Ukrayna Prezidenti Vladimir Zelenski Rusiya ilə danışıqlar prosesinin formatı barədə referendum keçirəcək.

Axar.az Report-a istinadən xəbər verir ki, bunu Ukrayna Prezident Administrasiyasının rəhbəri Andrey Boqdan deyib.

"Biz təkcə deputatlar və prezidentin deyil, həm də Ukrayna xalqının qərar qəbul etməsi üçün məsələnin xalq referendumuna çıxarılmasını nəzərdən keçiririk", - deyə o, "112 Ukraina" telekanalının efirində bildirib.

Məmurun sözlərinə görə, referenduma Rusiya ilə sülh danışıqlarının nailiyyətləri və Donbas münaqişəsi üzrə qərar barədə məsələ çıxarılacaq.

Zelenskinin komandası bunun üçün referendum barədə qərar qəbul etməyə ümid bəsləyir.

ABŞ Moskvaya qarşı tətbiq etdiyi yeni sanksiyalarla Mayk Pompeonun Rusiya səfərinin nəticələrini silməyə çalışır.

Axar.az xəbər verir ki, bu barədə Rusiya Xarici İşlər Nazirliyinin bəyanatında deyilib.

“ABŞ Pompeonun səfərindən sonrakı bir həftə ərzində ikinci dəfə Rusiyaya qarşı qərarları elan edərək, bu səfərin müsbət nəticələrini silməyə tələsir. Suriya havadan müdafiə sisteminin gücləndiriməsi üçün edilən yardımlardan dolayı ABŞ-ın hesablaşmaq istəyi ortadadır. Əlbəttə ki, Rusiya öz mövqeyindən dönməyəcək. Vaşinqton bunu istəsə də, istəməsə də...” - deyə bəyanatda bildirilib.

Qeyd edək ki, ötən gün ABŞ Rusiyaya qarşı növbəti sanksiyalarını elan edib.

Nikol Paşinyan xalqa çağırış etməklə öz acizliyini və siyasi zəifliyini bir daha sübut etdi.

Bu sözləri Axar.az-a Ermənistanın Baş naziri Nikol Paşinyanın keçmiş ölkə rəhbərlərini Qarabağı və işğal edilmiş digər rayonları Azərbaycana qaytarmağa çalışmaqda ittiham etməsi ilə bağlı çağırışına münasibət bildirən siyasi elmlər üzrə fəlsəfə doktoru, Bakı Politoloqlar Klubunun sədri Zaur Məmmədov deyib.

Politoloqun sözlərinə görə, Paşinyan Robert Köçəryanın azadlıqda olmasının onun hakimiyyəti üçün böyük təhlükə olduğunu yaxşı başa düşür:

“Nikol Paşinyanın xalqa çağırışı və səsləndirdiyi fikirlər çox gülünc və sərsəmdir. O, Ermənistanın keçmiş hakimiyyətini torpaqları Azərbaycana müharibə yolu ilə qaytarmaq istəməkdə ittiham edir. Paşinyan indi çox sərt mövqe ilə üzləşib. Robert Köçəryanın azadlığa buraxılması onun hakimiyyətdə olduğu müddətdə ilk ciddi məğlubiyyəti idi. Məğlub olduğunu qəbul etməyən Paşinyan xalqı küçələrə çağırdı. Bu çağırışın baş nazir tərəfindən edilməsi onun acizliyini göstərir.

O ki qaldı Qarabağ məsələsinə, Ermənistanda hakimiyyətdə qalmaq və güclənmək üçün bütün erməni siyasətçilər oradan istifadə etməyə çalışır. Paşinyan da indi Qarabağ ermənilərini öz tərəfinə çəkməyə səy göstərir, lakin bu, elə də asan məsələ olmayacaq”.

Politoloq İrəvanda iqtidar və müxalifət arasında razılıq əldə olunmasının mümkünsüz olduğunu deyib:

“Nikol Paşinyanla Robert Köçəryanın razılığa gəlməsi mümkün deyil. Onlar arasında mübarizə daha da gərginləşəcək. Paşinyanın əsas məqsədi Köçəryanı yenidən həbsə atmaqdır. Lakin məhkəmə qərarına görə, hələlik o, həbs edilə bilməz. Bu qərar onu çox narahat edir. Çünki Paşinyan çox yaxşı başa düşür ki, Köçəryanın azadlıqda olması siyasi revanşa gətirib çıxara bilər. Sərkisyan və Köçəryan onun üçün çox ciddi rəqibdir. Qarabağ demək olar ki, hələ də onların əlindədir. Hələ ki, cəmiyyətin bütünlüklə bölünməsindən söhbət getmir. Lakin gələcəkdə Paşinyanın siyasəti uğurlu nəticə verməsə, bu zaman onun reytinqi aşağı düşəcək. Bundan istifadə edən müxaliflər xalqı ikiyə bölməyə çalışacaq. Hesab edirəm ki, bu, çox uzun çəkməyəcək. Artıq sosioloji araşdırmalara görə, Paşinyanın reytinqi 30 faiz aşağı düşüb”.

Qeyd edək ki, Ermənistanda Robert Köçəryanın azadlığa çıxmasından sonra Paşinyan xalqa müraciət edərək, onları küçələrə çağırıb. Erməni baş nazir həmçinin, ölkədəki keçmiş hakimiyyət nümayəndələrinin hərbi fəaliyyətləri provokasiya edərək, əraziləri Azərbaycana verməyə və bunun da məsuliyyətini İrəvanın üzərinə atmağa çalışdıqlarını iddia edib.

Bu gün İran Prezidenti Həsən Ruhani ölkənin qərbində yerləşən Qərbi Azərbaycan vilayətinə səfər edəcək.

Trend-in məlumatına görə, bunu İranın Qərbi Azərbaycan vilayətinin valisi Məhəmməd Mehdi Şəhriyari deyib.

M.Şəhriyarinin sözlərinə görə, İran prezidentinin Qərbi Azərbaycan vilayətinin Maku rayonuna səfəri çərçivəsində 27 layihə istismara veriləcək. Urmiya gölünün bərpası istiqamətində 47 trilyon rial (təxminən 1,11 milyard dollar) dəyərində layihənin açılışı olacaq.

Vali əlavə edib ki, 27 layihəyə 4,46 trilyon rial (təxminən 106 milyon dollar) investisiya yatırılıb.

Yaxın Şərqdə vəziyyətin mürəkkəb olaraq qalması müxtəlif geosiyasi "oyunlar"ı meydana gətirməkdədir. Amerikanın İrana qarşı sanksiyaları gücləndirməsi və ona hərbi-informasiya təzyiqləri etməsi digər böyük gücləri də hərəkətə gətirib. Bu proses Mayk Pompeonun Avropa və Rusiya turnesindən sonra yeni dinamika alıb. Onun ardınca Avstriyanın prezidenti Aleksander Van der Bellen Soçiyə gedib. Onun Rusiya prezidenti ilə söhbətində əsas məsələ yenə də İran olub. Brüsselin bu məsələ ilə bağlı konkret təklifləri vardır. Ancaq Vladimir Putin fərqli düşündüyünü ifadə edib. Bununla həm Avropanın İranla bağlı narahatlığı, həm də Rusiyanın özünü başlıca geosiyasi güc kimi aparmağa başlaması ekspertlərin diqqətindən yayınmayıb. Bu bağlılıqda yaranmış vəziyyətin geosiyasi təhlili üzərində dayanmağa ehtiyac görürük.

Vaşinqtondan sonra Brüssel: Soçidəki görüşlər

Amerikanın İranla bağlı son dövrlərdə atdığı sərt addımların qlobal və regional geosiyasi proseslərə təsirinin əlamətləri artıq hiss edilir. Ekspertlər hesab edirdilər ki, bu təsirlər başlıca olaraq gərginləşmə istiqamətində olacaq. Görünür, onlar haqlı imişlər. Bu məsələ ətrafında böyük geosiyasi güclərin yeni səviyyədə manevrləri start götürüb. O cümlədən Avropa İttifaqı Rusiya ilə İran problemi ətrafında müzakirələrə başlayıb. Avstriya prezidentinin Soçidə Vladimir Putinlə görüşməsi və orada birbaşa İranla əlaqədar fikir mübadiləsi aparması bunun konkret əlamətlərindəndir.

Soçidə Avstriya prezidentinin əməkdaşlıqla bağlı təklifinə Rusiyanın dövlət başçısı diplomatik ibarələrlə cavab verib ki, İranın əvəzinə qərar qəbul edə bilməz və Rusiya "yanğınsöndürən deyil ki, hər yerdə hər şeyə vaxtında müdaxilə edə bilsin". Yəni İran elə məsələdir ki, öncə qlobal miqyasda böyük dövlətlər onun barəsində ortaq fikrə gəlməlidirlər. Və Rusiya heç zaman Tehrana güc tətbiq etməklə və ya təzyiq göstərməklə onu Vaşinqtonun iradəsini qəbul etməyə məcbur edə bilməz.

Rusiya, ümumiyyətlə, İrana münasibətdə bu formatı məqbul hesab etmir. V.Putin həm M.Pompeoya, həm də Avstriya prezidentinə Kremlin problemə öz baxışı olduğunu çatdırıb. Moskva müstəqil və əsas geosiyasi oyunçulardan biri kimi, maraqlarının təmin olunduğu formata razı ola bilər. Bu səbəbdən istər Amerika, istərsə də Aİ öncə bütövlükdə dünyaya baxışlardakı incəlikləri araşdırıb, ortaq nəticəyə gəlib, ümumi qərara gəlsələr, həmin əsasda hərəkət edib, İran məsələsini həll etmək olar.

Bununla Qərb siyasi xadimlərinin Soçiyə dalbadal gəlmələrinin başlıca səbəbi aydın olur. Onlar İran məsələsində Kremllə ortaq mövqeyə gəlməyi hədəfləyiblər. Bu isə nəinki İranın, hətta bütün Yaxın Şərqin siyasi taleyini həll etmək deməkdir. Hələlik tərəflərin heç bir ortaq fəaliyyət planı yoxdur. Lakin aydın olur ki, ABŞ-ın öz mövqeyi var və Aİ də həmin mövqe ilə razı deyil. Belə ki, Avropa açıq bəyan edir ki, İranla nüvə sazişi qalmalıdır və bu, xilas yoludur. Əks halda, Yaxın Şərqlə yanaşı, Avropada da sabitliyə ciddi təhlükələr meydana gələ bilər. O cümlədən İranın ballistik nüvə raketlərinə sahib olması ciddi geosiyasi gərginlik yarada bilər (qərblilərin məntiqi ilə).

Moskva isə həm İranın nüvə planlarına təmkinlə yanaşır, həm də avropalıların nə istədiklərini yaxşı bilir. Bu da İran məsələsində böyük dövlətlərin ortaq fəaliyyəti ehtimalını çox aşağı salır. Lakin yenə də müxtəlif səviyyələrdən Rusiya ilə Aİ-nin birgə fəaliyyət göstərməsinə çağırışlar eşidilir (bax: məs., Андрей Кортунов, Мишель Дюкло. Иран на Ближнем Востоке: часть проблемы или часть решения? / РСМД, 13 may 2019).

Həmin bağlılıqda ekspertlər hesab edirlər ki, İranı "aldanmış kəvakib" vəziyyətinə salmaq kimsənin xeyrinə deyil. Bunun siyasi, tarixi, geosiyasi və mədəni səbəblərini göstərməyə çalışırlar. İdeya bundan ibarətdir ki, İran tarixən Yaxın Şərqlə sıx bağlı olub və onu indi oradan kənarda tutmaq mümkün deyildir. Vaşinqtonun bu istiqamətdə addımlar atması isə bütövlükdə regionu və dünyanı təhlükəyə atır. Belə ki, Yaxın Şərqdə kifayət qədər gücə malik olan İran bir çox yerlərdə dağıdıcı fəaliyyət göstərə bilər. Deməli, Avropa və Rusiya məsələnin bu tərəfinə diqqət yetirməlidirlər. Konkret olaraq, İran regionun əhəmiyyətli dövlətlərindən biri kimi qəbul edilməli və Yaxın Şərqdə onun geosiyasi rolu müəyyənləşməlidir. Müəyyənləşmə altında ekspertlər hər şeydən öncə İranın regiondakı təsirlərinin sərhədlərinin qoyulmasını nəzərdə tuturlar. Bunun adi dildə ifadəsi ondan ibarətdir ki, Avropa, Rusiya və Çin İranın müasir mərhələdə geosiyasi rolunu müəyyənləşdirib, onu nəzarət altında saxlamağı təmin etməlidirlər (bax: əvvəlki mənbəyə).

Tehran üçün üç addım: Yaxın Şərqin "geosiyasi ağaları"

Bunun üçün ilkin addım nüvə sazişini xilas etməkdən ibarət olmalıdır. Çünki Tehranın nüvə silahına malik olması böyük dövlətlər üçün təhlükədir. Nüvə istiqamətində tədqiqatların dayandırılması isə həm İranın aqressivliyinin qarşısını alar, həm də onu Avropa, Rusiya və Çinlə əməkdaşlığa açıq saxlayar.

İkinci addım kimi İranın Suriyadakı rolu ilə bağlı qarşılıqlı anlaşma əldə etmək düşünülə bilər. Bu məsələyə ekspertlər ciddi əhəmiyyət verirlər. Tehranın Suriyadan tamamilə sıxışdırılması mümkün deyil. Moskva bu addıma heç getməz də. Çünki İran regionun yeganə dövlətidir ki, Dəməşq onun ölkədə hərbi mövcudluğuna razıdır. İran həm də Rusiyanın orada müttəfiqi, Astana prosesinin iştirakçısıdır. Tehran Bəşər Əsəd ordusuna indi də böyük kömək edir. Əslində, ekspertlərin fikrinə görə, həmin ordu sıralarında İrandan olan hərbçilər üstünlük təşkil edirlər.

Bütün bunların fonunda İranı Suriyadan geosiyasi və hərbi qüvvə olaraq necə ata bilərlər? Amerika və İsrail məhz buna çalışırlar. Nəticədə, regionda gərginlik daha da çoxalır. Təbii ki, Avropanın bu cür düşünməsi təəccüblü deyil. Ancaq əsas məsələ yenə də İranın Suriyadakı varlığının məzmun və miqyasının kim tərəfindən müəyyənləşdirilməsindədir. Avropa arzulayır ki, bu məsələdə də ip Aİ ilə Rusiyanın əlində olsun. Tehran üçün kənardan sərhəd müəyyənləşdirsinlər və o, ona sözsüz əməl etsin. İranın belə bir mövqeni qəbul etməsi mümkünsüz görünür.

Üçüncü addım kimi İranın regionun gələcək təhlükəsizlik sistemində yeri və rolunu müəyyənləşdirmək nəzərdə tutulur (bax: əvvəlki mənbəyə). Bu bənd daha çətin, lakin ən əhəmiyyətli hesab edilir. İranı hər hansı bir şəkildə Yaxın Şərqin gələcək təhlükəsizlik sistemində nəzərdə tutmaq, faktiki olaraq, bu sistemi yaratmamaq deməkdir. Heç bir arqument bu tezisi dəyişə bilməz. Bunun tarixi, siyasi, geosiyasi və hərbi səbəbləri vardır.

Ancaq hesab edilir ki, İranın da daxil olduğu "inklüziv kollektiv təhlükəsizlik sistemi"nin hətta 3-5 ilə yaranması çox çətindir. Buna baxmayaraq, Rusiya və Avropanın belə bir sistemə ortaq baxışının olması mühüm nailiyyət və həm Tehran, həm də onun regiondakı rəqibləri üçün aydın siqnal olardı. Görünür, bu mesajda əsas məqam ABŞ-la İran arasındakı münaqişənin Yaxın Şərqin taleyində həlledici olmaya da bilməsindən ibarətdir. Bu kontekstdə Avropa ilə Rusiya İranla region dövlətləri arasında etibarlığı artıra biləcək incə addımlar ata bilərlər. Konkret deyilsə, Avropa Rusiyanı öz yanına çəkib, Vaşinqtonun planlarını pozmağı təklif edir.

Bütün bunlar təbii ki, maraqlı olduğu qədər də düşündürücüdür. Çünki hiss olunur ki, İran məsələsi ətrafında bütövlükdə Yaxın Şərqdə geosiyasi mənzərənin yenidən formatlaşdırılması prosesi meydana gəlir. Burada görünən başlıca məqam ondan ibarətdir ki, regionun taleyini yerli xalqların və dövlətlərin deyil, kənarda olan böyük geosiyasi güclərin müəyyənləşdirməsinin vacibliyi kursu seçilib. Bu baxımdan kənar qüvvənin Amerika, Aİ, Rusiya və ya Çin olmasının elə bir əhəmiyyəti yoxdur. Yanaşmanın fəlsəfəsi İkinci dünya müharibəsindən sonrakı ab-havanın saxlandığına dəlalət edir. Supergüclər indi də özlərini yeni müharibənin qalibləri kimi aparmağa çalışır və bu mövqedən çıxış edərək dünyanın istənilən regionunda özlərinə uyğun bölgü aparmağı düşünürlər.

Məsələn, onlar istəyirlər ki, regionun geosiyasi düzəni "belə olsun", İranın oradakı rolu "elə olsun", filan dövlətlər də filanlarla "barışsın" və s. Bu göstərişi verənlər də növbəti dəfə dünyanın aparıcı kəsimi kimi qalsınlar və bir neçə ildən sonra hər şey yenidən başlasın: dünyanı yenidən bölmək üçün müsəlmanların canına daraşsınlar!

Şübhə yoxdur ki, bu cür düşüncə bəşəri deyil və milyonlarla insanın yeni fəlakətlərə sürüklənməsinə yol açır. Yaxın Şərqin taleyini regionda yerləşən dövlətlər və orada yaşayan xalqlar müəyyən etməlidirlər. Kənardakılar müdaxilə etməməlidirlər. Suriya necə dövlət olacaq və ya İraqda hansı quruluş seçiləcək, İranda hansı silahlar istehsal olunacaq kimi məsələlər həmin dövlətlərin daxili işləridir!

Nyustayms

ABŞ “Huavei”in gücünü dəyərləndirmir.

Axar.az xəbər verir ki, bunu Çin mətbuatına açıqlamasında “Huavei” şirkətinin təsisçisi Jen Çjenfey deyib.

“Biz ABŞ tərəfindən real nəzarəti bir il öncədən hiss edirdik. ABŞ siyasətçiləri özlərinin hazırkı fəaliyyətləri ilə “Huavei”in gücünü dəyərləndirmirlər”, – deyə o bildirib.

Qeyd edək ki, ABŞ bundan öncə “Huavei” şirkətini qara siyahıya daxil edib. Vaşinqton həmçinin öz şirkətlərinin bu kompaniya ilə biznes əlaqələri qurmasına qadağa qoyub.

Quql da “Huavei” ilə əməkdaşlığını dayandırdığını açıqlayıb.

Seçkilərdə qalib gəldiyimiz şəhərlər də oldu, məğlub olduğumuz da. Məsələn, Ankarada uduzduq.

Axar.az xəbər verir ki, bu sözləri Türkiyə Daxili İşlər naziri Süleyman Soylu deyib.

"Ancaq İstanbulda seçkidən sonra gördüklərim məni dəhşətə gətirdi. Baş verənlər tükürpərdici idi. Kiçik nüansları başa düşmək olar. Məsələn, Əhmədin verdiyi səsi Məhmədə yazdılar. Bu, səhvən də ola bilər, qəsdən də. Amma İstanbulda Binəli Yıldırıma verilmiş 207 səs hesaba alınmadı", - Soylu bildirib.

Ukraynada dekommunizasiya faktiki olaraq başa çatıb.

Axar.az xəbər verir ki, bu sözləri Ukrayna Prezidenti Pyotr Poroşenko deyib.

“Son 5 ildə ölkəmizdə dekommunizasiya başa çatıb, kommunist ideologiyası qadağan edilib. Kommunist terrorunun faciəsindən gələcəkdə dərs çıxarılmalıdır. Ukrayna torpaqlarında “Rus dünyası”nın yenidən canlandırlıması cəhdlərinə qarşı etibarlı qorunma olmalıdır”, - deyə dövlət başçısı bildirib.

Qeyd edək ki, mayın 20-də yeni Prezident Vladimir Zelenskinin inauqurasiya mərasimidir.

Biz "Patriot"ları Barak Obamanın dövründə istədik, ancaq eks-prezident bizə "Konqres icazə vermir" dedi.

Axar.az xəbər verir ki, bu açıqlama ilə Türkiyə Prezidenti Rəcəb Tayyib Ərdoğan çıxış edib.

"Trampa dedik ki, bu işin önünü kəsən Obama oldu. Sən Konqresdən icazə ala bilirsənsə, biz "Patriot" də alaq. Həm S-400, həm də "Patriot"umuz olsun. F-35 qırıcılarından da 5 dənəsini bizim general və pilotlarımıza təhvil verdilər. Ancaq aparatları vermədilər. Hazırda oraya 7 milard dollar dəyərində təyyarə hissələrini göndəririk. Bir az naz edirlər, topu meydanın ortasında oynadırlar, ancaq bu iş mümkünsüz deyil. Gec-tez, biz F-35-ləri alacağıq. S-400-lər də ölkəmizə gələcək", - Ərdoğan qeyd edib.

ABŞ Prezidenti Donald Tramp impiçmentin astanasında dayanıb.

Axar.az xəbər verir ki, bu barədə ABŞ Nümayəndələr Palatasının demokratlardan olan üzvü Castin Amaş bildirib.

Amaşın sözlərinə görə, Tramp xüsusi fəaliyyətlərə cəlb olunub və buna uyğun davranış nümayiş etdirib. Xüsusi prokuror Robert Müllerin hazırladığı hesabatda məhkəməyə verilməsini tələb edən onlarla sübutlar var.

“Bu cür hesabat əsasında ABŞ-dakı istənilən vəzifəli şəxsə qarşı ittiham irəli sürülərdi”, - Amaş bildirib.