 |
|
“Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında” fərmanın icrası ilə əlaqədar olaraq, "Unibank" filialları gücləndirilmiş iş rejimində fəaliyətini davam etdirir. Müştərilərin kompensasiyalarını rahat və sürətli şəkildə alması üçün bu şənbə (4 may tarixində) Unibankın Abşeron və Region filialları səhər saat 10.00-dan 16.00-dək işləyəcək.
Axar.az xəbər verir ki, müştərilərin növbələrdə vaxt itkisinin qarşısını almaq üçün kompensasiya alacaq müştərilərə xidmət növbəlilik prinsipi əsasında aparılır. Müştərilərə göndərilən SMS-lərdə hansı filiala və nə vaxt gəlməsi haqda məlumat qeyd olunur.
Bank mobil nömrəsi işlək olmayan müştərilərdən xahiş edir ki, şəxsiyyət vəsiqələrinin FİN kodunu öz mövcud işlək nömrələrindən SMS vasitəsi ilə 8117 nömrəsinə göndərsinlər. Bütün müştərilərə kompensasiya ödənişlərinin mayın sonunadək yekunlaşdırılması nəzərdə tutulur.
Ətraflı məlumatı (012) 117 nömrəli telefondan, Bankın saytından (www.unibank.az) və yaxud Feysbuk və Tvitter səhifələrindən (www.facebook.com/unibank.az, https://twitter.com/unibank) əldə etmək olar.
“Unibank” hər kəsin bankı!
15,5 ton pomidorun Azərbaycandan Rusiyanın Dağıstan Respublikasına idxalına icazə verilməməsi ilə bağlı Qida Təhlükəsizliyi Agentliyinə sözügedən ölkənin müvafiq qurumundan rəsmi məlumat daxil olmayıb.
Bu sözləri Axar.az-a AQTA-nın mətbuat katibi Aysel Fərziyeva deyib.
O, həmin məlumatın doğruluğunun dəqiqləşdirilməsi istiqamətində araşdırmaya başladıqlarını bildirib.
Qeyd edək ki, Rusiya Federasiyasının Baytarlıq və Fitosanitar Nəzarəti üzrə Federal Xidmətinin ("Rosselxoznadzor”) Azərbaycandan Rusiyaya aparılan 15,5 ton pomidoru ölkəyə buraxmadığı baradə məlumat yayıb. Laboratoriyanın rəyinə əsasən, Azərbaycandan gətirilən məhsulda zərərli güvə aşkar edildiyinə görə məhsulun geri qaytarılması barədə qərar qəbul edilib.
Sabahdan etibarən dollar kreditləri üzrə kompensasiyası 500 manatdan yuxarı olan vətəndaşlar onlar üçün ayrılmış poçt şöbələrindən məbləğlərini qeyri-nağd formada, yəni kart vasitəsilə alıb, nağdlaşdıra biləcəklər.
Axar.az xəbər verir ki, bu barədə Nəqliyyat, Rabitə və Yüksək Texnologiyalar Nazirliyinə məxsus Azərpoçt MMC-nin açıqlamasında bildirilir.
Məlumatda deyilir ki, kompensasiyanın əldə edilməsi üçün plastik kartlar şirkətin Bakıda və bölgələrdə yerləşən 77 şöbəsində təqdim ediləcək. Paytaxt Bakı istisna olmaqla, respublika ərazisində Sumqayıt, Gəncə, Tovuz, Qazax, Yevlax, Ağdam, Masallı, Cəlilabad, Şəmkir ərazisinə düşən kart sayı 1 000-dən çox, digər bölgələrdə isə 1 000-dən azdır.
Prezident İlham Əliyevin "Fiziki şəxslərin problemli kreditlərinin həlli ilə bağlı əlavə tədbirlər haqqında" 28 fevral 2019-cu il tarixli fərmanı ilə bank olmayan kredit təşkilatlarının (BOKT) və bağlanmış bankların müştəriləri aprelin 22-dən etibarədn "Azərpoçt"un respublika üzrə 14 97 şöbəsindən kompensasiyalarını ala bilirlər. Bu gün artıq 9 gündür ki, problemli kredit sahiblərinə kompensasiyaların ödənilməsinə başlanılıb. Belə ki, son 8 gün ərzində 43 350 nəfər 500 manatdan aşağı kompensasiyası olan vətəndaş 11 347 668 manat vəsaiti nağd formada alıb.
Maliyyə Bazarlarına Nəzarət Palatası tərəfindən təqdim olunan siyahıya əsasən “Azərpoçt”un icra edəcəyi əməliyyat 121 minə yaxın insana şamil olunacaq. 45 minə yaxın vətəndaşın kompensasiyası 500 manatdan çox olduğuna görə “Azərpoçt”un kartları vasitəsi ilə, 77 minə yaxın vətəndaş isə məbləği 500 manatdan az olduğuma görə nağd şəkildə əldə edəcəklər. “Azərpoçt”un internet səhifəsində azerpost.az-da “Problemli kreditinzə düşən kompensasiya haqqında məlumat” bölməsindən də kompensasiyasını nağd və kart vasitəsilə alacaq vətəndaşlarla bağlı bütün məlumatlar yerləşdirilib.
Vətəndaş Azərpoçtun saytı vasitəsilə məlumatları qeyd edərkən, onun kredit məbləğı, kredit aldığı bank və ya BOKT,ona düşən kompensasiya haqda ətraflı məlumat ala bilir. Eyni zamanda onun kartını ala biləcəyi şöbə və ünvanı həmin məlumatlar arasında qeyd olunub. Daha sonra vətəndaş orda göstərilən poçt şöbəsinə şəxsiyyət vəsiqəsi və onun surəti ilə yaxınlaşıb, zəruri sənədlərə imza atır. Bu əməliyyatlar yerinə yetirildikdən sonra vətəndaşa plastik kart və PIN kod təqdim olunur. Qeyd olunan ödənişlər həyata keçirilərkən müştərilərin eyniləşdirilməsinə, sistemdə olan məlumatlarla müştərinin şəxsiyyət vəsiqəsindəki məlumatlarin üst-üstə düşməsinə ciddi diqqət yetiriləcək.
Eyni zamanda PIN kodlar və kartlar müştərilərə təqdim edilərkən reyestrdə imza etdiriləcək və şəxsiyyət vəsiqəsinin surəti alınaraq reyestrə əlavə olunacaq. Müştərilər nəinki “Azərpoçt”un bankomatlarında və post terminallarla təhciz olunan şöbələrində plastik kart vasitəsilə, eyni zamanda Millikart MMC-nin şəbəkəsinə daxil olan bütün ATM-lər vasitəsilə rüsum tutulmadan, yəni komissiyasız nağdlaşdırma əməliyyatı həyata keçirə biləcəklər. Həmin şəbəkəyə "Azərbaycan Sənaye Bankı", "Access Bank", "Bank Melli İran", "Bank of Baku", "Express Bank", "Gunay Bank", "Naxçıvan Bank" və "Unibank" daxildir.
Problemli kredit sahibi ölkədə yoxdursa və ya vəfat edibsə, ödəniş zamin tərəfindən edilibsə, eləcə də bu və ya digər müzakirəli məsəslələrdə, yalnız qanunvericiliklə nəzərdə tutulan hallarda varislik və ya etibarnamə ilə ödənişlər həyata keçirilə biləcək. Varisliyin təyin olunması və etibarnamənin verilməsi ilə bağlı yaranan problemlərin həll olunması “Azərpoçt”un səlahiyyətində deyil. Problemli kreditlərin fiziki şəxslərə qaytarılması işində şirkət sadəcə icraçı tərəf kimi çıxış edir.
“Azərpoçt” tərəfindən problemli kreditlərin ödənilməsilə bağlı göstərilən xidmətlər pulsuz həyata keçiriləcək.
10 min dollardan yuxarı götürülən kreditlərə güzəşt edilməsi nəzərdə tutulmayıb. Bu kreditləri sahibkarlar öz biznes planları üçün götürüblər və onlar risklərə görə cavabdehdirlər.
Azvision.az xəbər verir ki, bunu Mərkəzi Bankın (AMB) sədri Elman Rüstəmov bu gün keçirdiyi mətbuat konfransında bildirib.
AMB sədri qeyd edib ki, əsas məqsəd əhalinin aztəminatlı təbəqəsinin problemli kreditlərinin həlli idi: "Prezidentin dollar krediti olan fiziki şəxslərə güzəştin edilməsinə dair qərarı böyük əhali qrupunu əhatə edir. 10 min, 20 min, 50 min dollarlıq kredit artıq biznəs kreditləridir. Biznes sahibləri risklər üçün özləri cavabdehdirlər. Dövlətin bu yükü üzərinə götürmək öhdəliyi yoxdur".
Dünya bazarlarında neft qiymətləri bu gün kəskin bahalaşıb.
Axar.az xəbər verir ki, “Brent” markalı neftin bir barreli 1,64 dollar qalxaraq, 73,61 dollar olub.
VTİ markalı neftin barreli isə 1,41 dollar qalxıb və 65,41 dollara satılır.
Ekspertlər neftin bahalaşmasına səbəb kimi ABŞ-ın İrandan neft idxalına tətbiq etdiyi güzəştin ləğvinə hazırlaşmasını göstərib. Belə ki, bu gün Pompeonun İrandan 2 maydan etibarən neft idxalının tam dayandırılması üçün müraciət edəcəyi gözlənilir.
Bu gün Azərbaycan və İran ticarət mərkəzinin açılışı olub.
Teleqraf.com xəbər verir ki, açılış mərasimində Azərbaycan İqtisadiyyat nazirinin müavini Rüfət Məmmədov, İranın Sənaye, mədən və ticarət naziri Rza Rəhmani, İranın Azərbaycandakı səfiri Cavad Cavadzadə və digər rəsmi nümayəndələr iştirak ediblər.
Mərkəzin rəhbəri Hüseyn Pirmüəzzin jurnalistlərə açıqlamasında bildirib ki, mərkəz Azərbaycanda fəaliyyət göstərmək istəyən iranlı sahibkarların işlərinin koordinasiyasına köməklik göstərəcək. Onun sözlərinə görə, bu mərkəz iki ölkə arasında ticari əlaqələrin inkişafına müsbət töhfə verəcək:
"Mərkəz sahibkarların problemlərinin həllinə dəstək verməyə hazırdır. Biz onları lazımi informasiya ilə təmin edəcəyik".
Xatırladaq ki, 2018-ci ildə İranla Azərbaycan arasında ticarət dövriyyəsi 2017-ci illə müqayisədə 74 faiz artıb. Eləcə də bu ilin ilk iki ayı ərzində ötən ilin müvafiq dövrü ilə müqayisədə ticarət dövriyyəsi 4 dəfə yüksəlib.
Azərbaycan Beynəlxalq Bankı ölkəmizdə elektron kommersiya xidmətləri ilə məşğul olan portallar üçün yeni imkan yaradıb. Bankın kartlarından istifadə etməklə bu portallar üzərindən onlayn sifarişləri indi daha tez, rahat və təhlükəsiz şəkildə yerinə yetirmək mümkündür.
Axar.az xəbər verir ki, bu xidmətə qoşulan portalların daimi istifadəçiləri öz kart məlumatlarını sistemə daxil edir və yaddaşda saxlayır. Ondan sonra hər dəfə onlayn sifarişlər zamanı ödənişi əlavə vaxt sərf etmədən, cəmi bircə toxunuşla yerinə yetirmək mümkün olur.
Kart hesablarının təhlükəsizliyi beynəlxalq ödəniş sistemlərinin müəyyən etdiyi tələb və standartlar səviyyəsində qorunur. Hər ödəniş zamanı müştərinin mobil telefonuna 3D təhlükəsizlik kodu göndərilir. Əməliyyat yalnız kod daxil edildikdən sonra başa çatdırılır. Bu da kart hesablarını hər hansı arzuolunmaz hallardan tam sığortalayır.
Azərbaycan Beynəlxalq Bankının yaratdığı bu xidmətə ilk olaraq iticket.az portalı qoşulub. Bu xidmət digər potensial tərəfdaşlar üçün də açıqdır. Belə ki, ölkədə elektron xidmətlər göstərən istənilən təsərrüfat subyekti Azərbaycan Beynəlxalq Bankının təqdim etdiyi bu imkandan yararlana bilər. Ölkəmizdə elektron kommersiya fəaliyyəti göstərən bütün təsərrüfat subyektləri bu sistemə qoşulmaqla öz elektron ticarət portallarını daha da inkişaf etdirə bilər.
Azərbaycan Beynəlxalq Bankı ölkəmizdə ən böyük ATM şəbəkəsinə malik olan və ən çox sayda beynəlxalq ödəniş sistemləri ilə əməkdaşlıq edən Azərbaycan bankıdır. Bankın müxtəlif çeşiddə plastik kartlarını bu linkdən onlayn sifariş vermək mümkündür: https://www.ibar.az/az/individual/plastic-cards/
Müasir dövlət bankı olan Azərbaycan Beynəlxalq Bankının məhsul və xidmətləri barədə məlumatları bankın 36 filial və 40 şöbəsindən, www.ibar.az internet səhifəsindən, 937 nömrəli Məlumat Mərkəzindən, həmçinin rəsmi Feysbuk səhifəsindən əldə etmək olar.
 |
2019-cu ilin yanvar-mart aylarında istehlak məhsullarının və xidmətlərin qiymətləri 2018-ci ilin müvafiq dövrünə nisbətən 2,1 faiz, o cümlədən ərzaq məhsulları, içkilər və tütün məmulatlarının qiymətləri 1,5 faiz, qeyri-ərzaq mallarının qiymətləri 1,2 faiz əhaliyə göstərilən ödənişli xidmətlərin qiymətləri 3,6 faiz bahalaşıb.
Trend-in məlumatına görə, cari ilin mart ayında fevral ayına nisbətən istehlak məhsullarının və xidmətlərin qiymətləri 0,6 faiz, o cümlədən ərzaq məhsulları, içkilər və tütün məmulatlarının qiymətləri 1,3 faiz, qeyri-ərzaq mallarının və əhaliyə göstərilən ödənişli xidmətlərin qiymətləri isə 0,1 faiz bahalaşıb.
Ay ərzində unun, çörəyin, makaron məmulatlarının, qoyun ətinin, kolbasa məmulatlarının, təzə balığın, pasterizə olunmamış üzlü südün, yoqurtun, kəsmiyin, zeytun yağının, limonun, naringinin, portağalın, bananın, almanın, armudun, heyvanın, narın, kivinin, kələmin, göyərtinin, xiyarın, pomidorun, balqabağın, bibərin, çuğundurun, kartofun, soğanın, sarımsağın, energetik içkilərin qiymətlərində bahalaşma, mal və toyuq ətinin, sterilizə olunmuş üzlü südün, xamanın, süfrə marqarininin, qarğıdalı yağının, yumurtanın, qozun, fındığın, şabalıdın, badımcanın, yerkökünün, quru noxud və lobyanın, mərcinin, şəkər tozunun, duzun qiymətlərində isə ucuzlaşma müşahidə olunub. Digər ərzaq məhsullarının qiymətlərində ciddi dəyişikliklər baş verməyib.
Ay ərzində qeyri-ərzaq mallarından parçaların, xalça və digər döşəmə örtüklərinin, mebel və ev əşyalarının, velosipedlərin, televizorların, dəftərxana ləvazimatlarının, sementin, kərpicin, nitro və yağlı boyaların qiymətlərində bahalaşma, kəsilmiş taxtanın, sulu boyanın, kondisionerlərin, mobil telefonların və planşet tipli kompüterlərin qiymətlərində isə ucuzlaşma müşahidə olunub. Digər qeyri-ərzaq mallarının qiymətlərində ciddi dəyişikliklər baş verməyib.
Cari ilin mart ayında fevral ayına nisbətən əhaliyə göstərilən ödənişli xidmətlərdən mənzillərin icarə haqqı, məişət cihazlarının təmiri, hava nəqliyyatı ilə beynəlxalq sərnişindaşıma xidmətlərinin, stomatoloji, bərbərxana və kosmetoloji xidmətlərin, istirahət turlarının qiymətləri bahalaşıb, dəmir yolu nəqliyyatı ilə MDB ölkələrinə sərnişindaşıma xidmətlərinin, otel və mehmanxanalar tərəfindən göstərilən gecələmə xidmətlərinin qiymətləri isə ucuzlaşıb. Digər ödənişli xidmətlərin qiymətlərində ciddi dəyişikliklər baş verməyib.
Yaxın aylarda neft qiymətləri 60-70 dollar arasında dəyişməkdə davam edəcək.
Bu sözləri Axar.az-a açıqlamasında iqtisadçı Natiq Cəfərli deyib. Ekspert bildirib ki, hazırda dünya bazarında neft qiymətlərinin bahalaşması bir neçə faktorla bağlıdır:
“Bahalaşma və ya ucuzlaşma ilə bağlı ən azı 14 və ya 21 günlük trend olmalıdır ki, daha ciddi analiz aparmaq mümkün olsun. Ancaq ümumilikdə dünya bazarlarında neft qiymətlərində müşahidə edilən bahalaşma müvəqqəti hərəkətlilikdir. Belə ki, Çinlə ABŞ arasında ticarət anlaşmasının baş tutmasına dair xəbərlər yayıldı. Bu da neftə olan tələbatın artacağına dair ehtimalları gücləndirdi. Buna görə də neft qiymətlərinin bahalaşmasını müşahidə etdik. Digər bir səbəb isə Avropa Birliyində istehsal indekslərinin daha yüksək olması ilə bağlı idi. Bütövlükdə, hazırkı bahalaşma məhz bu iki xətt üzərində davam edir”.
Ekspertin fikrincə, bu tendensiya bir müddət sonra səngiyə bilər:
“Çünki bazar çox qəribə şəkildə başqa impulslara cavab vermir. Məsələn, ABŞ-da bu həftə neft hasilatı böyük həcmdə artsa da, bazar buna reaksiya vermədi. Buna görə də bir müddət sonra əks tendensiyanı müşahidə edə bilərik. Yaxın aylarda neft qiymətləri 60-70 dollar arasında dəyişməkdə davam edəcək”.
Qeyd edək ki, bu gün “Brent” markalı neftin bir barrelinin qiyməti 70 dolları keçib.
Ölkədə pərakəndə bazarlar daim nəzarətdədir və monitorinqlər aparılır. Gündəlik tələbata daxil olan məhsullara daha çox ciddi nəzarət olunur.
Axar.az xəbər verir ki, bu barədə iqtisadiyyat naziri Şahin Mustafayev deyib.
"Son 1 aya yaxındır ki, soğan, kartof və kələmin qiymətində bahalaşma müşahidə olunur. İqtisadiyyat Nazirliyi qiymətlərin artmasının səbəblərini araşdırır. Deyə bilərəm ki, qiymət artımı süni şəkildə baş vermir. Ancaq qiymətlərin artımı bizi narahat edir. Hökumət tərəfindən bununla bağlı müvafiq tədbirlər görüləcək. Bu məhsullara ixrac rüsumu tətbiq etmək niyyətindəyik. Soğanın dəyərinə spesifik idxal rüsumu tətbiq olunurdu. Soğanın bir kilosu 60 sent həcmində idi. Biz bunu aradan qaldırmaq istəyirik. Bu xüsusi rüsumun 2 ay müddətinə dayandırılmasını istəyirik. Bazarda aparılan monitorinqlər davam etdiriləcək. İnanırıq ki, görülən tədbirlər nəticəsində bazardakı qiymətlər sabitləşəcək”, - deyə Ş.Mustafayev əlavə edib.