 |
|
2019.01.25. 19:53
Yunanıstan parlamenti keçmişdə Yuqoslaviyadan ayrılan Makedoniya Respublikasının adının Şimali Makedoniyaya dəyişdirilməsi barədə Afina və Skopye arasında imzalanan sazişi təsdiqləyib.
Axar.az xəbər verir ki, yanvarın 25-də Yunanıstanın əsas qanunverici orqanında üç günlük müzakirələrdən sonra keçirilən səsvermədə 300 deputatdan 153-ü sazişin lehinə, 146-sı əleyhinə səs verib, bir nəfər isə bitərəf qalıb. Sənədin ratifikasiyası üçün zalda olan parlament üzvlərinin sadə səs çoxluğu kifayət etsə də, Baş nazir Aleksis Çipras sazişi azı 151 səslə qəbul etdirməyi qarşısına məqsəd qoymuşdu.
Afina və Skopye 2018-ci il iyunun 17-də Yunanıstanın Prespes bələdiyyəsində Makedoniyanın adının Şimali Makedoniya Respublikasına dəyişdirilməsi barədə saziş imzalayıblar. Həmin saziş bir müddət öncə Makedoniya parlamenti tərəfindən təsdiqlənib.
Makedoniya Respublikasının adı ətrafında yaranmış vəziyyət bu ölkənin Avropa İttifaqı və NATO ilə yaxınlaşmasına mane olur. Belə ki, vilayətlərindən birinin adı Makedoniya olan Yunanıstan Makedoniya Respublikasının adına qarşı çıxır. Bu səbəbdən Yuqoslaviya Sosialist Federativ Respublikası dağıldıqdan sonra Makedoniya BMT-yə keçmiş Yuqoslaviyanın Makedoniya Respublikası adı ilə qəbul edilib. Yunanıstan xəritələrində isə onun adı ölkə paytaxtının adı ilə - Skopye kimi qeyd olunur.
***
Bu gün tarixi gündür.
Bu sözləri Yunanıstan Baş naziri Aleksis Çipras Afina və Skopye arasında imzalanan sazişin təsdiqlənməsi ilə bağlı açıqlamasında deyib.
“Yunanıstan tarixin önəmli hissəsini qoruyur. Keçmiş Makedoniya mirası... Bu gün Balkan tarixində yeni səhifə açdıq. Milliyətçi nifrətin, anlaşılmazlıqların və qarşıdurmaların yerini dostluq, sülh və əməkdaşlq tutdu”, - deyə o bildirib.
Yunanlar heç bir şeyi Türkiyə tərəfi ilə bölüşmək istəmir.
Axar.az xəbər verir ki, bunu Türkiyə Xarici İşlər naziri Mövlud Çavuşoğlu Şimali Kipr Respublikasının Prezidenti Mustafa Akıncı ilə görüşündə bildirib.
"Cənab Anastasiadis ikitərəfli görüşlərimizdə onsuz da bunu etiraf edib. Nyu Yorkdakı görüşümüzdə başqa variantlar üzərində dayanıb. Ancaq konkret olaraq nə istədiklərini bildirməyiblər", - Çavuşoğlu qeyd edib.
Akıncı isə artıq ikidövlətli həll prosesinin gündəmə gəldiyini, ancaq yunan icmasının buna hazır olmadığını söyləyib.
2008-ci ildə konstitusiya quruluşunu devirmək ittihamı ilə həbs olunmuş Ermənistanın sabiq prezidenti Robert Köçəryan yanvarın 25-də həmfikirlərinə müraciətlə çıxış edərək Nikol Paşinyanın hazırkı hakimiyyətini sərt tənqid edib və özünü siyasi məhbus adlandırıb.
Axar.az xəbər verir ki, respublikanın sabiq rəhbərinin bu barədə bəyanatı ona məxsus qeyri-rəsmi saytda dərc olunub.
“Ermənistanın hakimiyyət orqanları baş nazir Nikol Paşinyanın rəhbərliyi ilə siyasi və dövlət idarəçiliyində tam gücsüzlük nümayiş etdirir. Aydın görünür ki, yaxın zamanlarda biz böyük məyusluq dalğasının şahidi olacağıq. İqtisadi, daxili və xarici siyasətdə yol verilən kobud səhvlər isə bizə çox baha başa gələcək. Cinayət işimə gəldikdə isə, mən siyasi məhbusam”, - deyə Köçəryan müraciətində bildirib.
Ermənistanın sabiq prezidenti, həmçinin barəsində başlayan cinayət işini “perspektivsiz məşğuliyyət” adlandırıb və “bir neçə avantürist tərəfindən qurulan saxta işin artıq puça çıxdığını” deyib. “Mən hələ də bu işi hüquqi zibil hesab edirəm. Həbsxana məni siyasi fəaliyyətdən imtina etməyə məcbur edə bilməz”. – deyə o, sözlərinə əlavə edib.
Suriyada gedən proseslər elə bir dalana girib ki, orada olan problemləri bir, yaxud bir neçə görüşlə həll etmək mümkün deyil.
Bu sözləri Axar.az-a açıqlamasında analitik Vüqar Zifəroğlu Ərdoğan-Putin görüşü zamanı Suriya məsələsi ilə bağlı son qərarın verilmədiyi barədə yayılan məlumatı şərh edərkən deyib. O bildirib ki, Türkiyə və Rusiya prezidentlərinin keçirdiyi görüşün özü kifayət qədər ciddi əhəmiyyətə malikdir:
“Mən deməzdim ki, Suriya məsələsi ilə bağlı müəyyən addımların atılmasına bu görüşün heç bir təsiri olmayacaq. Bu görüşdən sonra müəyyən razılıqların əldə edilməsi, ən azından problemin həll edilməsi üçün müəyyən addımların atılması gözləniləndir. İkinci bir məsələ isə Türkiyənin Suriyanın şimalında təhlükəsizlik zonasının yaradılması ilə bağlı təklifidir ki, bu, Türkiyənin maraqlarına cavab verən məsələdir və bu təklifin reallaşması təkcə Türkiyə-Rusiya münasibətlərindən asılı deyil. Bölgədə marağı olan digər ölkələr - İran, Suriya, Qərb faktoru da var. Bütün bunlar hamısı proseslərin yalnız ikitərəfli münasibətlərdən asılı və iki ölkə arasında müzakirə ediləcək bir məsələ olmadığını deməyə əsas verir”.
Analitik vurğulayıb ki, ümumilikdə götürəndə isə Türkiyənin Suriyanın şimalında bufer zona yaradılması ilə bağlı irəli sürdüyü təklif bir çox aktorun maraqlarına müəyyən qədər cavab verə bilər:
“Türkiyənin isə bunun müqabilində onlara nə təklif edəcəyi maraqlıdır. Görünür, həm İdlib, həm də Fəratın şərq sahilində Menbiç istiqamətində əməliyyatların aparılması, həm də Suriyanın şimalında bufer zonanın yaradılması məsələsi kompleks götürüləcək. Çünki bu məsələlərin kompleks müzakirəyə ehtiyacı var və müzakirələr zamanı bölgədə marağı olan digər ölkələrin də gedişləri nəzərə alınmalıdır”.
Analitik qeyd edib ki, Suriya o qədər sadə məsələ deyil ki, onunla bağlı tez nəticə əldə etmək mümkün olsun:
“Suriyada gedən proseslər hamısı bir-biri ilə zəncirvari bağlıdır. Ona görə də görünür, bu proseslər müəyyən bir vaxt tələb edəcək. Əlavə olaraq da Rusiya və İran rəsmi Dəməşqin razılığı olmadan Türkiyə ilə hər hansı razılığa gəlməkdə çətinlik çəkə bilər. Bu baxımdan Suriyanın şimalında bufer zonanın yaradılması əslində çox ciddi məsələdir”.
Rusiyanın Venesueladakı mümkün hakimiyyət dəyişikliyinə həssas münasibətinin səbəbi təkcə siyasi deyil.
Bu sözləri Axar.az-a açıqlamasında iqtisadçı ekspert Rövşən Ağayev deyib. O bildirib ki, sözügedən məsələdə iqtisadi amillər həlledicidir:
“Karakasın Moskvaya 17, Çinə isə 50 milyard dollar borcu var. Həmin borclar dövlətin öhdəliyi olsa da, burada bir incə nüans mövcuddur. İndiyə qədər Venesuelada defolt məsələsi gündəmdə idi. Yəni defolta əsasən dövlət beynəlxalq hüquqa uyğun olaraq borclarını ödəmə qabiliyyətsizliyini bəyan edir. Ancaq Madura buna getmədi. Rusiyanın da Venesueladakı mümkün hakimiyyət dəyişikliyinə həssas münasibətinin səbəbi təkcə siyasi deyil. Çünki defolt zamanı Karakasın Rusiya və Çinə olan borcunun taleyi sual altında qala bilər”.
İqtisadçının sözlərinə görə, defoltun dövlət üçün başqa mənfi tərəfləri də var:
“Defolt elan edilmiş tərəf artıq beynəlxalq aləmdən borc ala bilmir. Bu zaman həmin dövlətin kredit reytinqi tamamilə ləğv olunur və nəticədə maliyyə bazarlarına çıxışı məhdudlaşır. Buna görə də Veneuelada defolt məsələsi rəsmiləşdirilmirdi. Çünki ölkənin əsas aktivləri neft şirkətlərində olduğundan defolt zamanı nəinki Venesuelanın xaricdəki aktivləri dondurulacaqdı, faktiki olaraq neftdən qazanılan vəsaitlər borca tutulacaqdı. Maduro da məhz bu məlum səbəbdən dolayı defolta getmədi”.
Ekspert bildirib ki, Venesuelada yeni hakimiyyət formalaşarsa, o, Qərbin dəstəyi ilə defolta gedəcək:
“Bu zaman Maduronun və digər hökumət nümayəndələrinin bütün sərvətinə həbs qoyulacaq. Bununla da Venesuelanı bir müddət xilas etmək mümkün olacaq”.
İndoneziyanın Cənubi Sulavesi əyalətində baş verən güclü daşqınlar nəticəsində ölənlərin sayı 60-a çatıb.
Axar.az xəbər verir ki, bu barədə İndoneziya FHN-in rəsmisi Sutopo Purvo Nuqroxo bildirib.
Onun sözlərinə görə, itkin düşənlərin axtarışları davam etdirilir.
Qeyd edək ki, əyalətdə güclü yağışların yağması çaylarda suyun səviyyəsinin yüksəlməsinə səbəb olub. Təbii fəlakət nəticəsində 6 minə yaxın insan ziyan görüb. Hökumət rəsmiləri 9 körpünün dağıldığını bildirib.
Avropa Komissiyasının Avropa Siyasəti, Qonşuluq və Genişlənmə üzrə komissarı Yohannes Xan yanvarın 29-da Ermənistana səfər edəcək.
Axar.az xəbər verir ki, bu məlumatı Ermənistan Xarici İşlər Nazirliyi yayıb.
Məlumata görə, Xan İrəvanda Ermənistan XİN rəhbəri Zöhrab Mnatsakanyanla görüşəcək.
Onun Baş nazir Nikol Paşinyan və Prezident Armen Sərkisyanla da görüşü nəzərdə tutulub.
Venesuela Prezidenti Nikolas Maduro Ali məkəmədə çıxışı zamanı vəzifəsini tərk etmək niyyətində olmadığını bildirib.
Ukrayna Prezidenti Pyotr Poroşenkonu növbəti dəfə prezident görmək istəyənlərin sayı artmaqdadır.
Axar.az xəbər verir ki, Mixail Draqomanov adına Sosioloji Mərkəzin bu gün açıqladığı növbəti sorğunun nəticələrinə görə, prezident seçkiləri ilə bağlı Pyotr Poroşenko ilə Ukraynanın sabiq baş naziri, “Batkivşina” partiyasının lideri, deputat Yuliya Timoşenkonun reytinqi bərabərləşib. Səsvermədə iştirak edənlərin 17,4 faizi Timoşenkoya, 17,1 faizi isə Poroşenkoya üstünlük verib. 2018-ci ilin dekabr ayının sosioloji sorğusu ilə müqayisədə Poroşenko reytinqdə xeyli irəliləyib.
“Növbəti dəfə prezident seçkilərində kim qalib gələcək?” sualına sorğuda iştirak edənlərin 21,3 faizi Timoşenko, 21,1 faizi Poroşenko cavabını verib.
Qeyd edək ki, Ukraynada prezident seçkiləri martın 31-də keçiriləcək.
ABŞ Prezident Nikolas Maduronun rəhbərlik etdiyi Venesuela hökumətini bütün gəlir mənbələrindən məhrum etməyə çalışır.
Axar.az xəbər verir ki, bunu “Foks Biznes” televiziyasına açıqlamasında ABŞ Prezidentinin milli təhlükəsizlik üzrə müşaviri Con Bolton deyib.
“Maduronun qeyri-legitim rejimini bütün gəlir mənbələrindən məhrum etməyə çalışırıq. Hesab edirik ki, Xuan Quaido qanuni prezident kimi tanınandan sonra bütün gəlirlər legitim hökumətə verilməlidir. Bu isə çox çətindir”, – deyə o bildirib.