 |
|
Zabrat, Maştağa istiqamətində xaos hökm sürür
Bakının Sabunçu rayonu, Zabrat yolundan sürücülər şikayətçidir. Avtosfer.az xəbər verir ki, Sabunçu körpüsündən düşən zaman yolun başlanğıcında xaos yaşanır. Belə ki, dayanacağı zəbt edən taksi sürücüləri avtomobuları yolun hərəkət hissəsində saxlamağa məcbur edir. Nəticədə də ərazidə sıxlıq yaranır.
Qeyd edək ki, Zabrat, Maştağa, Kürdəxanı, Ramanı Sovxoz istiqamətlərinə gedən sürücülər bundan əziyyət çəkirlər. Xüsusilə günün pik saatlarında bu problem yaşanır. 300 metrlik ərazini sürücülər çətinlikıə keçir. Nəticədə körpünün üstündə tıxac yaranır. Ərazidən çəkilmiş görüntüləri təqdim edirik:
Həm təhlükə, həm də tıxac yaranır
Astara rayonunda yaranmış xaosla bağlı sakinlər Avtosfer.az-a şikayət ünvanlayıblar. Belə ki, Astara rayonu (köhnə Bakı-Astara yolu) Pensər kəndinin "dördyol" kimi tanınan ərazisində sürücülər həm maneə, həm də təhlükə ilə üzləşirlər. Videodan aydın şəkildə görünür ki, yolun kənarında taksi sürücüləri avtomobili qanunsuz olaraq, pərakəndə halda park ediblər. Həmçinin küçə ticarəti ilə məşğul olanlar yolu kəsiblər. Alış-veriş edən şəxslər isə avtomobillərinin yolun hərəkət olan hissəsində park edərək gediş-gəlişə mane olur. Lakin bu problemi bağlı mübarizə aparılmır.
Sakinlər həmin ərazidə normal və təhlükəsiz hərəkətin bərpa olunmasını xahiş edir. Videonu təqdim edirik:
Sürücülər təhlükəsizlik adacığına çıxır, lakin polis onları saxlamır
Bakı-Dairəvi yolunda qəribə mənzərə baş verir. Qayda pozan sürücülər cərimələnmir, qayda pozmayanlar isə yol polisi tərəfindən saxlanılır. Avtosfer.az-ın təqdim etdiyi ilk görüntüdə “Avtomobil Bazarı” istiqmətinə gedən yolda sürücülər həm yolun hərəkət hissəsində yerləşmə qaydasını pozurlar, həm də təhlükəsizlik adacığına çıxırlar. Lakin yol polisi sürücülərin heç birini saxlamır.
İkinci videogörüntüdə isə sürücü heç kimə mane olmadan qaydalar çərçivəsində hərəkət edir, lakin yol yol polisi həmin sürücüyə saxla əmri verir.
Görüntüləri sizə təqdim edirik!
Bakı Dövlət Universitetinin (BDU) 100 illik yubileyi münasibətilə başlanan mədəni-kütləvi tədbirlər çərçivəsində "Aşıq Şəmşir" Mədəniyyat Ocağı İctimai Birliyinin təşkilatçılığı ilə "Ulu öndər Heydər Əliyev - Bakı Dövlət Universitetinin dünya şöhrətli məzunu” mövzusunda məqalə müsabiqəsinin yekunlarına həsr olunmuş mərasim keçirilib.
"Report" xəbər verir ki, tədbiri giriş sözü ilə açan rektor Elçin Babayev ümummilli lider Heydər Əliyev şəxsiyyətinin Azərbaycan üçün əhəmiyyətindən danışıb. Müasir Azərbaycanın öz varlığı ilə ulu öndərə borclu olduğunu bildirən rektor vurğulayıb ki, ümummilli liderin xidmətləri sayəsində Azərbaycanda müstəqillik əbədi və dönməz xarakter alıb, dövlətçilik möhkəmlənib, iqtisadi inkişaf üçün güclü təməl yaradılıb, elm və milli təhsil sistemi müasirləşdirilib, fəal maarifçilik kursu həyata keçirilib.
Rektor həmçinin "Aşıq Şəmşir" Mədəniyyət Ocağı İctimai Birliyinin həyata keçirdiyi işlərdən söz açıb. Bildirib ki, İctimai Birliyin gördüyü işlər təqdirəlayiqdir:
“Mən hər zaman vurğulamışam ki, belə tədbirlərimiz davamlı olmalıdır. İctimai Birliyin növbəti tədbirlərindən biri də ümummilli lider Heydər Əliyevə həsr olunub. Çünki Heydər Əliyev BDU-nun məzunu olub, biz də bununla qürur duyuruq. Qaliblərin mükafatlandırılması mərasiminin BDU-da keçirilməsi rəmzi məna daşıyır. Biz gələcəkdə də "Aşıq Şəmşir" Mədəniyyət Ocağı İctimai Birliyi ilə birlikdə tədbirlər keçirəcəyik".
E.Babayev Heydər Əliyevin BDU-nun ən görkəmli, dünya şöhrətli məzunu olduğunu xüsusi vurğulayıb və bu mövzuda məqalə müsabiqəsinin keçirilməsini yüksək dəyərləndirib, müsabiqə qaliblərini təbrik edib.
Sonra xalq şairi Nəriman Həsənzadə Heydər Əliyevin həyat və faəliyyəti barədə tədbir iştirakçılarına geniş məlumat verib, ümummilli liderin Azərbaycan dövlətinin və xalqının taleyində müstəsna xidmətlərindən bəhs edib. O, Heydər Əliyevlə bağlı xatirələrini bölüşüb.
Müsabiqənin Təşkilat Komitəsinin rəhbəri, BDU-nun dosenti Ələmdar Cabbarlı müsabiqənin yekunları haqqında məlumat verib: "Bizim təşkilatımızın təməl prinsiplərindən birincisi ulu öndər Heydər Əliyevin siyasətinin təbliği və onun irsinin gənclərə aşılanmasıdır. Bu məqsədlə biz onlarla kitab çap etmişik. Ölkə daxilində və xaricdə müxtəlif tədbirlər keçirmişik. Hazırda keçirdiyimiz tədbir də bu tədbirlərin davamıdır. Biz düşündük ki, Bakı Dövlət Universitetinin 100 illik yubileyində universitetin dünya şöhrətli məzununa həsr olunmuş bir müsabiqə təşkil edək. Müsabiqəyə noyabrın 30-dan start verilib. 10 gündə 102 nəfərin məqaləsi təşkilat komitəsinə daxil olub. Bu, böyük bir rəqəmdir. Bu həm də gənclərin marağının göstəricisidir. 102 müsabiqə iştirakçısından 6 nəfəri qalib seçilib. 3 nəfərə həvəsləndirici mükafata layiq görülür. Qaliblərə mükafatları təqdim olunacaq”.
Tədbirin sonunda "Aşıq Şəmşir" Mədəniyyət Ocağı İctimai Birliyinin sədr müavini Həbib Misirov tədbirin keçirilməsinə yaratdıqları şəraitə görə universitet rəhbərliyinə təşəkkürünü bildirib, müsabiqə qaliblərini və eyni zamanda BDU-nun professor-müəllim və tələbə heyətini 100 illik yubiley münasibətilə İctimai Birliyin sədri Qənbər Şəmşiroğlunun adından təbrik edib: "Aşıq Şəmşir" Mədəniyyət Ocağı İctimai Birliyinin və Kəlbəcər ictimaiyyəti adından Elçin Babayevə təşəkkürümü bildirirəm. Bu günə qədər 900-ə yaxın layihə və tədbirlər həyata keçirmişik. Ölkəmizin milli-mənəvi dəyərlərinin, incəsənətimizin təbliği, görkəmli şəxslərin yaradıcılıqlarının və irsinin öyrənilməsi, eyni zamanda, ümummilli lider Heydər Əliyev irsinin gənc nəsilə aşılanması istiqamətində tədbirlər həyata keçirilib”.
Sonda müsabiqənin qalibləri elan olunub. Qaliblərə "Aşıq Şəmşir" Mədəniyyət Ocağı İctimai Birliyi tərəfindən diplom, pul mükafatı və digər hədiyyələr təqdim olunub.
Vaqif Əsədov: "Sürücülər başa düşməlidir ki, qayda pozmaqla ilk növbədə özlərinə ziyan vururlar"
Bakı Şəhər Dövlət Yol Polisi İdarəsinin şöbə rəisi, polis polkovniki Vaqif Əsədovun təşəbbüsü ilə Sumqayıt Texnologiyalar Parkında yol polisi əməkdaşları ilə sürücülərin görüşü keçirilib. Yol-xeber.az xəbər verir ki, tədbirdə Baş Dövlət Yol Polisi İdarəsinin, Bakı Şəhər Baş Polis İdarəsinin, o cümlədən Sumqayıt Texnologiyalar Parkının rəsmiləri, sürücülər iştirak ediblər.
Bildirilib ki, Sumqayıt Texnologiyalar Parkında həm yük, həm avtobus, həm də minik maşınları fəaliyyət göstərir.
Bakı Şəhər Dövlət Yol Polisi İdarəsinin şöbə rəisi, polis polkovniki Vaqif Əsədov qeyd edib ki, görüş Prezident İlham Əliyev tərəfindən imzalanmış "Yol Hərəkəti Təhlükəsizliyinə dair" 2019-2023-cü illəri əhatə edən Dövlət Proqramının icrası çərçivəsində baş tutur. Əsas məqsəd yol hərəkəti qaydalarına əməl etməyin vacibliyinin sürücü və piyadalar arasında təbliğ edilməsi, o cümlədən baş verə biləcək qəzaların qarşısının alınmasıdır. Şöbə rəisi onu da əlavə edib ki, bu gün maarifləndirmə işləri inzibati tədbirlərdən daha çox faydalıdır. "Sürücülər özləri başa düşməlidir ki, qayda pozmaqla ilk növbədə öz sağlamlıqlarına, ailələrinə, yaxınlarına ziyan vururlar. Həmçinin yolu keçən piyadalar da anlamalıdır ki, sürücü hər zaman ona yol verməyəcək. Bəzən sükan arxasında sərxoş sürücü ola bilər. Yaxud da elə həmin an sürücü yuxulaya, yaxud avtomobildə texniki nasazlıq yarana bilər. Nəticədə piyada həyatını itirəcək."
Tədbir sürücüləri maraqlandıran sualların cavablandırılması ilə davam edib.
Hazırda cinayət işi üzrə istintaq tədbirləri davam etdirilir
Beyləqanda həbs edilən Qarabağ qazisi azadlığa buraxılıb.
Bu barədə APA-ya Daxili İşlər Nazirliyinin mətbuat xidmətindən bildirilib.
Qeyd olunub ki, Daxili İşlər naziri general-polkovnik Vilayət Eyvazov xuliqanlıq ittihamı ilə həbs edilən ehtiyatda olan polkovnik Qadir Vəlişova qarşı humanist addım atıb.
Belə ki, V.Eyvazovun göstərişi ilə Q.Vəlişov torpaqlarımızın müdafiəsi uğrunda gedən döyüşlərdəki iştirakı nəzərə alınaraq həbsdən azad edilib və istintaq müddətində polisin nəzarətinə verilib.
Qeyd edək ki, Beyləqan rayonunun Kəbirli kənd sakini İrfanə Eminova və əri İbrahim Alıyevin şikayəti əsasında həbs edilib. O, Cinayət Məcəlləsinin 221.3-cü (xuliqanlıq əməlinin silahdan və ya silah qismində istifadə olunan əşyalardan istifadə edilməklə törədilməsi, zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunduqda) maddəsi ilə təqsirli bilinir.
Hazırda cinayət işi üzrə istintaq tədbirləri davam etdirilir.
Hazırda isə ərazidə təmir-bərpa işlərinin başlanılması üçün hazırlıq işləri görülür
Bibiheybət yolu ilə bağlı yekun plan hazırdır. Yol-xeber.azın Xezerxeber.az-a istinadən məlumatına görə, paytaxtın cənub girişindəki yolda təmir-bərpa işlərinin hansı istiqamətdə aparılacağı bəlli olub. Söhbət bir müddət əvvəl çökən Bibiheybət yolundan gedir. Bibiheybət məscidi istiqamətində olan yolda baş verən çökmənin qarşısını almaq məqsədi ilə geoloji-kəşfiyyat işləri aparılıb. Geoloji-kəşfiyyat işlərinin nəticələri ilə bağlı hesabat formalaşdırılıb. Hesabat əsasında Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi, Avtomobil Yolları Dövlət Agentliyinin "Azəryolelmitədqiqatlayihə” İnstitutunun və xarici mütəxəssislərin iştirakı ilə yolda aparılacaq bərkitmə işləri ilə bağlı layihə hazırlanıb. Bununla yanaşı yağış və qrunt sularının axıdılması üçün yeni drenaj sistemi yaradılacaq. İstinad divarlarında su axınını təmin etmək üçün eninə istiqamətdə boruların atılması nəzərdə tutulur. Hazırda isə ərazidə təmir-bərpa işlərinin başlanılması üçün hazırlıq işləri görülür.
Məktəblilər maraqlı çıxışlar edib
Məktəblilərin və uşaqların yollarda təhlükəsizliyinin təmin olunması məqsədilə Sumqayıt şəhər Nizami Gəncəvi adına Texniki və təbiət elmləri liseyində tədbir keçirilib. Avtosfer.az xəbər verir ki, Sumqayıt Şəhər Dövlət Yol Polisi Şöbəsinin inspektoru Fərid İldırımzadə, 1-ci polis bölməsinin inspektoru Vüsal Tahirov, məktəb rəhbərliyi, şagirdlər və valideynlərin iştirakı ilə keçirilən tədbirdə bildirilib ki, Prezident İlham Əliyevin sərəncamı ilə təsdiq edilən Azərbaycanda yol hərəkəti təhlükəsizliyinə dair 2019-2023-cü il Dövlət Proqramına uyğun olaraq məktəblilərə yol hərəkəti qaydalarını izah etmək, yol hərəkəti təhlükəsizliyini aşılamaq öz əksini tapıb. Tədbirdə piyada keçidindən pərakəndə keçən şagirdlər maarifləndirilib, onların bu keçidlərdən istifadə etməsinin zəruriliyi qeyd olunub. Bildirilib ki, şagirdlərə bu istiqamətdə müəllimlər, valideynlər də məlumat verməlidir. Bu həm piyadaların, həm də sürücülərin təhlükəsizliyi üçün vacibdir.
Daxili işlər orqanlarında növbəti kadr dəyişiklik olub.
Oxu.az bildirir ki, bu barədə müvafiq əmri Daxili İşlər naziri, general-polkovnik Vilayət Eyvazov imzalayıb. Əmrə görə, Daxili İşlər Nazirliyinin mətbuat xidmətinin rəis müavini, polis polkovniki Orxan Mansurzadə tutduğu vəzifədən azad edilib.
Nazirin digər əmrinə əsasən, o, DİN-in Yasamal Rayon Polis İdarəsi rəisinin şəxsi heyətlə iş üzrə köməkçisi vəzifəsinə təyinat alıb.
Baş Dövlət Yol Polisi İdarəsi piyadalar üçün 100-ə yaxın məlumatverici lövhələr hazırlayıb
Hər gün ölkədə yol-nəqliyyat hadisələri haqda informasiyalar oxuyuruq. Təssüf ki, bunların əksəriyyəti acı sonluqla bitir. Bu qəzaların bir çoxu piyadaların iştirakı ilə yaşanır. Verilən məlumata əsasən, ölkə yollarında bu ilin 11 ayı ərzində baş vermiş yol qəzalarının 60 faizi piyadaların vurulması ilə nəticələnib. Belə hadisələrin qarşısının alınması istiqamətində Baş Dövlət Yol Polisi İdarəsi (BDYPİ) piyadalar üçün 100-ə yaxın məlumatverici lövhələr hazırlayıb. Sözügedən belə lövhələrin hazırlanmasında iştirak edən yol hərəkəti üzrə ekspert Elməddin Muradlı Mediapost.az-a açıqlama verib.
O bildirib ki, nişanlarla bağlı ideya Baş Dövlət Yol Polisi İdarəsi tərəfindən irəli sürülüb və bu model Rusiya təcrübəsindən götürülüb: “Bu, Rusiyada bir az fərqli formadadır, biz də onu Baş Dövlət Yol Polisi İdarəsinin rəisi, general mayor Ramiz Zeynalovun tövsiyəsi əsasında özümüzə uyğun formaya saldıq. Bu nişanlar sürücülərə xəbərdarlıq edir ki, 200, 300 metr qabaqda piyada ola bilər. Çünki bizim piyadalarımızın əksəriyyəti keçidlərlə yanaşı, onların yaxınlığından yolu keçirlər. Ona görə də biz həmin məsafələri qoymuşuq ki, sürücülərimiz diqqətli olsun. İnanıram ki, bu yenilik sürücülərin maarifləndirilməsi üçün faydalı olacaq. Lakin bununla paralel digər adımlar da atmaq lazımdır. Bu bir gerçəklikdir ki, son zamanlar piyadaların vurulması ilə nəticələnən yol qəza hadisələrinin sayı artıb. Burada diqqət edilməli bir neçə məqam var. Onlardan biri də yolların işıqlandırılması ilə bağlıdır. İşıqlandırmanın yaxşı vəziyyətdə olmaması və ya ümumiyyətlə yoxluğu səbəbindən piyadaların vurulması halları ilə də qarşılaşırıq. Bunu nəzərə alaraq hazırda Nəvai postundan Kürdəmir rayonu ərazisinə qədər bir neçə kənddə Baş Dövlət Yol İdarəsinin Yol Patrul xidməti alayının təşəbbüsü ilə Azərbaycan Avtomobil Yolları Dövlət Agentliyi tərəfindən yolların işıqlandırılması təmin edilib. Həmin ərazidə işıqlandırma yaxşı vəziyyətdə olmadığı üçün tez-tez piyadaların vurulması hallarına rast gəlinirdi. Özüm də gördüm ki, artıq o yolda vəziyyət yaxşılığa doğru gedir və çox istərdim ki, bütün yollarımız bu cür işıqlandırılsın. Yolların işıqlandırılması sürücülər və piyadalar üçün çox faydalıdır. Əgər yollar tam işıqlandırılsa, mən sizi tam əmin edirəm ki, qaranlıq vaxtı baş verən yol nəqliyyat hadisələri 50 faizi azala bilər”.
Ekspert piyadaların vurulması ilə nəticələnən yol qəza hadisələrində piyadaların da böyük günahı olduğunu qeyd edib:
“Bir çox hallarda qəza vəziyyəti piyadaların məsuliyyətsizliyi səbəbindən baş verir. Bəzən onlar yolun təyin olunmamış hissəsindən keçirlər, piyada keçidlərindən düzgün istifadə etmirlər. Bir nüansı da qeyd edim, bəzi ərazilər - məsələn, İnşaatçılar prospekti, Mir Cəlal küçəsi burada piyada keçidləri silinsə də, izi qalıb və piyadalar da həmin keçidlərdən istifadə edirlər. Bu da çox təhlükəli bir vəziyyət yaradır. Qeyd edim ki, yolların işıqlandırılması ilə yanaşı, piyada keçidlərinin də işıqlandırılması məsələsi zəruridir”.
Elməddin Muradlı bu cür yol qəzalarının baş verməsində aidiyyatı qurumların da məsuliyyətsizlyinin rolu olduğunu əlavə edib:
“Burada başqa bir problem keçidlər arasında məsafələrin düzgün qoyulmamasıdır. Məsələn, Yusif Səfərov küçəsi 2 kilomatrlik bir məsafədir, orada ən azı 3 piyada keçidi olmalıdır, amma biri var. Qanundan göstərilir ki, yaşayış məntəqələrində 150-300 km məsafədə piyada keçidi olmalıdır, yaşayış məntəqələrindən kənarda isə 700 m-dən bir keçdi olmalıdır, lakin yoxdur. Piyadaları da başa düşürəm ki, onlar hansısa formada evlərinə getməlidir, bu zaman təhlükəli yollardan keçməli olurlar. Bu da bəzən onların həyatı bahasına başa gəlir. Səbəb isə aidiyyatı qurumların məsuliyyətsizliyi, vaxtında müşahidələr aparıb insanların daha çox istifadə etdiyi ərazilərdə keçid quraşdırmamasıdır”.