 |
|
Karantin qaydalarını pozaraq toy məclisi keçirənlər məsuliyyətə cəlb olundular.
Bu barədə Bakı şəhər Baş Polis İdarəsindən "Ölkə.Az"a bildirilib
Qeyd edilir ki, paytaxtda mobil rabitə şirkətlərindən birinin vəzifəli şəxsinin ölkədə tətbiq olunan karantin qaydalarını pozaraq Səbail rayonunda yerləşən “Sea Bay” restoranında toy məclisinin keçirilməsilə bağlı sosial şəbəkələrdə yayılan görüntülər DİN tərəfindən nəzarətə alınıb.
Aparılan araşdırmalar nəticəsində şirkətin satış menecerinin övladının bir qrup şəxsin iştirakı ilə toy şənliyinin keçirildiyi aşkar olunub. Şənliyin təşkilatçıları, sifarişçiləri və iştirakçılarının bir qismi müəyən edilib və barələrində qanunvericiliyə uyğun tədbirlər görülüb.
Belə ki, toy məclisini təşkil edən hüquqi şəxs İnzibati Xətalar Məcəlləsinin 211.1-ci maddəsilə 4000 manat, restoranın mühasibatçısı 400 manat cərimə olunub.
2 nəfər inzibatçı barəsində tərtib edilən protokollar rayon məhkəməsinə göndərilməklə barələrində məhkəmənin qərarı ilə 10 gün inzibati həbs tənbeh növü tətbiq olunub.
Eləcə də restoran işçilərindən 6 nəfər müvafiq maddələrlə inzibati xəta haqqında protokollar tərtib olunaraq, hər biri 100 manat cərimə olunub.
Toy məclisinin sifarişçilərindən 2 nəfər qanunverciliyə uyğun olaraq 400 manat məbləğdə, iştirak edənlərdən isə 9 nəfər 200 manat məbləğində cərimə olunublar.
Şənlikdə iştirak edərək karantin qaydalarını pozan digər şəxslərin müəyyən olunması istiqamətində araşdırmalar davam etdirilir.
Şəmkir rayonunda bacanağını odlu silahla qətlə yetirməkdə təqsirləndirilən Etibar Süleymanovun cinayət işi məhkəmə prosesi keçirilib.
"Ölkə.Az" xəbər verir ki, Gəncə Ağır Cinayətlər Məhkəməsində hakim Elmin Rüstəmovun sədrliyi ilə keçirilən hazırlıq prosesində təqsirləndirilən şəxsin anket məlumatı dəqiqləşdirlib.
Məhkəmə baxış iclası sentyabr ayının 7-nə təyin olunub.
Qeyd edək ki, hadisə bu ilin may ayında baş verib.
İttihama görə, Şəmkir rayonu Yeni Həyat kənd sakini, 1977-ci il təvəllüdlü Süleymanov Etibar Binnət oğlu Yuxarı Seyfəli kənd sakini, 1992-ci il təvəllüdlü Hümmətli Elnur Salman oğlunu odlu silahla öldürüb.
Tutularaq istintaqa cəlb edilən E.Süleymanova Cinayət Məcəlləsinin 120.2.2-ci (xuliqanlıq niyyəti ilə adam öldürmə) maddəsi ilə ittiham verilib.
Məlumata görə, bacanaqlar arasında borc söhbəti olub. Bundan dolayı tərəflər arasında narazılıq yaşanıb.
Ermənistan silahlı qüvvələrinin bölmələri cəbhənin müxtəlif istiqamətlərində iriçaplı pulemyotlardan da istifadə etməklə, sutka ərzində atəşkəs rejimini 29 dəfə pozub.
Bu barədə Müdafiə Nazirliyi məlumat yayıb.
Bildirilib ki, Ermənistan Respublikası Berd rayonunun Ayqepar, Mosesqex və Çinari kəndlərində yerləşən mövqelərdən Tovuz rayonunun Əlibəyli və Ağdam kəndlərində yerləşən mövqelərimiz atəşə tutulub.
Ağdam rayonunun işğal altında olan Yusifcanlı, Mərzili, Füzuli rayonunun Aşağı Veysəlli, Qorqan, Horadiz, Cəbrayıl rayonunun Nüzgar kəndləri yaxınlığında, həmçinin Tərtər və Ağdam rayonları ərazisindəki adsız yüksəkliklərdə yerləşən mövqelərdən də ordumuzun mövqeləri atəşə tutulub.
Tovuz rayonunun Qovlar şəhərində bıçaqlanma hadisəsi olub.
“Report” xəbər verir ki, Tovuz rayon Kirən kənd sakini, 1994-cü il təvəllüdlü Elnur İsayev hələ ki, məlum olmayan səbəbdən sağ qolundan və kürəyindən bıçaqlanıb.
O, tanışları tərəfindən Tovuz rayon Mərkəzi Xəstəxanasına aparılıb, vəziyyəti kafi qiymətləndirilir.
Onun kim tərəfindən və hansı səbəbdən bıçaqlandığı araşdırılır.
Bakıda beş ay öncə baş verən qəzaya görə yol polisi hələ də vətəndaşa arayış təqdim etmir. “Qafqazinfo”ya müraciət edən Erkin Həsənli bildirib ki, martın 28-də Xətai rayonunda hərəkətdə olarkən yolun sağında qəza işıq siqnalını yandırıb dayanmış “Mitsubishi” markalı 99 VM 857 nömrəli avtomobilin sürücüsü qəfildən yola çıxaraq onun qarşısını kəsib: “Mən sağ zolaqda qaydaya uyğun olaraq hərəkət edirdim, həmin maşının qəfildən qarşıma çıxması ilə qəza baş verdi. Mənim idarə etdiyim “BMW” markalı 90 SZ 702 nömrəli maşın “Mitsubishi” markalı avtomobilə dəydi. Xətai rayon yol polisinin əməkdaşı qəzaya mənim səbəb olmağım haqda qərar çıxardı. Lakin mənim şikayətimdən sonra məsələ araşdırıldı və qərar verildi ki, qəza qarşı tərəfin təqsirinə görə olub. İndi isə kobud pozuntuya yol verən Xəta polisi Baş Dövlət Yol Polisi İdarəsinin rəis müavini Elşən Kazımovun göstərişinə əməl etmir. Onlar mənə bu barədə arayışı verməlidirlər ki, mən onu sığorta şirkətinə təqdim edərək maşınımı düzəltdirim. Lakin dəfələrlə müraciət etsəm də, heç bir əsaslı səbəb olmadan arayışı verməkdən imtina edirlər”.
Qeyd edək ki, Baş Dövlət Yol Polisi İdarəsinin rəis müavini Elşən Kazımovun məktubunda qeyd edilib ki, Xətai RPİ Dövlət yol polisi şöbəsinin əməkdaşı A.Piriyevin tərtib etdiyi protokol və inzibati tənbeh haqda qərara xitam verilib. Digər sürücü M.Seyidovu barəsində inzibati tənbeh tədbirinin görülməsi üçün Xətai RPİ-yə göstəriş verilib.
Baş Narkotiklərlə Mübarizə İdarəsinin əməkdaşları tərəfindən 15 kiloqramdan artıq yüksək təsiredici xassəyə malik narkotik vasitə qanunsuz dövriyyədən çıxarılıb. İdarədən Yol-xeber.az-a verilən məlumata görə, Baş Narkotiklərlə Mübarizə İdarəsinin əməkdaşları tərəfindən narkotik vasitə və psixotrop maddələrin satışı ilə məşğul olan daha bir şəxs saxlanılıb. Baş İdarə əməkdaşlarının daxil olmuş əməliyyat məlumatı əsasında Sumqayıt şəhərində keçirdikləri tədbir zamanı narkotiklərin qanunsuz dövriyyəsində şübhəli bilinən Qubadlı rayon sakini Ramin Qasımlı tutulub. Şəxsi axtarış zamanı onun üzərindən 2 qram psixotrop maddə metamfetamin aşkar edilib. Ramin Qasımlıının idarə etdiyi “Lada” markalı avtomobilin yük yerindən isə 12 kiloqram heroin və 3 kiloqram psixotrop maddə metamfetamin aşkar edilib. Sonuncu əməliyyat nəticəsində 15 kiloqramdan artıq narkotik vasitə qanunsuz dövriyyədən çıxarılıb.
Araşdırma zamanı müəyyən olunub ki, saxlanılan şəxs hələlik adı istintaqa məlum olmayan İran vətəndaşının tapşırığı ilə qanunsuz yollarla Azərbaycan ərazisinə keçirilən külli miqdarda narkotik vasitələri Yardımlı rayonunda qəbul edib və Sumqayıt şəhərinə gətirərək satışını təşkil etmək istəyib.
Faktlarla bağlı Cinayət Məcəlləsinin müvafiq maddələri ilə cinayət işi başlanılıb, Ramin Qasımlı tutularaq istintaqa təqdim olunub. Cinayət işi üzrə zəruri istintaq və əməliyyat-axtarış tədbirləri davam etdirilir.
Gəncədə kriminal aləmin üzvü saxlanılıb.
DİN Mətbuat Xidmətinin Gəncə regional qrupundan “Qafqazinfo”ya verilən məlumata görə, Gəncə şəhər Baş Polis İdarəsinin əməkdaşları tərəfindən şəhər sakini, 42 yaşlı Zaur İsmayılov şəhər ərazisindəki çayxanaların birində saxlanılıb. Onun üzərində şəxsi axtarış keçirilən zaman 1 ədəd, atəşə yararlı, kustar üsulla hazırlanmış, “naqan” tipli revolver tapança,həmin tapançanın barabanından isə 4 ədəd atəşə yararlı 9mm kalibirli “Makarov” tipli tapançanın patronları açkar edilərək götürülüb.
Faktla bağlı araşdırmalar davam etdirilir.
Məlumata görə, Z.İsmayılov əvvəllər Azərbaycan, Rusiya və Gürcüstanda dəfələrlə məhkum olunub, kriminal aləmdə “Krıtı Malış Gəncəli” ləqəbi ilə tanınır. O, gürcü “qanuni oğru” “Lavaşoğlu Batumski” kimi tanınan Mindiya Qoradze ilə bir yerdə həbsdə olub və onunla yaxın əlaqələri olduğu bildirilir.
Ədliyyə Nazirliyinin binası yanır.
“Qafqazinfo”nun verdiyi xəbərə görə, binanın yuxarı mərtəbəsində yanğın başlayıb.
Hazırda əraziyə yanğınsöndürmə briqadaları cəlb edilib.
Nazirliyin əməkdaşları binadan təxliyyə olunub.
***
Yanğın söndürülüb.
Azərbaycanda ötən il cinayət törətmiş şəxslərin sosial-demokratik əlamətlərinə görə bölgüsü açıqlanıb.
“Qafqazinfo”nun verdiyi xəbərə görə, burada hansı təbəqədən olan insanların daha çox cinayət törətdiyi məlum olub.
Belə ki, ötən il qeydə alınan 17 823 cinayət törətmiş şəxsin 10 408 nəfəri əmək qabiliyyətli yaşda olub işləməyən və oxumayan şəxslərdir.
Cinayət törətmiş şəxslərin 1160-ı fəhlə, 606-sı qulluqçu, 168-i kənd təsərrüfatı işçisi, 274-ü sahibkar, 55-i bank işçisi, 13-ü dövlət idarəçiliyi işçisi, 95-i tələbə olub.
İctimai nəqliyyatda sürücüyə qarşı xuliqanlıq hərəkətləri törətməkdə şübhəli bilinən Anar Nehmətli üzr istəyib.
Bakı şəhər BPİ Mətbuat Xidmətindən "Qafqazinfo"ya verilən məlumata görə, Bakı şəhər BPİ Cinayət Axtarış İdarəsi əməkdaşlarının keçirdiyi əməliyyat-axtarış tədbirləri nəticəsində Abeşeron rayon sakini, 1993-cü il təvəllüdlü Anar Nehmətli saxlanılıb.
Qeyd olunan hərəkətlərdə xırda xüliqanlıq, polis işçisinin və ya hərbi qulluqçunun qanuni tələbinə qəsdən tabe olmama maddələrinin tərkib əlamətləri olduğuna görə fakta görə İnzibati Xətalar Məcəlləsinin 510, 535-ci maddələri ilə onun barəsində toplanmış matereallar baxılması Nərimanov rayon məhkəməsinə göndərilib.