 |
|
“Ermənistan silahlı qüvvələrinin yaşayış məntəqələrimizi atəşə tutması nəticəsində Naftalan şəhərində həlak olan ailənin üzvlərindən biri - 13 yaşlı Şəhriyar Qurbanovdur. Əməkdaşlarımız bu oğlanı tanıdılar, AFFA-nın bazasında apardıqları axtarışdan sonra əmin oldular ki, 2007-ci il təvəllüdlü Şəhriyar Qurbanov müxtəlif yaş qrupları üzrə UGİM (Naftalan) klubunda çıxış edib. Təəssüf ki, biz həyatı yenicə başlayan 13 yaşlı yeniyetməni itirdik”.
Report məlumatına görə, bunu AFFA-nın icraçı vitse-prezidenti Elxan Məmmədov deyib.
Milli assosiasiya rəsmisi futbol ailəsinin üzvünü itirdiklərini bildirib:
“Biz müvafiq olaraq, FİFA və UEFA-nı məlumatlandırdıq. Çünki Azərbaycan futbol ailəsinin üzvü həm də Avropa və dünya futbol ailəsinin üzvüdür. Borcumuz hamımızı sarsıdan faciəvi itkidən yuxarı orqanları, indiki halda, FIFA və UEFA-nı məlumatlandırmaq idi. Bu, bir daha dünyaya sübut edir ki, təcavüzkar Azərbaycan ərazisində dinc sakinlərə hücum edir”.
İcraçı vitse-prezident Ermənistan Futbol Federasiyasının (EFF) bəyanatını absurd və alçaldıcı adlandırıb. E.Məmmədov bildirib ki, hazırda EFF-ni başqa bir məsələ də narahat edir:
“İki həftə əvvəl biz UEFA-ya “Lernain Artsax” klubu ilə bağlı sorğu göndərmişik. Bizdə olan məlumata görə, bu klub əvvəlcə Xankəndidə qeydiyyatdan keçib və deməli, yalnız Azərbaycan çempionatında çıxış edə bilər. Lakin “Lernain Artsax” qeydiyyata alındıqdan sonra əvvəlcə tanınmamış Dağlıq Qarabağ Resublikaının çempionatında, daha sonra Ermənistan çempionatında mübarizəyə qoşulub. Onların bu çempionatda iştirak etmələri üçün hüquqi cəhətdən heç bir əsas yoxdur. Üstəlik, klub öncə qeydiyyatdan qanunsuz keçib. UEFA-dan bu işi araşdırmağı və klubun nə qədər legitim olduğuna dair informasiya verməyi xahiş etmişik”.
AFFA rəsmisi Avropa Liqasının pley-off mərhələsində “Legiya” və “Qarabağ” arasında Polşada keçiriləcək oyunla bağlı UEFA-ya müraciət etdiklərini də xatırladıb:
“AFFA UEFA-ya müraciət edərək bu matçla bağlı əlavə təhlükəsizlik tədbirlərinin görülməsini istədi. Qitə futbol qurumu operativ reaksiya verərək, oyuna təhlükəsizlik üzrə xüsusi nümayəndə təyin etdi. Əlbəttə, Ermənistan vətəndaşlarının əvvəlki təxribatları da nəzərə alındı. Təbii ki, biz Avropa Liqasında ötən mövsüm Lüksemburqda keçirilmiş “Düdelanj” - “Qarabağ” oyununda yaşananları unutmamışıq. Həmin vaxt ermənilər stadion üzərində dron qaldıraraq onu komandamıza tərəf yönləndirmişdilər. Xoşbəxtlikdən, heç kim xəsarət almamışdı. Həmin vaxt UEFA nümayəndələri oyunu dayandırmış, 20 dəqiqədən sonra davam etdirmişdilər. Bu faktları nəzərə alaraq, UEFA təhlükəsizlik üzrə əlavə nümayəndə təyin edib. Biz həmçinin, təhlükəsizliyin ən yüksək səviyyədə təmin olunması üçün Polşa Futbol Federasiyasına da müraciət etmişik”.
Bu gün futbol üzrə Azərbaycan Premyer Liqasında 4-cü tura start veriləcək.
İlk oyun günündə bir qarşılaşma baş tutacaq.
Turun açılış matçında son iki oyunundan qələbə ilə ayrılan və liderlər qrupunda qərarlaşmış “Sumqayıt” çempion “Qarabağ”ı qəbul edəcək
Sabah “Səbail” – “Sabah” və “Keşlə” – “Zirə” oyunları keçiriləcək. Tura bazar günü baş tutacaq “Neftçi” – “Qəbələ” matçı ilə yekun vurulacaq.
Azərbaycan Premyer Liqası
4-cü tur
25 sentyabr
“Sumqayıt” – “Qarabağ”
Hakimlər: Kamal Umudlu, Pərvin Talıbov, Müslüm Əliyev, Rövşən Rəcəbov.
Sumqayıt. “Kapital Bank Arena”, 19:00.
Türkiyənin “Qalatasaray” klubu UEFA Avropa Liqasında pley-off mərhələsinə yüksəlməyi bacarıb.
“Aslanlar” III təsnifat mərhələsində Xorvatiyanın “Hayduk” klubunu məğlub ediblər - 2:0.
Qolların müəllifləri Yunes Belhanda və Rayan Babeldir.
“Qalatasaray”dan fərqli olaraq, Türkiyənin digər iki təmsilçisi “Alanyaspor” (1:0) və “Beşiktaş” (1:1, penaltilər 2:4) uğursuz çıxış edərək, avrokuboklarla vidalaşıblar.
Almaniyanın “Bavariya” klubunun futbolçuları Manuel Noyer ilə Robert Levandovski, İngiltərənin “Mançester Siti” klubun belçikalı yarımmüdafiəçisi Kevin de Brüyne UEFA-nın 2019-2020-ci il mövsümünün ən yaxşı futbolçusu adını qazanmağa namizəddirlər.
Bu barədə futbol qurumunun mətbuat xidməti xəbər yayıb.
Eyni zamanda, UEFA ən yaxşı məşqçi adına namizədlərin də adını açıqlayıb.
Belə ki, “Bavariya”nın baş məşqçisi Hans Flik, “Liverpul”un almaniyalı baş məşqçisi Yurgen Klopp və “Leyptsiq”ə rəhbərlik edən Yulian Nagelsman 2019-2020-ci il mövsümünün ən yaxşı baş məşqçi olmağa namizəddirlər.
Qaliblərin adı oktyabrın 1-də Çempionlar Liqasının püşkatma mərasimində açıqlanacaq. oxu.az
“Bakı”nın prezidenti, tanınmış iş adamı Hafiz Məmmədov “Qalatasaray”ın heyətində Avroliqanın ikinci təsnifat mərhələsində “Neftçi” ilə oyun üçün Bakıya gələn Arda Turanla görüşüb.
Görüş “Qalatasaray”ın paytaxtımızda olduğu müddətdə məskunlaşdığı Alov qüllələri - “Hotel Fairmont Baku”da baş tutub.
Görüşdən sonra türkiyəli futbolçu bunları deyib: “Hafiz bəyi uzun illərdi tanıyıram. O, bizim dəyərlimizdir. “Bakı” ilə “Atletiko” arasındakı əməkdaşlıq zamanı dostluğumuz yarandı. Onu görmək mənim üçün çox xoş oldu. Deyiləndə ki, Hafiz bəy otelə gəlib çox sevindim. Son illər Bakıya gələ bilməsəm də, daim həm Hafiz bəylə, həm övladları ilə telefon vasitəsi ilə əlaqə saxlayırıq”.
"Qarabağ"ın baş məşqçisi Qurban Qurbanov UEFA Çempionlar Liqasının III təsnifat mərhələsində Norveç "Molde"sinə penaltilər seriyasında uduzaraq mübarizəni dayandırdıqları oyunla bağlı Heydər Əliyev adına beynəlxalq aeroportunda "Report"un suallarını cavablandırıb. “Qafqazinfo” həmin müsahibəni təqdim edir:
- Əvvəlcə oyun barədə fikirlərinizi bilmək istərdik...
- Çox ağır oyun keçdi. Əlbəttə, Kiprə maksimum nəticə əldə etmək üçün getmişdik. Amma çoxsaylı qol epizodlarından yaxşı istifadə edə bilmədik. Həmişə demişəm, penaltilər seriyası idman lotereyasıdır. Məğlub olduq, heç istəməzdik. Futbolçularımız çox əziyyət çəkdilər. Sadəcə, onların əziyyətlərinə üzülürəm. Sözün həqiqi mənasında meydanda əsl kollektiv gördüm. Hər bir halda düşünürəm ki, bizim üçün böyük təcrübə oldu.
- Oyuna bir həftə qalmış matçın neytral meydana salınmasının komandanıza psixoloji təsiri oldumu?
- Əlbəttə, çox təsiri oldu. Əvvəl də bildirmişdim, püşkatmadan bir və ya iki gün əvvəl desəydilər ki, oyunumuz səfərdə olacaq, bizim üçün hazırlaşmaq bəlkə də daha asan olardı. Arxayın idik ki, oyun Bakıda olacaq. Sonda belə bir qərarın qəbul olunması, bir günün içində hər şeyin dəyişməsi istər-istəməz planlarımızı pozdu. Hər bir halda, biz Kiprə məğlub olmağa getməmişdik. Demək olar, tam üstünlüklə oynadıq.
- Komandanı penaltilər seriyasına hazırlamışdınız?
- Belə oyunlarda futbolçuları tam olaraq penaltilərə hazırlaşdırmıram. Məndə belə bir şey yoxdur. Sadəcə, məşqlərdə oyunçuların özləri penaltilərə istəkli olurlar. Mən də orada baxıram ki, kim daha yaxşı vurur, kim pis. Gördüyünüz kimi, ilk beşlik heç də pis olmadı. Sadəcə, digərləri o qədər də yaxşı penalti vuranlar deyil.
- Sizcə, bu məğlubiyyətdən sonra komandanı Avropa Liqasının pley-off matçına kökləmək çətin olmayacaq?
- Bilirsiniz ki, bir neçə ay futbol olmadı, oyundan uzaq idik. Ümumiyyətlə, futbolçuların tam hazırlıqlı olmaları elə də asan deyil. "Molde" bunadək öz çempionatlarında 16, Çempionlar Liqasında 2 oyun keçirmişdi. Rəqibin son 3 ayda 18 görüş keçirməsi futbolçularının yaxşı formada olmasından xəbər verir. Bizdə isə çempionat dayanmışdı, rəsmi oyunlarımız bu il həddindən artıq az oldu. Belə oyunlarda 90 dəqiqə gücümüzü bölüşdürmək və ya 120 dəqiqə hazır olmaq bizim üçün heç də asan deyil. Amma istənilən halda, bu oyunun psixoloji təsiri qısa zamanda bizdən getməyəcək. Bu, şəxsən mənim üçün üzücü məğlubiyyət oldu. Pley-offa kimi bir neçə çempionat oyunu olacaq. Sentyabrın 18-də növbəti rəqib bilinəcək. Burada zəif komanda yoxdur, bilirsiniz ki, növbəti rəqibimiz də ölkəsinin çempionu olacaq.
- Qarşıda "Neftçi" ilə oyununuz var...
- Çalışacağıq ki, sentyabrın 20-də keçirəcəyimiz oyunadək tam hazır olaq. Bu arada, "Neftçi" "Qalatasaray"la qarşılaşacaq. Mən "Neftçi"yə yalnız uğurlar arzulayıram. Əvvəl də qeyd etdiyim kimi, "Qalatasaray"ın Bakıya gəlməsi futbolumuza sevgini daha da artıracaq. Türkiyənin Top-5 komandasından biri ölkəmizə səfər edib. Düşünürəm ki, bu rəqibə qarşı oynamaq həm "Neftçi", həm də Azərbaycan futbolu üçün böyük təcrübə olacaq.
Azərbaycan UEFA-nın reytinq cədvəlində 25-ci pilləyə yüksəlib.
“Qafqazinfo” xəbər verir ki, Çempionlar Liqasının III təsnifat mərhələsində “Molde” ilə qarşılaşan “Qarabağ” rəqibinə penaltilər seriyasında məğlub olsa da (5:6), ölkəmizin reytinqinə 0,250 xal qazandırıb.
Nəticədə Azərbaycanın son 5 mövsümün yekununda xalları 16.125-ə çatıb. 15.950 xala malik Rumıniya isə 1 pillə geriləyərək, 26-cı sıraya enib.
.jpg)
"İdman TV"nin tanınmış aparıcısı İsmayıl Abdullayev sözügedən telekanaldan ayrılıb.
Qafqazinfo xəbər verir ki, şərhçinin işindən ayrılması öz istəyi ilə baş verməyib.
Ayrılığın telekanal daxilində baş verən problemlərdən qaynaqlandığı bildirilir. Yaxın günlərdə növbəti ayrılıqların baş verəcəyi isə istisna edilmir.
Qeyd edək ki, bir müddət öncə "İdman TV"nin daha bir tanınmış şərhçisi Ramiz Mirzəzadə işindən ayrılaraq "CBC Sport"a keçib. İsmayıl Abdullayev isə 11 ildir "İdman TV"nin uğurları üçün çalışırdı.
Azərbaycan Respublikasının Daxili İşlər Nazirliyi, Azərbaycan Futbol Federasiyaları Assosiasiyası və "Neftçi" Peşəkar Futbol Klubu UEFA Avropa Liqası turnirinin ikinci təsnifat mərhələsi çərçivəsində 2020-ci il sentyabrın 17-də Bakı Olimpiya Stadionunda keçiriləcək "Neftçi" - "Qalatasaray" (Türkiyə) oyunu ilə əlaqədar ictimaiyyətin diqqətinə çatdırır ki, UEFA İcraiyyə Komitəsinin müvafiq qərarına uyğun olaraq, qarşılaşma azarkeşsiz keçiriləcək.
Daxili İşlər Nazirliyinin mətbuat xidmətindən Yol-xeber.az-a verilən məlumata görə, hər iki komandanın ölkəmizdə çox sayda azarkeşinin olması nəzərə alınaraq, bir daha bildiririk ki, COVİD-19 pandemiyası ilə əlaqədar Azərbaycan Respublikası Nazirlər Kabineti yanında Operativ Qərargahın tətbiq etdiyi qaydalara riayət olunması vacibdir. "Qalatasaray" komandasının Bakıya gəlişi zamanı hava limanında, komandanın qalacağı otelin qarşısında, məşq edəcəyi və oyunun keçiriləcəyi stadionun ətrafında, eləcə də digər müvafiq məkanlarda azarkeşlərin kütləvi toplaşması yolverilməzdir.
DİN, AFFA və "Neftçi" PFK koronavirusa yoluxma hallarının artım riskini nəzərə alaraq, azarkeşləri Nazirlər Kabineti yanında Operativ Qərargahın tətbiq etdiyi qaydalara riayət etməyə çağırır.
Azarkeşlər sevimli komandalarına çatdırmaq istədikləri mesajları videoya çəkərək CBC Sport televiziya kanalına göndərə bilər. Həmin videomesajlar CBC Sport-da, həmçinin oyun günü Bakı Olimpiya Stadionunun monitorlarında nümayiş etdiriləcək.
"Forbes" jurnalı 2020-ci ilin ən çox qazanan futbolçularının siyahısını dərc edib.
Siyahıya Argentina millisinin və "Barselona"nın kapitanı Lionel Messi başçılıq edir. 33 yaşlı hücumçu bu il 126 milyon dollar qaanlıb.
Onu 117 milyon dollarla Portuqaliya millisinin və "Yuventus"un ulduzu Kriştianu Ronaldu izləyir. İlk "üçlüy" Braziliya millisinin və PSJ-nin hücumçusu Neymar qapayır - 96 milyon dollar.
1. Lionel Messi ("Barselona") - 126 milyon dollar
2. Kriştianu Ronaldu ("Yuventus") - 117 milyon dollar
3. Neymar (PSJ) - 96 milyon dollar
4. Kilian Mbappe (PSJ) - 42 milyon dollar
5. Məhəmməd Salah ("Liverpul", İngiltərə) - 37 milyon dollar
6. Pol Poqba ("Mançester Yunayted", İngiltərə) - 34 milyon dollar
7. Antuan Qrizmann ("Barselona") - 33 milyon dollar
8. Qaret Beyl ("Real Madrid", İspaniya) - 29 milyon dollar
9. Robert Levandovski ("Bavariya", Almaniya) - 28 milyon dollar
10. David De Xea ("Mançester Yunayted") - 27 milyon dollar (fanat.az)