Mayın 10-dan etibarən provayderlərə təmin olunan internetin qiymətində təxminən 70%-ə qədər endirim olacaq.

Bu barədə məlumat Axar.az-a Delta Telekom MMM-dən verilib. Məlumata görə, şirkət istifadəçilərə göstərilən internet xidmətinin keyfiyyətinin yüksəldilməsi və qiymətlərin əlçatan olması məqsədiylə kampaniyaya başlayıb.

“Endirim qiymətlərindən istifadə etmək istəyən provayderlər satdığı internetin keyfiyyətinin yüksək səviyyədə olması və son istifadəçiyə qiymətlərdə endirim etməsi öhdəliyini götürməlidir. 
Maraqlı olan provayderlər, endirim paketi haqda ətraflı məlumat almaq üçün müəssisəmizə müraciət edə bilər”, - Delta Telekom bildirib.

“Yatsan” mebel mağazası möhtəşəm Ramazan bayramı endiriminə start verib.

Axar.az xəbər verir ki, Ramazan bayramı münasibətilə mağaza bütün növ döşəklərə endirim tətbiq edib.

Kampaniya daxilində ortopedik, komfort, bel problemi olan insanlar üçün, uşaq, yaşlı və otel konseptli döşəklərin hər birinə üç növ endirim müəyyənləşdirilib. Belə ki, mağazanın seçilmiş 3 döşəyini 50% endirimlə aldığınız zaman əlavə olaraq 20% endirim edilir və yastıq hədiyyə edilir.

Bundan başqa, mağazanın digər bütün növ döşəklərinə 50 və 30% faiz endirim müəyyən edilib. Endirimlə alınan hər döşəyə yastıq hədiyyə edilir.

Mağazanın ən çox alınan “Tempur” markasının döşəkləri isə 30% endirimlə satılır.

Bütün döşəklərə 5-10 il arası rəsmi zəmanət verilir.

Ermənistanın İrəvan şəhər meriyasının Ağsaqqallar Şurası İrina Rodnina adına fiqurlu konkisürmə məktəbinin adınının dəyişdirilməsinə səs verib.

Report xəbər verir ki, bu barədə TASS məlumat yayıb.

"Luys" fraksiyasının Rodnina adına fiqurlu konkisürmə məktəbinin adının dəyişdirilməsi ilə bağlı təklifi qəbul olundu", - səsvermədən sonra İrəvan meri Ayk Marutyan bildirib.

Bundan sonra obyekt İrəvan fiqurlu konkisürmə və hokkey idman məktəbi adlanacaq.

"Luys" fraksiyasının nümayəndəsi qeyd edib ki, İ.Rodnina Bakıda antiermənistan çıxışları edib.

Daha əvvəl ermənistanlı deputatlar məktəbə İrina Rodninanın adının verilməsi ilə bağlı 2015-ci ildə qəbul edilmiş qərarın dəyişdirilməsi və məktəbin adının dəyişdirilməsi məqsədilə irəvan Ağsaqqallar Şurasına müraciət etməyi təklif ediblər.

Buna Olimpiya çempionunun Bakıya səfəri və Xocalı faciəsinin ildönümü ilə əlaqədar yürüşdə iştirak etməsi səbəb olub.

Daha əvvəl Rusiya Dövlət Dumasının Beynəlxalq işlər komitəsinin sədr müavini İ.Rodnina çıxışında bildirib ki, Rusiyada Xocalı faciəsi haqqında daha çox şey bilməlidirlər.

Kult.az “Güneyli məşhurlar” layihəsində görkəmli ədəbiyyatşünas, şair Məmmədağa Sultanov haqqında yazını təqdim edir.

Məmmədağa Sultanməhəmməd oğlu Sultanov 1910-cu il yanvarın 5-də Güney Azərbaycanın Ərdəbil şəhərində anadan olub. Kiçik yaşlarından ailəsi ilə birlikdə Bakıya köçüb. İbtidai təhsilini Bakıda alan Məmmədağa atasının tövsiyəsi ilə Balaxanı kəndində fabrik-zavod məktəbində, daha sonra Sabunçu qəsəbəsindəki neft texnikumunda oxuyub. Lakin neftçi olmaq arzusu onun üçün həmişə ikinci planda qalıb. Gənc Məmmədağa əsl vətəndaşlıq borcunu gələcəyə savadlı insanları hazırlamaqda görürdü.

Həmin vaxtlar o, Sabunçu qəsəbəsində fəhlə klubunda fəal iştirak edir, müəllim kimi bədii-siyasi axşamlar təşkil edir, fəhlələrə, qadınlara savad öyrədir, gündəlik qəzetləri onlar üçün oxuyurdu. O, eyni zamanda həmin klubun nəzdində təşkil edilmiş və görkəmli ədibimiz Seyid Hüseynin rəhbərlik etdiyi ədəbiyyat dərnəyinin iştirakçısı idi.

1931-ci ildə M.Sultanov qələmini ilk dəfə bədii tərcümə sahəsində sınayıb. O vaxtdan ara-sıra şeirlər, hekayələr yazıb, farsdilli klassik şairlərin əsərlərini - Xaqani, Nizami, Əssar Təbrizi, Sədi Şirazinin şeirlərini ana dilimizə tərcümə edib.

Məmmədağa müəllim 1933-cü ildə Azərbaycan Dövlət Elmi-Tədqiqat İnstitutunun aspiranturasına daxil olub. Bundan sonra bir sıra dövlət təşkilatlarında, müxtəlif rayonlarda qəzet redaktoru vəzifəsində çalışıb. 1939-1941-ci illərdə Azərbaycan Dövlət Universitetinin filologiya fakültəsində fars dili müəllimi işləyib.

1942-ci ildə isə Təbrizdə ordunun siyasi şöbəsində baş təlimatçı vəzifəsində fəaliyyət göstərib. SSRİ-nin Tehrandakı səfirliyinin xüsusi təşəkkürünə layiq görülən Məmmədağa müəllim 1945-ci ildə ordudan tərxis olunaraq, Azərbaycan Elmlər Akademiyasının Nizami adına Dil və Ədəbiyyat İnstitutunun Əlyazmalar şöbəsinə müdir vəzifəsinə təyin edilib. Bununla yanaşı, Bakı Dövlət Universitetində fars dili və İran ədəbiyyatı tarixindən dərs deyib.

1945-ci ilə qədər Azərbaycan Elmlər Akademiyasının Nizami adına Dil və Ədəbiyyat İnstitutu binasında xüsusi bir otaq vardı ki, qapısında “Əlyazmalar şöbəsi” yazılan lövhə vurulmuşdu. Otağın rəflərində iki minə yaxın fars, ərəb, Azərbaycan dillərində kitab, bir neçə şairin, ədibin arxivi düzülmüşdü. 1950-ci ildə bu balaca şöbə Məmmədağa müəllimin səyi nəticəsində müstəqil Respublika Əlyazmalar fonduna çevrilib. Fond əvvəlcə Nizami adına Ədəbiyyat Tarixi Muzeyində, daha sonra Elmlər Akademiyasının Rəyasət Heyətinin binasında geniş sahəyə köçürülüb.

Məmmədağa müəllim 1950-ci ildən 1972-ci ilə qədər Azərbaycan Elmlər Akademiyası Respublika Əlyazmalar fondunun direktoru vəzifəsində işini davam etdirib. Onun rəhbərliyi dövründə fondda saxlanılan nadir əlyazmalar və mətbu kitabların kataloqları tərtib və çap olunub.

70-ci illərdə Əlyazmalar fondunda görülən işlərin elmi səviyyəsi elə bir yerə çatır ki, onun xüsusi instituta çevrilməsi ideyası irəli sürülür, lakin bu işi görmək Sultanova qismət olmur. Ona qarşı olan bəzi qərəzli şəxslərə görə Məmmədağa müəllim öz istəyi ilə vəzifəsindən istefa verir. Lakin illər sonra ümummilli lider Heydər Əliyevin sayəsində Respublika Əlyazmalar fondu Hacı Zeynalabdin Tağıyevin yadigarı olan möhtəşəm binaya köçür və İnstituta çevrilir.

M.Sultanovun bir ədəbiyyatşünas kimi xidmətləri çox böyükdür. Azərbaycan ədəbiyyatı tarixində parlamış üç böyük şəxsiyyəti - Xaqani Şirvani, Abbasqulu ağa Bakıxanov və Əssar Təbrizini xalqımıza tanıtdıran və demək olar ki, həyata yenidən qaytaran Məmmədağa müəllim olub.

Onun bir neçə ədəbi kəşfi də var. Onlardan biri Bakıxanovun itmiş hesab edilən “Divan”ının tapılmasıdır. Məmmədağa müəllimin bacarığı sayəsində Bakıxanovun külliyyatının əlyazması üzə çıxıb. Bir çoxu bu əlyazmanın “Qüdsi“ təxəllüsü ilə yazan başqa şairlərə - Mirzə Həsib Qüdsiyə, Mirzə Hüseyn Səbzvari Qüdsiyə, Qüdsi Şeyx İbrahim Gəncəviyə aid olduğunu bildirsələr də, o, elmi dəlillərlə sübut etdi ki, bu külliyyat məhz Bakıxanovundur.

Məmmədağa Sultanovun istər publisistik, istər elmi-pedaqoji, istərsə də ədəbi-bədii və tərcüməçilik işləri Azərbaycan ədəbiyyatı tarixinin önəmli parçalarındandır.

Qeyd edək ki, görkəmli ədəbiyyatşünas Məmmədağa Sultanov 1991-ci il yanvarın 22-də Bakıda vəfat edib.

İsa əl-Məsih haqqında ibrani mənbələrinin əksəriyyətində onun edamı bu cür ardıcıllıqla gedir: edam olundu, çarmıxa çəkildi. Amma heç kəs söz sırasını əsas tutub, “İsa əvvəl öldürülüb, sonra çarmıxa çəkilib” demir. Bu absurd bir iddia olardı. Biz hərfi mənadan yapışıb düşünməməliyik ki, İsa əvvəl edam olunub, sonra çarmıxa çəkilib, eləcə də Nəsimi öldürülüb, sonra dərisi soyulub.

Kult.az xəbər verir ki, bu sözləri Bakı Dövlət Universitetinin Ərəb filologiyası kafedrasının professoru, filologiya elmləri doktoru Aida Qasımova Teleqraf.com-un “Brifinq” layihəsində Nəsiminin edamı ilə bağlı danışakən deyib.

A.Qasımova bildirib ki, Nəsimi təkcə şair deyil, həm də bir əzabkeşdir. Əzabkeşlik dinlər tarixində çox böyük yer tutur. Əzabkeş olmağın isə özünün xüsusi məqamı var:

“Səhv etmirəmsə, Nəsiminin dərisinin soyulması kimi mübahisəli mülahizəni ədəbiyyatşünaslığımıza Qəzənfər Paşayev gətirib. Nəsimişünaslıqda böyük xidməti olan Qəzənfər müəllim, yəqin ki, bu məsələyə münasibət bildirəcək.

Nəsimi niyə bu qədər məşhurdur, insanlar nəyə görə əsrlər boyu onu sevir? Ona görə ki, o əzabkeş olub. İsa Məsih də əzabkeşdir. İsa peyğəmbər haqqında Quranda deyilir ki, onu öldürmədilər, çarmıxa çəkmədilər. Amma məntiqlə yazılmalı idi ki, çarmıxa çəkmədilər, öldürmədilər. İsa Məsih çarmıx əzabı çəkib, onun müqəddəsliyi birbaşa əzabkeş olması ilə bağlıdır.

Nəsiminin həyatını mükəmməl şəkildə araşdırdığımı söyləsəm, düzgün olmaz. Hər kəsin məşğul olduğu konkret sahələr var. Mən ərəbşünasam və əsas sahəm də klassik ərəb ədəbiyyatıdır. Bununla belə, bu məsələ ilə maraqlandım və gördüm ki, həqiqətən də bəzi ərəb mənbələrində şairin qətli barədə “boynu vuruldu, dərisi soyuldu və çarmıxa çəkildi” yazılır. Bu əl-Asqalanidə belədir və ərəb mənbələrinə xas təkrarçılığı xatırlasaq, əl-Asqalanidən təsirlənən tarixçilərin də onun mətnini olduğu kimi təkrarladığını görərik. (Sibt əl-Əcəmidə isə Sultan Müəyyədin fərmanında deyilir ki, dərisi soyulsun, sonra yeddi gün Hələbdə cəsədi car çəkilib nümayiş etdirilsin. Gördüyümüz kimi, bu, bir qədər fərqli xəbər olub dərisi soyulmaqla edam edilməni nəzərdə tutur).

Quranda da İsa ilə bağlı bu cür sıralanma var. İsa Məsih haqqında ibrani mənbələrinin əksəriyyətində onun edamı bu cür ardıcıllıqla gedir: edam olundu, çarmıxa çəkildi. Amma heç kəs söz sırasını əsas tutub “İsa əvvəl öldürülüb, sonra çarmıxa çəkilib” demir. Bu absurd bir iddia olardı. Biz hərfi mənadan yapışıb düşünməməliyik ki, İsa əvvəl edam olunub, sonra çarmıxa çəkilib, eləcə də Nəsimi öldürülüb, sonra dərisi soyulub.

Çünki sami dillərinin, eləcə də ərəbcənin öz qaydaları var. “Və”, yəni “vav” bağlayıcısını İbn Mənzurun “Lisan əl-ərəb” kitabında axtardım. Orada VIII əsr ərəb dilçisi Fərranın “vav”la “fə” bağlayıcılarının fərqi ilə bağlı fikrinə rast gəldim. Vurğulayır ki, “fə” bağlayıcısı yazılanda ardıcıllıq gözlənilir, “vav” olanda isə ardıcıllıq gözlənilmir. Fikir “vav”la bağlananda hərəkətin ardıcıllığı pozula bilər. Digər tərəfdən, “vav”ın bir mənası da “ilə”dir. Mənim fikrimcə, Nəsiminin dərisi soyulub, sonra qətlə yetirilib”.

A.Qasımova bildirib ki, apardığı araşdırmalar nəticəsində müəyyən edib ki, Nəsimi hətta dərisi soyularkən muvaşşah şeirləri deyib:

“Mən sonra başqa müəlliflərin, Şəraninin əsərini tapdım. Bu, sufizm mövqeyindən yazılıb, İbn Ərəbi tərəfdarlarına və onların kitablarına qarşı olan terrordan bəhs edən əsərdir.

Orada Nəsimidən də danışılır və ona olan məhəbbət özünü göstərir. Şərani yazıb ki, Nəsimi hətta dərisi soyularkən muvaşşah (qəsidə tipində şeir forması) da deyib. Təbii ki, bu hissə uydurula da bilər, amma bir məqam da var: dərinin soyulması Hələbdə, qədim Assuriyada əsas edam növlərindən biri olub. Bəşər tarixində bu dəhşətli edama məruz qalanlar olub. İsa Məsihin həvarilərindən olan Vorfolomey də bu üsulla qətlə yetirilib. Bu barədə Mikelancelonun çəkdiyi bir tablo da var. İsa Məsihin həvarilərindən olan Vorfolomey barədə daha bir faktı şərqşünas Vüqar Qaradağlıdan öyrəndim. Dedi ki, Vorfolomey Bakıda qətlə yetirilib”.

Professorun sözlərinə görə, bu sahədə də apardığı araşdırma zamanı maraqlı faktlar üzə çıxarıb. Belə ki, axtarış zamanı məlum olub ki, ermənilər bəzi mənbələrdə Bakını qədim erməni şəhəri kimi göstəriblər:

“Axtarış apardım, bu zaman qarşıma başqa bir məlumat çıxdı; ermənilər yazır ki, Vorfolomey ermənilərin qədim şəhəri Albanipolisdə, Albaniyanın paytaxtında, indiki Bakıda öldürülüb.

Yeri gəlmişkən, ermənilərin fantaziyasına, həyasızlığına baxın ki, Bakını qədim erməni şəhəri kimi qələmə verirlər. İkincisi, onların albanlarla nə əlaqəsi ola bilər?! Ağ bənizli, sarışın, mavi gözlü, uca boylu albanlar hara, ermənilər hara?”

Tanınmış yazıçı və tərcüməçi, Fransanın “İncəsənət və ədəbiyyat komandoru” ordeninə layiq görülmüş Hamlet Qoca vəfat edib.

Kult.az xəbər verir ki, bu barədə məlumatı tərcüməçi Səlim Babullaoğlu qeyd edib.

“Görkəmli tərcüməçi və ədib Hamlet Qoca Allahın rəhmətinə qovuşub. Ailə üzvlərinə, bütün yaxınlarına - xalq şairi Fikrət Qocaya, Güldəniz Qocayeva, dostlarım Babək Qocaya, İldırım Qocayevə başsağlığı verirəm. Yeri behişt olsun! Allah səbr versin”, - S.Babullaoğlu bildirib.

Qeyd edək ki, 1965-ci ildə ali təhsilini tamamlayıb Azərbaycan Milli Elmlər Akademiyasının Tarix İnstitutunda əmək fəaliyyətinə başlamış Hamlet Qoca “Gənclik” nəşriyyatında redaktor, Asiya və Afrika ölkələri ilə Respublika Həmrəylik Komitəsində məsul katib, “Azərbaycan Televiziya və Radio Verilişləri” Qapalı Səhmdar Cəmiyyətinin (AzTV) Avropa ölkələri üzrə baş redaksiyasında baş redaktor, Malidə tərcüməçi və Əlcəzairdəki səfirliyin mədəniyyət mərkəzində şöbə müdiri, Milli Məclisin beynəlxalq münasibətlər şöbəsində baş məsləhətçi vəzifələrində işləyib.

Azərbaycan Qida Təhlükəsizliyi Agentliyi (AQTA) Ramazan ayında düzgün qidalanma ilə bağlı maarifləndirici məqalə hazırlayıb.

Axar.az həmin məqaləni təqdim edir:

Ramazan ayında oruc tutan şəxsin qidalanma rejimi adi günlərdə qidalanmadan tam fərqlənir. Buna görə də oruc tutmağı asanlaşdırmaq üçün bir müddət əvvəldən bədəni buna hazırlamaq lazımdır. Gün ərzində qəbul edilən qidanın kalorisini azaltmaq və rejimlə qidalanmağa çalışmaq oruc tutmazdan əvvəl bədəninizin yeni qidalanma rejiminə uyğunlaşmasını asanlaşdıracaq.

Əksər insanlar imsak zamanı yeməkdən imtina edirlər. Lakin gün ərzində suya və qidaya olan tələbatı ödəmək üçün imsakda mütləq yemək lazımdır. Bu, oruc vaxtı sizi yorğunluq və halsızlıqdan qoruyar.

İmsakdan yarım saat öncə iki stəkan su içilməsi məsləhətdir. İmsakda daha çox enerjili qidalara üstünlük vermək lazımdır. Lifli qidaların qəbulu qandakı şəkəri tənzimləyir. Bal və mürəbbə isə məsləhət deyil. Çünki qandakı şəkəri ani sürətdə qaldırdığı və endirdiyi üçün orqanizmdə pozğunluq yarada bilər. İmsakda süd, şitpendir, qaymaq və digər ağartı məhsulları, yumurta, şorba, tərəvəz, yarma plovu kimi yeməklər yeyilə bilər. Yeməklərlə birlikdə, təzə meyvə və ya qoz, badam kimi quru qidaların qəbul edilməsi enerji və mineral baxımından dəstəkləyici ola bilər. Ümumiyyətlə, bədəndə su saxlayan qidalara daha çox üstünlük vermək lazımdır.

Tünd qara çay və qəhvə kimi kofeinli içkilər içməyin, bitki çaylarına, az şəkərli kompotlara üstünlük verin. Əgər səhər düzgün qidalansaq, gün ərzində həm su, həm də enerji balansımızı qorumuş olarıq.

Orucu ilıq su ilə açmaq lazımdır. İlıq su ilə mədə yumşalmalıdır ki, qidanı qəbul etməyə hazır olsun. Birbaşa quru qidanın qəbulu həzm problemləri yarada bilər. Təbii ki, əvvəlcə ən yüngül qidaların, yəni meyvə-tərəvəzin qəbulu daha yaxşı olar.

Yeməyə ilk olaraq sulu yeməklərdən başlamaq məsləhətdir. Menyuda ət, ətli tərəvəz yeməklərinə yer verilməlidir. Ətli tərəvəzli yeməkləri bişirərkən yağ əlavə etməyin, yalnız ətin öz yağında bişməsinəüstünlük verin. Ümumiyyətlə, bu ayda çox yağlı vəduzlu yeməklərin qəbul edilməsi məsləhət görülmür. İftar süfrənizdə tərəvəz salatlarına yer verin, bu salatları zeytun yağı ilə zənginləşdirə bilərsiniz. Yeməkdən 1-2 saat sonra meyvələrdən, xüsusilə mövsümi meyvələrdən hazırlanan qidaların qəbulu daha düzgün seçim olar.

İftar zamanı normadan artıq və fasiləsiz qida qəbul etmək ziyandır. Hətta gecədən səhər saatlarına kimi yeyən insanlar da var. Bu, tibbi baxımdan düzgün sayılmır. İftarda sürətli yemək mədə problemləri başda olmaqla qan şəkəri və təzyiqin yüksəlməsinə səbəb olur. Uzun müddət ac qalan mədəni qəfildən yükləməyin, kiçik hissələri yaxşıca çeynəmək şərti ilə yavaş-yavaş və uzun müddətə yeyin.

İftardan 1,5-2 saat sonra gəzməyiniz həzmə köməklik göstərəcək, zəifləyən metabolizmanızı sürətləndirəcək. Bu da çəkinizin artmasının qarşısını alacaq. Yatmazdan öncə qatıq yemək məsləhətdir. Bu, bədəndə suyun saxlanmasını tənzimləyir. Oruc tutanlar yuxu rejiminə də düzgün əməl etməlidirlər.

Yazıçı Hans Zaydler özünün yeni kitabına İkinci dünya müharibəsinin sonuna yaxın alman ordusunun nadir şəkillərini daxil edib.

“Müharibənin obrazları: 1944-1945-ci illərdə Hitlerin Qərb cəbhəsində məğlubiyyəti” (Images of War: Hitler’s Defeat on the Western Front 1944-1945) adlı kitabda eksklüziv şəkillər yer alıb. Şəkillərdə əsgərlər yorğun vəziyyətdə təsvir edilib. Onlar artıq anlayırlar ki, məğlubiyyət mütləqdir.

Kult.az Publika.az-a istinadən fotoları təqdim edir:

“Burger Kinq” bu ilin sonlarından etibarən Gürcüstanda sünii ətdən hazırlanmış fəst-fud qidaları satacaq.

Axar.az-ın ONA-ya istinadən xəbərinə görə, bu barədə ABŞ-da fəaliyyət göstərən fəst-fud şəbəkəsi “Verge” məlumat yayıb.

Şirkət səbəb kimi Gürcüstandakı vegeterian müştərilərini razı salmağa çalışdığını bildirib. Vegeterian burgerlərdə pendir və ət yerinə noxud, soya, kartof, bitki yağı və süni ətdən istifadə ediləcək. “Burger King”in baş ofisindən burgerlərin dad olaraq daha fərqli olmayacağı bildirilib.

Mağazalarda artıq mövsümün meyvələri hesab edilən çiyələk və alçanın satışı başlayıb. Ancaq heç bir halda uşaqlara verilməsi düzgün deyil.

Axar.az xəbər verir ki, bu barədə pediatr Vaqif Qarayev məlumat paylaşıb.

O bildirib ki, hazırda satışda olan bu meyvələr təbii halda yetişdirilməyib. Bu səbəbdən xüsusilə uşaqlara verilməsi məsləhət görülmür:

“Satışına yeni başlanılıb. Uşaqlara hələ vermək məsləhət deyil. Artıq şikayət edənlərin sayı artır. Deməli, xeyirindən çox ziyanı var”.