı keçirilib.
Azərbaycan şahmatçısı Şəhriyar Məmmədyarov yarışı gümüş medalla başa vurub.
Təmsilçimiz keçirdiyi oyunlarda ümumilikdə 10,5 xal toplayıb. Onu çempionluqdan cəmi yarım xal ayırıb. Belə ki, 11 xal toplayan rusiyalı Daniel Dubov dünya çempionu olub.
Bürün medalı isə ABŞ şahmatçısı Hikaru Nakamura (10,5 xal) qazanıb.
Azərbaycanın 19 yaşadək futbolçulardan ibarət milli komandasınıni baş məşqçisi postunda dəyişiklik olub.
Axar.az AFFA-nın mətbuat xidmətinə istinadən xəbər verir ki, yığma Samir Əliyevə tapşırılıb. O, Vüqar Məmmədi əvəzləyib. Təyinat AFFA-nın Məşqçilər Komitəsinin təqdimatı əsasında baş katibliyin birgə müzakirələri nəticəsində reallaşıb.
39 yaşlı mütəxəssis komandanı 2019-cu ilin oktyabr ayında keçiriləcək Avropa çempionatının seçmə mərhələsinə hazırlayacaq.
Qeyd edək ki, S.Əliyev ötən mövsüm “Səbail”ə rəhbərlik edib.
“Yuventus” yaxşı komandadır. Əvvəl də belə idi, Ronaldonun transferindən sonra isə daha yaxşı olub.
Qol.az xəbər verir ki, bu sözləri “Marca”ya açıqlamasında “Barselona”nın futbolçusu Lionel Messi deyib.
Argentinalı hücumçu Turin klubunu bu mövsüm Çempionlar Liqasını qazanmağa əsas namizədlərdən olduğunu bildirib.
Qeyd edək ki, mövsümün əvvəlində “Real”dan “Yuventus”a keçən Ronaldo Turin klubunda 18 oyuna 12 qol vurub, 5 məhsuldar ötürmə edib.
“Liverpul”un misirli hücumçusu Məhəmməd Salah Avstriya “Salzburq”nun formasını geyinən yəhudi futbolçu Munas Dabburun transfer ediləcəyi təqdirdə klubdan gedəcəyini bildirib.
Axar.az xəbər verir ki, bu barədə İsrailin “Yerusalem Post” qəzeti yazıb.
Qəzetin iddiasına görə, çıxdığı son 30 rəsmi oyunda 20 qol vuran Dabbur “Liverpul”un baş məşqçisi Yurgen Kloppun transfer siyahısında yer alıb. Misir-İsrail arasında olan münasibətlərə görə, Salah bu transferin baş tutacağı təqdirdə ingilis klubunu tərk edəcəyi ilə bağlı xəbərdarlıq edib.
Qəzet bildirib ki, 2014-cü ildə Salah “Bazel” klubunda oynayarkən “Makkabi Təl-Əviv”lə keçirilən görüşdə rəqib oyunçuların əlini sıxmaq əvəzinə ayaqqabılarının ipini bağlamışdı.
Dekabrın 26-da İtaliya A Seriyasında 18-ci turun oyunları keçirilib.
Axar.az xəbər verir ki, turun gözlənilməz hesabı “Atleti Azzurri İtalia” stadionunda qeydə alınıb. Son çempion “Yuventus” səfərdə “Atalanta” komandasının qonağı olub. Görüş 2:2 hesabı ilə başa çatıb. Gərgin keçən qarşılaşmada hesabı erkən qolla Turin təmsilçisi açıb. Miralim Pyaniçin ötürməsindən sonra top “Atalanta” klubunun müdafiəçisi Berat Djimsitinin ayağına dəyərək qapıdan keçib – 0:1. Qoldan sonra irəli atılan meydan sahibləri matçın 24-cü dəqiqəsində hesaba tarazlıq gətirib. Duvan Sapata fərdi ustalığı sayəsində rəqibin iki müdafiəçisini keçərək qapıya qüvvətli zərbə endirib – 1:1.
Fasiləyə komandalar heç-heçə ilə yollanıb.
Qarşılaşmanın ikinci hissəsinin 56-cı dəqiqəsində “Atalanta” klubu hesabda önə keçib. Duvan Zapata adını tabloya yazdıraraq oyunda dublun rəsmiləşdirib – 2:1. Matçın 78-ci dəqiqəsində “qoca sinyora” hesabı bərabərləşdirməyə nail olub. Belə ki, Miralim Pyaniçin künc ötürməsindən sonra “Atalanta”nın cərimə meydançasında yaranmış qarışıqlıqdan Kristino Ronaldo dəqiq baş zərbəsi ilə istifadə edib. Bu, “Yuventus”un ulduz oyunçusunun cari mövsümdə vurduğu 12-ci qoldur. Qalan dəqiqələrdə hər iki komandanın cəhdlərinə baxmayaraq, hesab dəyişməyib.
Turun digər oyunlarında aşağıdakı nəticələr qeydə alınıb:
“Frosinone” – “Milan” – 0:0
“Fiorentina” – “Parma” – 0:1
“Bolonya” – “Latsiyo” – 0:2
“Kalyari” – “Cenoa” – 1:0
“Sampdoriya” – “Kievo” – 2:0.
Qeyd edək ki, tura “Roma” - “Sassuolo”, “Torino” - “Empoli”, SPAL - “Udineze” və “İnter” - “Napoli” oyunları ilə yekun vurulacaq.
Rusiyanın Sankt-Peterburq şəhərində şahmat üzrə rapid yarışlarına start verilib.
Axar.az xəbər verir ki, kişilər arasında 206, qadınların yarışlarında 124 şahmatçının mübarizə apardığı yarışların ilk günündə 5 turun oyunları keçirilib. Azərbaycanın tanınmış şahmatçısı Şəhriyar Məmmədyarov 5 turun nəticəsinə görə 4 xal toplayıb. O, bu nəticəyə görə turnir cədvəlində 5-ci yerdədir. Qədir Hüseynovun aktivində 3,5, Rauf Məmmədovun isə 3 xalı var. 4-cü turun nəticələrinə görə Gülnar Məmmədova 3, Günay Məmmədzadə 2,5, Zeynəb və Türkan Məmmədyarova bacıları isə hərəyə 2 xal qazanıblar.
Turnir cədvəlinin lideri 4,5 xalla iranlı Alireza Firoujadır. Qadınların turnirində isə 4 xalla Çin şahmatçısı Vencun Cu liderlik edir.
Yarışlar dekabrın 28-dək keçiriləcək. Kişilərin yarışları 15, qadınların turnirin isə 12 turdan ibarətdir.
Blits üzrə dünya çempionatı isə dekabrın 29-30-da təşkil ediləcək.