 |
|
Yaxın günlərdə “3+3” platformasının növbəti iclası Türkiyədə baş tuta bilər.Rusiya Xariciş İşlər Nazirliyinin məbtuat katibi Mariya Zaxarova son mətbuat konfrasında bildirib ki, Türkiyədə “3+3” formatında xarici işlər nazirlərinin görüşü gözlənilir.
Platformanın növbəti görüşündə Rusiya, İran, Ermənistan, Azərbaycan, Türkiyə və Gürcüstan XİN rəhbərləri iştirak edəcəklər.
Maraqlıdır, Türkiyədə bu görüşün baş tutma ehtimalı nə qədərdir? Əgər belə bir görüş baş tutacaqsa, regionla bağlı hansı məsələlər müzakirə olunacaq?
Məsələ ilə bağlı politoloq Samir Hümbətov “Cebheinfo.az” -a şərhində qeyd edib ki, “3+3” formatında görüş baş tuta bilər:
“Ola bilsin ki, önümüzdəki aylarda “3+3” platformasının növbəti görüşü baş tutsun. Əgər təşəbbüs iştirakçı ölkələr tərəfindən müsbət qarşılanarsa, bu görüş baş tutacaq.
O ki qaldı görüşdə hansı məsələlərin müzakirə olunacağına, bu, bir qədər qaranlıq qalır. İnanmıram ki, görüşdə ciddi bir nəticə əldə etmək mümkün olsun. Ola bilər ki, tərəflərin müzakirə gündəminə regiondakı münaqişələr, nəqliyyat kommunikasiyaların açılması və iqtisadi əməkdaşlığın dərinləşdirilməsi ilə bağlı məsələlər daxil olacaq.
Çünki altılıq platformanın içərisindəki bəzi dövlətlər üçün iqtisadi əməkdaşlığın genişləndirilməsi xüsusi əhəmiyyət kəsb edir. Məsələn, Rusiya regionda yeni kommunikasiyaların açılmasında maraqlıdır. İran da regional əməkdaşlığı dəstəkləyir, amma Tehran bu kimi məsələlərdə daha çox öz maraqlarına üstünlük verir.
Eyni zamanda, bu görüşdə Azərbaycanla Ermənistan arasında imzalanacaq sülh sazişi də müzakirə predmentinə çevrilə bilər. Amma növbəti görüşün ciddi nəticə verəcəyini indidən proqnozlaşdırmaq bir qədər çətindir.
Ümumi götürəndə əsas odur ki, “3+3” platformasının növbəti görüşü baş tutsun və platforma tam olaraq fəaliyyətə başlasın. Ondan sonrakı mərhələlərdə regionla bağlı bir çox önəmli məsələləri müzakirə etmək olar”.
Prezident İlham Əliyev Türkiyə–Azərbaycan Universitetinin fəaliyyəti ilə bağlı bəzi məsələlərin tənzimlənməsi haqqında Sərəncam imzalayıb.
Sərəncama əsasən, Türkiyə–Azərbaycan Universitetinin fəaliyyətinə cəlb edilən Azərbaycan Respublikasının ali təhsil müəssisələrinə Azərbaycan Respublikası Dövlət İmtahan Mərkəzinin keçirdiyi qəbul imtahanlarının nəticələri əsasında tələbə seçimini müstəqil aparmaq hüququ verilib.
Müəyyən edilib ki, Türkiyə–Azərbaycan Universitetinin fəaliyyətinə cəlb edilən Azərbaycan Respublikasının ali təhsil müəssisələri:
tətbiq etdikləri Türkiyə Respublikasının müvafiq ali təhsil müəssisələrinin təhsil proqramlarını həmin ali təhsil müəssisələri ilə birgə idarə etmək hüququna malikdirlər;
maddi-texniki baza imkan verdiyi hallarda Türkiyə–Azərbaycan Universiteti üçün müəyyən edilmiş dövlət hesabına təhsilalanların sayından artıq ödənişli əsaslarla da tələbə qəbulu apara bilərlər.
Nazirlər Kabineti Türkiyə–Azərbaycan Universitetində dövlət hesabına təhsil alan tələbələrin sayını hər tədris ili üçün müəyyən etməli, Türkiyə–Azərbaycan Universitetinin fəaliyyətinə cəlb edilən ali təhsil müəssisələrinin maddi-texniki bazasının təşkili və əməliyyat xərclərinin maliyyələşdirilməsi məsələlərini həll etməli, bu Sərəncamdan irəli gələn digər məsələləri həll etməlidir.
Mən tam əminliklə deyə bilərəm ki, son illər ərzində quru sərhədlərimizin bağlı olması bizi çox böyük fəlakətlərdən xilas etdi. Hətta bu gün - sərhədlər bağlı olan vaxtda təhlükəli hərəkətlər aparılır və bu hərəkətlərin qarşısı alınır.
"Yol-xeber.az" xəbər verir ki, bunu Prezident İlham Əliyev VII çağırış Milli Məclisin ilk iclasındakı çıxışında deyib.
Sərhədlərimizin qorunmasının bizi xarici risklərdən qoruyacağını qeyd edən dövlət başçısı bildirib ki, Azərbaycanda daxili risklər yoxdur. “Azərbaycanda təhlükəsizlik, əmin-amanlıq uzun illərdir təmin edilir, sabitlik bütün dünya üçün nümunə ola bilər. Hər kəs bilir ki, əgər sabitlik olmasa, heç bir ölkə inkişaf edə bilməz. Bu gün sabitliyi pozulan ölkələrin vəziyyətini və aqibətini hər kəs yaxşı görür. Bu, təhlükəsizliyin, inkişafın, xarici sərmayənin cəlb edilməsi üçün başlıca şərtdir”, - deyə Prezident diqqətə çatdırıb.
VII çağırış Milli Məclis sədrinin müavinləri seçilib.
Bu barədə VII çağırış Milli Məclisin ilk iclasında məsələ müzakirəyə çıxarılıb.
Deputat Əli Əhmədov Milli Məclis sədrinin birinci müavini, deputatlar Ziyafət Əsgərov, Musa Qasımlı və Rafael Hüseynov sədrin müavinləri seçiliblər.
Qeyd edək ki, indiyədək Milli Məclis sədrinin üç müavini ( birinci müavin və iki müavin) olub.
İkinci Qarabağ müharibəsindən keçən dövr ərzində böyük dərəcədə öz hərbi gücümüzü artırmışıq, yeni silahlı birləşmələr yaradıldı, xüsusi təyinatlı qüvvələrin say tərkibi bir neçə dəfə artırıldı. Yeni xüsusi təyinatlı qüvvələr, komanda qüvvələri yaradıldı və onların da say tərkibi ildən ilə artır və artacaq.
Bu sözləri Prezident İlham Əliyev VII çağırış Milli Məclisin ilk iclasındakı çıxışında deyib.
Ordumuzun döyüş qabiliyyətinin artdığını, texnika ilə təchizatın lazımi səviyyədə təmin edildiyini və ediləcəyini vurğulayan dövlət başçısı bildirib: “Ermənistan və onun arxasında duran istənilən ölkə bilməlidir ki, bizimlə şantaj və ultimatum dili ilə danışmaq mümkün olmayacaq. İstənilən cavabı verməyə hazırıq, buna qadirik və hər zaman buna hazır olmalıyıq”.
Prezident İlham Əliyev İki Müqəddəs Ocağın Xadimi, Səudiyyə Ərəbistanının Kralı Əlahəzrət Salman bin Əbdüləziz Al Səuda təbrik məktubu ünvanlayıb.
“Məktubda deyilir:
“Əlahəzrət,
Əziz Qardaşım,
Səudiyyə Ərəbistanı Krallığının milli bayramı – Krallıq elan edilməsi Günü münasibətilə Sizi və Sizin simanızda bütün xalqınızı öz adımdan və Azərbaycan xalqı adından ürəkdən təbrik edir, ən səmimi və xoş arzularımı çatdırıram.
Azərbaycan ortaq dini və mədəni köklərlə bağlı olduğu Səudiyyə Ərəbistanı ilə münasibətlərinə xüsusi önəm verir. Dövlətlərarası münasibətlərimizin hazırkı səviyyəsi qardaş xalqlarımızın bir-birinə bəslədiyi dərin rəğbət, hörmət və etimaddan güc alır. Bu sarsılmaz iradədən qaynaqlanan əlaqələrimizin ötən dövr ərzində hərtərəfli inkişaf edərək bugünkü səviyyəyə yüksəlməsi məmnunluq doğurur. Azərbaycan-Səudiyyə Ərəbistanı münasibətlərinin möhkəmlənməsində Sizin şəxsi töhfənizi xüsusi vurğulamaq istəyirəm.
Səudiyyə Ərəbistanının ölkəmizin ərazi bütövlüyünə, suverenliyinə və beynəlxalq səviyyədə tanınmış sərhədlərinin toxunulmazlığına göstərdiyi daimi dəstəyini və ədalətli mövqeyini Azərbaycan xalqı heç vaxt unutmur.
Biz Azərbaycan-Səudiyyə Ərəbistanı əlaqələrini bütün sahələrdə, xüsusilə də iqtisadi-ticari, enerji, turizm, humanitar və digər sahələrdə genişləndirmək və möhkəmləndirmək əzmindəyik. Yüksək səviyyədə qarşılıqlı anlaşmanın mövcudluğu müxtəlif sahələrdə münasibətlərimizin daha da dərinləşdirilməsi üçün əlverişli zəmin yaradır. Enerji sahəsində uğurlu və davamlı əməkdaşlıq Səudiyyə Ərəbistanı ilə münasibətlərimizin əsas istiqamətlərindən biridir. Ölkənizi təmsil edən “ACWA Power” şirkətinin Azərbaycanın alternativ və bərpa olunan enerji sektorunda fəaliyyətini yüksək qiymətləndiririk.
Beynəlxalq təşkilatlar çərçivəsində səmərəli əməkdaşlığımız və qarşılıqlı dəstəyimiz münasibətlərimizin vacib tərkib hissələrindən biridir.
Əminəm ki, qarşılıqlı etimad və dəstəyə əsaslanan Azərbaycan-Səudiyyə Ərəbistanı tərəfdaşlığının inkişafı yolunda birgə səylərimizi dövlətlərimizin maraqları və xalqlarımızın mənafeləri naminə bundan sonra da ardıcıl şəkildə davam etdirəcəyik.
Bu bayram günündə Sizə möhkəm cansağlığı, işlərinizdə uğurlar, Səudiyyə Ərəbistanının qardaş xalqına daim əmin-amanlıq və firavanlıq arzulayıram”.
Bu dəqiqələrdə yeddinci çağırış Azərbaycan Respublikası Milli Məclisinin ilk iclası keçirilir.
“Yol-xeber.az” xəbər verir ki, Azərbaycan Prezidenti İlham Əliyev iclasda iştirak edir.
Bu gün Milli Məclisin yeni tərkibdə ilk iclası keçiriləcək.
“Qafqazinfo”nun əldə etdiyi məlumata görə, Yeni Azərbaycan Partiyasının sədr müavini Əli Əhmədov Milli Məclis sədrinin müavini postuna namizəd olub. Onun spikerin birinci müavini olacağı bildirilir.
Eyni zamanda, Musa Qasımlı və Rafael Hüseynovun da parlament sədrinin müavini postuna namizədlikləri təsdiqlənib.
Milli Məclisin VI çağırışında sədr müavini olan Fəzail İbrahimli VII çağırışda bu postda olmayacaq.
***
Əldə etdiyimiz digər məlumata görə isə, Milli Məclisin VII çağırışında sədrin birinci müavini və 3 vitse-spiker olacaq. Bununla da müavin sayı artacaq.
Xatırladaq ki, sentyabrın 21-də Konstitusiya Məhkəməsi Plenumunun xüsusi Konstitusiya icraatı üzrə iclasında VII çağırış Milli Məclisə keçirilmiş seçkilərin nəticəsi təsdiqlənib.
Yeni Azərbaycan Partiyasının Milli Məclisin sədri postuna namizədi Sahibə Qafarova olub.
“Report” xəbərinə görə, bu barədə partiyanın yeni seçilmiş deputatlarının iclasında qərar qəbul edilib.
Xatırladaq ki, daha əvvəl Sahibə Qafarova VI çağırış Milli Məclisin sədri olub.
ABŞ Konqresinin Tom Lantos İnsan Hüquqları Komissiyasının Nyu-Yorkda keçirdiyi son dinləmələrdə Azərbaycan haqqında irəli sürülən əsassız ittihamlar bir daha sübut etdi ki, bəzi qərb dairələri, o cümlədən ermənipərəst kongresmenlər vəziyyəti tam təhrif edərək qərəzli mövqelərini nümayiş etdirirlər. Xüsusilə Luiz Moreno Okampo tərəfindən irəli sürülən "Azərbaycanın Ermənistan və Qarabağ ermənilərinə qarşı soyqırım həyata keçirdiyi" iddiası tamamilə məntiqdən uzaq və qərəzli bir yanaşmadır. Okamponun Azərbaycan haqqında verdiyi açıqlamalar reallığı əks etdirmir, əksinə, münaqişənin həlli ilə bağlı beynəlxalq hüququn fundamental prinsiplərinə tamamilə ziddir.
Tom Lantos İnsan Hüquqları Komissiyasının dinləmələrində çıxış edənlər bir daha Azərbaycanı "blokada tətbiq etməklə Qarabağ ermənilərinə qarşı soyqırım törətməkdə" ittiham etdilər. Xüsusilə, komissiyanın həmsədri Kristofer Smit Azərbaycan rəhbərliyini ittiham edərək qeyd etdi ki, "Azərbaycan hökuməti tərəfindən Qarabağ ermənilərinə qarşı soyqırım niyyətləri açıq şəkildə mövcuddur". Belə əsassız və qərəzli bəyanatlar tamamilə məntiqsizdir, çünki bu dinləmələrdə səslənən ittihamların heç biri real faktlarla dəstəklənməyib. Əksinə, Azərbaycan beynəlxalq hüququn çərçivəsində fəaliyyət göstərərək öz suveren ərazilərində sülh və təhlükəsizlik bərqərar etməyə çalışır.
Luiz Moreno Okampo keçmiş Beynəlxalq Cinayət Məhkəməsinin prokuroru olaraq, öz çıxışında "Azərbaycan hökumətinin Qarabağ ermənilərinə qarşı soyqırım niyyəti güddüyünü" iddia etdi. Okampo, blokadanı "soyqırım vasitəsi" kimi təqdim edərək, bu barədə heç bir dəqiq və məntiqi sübut təqdim etmədi. O ermənilərin Qarabağda ərzaq, qaz, elektrik enerjisi və dərmanlardan məhrum olduğunu iddia edir, lakin bunun reallıqla əlaqəsi yoxdur. Azərbaycan hökuməti bölgəyə humanitar yardımın çatdırılması üçün dəfələrlə təkliflər irəli sürüb və beynəlxalq strukturlarla əməkdaşlıq etməyə hazır olduğunu göstərib.
Okamponun iddialarında diqqət çəkən məqam odur ki, o, "bir çox soyqırım halları ölümsüz baş verir" və "Azərbaycanın soyqırım niyyəti heç bir insan itkisinə səbəb olmadan həyata keçirilir" deyərək yeni və tamamilə əsassız bir terminologiyadan istifadə edir. Bu cür ifadələr beynəlxalq hüquqa və soyqırımın mahiyyətinə ziddir. Soyqırım beynəlxalq hüquq çərçivəsində mütəşəkkil və sistematik qətl halları ilə xarakterizə olunur, ancaq Okampo, hər hansı insan itkisi olmadan soyqırım iddiası irəli sürməklə hüquqi çərçivəni tamamilə pozur.
Azərbaycan münaqişə dövründə beynəlxalq hüquqa tam əməl edərək öz ərazilərindəki qanunsuz erməni separatçı strukturlarını aradan qaldırmaq üçün tədbirlər görüb. Bu tədbirlər heç bir halda etnik təmizləmə və ya soyqırım kimi təqdim edilə bilməz. Əksinə, Ermənistanın illərdir həyata keçirdiyi etnik təmizləmə siyasəti nəticəsində Azərbaycan ərazilərindən məcburi köçkün salınan 800 min azərbaycanlının geri qayıtmasına imkan yaratmaq üçün tədbirlər həyata keçirilib. Azərbaycanın məqsədi Qarabağın bütün əhalisinin sülh şəraitində yaşaması və bölgədə təhlükəsizlik və sabitliyin bərpasıdır.
Digər tərəfdən, bu dinləmələrdə Azərbaycan hökumətinin addımları "xristianlıq" və ya "dini qarşıdurma" kimi təqdim olunub. Bu, tamamilə əsassız və zərərli bir yanaşmadır. Azərbaycan sekulyar dövlətdir və onun müxtəlif dinlərə qarşı heç bir ayrı-seçkiliyi yoxdur. Qarabağdakı erməni icması da Azərbaycan vətəndaşıdır və onların hüquqları Azərbaycan Konstitusiyasına uyğun olaraq qorunur. Erməni separatçılarının dini münaqişə kimi təqdim etməyə çalışdığı bu addımlar, sadəcə olaraq, qərəzli bir təbliğatın tərkib hissəsidir.
Tom Lantos İnsan Hüquqları Komissiyasının bu dinləmələri, sadəcə olaraq, ABŞ-Azərbaycan münasibətlərinə zərbə vurmaq məqsədi daşıyan bir tədbirdir. Ermənilərə qulluq edən kongresmenlərin Azərbaycana qarşı apardığı təbliğat kampaniyası, bölgədə sülh və sabitliyin bərqərar olmasına xidmət etmir, əksinə, bölgədə gərginliyi artırır. Azərbaycan hökuməti sülh müqaviləsi üzərində işləməyə hazırdır və bu istiqamətdə bütün beynəlxalq strukturlarla əməkdaşlıq etməyə açıqdır. Ermənistan və onun tərəfdarlarının məntiqsiz ittihamları sülh prosesini ləngitməklə yanaşı, bölgədə uzunmüddətli sabitliyi təhdid edir.
Absurd ittihamlar, həmçinin ABŞ-ın Azərbaycanla münasibətlərinə zərbə vurur və bu ölkənin regiondakı roluna kölgə salır. Dinləmələrdə erməni separatçılarının mövqeləri ilə eyni sırada duran pro-Armenian kongresmenlər, beynəlxalq hüququn prinsiplərini nəzərə almadan, Azərbaycanın suveren hüquqlarını pozan mövqelər nümayiş etdirirlər. Bu cür qərəzli mövqelər nəinki Azərbaycanın beynəlxalq arenadakı mövqeyini zəiflədir, həm də ABŞ-ın regiondakı strateji maraqlarına da zərbə vurur.
Qarabağ münaqişəsi artıq tarixə çevrilib və bölgədə yeni bir reallıq yaranıb. Təxminən dörd il ərzində Azərbaycan öz gücünə arxalanaraq Qarabağ və Şərqi Zəngəzur iqtisadi bölgələrində genişmiqyaslı yenidənqurma və bərpa işləri həyata keçirib. Minlərlə keçmiş məcburi köçkün artıq doğma torpaqlarına geri dönüb. Azərbaycan Prezidenti İlham Əliyevin qeyd etdiyi kimi, "Biz Qarabağı cənnətə çevirəcəyik. Artıq bu torpaqlarda əbədi yaşayacağıq. Heç kim bizi bu torpaqlardan qovmağa qadir olmayacaq. Qarabağ bizimdir! Qarabağ Azərbaycandır!"
Bu bəyanatın ardınca bölgədə stabillik və inkişafın davam etməsi Azərbaycan üçün bir prioritetə çevrilib.
Ancaq dünyanın bəzi gücləri bu yeni reallığı qəbul etmək istəmir və bölgədə baş verən dəyişiklikləri geri qaytarmağa çalışırlar. Həmin güclərin başında isə ABŞ-ın dayandığını qeyd etmək lazımdır. İkiüzlü siyasət aparan Vaşinqton, bir tərəfdən Azərbaycan və Ermənistan arasında sülh çağırışları edərkən, digər tərəfdən Ermənistanı yeni silahlarla təchiz edir və onu növbəti provokasiyalara sövq edir.
Avqust ayının ən diqqət çəkən xəbərlərindən biri ABŞ və Ermənistan arasında gizli hərbi əməkdaşlıqla bağlı məlumatların ortaya çıxmasıdır. Bu xəbərə görə, ABŞ Ermənistanı ən müasir silahlarla təmin etmiş, hətta məhdud sayda hərbi kontingenti Zəngəzurda yerləşdirib. Hələ iyul ayında ABŞ və Ermənistan arasında birgə hərbi təlimlər keçirilmişdi və bu da göstərir ki, Vaşinqton sülh çağırışları edərkən, əslində, Ermənistanı müharibəyə təhrik etməkdədir. Bu siyasətin arxasında duran məqsəd yalnız Ermənistanı hərbi baxımdan gücləndirmək deyil, həm də Azərbaycanı təzyiq altında saxlamaq və bölgədə stabilliyi pozmaqdır.
Buna paralel olaraq, ABŞ siyasi və diplomatik dəstək vasitəsilə də Ermənistanı müdafiə edir. 16 sentyabrda ABŞ dövlət katibi Entoni Blinken Azərbaycan Prezidenti İlham Əliyevə zəng etmiş və sülh prosesinin vacibliyini vurğulayıb. Ancaq bu sözlərin dəyəri ABŞ-ın digər addımlarında öz əksini tapmır. 19 sentyabrda ABŞ Konqresinin Tom Lantos İnsan Hüquqları Komissiyasında "Dağlıq Qarabağın süqutundan sonra Azərbaycanda insan hüquqları" mövzusunda dinləmələr keçirildi. Bu dinləmələrdə Azərbaycan əleyhinə ittihamlar açıq şəkildə səsləndi və bu, Azərbaycanın suverenliyinə və ərazi bütövlüyünə hörmətsizlik kimi qiymətləndirildi.
ABŞ-ın bu siyasətinin ən açıq nümunələrindən biri də separatçı rejimin nümayəndəsi olan Geqam Stepanayanın dinləmələrdə iştirakı idi. O, "Artsax respublikasının ombudsmanı" kimi təqdim olundu və bu, Ermənistanın saxta siyasi qurumlarının legitimləşdirilməsinə xidmət edir. Bu kimi hallarda Azərbaycan əleyhinə əsassız ittihamlar irəli sürülür, lakin Azərbaycana cavab haqqı verilmir. ABŞ-ın bu yanaşması ikili standartların bariz nümunəsidir və bu, bölgədə sülh və stabilliyə ciddi təhdid yaradır.
ABŞ hökuməti eyni zamanda, Ermənistanın separatçılarının Amerika ərazisinə girişini də asanlaşdırır. Məsələn, separatçıların nümayəndələrinə ABŞ vizası verilməsi Dövlət Departamentinin bu prosesdəki birbaşa rolunu göstərir. ABŞ hökuməti separatçı rejimi dəstəkləməklə bölgədə sabitliyi pozmağa və Ermənistanı silahlandırmağa davam edir.
ABŞ-ın Ermənistana hərbi dəstəyi yalnız silah tədarükü ilə məhdudlaşmır. USAID-in Ermənistana yardımını iki dəfə artırması və bu yardımların "demokratik inkişaf" adı altında təklif edilməsi, əslində, Ermənistanın silahlanmasına xidmət edir. ABŞ bu yardımlarla Ermənistanı yeni müharibələrə hazırlayır və onu Azərbaycana qarşı daha da təhrik edir.
Maraqlı məqamlardan biri də OCCRP layihəsi çərçivəsində aparılan araşdırmalardır. Bu araşdırmalarda Azərbaycan əleyhinə yalan məlumatlar yayılır, guya Azərbaycan Qarabağdakı erməni əhalisinə humanitar yardımları əngəlləyir. Bu cür yalanlar Ermənistanın beynəlxalq arenada öz maraqlarını irəli sürməyə çalışdığını göstərir. OCCRP layihəsinin əsas sponsorlarından biri isə USAID-dir ki, bu da ABŞ hökumətinin birbaşa maraqlarının Ermənistanın yanında olduğunu sübut edir.
ABŞ-ın Ermənistan və onun separatçı məqsədlərinə verdiyi dəstək, regionda sabitliyə qarşı ciddi təhdid yaradır. Vaşinqton Cənubi Qafqazda münaqişələrin və gərginliyin davam etməsini istəyir, çünki bu, ABŞ-ın bölgədəki maraqlarına xidmət edir. Ermənistanın silahlandırılması və siyasi dəstəklənməsi isə bu prosesin əsas tərkib hissəsidir.
Belə siyasətin Azərbaycan üçün nə dərəcədə təhlükəli olduğunu 2020-ci il müharibəsindən sonra görmək mümkün oldu. Ermənistan ABŞ və digər Qərb ölkələrinin dəstəyinə arxalanaraq təxribatlar həyata keçirdi və nəticədə ağır hərbi-siyasi zərbələrə məruz qaldı. Azərbaycan öz gücünü və əzmini bir daha sübut etdi və bu reallıq bölgədə sülh və stabilliyin təmin edilməsinin yeganə yoludur.
ABŞ-ın ikiüzlü siyasəti bölgədə gərginliyin və münaqişələrin davam etməsinə səbəb olur. Ermənistanın hərbi baxımdan gücləndirilməsi və separatçılığın dəstəklənməsi ABŞ-ın bölgədə sülh və stabilliyə qarşı açıq təhdididir. Azərbaycan isə öz hüquqlarını qoruyaraq suverenliyini təmin etmək üçün hər zaman hazırdır. Vaşinqtonun sözlərinə inanmaq əvəzinə, Azərbaycan öz gücünə arxalanmalı və bölgədə sülhün bərqərar olmasına davam etməlidir.Elçin Alıoğlu - Trend