 |
|
İspaniya La Liqasının 26-cı turunda “El-klasiko” baş tutub.
Madriddə kemirilmiş görüşdə “Real” “Barselona”nı qəbul edib.
İki komanda arasında əzəli rəqabətdən əlavə turnir cədvəli baxımından da olduqca vacib əhəmiyyət daşıyan görüşün qalibi meydan sahibləri olub.
Bu matça qədər 53 xalı olan və 55 xallı “Barselona”dan sonra ikinci pillədə qərarlaşan “Kral klubu” iki qollu qələbə ilə xalını 56-ya yüksəldib və liderlik mövqeyini ələ keçirib.
Oyunda hesabı Vinisius Junior açıb. O, 71-ci dəqiqədə Toni Kroosun ötürməsini məntiqi sonluğa çatdırıb.
Qarşılaşmaya əlavə olunmuş 2-ci dəqiqədə isə Mariano Diaz nəticəni elan edib. Bir dəqiqə əvvəl oyuna daxil olan və Dani Karvaxalın ötürməsindən sonra fərqlənən 26 yaşlı futbolçu hesabı 2:0-a çatdırıb.
Futbol üzrə Azərbaycan milli komandasının Braziliya əsilli sabiq üzvü Andre Ladaqanın sosial şəbəkədəki son paylaşımı marağa səbəb olub. "Ölkə.Az" xəbər verir ki, veteran futbolçu saçlarını tamamilə saraldıb. 45 yaşlı futbolçunun bu addımı izləyicilərini təəccübləndirib.
Qeyd edək ki, Ladaqa ölkəmizdə "Bakı" və "Karvan" klublarının şərəfini qoruyub. O, 2006-2008-ci illərdə milli komandamızda 11 oyun keçirib və 1 qol vurub.
“Bəli, Moldovada keçirdiyim görüşüm yarımçıq saxlanıldı. Rəqibim ayağa qalxmadı. Dursaydı, hakim mənim əlimi qaldıracaqdı”.
Bunu Oxu.Az-a açıqlamasında MMA üzrə döyüşçümüz Mehman Məmmədov deyib.
Dörd gün əvvəl Moldovanın paytaxtı Kişinyovda keçirilmiş “Eagles Next Level” döyüş gecəsində azərbaycanlı idmançı Mehman Məmmədovla Əfqanıstan döyüşçüsü Nurəddin Həzrət arasında keçirilmiş görüş yarımçıq saxlanılıb.
Görüşün bitməsinə 3:11 dəqiqə qalmış əfqanıstanlı idmançı yerə yıxılıb və zədələndiyini bildirib. Onu oktaqondan xərəklə aparıblar. Hakimlər isə görüşdə qalibin olmadığını bildiriblər.
Lakin Mehman Məmmədov saytımıza açıqlamasında sonradan qələbənin ona verildiyini bildirib: “O, uzandı və ayağa qalxmadı. Rəqibimi xəstəxanaya apardılar. Ancaq sonra məlum oldu ki, ona heç nə olmayıb. Özünü artistliyə vurmuşdu. Mənim ayağım heç onun qasıq nahiyəsinə dəyməyib. Hamı, hətta hakimlər də şokda idi. Belə şey olar?!
Hələ sonradan qışqırırdı ki, qələbə onundur. Ayağım ona toxunmur. Videoya baxsanız, görərsiniz ki, əvvəlcə fikirləşir, sonra yerə uzanır. Xəstəxanadan həkim rəyindən sonra təşkilatçılar bu döyüşdə qələbəni sonradan mənə verib. Bunu həmin təşkilatın prezidenti Dorin Damir məşqçim Ruslan Əfəndiyevə də deyib. Buna görə də iyunda mənə kəmər uğrunda döyüş veriləcək”.
Qeyd edək ki, həmin döyüşdə daha iki azərbaycanlı idmançı gücünü sınayıb. Lakin həm Tünzalə İmanlı, həm də Elçin Hüseynov müvafiq olaraq moldovalı və özbəkistanlı rəqiblərinə uduzub.
Prezident İlham Əliyev İtaliyanın paytaxtı Romada keçirilən Avropa çempionatında uğurlu nəticə qazandığına görə Azərbaycanın yunan-Roma güləşi üzrə milli komandasının üzvlərini təbrik edib.
Bununla bağlı Prezidentin "Twitter" səhifəsində paylaşım edilib.
Təbrikdə deyilir: "Avropa çempionatında yunan-Roma güləşi üzrə tarixdə ilk dəfə 6 medal qazanan milli komandamızın möhtəşəm qələbəsi münasibətilə idmançılarımızı, məşqçilərimizi və bütün Azərbaycan xalqını ürəkdən təbrik edirəm".
Azərbaycan yunan-Roma güləşçisi Rafiq Hüseynov İtaliyanın paytaxtı Romada keçirilən Avropa çempionatında final görüşünə çıxıb.
82 kq çəki dərəcəsində rəqib bolqarıstanlı Daniel Tixomirov Aleksandrov olub.
Görüş azərbaycanlı pəhləvanın qələbəsi ilə yekunlaşıb - 2:1. Bununla da Hüseynov karyerasında ikinci dəfə Avropa çempionu olub. O, daha əvvəl 2011-ci ildə 74 kq çəkidə qitə birincisi olub.
Azərbaycan yunan-Roma güləşçiləri Avropa çempionatını 2 qızıl, 4 bürünc medalla başa vurub. Daha əvvəl Sənan Süleymanov (77 kq) qızıl, Eldəniz Əzizli (55 kq), Murad Bazarov (60 kq), Ülvi Qənizadə (72 kq) və İslam Abbasov (87 kq) bürünc medala sahib olublar.
Qeyd edək ki, ümumilikdə 6 medal qazanan yunan-Roma güləşi millimiz Avropa çempionatlarında medalların sayına görə tarixinin ən yaxşı nəticəsinə imza atıb.
ABŞ-ın Con Xopkins Universitetinin mütəxəssislərinin gəldiyi qənaətə görə, daha fəal fiziki aktivlik vaxtından əvvəl ölümün qarşısını alan əsas amillərdən biridir.
C.Xopkins Universiteti bununla bağlı uzunmüddətli bir araşdırma həyata keçirib. Araşdırmaya 548 yaşlı insan cəlb edilib. Araşdırma 2007-ci ildən 2015-ci ilədək davam edib. Prosesə cəlb edilən 548 insan monitorlar vasitəsi ilə izlənilib. Mütəxəssislər fiziki aktivliyin ömrün uzanması və ölümün qarşısının alınmasında heç bir əlaqəsini tapa bilməyiblər. Lakin gün ərzində daha çox fiziki aktiv olan və məşq edən insanların daha az fiziki aktiv olan insanlardan uzun ömür yaşaması bəlli olub.
Yəni passiv insanların daha tez xəstələnməsi və yaxud da sağlamlığına ciddi təhlükələrin çıxdığı bəlli olub.
Aparılan araşdırma nəticəsində 548 nəfərdən 61-i 2017-ci ilin sonunadək ölüb, 487-si isə sağ qalıb. Sağ qalanların gün ərzində orta hesabla 5,7 saat, ölənlərin isə gün ərzində 4,7 saat məşq edən insanlar olub. İnsanın ölümündə yaş həddi, insanın cinsi, çəkisi, xəstəliyin təsiri kimi digər amillər az rol oyandığı ortaya çıxıb. Odur ki, yaşlı insanların davamlı fiziki aktiv fəaliyyətlə məşğul olması insan ömrünü uzadan amildir.
İtaliyada keçirilən güləş üzrə Avropa çempionatında Azərbaycan idmançısı Sənan Süleymanov (77 kq) qızıl medal qazanıb. O bu uğura Avropa çempionatının finaldakı rəqibi Macarıstan təmsilçisi Zoltan Levanı (3:1) məğlub edərək nail olub.
Azərtac xəbər verir ki, yarışların ikinci günündə - fevralın 11-də 55, 63, 77, 87 və 130 kiloqram çəki dərəcəsində çıxış edən yunan-Roma güləşçiləri final görüşlərində mübarizə aparıblar.
Pəhləvanımız Sənan Süleymanov debütdə Bolqarıstanı təmsil edən erməni güləşçiyə qalib gəlib. Sonra İtaliya idmançısına şans verməyən güləşçimiz dörddəbir finala vəsiqə qazanıb. Bu mərhələdə Yunanıstan idmançısı ilə görüş dramatik alınıb. Əzmkarlıq nümayiş etdirən güləşçimiz son saniyələrdə uğurlu fənd işlədərək rəqibinin kürəyini yerə sıxıb və yarımfinala yüksəlib. Yarımfinalda təcrübəli Ermənistan güləşçisi ilə prinsipial görüşdən də qalib ayrılan S.Süleymanov ilk dəfə çıxış etdiyi qitə birinciliyinin finalına vəsiqə əldə edib. Fevralın 11-də macar güləşçiylə həlledici görüşə çıxan gənc pəhləvanımız ikinci hissədə qazandığı xallarla Avropa çempionatının qalibi olub.
Şəmkir DYP-nin əməkdaşları yeniyetmə idmançıları təhlükəsiz əraziyə təxliyə edib
Şaxtalı hava qarla müşahidə olunduğundan axşam saatlarında Şəmkir-Gədəbəy yolunda avtomobillərin hərəkəti üçün xeyli çətinlik yaradıb. Bu isə ötən gecə nəqliyyat vasitələrinin yolda qalmasına səbəb olub. Yolda qalanlar sırasında Gədəbəydən idman yarışında qayıdan yeniyetmələrdə olub.
Avtosfer.az xəbər verir ki, ərazidə xidmət aparan Şəmkir rayon Polis Şöbəsinin Dövlət Yol Polisi Bölməsinin əməkdaşları mikroavtobusun yolda qaldığını görüb nəqliyyat vasitəsinə yaxınlaşaraq yeniyetmələri təxliyə ediblər. İsti məkana aparılanlara qida və isti içki təklif olunub. Bir müddət sonra nəqliyyat vasitəsinin təhlükəsiz şəkildə yoluna davam edilməsi üçün müvafiq işlər görülüb.
Yol polisləri gecə yolda qalan digər nəqliyyat vasitələrinin sürücülərinə də köməklik göstərərək təbliğat xarakterli söhbətlər aparılıb. Bildirilib ki, havaların qarlı-buzlu keçməsi ilə əlaqədar mövsümi şinlərlə təchiz edilməyən nəqliyyat vasitələrdən etmək zəruridir. Yol polisi xüsusilə də dağlıq ərazilərdə hərəkət edən nəqliyyat vasitələrinin sürücülərinə qış mövsümünə uyğun təhlükəsiz qaydalarına əməl olunmasını tövsiyə edib.
"Çempionlar Liqasının final oyunları bəzi şəhərlərdə bu səviyyədə keçirilmir".
Azərtac xəbər verir ki, bunu Azərbaycan Respublikasının Prezidenti, Milli Olimpiya Komitəsinin Prezidenti İlham Əliyev bu gün Milli Olimpiya Komitəsində 2019-cu ilin idman yekunlarına həsr olunan mərasimdə çıxışı zamanı deyib.
Dövlət başçısı gələcək fəaliyyətlərinə toxunarkən, Azərbaycanda bundan sonra da beynəlxalq idman yarışları keçiriləcəyini bəyan edib: "Bu baxımdan bu il əlamətdar il olmuşdur. Bir neçə dünya, Avropa çempionatı keçirilmişdir, gimnastika üzrə, digər idman növləri üzrə. O cümlədən Avropa Gənclər Olimpiya Festivalı keçirilmişdir. Bakı şəhərinə Avropanın bütün ölkələrindən yeniyetmələr, gənclər gəlmişlər. Bildirməliyəm ki, bizim gənclərimiz də yaxşı nəticə göstərmişlər, komanda hesabında 4-cü yerə layiq görülmüşlər. Bu il Bakıda daha bir əlamətdar idman yarışı keçirilib. Futbol üzrə Avropa Liqasının final oyunu ilk dəfə olaraq Azərbaycanda, Bakı Olimpiya Stadionunda keçirilibdir. Bütün təşkilati məsələlər ən yüksək səviyyədə öz həllini tapıb, bunu da mən xüsusilə qeyd etmək istəyirəm. Çünki minlərlə xarici tamaşaçı, xarici qonaq gəlmişdir. Minlərlə qonağın bir gün, iki gün ərzində gəlməsi əlbəttə ki, bizim üçün müəyyən problemlər yarada bilərdi, ictimai nəqliyyatla, təhlükəsizliklə bağlı. Həmçinin hava limanında təyyarələrin, o cümlədən çarter təyyarələrin enişi ilə bağlı müəyyən problemlər ola bilərdi. Ancaq bütün müvafiq qurumlar, Təşkilat Komitəsi çox səmərəli işləyiblər. Ümumi rəyə əsasən, təşkilati məsələlərə görə Bakı Avroliqa final yarışı nümunə kimi göstərilir. Mən indi başqa şəhərlərdə buna oxşar yarışların keçirilməsi ilə bağlı bir söz demək istəmirəm, ancaq bizə gələn məlumata görə, hətta Çempionlar Liqasının final oyunları bəzi şəhərlərdə bu səviyyədə keçirilmir. Bizdə olan nizam-intizam, qayda-qanun, təşkilati məsələlər, könüllülərin fəaliyyəti, bütün aidiyyəti qurumların birgə fəaliyyəti bunu təmin edibdir"
Azərbaycan Prezidenti gələn il ölkəmidzə yenə də mötəbər idman yarışlarının keçirilməsinin nəzərdə tutulduğunu, onların arasında bir nömrəli yarış olan futbol üzrə Avropa çempionatının dörd oyununun olduğunu söyləyib: "Artıq tarixlər də bəllidir, hazırlıq işləri də aparılıb, xaricdən gələn çox böyük tamaşaçı auditoriyası olacaq. Əminəm ki, bu yarış da ən yüksək səviyyədə keçiriləcək və Azərbaycan öz imkanlarını, o cümlədən təşkilatçılıq qabiliyyətini bir daha göstərəcəkdir".
Azərbaycan Qran-Prisi 5-7 iyunda keçiriləcək
“Formula 1” üzrə 2020-ci il Azərbaycan Qran-Prisi üçün könüllülərin qeydiyyatına start verilib.
Bakı Şahar Halqası əməliyyat Sirkəti (BŞH) “5 dekabr - Beynəlxalq Könüllülər Günü” munasibətilə xüsusi tədbir keçirərək, yeni “Formula-1” mövsümü üçün könüllülərin qeydiyyatına təntənəli şəkildə başlayıb.
Pit binasında yerləşən Paddok Klubda reallaşan tədbirdə BŞH-nin İnsan Resursları şöbəsinin və BŞH Akademiyasının rəhbəri İranə Əhmədova, BP şirkətinin Azərbaycan, Gürcüstan, Türkiyə regionunda xarici əlaqələr və strategiya üzrə vitse-prezidenti Bəxtiyar Aslanbəyli və “CinemaPlus” kinoteatrlar şəbəkəsinin Müşahidə Şurasının üzvü Zaur Darabzadə nitq söyləyərək, karyera quruculuğuna dair öz təcrübələrini iştirakçılarla bölüşüblər.
2020-ci il Qran-Prisi üçün 3 min könüllünün cəlb olunması nəzərdə tutulub. Könüllülər proqramına müraciət üçün azı 16 yaşında olmaq, ingilis dilini əla dərəcədə bilmək (əlavə xarici dil bilənlərə üstünlük veriləcək), böyük həvəs və əzmkarlığa sahib olmaq tələb olunur.
Proqrama tələb hər ötən il artdığından və yerlər məhdud olduğundan seçim zamanı ən yaxşı namizədlərə üstünlük veriləcək. Seçim mərhələlərindən uğurla keçən hər bir könüllü insan resursları, işçi qüvvəsi, media əməliyyatları, tamaşaçı xidmətləri, şəhər əməliyyatları, marsal klubu əməliyyatları, inzibati əməliyyatlar, hava limanı əməliyyatlan və digər zəruri istiqamətlərdən birinə yönləndiriləcək.
Qeyd edək ki, Azərbaycan Qran-Prisi 5-7 iyunda keçiriləcək.