 |
|
AzTV sosial şəbəkədə fotosu yayılan övladının tabutunu çiynində daşıyan ana Səkinə Sahratova ilə çəkiliş edib.
Səkinə xanım sentyabrın 27-də başlayan və 44 gün davam edən Vətən müharibəsində oğlu Cavid Sahratovu şəhid verib. Gizir rütbəsini daşıyan Cavid tankçı olub.
Yardımlı rayonunun Əsədabad kənd sakini S.Sahratova deyib ki, oğlu tankçı olub:
"Oğlanlarımı Vətən üçün böyütmüşəm, hamısı əsgərliyini çəkib, Vətənə xidmət edib. Cavid hərbçi olmaq istəyirdi. Tabutu həyətə gələndə dedim, başıma qoyun, onu son mənzilə başımda aparım. Onun kimi oğlanlarımızla fəxr edirəm. Onlar hamısı mənim balamdır. Qələbə günü Cavid yuxuma gəldi".
Azərbaycan hərbçiləri işğaldan azad olunan ərazilərdəki evlərdən birində sahibsiz azyaşlı oğlan uşağının olduğunu aşkarlayıb və ona köməklik göstəriblər.
"Ölkə.Az" xəbər verir ki, video Telegram-da yayılıb.
Kölgə iqtisadiyyatının hökm sürdüyü Ermənistanda sosial siyasət və inkluziv iqtisadiyyatın inkişafından danışmaq olmaz. Beynəlxalq Valyuta Fondunun tədqiqatlarında da bu şərtlər altında inkişafın mümkün olmadığı qeyd edilib.
Bu barədə İqtisadi İslahatların Təhlili və Kommunikasiya Mərkəzinin departament rəhbəri Nicat Hacızadə məlumat verib.
Onun sözlərinə görə, sosial gərginlik yaşayan Ermənistanda kölgə iqtisadiyyatının miqyası Dünya Bankının “Dünya ölkələrində kölgə iqtisadiyyatı” ilə əlaqədar hesabatında da aydın görünür. Ermənistana gələn pul axını mənbəyi üç istiqamətlidir ki, buraya pul köçürmələri, xarici investisiya və müxtəlif fondların pul yardımları daxildir. Dünya Bankının regional ölkələri ilə bağlı hesabatına əsasən, Ermənistan miqrant əməyi hesabına MDB-də ən çox pul köçürmələri alan ölkələrdən biridir. Pul köçürmələrinin miqrantlar vasitəsilə edildiyini nəzərə alsaq, bu Ermənistanda işsizlik və yoxsulluğun yüksək həddə olmasına işarədir.
Yoxsulluq və işsizlik arasındakı səviyyə fərqinə nəzər yetirərkən məlum olur ki, nəzəri olaraq işsizlər arasında yoxsulluq payının yüksək olması ilə bərabər, məşğul əhali arasında da yoxsulluq payı yüksəkdir. Hesablamalara görə Ermənistanda gündəlik olaraq əhalinin 100 min nəfərinin qazancı 1,9 ABŞ dolları, 280 min nəfərinin qazancı 3,2 ABŞ dolları, 1 milyon 500 min nəfərinin qazancı isə 5,4 ABŞ dolları səviyyəsində qiymətləndirilir.
Departament rəhbəri əlavə edib ki, çoxda uzaq olmayan tarixdə qeyd edilən statistikaya görə 42 faiz əhalisi 5,5 ABŞ dollarına yaxın günlük qazanca sahib olan Ermənistanın COVID-19 pandemiyası dövründə daha acınacaqlı durumda olduğunu təxmin etmək çətin deyil.
Qapalı iqtisadiyyatın ÜDM-də payına görə Afrika qitəsinin bəzi ölkələri ilə eyni sırada olan Ermənistan “İnkluziv İnkişaf İndeksi - 2018” hesabatına görə inkişaf etməkdə olan 78 ölkə arasında 45-ci mövqedə qərarlaşıb. Qeyd edilən indeksə müvafiq olaraq Ermənistan Afrikanın yoxsul statuslu ölkələri ilə qonşuluq mövqeyindədir.
N. Hacızadə qeyd edib ki, Ermənistanın inkluziv şəkildə inkişafını bütün parametrlər üzrə mənfi qiymətləndirmək mümkündür. Digər millətlər və inanclar üçün münbit bir şəraitin yaradılmaması, ölkənin təbii sərvətlərindən əldə edilən gəlirlərin əhali arasında düzgün bölüşdürülməməsi, işsizlik və yoxsulluğun son illərdir eyni tempdə qalması inkluziv inkişafa maneə yaradan əsas məqamlardır.
Heydər Əliyev Fondunun vitse-prezidenti Leyla Əliyeva Ali Baş Komandan İlham Əliyevə Vətən müharibəsində qazanılan zəfər münasibətilə "Əsgər" şeirini həsr edib.
Leyla Əliyeva şeiri şəxsi instaqram hesabında paylaşıb.
Şeiri rus dilindən Aydan Xəndan tərcümə edib.
Həmin şeiri təqdim edirik:
Əsgər, əsgər yurdun oğlu,
İnanır haqqa, zəfərə!
Sükutun səsin dinləyir
Bağlıdır nurlu vətənə!
Güllədən qorxusu yoxdur,
Günəşi dağlar heç örtməz
Əsgər bilir sevgi nədir
Ədalətdən üz döndərməz!
Yoxdur qorxu ürəyində
Gecə bitsin, səhər gəlsin!
Zülmətdən qorxmaq dərd deyil!
Təki günəş heç sönməsin!
O, Allahın kəlamını
Könlündə bir yazı bilir,
Dünyanın ağır yükünü
Çiyinlərində gəzdirir.
Əsgər müqəddəs bir gündə
Xalqı naminə doğulub,
Cəhalətin kor kölgəsi
Onun nuruyla yox olub!
O, iftiradan uzaqdır,
O, məzlumlar yanındadır
O, Allahın yazısıyla
Həyatını yaşayandır!
Əsgər zirvələr zirvəsi,
Onun yeri yüksəklərdir!
O, vicdanın, xalqın səsi,
Həqiqətə and içəndir!
Onun üçün bu dünyada
Eldən uca heç nə yoxdur!
Paklıq, mərhəmət doludur
Onun yolu, haqq yoludur!
Qorxu nədir bilməz əsgər,
O, Allahın balasıdır
Açıqdır yolu dünyaya
Yaddaşlarda qalasıdır!
Qələbəmizin qəhrəmanlarından olan “Maştağa” ləqəbli Vidadi adlı döyüşçümüz öz doğum gününü cəbhədə hərbçi dostları ilə birgə qeyd edib.
“Qafqazinfo” xəbər verir ki, sosial şəbəkələrdə döyüşçünün doğum günündən görüntülər yayılıb. Hərbçimizin arzuları da elə qələbə ilə bağlı olub: “Siz mənə qanad verdiniz, siz məni cavanlığıma qaytardınız. Allah sizin hər birinizi sağ-salamat döyüşlərdən çıxarsın! Analar sevinsin. O gün olsun bax belə Xankəndidə yığışaq!”
Xatırladaq ki, “Maştağa” ləqəbli döyüşçümüz həm də Birinci Qarabağ müharibəsinin qəhrəmanlarındandır. Həmin dövrdən qalan nadir görüntülərdən birində döyüşçü dostları onun qəhrəmanlığından danışıb, xüsusən, Ağdərənin alınmasında böyük rolu olduğunu qeyd ediblər.
//ok.ru/video/2024845478506
Azərbaycanlılar 28 ildən sonra ilk dəfə Şuşada, Gövhər ağa məscidində cümə namazı qılıb.
Bu barədə sosial şəbəkələrdə görüntülər yayımlanıb.
Namaz vəhdət şəklində, yəni sünni və şiələrlə birlikdə qılınıb.
Qeyd edək ki, Azərbaycan Ordusu 28 ildən sonra, bu il noyabrın 8-də Şuşa şəhərini işğaldan azad edib.
Dünən sosial şəbəkələrdə cəbhə bölgəsindən videosu yayılan Bakı Avrasiya Universitetinin Regionşünaslıq və iqtisadiyyat fakültəsinin tələbəsi olmuş Daşdəmirov Xəzər Asif oğlu ilə bağlı universitet açıqlama yayıb.
Sözügedən videoda adı çəkilən universitetin prorektou Günhan Hüseynli Qafqazinfo-ya açıqlamasında, “Mənə salam göndərən əsgərimizə eşq olsun”, - deyərək universitet rəhbərliyinin Xəzər Daşdəmirovla bağlı müsbət qərar verdiyini və tezliklə məsələnin həll olunacağını bildirib.
“Allah bütün şəhidlərimizə rəhmət eləsin, Ali Baş Komandanımızı və əsgərlərimizi qorusun. Qarabağ Azərbaycandır!”, - deyə G.Hüseynli qeyd edib.
Baş leytenant Elnur Elxan oğlu Əmrahov Qarabağ uğrunda gedən döyüşlərdə yaralanıb.
Baku.ws xəbər verir ki, xəstəxanada müalicə aldıqdan sonra evə buraxılan zabitimiz alqışlarla təntənəli şəkildə qarşılanıb.
Sosial şəbəkələrdə yayılan videoda Ə. Elnurun Zəngilanda yaralandığı qeyd edilib.
Həmin görüntüləri təqdim edirik:
Ayağından qəlpə yarası alan əsgərimiz xəstəxanadan çıxaraq sığınacağa baş çəkməyə gəldi.
Bunu “Facebook”da Qadın və Uşaq Sığınacağının rəhbəri Mehriban Zeynalova yazıb.
M.Zeynalova bildirib ki, sığınacağa qurban payı gətirən əsgər hər kəsi, hətta uşaqları da kövrəldib: “Deyəcək bir söz var. Siz ölkənin xilaskarlarısınız, siz mərdliyin, insanlığın, mərhəmətin, vətən sevgisinin nə olduğunu bütün dünyaya göstərdiniz!”
9 Noyabr - Dövlət Bayrağı Günü münasibətilə, həmçinin Vətən müharibəsinə dəstək olmaq məqsədilə Koreya Respublikasının paytaxtı Seul şəhərində Azərbaycan bayrağının asılması aksiyası keçirilib.
AZƏRTAC xəbər verir ki, aksiya Azərbaycanın Koreya Respublikasındakı səfirliyi və Koreya Mədəniyyət Assosiasiyasının birgə dəstəyi, “Buta” Azərbaycan-Koreya Dostluq Assosiasiyasının üzvlərinin iştirakı ilə keçirilib. Azərbaycan bayrağı dünyanın ən hündür 5-ci, Koreya yarımadasının isə 1-ci binasında - “Lotte World Tower” göydələnində asılıb. Hündürlüyü 541 metr olan 123 mərtəbəli binanın yuxarı hissəsində yerləşən “Səma körpüsü”ndən Azərbaycan bayrağı asılıb.
Bayraq aksiyası koreyalılar tərəfindən böyük maraqla qarşılanıb. Belə ki, 2017-ci ildən istifadəyə verilmiş göydələndə ilk dəfə olaraq məhz Azərbaycan Respublikasının üçrəngli bayrağı dalğalanıb. “Lotte World Tower”in idarəçiləri Azərbaycan bayrağının məhz bu göydələndə dalğalandırılmasına görə tədbirin təşkilatçılarına təşəkkür edib, Azərbaycanın bu nümunəvi layihəsindən faydalanaraq sözügedən binada tezliklə Koreya Respublikasının bayrağının da dalğalandırılması layihəsini həyata keçirəcəklərini söyləyiblər.
