 |
|
Bu gün saat 16:40 radələrində paytaxtın Nəsimi rayonunun Azadlıq prospekti ilə Həsən Əliyev küçəsinin kəsişməsində nasaz vəziyyətdə, yol hərəkətində istismarı mümkün olmayan “QAZ-31” markalı, 10-NR-899 dövlət nömrə nişanlı avtomobil üstündə 12 metr uzunluğa malik tikinti materialı-armatur daşımaqla yük daşıma qaydasını pozduğu üçün yol polisi əməkdaşları tərəfindən saxlanılıb.
“Qafqazinfo” xəbər verir ki, Bakı şəhər Baş Polis İdarəsinin Dövlət Yol Polisi İdarəsinin bölmə rəisi, polis polkovniki Vaqif Əsədov Avtosfer.az-a məlumatı təsdiqləyib.
O bildirib ki, avtomobil daşıdığı yüklə yol boyu digər hərəkət iştirakçılarına maneə yaradıb: “Sürücü, Zəngilan rayon sakini, Bakıxanov qəsəbəsində qeydiyyatda olan 53 yaşlı Məhərrəmov Kamil Atlıxan oğlu saxlanılarkən yol polisləri tərəfindən ona müvafiq sənədin təqdim edilməsi, eyni zamanda spirtli içkinin dərəcəsinin yoxlanılması üçün tibbi müayinədən keçirilməsi təklif edilib. Lakin sürücü sənəd təqdim etməyib və spirtli içkinin dərəcəsinin yoxlanılması üçün tibbi müayinədən keçirilməsindən imtina etməklə polisə 50 manat pul təklif edib.
İnspektorun prinsipiallığını görən sürücü avtomobilin baqajında plastmas qabdakı yanacağın benzin olduğunu bildirərək, kirbit çıxarmaqla özünü yandıracağını deyib. O, özünü yandıranda polis əməkdaşları bunun qarşısını alıblar. Sürücünün əynində yanan paltarlar çıxarılıb və Respublika Yanıq Mərkəzinə çatdırılıb. Mərkəzdən bildirilib ki, onun boynunda və sağ əlinin dərisinin yanığı qeydə alınıb. Hadisə zamanı yol polisi əməkdaşı da yanıq xəsarəti alıb”.
BP şirkəti 2019-cu ildə Azərbaycanda neft-qaz yataqlarında 4 yeni buruğun qazılmasını planlaşdırıb.
“Qafqazinfo” xəbər verir ki, bu barədə Trend-ə BP-nin Azərbaycan, Gürcüstan və Türkiyə regionu üzrə Əlaqələr, xarici işlər və strategiya üzrə vitse-prezidenti Bəxtiyar Aslanbəyli deyib.
O qeyd edib ki, 2 kəşfiyyat xarakterli buruq Abşeronun dayaz sularında (SWAP layihəsi), biri – “Şəfəq-Asiman” yatağında, digəri isə “Qobustan” onşor yatağında qazılacaq.
B.Aslanbəyli bildirib ki, növbəti illər üçün planlar göstərilən qazma işlərinin nəticəsindən asılı olacaq.
İstehsalat planlarına gəldikdə isə, mənbənin dediyinə görə, “Azəri-Çıraq-Günəşli” (AÇQ) və “Şahdəniz” kimi ölkənin ən böyük yataqlarından istehsalatı bu ilki səviyyəyə (AÇQ-də sutka ərzində ortalama istehsal 588 min barrel, “Şahdəniz”də isə - 48 milyon kubometr təşkil edib) uyğun saxlanılması nəzərdə tutulub.
Qeyd edək ki, BP Azerbaijan “AÇQ” , “Şahdəniz”, “Shallow Water Absheron Peninsula”, “Şəfəq-Asiman” və “Qobustan” yataqlarının operatorudur.
Türkiyə də daxil olmaqla, bəzi qonşu ölkələrdə Mübariz İbrahimov vətənpərvərliyin simvolu kimi təbliğ edilir, haqqında film çəkilir və yaxud ən məşhur seriallarında onun qəhrəmanlığı nümunə göstərilir, Mübariz dastanları yaradır, bizlərdən isə kimlərsə onu aşağılamağa cəhd edir. Görünür, bunun günahı bir az da bizdə - jurnalistlərdə, media orqanlarında çalışanlardadır. Görünür, biz Mübariz İbrahimovun kimliyini, onun atdığı addımın ictimai-hərbi və sosial anlamını tam izah edə bilməmişik və ya az təbliğ etmişik.
Bu sözləri Axar.az-a açıqlamasında Teleqraf Media Qrupunun rəhbəri Aynur Camalqızı deyib. Son günlər Milli Qəhrəman Mübariz İbrahimov haqda sosial şəbəkədə yazılan bir statusun doğurduğu rezonansa münasibət bildirən A.Camalqızı deyib ki, bu hadisə araşdırılmalar aparılmasını zəruri edir:
“Adətən, Avropada sosioloqlar və sosioloji mərkəzlər bu cür hallarda ciddi araşdırmalar aparır və mənzərəni aydınlaşdırırlar. Çünki burda məsələ bir xalqın dəyərindən gedir. Mübariz İbrahimov Azərbaycan xalqının dəyiridir, vətənpərvərlik məsələsində bir dönüş nöqtəsidir və dövlətin bununla bağlı ictimai-sosial mesajı, siyasi iradəsi ortadadır. Müzakirələrin ümumi mənzərəsində Mübariz İbrahimovu aşağılamağa cəhd edən bir gəncə qarşı sərt təpkilərə etiraz edənlər bizi düşünməyə vadar etməlidir. Yəni elə dəyərlər var ki, onları hər hansı “səbəblə” – məşhurlaşmaq, ya hansısa təşkilatın ayırdığı qrantın “tələblərini yerinə yetirmək”, yaxud Avropadan siyasi sığınacaq almaq arzusu... – müzakirəyə çıxarmaq qətiyyən olmaz”.
A.Camalqızı bildirib ki, mövzu həddən artıq həssasdır və xalqın dəyərini aşağılayan gənc çox təhlükəli bir yola əl atıb:
“Onu buna hansı səbəblər “vadar edib” – bu, toxunulası məqam deyil. Burda əsas məqam ona qarşı ən sərt mövqelərin doğurduğu “ictimai yazıqlıq” hissi və nəticədə bir gəncin çox böyük, yanlış mövqeyinin tərəfdarı olmayanların belə onu müdafiə etməyə qalxmasıdır. Ən kədərləndirici məqam isə belə bir “mövqenin” ictimai şüura yeridilməsi cəhdidir. Xatırlayırsınızsa, analoji hadisə Ramil Səfərovla bağlı da baş vermişdi. Baxmayaraq ki, Ramil Səfərov və Mübariz İbrahimov olayları tamamilə fərqlidir, ancaq diqqət edirsinizsə, bütün hallarda bir yanlış yanaşmanın, dəyərlərə qarşı getmənin, neqativ informasiyanın xalqın şüuraltına yeridilməsinə cəhdlər sezilir”.
A.Camalqızının sözlərinə görə, bu, ictimai təfəkkürə, xalqın milli mübarizəsinə və torpaqlarımıza qarşı yönələn qəsddir:
“Maraqlıdır ki, erməni millətindən olanlar o qızın statusuna dərhal münasibət bildirməyə tələsdilər, erməni mediası bunu xəbərə çevirdi, manşetlərə daşıdı və bundan öz məqsədləri üçün istifadə etməyə başladı. Digər tərəfdən, o gənc qızın dərhal saxta profili yaradıldı və o profildən Xocalı faciəsi də daxil olmaqla, torpaqlarımızın işğalı ilə bağlı erməni fikirləri tirajlanmağa başladı. Burdakı eybəcər məqsəd və hədəflərə baxaq: birincisi, xalqımızın dəyərinə hücum, sosial nəbz yoxlanılması, ikincisi, dəyərlərin və qəhrəmanların aşağılanmasına “cəsarətin” mümkünlüyü, üçüncüsü, ictimai altşüura – təhtəlşüura neqativ informasiyanın ötürülməsi ilə milli təfəkkürü sarsıtma cəhdi... Sosioloqlar yaxşı bilir ki, ən ağlasığmaz olayla bağlı xəbər belə qəti etirazlarla qarşılansa da, altşüurda özünə yer edir və “demək ki, mümkündür” təhlükəli rəyinin formalaşmasına təkan verir.
Dördüncü və ən təhlükəli məqamı isə saxta profilin yaradılması və ordan aparılan təbliğatda gördük. Şübhəsiz ki, bu, düşmən işidir və hədəf həmin o fikirləri səsləndirən qızın linç edilməsinə nail olmaqdır. Bununla erməni təbliğatına beynəlxalq aləmdə Azərbaycan xalqı haqda yanlış rəy yaratma fürsəti ilə bərabər. bizim cəmiyyətimizi də gərginləşdirmək hədəflənir”.
Aynur Camalqızı buna görə də mütləq Dövlət Təhlükəsizliyi Xidmətinin müəyyən araşdırmalar aparmasının vacibliyini də bildirib:
“Biz hələ bilmirik ki, o qızın birdən-birə bu statusu yazması, ermənilərin o statusu dərhal “görməsi”, saxta profilin açılması və Azərbaycan xalqına təhqirlərin davam etdirilməsi ilə o gəncin hədəfə çıxarılması, erməni mediasının bu olaya anında reaksiyası və s. əvvəlcədən düşünülmüş məkrli planın tərkib hissəsidir, ya yox. Çünki istər-istəməz, burda bir “ssenari” diqqət çəkir və hesab edirəm ki, DTX artıq araşdırmaya başlayıbdır.
İkinci məsuliyyət isə əlbəttə ki, bizim və ziyalıların üzərinə düşür. Çünki dəyərlərə hücum cəhdi varsa, bunun məsuliyyəti həm də bizimdir. Mübariz İbrahimov obrazının niyə dəyərə çevrilməsi, onun həyat amalı, hədəfi, Azərbaycan gəncliyinə böyük və əbədi mesajı daha yaxşı anladılmalı, vaxtaşırı təbliğ olunmalı, yada salınmalıdır. Mübarizin timsalında dəyərimizə atılan bu daş bizi oyatmalıdır. Mübariz İbrahimovun kimliyi, onun igidliyi barədə əsərlər yazılmalı, orta məktəb dərsliklərinə salınmalıdır, filmlər çəkilməlidir. Müasir dünyada kino ölkələrin, xalqların tanıtımı, təbliği üçün ən gözəl vasitədir. Gözəl hekayələri gözəl ssenarilərə, gözəl ssenariləri gözəl filmlərə çevirən usta yazarlara, istedadlı rejissorlara, peşəkar aktyorlara meydan verilməlidir. Uşaqlara, gənclərə aşılanmalıdır ki, suverenliyimiz və Qarabağın azadlığı uğrunda həyatını fəda edən hər bir şəhidimiz Azərbaycanın dəyəridir və dəyərlərimizə sayğı göstərilməsi hər kəsin, hər bir azərbaycanlının borcudur. Hesab edin ki, bu, Konstitusiya ilə təsbit olunan bir borcdur, görəvdir. Azərbaycanın bütövlüyü, müstəqilliyi ugrunda həlak olan oğullarımızın statusu dövlətimizin simvolları qədər simvollaşmalı, bayraq qədər müqəddəs tutulmalıdır”.
Ağdam rayon polis şöbəsinin dövlət yol polisi bölməsinin rəisi Məmmədov Vasif Yusif oğlu vəzifəsindən azad edilərək sərəncama göndərilib.
Report-un məlumatına görə, Daxili İşlər naziri, general-polkovnik Ramil Usubov bununla bağlı müvafiq əmr imzalayıb.
Onun yerinə hələlik təyinat olmayıb.
Ermənistan silahlı qüvvələrinin bölmələri cəbhənin müxtəlif istiqamətlərində iriçaplı pulemyotlardan da istifadə etməklə sutka ərzində atəşkəs rejimini 29 dəfə pozub.
Axar.az xəbər verir ki, Ermənistan Respublikası Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonunun Göyəli kəndində yerləşən mövqelərimiz atəşə tutulub.
İşğal altında olan Ağdam rayonunun Şuraabad, Tağıbəyli, Şıxlar, Qaraqaşlı, Kəngərli, Yusifcanlı, Füzuli rayonunun Aşağı Veysəlli, Kürdlər, Horadiz kəndləri yaxınlığında, həmçinin Goranboy, Tərtər, Ağdam, Xocavənd və Füzuli rayonları ərazisindəki adsız yüksəkliklərdə yerləşən mövqelərdən də ordumuzun mövqeləri atəşə tutulub.
Erməni silahlı bölmələri ötən gün atəşkəsi 21 dəfə pozub.
Cəbhədə ölən işğalçı Ermənistan ordusunun əsgərləri üçün humanizm dərsi keçməyə çalışan insanlar ya dar düşüncəlidir, ya da ucuz populizmlə gündəmdə qalmağa çalışır.
Axar.az xəbər verir ki, bu sözləri Qafqaz Beynəlxalq Münasibətlər və Strateji Araşdırmalar Mərkəzinin (QAFSAM) sədri Araz Aslanlı deyib. O bildirib ki, Mübariz İbrahimov Milli qəhrəmanımızdır:
“Onu insan öldürməyə görə ittiham etmək humanizm yox, ən azı cəhalətdir. Mübariz İbrahimov evində oturmuş birini öldürməyib. Azərbaycan ərazilərini işğal etmiş, qətliamlar və soyqırım törətmiş ordunun əsgərlərini öldürüb. Ordumuzun əsgərləri işğalçı ordunun əsgərlərini bir-bir təftiş edə bilməz ki, hansının ürəyindən nə keçir, kim bura könüllü gəlib, kimi zorla göndəriblər. Hansı erməni özünü məsum hesab edirsə və öldürülmək istəmirsə, onu Azərbaycan ərazisinə, cəbhə xəttinə göndərən hakimiyyətinə etiraz etsin və bizim torpaqlarımızı işğal altında saxlayan orduda xidmətdən imtina etsin. Əgər hansısa bir insan bizim ərazilərimizi işğal altında saxlayan orduda xidmət keçməyi normal hesab edirsə, onda onun ölümünü də normal qarşılamaq lazımdır”.
A.Aslanlı vurğulayıb ki, bir sahədə yeni nəsə öyrənməyə başlayan dar dünyagörüşə sahib insanların, ya da sırf gündəmdə qalmaq xatirinə sensasiya xarakterli açıqlamalar verənlərin fikirlərinə münasibət bildirməməyə çalışır:
“Hesab edirəm ki, onların fikirlərini uzun-uzadı müzakirə etmək onları məqsədinə çatdırır. Bu cür insanları boykot etməyin tərəfdarıyam. Amma Azərbaycanda son illərdə işğalçı ordunun əsgərlərinin ölməsinə saxta, ya da qüsurlu humanizm duyğusu ilə yanaşanlar artdığı üçün münasibət bildirməyi vacib hesab etdim”.
Onun qəhrəmanlığını qəbul etməmək Azərbaycan maraqlarını düşünməyən insanların işidir. Mübariz İbrahimov əsil qəhrəmanlıq, igidlik, cəsurluq simvolu kimi yaddaşlarda həmişə qalacaq. Təbii ki, düşmən tərəfi də var və Mübariz İbrahimovun qəhrəmanlığını gözdən salmağa çalışırlar. Məsələyə bu konteksdə baxmaq lazımdır.
Bu sözləri Publika.az-a açıqlamasında millət vəkili Fazil Mustafa özünü “psixoloq” kimi qələmə verən Nərmin Şahmarzadənin Azərbaycanın Milli Qəhrəmanı Mübariz İbrahimov haqqında söylədiyi aşağılayıcı fikirləri şərh edərkən deyib.
Onun sözlərinə görə, Mübariz İbrahimovu sevməyən və onun barəsində bu cür fikirlər səsləndirən adamlar ola bilər, amma Azərbaycanı sevən, onun maraqlarını düşünən insanlar Milli Qəhrəmanımıza yüksək qiymət verirlər.
“Mübariz İbrahimov bir sindromun qırılmasında mühüm rol oynayıb. Bəzən nadanlar və cahillərin bir qismi bildirirlər ki, o, hansısa bir məktəbin, məzhəbin təmsilçisi olduğu üçün bunu edib. Bunlar onun qəhrəmanlğını gözdən salmaq üçün atılan addımlardır. Mübariz İbrahimov birbaşa Azərbaycanın dəyərlərini yaşadan, onun düşmənindən qisasını alan bir qəhrəmandır. O, hansısa bir məktəbin deyil, bütövlükdə Azərbaycanın yetirməsidir. Mübariz İbrahimov bütövlükdə islam dünyasının qəhrəman oğludur”, - millət vəkili bildirib.
Qeyd edək ki, N.Şahmarzadə Mübariz İbrahimovu "cinayətkar və qatil” adlandırıb. Sosial şəbəkə hesabında ciddi etirazlara səbəb olan statusunda bildirib ki, döyüş olmadan, vətəni, yaxınlarını, öz canını itirmək təhlükən olmadan birini öldürürsənsə, bu, qəddarlıqdır.
“Bəlkə də öldürdüyü erməni əsgəri bütün prosseslərdən sonra doğulmuş, zərrə günahı olmayan, sərhəddə qalarkən qorxu keçirən, evə qayıtmaq üçün gün sayan biri idi. Əslində, qəhrəman dediyimiz şəxs dövlətə siyasi olaraq təhlükə yaratmışdı. Bu yazı kimisə təhqir və ya gözdən salmaq məqsədilə yazılmayıb, sadəcə hər şeyi kor-koranə qəbul etmək asana qaçmaqdır”, - deyə o qeyd edib.
Mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə uyğun olaraq Baş prokuror Zakir Qaralov dekabrın 15-də Xızı rayon prokurorluğunun inzibati binasında Sumqayıt şəhər, Xızı, Abşeron, Qubadlı və Zəngilan rayonlarından olan vətəndaşları qəbul edib.
Baş Prokurorluqdan Axar.az-a verilən məlumata görə, qəbuldan əvvəl Baş prokuror və Xızı rayon İcra Hakimiyyətinin başçısı xalqımızın ümummilli lideri Heydər Əliyevin şəhərin mərkəzində ucaldılmış abidəsini ziyarət edib, önünə gül dəstələri düzərək əziz xatirəsini ehtiramla yad ediblər.
Baş Prokurorluğun məsul əməkdaşlarının, habelə əlaqədar tabe prokurorların iştirakı ilə keçirilən qəbulda Baş prokuror bölgədə yaşayan 22 vətəndaşın müraciətini dinləyərək, qaldırılan məsələlər üzrə onların qanunauyğun və operativ şəkildə həll edilməsi üçün Baş Prokurorluğun əlaqədar struktur qurumlarının rəhbərlərinə və tabe rayon prokurorlarına müvafiq göstərişlər verib.
Vətəndaşların müraciətlərinin bir qismi yerindəcə həllini tapmış, digər müraciətlər isə araşdırılması üçün nəzarətə götürülüb.
Bölgə sakinlərinin yerlərdə qəbulu və müraciətlərinə baxılması üçün rahat və əlverişli şərait yaradılmasından razılıqlarını ifadə edən vətəndaşlar göstərilən diqqət və qayğıya görə dövlət başçısına minnətdarlıqlarını ifadə ediblər.
Psixoloq Nərmin Şahmarzadə Azərbaycanın Milli Qəhrəmanı Mübariz İbrahimov barədə açıqlaması ilə gündəmə gəlib.
İstirahət günlərində səyahətə çıxan insanlar üçün hava proqnozu açıqlanıb.
Ekologiya və Təbii Sərvətlər Nazirliyinin Milli Hidrometeorologiya Departamentindən Axar.az-a verilən məlumatda Böyük və Kiçik Qafqaza səyahət edən insanların nəzərinə çatdırırılır ki, hava şəraitinin əsasən yağmursuz, bəzi yerlərdə dumanlı olacağı gözlənilir. Lakin dekabrın 16-da axşam ayrı-ayrı yerlərdə yağış yağacağı ehtimalı var. Havanın temperaturu dağətəyi rayonlarda 5-10, dağlıq rayonlarda 3-5 dərəcə isti təşkil edəcək.
Lənkəran-Astara bölgəsinə üz tutanların nəzərinə çatdırılır ki, əsasən hava şəraitinin yağmursuz keçəcəyi, lakin dekabrın 16-sı gündüzdən bəzi yerlərdə arabir yağış yağacağı gözlənilir. Şərq küləyi üstünlük təşkil edəcək. Havanın maksimal temperaturu 8-12, dağlıq rayonlarda 6-9 dərəcə isti təşkil edəcək.
Aran rayonlarında hava şəraitinin əsasən yağmursuz keçəcəyi gözlənilir. Gecə və səhər saatlarında ayrı-ayrı yerlərdə duman müşahidə olunacaq. Havanın maksimal temperaturu 8-13 dərəcə isti təşkil edəcək.
Naxçıvan MR-də hava şəraitinin əsasən yağmursuz keçəcəyi gözlənilir. Ayrı-ayrı yerlərdə duman müşahidə olunacaq. Zəif şərq küləyi əsəcək. Havanın maksimal temperaturu 6-11 dərəcə isti təşkil edəcək.
Paytaxt qonaqlarının nəzərinə çatdırılır ki, hava şəraitinin dəyişkən buludlu olacağı, arabir tutulacağı, dekabrın 15-i gündüz, dekabrın 16-da əsasən yağmursuz keçəcəyi gözlənilir. Dekabrın 16-sı gündüz mülayim şimal-qərb küləyi arabir güclənəcək. Havanın maksimal temperaturu 9-12 dərəcə isti təşkil edəcək.