 |
|
Türkiyədə Prezident seçkiləri 2023-cü il iyunun 18-də keçirilməlidir.
Bu barədə Türkiyənin ədliyyə naziri Bekir Bozdağ açıqlama verib.
“2023-cü il iyunun 18-də keçiriləcək seçkilər Prezidentimizin ikinci dəfə iştirak edəcəyi seçkilər olacaq. Burada əlavə şərhə ehtiyac yoxdur. Gizli, ikimənalı nəsə axtarmaq lazım deyil”, - nazir deyib.
Son bir gün ərzində Ukrayna ordusu 400 rus əsgərini məhv edib.
“Bu barədə Ukrayna Silahlı Qüvvələrinin Baş Qərargahı öz Facebook səhifəsində məlumat yayıb.
Son bir gün ərzində Ukraynada gedən döyüşlərdə 400 rus əsgəri və ondan çox tank məhv edilib.
Düşmən ən böyük itkini Donetsk istiqamətində verib. Məlumat dəqiqləşdirilir.
Rus ordusu Ukraynanın cənubunda ciddi itkilərə uğrayıb. İtki verən rus ordusu geri çəkilmək məcburiyyətində qalıb.
Ukraynanın Cənub Müdafiə Qüvvələrinin birgə əlaqələndirici mətbuat mərkəzinin rəhbəri Nataliya Qumenyukun məlumatına görə, rus ordusunun xeyli sayda hərbi texnikası, o cümlədən tanklar, 50-yə qədər şəxsi heyət itkisi verərək geriyə çəkkilməli olub.
“Rus ordusunun fevralın 24-dən avqustun 19-dək ümumi döyüş itkiləri təqribən olub: şəxsi heyət - təqribən 44.700 (+400) nəfər ləğv edilib, tanklar - 1.899 (+10) ədəd, zirehli döyüş maşınları - 4.195 (+16) ədəd, artilleriya sistemləri. - 1016 (+6) ədəd, MLRS/MLRS - 266 (+1) ədəd, hava hücumundan müdafiə sistemləri - 141 (+5) ədəd, təyyarələr - 234 (+0) ədəd, helikopterlər - 197 (+0) ədəd., İHA əməliyyat-taktiki səviyyədə - 795 (+2), qanadlı raketlər - 190 (+0), gəmilər / qayıqlar - 15 (+0) ədəd, avtomobil texnikası və tankerlər - 3130 (+69) ədəd, xüsusi texnika - 94 ( +1)”-məlumatda deyilir.
“Paşinyanı qətlə yetirə bilərlər, buna görə də onun mühafizəsi gücləndirilib”
Rusiya Xarici İşlər Nazirliyi (XİN) İrəvandakı “Surmalu” ticarət mərkəzində baş verən partlayışda Rusiya strukturlarının əli olması ilə bağlı ittihamlardan sonra Ermənistan XİN-ə nota göndərib. Rusiyanın Ermənistandakı səfirliyinin bununla bağlı açıqlamasında bildirilir ki, İrəvandakı ticarət mərkəzində baş vermiş faciədə Rusiya strukturlarının əli olması ilə bağlı ittihamlardan dərin hiddət keçirirlər.
“Biz bunu Rusiya-Ermənistan müttəfiqlik münasibətlərinə xələl gətirmək məqsədi daşıyan siyasi qüvvələrin birbaşa təxribatı kimi qiymətləndiririk. Ermənistan hakimiyyətindən bu cür qeyri-dost təzahürlərin qarşısını almağa yönəlmiş addımlar, o cümlədən lazımi ictimai açıqlamalar gözləyirik”, - deyə səfirlikdən vurğulanıb.
Qeyd edək ki, Ermənistan mətbuatında baş verən partlayışın Rusiya tərəfindən təşkil edildiyi ilə bağlı iddialar yayılıb. Məlumatlara görə, Rusiya bu təxribatı hazırlamaqla Ermənistanın daxilində siyasi sabitliyi pozmağa və vətəndaşları hakimiyyətdən narazı salmağa çalışır.
Putin administrasiyasının Ermənistan iqtidarı ilə münasibətlərinin normal olmadığı, Paşinyan hökumətinin Qərbə yaxınlığı səbəbindən uzun müddətdir Rusiya tərəfindən təzyiqlərə məruz qaldığı, hətta bir neçə dəfə onun hakimiyyətdən devrilməsi üçün cəhdlər göstərildiyi heç kimə sirr deyil. Bir çox ekspertlər baş verənləri Kremlin İrəvana növbəti təzyiq aləti kimi qiymətləndirirlər. Onların qənaətinə görə, Moskva Paşinyanı devirib öz adamını hakimiyyətə gətirməklə Ermənistana nəzarəti tam şəkildə əlinə almaq niyyətindədir. Azərbaycan Milli Məclisinin üzvü Vahid Əhmədov AYNA-ya açıqlamasında deyib ki, Rusiyanın Azərbaycana və Ermənistana təzyiqləri davam etməkdədir: “Çünki Rusiya fərqindədir ki, artıq postsovet məkanını itirir. Ukraynada baş verənlər, Moldova, Gürcüstan və digər nümunələr başqa keçmiş ittifaq dövlətlərinin də Rusiyaya olan bütün bağlarını qoparır. Artıq keçmiş sovetlər məkanında Rusiyaya qarşı dərin qəzəb hökm sürməkdədir və hamı Moskvadan qopmağa çalışır”.
“Şimal qonşumuz da dinc oturmayıb və müəyyən təzyiq alətləri ilə nəzarəti öz əlində saxlamağa çalışır. Bu məqsədlə müxtəlif təxribatlar törədir, münaqişələr yaradır, qonşu dövlətləri üz-üzə qoymağa çalışır. Tamamilə mümkündür ki, İrəvanda baş verənlərdə Rusiyanın da hər hansı formada iştirakı olsun. Lakin bu, sadəcə bir ehtimaldır və yekun sözü Ermənistanın hüquq-mühafizə orqanları deməlidir”, - deyə həmsöhbətimiz bildirib.
Deputatın sözlərinə görə, Paşinyanın Qarabağla bağlı mövqeyi Rusiyanı qane etmir: “Məlumdur ki, Paşinyan demokratik yolla iqtidara yiyələnib. 44 günlük müharibədə sonra məğlub olmasına rəğmən, Ermənistan cəmiyyəti tərəfindən yenidən dəstək qazanıb. Çünki Ermənistan ictimaiyyəti sülhdən yanadır və Rusiyanın forpostu olmaqdan yorulub. Həm revanşist qüvvələrə münasibətinə, həm də Qarabağ məsələsində tutduğu loyal mövqeyə görə fəaliyyəti Ermənistan cəmiyyəti tərəfindən rəğbətlə qarşılanır. Qərbə yaxınlığı və qeyd etdiyim səbəblər Rusiyanı qıcıqlandırır”.
“Bu mənada hər vəchlə ona təzyiq göstərməyə çalışırlar. Düşünürəm ki, Azərbaycan və Türkiyə ilə münasibətləri bərpa edərək, Ermənistan Rusiyanın bu təzyiqlərindən yayına biləcək. Əslində Ermənistan üçün ən doğru seçim də elə budur”, - deyə Əhmədov vurğulayıb. Dia.az-ın məlumatına görə, politoloq Zərdüşt Əlizadə isə AYNA-ya şərhində söyləyib ki, İrəvanda baş verən partlayışın təbii, yoxsa terror hadisəsi olması barədə qəti mülahizə yürütmək çətindir: “Çünki dünyanın müxtəlif yerlərində bu cür partlayışlar baş verir. Ermənistanda da bunun baş verməsi gözləniləndir. Burada kənar dövlətləri ittiham etmək, səbəbi xaricdə axtarmaq Ermənistan siyasi dairələri üçün xarakterikdir”.
“Lakin istisna da deyil ki, Rusiyanın da bu partlayışda əli olsun. Bu, elə bir məsələdir ki, araşdırmalardan sonra hüquqi müstəvidə aydınlıq gətirilməlidir. Ermənistan cəmiyyəti elə bir cəmiyyətdir ki, orada bu kimi olaylardan hər zaman siyasi məqsədlər üçün istifadə olunub. Digər yandan siyasi məqsədlər üçün terrordan istifadə bu ölkədə geniş yayılıb. Yaxın tarixdə siyasi məqsədlər üçün törədilən terror aktlarını da az görməmişik. Götürək elə Ermənistan parlamentində deputatların güllələnməsini. Orada buna bənzər hallar çox baş verib”, - deyə analitik qeyd edib.
Onun sözlərinə görə, Rusiya Ermənistana daim təzyiq göstərməyə çalışıb: “Təkcə Ermənistana deyil, digər postsovet ölkələrinə də. Elə Azərbaycana da. İmperialist maraqları naminə şimal qonşumuz hər zaman keçmiş ittifaq ölkələrini qarışdırıb, münaqişələr yaradıb. Qarabağ münaqişəsindən də təzyiq vasitəsi olaraq istifadə edib. Lakin bir məsələ var ki, artıq revanşist qüvvələrin Ermənistana təsir imkanları yoxdur. Köçəryan, Sərkisyan kimi siyasətçilər daxildə dayaqlarını tam şəkildə itiriblər. Paşinyan isə demokratik yolla iqtidara gəlib. Qərbə həm birbaşa, həm də mənəvi bağlılığı mövcuddur”.
“Bunu isə Moskvada həzm etmirlər. Bir neçə dəfə onu devirməyə səy göstərsələr də, buna nail olmayıblar. Bu dəfə də belə bir cəhd olacaqsa, nəticəsiz qalacaq. Həm də artıq Rusiya əvvəlki Rusiya deyil, xeyli zəifləyib. Paşinyan Qarabağ məsələsində ədalətli mövqe tutarsa, Ermənistan cəmiyyətindən tam dəstək alacaq və onu devirmək mümkün olmayacaq”, - deyə müsahibimiz diqqətə çatdırıb.
Əlizadə hesab edir ki, Paşinyanı qətlə yetirə də bilərlər: “Siyasi yollarla susdura bilmədiklərini fiziki üsullarla aradan götürmək Rusiyanın köhnə adətidir. Təbii ki, onlar Paşinyanı öldürmək istəyəcəklər. Bunu Ermənistan iqtidarında da bilirlər. Elə buna görə də onun mühafizəsi gücləndirilib. Bu məqsədlə xeyli peşəkar əməliyyatçılar cəlb edilib”.
Koronavirus epidemiyası davam etsə də, demək olar ki, bütün dünyada tədbirlər yumşaldılıb və insanlar normal həyatını davam etdirməyə çalışır. Lakin ekspertlər “səssiz” sağlamlıq böhranı barədə xəbərdarlıq edir.
Xarici KİV xəbər verir ki, mütəxəssislərin fikrincə, bu böhran hazırda koronavirusun yaratdığından daha çox ölümə səbəb ola bilər.
Ətrafınızda qəfildən səhhətində problemlər yaranmağa başlayan və hətta heç bir səbəb olmadan gözlənilmədən vəfat edən insanların sayının çox olduğunu müşahidə etmiş və ya eşitmiş ola bilərsiniz.
Peyvənd əleyhinə olan şəxslər bunun vaksinlərdən qaynaqlandığını desələr də, reallıq tamam başqadır.
İngiltərədə bu yaxınlarda aparılan bir araşdırma koronavirusun yayılması zamanı karantinin ictimai sağlamlığa təsirini müəyyənləşdirməyə çalışıb.
Böyük Britaniyanın Milli Statistika İdarəsinin (ONS) məlumatına görə, karantin dövründə adi haldan 1000-dən çox insanın öldüyünü müəyyən edib. Bu rəqəm isə aölüm nisbətini beş illik orta göstəricidən 14,4 % yüksək olması deməkdir.
Britaniyanın Milli Statistika İdarəsinin açıqladığı rəqəmlər hər həftə normaldan əlavə olaraq təxminən 1000 insanın koronavirusdan başqa xəstəliklərdən və şərtlərdən öldüyünü ortaya qoyub.
Əslində, ONS məlumatları göstərir ki, karantin dövründə beş illik orta göstəricidən təxminən 10.000 daha çox ölüm qeydə alınıb. Bu da karantinin təsirlərinin koronavirusdan daha çox ölümə səbəb ola biləcəyini göstərir.
Müayinə edilən halların 469-u COVID-19-la bağlı ölümlər olduğu halda, qalan 881-i "açıqlanmamış" qalıb.
“The Telegraph” qəzetində yer alan xəbərə görə, İngiltərə Səhiyyə Nazirliyinin müalicədəki gecikmələrlə əlaqədar rəqəmlərlə bağlı araşdırma əmri verib.
Bildirilir ki, koronavirus məhdudiyyətləri xərçəng, diabet və ürək xəstəliyi kimi xəstəliklərin müalicəsini təxirə salıb.
Keçən həftə Böyük Britaniyada açıqlanan statistika göstərdi ki, xəstəxanalarda təcili yardım standartları ən aşağı səviyyəyə çatıb. Belə ki, 20,000-dən çox xəstə 12 saatdan çox tibbi müalicə üçün gözləməli olub.
“The Telegraph”ın araşdırması göstərdi ki, bu ölümlərin əksəriyyəti əsasən qarşısı alına bilən ürək, insult və diabetlə əlaqəli xəstəliklərdir.
Məşhur ukraynalı teleaparıcı Serxiy Praytula Ukrayna xalqının bağışladığı pulla olaraq orbitdəki peyklərdən birinin tam istifadə hüququ alıb.
Xarici KİV xəbər verir ki, bu barədə Serxiy Praytula Xeyriyyə Fondu ilə Finlandiyanın “ICEYE OY” peyk şirkəti ilə müqavilə bağlanıb.
“Mən tarixdə gənc və yaşlı insanların bir araya gələrək öz dövlətləri üçün peyk aldıqları başqa bir hadisəni bilmirəm”- Parytula söyləyib.
Ukrayna xalqının ianələri ilə yer üzünü müşahidə edə bilən peykdən istifadə hüququ Ukrayna Silahlı Qüvvələrinin istifadəsinə verilib.
Sözügedən peykin Rusiya qüvvələrinə qarşı Ukrayna qüvvələrinə üstünlük təmin etmək məqsədi daşıdığı, peykin buludların arasından yer üzünü müşahidə edə bildiyi qeyd edilib.
Latviyanın Oqre bələdiyyəsində diplomatik kuryer Teodor Nettenin xatirə daşı da daxil olmaqla, beş sovet abidəsinin sökülməsinə qərar verilib.
"Bu barədə bələdiyyənin mətbuat xidmətindən məlumat verilib.
“İkskile dəmir yolu vağzalında SSRİ Xarici İşlər Xalq Komissarlığının diplomatik kuryeri Teodor Nettanın şərəfinə qoyulmuş xatirə daşının, habelə totalitar rejimlərin terror qurbanlarının xatirəsinə ucaldılmış abidənin sökülməsi barədə qərar qəbul edilib. Madlienadakı köhnə məktəbin yaxınlığında yerləşir”, - məlumatda deyilir.
Yumpravskaya volostunda partizan Vitolds Jauntirans və Suntazhskaya volostunda partizan Martins Rudzitis abidələrinin, Mazozoli kəndini azad edənlərin abidəsinin sökülməsi də planlaşdırılır. Onların avqustun 19-da sökülməsi planlaşdırılır.
Bundan əvvəl Estoniyanın Narva şəhərində T-34 tankının abidəsi sökülüb.(Publika.az )
ABŞ administrasiyası Çinlə gərginliyin yüksək olduğu bir vaxtda Pekinlə suverenlik münaqişəsində olan Tayvanla yeni ticarət təşəbbüsü çərçivəsində rəsmi danışıqlara başlayacaq.
Xarici KİV xəbər verir ki, ABŞ Ticarət Nümayəndəliyi (USTR) açıqlamasında bildirib ki, Birləşmiş Ştatlar və Tayvan "21-ci Əsr Ticarəti üzrə ABŞ-Tayvan Təşəbbüsü" çərçivəsində danışıqlar səlahiyyətinə dair razılığa gəliblər.
Danışıqların birinci raundunun bu ilin payızının əvvəlində baş tutacağı gözlənilir.
Bəyanatda qeyd olunub ki, dövlət müəssisələrinin pozucu təcrübələri və qeyri-bazar siyasət və praktikaları da gündəmdədir.
USTR-nin bəyanatında bildirilir ki, ABŞ danışıqlar boyu Konqres və işçilər, iş dünyası, ətraf mühit qrupları və digər əsas maraqlı tərəflərlə məsləhətləşmələri davam etdirəcək.
ABŞ Ticarət Nümayəndəsinin müavini Sara Biançi açıqlamasında Tayvan ilə ticarət və investisiya əlaqələrini dərinləşdirəcək danışıqlara başlayacaqlarını bildirib:
"Biz yüksək standartlı öhdəliklər və mənalı nəticələr əldə etmək üçün daha ədalətli, daha firavan və dayanıqlı 21-ci əsr iqtisadiyyatının qurulmasına kömək edəcək danışıqlarda 11 ticarət sahəsini əhatə edən iddialı bir proqram həyata keçirməyi planlaşdırırıq" - o bildirib.
Yüksək dəqiqlikli snayper tüfəngləri istehsal edən Rusiyanın "Lobaev Arms" şirkəti snayperi əvəz edə biləcək "Minirex" mobil hərbi robotu üzərində işi bərpa etməyi planlaşdırır.
Publika xəbər verir ki, bu barədə şirkətin təsisçisi Vladislav Lobayev "Army-2022" forumu çərçivəsində danışıb .
Agentliyin məlumatına görə, robot ilk dəfə "Interpolitech-2016" sərgisində nümayiş etdirilib, lakin şirkət stasionar snayper sistemlərinə diqqət yetirdiyi üçün layihə tamamlanmayıb.
"Biz "Minirex" layihəsinin bərpasına qayıtmağı planlaşdırırıq, indi dəqiq tarix deyə bilmərəm, amma belə planlar var", - TASS Lobayevin sözlərindən sitat gətirib.
"Minire"x relslərdə hərəkət edir, pilləkənləri qalxa və dağıntıların öhdəsindən gələ bilur. Robot düşmən snayperlərini hesablamağa imkan verən yüksək ayırdetmə qabiliyyətinə malik kameralar və termal kameralarla təchiz edilib. O, 7,62 x 39, 9 x 39 mm çaplı döyüş modulları və snayper 338LW və 40LW ilə təchiz oluna bilər.
Eyni zamanda, yığılmış vəziyyətdə, kürək çantasında daşına bilər.
Avropa İttifaqının altı əsas ölkəsi fevral ayından bəri ilk dəfə Rusiyanın Ukraynayay genişmiqyaslı işğal əməliyyatı fonunda Kiyevə yeni hərbi öhdəliklərdən imtina edib. Bunu da hərbi yardımın azaldılması istiqamətində bir mesaj hesab etmək olar.
Bu barədə “Politico” nəşri Kiel Dünya İqtisadiyyatı İnstitutunun (IfW) məlumatlarına istinadən yazır.
Təhlilçilər bildirir ki, hətta Fransa və Almaniya kimi ölkələr yardım göstərməkdə acizlik çəkirlər. Bunun da nəticəsində Kiyevin həlledici əks-hücuma başlayan zaman silah tədarükü azala bilər.
Təşkilatın Ukraynaya dəstəyi monitorinq edən qrupun rəhbəri Kristof Trebeş deyib ki, aprelin sonundan Avropanın Ukraynaya hərbi yardımla bağlı öhdəliklərində azalma tendensiyası müşahidə edilməkdədir.
Keçən həftə Kopenhagendə keçirilən Qərb müttəfiqlərinin görüşündə bəyan edilmiş 1,5 milyard avroluq yeni öhdəliklərin məbləği əvvəlki rəqəmlərlə müqayisədə “çox kiçik”dir.
Onun sözlərinə görə, müharibə kritik mərhələyə daxil olsa da, yeni yardım təşəbbüsləri yoxdur.
Latviyanın müdafiə naziri Artis Pabriks bu yaxınlarda Politico-ya bildirib ki, Fransa və Almaniya kimi ölkələr Ukrayna ilə Rusiyaya qarşı mübarizə aparmaq üçün daha çox iş görməlidir: “Əgər müharibənin mümkün qədər tez bitməsini istəyiriksə, onlar özlərinə sual verməlidirlər ki, onlar kifayət qədər işlər görürlərmi?”
"NATO-nun bayrağı altında fəaliyyət göstərən Kosovodakı Beynəlxalq Təhlükəsizlik Qüvvələri (KFOR) regionda sabitliyə təhlükə yaranacağı təqdirdə vəziyyətə müdaxilə etməyə hazırdır".
“Report” TASS-a istinadən xəbər verir ki, bunu NATO-nun Baş katibi Yens Stoltenberq Brüsseldə Serbiya Prezidenti Aleksandr Vuçiçlə görüşdən sonra keçirilən mətbuat konfransında bildirib.
“KFOR, BMT mandatı əsasında, sabitliyə təhlükə yaranarsa müdaxilə etməyə hazırdır”, - o deyib.
Y.Stoltenberq jurnalistlərin hazırda eskalasiya riskinin olub-olmaması ilə bağlı sualını da cavablandırıb: “Risk hər zaman var, ona görə də bu danışıqları aparmağımız vacibdir. Eskalasiyanın qarşısını almaq üçün hər şey edilməlidir. NATO öz üzərinə düşəni edir. Ən yaxşısı gərginliyin qarşısını almaqdır, lakin lazım gələrsə, hərəkətə keçməyə hazırıq”.
Qeyd edək ki, Serbiya Prezidenti və tanınmamış Kosovonun Baş naziri Avropa İttifaqının xarici işlər və təhlükəsizlik siyasəti üzrə ali nümayəndəsi Jozep Borrellin dəvəti ilə Brüsseldə səfərdədir. Aİ-nin Qərbi Balkanlar üzrə xüsusi nümayəndəsi Miroslav Layçakın avqustun 18-də onlarla görüşəcəyi gözlənilir.