 |
|
Azərbaycanda sabaha gözlənilən hava şəraiti açıqlanıb.
Ekologiya və Təbii Sərvətlər Nazirliyinin Milli Hidrometeorologiya Departamentindən Axar.az-a verilən məlumata görə, Bakıda və Abşeron yarımadasında fevralın 2-də havanın dəyişkən buludlu olacağı, arabir tutulacağı, gecə və səhər bəzi yerlərdə duman, çiskin olacağı, axşama doğru isə yağış yağacağı gözlənilir. Şimal-qərb küləyi gündüz arabir güclənəcək.
Havanın temperaturu Bakıda və Abşeron yarımadasında gecə 2-5, gündüz 7-9 dərəcə isti təşkil edəcək.
Atmosfer təzyiqi 762 mm civə sütunundan 767 mm civə sütununa yüksələcək. Nisbi rütubət 70-80 faiz olacaq.
Azərbaycanın rayonlarında fevralın 2-də bəzi yerlərdə arabir yağış yağacağı gözlənilir. Ayrı-ayrı yerlərdə intensiv olacağı, dağlıq ərazilərdə qar yağacağı ehtimalı var. Bəzi yerlərdə duman olacaq. Qərb küləyi ayrı-ayrı yerlərdə arabir güclənəcək.
Havanın temperaturu gecə 0-5, gündüz 7-11 dərəcə isti, dağlarda gecə 2 dərəcə şaxtadan 3 dərəcəyədək isti, gündüz 3-6 dərəcə isti təşkil edəcək.
Tibbi-meteoroloji proqnoza görə, fevralın 2-3-də Abşeron yarımadasında meteoroloji amillərin mülayim tərəddüdü meteohəssas insanlar üçün əsasən əlverişlidir.
Bakı metrosunda əlil və sağlamlığı məhdud insanlar üçün layihəyə başlanılıb.
“Bakı Metropoliteni” QSC-nin mətbuat katibliyindən Axar.az-a bildirilib ki, ötən ilin sentyabr ayında elan edilən və QSC-nin sosial əhəmiyyəti mühüm layihəsinin həyata keçirilməsi istiqamətində ilk mühüm addımların atılmasına başlanılıb. Bu layihəyə görə, əlillərin və sağlamlığı məhdud insanların metropolitendən təhlükəsiz və rahat istifadə imkanları artırılaraq bu nəqliyyat vasitəsində onların imkanlarını məhdudlaşdıran maneələr aradan qaldırılacaq. Məqsəd isə sosial ədalət prinsiplərinin tam təmin edilərək, digər kateqoriyalardan olan sağlamlığı məhdud, ələlxüsus əlil arabaları ilə hərəkət edən insanların metropolitendən istifadə edə bilməsini təmin etməkdir.
Hazırda Bakı metrosunda əlil arabaları ilə hərəkət etmək çox çətindir. Bu səbəbdən xüsusi işçi qrup yaradılaraq vəziyyət təhlil olunub, araşdırma və müzakirələrin aparılaraq beynəlxalq təcrübə, müasir texnologiyaların tətbiqi imkanları öyrənilib. Aparılan araşdırmalar zamanı əlil arabası ilə hərəkət edən şəxslərin də metropoliten işçilərinin və xüsusi avadanlıqların köməyi ilə metrodan istifadə etməsinin mümkünlüyü müəyyən olunub.
Ötən müddət ərzində layihənin həyata keçirilməsi üçün bir sıra texniki məsələlər, tətbiq ediləcək qaydalar öyrənilib və Bakı metropoliteni üçün ən uyğun variant seçilib. Əlil arabası ilə metropolitendən istifadə etmək istəyən şəxs əvvəlcədən sifarişini verəcək və metropolitendə bu iş üçün ayrılmış işçi onu girişdə qarşılayaraq stansiyaya endirəcək, sərnişinin qatarla mənzil başına çataraq stansiyanı tərk etməsi təmin olunacaq.
Bu işlərin yerinə yetirilməsi məqsədilə birinci mərhələdə stansiyalarda konstruktiv dəyişikliklər nəzərdə tutulmasa da, metropolitendə istismarı əksəriyyət təşkil edilən 81-717/714 tipli vaqonlarda əlil arabalarının yerləşdirilməsi üçün yerlərin hazırlanması istiqamətində tədbirlərə başlanılıb. Artıq bu yerlərin ilk nümunələri də baş vaqonların salonlarında quraşdırılıb. Qaydaya uyğun olaraq, hər baş vaqonun maşinist kabinasına yaxın hissəsində quraşdırılan bu yerlər bütün standartlara uyğun, ən əsası vaqonların konstruksiyasının təməl prinsiplərinə xələl gətirilmədən quraşdırılır. Mərhələ ilə bu yerlər baş vaqonların hər birində quraşdırılacaq.
Əlillər və fiziki sağlamlığı məhdud insanlar əlil arabasında metropolitendən istifadə etmək üçün əvvəlcədən sifariş verə biləcək. Bu istiqamətdə işlər yekunlaşmaq üzrədir. Əlil arabası istifadəçisi xüsusi ayrılmış telefon və ya internet vasitəsilə sifarişini verə biləcək. Sifariş əsasında o, metro stansiyasının girişində qarşılanacaq və mənzil başına çatdırılacaq. Sifariş üçün müasir texnologiyaların imkanlarından istifadə olunacaq. Bu məqsədlə xüsusi proqram işlənib və metropolitenin saytında yerləşdirilib. Əlil arabasında metropolitendən istifadə etmək istəyən sərnişinlər üçün xüsusi mobil əlavə hazırlanır. Bu proqramı yükləməklə sərnişinlərin sifariş imkanları da genişlənəcək.
Əlillərin metrodan istifadə rahatlığını təmin etmək məqsədilə texniki cəhətdən Bakı metropoliteninin mövcud infrastruktur tələblərinə cavab verən əlil arabası seçilərək gətirilib və ilkin sınaqları aparılıb. Bu məqsədlə ayrılmış işçilərin nəzəri və praktiki təlimləri, məşqləri keçirilib. Artıq ilkin əyani sınaq da keçirilib. Əlil arabasının qarşılanması, stansiyaya endirilməsi və qatarda mənzil başına çatdırılması prosesinin ilkin sınaqları uğurla aparılıb. Hazırda əldə olunmuş nəticələrin təhlili, təkmilləşdirilməsi, işçilərin təcrübəsinin artırılması üzərində işlər başlanılıb.
Bütün bunlar Bakı metropoliteni tarixinin ən böyük sosial layihəsinin həyata keçirilməsində real addımların atıldığını əyani nümayiş etdirir. Yaxın vaxtlarda layihənin istifadəyə verilməsi ilə bağlı həlledici tədbirlərə başlanılacaq. Texniki məsələlərin əsas qismi həllini tapdıqdan sonra layihə ictimaiyyətə geniş şəkildə təqdim olunacaq.
Metrodan əlillərin və fiziki imkanları məhdud şəxslərin istifadə etməsi məqsədilə silsilə addımlar atılır. Buna qədər görmə qabiliyyəti məhdud insanların metropolitendən istifadə etməsinə şərait yaradılmasının mümkünlüyü nəzərə alınaraq, mühüm işlər görülüb və ardıcıl olaraq genişləndirilir. Bu xüsusda Yaşıl və Qırmızı xətlərin son illərdə təmir edilən stansiyalarında xüsusi zolaqlar salınmaqla gözdən əlillərin rahat istifadəsinə şərait yaradılması qeyd oluna bilər. 2016-cı ildə istifadəyə verilmiş Bənövşəyi xəttin “Avtovağzal” və “Memar Əcəmi” stansiyalarında fiziki imkanları məhdud şəxslər üçün liftlər quraşdırılıb. Yaşıl və Qırmızı xətlər üzrə yerləşən stansiyalarda isə bu cür liftlərin layihələndirilərək inşa edilməsi mümkün deyil.
Bu mənim Sumqayıta ilk səfərimdir. Sumqayıt Azərbaycanın böyük sənaye şəhəridir. Burada sənaye kompleksləri, böyük şirkətlər var. Sumqayıt Kimya Sənaye Parkı çox müasirdir.
Bu sözləri İndoneziyanın Azərbaycandakı səfiri Hüsnan Bəy Fanani Azərtac-a açıqlamasında deyib.
“Sumqayıt çox xoşuma gəldi. Burada gənclər çoxdur. Bu da Azərbaycanın gələcəyinə böyük imkanlar açır. Azərbaycan daha da inkişaf edəcək. Ölkə iqtisadiyyatı Prezident İlham Əliyevin rəhbərliyi ilə ildən-ilə inkişaf edir. Azərbaycan Mərkəzi Asiyada və Qafqazda ən inkişaf etmiş ölkədir”, - deyə səfir əlavə edib.
Diplomat, həmçinin 2019-cu ilin ölkəmizdə “Nəsimi ili” elan olunmasına da toxunaraq deyib: “Azərbaycan xoşbəxt ölkədir ki, onun Nəsimi kimi mütəfəkkiri olub. Nəsimi biliyin, fəlsəfənin atasıdır. Mən Prezident İlham Əliyevə 2019-cu ili Azərbaycanda “Nəsimi ili” elan etdiyinə görə minnətdarlığımı bildirirəm”.
Xatırladaq ki, yanvarın 30-da Azərbaycan Respublikasının Xarici İşlər, İqtisadiyyat nazirlikləri və Prezident Administrasiyası ölkəmizdə akkreditə olunmuş səfirliklərin və beynəlxalq təşkilatların nümayəndələrinin Sumqayıt şəhərinə səfərini təşkil edib. Sumqayıt şəhərinin inkişafı ilə yaxından tanış olmaq məqsədilə təşkil olunmuş bu səfərdə ölkəmizdə fəaliyyət göstərən diplomatik korpusun 60-dan çox nümayəndəsi iştirak edib. Səfər çərçivəsində diplomatlar Sumqayıt Kimya Sənaye Parkında, Sumqayıt Texnologiyalar Parkında, Sumqayıt Dövlət Dram Teatrında, həmçinin Lüdviqshafen parkında, “Kimyaçı” Mədəniyyət Sarayında, Heydər Əliyev Parkında, Heydər Əliyev Mərkəzində, Bayraq Meydanında, Bayraq Muzeyində və dənizkənarı bulvarda olublar.
Bakıda Azərbaycan - Almaniya yüksək səviyyəli İşçi Qrupunun 8-ci iclası keçirilir.
Axar.az xəbər verir ki, tədbirdə çıxış edən iqtisadiyyat nazirinin müavini Rüfət Məmmədov Azərbaycan və Almaniya arasında iqtisadi əlaqələrin hazırkı vəziyyəti, sonuncu iclasdan sonrakı dövrdə görülmüş işlər, qarşıdakı dövrdə iqtisadi sahədə əməkdaşlığın genişləndirilməsi istiqamətində görüləcək işlərdən danışıb:
“Ölkələrimiz arasında ticarət əlaqələri yüksələn xətlə inkişaf edir. Ötən il avqust ayında Almaniya kansleri Angela Merkelin Azərbaycana səfəri iqtisadi inkişaf üçün impuls rolunu oynadı. Bu səfərdən sonra Azərbaycan məhsullarının Almaniyaya ixrac edilməsi ilə bağlı danışıqlar aparılıb. 2018-ci ildə Azərbaycanla Almaniya arasında ticarət dövriyyəsi 61 faiz artıb. Həm Azərbaycandan Almaniyaya ixrac, həmçinin Almaniyadan Azərbaycana idxal olunan malların faizində artım müşahidə edilir. Almaniyanın Cənubi Qafqazla ticarət dövriyyəsinin 70 faizi Azərbaycanın payına düşür”.
Qeyd edək ki, İşçi Qrupun iclasları növbəlilik prinsipi ilə - bir il Almaniya, bir il isə Bakıda keçirilir. Sonuncu iclas 2017-ci noyabr ayında Berlində baş tutub.
Xeyriyyə yönümlü addımları ilə daim gündəmə gələn Türkiyədə yaşayan azərbaycanlı iş adamı, “Palmali Holdinq”in rəhbəri Mübariz Mənsimovun fevral ayından Türkiyə universitetlərində təhsil alan 100 azərbaycanlı tələbəyə təqaüd verəcəyini bildirməsinə təhsil ekspertləri reaksiya verib.
Mövzu ilə bağlı Axar.az-a danışan təhsil eksperti Etibar Əliyev də hesab edir ki, xaricdə təhsil alan tələbələrə təqaüd verən iş adamları DİM-lə birgə işləsə, daha səmərəli olar:
“Bu, çox yüksək və təqdir olunası addımdır və o iş adamları bilməlidirlər ki, biz onların bu addımını yüksək qiymətləndiririk. Çox istərdik ki, onlar bu xoşniyyətli planlarını DİM-lə əlaqələndirsinlər.
“Azərbaycan gənclərinin xarici ölkələrdə təhsili üzrə Dövlət Proqramı” dayandırılıb. Yəni dövlət artıq bakalavr səviyyəsində xaricdə təhsil alan tələbələrin təhsilini maliyyələşdirmir. Buna görə də öz hesabına gedən tələbələrimiz var. Onların təhsil haqları və yaşayış xərclərinin ödənilməsini azərbaycanlı milyonçuların öz üzərlərinə götürməsi çox yaxşı təşəbbüsdür. Bundan başqa, bu təşəbbüs xarici qrant və fondların maliyyə vasitəsilə oxuyan tələbələrimizdən fərqli olaraq, onlarda Azərbaycana qarşı məsuliyyət hislərini gücləndirəcək və azərbaycançılıq ideyası çərçivəsində gənclərə verilən dəstək əsasında daha məsuliyyətli olacaqlar.
Xarici qrant və fondlar bizim hansı tələbələrimizi maliyyələşdirirsə, onların məqsədləri var, kadrlar artıq onların kadrları hesab olunur. Bunun mənfi nəticələrini də biz görmüşük. Başqa ölkələrin qrant layihələri hesabına təhsil alanlar haqqında məlumatımız var. Düşünürəm ki, öz iş adamlarımız tərəfindən atılan bu cür addımlar gələcəyə qoyulan kapital olmaqla yanaşı, həm də vətənpərvərlik hissinin geniş mənada təbliğidir”.
Digər təhsil eskperti Kamran Əsədov isə bildirib ki, iş adamları tərəfindən xaricdə oxuyan tələbələrə təqaüd verilməsi konsulluqlarımız vasitəsi ilə mərkəzləşdirilmiş qaydada aparılsa, daha səhih nəticələri olar:
“Xarici ölkələrdə təhsil almağa gedən şəxslərin əksəriyyəti ya DİM-in imtahanlarında iştirak etmirlər, ya da DİM-in imtahanlarında keçərli bal toplaya bilmirlər. Ona görə də ölkədə ali məktəblərə qəbul ola bilmədikləri üçün xarici ölkələrə üz tuturlar. Xarici ölkələrə gedənlərin sayı isə hədsiz dərəcədə çoxdur. Ona görə də xarici ölkələrin hər birində onlara iş adamları tərəfindən təqaüd verilmə prosesini oradakı səfirlik və konsulluqlar tərəfindən mərkəzləşdirilmiş qaydada həyata keçirmək daha yaxşıdır.
Dünyada məşhur olan təqaüdlərin bir növü də hansısa iri şirkətlər və ya imkanlı şəxslər tərəfindən verilənlərdir. Əlbəttə ki, maddi imkanı aşağı olan tələbələrə özəl qrup və şəxslər tərəfindən təqaüdün verilməsi təhsilin əlçatımlılığı və əhatə dairəsinin genişləndirilməsi baxımından çox müsbət haldır”.
Azərbaycanda fevral ayına olan hava proqnozu açıqlanıb.
Ekologiya və Təbii Sərvətlər Nazirliyinin Milli Hidrometeorologiya Departamentindən Axar.az-a verilən məlumata görə, fevral ayında havanın orta aylıq temperaturunun iqlim normasına yaxın, bəzi yerlərdə isə bir qədər aşağı olacağı gözlənilir. Aylıq yağıntının miqdarının iqlim normasına yaxın, bəzi ərazilərdə isə normadan bir qədər çox olacağı ehtimal olunur.
Birinci ongünlüyün ilk günlərində hava şəraitinin yağıntılı keçəcəyi gözlənilir.
Bakıda və Abşeron yarımadasında orta aylıq temperaturun 2-4 dərəcə isti (gecələr 1-6 dərəcə isti, bəzi günlərdə 0 dərəcəyə yaxın, gündüzlər 8-13, bəzi günlərdə 2-4 dərəcə isti) olacağı gözlənilir ki, bu da iqlim normasına yaxın və bir qədər aşağıdır.
Aylıq yağıntının miqdarının iqlim normasına yaxın, bəzi yerlərdə isə bir qədər çox olacağı (norma 21-24 mm) gözlənilir.
Naxçıvan Muxtar Respublikasında orta aylıq temperaturun 0-3 dərəcə şaxta (gecələr 3-8, bəzi günlərdə 10-15, dağlarda 15-20 dərəcə şaxta, gündüzlər 4-9 dərəcə isti, bəzi günlərdə 2 dərəcə şaxtadan 3 dərəcəyədək isti) olacağı gözlənilir ki, bu da iqlim normasına yaxın və bir qədər aşağıdır.
Aylıq yağıntının miqdarının iqlim normasına yaxın olacağı (norma 11-29 mm) gözlənilir.
Yuxarı Qarabağ: Xankəndi, Şuşa, Xocalı, Xocavənd, Qubadlı, Zəngilan, Laçın, Kəlbəcər, Daşkəsən və Gədəbəy rayonlarında orta aylıq temperaturun 0-3 dərəcə şaxta (gecələr 0-5, bəzi günlərdə 8-10 dərəcə şaxta, gündüzlər 5-10 dərəcə isti, bəzi günlərdə 2 dərəcə şaxtadan 3 dərəcəyədək isti) olacağı gözlənilir ki, bu da iqlim normasına yaxın və bir qədər aşağıdır.
Aylıq yağıntının miqdarının iqlim normasına yaxın (norma 25-35 mm) olacağı gözlənilir.
Qazax, Gəncə, Goranboy, Tər-Tər, Ağdam, Füzuli, Cəbrayıl rayonlarında orta aylıq temperaturun 0-3 dərəcə isti (gecələr 1-6 dərəcə isti, bəzi günlərdə 0-5 dərəcə şaxta, gündüzlər 8-13, bəzi günlərdə 1-5 dərəcə isti) olacağı gözlənilir ki, bu da iqlim normasına yaxın və bir qədər aşağıdır.
Aylıq yağıntının miqdarının iqlim normasına yaxın (15-36 mm) olacağı gözlənilir.
Balakən, Zaqatala, Qax, Şəki, Oğuz, Qəbələ, İsmayıllı, Ağsu, Şamaxı, Xızı, Siyəzən, Şabran, Quba, Qusar, Xaçmaz rayonlarında orta aylıq temperaturun 3 dərəcə şaxtadan 2 dərəcəyədək isti (gecələr 3 dərəcə şaxtadan 2 dərəcəyədək isti, bəzi günlərdə 4-9, yüksək dağlıq ərazilərdə 13-18 dərəcə şaxta, gündüzlər 6-11 dərəcə isti, bəzi günlərdə 3 dərəcə şaxtadan 2 dərəcəyədək isti) olacağı gözlənilir ki, bu da iqlim normasına yaxındır.
Aylıq yağıntının miqdarının iqlim normasına yaxın, bəzi yerlərdə isə bir qədər çox olacağı (norma 24-55 mm) gözlənilir.
Mərkəzi-Aran: Mingəçevir, Yevlax, Göyçay, Ağdaş, Kürdəmir, İmişli, Ağcabədi, Beyləqan, Sabirabad, Biləsuvar, Saatlı, Şirvan, Hacıqabul, Salyan, Neftçala rayonlarında orta aylıq temperaturun 3-5 dərəcə isti (gecələr 1-6 dərəcə isti, bəzi günlərdə 0-4 dərəcə şaxta, gündüzlər 8-13, bəzi günlərdə 1-5 dərəcə isti) olacağı gözlənilir ki, bu da iqlim normasına yaxındır.
Aylıq yağıntının miqdarının iqlim normasına yaxın, bəzi yerlərdə isə bir qədər çox (norma 21-35 mm) olacağı gözlənilir.
Masallı, Yardımlı, Lerik, Lənkəran, Astara rayonlarında orta aylıq temperaturun 0-4 dərəcə isti (gecələr 1-6 dərəcə isti, bəzi günlərdə 0-2, dağlarda 6-11 dərəcə şaxta, gündüzlər 8-13, bəzi günlərdə 1-5 dərəcə isti) olacağı gözlənilir ki, bu da iqlim normasına yaxın və bir qədər aşağıdır.
Aylıq yağıntının miqdarının iqlim normasına yaxın olacağı (norma 44-105 mm) gözlənilir.
ABŞ Prezidentinin milli təhlükəsizlik məsələləri üzrə müşaviri Con Boltonun Prezident İlham Əliyevə telefonla zəngi Azərbaycanla Qərb arasındakı münasibətlərin pozulduğunu, hətta dalana dirəndiyini iddia edənlərin növbəti anonslarının üzərindən xətt çəkdi.
Axar.az xəbər verir ki, bu sözləri analitik Elçin Mirzəbəyli deyib. O bildirib ki, telefon söhbətində müzakirə olunan məsələlərin siyahısı və sıralaması da ənənəvi nüfuz müvəkkillərinə manipulyasiya üçün ipucu vermədi:
“Əslində bundan öncə də Azərbaycan-Qərb münasibətlərində pozucuların ümidlənməsi üçün əsas yox idi. Yalnız 2018-ci ildə Azərbaycan Prezidentinin səfərlərinin, ölkədə və ölkədən kənarda keçirdiyi görüşlərin siyahısına nəzər salınsaydı, nəticə çıxarmaq olardı. Prezident İlham Əliyevin Avropa İttifaqının mənzil-qərargahına səfəri və Avropa İttifaqı (Aİ) Şurasının prezidenti Donald Tusk ilə görüşü, Aİ ilə Tərəfdaşlıq Prioritetləri sənədinin paraflanması, ABŞ Prezidentinin dövlətimizin başçısına ünvanlandığı məktublar və Birləşmiş Ştatların yüksək çinli nümayəndə heyətlərinin ölkəmizə səfərləri Azərbaycanın Qərblə münasibətlərinin hansı səviyyədə olduğunu müəyyənləşdirmək üçün bəs edərdi”.
Analitik vurğulayıb ki, amma qütbdən-qütbə yuvarlanmağa, piştaxta üzərində, yaxud siyasi vitrinlərdə sərgilənməyə adət etmiş radikal və inkarçı ünsürlər hər zaman olduğu kimi faktlara deyil, dedi-qodulara, erməni diasporu ilə sinxron fəaliyyət göstərən təxribatçı qrupların yalan və böhtan üzərində qurulan kampaniyalarına, Avropa Parlamentinin divarları arasında sərgilənən rəngli şouların siyasi çalarlarına istinad etdilər:
“Onlar üçün Qərbin Azərbaycanla münasibətlərini dəyərləndirmək baxımından ölkəmizə qarşı düşmənçiliyi özünün siyasi biznes elementinə çevirmiş Rebeka Harmsın təxribatı, Avropa İttifaqı (Aİ) Şurasının prezidenti Donald Tuskun Azərbaycanla bağlı açıqlamalarından daha tutarlı göründü. Yaxın tarixə müraciət edək: 2018-ci il iyunun 11-də Azərbaycanla Avropa İttifaqı arasında “Tərəfdaşlıq prioritetləri” sənədinin paraflanma mərasimində çıxış edən Donald Tusk Azərbaycanın dünyəvi və müasir cəmiyyət quruculuğu sahəsində müsbət təcrübəyə malik olduğunu bildirmiş, ölkəmizin Aİ-nin etibarlı strateji və enerji tərəfdaşı olduğunu qeyd etmişdi. Hesab edirəm ki, sağlam şüura malik istənilən şəxs “dünyəvi və müasir cəmiyyət quruculuğu sahəsində müsbət təcrübə” ifadəsinin özündə insan hüquq və azadlıqları, vətəndaş cəmiyyəti və hüquqi dövlət quruculuğu və digər fundamental hüquqlarla bağlı olduqca geniş bir spektri əhatə etdiyini yaxşı başa düşür”.
Analitik ABŞ Prezidenti Donald Trampın Azərbaycan Prezidentinə ünvanladığı məktubların ikisindən iqtibas gətirməklə, Vaşinqtonun Bakı ilə münasibətlərə nə qədər böyük önəm verdiyini xatırladıb:
“Donald Tramp ABŞ-la Azərbaycanın “mürəkkəb regional çağırışların həlli üçün birgə işləyərək sıx tərəfdaşlıq” etdiyini vurğulamışdı. Bu isə şübhəsiz ki, Azərbaycanın regionun əsas güc mərkəzlərindən biri kimi kifayət qədər yüksək statusa və mövqeyə malik olduğunun qeyd olunmasıdır. Əgər bizim regionda ərazi və əhali baxımından Azərbaycandan dəfələrlə böyük olan dövlətlərin yerləşdiyini də nəzərə alsaq, Prezident Trampın bu sözlərinin nə qədər ciddi bir ismarış olduğunu anlamaq mümkündür.
ABŞ Prezidenti ölkəsinin Azərbaycanla enerji sahəsindəki əməkdaşlığını “inanılmaz nailiyyət” adlandırıb. Düşünürəm ki, Azərbaycanın təşəbbüsü və iştirakı ilə gerçəkləşdirilən enerji layihələrinin siyahısı və qət edilən məsafə “inanılmaz nailiyyət” ifadəsinin alt qatında kifayət qədər sıx və strateji əməkdaşlığın dayandığını söyləməyə əsas verir.
Prezident İlham Əliyevə ünvanladığı başqa bir məktubda Donald Tramp “Azərbaycanın indi daha firavan və qlobal iqtisadiyyata bağlı bir ölkə” olduğunu vurğulayır. Firavanlıq kompleks bir anlayışdır və özündə sadəcə iqtisadi sahədə əldə edilən uğurları ehtiva etmir. Firavanlıq həm də hüququn aliliyinin qorunduğu azad cəmiyyət deməkdir. İqtibas gətirdiyim cümlələrdə Azərbaycanda həyata keçirilən islahatlara ciddi dəstək və bu islahatların uğurlu nəticələrə gətirib çıxaracağına inam ifadə olunur”.
Analitik Azərbaycandakı bəzi inkarçı qrupların və onların xaricdəki rəngli himayəçilərinin əndişəsinin nə ilə bağlı olması sualına da aydınlıq gətirib:
“Azərbaycanda həyata keçirilən islahatlara dünyanın supergücü tərəfindən dəstək verilir, onlarsa Avropadakı hansısa kiçik qruplarla birlikdə islahatlara mane olmaq üçün dəridən-qabıqdan çıxırlar. Səbəb nədir? Əslində bu sualın cavabını hər kəs bilir. Kimlər inkişafın yeni mərhələsinə daşınan, qarşısında daha böyük strateji hədəflər qoymuş Azərbaycanın daha da güclənməsində, daha çevik idarəetmə strukturuna, daha intellektual, bacarıqlı kadr potensialına malik olmasında maraqlı deyilsə, onlar da ölkəmizin beynəlxalq nüfuzunu zədələməyə, cəmiyyətdə çaşqınlıq yaratmağa çalışır”.
Analitikin sözlərinə görə, Trampın Azərbaycan Prezidentinə yazdığı bütün məktublarda Dağlıq Qarabağ münaqişəsinin həlli ilə bağlı çox önəmli ismarışlar verilir:
“Bu yanaşma ABŞ Prezidentinin milli təhlükəsizlik məsələləri üzrə müşaviri Con Boltonun regiona səfəri və Azərbaycan Prezidenti ilə son telefon danışığında da özünü büruzə verdi. Görəsən, Azərbaycanın ərazi bütövlüyünün təmin olunması ilə bağlı olduqca önəmli bir mərhələyə qədəm qoyduğumuzu əsaslandıran çoxsaylı real faktların ortalıqda olduğu bir zamanda bir qrup radikalın münaqişənin həllində maraqlı olmayan, Dağlıq Qarabağ problemini öz siyasi karyeraları, biznes və digər korporativ maraqları üçün əsas alət hesab edən xarici dairələrlə eyni düşərgədə, eyni kampaniyanın içərisində yer almalarının səbəbi nədir?
Con Boltonun Azərbaycan Prezidenti ilə telefon danışığında müzakirə olunan məsələlər, əslində Vaşinqton ilə Bakının əməkdaşlıq prioritetləri ilə yanaşı, daha öncə vurğuladığım bir sıra məsələlərə də diqqət çəkməyə imkan yaradır: Enerji təhlükəsizliyi, təhlükəsizlik sahəsində əməkdaşlıq və Ermənistan-Azərbaycan Dağlıq Qarabağ münaqişəsinin həlli! Bu 3 istiqamətin hər birini ayrı-ayrılıqda dəyərləndirmək də mümkündür. Amma zənnimcə, kompleks dəyərləndirmə Azərbaycana qarşı həyata keçirilən təxribat kampaniyalarının mahiyyətini dəqiqləşdirmək üçün daha doğru yanaşma olardı. Enerji təhlükəsizliyi istər Azərbaycan, istərsə də ölkəmizin bu sahədəki tərəfdaşları üçün fundamental əhəmiyyət kəsb edir. Enerji təhlükəsizliyi həm də daha geniş anlamda təhlükəsizlik məsələsidir, Dağlıq Qarabağ münaqişəsinin həlli də həmçinin. Bu isə o deməkdir ki, Azərbaycana qarşı savaş açan qruplar bütövlükdə ölkəmizin təhlükəsizliyini, o cümlədən ərazi bütövlüyümüzü, müstəqilliyimizi hədəfə alıb. Yəni hədəfdə Azərbaycandır! Boltonun zəngi isə Azərbaycana birmənalı dəstək ifadə etməklə yanaşı həm də kölgədəki oyunçulara xəbərdarlıq xarakteri daşıyır: Sizi görürük!”
Ermənistan silahlı qüvvələrinin bölmələri cəbhənin müxtəlif istiqamətlərində sutka ərzində atəşkəs rejimini 21 dəfə pozub.
Müdafiə Nazirliyindən Axar.az-a verilən məlumata görə, Ermənistan Respublikası Noyemberyan rayonunun Voskevan, İcevan rayonunun Ayqeovit kəndlərində və adsız yüksəkliklərdə yerləşən mövqelərdən Qazax rayonunun Quşçu Ayrım, Cəfərli, Bala Cəfərli kəndlərində və adsız yüksəkliklərdə, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonunun Zamanlı kəndində və adsız yüksəkliklərdə yerləşən mövqelərimiz atəşə tutulub.
Ağdam rayonunun işğal altında olan Şıxlar, Şirvanlı, Kəngərli, Füzuli rayonunun Aşağı Seyidəhmədli kəndləri yaxınlığında, həmçinin Tərtər və Ağdam rayonları ərazisindəki adsız yüksəkliklərdə yerləşən mövqelərdən də ordumuzun mövqeləri atəşə tutulub.
Azərbaycanın dövlət və ictimai xadimi Azərbaycan Xalq Cümhuriyyətinin (1918-1920) banilərindən olmuş Məhəmməd Əmin Rəsulzadənin doğum günüdür.
Axar.az xəbər verir ki, M.R.Rəsulzadə 135 il bundan əvvəl, 1884-cü ilin yanvarın 31-də Bakının Novxanı kəndində anadan olub.
Gənc yaşlarında sosial demokratlarla birgə «Hümmət» təşkilatının yaranmasında iştirak edib. Çarizmin təqiblərinə məruz qalaraq 1909-cu ildə İrana mühacirət edən bir müddət orada “İrane-nou” qəzetinin baş redaktoru kimi çalışıb, məşrutə inqilabı yatırıldıqdan sonra Türkiyəyə mühacirət edib.
O, 1911-ci ildə Müsavat Partiyasına üzv qəbul edilib və 4 il sonra Müsavat Partiyası Mərkəzi Komitəsinin sədri seçilib.
1918-ci ildə Fətəli Xan Xoyski ilə birgə Şərqdə ilk respublikanın yaradılmasını rəsmi şəkildə elan edib. 1920-ci il aprelin 28-də bolşevik işğalından sonra həbs edilib. Az sonra Stalinin göstərişi ilə həbsdən azad edilərək Moskvaya aparıb. Stalinin təkidlərinə baxmayaraq, sovet hakimiyyəti ilə əməkdaşlıqdan imtina edərək SSRİ-ni tərk edib.
M. Ə. Rəsulzadə 1955-ci ilin martın 6-da Ankarada dünyasını dəyişib.
1992-ci il dekabrın 24-də Azərbaycan prezidenti Əbülfəz Elçibəy "Görkəmli ictimai-siyasi xadim Məhəmməd Əmin Rəsulzadənin totalitar sovet rejimi dövründə repressiyaya məruz qalmış ailə üzvlərinin Azərbaycana qaytarılması və onların sosial-məişət məsələlərinin həlli haqqında" sərəncam imzalayıb.
29 dekabr 1993-cü ildə Azərbaycan prezidenti Heydər Əliyev "Azərbaycanın görkəmli ictimai-siyasi xadimi Məhəmməd Əmin Rəsulzadənin anadan olmasının 110 illik yubileyinin keçirilməsi haqqında" sərəncam imzalayıb.
22 noyabr 2013-cü ildə isə Azərbaycan prezidenti İlham Əliyev Məhəmməd Əmin Rəsulzadənin 130 illik yubileyinin keçirilməsi haqqında sərəncam verib.
Sərəncama əsasən, respublikada və respublikadan kənarda silsilə yubiley tədbirləri keçirilib.
Qeyd edək ki, ötən il Azərbaycan Xalq Cümhuriyyətinin qurulmasının 100-cü ili tamam oldu. Dövlət başçısı bu münasibətlə 2018-ci ili isə "Cümhuriyyət ili" elan etmişdi.
Azərbaycanda bu il Novruz çərşənbələrinin qeyd olunacağı tarixlər açıqlanıb.
Axar.az xəbər verir ki, AMEA-nın Şamaxı Astrofizika Rəsədxanasının elmi işlər üzrə direktor müavini, fizika üzrə fəlsəfə doktoru Xıdır Mikayılov Trend-ə bildirib ki, bu il ilk - Su çərşənbəsi fevralın 26-na təsadüf edəcək.
X.Mikaylovun sözlərinə görə, martın 5-də Od, martın 12-də Yel çərşənbəsi olacaq.
Novruzun ilaxır - Torpaq çərşənbəsi isə martın 19-da qeyd ediləcək.
Bu il yaz fəsli ölkəyə martın 20-dən 21-nə keçən gecə saat 01:58-də gələcək.
X.Mikayılov qeyd edib ki, martın 20-si ölkəmizdə bayram axşamı, 21-i isə bayram günü kimi qeyd ediləcək.
Xatırladaq ki, bu il Novruz bayramı ilə əlaqədar 20, 21, 22, 23, 24 mart qeyri-iş günləri olacaq. Bu il bayram günü hesab edilən 23 və 24 mart həftələrarası istirahət günləri ilə üst-üstə düşdüyündən 25, 26 mart da qeyri-iş günü hesab ediləcək. Beləliklə, Novruz bayramı günlərində 20-26 mart tarixləri qeyri-iş günləri olacaq.