 |
|
Biz Misir ilə ənənəvi dostluq və əməkdaşlıq münasibətlərimizə böyük əhəmiyyət veririk.
Bu fikir Azərbaycan Respublikasının Prezidenti İlham Əliyevin Misir Ərəb Respublikasının milli bayramı – İnqilab Günü münasibətilə Prezident Əbdülfəttah əs-Sisiyə təbrik məktubunda yer alıb.
Məktubda, həmçinin deyilir: “Hazırda ölkələrimiz arasında əlaqələrin dərinləşməsi, müxtəlif sahələrdə əməkdaşlığın genişlənməsi və yeni məzmunla zənginləşməsi üçün yaxşı imkanlar yaranmışdır. Siyasi dialoqumuzun müntəzəm xarakter daşıması birgə fəaliyyətimizin inkişafına öz müsbət təsirini göstərir. Bu baxımdan iyun ayının əvvəlində Misirə həyata keçirdiyim səfər çərçivəsində əldə olunmuş razılaşmaların və imzalanmış sənədlərin əhəmiyyətini xüsusi vurğulamaq istərdim.
Əminəm ki, dövlətlərarası münasibətlərimizi möhkəmləndirmək, həm ikitərəfli, həm də çoxtərəfli müstəvidə qarşılıqlı maraq doğuran əməkdaşlığımızın potensialından tam bəhrələnmək üçün bundan sonra da birgə səylər göstərəcəyik”.
Dövlət başçısı bu bayram günündə Prezident Əbdülfəttah əs-Sisiyə möhkəm cansağlığı, xoşbəxtlik, işlərində müvəffəqiyyətlər, dost Misir xalqına daim əmin-amanlıq və firavanlıq arzulayıb.
YAP VII çağırış Milli Məclisə seçkilərdə 12 saylı Xəzər birinci seçki dairəsindən Maniyeva Aygün Şaitdin qızının namizədliiyni irəli sürsə də, sonradan onun namizədliyini ləğv edib. Buna səbəb isə namizədin atası Şaitdin Əliyevin MSK üzvü olması olub.
Həmin dairədən isə VI çağırış Milli Məclis üzvü olmuş Soltan Məmmədovun namizədliyi irəli sürülüb. Bu barədə Soltan Məmmədov özü paylaşım edib.
"Ötən seçkilərdə mənə etimad göstərərək namizədliyimi dəstəkləyən, 5 il ərzində hər zaman güvənini, etimadını hiss etdiyim hər bir vətəndaşımıza dərin təşəkkürümü bildirirəm!
Bu gün yeni bir dövrə qədəm qoyuruq. Yenə Xəzər rayonundan, lakin bu dəfə Mərdəkan, Şağan və Buzovna qəsəbələrini əhatə edən 12 saylı Xəzər seçki dairəsindən Milli Məclisin deputatlığına namizədliyim irəli sürüldü. Bu təşəbbüsü irəli sürənlərə, namizədliyimi dəstəklədiyini imzası ilə təsdiq edən bütün vətəndaşlara minnətdaram! İnanıram ki, növbədənkənar parlament seçkiləri ölkəmizin tarixində başlamış yeni mərhələnin ən mühüm siyasi hadisələrindən biri kimi yadda qalacaq", - Soltan Məmmədov qeyd edib.
Birləşmiş Ştatlar bu günlərdə bəyan edib ki, ötən həftə Vaşinqtonda keçirilən son görüş zamanı Bakı və İrəvan arasında danışıqlarda “irəliləyiş” qeydə alınıb.“Biz irəliləyiş əldə etmişik. Təfərrüatları açıqlamayacağam. Hələlik razılaşma yoxdur, lakin razılığa gələnə qədər dincəlmək fikrində deyilik”. Bu barədə brifinqdə Dövlət Departamentinin sözçüsü Metyu Miller dövlət katibi Entoni Blinkenin NATO sammiti çərçivəsində azərbaycanlı və erməni həmkarları ilə görüşünün nəticələri ilə bağlı suallara cavab verərkən deyib.
“Siz hamınız eşitdiniz ki, dövlət katibi görüşü açarkən hər iki tərəfin uzun yol qət edərək, irəliləyişə nail olduğunu dedi. Buna görə də, biz onları kömək etməkdə davam edirik”, - Miller əlavə edib.
Blinken Bayramov və Mirzoyana bildirib ki, Birləşmiş Ştatlar tərəflərə regionda sabitlik və təhlükəsizlik üçün çox vacib olan sülh razılaşmasını əldə etməyə kömək etməyə çalışacaq.
"Biz razılaşmanın mümkün olduğunu düşünürük, lakin hər iki tərəf çətin seçim və çətin kompromislər etməlidir. Və biz onları bu son ziddiyyətləri həll etməyə və razılığa gəlməyə təşviq edəcəyik" – Miller deyib.
Ermənistan ötən ay bəyan edib ki, “bir ay ərzində” Bakı ilə sülh sazişi imzalamağa hazırdır. Ötən həftə prezident İlham Əliyev də sazişin mətninin bir neçə ay ərzində razılaşdırıla biləcəyini deyib.
Amma bütün bu bəyanatlara baxmayaraq, tərəflər arasında hələ də rəsmi sülh yoxdur. Və təbii ki, bu, suallar doğurur.
Bəs, Ermənistan və Azərbaycan heç bir sülh razılaşması imzalamadan uzun müddət sülh şəraitində yaşaya bilərlərmi? Bu, maraqlarına uyğunluq baxımından kimə daha çox faydalı, kimə daha az zərərlidir - Ermənistana, yoxsa Azərbaycana? Belə birgəyaşayış nümunələri, presedentlər varmı? Bəlkə də var. Məsələn, Rusiya və Yaponiya sülh müqaviləsi olmadan yaşayırlar, hətta diplomatik əlaqələrə malikdirlər və paytaxtlarında bir-birinin səfirliklərini açıblar.
Bəs regional maraqlar, bütün Cənubi Qafqazın maraqları baxımından iki dövlət arasında sülh müqaviləsi olmadan yaşamaq necə olur?
Pressklub.az-ın suallarını regionun tanınmış ekspertləri cavablandırıblar.
Ermənistan Politoloqlar Assosiasiyasının prezidenti, siyasi elmlər doktoru Amayak Ovannisyan hesab edir ki, sülh müqaviləsi olmadan uzun müddət sülh şəraitində yaşamaq mümkündür. Eyni zamanda o, sual verir - taleyi sınağa çəkmək, qeyri-müəyyənlik yaratmaq nəyə lazımdır. Axı bu, dövlətlərimizin sərt qarşıdurma şəraitinə qayıtmasında maraqlı olan pozucu qüvvələr üçün yaxşı zəmindir.
“Belə qüvvələr həm Ermənistanda, həm də Azərbaycanda mövcuddur: bu qüvvələri təmsil edən tanınmış, amma layiq olmadıqları mövqeyi tutan siyasi xadimlər otuz il ərzində xalqlarımız arasında düşmənçilik və nifrət toxumu səpib, sonra isə onları istismar ediblər. Bunun sayəsində yüksək dövlət mövqelərini ələ keçiriblər, təkcə Ermənistanda və Qarabağda deyil, həm də uzaq xaricdə saraylar tikiblər. Bu insanlar müharibə, qonşu xalqın simasında düşmən obrazı yetişdirmək sayəsində cır-cındırdan var-dövlətə yüksəlib, başgicəlləndirici siyasi karyera qurdular. Təbii ki, onlar sülh müqaviləsi bağlamaq istəmirlər və yenidən hakimiyyətə qayıtmaq arzusundadırlar. Vazgen Sarkisyan Karen Dəmirçyanın tərəfinə keçəndə, onunla nə etdilər? Onlar Vazgeni öz çevrələrində satqın elan edərək, 1999-cu il oktyabrın 27-də parlamentin iclas zalında hər ikisinin qətlini təşkil etdilər. Mən partiyada Karen Dəmirçiyanın müavini və deputat idim və o zaman möcüzə nəticəsində sağ qaldım... Sualınıza cavab zamanı faciəmizi xatırlamağım heç də təsadüfi deyil. Çünki 90-cı illərdə Karen Dəmirçyanı Heydər Əliyevin Azərbaycanda etdiyi kimi böyük siyasətə qayıtmağın zərurətinə inandıranda ondan çıxış etdim ki, bu iki siyasi nəhəng birlikdə xalqlarımızı mehriban qonşuluq, dostluq və firavanlıq yoluna qaytara biləcəklər. Mən onları şəxsən tanıyırdım və əminliklə deyə bilərəm: onların hər ikisi bir həqiqəti dərindən dərk edirdilər ki, qonşu xalq və ölkə bədbəxtdirsə, sənin xalqın və ölkən xoşbəxt ola bilməz, ermənilər və azərbaycanlılar yalnız mehriban qonşuluq və dostluq şəraitində xoşbəxt ola bilərlər. Və Qorbaçovun yenidənqurmasından əvvəl respublikalarımızın başında Karen Dəmirçyan və Heydər Əliyev dayandığı zaman bu dostluq mövcud idi. Mən tam əminəm ki, dövlət müstəqilliyini əldə etdikdən sonra dövlətlərimizin başında onlar olsaydılar, səpdikləri yaxşı toxumlar yeni şəraitdə cücərə bilərdi və şübhəsiz ki cücərəcəkdi. Təsəvvür edəndə ki, onlar sağ olsaydılar və ölkələrimizi idarə etsəydilər, tam aydın şəkildə deyərdim: bir neçə saat ərzində sülh müqaviləsi bağlayardılar, diplomatik əlaqələr qurardılar və bununla da dağıdıcı qüvvələrin ölkələrimizi qarşıdurma yoluna qaytarmaq cəhdinin qarşısını birdəfəlik alardılar”, - politoloq deyir.
Onun fikrincə, hərbi münaqişə tərəflərindən birinin geniş ərazilər üzərində nəzarəti itirdiyi, digərinin isə bu nəzarəti bərpa etdiyi böyük müharibədən sonra sülh müqaviləsinin bağlanması məğlub olan tərəfin deyil, qalib olan tərəfin marağındadır. “Azərbaycan obyektiv olaraq, Birinci Qarabağ müharibəsindən sonra Levon Ter-Petrosyan administrasiyasının buraxdığı ciddi səhvin təkrarlanmasında maraqlı deyil. O zaman qalib olan Ermənistan tərəflər arasında tam hüquqlu sülh müqaviləsi bağlamaqda israr etməmişdi.
Ermənistana gəlincə, o, beynəlxalq əlaqələrimizdən istifadə etməyə imkan verməyən, ölkəmizi qonşu Azərbaycan və Türkiyə ilə münaqişənin girovuna çevirən səhv inkişaf modelini kökündən dəyişmək niyyətindədir. Axı, böyük Höte əbəs yerə deməyib ki, iki mübahisə edən arasında günahkar daha ağıllı olandır. Allah eləsin ki, aramızda yeganə mübahisə predmeti kimin daha ağıllı olması məsələsi olsun”, - siyasi elmlər doktoru qeyd edir.
Onun sözlərinə görə, sülh müqaviləsi bağlanmadan dinc yanaşı yaşamaq presedentləri mövcuddur. “Üstəlik, Ermənistan və Azərbaycan formal olaraq müharibə şəraitində deyildilər: onlar Ukraynada olduğu kimi bir-birinə müharibə elan etməyiblər. Amma hətta Ukrayna münaqişəsi məsələsində də beynəlxalq ictimaiyyət sülh müqaviləsinin bağlanmasının zəruriliyi məsələsini gündəmə gətirir. Bizim məsələmizdə də belədir - beynəlxalq ictimaiyyət sülh müqaviləsi bağlamaq zərurətində təkid edir. Çünki söhbət daha da artacaq beynəlxalq sərmayələrin qorunmasından gedir və Cənubi Qafqaz regionunun iqtisadi inkişafında maraqlı olan bütün investorlara fəaliyyətlərinin etibarlı dinc şəraitdə davam edəcəyinə zəmanət vermək lazımdır”, - ekspert əmindir.
O, hesab edir ki, bu yaxınlarda ABŞ Dövlət Departamentinin vasitəçiliyi ilə xarici işlər nazirləri arasında sülh müqaviləsinin bağlanması perspektivləri ilə bağlı üçtərəfli müzakirələrdən sonra beynəlxalq ictimaiyyətin bu məsələnin tezliklə həllində nə dərəcədə maraqlı olması hamıya aydın olmalıdır. "Mən bu cür marağın səbəbləri barədə artıq danışmışam və təkrar etməyəcəyəm", - Ovannisyan bildirib.
Gürcüstan Strateji Təhlil Mərkəzinin (GSAC) aparıcı eksperti Gela Vasadze də hesab edir ki, sülh müqaviləsi olmadan yaşamaq tamamilə mümkündür, üstəlik, sülh müqaviləsi olmadan hətta kommunikasiyaları (yük daşımaları üçün) da açmaq olar. Lakin sülh müqaviləsi olmadan tam hüquqlu münasibətlər qurulması və barışıq prosesi mümkün deyil.
“Azərbaycana müharibənin nəticələrinin hüquqi cəhətdən möhkəmləndirilməsi və gələcəkdə Ermənistanın iddialarının qarşısının alınması üçün saziş lazımdır. Baxmayaraq ki, heç bir razılaşma buna tam zəmanət vermir. Saziş Ermənistana Azərbaycan və Türkiyə ilə münasibətlərdə sərhədlərinin hüquqi şəkildə rəsmiləşdirilməsi üçün lazımdır. Baxmayaraq ki, hətta burada belə, bir sənəd heç bir konkret təminat vermir. Odur ki, bunun kimə daha çox lazım olduğuna özünüz qərar verin”, - analitik bildirib.
Ekspert presedentlərdən danışarkən Yaponiya - SSRİ, indi də Yaponiya – Rusiya münasibətlərinin misal gətirilməsini doğru sayıb. “Heç nə də olmayıb, yaşayıblar, bəzən hətta yaxşı yaşayıblar. Sovet İttifaqı zamanı hətta birlikdə filmlər də çəkirdilər. Yeri gəlmişkən, müharibə əleyhinə filmlər idi. Amma bu, başqa situasiyadır”, - o, hesab edir.
Ümumi regional maraqlarla bağlı vəziyyətə gəlincə, Vasadze bunu belə ifadə edib: “Ənənəyə görə, indi deməliyəm ki, bu, çox pis və hətta dəhşətlidir. Amma bunu deməyəcəyəm. Azərbaycan və Ermənistanı hələ çox uzun və çətin sülh yolu gözləyir və sülh müqaviləsinin bu yolun hansı mərhələsində bağlanacağı o qədər də vacib deyil. Kommunikasiyaları açmaq yaxşı olardı, amma bu da kritik deyil”.
Öz növbəsində Cənubi Qafqaz Araşdırmaları Mərkəzinin direktoru Fərhad Məmmədov bildirib ki, əgər sülh müqaviləsi imzalamaq mümkün deyilsə, yəni, buna imkan verməyən maneələr varsa, belə bir birgəyaşayış mümkündür və biz, prinsipcə, ötən ildən başlayaraq, faktiki sülh şəraitində yaşayırıq.
“Bunun bəzi eskalasiya ssenarilərinə çevrilməsinin qarşısını almaq üçün de-fakto sülh şəraitində qarşılıqlı təsir mexanizmlərinin formalaşdırılması mümkündür. Şərti sərhəddə silahlı insidentlərin qarşısını almaq üçün bəzi qabaqlayıcı tədbirlər görmək və ya hər hansı insidentlərin qarşısını almaq üçün mexanizmlər işə salmaq. Bəli, bu, mümkündür. Və yəqin ki, biz bir müddət faktiki sülh şəraitində yaşayacağıq. Amma burada qarşılıqlı fəaliyyət və əməkdaşlıq anlayışları arasında xətt çəkməliyik. Bu şəraitdə ölkələr ya eskalasiyanın qarşısını almaq üçün qarşılıqlı fəaliyyət göstərirlər, ya da əməkdaşlıq üçün imkanlar yaradırlar. Məsələn, kommunikasiyaların açılması mövzusunda”, - politoloq deyir.
Onun sözlərinə görə, istənilən dövlətin marağı ondan ibarətdir ki, sərhədi yaxınlığında ən azı tərəfdaşlıq əlaqələri qurmaq mümkün olan, proqnozlaşdırıla bilən qonşular olsun. “Ermənistan-Azərbaycan münasibətlərinə toxunuruqsa, sülh müqaviləsi olmadan de-fakto sülh vəziyyəti, yəni atışmanın olmadığı və qarşılıqlı münasibətlər olduğu vəziyyət müharibədən daha yaxşıdır. Bu, hər iki dövlət üçün qarşıdurmadan sülh sazişinə keçid dövründə daha sərfəli mövqedir”, - deyə mərkəzin direktoru bildirib.
O qeyd edir ki, dünyada belə birgəyaşayış üçün klassik presedentlər azdır. “Rusiya və Yaponiya nümunəsi mənim üçün tam aktual nümunə deyil. Çünki onlar sülh müqaviləsi olmadığı şəraitdə münasibətlərin demək olar, bütün spektrini rəsmiləşdiriblər. Yəni diplomatik əlaqələr qurulub, ticarət inkişaf edib, investisiyalar qoyulub, turizm böyüyüb və s. Putin hətta baş nazir Abeni dostu adlandırırdı. İkitərəfli münasibətlərdə sülh müqaviləsinin şərt kimi qoyula biləcəyi heç nə yox idi. Düşünürəm ki, bu, o qədər də uğurlu deyil və əsas problemləri həll etmir. Yəni, hansısa sahə sülh müqaviləsi ilə şərtləndirilməliydi ki, ona nail olmaq üçün məqsəd, maraq oldun. Bu, kommunikasiyalar, diplomatik münasibətlər, iqtisadi qarşılıqlı fəaliyyət ola bilər”, - analitik bildirib.
Regional maraqlara gəlincə, təəssüf ki, Ermənistan bunda maraqlı deyil və buna görə də daim Cənubi Qafqaza xarici qüvvələri cəlb edir. “Bu qüvvə əvvəllər Rusiya idi, indi ABŞ, Fransa, Aİ-dir. İrəvan regionumuzda geosiyasi gərginliyin artmasına şərait yaradır. Paşinyan hökumətinin gördüyü işləri nəzərə alsaq, qeyd etməliyik ki, o, hətta, indiki mərhələdə sülh müqaviləsinin imzalanmasında maraqlı olmaya bilər. Çünki Azərbaycandan gələn “təhlükə” Paşinyan hökumətinin elə həmin Fransa, ABŞ, Aİ, Hindistan və başqalarından maliyyə, iqtisadi, institusional, hərbi yardım almasına şərait yaradır. Bütün bunlar isə region üçün əlverişli şərait yaratmır.
Azərbaycan müstəqil şəkildə, tərəfdaşları ilə birlikdə Gürcüstan kimi regional ölkənin maraqlarını nəzərə alaraq, 25-30 illik müstəqillik dövründə mümkün olan hər şeyi həyata keçirib. Yəni, biz nümunə göstərmişik ki, Cənubi Qafqazda geosiyasi gərginliyin artmasının və burada öz siyasətini həyata keçirən regiondankənar qüvvələrin tərəfdarı deyilik.
Bu məsələdə bizimlə Ermənistanın iki fərqli mövqeyi var. Və təbii, hesab edirəm ki, sülh müqaviləsinin bağlanması ilə gərginlik səngiməlidir. Bununla belə, Ermənistanın yuxarıda təsvir olunan hərəkətlərini davam etdirməsi regional təhlükəsizliyə təhdid yarada bilər”, - Məmmədov yekunlaşdırıb.
Prezident İlham Əliyevin İkinci Şuşa Qlobal Forumunda Ermənistanla münasibətlər və sülh üçün zəruri şərtlər barədə açıqlamasına erməni ekspertlər çox qəribə şəkildə daha real yanaşma sərgiləməyə çalışıblar.Axar.az xəbər verir ki, bu cür yanaşmalardan birini erməni politoloq Suren Surenyants nümayiş etdirib.
O, Azərbaycan liderinin 3 əsas tələbi olduğunu vurğulayıb: azərbaycanlı qaçqınların Ermənistana qaytarılması, ATƏT-in Minsk Qrupunun buraxılması ilə bağlı sənədin razılaşdırılması və Ermənistan Konstitusiyasının dəyişdirilməsi.
Surenyants bildirib ki, Azərbaycan prezidentinin tələblərinə “emosional reaksiya vermək” və ya daxili auditoriyaya “oynamaq” da olar:
“Lakin bütün bunlar özünü aldatmaq olardı, xüsusən də Bakı beynəlxalq platformalarda bəzi tələblərini artıq qanuniləşdirə bilib”.
O təsdiqləyib ki, Minsk Qrupu 6 oktyabr 2022-ci ildə Praqada dördtərəfli bəyannaməsi nəticəsində faktiki olaraq ləğv edilib, çünki Nikol Paşinyan Qarabağı unitar Azərbaycanın bir hissəsi kimi tanıyaraq, “Dağlıq Qarabağ problemi”ni mahiyyətcə bağlayıb:
“Artıq “Dağlıq Qarabağ məsələsi” qapalıdır, ona görə Minsk Qrupu öz aktuallığını itirib - hətta bunu etiraf etmək son dərəcə çətin olsa da.
Digər tərəfdən, Ermənistan-Azərbaycan münaqişəsinin transformasiyası yeni status-kvo yaradıb və bu, açıq-aşkar güc balanssızlığı şəraitində birbaşa danışıqları yenidən Ermənistan üçün olduqca həssas və təhlükəli edir. Fikrimcə, Ermənistan-Azərbaycan nizamlanması prosesinin real vasitəçiləri və təminatçısı regional supergüclər olmalıdır: Rusiya, İran, Türkiyə”.
Başqa sözlə, Surenyats Minsk Qrupunun ləğvi ilə bağlı hər iki ölkənin ATƏT-ə müraciətinin məntiqli olduğu qənaətini bölüşüb.
İkinci məsələ - Ermənistan Konstitusiyasında dəyişikliklə bağlı Surenyats qeyd edib ki, bu, heç bir halda Azərbaycanın tələbi ilə olmamalıdır:
“Bununla bağlı ölkə daxilində, kənardan müdaxilə və təzyiq olmadan, siyasi və ictimai konsensus formalaşdırmalıyıq. Mən bu fikirdəyəm ki, Ermənistan Konstitusiyasında Ermənistanın dünyanın heç bir ölkəsinə qarşı ərazi ambisiyasının olmadığını bildirən, belə bir gündəmi və proqramı olan bütün siyasi qüvvələri qanundan kənar elan edən maddə olmalıdır”.
Üçüncü tələblə bağlı isə erməni politoloq hesab edir ki, bunun vaxtı hələ gəlməyib:
“Qaçqınların qayıtması mövzusu hazırda gündəm ola bilməz. İki xalq arasındakı antaqonizmin aradan qaldırılması onilliklər tələb edir. İnstitusional və sabit sülh bərqərar edilmədən qaçqınların geri qayıtması yalnız münaqişənin yenidən başlaması üçün imkanlar yaradacaq. Ona görə də indiki vaxtda bu məsələnin müzakirəsi nizamlanmaya qətiyyən kömək etmir”.
Beynəlxalq Qızıl Xaç Komitəsinin (BQXK) əməkdaşları Azərbaycan tərəfinin haqqında məlumat verdiyi erməniəsilli şəxslərə yenidən baş çəkiblər.
Bu barədə BQXK-nın Azərbaycan nümayəndəliyinin ictimaiyyətlə əlaqələr şöbəsinin rəhbəri İlahə Hüseynova məlumat verib.
O qeyd edib ki, saxlanılan şəxslərlə təkbətək görüşlər keçirilib və onların ailələri ilə əlaqəsi üçün şərait yaradılıb:
"Mandatına uyğun olaraq BQXK bu cür başçəkmələr zamanı saxlanılan şəxslərlə rəftarı və saxlanma şəraitini qiymətləndirir. BQXK, həmçinin şəxslərin ailələri ilə əlaqələrini bərpa etmək və ya davam etdirmək üçün şərait yaradır. BQXK-nın prosedurlarına uyğun olaraq başçəkmələrlə bağlı müşahidələr və tövsiyələr yalnız saxlayan tərəflə paylaşılır və müzakirə edilir".
Xatırladaq ki, Azərbaycanın hüquq-mühafizə orqanları Qarabağdakı keçmiş qondarma qurumun “prezidentləri” olmuş Arkadi Qukasyan, Bako Saakyan, Arayik Arutyunyan, sabiq “xarici işlər naziri” David Babayan, eləcə də “parlament sədri” David İşxanyan, generallar Lyova Mnatsakanyan, David Manukyan və keçmiş “dövlət naziri” Ruben Vardanyanı saxlayaraq Bakıya gətiriblər.
Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev 22 İyul - Milli Mətbuat Günü münasibətilə media nümayəndələrini təbrik edib.
O, bu barədə "X" hesabında paylaşım edib.
"22 İyul - Milli Mətbuat Günü münasibətilə bütün həmkarları təbrik edirəm. 149-cu ildönümünü qeyd edən milli mətbuatımız uzun, şərəfli və məsuliyyətli inkişaf yolu keçib", - Prezident köməkçisi qeyd edib.
Fransa Prezidenti Emmanuel Makron Birləşmiş Krallığın Vudstok şəhərində baş tutan Avropa Siyasi İcmasının sammitində keçirdiyi mətbuat konfransında ölkəsinin Ermənistanı silahlandırmasına haqq qazandırmağa və Azərbaycana böhtan atmağa cəhd edib. 2020-ci ildə Azərbaycanın öz ərazilərini 30 illik işğaldan azad etməsini mənfi müstəvidə təqdim etməyə cəhd edən Fransa prezidentinə xatırlatmaq lazımdır ki, 44 günlük Vətən müharibəsi BMT Nizamnaməsinin müddəalarının və Təhlükəsizlik Şurasının konkret qətnamələrinin icrasını təmin etməklə beynəlxalq hüququn və ədalətin təntənəsi olub. Prezident Makron bu şanlı tarixə qara yaxmağa cəhd etmək əvəzinə Fransanın uzun illər ərzində Ermənistanı dəstəkləyərək onu Azərbaycan ərazilərinin işğalını davam etdirməyə cəsarətləndirməsinə görə öz ölkəsinin məsuliyyətini etiraf etməlidir. Azərbaycan ərazilərinin 20 faizini zəbt edərək, 30 il ərzində işğal altında saxlamış Ermənistana Fransanın silah satması ordusunda və bir çox siyasi dairələrində revanşist hisslərin hakim olduğu bu ölkəni Azərbaycana qarşı təkrar müharibəyə sövq etmək və regionu qana çalxalamağa xidmət edir. Fransa Ermənistanı silahlandırmasını və digər pozucu əməllərini dərhal dayandırmalıdır.Politoloq Elxan Şahinoğlu "Sherg.az"a deyib ki, Fransa Prezidenti Emmanuel Makron Cənubi Qafqaz siyasətini korrektə etmək istəmir. Onun son təxribatçı çıxışı buna dəlalət edir:
"Makronun sözlərinə görə, guya Fransa Ermənistana ona görə hərbi texnika göndərir ki, bu ölkə özünü Azərbaycandan qoruya bilsin. 30 ilə yaxın torpaqlarımız işğal altında olanda Ermənistanın qorunması Fransanın yadına düşmürdü, torpaqlarımızın 20 faizinin işğalını “reallıq” kimi qəbul edirdilər. Elə ki, Azərbaycan torpaqlarını azad etdi, ərazi bütövlüyünü təmin etdi, Fransa əl-ayağa düşdü, ay-haray salmağa başladı ki, Ermənistanı qorumaq lazımdır. Ermənistanı Azərbaycanla sülhə təşviq etmək əvəzinə, Konstitusiyada başqalarının ərazisinə iddianın beynəlxalq hüquqa zidd olduğunu anlatmaq əvəzinə Paris gücsüz İrəvana sanki belə mesaj göndərir ki, “möhkəm ol, Azərbaycan və Türkiyə ilə razılaşma, silah və sursatı biz göndərəcəyik”. Makron deyib ki, Baş nazir Nikol Paşinyanın Azərbaycana hücum etmək planı yoxdur. Həqiqətən Paşinyan o durumda deyil ki, bu haqda düşünsün, o, İkinci Qarabağ müharibəsində elə zərbə almayıb ki, yeni müharibəyə hazır olsun. Söhbət Paşinyandan getmir, baş nazirin də etiraf etdiyi ordusundakı “5-ci kolondan”, "Yerkrapa" kimi terrorçu təşkilatların varlığından gedir ki, Azərbaycana qarşı təxribatları ilə yadda qalıblar".
Analitik vurğulayıb ki, Makron və onun ətrafı o qədər erməni sevgisinə bürünüblər ki, Ermənistandakı təxribatçıları görməzdən gəlirlər: "Makron deyir ki, 2020-ci ildə Azərbaycan “dəhşətli” müharibəyə başlayıb. Makron unudur ki, onun “dəhşətli” adlandırdığı müharibə Azərbaycan ərazisində baş verib, məqsəd separatizmə son qoymaq olub. Fransa öz müstəmləkələrində necə separatçılara qarşı mübarizə aparırsa, Azərbaycanın da separatçılara qarşı mübarizə aparmaq hüququ var. Beynəlxalq hüquq da bunu diktə edir. Makron Azərbaycanın bu hüququnu tanımırsa, bu onun problemidir. Makron açıqlamasının sonunda xala-xətrin xoş olsun deyə Ermənistanla Azərbaycan arasında sülhə dəstək verəcəyini bildirib. Sən bircə iki dövlətə mane olma, Ermənistandakı təxribatçıları qızışdırma, sülhə Fransanın iştirakı olmadan da nail ola bilərik. Fransanın Ermənistana göndərdiyi hücum silahları sülhə yox, müharibəyə xidmət edir. Paşinyan bunu anlayanda gec ola bilər".
Azərbaycan Prezidenti İlham Əliyev 22 İyul - Milli Mətbuat Günü münasibətilə sosial media hesablarında paylaşım edib.
Fransa hökuməti yenə də mediadan istifadə edərək bizi ittiham edir ki, guya biz onların daxili işlərinə qarışırıq. Ancaq bu, qətiyyən belə deyil.
Bu sözləri Prezident İlham Əliyev “Yalan məlumatların ifşası: Dezinformasiyaya qarşı mübarizə” mövzusunda 2-ci Şuşa Qlobal Media Forumunda çıxışında söyləyib.
“Qoşulmama Hərəkatının bir çox üzvü keçmişdə kolonializmin qurbanı olmuşdur. Milyonlarla insan bunun qurbanı olmuşdur və bəzi ölkələr hələ də bundan əziyyət çəkir. Məsələn, Qəmər adaları, Mayot adası. Hələ də onlar kolonial idarəçilik altındadır. Biz bu ölkələrə kömək etmək istəyirik ki, keçmişin bu iyrənc qalığından özlərini azad edə bilsinlər”, – dövlət başçısı vurğulayıb.
Dövlət başçısının sözlərinə görə, “Fransa hökuməti yenə də mediadan istifadə edərək bizi ittiham edir ki, guya biz onların daxili işlərinə qarışırıq”. Prezident qeyd edib ki, “bu, qətiyyən belə deyil”:
“Biz bunu Avropa İttifaqında, BMT-də anti-Azərbaycan mövqeyi ilə əlaqələndiririk. Onlar Azərbaycana qarşı soyuq müharibəyə başlayıblar. Biz bunu ona görə edirik və əminik ki, Fransanın etdikləri iyrəncdir, qəbuledilməzdir və buna son qoyulmalıdır. Onların həmin insanların taleyinə bu dərəcədə təsir etməyə ixtiyarları yoxdur. O ölkələr Fransadan minlərlə kilometr uzaqda yerləşir, onları assimilyasiya etməyə çalışırlar, onları təhqir edirlər. Sonuncu hadisələrdə Yeni Kaledoniyada yeddi insan həlak olub. Bu, Fransanın və onun prezidentinin əməli nəticəsində baş verib”.
“Biz kolonializmdən əziyyət çəkən bütün xalqları dəstəkləməyə davam edəcəyik, əlimizdən gələni edəcəyik”, – ölkə lideri vurğulayıb.
Bu gün ll Şuşa Qlobal Media Forumunun açılış mərasimi olacaq.
50-ə yaxın ölkədən 150-dən çox xarici qonağın, o cümlədən 30-a yaxın ölkənin informasiya agentliyi, 3 beynəlxalq təşkilat və 82 media qurumunun qatılacağı Forumda Azərbaycan Prezidenti İlham Əliyevin iştirakı nəzərdə tutulur.
Dövlət başçısının “Yalan məlumatların ifşası: Dezinformasiyaya qarşı mübarizə” mövzusunda keçiriləcək forumunun iştirakçıları ilə görüşü canlı yayımlanacaq.
Qeyd edək ki, iki gün davam edəcək forum çərçivəsində 4 panel sessiya - “Təsirin qiymətləndirilməsi: Dezinformasiyanın əhatə dairəsini müəyyənləşdirmək”, “Dezinformasiyaya qarşı daha davamlı cəmiyyət qurmaq üçün siyasət və təşəbbüslər”, “Süni intellektin reallığa, mediaya və dezinformasiyaya təsiri: Media savadlılığının təşviqi” və “İqlim hərəkatı və media” mövzularında təşkil olunacaq. Panel sessiyalarda müxtəlif ölkələrdən olan rəsmilər, media və vətəndaş cəmiyyəti, dövlət və biznes nümayəndələri, beynəlxalq təşkilatların təmsilçiləri və media ekspertləri ətraflı fikir və təcrübə mübadiləsi aparacaqlar.