 |
|
Bərdə rayonunda baş verən dəhşətli yol qəzasında ölənlərin şəxsiyyəti məlum olub.
Trend-in məlumatına görə, hadisə Goranboy rayonunun Dəliməmmədli kənd sakini Vəliyev Azər Məmməd oğlunun idarə etdiyi "VAZ-21011" markalı 22-BM-803 dövlət nömrə nişanlı avtomobillə Goranboy rayon sakini Nuriyev Raqib Səxavət oğlunun idarə etdiyi "HOVO" markalı 04-BN-914 markalı yük maşını ilə toqquşması nəticəsində baş verib.
Hadisə nəticəsində "VAZ-21011" markalı avtomobilin sürücüsü Azər Vəliyev və sərnişinləri 1950-ci il təvəllüdlü Rəcəbəliyeva Zeynəb Əbdülkərim qızı, 1970-ci il təvəllüdlü Rəcəbəliyeva Rəna Əli qızı və 2005-ci il təvəllüdlü Vəliyev Rəvan Azər oğlu hadisə yerində keçiniblər.
Faktla bağlı Daxili İşlər Nazirliyinin Baş İstintaq və Təhqiqat İdarəsində Cinayət Məcəlləsinin 263.3-cü (Yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) maddəsilə cinayət işi başlanıb
Bakıd Zaqulba yolu ilə Bilgəh qəsəbəsi istiqamətində hərəkətdə olan “10-TH-113” dövlət qeydiyyat nişanlı 171 saylı sərnişin avtobusu qarşıda gedən “90-DN-376” dövlət qeydiyyat nişanlı “Mercedes”lə toqquşub.
hadisə nəticəsində “Mercedes”in 1994-cü il təvəllüdlü sürücüsü Sarıyev Mərhəmət Məhəmməd oğlu xəsarət alıb.
Hadisədən dərhal sonra 3 saylı Şəhər Klinik Xəstəxanasına aparılan M.Sarıyevə ilkin tibbi yardım göstərildikdən sonra o, evə buraxılıb.
Məlumata görə, o, Milli Aviasiya Akademiyasını bitirib və hazırda bu sahə üzrə işləyir.
Avtobus sürücüsünün bildirdiyinə görə, qarşısında hərəkətdə olan “Mercedes” markalı minik maşınının sürücüsü sükan arxasında yatmış vəziyyətdə olub və qəza bu səbəbdən baş verib.
Faktla bağlı araşdırma aparılır.
Moskva prospektinin 20 Yanvar küçəsi ilə kəsişməsində, “Şamaxı yolu” adlanan ərazidə yeni asma piyada keçidinin inşasına start verilib.
Azərbaycan Avtomobil Yolları Dövlət Agentliyinə istinadən xəbər veririk ki, yerüstü piyada keçidi 3 giriş-çıxışlı olmaqla ümumi uzunluğu 134 metr təşkil edəcək. Keçid Moskva prospektini keçməklə avtomobil tuneli üzərində inşa edildiyi üçün orta dayaqsız olacaq. Keçidin tunelin üzərindən keçən və80 metr uzunluğa malik olan hissəsi hazırda prospektin 20 yanvar küçəsi ilə kəsişmədə inşası aparılan və 30 metr hündürlüyə malik olacaq pilona (dirək) bərkidilmiş xüsusi asqıların (tros) köməkliyi ilə saxlanılacaq.
Bundan əlavə sözügedən kəsişmədə yolun hər bir istiqaməti üzrə giriş-çıxış hissə inşa olunacaq. Asma keçidin yol səthindən hündürlüyü ortalama 6 metr, qalereyasının eni isə 3.5 metr təşkil edəcək.
İşlərin 2019-cu ildə yekunlaşdırılması nəzərdə tutulub.
Prezident İlham Əliyev Salyan rayonunun Arbatan-Marışlı-Seyidsadıqlı-Quyçu avtomobil yolunun tikintisi ilə bağlı tədbirlər haqqında sərəncam imzalayıb.
sərəncama əsasən on bir min nəfər əhalinin yaşadığı 4 yaşayış məntəqəsini birləşdirən Arbatan-Marışlı-Seyidsadıqlı-Quyçu avtomobil yolunun tikintisi məqsədi ilə Azərbaycan Respublikasının 2018-ci il dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 4,2 milyon (dörd milyon iki yüz min) manatı Azərbaycan Avtomobil Yolları Dövlət Agentliyinə ayrılıb.
Bakı şəhər Baş Polis İdarəsi və şəhər prokurorluğu bu gün baş verən qəzayla bağlı məlumat yayıb.
oktyabrın 2-də saat 10 radələrində Sumqayıt şəhər sakini Bəşirov Fəxrəddin Asif oğlu idarə etdiyi “İsuzu” markalı 90-XU-233 dövlət qeydiyyat nişanlı yük avtomobili ilə Binəqədi rayonu, Novxanı qəsəbəsi, Dəniz Kənarı küçəsində hərəkətdə olarkən yolu keçmək istəyən 2004-cü il təvəllüdlü Qasımov Ayxan Xəyyam oğlu və Bayramov Rasim Vüqar oğlunu vurub, nəticədə onlar aldıqları xəsarətlərdən hadisə yerində vəfat edib.
Fakta görə Binəqədi rayon Polis İdarəsinin İstintaq Şöbəsində Cinayət Məcəlləsinin 263.3-cü (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanıb.
İş üzrə hadisə yerinə baxış keçirilmiş, müvafiq ekspertizalar, o cümlədən məhkəmə-tibbi və məhkəmə yol-nəqliyyat hadisələri ekspertizaları təyin edilmiş, şahidlərin ifadəsi alınmış və digər zəruri istintaq hərəkətləri yerinə yetirilmişdir.
F.Bəşirov şübhəli şəxs qismində tutularaq istintaqa cəlb edilib.
Hazırda iş üzrə zəruri istintaq tədbirləri davam etdirilir.
Bakıda Nəsimi rayonu Mir Cəlal küçəsi əsaslı şəkildə yenidən qurularaq vətəndaşların istifadəsinə verilib.
Avtomobil Yolları Dövlət Agentliyindən verilən məlumata görə, əsaslı şəkildə yenidən qurulan Mir Cəlal küçəsinin uzunluğu 1.75 km, eni isə 24 m təşkil edir. 2 gediş, 2 gəliş olmaqla 4 hərəkət zolaqlı küçə boyu 2 metr enində ayrıcı zolağın ləğv edilməsi ilə küçənin eni 22 m-dən 24 m-ə qədər genişləndirilib. Təmir-tikinti işləri çərçivəsində küçənin köhnə asfalt-beton örtüyünün üst qatı frezlənərək kənara daşınıb.
Layihəyə uyğun olaraq ayrıcı zolaqda yerləşən yüksək gərginlikli elektrik xətləri və dirəkləri təhlükəsizlik baxımından orda yerləşməsi məqsədəuyğun hesab edilmədiyi üçün yolun altına köçürülüb. Bunun üçün aidiyəti qurum tərəfindən yolun hərəkət hissəsi 5-6 metr enində qazılıb. Yüksək gərginlikli elektrik xətləri xüsusi dördbucaqlı beton boruların içi ilə çəkilib. Yol ayrıcında yerləşən dirəklər ləğv edilib.
Təmir-tikinti layihəsinə uyğun olaraq küçə boyu mövcud köhbə yağış-kanalizasiya sistemi bərpa olunaraq işlək vəziyyətə salınıb, zəruri yerlərdə yeni sistem qurulub, 53 ədəd yeni yağış barmaqlıqları və 160 ədəd kommunikasiya xətlərinin baxış qapaqları qoyulub.
Sərnişindaşımada keyfiyyətin artırılması məqsədi ilə 7 marşrut xətti müsabiqəyə çıxarılıb.
Bakı Nəqliyyat Agentliyindən daxil olan məlumata görə, bunlar 6, 38, 81, 85, 119, 135 və 165 nömrəli müntəzəm marşrutlardır.
Qeyd edək ki, Bakı şəhərinin inzibati ərazisində fəaliyyət göstərən bütün müntəzəm marşrut xətlərinin müsabiqəyə çıxarılması nəzərdə tutulub. Məqsəd, “Azərbaycan Respublikası Nazirlər Kabinetinin 2009-cu il 3 aprel tarixli 52 nömrəli Qərarı”nın müvafiq tələbinin icrasını təmin etməkdir.
Müsabiqədə iştirak etmək istəyənlər Bakı Nəqliyyat Agentliyinə müraciət edə bilərlər.
2018-ci il yanvarın 1-dən sentyabrın 23-ə qədər Bakı şəhəri üzrə yol-hərəkət qaydalarını pozmağa görə 477 mindən artıq inzibati protokol tərtib edilib.
Bu barədə Trend-ə Daxili İşlər Nazirliyinin (DİN) Bakı şəhər Baş Polis İdarəsinin Dövlət Yol Polisi İdarəsinin İctimaiyyətlə əlaqələr bölməsinin rəisi, polis polkovniki Vaqif Əsədov məlumat verib.
V.Əsədov bildirib ki, bundan əlavə Bakı şəhəri üzrə quraşdırılmış kameralar vasitəsilə 410 minə yaxın elektron protokol yazılıb.
Bölmə rəisinin sözlərinə görə,sərnişindaşıma qaydalarının pozulmasına görə 4235 sürücü, yol ayrıcının keçmə qaydalarının pozulmasına görə 160,339, işıqforun qadağanedici işığında hərəkətə görə 25,821, konstruksiya dəyişikliyi edən 394, təhlükəsizlik kəmərindən istifadə etməyən 45,774, sükan arxasında telefonla danışan 19124, ötmə, manevretmə qaydalarını pozan 1413, yükdaşıma qaydalarını pozan 208 sürücü barəsində inzibati protokolun təsdiq olunduğu aydın olur.
IX Azərbaycan-Rusiya Regionlararası Forumunda nəqliyyat əlaqələri diqqət mərkəzində olub
Sentyabrın 27-də Bakıda, Heydər Əliyev Mərkəzində IX Azərbaycan-Rusiya Regionlararası Forumu işinə başlayıb.
Azərbaycanın İqtisadiyyat Nazirliyi və Rusiyanın İqtisadi İnkişaf Nazirliyinin təşkilatçılığı ilə keçirilən tədbirdə dövlət qurumlarının, parlamentlərin, icra hakimiyyəti orqanlarının nümayəndələri, sahibkarlar və mətbuat işçiləri iştirak edirlər.
Forum çərçivəsində “Nəqliyyat və tranzit yükdaşımalar sahəsində əlaqələrin möhkəmləndirilməsi” mövzusunda təşkil edilən dəyirmi masada, hər iki ölkənin nəqliyyat sektoruna aid dövlət qurumlar və şirkətlərin rəhbərləri, o cümlədən “Azərbaycan Dəmir Yolları” QSC-nin sədri Cavid Qurbanov və “Rusiya Dəmir Yolları” ASC-nin baş direktorunun birinci müavini Aleksandr Mişarin iştirak ediblər. Tədbir iştirakçıları nəqliyyat sahəsində əlaqələrin genişləndirilməsi yolları, Şimal-Cənub Beynəlxalq Nəqliyyat Dəhlizi çərçivəsində tranzit yükdaşımaların inkişaf perspektivləri və digər mühüm məsələləri müzakirə ediblər.
Azərbaycan-Rusiya dəmir yolları arasındakı əməkdaşlıq, Bakı-Yalama dəmir yolunun rekonstruksiyası, Bakı-Astara dəmir yolunun yenilənməsi və Azərbaycan-İran dəmir yollarının birləşdirilməsi istiqamətində aparılan işlər haqqında danışılan dəyirmi masada, iki ölkə arasında dəmir yolu sahəsində əməkdaşlığın perspektivləri və hazırki durumu qənaətbəxş hesab edilib.
Azərbaycan Dəmir Yolları” QSC-də İran Yol və şəhərsalma nazirinin müavini, İran Dəmir Yollarının baş direktoru Səid Məhəmmədzadə və Ərdəbil əyalətinin qubernatoru Əkbər Behnəmcunun rəhbərlik etdikləri nümayəndə heyətləri ilə görüş keçirilib.
Görüşdə “Azərbaycan Dəmir Yolları” QSC-nin sədri Cavid Qurbanov çıxış edərək Azərbaycanın nəqliyyat-logistika imkanları, beynəlxalq və regional nəqliyyat dəhlizlərinin reallaşması prosesində görülən işlər barədə ətraflı məlumat verib.
"Şimal-Cənub" Beynəlxalq Nəqliyyat Dəhlizinin icra vəziyyətindən danışan natiq bildirib ki, bu layihə çərçivəsində Azərbaycan tərəfi öz üzərinə düşən vəzifələri yerinə yetirib. Astara stansiyasından İran İslam Respublikası dövlət sərhədinə qədər birxətli 8,3 km dəmir yolu çəkilib və Astara çayı üzərindəki dəmir yolu körpüsü tikilib. Eyni zamanda Astarada (İran) 35 hektar ərazidə dəmir yolu stansiyasının tikintisi və yüklərin boşaldılması üçün terminalların inşası davam edir. Bu ilin mart ayında Astara-Astara dəmir yolunun birləşdirilməsi layihəsinin ilk fazası və yük terminalı istismara verilib və eyni zamanda taxıl terminalının təməli qoyulub. İran İslam Respublikasının Prezidenti Həsən Ruhani Azərbaycana sonuncu səfəri çərçıvəsində “Azərbaycan Respublikası ilə İran İslam Respublikası arasında İran İslam Respublikası ərazisində Astara-Rəşt dəmir yolu hissəsinin tikintisinin maliyyələşdirilməsi haqqında Saziş”i imzalanıb.
Sonra Rəşt-Astara dəmir yolu xəttinin tikintisi, İranın Ərdəbil vilayəti ilə iqtisadi əməkdaşlığının genişləndirilməsi, eləcə də nəqliyyat sahəsində əməkdaşlığın inkişafına dair müzakirələr aparılıb.
İran Yol və şəhərsalma nazirinin müavini, İran Dəmir Yollarının baş direktoru Səid Məhəmmədzadə və Ərdəbil əyalətinin qubernatoru Əkbər Behnamcu çıxışlarında müzakirə olunan məsələlərin əhəmiyyətindən danışıb, ikitərəfli əlaqələrin genişləndirilməsində maraqlı olduqlarını bir daha diqqətə çatdırıblar.
