 |
|
“Bu gün səhər saatlarından ölkə ərazisində başlayan güclü şimal-qərb küləyi gün ərzində davam edəcək”.
Bunu oxu.az-a açıqlamasında Ekologiya və Təbii Sərvətlər Nazirliyinin Milli Hidrometeorologiya Xidmətinin Proqnozlar Bürosunun direktoru Gülşad Məmmədova bildirib.
O bildirib ki, sabah səhər saatlarından başlayaraq küləyin gücü tədricən mülayimləşəcək:
“Gündüz saatlarında mülayim cənub küləyinin əsəcəyi gözlənilir”.
Qeyd edək ki, Milli Hidrometeorologiya Xidmətinin yaydığı məlumata görə, bu gün Bakıda və Abşeron yarımadasında şimal-qərb küləyinin 18-23 m/s, arabir 27-32 m/s, günün birinci yarısında bəzi ərazilərdə arabir 35-38 m/s-dək güclənəcəyi, rayonlarında isə şimal-qərb küləyinin 15-20 m/s, arabir 25-30 m/s, bəzi Kür vadisi rayonlarında arabir 35-38 m/s-dək güclənəcəyi gözlənilir.
Aprelin 3-ü saat 23:00-da Ermənistan silahlı qüvvələrinin bölmələri dövlət sərhədinin Tovuzqala rayonunun Müsürskənd yaşayış məntəqəsində yerləşən mövqelərindən Azərbaycan Ordusunun Tovuz rayonunun Ağdam yaşayış məntəqəsi istiqamətində yerləşən mövqelərini atəşə tutub.
Bu barədə Müdafiə Nazirliyindən məlumat verilib.
Bölmələrimiz tərəfindən adekvat cavab tədbirləri görülüb.
Ordumuzun sıralarında şəxsi heyət və texnika baxımından itki yoxdur.
Ötən gün Bakı şəhəri Səbail rayonu, Əliyarbəyov küçəsində yerləşən gecə klubunda baş verən partlayış zamanı ümumilikdə 31 nəfər müxtəlif dərəcəli xəsarət alıb, 1 nəfər vəfat edib. Ölən şəxsin gecə klubunun əməkdaşı, 1979-cu il təvəllüdlü Maya Axundova olduğu açıqlanıb.
Həmçinin hadisədə 14 avtomobil, 1 mənzil və 2 qeyri-yaşayış obyektinə də ziyan dəyib.
Partlayışın propan qaz balonunun partlaması səbəbindən baş verdiyi deyilir.
Qeyd edək ki, faktla bağlı cinayət işi başlanaraq, prokurorluq və Fövqəladə Hallar Nazirliyinin müstəntiqlərindən ibarət birgə istintaq qrupu yaradılıb, istintaqın aparılması Baş Prokurorluğun İstintaq idarəsinə həvalə olunub.
Maraqlıdır ki, hadisə zamanı xəsarət alan vətəndaşlara, vəfat edən şəxsin ailəsinə, ələcə də, ətrafdakı daşınar və daşınmaz əmlaka dəyən zərər kim tərəfindən ödəniləcək? Həmin şəxslərə sığorta kompensasiyası ödənilə bilərmi?
Sığorta sahəsi üzrə ekspert İlkin İbrahimov “Ölkə.Az”a açıqlamasında bildirdi ki, ötən gün gecə klubunda baş verən hadisə ilə bağlı sığorta təminatları verilə bilər. Obyektin daşınmaz əmlakın icbari sığortası üzrə sığortalandığı iddia edilir. Həmçinin əlavə olaraq bir neçə istiqamət üzrə sığorta kompensasiyası verilə bilər:
“Daşınmaz əmlakın istismarı ilə bağlı mülki məsuliyyətin icbari sığortası var ki, bu, məcburi tətbiq edilir. Bu sığorta növündə daşınmaz əmlakla bağlı qarşı tərəfə - vətəndaşlara, avtomobillərə dəyən ziyan sığortalanır. Eləcə də, burada ölüm və sağlamlığın itirilməsi ilə bağlı hallar var ki, bu da qeyd etdiyimiz sığorta halları ilə əhatə olunub və kompensasiya verilə bilər. Doğrusu, həmin obyektdə sözügedən sığortanın olub-olmaması məlum deyil. Çünki məkanı fiziki şəxsin işlətdiyi deyilir ki, bu sığorta növü də əksər hallarda hüquqi şəxslərə tətbiq olunur”.
Ekspertin sözlərinə görə, bundan əlavə binanın içərisindəki partlayışla bağlı dəyən zərər daşınmaz əmlakın icbari sığortası növü üzrə kompensasiya edilməlidir. Həmçinin klubun əməkdaşının hadisə nəticəsində öldüyü açıqlandı ki, bununla bağlı peşə xəstəlikləri və bədbəxt hadisələr üzrə icbari sığorta növü var və əmək fəaliyyəti zamanı alınan xəsarət və ölüm halları zamanı bu sığorta növü üzrə kompensasiya ödənilir.
“Bütün bunların fonunda sığorta kompensasiyası ilk öncə araşdırılmalıdır. Bundan sonra müvafiq orqan tərəfidən arayış veriləcək və sənədlər təqdim olunacaq. Sənədləri təqdim edən orqan isə Fövqəladə Hallar Nazirliyinin İstintaq idarəsi olacaq. Sözügedən sənədlərdən asılı olaraq sığorta kompensasiyasının verilib verilməməsi ilə bağlı qərar veriləcək. Çünki sığorta şirkətləri də sığorta kompensasiyası zamanı həmin orqanların arayışlarını əsas götürürlər və sığorta halının olub-olmaması haqqında məlumatlı olurlar”, - deyə İ. İbrahimov əlavə edib.
İki gün əvvəl gecə saat 03 radələrində Səbail rayonu, T.Əliyarbəyov küçəsi 9 ünvanında yerləşən "Location" gecə klubunda baş vermiş partlayış nəticəsində xəsarət alanlar arasında daha bir azərbaycanlı məşhur da olub.
Milli.az xəbər verir ki, müğənni Nicat Məhərrəmov partlayış baş verən zaman gecə klubunda imiş.
Gənc məşhur müğənni xəsarət alanlar arasında olduğunu bu sözlərlə açıqlayıb:
"Bu gün baş verən partlayış sadəcə bir kabus idi. İnsanların çaresizliyi, o partlayışın səsi ümumilikdə yaşanan bu faciə heç bir zaman gözümdən və ağlımdan getməyəcək. Bütün yaralı olan dostlarıma Allahdan acil şəfalar diləyirəm və məni yığıb soruşan, axtaran, arxamca xəstəxanaya qədər gəlib yanımda olan doğmalarıma, dostlarıma, əzizlərimə, hər birinizə təşəkkür edirəm. Allah sizi sevdiklərinizə bağışlasın".
Qeyd edək ki, hadisə rəsmi açıqlamaya görə qaz sızmasına görə baş verib. Partlayış nəticəsində 1 nəfər ölüb, 31 şəxs isə xəsarət alıb. Yaralılardan bir neçəsinin vəziyyətinin kritik olduğu bildirilib.
Xəbər verdiyimiz kimi, ötən gün saat 12 radələrində Naxçıvan Muxtar Respublikasının Babək rayon Nehrəm qəsəbəsi 3 saylı tam orta məktəbində aparılan yenidənqurma işləri ilə əlaqədar binanın bir hissəsi uçub və nəticədə 4 nəfər ölüb.
Bunlar 1972-ci il təvəllüdlü Həsən Abbasəli oğlu Əliyev, 1961-ci il təvəllüdlü İbrahim Xəlil oğlu Məhərrəmov, 2000-ci il təvəllüdlü Qadir Nizami oğlu Süleymanov və 1988-ci il təvəllüdlü Asəf İsmayıl oğlu Rüstəmovdur.
Faciəvi hadisədə həlak olan şəxslər Nehrəm qəsəbə qəbiristanlığında torpağa tapşırılıb.
Əlavə edək ki, hadisə nəticəsində 1996-cı il təvəllüdlü Alı Əliyev xəsarət alıb.
Qeyd edək ki, ölən şəxslər Dövlət Şəhərsalma və Arxitektura komitəsinin Babək rayon idarəsində fəhlə işləyirdi.
"“Qafqazinfo” hadisədə ölən şəxslərin fotolarını təqdim edir:
Salyanda oğurluq və soyğunçuluqla məşğul olan üç nəfər saxlanılıb.
"Salyan Rayon Polis Şöbəsinin (RPŞ) əməkdaşları tərəfindən keçirilən əməliyyat-axtarış tədbirləri nəticəsində rayonun Kərimbəyli kəndi ərazisində yerləşən evlərin birindən ümumi dəyəri 4 000 manat olan dəmir boru və lövhələr oğurlamaqda şübhəli bilinən iki nəfər şəxs tutulub.
Araşdırmalarla onların əvvəllər məhkum olunmuş rayon sakinləri Orxan Hüseynov və Röyal Səmədov olduqları müəyyən edilib.
Dindirilmə zamanı hər iki şəxs törətdikləri oğurluq hadisəsini etiraf ediblər.
Şöbə əməkdaşları tərəfindən keçirilən digər bir əməliyyat tədbiri nəticəsində isə mart ayının 15-də rayon ərazisində bir qadına qarşı zor tətbiq edərək əlində olan 380 manat pulu soyğunçuluq yolu ilə ələ keçirən əvvəllər məhkum olunmuş Pərviz Əhmədov saxlanılıb.
Saxlanılan zaman onun üzərindən psixotrop maddə olan metamfetamin aşkarlanaraq götürülüb.
Faktlarla bağlı Salyan RPŞ-nin İstintaq Bölməsində cinayət işləri başlanılıb, saxlanılan şəxslər barəsində həbs qətimkan tədbirləri seçilib.
Ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) həbsdə olan sabiq icraçı direktoru Vüqar Səfərlinin səhhətində problemlər yaranıb.
Bu barədə "Report"a onun vəkili Hikmət Əliyev deyib.
O bildirib ki, müvəkkili Ədliyyə Nazirliyi Penitensiar Xidmətin müalicə müəssəsinə köçürülüb.
V.Səfərlinin səhhətində konkret hansı problemin olduğu açıqlanmayıb.
"Müdafiə etdiyim şəxs bir neçə gün əvvəl müalicə müəssəsinə köçürülüb. Vüqar Səfərli hazırda müalicəsini orada davam etdirir", - vurğulayıb.
Qeyd edək ki, V.Səfərli 2021-ci ilin yanvarında həbs edilib.
Bakı Ağır Cinayətlər Məhkəməsinin hökmü ilə V.Səfərli cəzasını ciddi rejimli cəzaçəkmə müəssisəsində çəkməklə 10 il 6 ay müddətinə azadlıqdan məhrum olunub. Hökmdən narazı qalan məhkum apellyasiya şikayəti verib. Bakı Apellyasiya Məhkəməsi birinci instansiya məhkəməsinin çıxardığı hökmü dəyişdirmədən qüvvədə saxlayıb.
“Caliber” Xocalı rayonu Pirlər kəndindən görüntülər paylaşıb.
Kadrlarda qəsəbəyə ermənilərin gətirilməsi, onlara yerindəcə hərbi geyim və silah verilməsi əks olunub.
Həmçinin, Rusiya sülhməramlılarının prosesi 200 metr aralıdan sakitcə izlədikləri qeyd edilib.
Türkiyənin İsparta şəhərinin Eğidir bölgəsinə bağlı Gökçehüyük kəndində yaşayan 64 yaşlı Eminə Tüzün ad-soyadlı qadına traktoru ilə ötən ilin oktyabr-noyabr aylarında İstanbulda İyul Şəhidlər (Temmuz Şehitler Köprüsü) və Fatih Sultan körpülərindən (Fatih Sultan Mehmet Köprüsü) 6, İstanbul-Ankara və Mahmutbey-Edirne avtomobil yollarından 3 dəfə ödəniş etmədən keçdiyi əsas götürülərək yazılmış 476 min lirəlik cərimə ləğv edilib.
Qaynarinfo xəbər verir ki, buna səbəb cərimənin yalnış anlaşılma nəticəsində yazılması olub.
Türkiyənin Nəqliyyat və İnfrastruktur Nazirliyi Emine Tüzünənin etdiyi şikayətdən sonra araşdırmalara başlayıb. Kamera görüntülərindən müəyyən edilib ki, həmin yoldan 10 EE 111 Azərbaycan dövlət nömrə nişanlı avtomobil istifadə edib. Nazirliyin mətbuat xidmətindən verilən yazılı açıqlamada sözügedən nəqliyyat vasitəsinin Azərbaycan nömrəli avtomobil olduğu, problemin Azərbaycan və Türkiyə nömrəli nəqliyyat vasitələrinin eyni nömrə nişanından istifadə etməsindən qaynaqlandığı müəyyən edilib. Nəticədə cərimələr ləğv edilib. 
Sonradan məlum olub ki, Azərbaycan və Türkiyə dövlət qeydiyyatlı avtomobil nömrə nişanları arasında qarşılıq olub. Həmin yollardan istifadə edən avtomobilin 10 EE 111 Azərbaycan qeydiyyat nömrə nişanlı maşın olduğu müəyyənləşib. Hər iki maşının nömrə nişanı eyni olduğundan cəza səhvən Eminə Tüzünə kəsilib.
Qaynarinfo-nun apardığı araşdırma nəticəsində məlum olub ki, əvvəllər 10 EE 111 dövlət nömrə nişanı "Rang Rover” markalı avtomobildə olub. Hazırda isə sözügedən dövlət nömrə nişanı "BMW 430” markalı avtomobildə istifadə edilir. Nəqliyyat vasitəsi Binəqədi rayon sakini Eldəniz adlı şəxsə məxsusdur.
İlkin ehtimala görə, 10 EE 111 nömrəli avtomobil Türkiyənin İstanbul şəhərində olarkən yol-hərəkət qaydaları pozduğu üçün cərimə edilib. Maşın hazırda Bakıda olduğundan cərimələr eyni nömrə nişanlı traktor şoferinə göndərilib.
Bir evdə 4 nəfərin odlu silahla qətlə yetirilmiş meyiti aşkar edilib.
Dəhşətli hadisə Türkiyənin Edirnə şəhərində baş verib. Uzunköprü səmtində bir evdə baba, ata, ana və oğul olmaqla 4 nəfər ölü tapılıb.
Deyilən ünvana gələn polis əməkdaşları evdə 76 yaşlı Mehmet Güner, eyniadlı oğlu 55 yaşlı Mehmet Güner, onun həyat yoldaşı 47 yaşlı Filiz Güner və 26 yaşlı oğlanları Anıl Günerin meyitini aşkar ediblər.
Araşdırmalar zamanı həmin şəxslərin odlu silahla qətlə yetirildiyi məlum olub.
Qətildə istifadə edilən odlu silah tapılsa da, cinatəri törətməkdə şübhəli bilinən şəxsin axtarışları davam edir.
Qonşuların sözlərinə görə Güner ailəsi sakit təbiətli insanlar olublar. Kənddə heç kimlə düşmənçilikləri olmayıb.
Qətli törədən şəxsin kimliyi və səbəbləri araşdırılır.
