 |
|
Azərbaycan Milli Məclisinin Müdafiə, təhlükəsizlik və korrupsiya ilə mübarizə komitəsinin iclası keçirilib.
Report xəbər verir ki, Milli Məclis sədrinin birinci müavini, komitənin sədri Ziyafət Əsgərov gündəlikdəki məsələlər barədə məlumat verib.
O xatırladıb ki, 2018-ci ilin avqustunda Xəzəryanı ölkələr arasında Xəzər dənizinin statusu ilə bağlı böyük tarixi əhəmiyyətə malik olan Konvensiya imzalanıb: “Bununla əlaqədar iyirmi ildən çox danışıqlar gedib, işlər görülüb. Bu, bizim üçün tarixi qələbədir. Bu, Azərbaycan Prezidenti İlham Əliyevin xarici siyasətinin qələbəsidir”.
Qeyd edilib ki, “2010-cu il 18 noyabr tarixli “Xəzər dənizində təhlükəsizlik sahəsində əməkdaşlıq haqqında” Sazişə Xəzər dənizində mütəşəkkil cinayətkarlıqla mübarizədə əməkdaşlıq üzrə” Protokolun təsdiq edilməsi haqqında”, “2010-cu il 18 noyabr tarixli “Xəzər dənizində təhlükəsizlik sahəsində əməkdaşlıq haqqında” Sazişə Xəzər dənizində terrorçuluqla mübarizədə əməkdaşlıq üzrə” Protokolun təsdiq edilməsi haqqında”, “2010-cu il 18 noyabr tarixli “Xəzər dənizində təhlükəsizlik sahəsində əməkdaşlıq haqqında” Sazişə Sərhəd orqanları arasında əməkdaşlıq və qarşılıqlı fəaliyyət üzrə” Protokolun təsdiq edilməsi haqqında” və “Xəzər dənizində insidentlərin qarşısının alınması haqqında” Sazişin təsdiq edilməsi barədə” qanun layihələri Azərbaycanın milli maraqlarına cavab verir və Konvensiyanın imzalanmasından sonra Xəzərin statusundan irəli gələn məsələləri özündə əks etdirir.
“Hərbi vəzifə və hərbi xidmət haqqında”, “Həbs yerlərində saxlanılan şəxslərin hüquq və azadlıqlarının təmin edilməsi haqqında” qanunlarda, Cəzaların İcrası və İnzibati Xətalar məcəllələrində dəyişiklik edilməsi barədə qanun layihəsini birinci oxunuşda təqdim edən Z.Əsgərov bildirib ki, təklif olunan dəyişikliklər redaktə xarakterlidir.
Deputatlar təklif olunan dəyişikliklərlə bağlı fikir mübadiləsi aparıblar.
Azərbaycan ərazisində növbəti iki gündə müşahidə olunacaq hava proqnozu açıqlanıb.
Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun direktoru Gülşad Məmmədova Report-a açıqlamasında bildirib ki, növbəti günlərdə ölkə ərazisində hava şəraitinin sabit, gün ərzində əsasən yağmursuz keçəcəyi gözlənilir:
“Gecə və səhər bəzi yerlərdə duman, çiskin olacaq”.
Onun sözlərinə görə, mülayim şimal küləyi gündüz saatlarında cənub küləyi ilə əvəz olunacaq: “Havanın temperaturu paytaxtda günorta saatlarında 7-9, bölgələrdə 9-14, dağlıq ərazilərdə 3-7 dərəcə isti olacaq”.
Bakı şəhərindəki uşaq bağçalarında qızılca və A (H1N1) virusuna (donuz qripi) yoluxma faktı qeydə alınmayıb.
Bu barədə Report-a Bakı Şəhər İcra Hakimiyyətinin (BŞİH) tabeliyində olan Məktəbəqədər Təhsil Müəssisələri və Uşaq Evləri İdarəsindən bildirilib.
Qeyd olunub ki, bununla bağlı mütəmadi profilaktik tədbirlər görülür.
Bolqarıstanın Baş naziri Boyko Borisov mart ayında Bakıya gələcək.
Trend-in məlumatına görə, o, martın 14-16-da Nizami Gəncəvi Beynəlxalq Mərkəzinin təşkilatçılığı ilə keçiriləcək VII Qlobal Bakı forumunda iştirak edəcək.
Qeyd edək ki, Boyko Borisov Nizami Gəncəvi Beynəlxalq Mərkəzinin ötən il Nyu Yorkda keçirilən keçirilən toplantısında da iştirak edib. Nizami Gəncəvi Beynəlxlalq Mərkəzinin Bolqarıstanın siyasi elitasının bir sıra nüfuzlu nümayəndəlri ilə yaxş əlaqələri var. Bolqarıstanın üç sabiq prezidenti – Petar Stoyanov, Geroge Pervanov və Roşen Pnevneliyev Mərkəzin üzvləridir.
Xatırladaq ki, VII Qlobal Bakı forumunda dünyanın 70-dən çox ölkəsindən 450 qonağın iştirakı gözlənilir. Builki forumunun mövzusu “Dünyanın yeni xarici siyasəti” olacaq. Tədbirə bir sıra ölkələrin hazırkı dövlət və hökumət başçılarının da qatılması gözlənilir.
Azərbaycanın Kəlbəcər rayonunda zəlzələ baş verib.
Respublika Seysmoloji Xidmət Mərkəzindən Axar.az-a verilən məlumata görə, yerli vaxtla saat 04:30-da qeydə alınmış yeraltı təkanların gücü 3,3 bal olub.
Zəlzələnin ocağı 11 kilometr dərinlikdə yerləşib.
Fevralın 5-də, saat 12:00-da Gürcüstan Parlamentinin qarşısında Abxaziyanın və Qarabağın işğalında iştirak etmiş separatcı erməni Mixail Avaqyana Axalkalakidə abidə qoyulmasına qarşı etiraz aksiyası keçiriləcək.
Axar.az xəbər verir ki, bununla bağlı sosial şəbəkələrdə məlumat yayılıb. Aksiyada “Təxribatçılar, əlinizi Gürcüstan-Azərbaycan dostluğundan çəkin!”, “Separatçı Mixail Avaqyanın büstü götürülsün!”, “Gürcüstan və Azərbaycanın ərazi bütövlüyü müzakirə predmeti deyil!”, “Separatçılığa və separatçılara YOX!”, “Gürcüstan-Azərbaycan dostluğu sarsılmazdır, əbədidir!” şüarlarının səsləndirilməsi nəzərdə tutulub.
Qeyd edək ki, 20 yanvar 2019-cu ildə Gürcüstanın Axalkalaki rayonunun Buqaşen kəndində Abxaziya və Qarabağın işğalında iştirak etmiş, Xocalı Soyqırımını törədən cinayətkarlardan olan separatcı Mixail Avaqyana abidə ucaldılıb. Belə bir şəxsə Gürcüstanda abidə qoyulması həm ölkə daxilində gərginliyin yaranmasına, həm də dost və qardaş ölkə Azərbaycanla münasibətlərin pozulmasına zəmin yaradır.
Ermənilər istisna olmaqla, milli dini və siyasi mənsubiyyətindən asılı olmayaraq, əksər Gürcüstan vətəndaşı separatçılığı kəskin pisləyərək, M.Avaqyanın büstünün götürülməsini tələb edirlər. Gürcüstanın azərbaycanlı icmasının fəalları da bu hadisədən ciddi narahatlıq keçirdiklərini deyirlər. Soydaşlarımız Gürcüstan-Azərbaycan dostluğunun möhkəmlənməsi üçün bundan sonra da var gücləriylə çalışacaqlarını, amma Gürcüstanın ərazi bütövlüyünə qarşı vuruşmuş bir separatçıya abidə qoyulmasını qəbul etmədiklərini bildirirlər.
.jpg)
Bakının Tiflis prospektində 4 mərtəbəli villa satışa çıxarılıb.
Axar.az xəbər verir ki, ümumi sahəsi 3500 kvadrat metr olan tikili tam təmirli deyil. Vasitəçi tərəfindən satışa çıxarılan obyektin 80 faizi təmir edilib.
Yaşayış üçün tikilən villanın 2 lifti də var.
Əmlak 7 milyon manata satışa çıxarılıb.
.jpg)
.jpg)
Gömrükçülər köhnə model avtobusun yeni model ilə dəyişdirilərək ölkəyə qanunsuz gətirilməsinin qarşısını alıb.
Dövlət Gömrük Komitəsinin mətbuat və ictimaiyyətlə əlaqələr idarəsindən Axar.az-a bildirilib ki, Aksizli Mallar üzrə Baş Gömrük İdarəsinin Əməliyyat və Təhqiqat şöbəsinə daxil olan məlumata əsasən Azərbaycan vətəndaşı Tofik İlyasovun idarə etdiyi avtobus gömrükçülər tərəfindən saxlanılıb və idarənin dayanacağına gətirilən nəqliyyat vasitəsinə gömrük baxışı keçirilib. Baxış zamanı avtobusun üzərindəki metal lövhə və ban nömrəsinin kustar üsulla vurulması şübhə yaradıb. İlkin araşdırma zamanı məlum olub ki, T.İlyasovun idarə etdiyi 2006-cı il buraxılışlı, “NEOPLAN” markalı, 806698 şassi nömrəli 99KN983 dövlət nömrə nişanlı avtobus Şəmsəddin Qasımov adlı başqa bir şəxs tərəfindən idarə edilərək Gürcüstana aparılıb. Daha sonra Ş.Qasımov idarə etdiyi həmin sərnişin avtobus ilə eynilik təşkil etməyən, ağ rəngli “NEOPLAN” markalı yeni model başqa nəqliyyat vasitəsini “Mazımçay” gömrük postundan keçirməklə Azərbaycana gətirib. O, sərnişin avtobusunu yeni modeli ilə əvəz edib gətirərkən idarə etdiyi nəqliyyat vasitəsini yenə də əvvəlki - 99KN983 dövlət nömrə nişanı altında keçirib.
Azərbaycan Respublikası Ədliyyə Nazirliyi Məhkəmə Ekspertizası Mərkəzinin ekspert arayışına əsasən müəyyən edilib ki, “NEOPLAN” markalı avtobusun 806698 rəqəmlərdən ibarət şassi nömrəsi kustar üsulla həkk olunub.
Faktla bağlı araşdırma aparılır.
Ermənistanda "super baş nazir" sisteminin saxlanılması qəbuledilməzdir.
Axar.az xəbər verir ki, bunu İşıqlı Ermənistan Partiyasının parlament fraksiyasının rəhbəri Gevork Qorqisyan deyib. Onun sözlərinə görə, güc strukturlarının baş nazirin tabeliyi altında olması doğru deyil:
“Əgər güc strukturları baş nazirin rəhbərliyi altında qalsa, bu, faktiki olaraq onların parlamentə tabe olmaması deməkdir. Ermənistan referendum yoluyla artıq parlament idarəçilik sisteminə keçib. Belə ki, Nikol Paşinyan bir il əvvələ qədər bu sistemi problem olaraq görürdü. İndi onlardan soruşmaq lazımdır ki, bu dövr ərzində onları özlərindən əvvəlkilərin mövqeyini qorumağa məcbur edən hansı dəyişiklik olub?"
ABŞ-ın Pensilvaniya Universitetinin dünyanın aparıcı beyin mərkəzlərinin reytinqi ilə bağlı hazırladığı beynəlxalq hesabat dünən BMT-nin Nyu Yorkdakı mənzil qərargahında təqdim edilib.
Axar.az xəbər verir ki, hesabatın təqdimatı dünyanın 100-dən artıq ölkəsində, beynəlxalq maliyyə qurumları və Dünya Bankında da təşkil edilib.
Qlobal reytinqlər müəyyənləşdirilən zaman dünyanın 182 ölkəsini təmsil edən 6545 beyin mərkəzi arasında sorğu keçirilib və sorğunun nəticələri 1500 ekspert tərəfindən qiymətləndirilib.
Beynəlxalq qiymətləndirmədə İqtisadi və Sosial İnkişaf Mərkəzi (CESD) Cənubi Qafqaz və Orta Asiyanın ən güclü beyin mərkəzi seçilib.
CESD hesabatda əksər kateqoriyalar üzrə dünyanın aparıcı beyin mərkəzləri siyahısına daxil edilib.
İqtisadçı alim Vüqar Bayramovun sözlərinə görə, CESD artıq 8 ildir ki, Cənubi Qafqaz və Orta Asiya regionunda ən güclü beyin mərkəzi statusunu qoruyub saxlayıb:
“Hələlik dünyada yeganə qlobal qiymətləndirmədə və kifayət qədər nüfuzlu beynəlxalq hesabatda regionun aparıcı beyin mərkəzinin Azərbaycan təşkilatı olması sevindirici olmaqla yanaşı, eləcə də mərkəzimizin regional elmi və praktik tədqiqatlara töhfəsinin səviyyəsini göstərir. CESD regionun top beyin mərkəzi olmaq üçün Cənubi Qafqazın 3, Orta Asiyanın 5 ölkəsini, eləcə də Əfqanıstanı təmsil edən təşkilatlarla rəqabət aparıb. CESD sözügeden hesabatda 23 kateqoriya üzrə dünyanın ən aparıcı beyin mərkəzləri siyahısına daxil edilib. Eyni zamanda, təşkilatımız illik büdcəsi 5 milyon dollardan az olan beyin mərkəzləri arasında dünyada 4-cü olmaqla yanaşı, dünyanın 10 ən yaxşı idarə olunan beyin mərkəzidir. Biz qlobal enerji və resurs siyasəti üzrə də ilk 15-likdə yer almışıq”.