 |
|
Prezident İlham Əliyev Azərbaycan Respublikasında 2024-cü ilin “Yaşıl dünya naminə həmrəylik ili” elan edilməsi haqqında Sərəncam imzalayıb.
Sərəncama əsasən, Azərbaycan Respublikasında 2024-cü il “Yaşıl dünya naminə həmrəylik ili” elan edilir.
Qeyd edilib ki, Azərbaycan Respublikası beynəlxalq ictimaiyyətin etibarlı və məsuliyyətli üzvü kimi iqlim dəyişmələrinin fəsadlarına qarşı mübarizəyə öz töhfəsini verir.
Azərbaycanın 2030-cu ilə qədər sosial-iqtisadi inkişafa dair beş milli prioritetindən biri “Təmiz ətraf mühit və yaşıl artım ölkəsi” kimi müəyyən edilmişdir. Həmin prioritetə uyğun olaraq, ətraf mühitin sağlamlaşdırılması, yaşıllıqların bərpası və artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində işlər aparılır.
Azərbaycan baza ili (1990) ilə müqayisədə 2030-cu ilə qədər istilik effekti yaradan qazların emissiyalarının 35 faiz, 2050-ci ilə qədər isə 40 faiz azaldılmasını hədəf kimi götürmüşdür.
İşğaldan azad edilmiş Qarabağ və Şərqi Zəngəzur, eləcə də Naxçıvan Muxtar Respublikası yaşıl enerji zonası elan olunmuşdur. Azad edilmiş ərazilərdə həyata keçirilən genişmiqyaslı bərpa və yenidənqurma prosesində ətraf mühitin qorunması prioritetdir. Həmin ərazilərdə “ağıllı şəhər”, “ağıllı kənd” kimi innovativ yanaşmalar tətbiq edilir, ekosistem bərpa olunur.
Yaşıl enerji növlərinin yaradılması və yaşıl enerjinin dünya bazarlarına nəqli Azərbaycanın enerji siyasətinin prioritetidir. Azərbaycan elektrik enerjisi istehsalının qoyuluş gücündə bərpa olunan enerji mənbələrinin payının 2030-cu ilə qədər 30 faizə çatdırılmasını hədəfləyir.
BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası – COP29 kimi mötəbər bir tədbirin Azərbaycanda keçirilməsi ilə əlaqədar yekdil qərarın verilməsi beynəlxalq ictimaiyyət tərəfindən Azərbaycana böyük hörmət və etimadın, eləcə də ölkəmizin milli, regional və qlobal səviyyədə ətraf mühitin qorunması, iqlim dəyişmələrinin qarşısının alınması işinə töhfəsinin təqdir olunmasının bariz nümunəsidir.
“Azərbaycan Respublikası Hökuməti ilə Türkiyə Respublikası Hökuməti arasında mədəniyyət sahəsində əməkdaşlığa dair Saziş” təsdiq edilib.
Bununla bağlı Prezident İlham Əliyev Fərman imzalayıb.
Saziş qüvvəyə mindikdən sonra Azərbaycan Respublikasının Mədəniyyət Nazirliyi onun müddəalarının həyata keçirilməsini təmin edəcək.
Azərbaycan Xarici İşlər Nazirliyi Sazişin qüvvəyə minməsi üçün zəruri olan dövlətdaxili prosedurların yerinə yetirildiyi barədə Türkiyə Respublikası Hökumətinə bildiriş göndərəcək.
Ramil İdris oğlu Usubov “Şərəf” ordeni ilə təltif edilib.
"Yol-xeber.az" xəbər verir ki, bu barədə Azərbaycan Prezidenti İlham Əliyev sərəncam imzalayıb.
R.Usubov Azərbaycanda dövlət qulluğunda səmərəli fəaliyyətinə görə “Şərəf” ordeni ilə təltif edilib.
Prezident İlham Əliyev Göyçay rayonunun Bakı‒Şamaxı‒Yevlax (218 km)‒Potu‒Ulaşlı Şıxlı‒Üngütlü‒Çərəkə‒Çərəcə‒Şıxlar‒Xəlitli‒Yeniarx‒Hacıağabəyli avtomobil yolunun əsaslı təmiri ilə bağlı tədbirlər haqqında Sərəncam imzalayıb.
"Yol-xeber.az" xəbər verir ki, Sərəncama əsasən, on dörd min nəfər əhalinin yaşadığı 9 yaşayış məntəqəsini birləşdirən Bakı‒Şamaxı‒Yevlax (218 km)‒Potu‒Ulaşlı Şıxlı‒Üngütlü‒Çərəkə‒Çərəcə‒Şıxlar‒Xəlitli‒Yeniarx‒Hacıağabəyli avtomobil yolunun əsaslı təmiri məqsədilə Azərbaycan Respublikası Prezidentinin 2023-cü il 23 yanvar tarixli 3720 nömrəli Sərəncamı ilə təsdiq edilmiş “Azərbaycan Respublikasının 2023-cü il dövlət büdcəsində dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”nün 1.31.25-ci yarımbəndində göstərilmiş məbləğin ilkin olaraq 1,4 milyon (bir milyon dörd yüz min) manatı Azərbaycan Avtomobil Yolları Dövlət Agentliyinə ayrılıb.
Maliyyə Nazirliyi bu Sərəncamın 1-ci hissəsində göstərilən məbləğdə maliyyələşməni təmin edəcək.
İqtisadiyyat Nazirliyi bu Sərəncamın 1-ci hissəsində göstərilən avtomobil yolunun əsaslı təmirinin başa çatdırılması üçün zəruri olan maliyyə vəsaitini Azərbaycan Respublikasının 2024-cü il dövlət büdcəsi layihəsində dövlət əsaslı vəsait qoyuluşu xərclərinin bölgüsündə nəzərdə tutacaq.
Nazirlər Kabineti bu Sərəncamdan irəli gələn məsələləri həll edəcək.
ABŞ və Qərbin, eləcə də Rusiyanın təsiri altında hərəkət edən Ermənistan siyasi elitasında Azərbaycana qarşı növbəti savaşın qaçılmaz olduğuna artıq mütləq əksəriyyət əmindir... Ancaq Paşinyan hakimiyyəti müharibə başlandıqdan sonra hərbi müttəfiq Rusiyanın, eləcə də, beynəlxalq himayədarların göndərdiyi Qərb müşahidəçilərinin Ermənistana kömək edəcəklərinə ciddi şübhə ilə yanaşır...
Cənubi Qafqazda yeni müharibə ehtimalı ətrafında müzakirələr və mübahisələr intensivləşməyə başlayıb. Bu barədə iddialar həm Ermənistanda, həm Rusiyada, həm də Qərb siyasi dairələrində xüsusi olaraq, ön planda tutulur. Ermənistan cəmiyyətində bu ehtimalın əsas daşıyıcısı rolunda məhz hərbi məğlubiyyətlə barışmaq istəməyən radikal-revanşist düşərgə çıxış edir. Bu düşərgə erməni toplumunu Azərbaycana qarşı düşmənçilik əhval-ruhiyyəsində saxlamağa çalışır.
Eyni zamanda, Cənubi Qafqazda geopolitik maraqları olan Qərb ölkələri, xüsusilə də, Fransa bu iddianın reallaşdırılmasına cəhd göstərir. Üstəlik, Rusiya üçün də regional sülh prosesinin uğur qazanmasına dəstək vermək qətiyyən sərfəli deyil. Bu səbəbdən də, Kremlə yaxın siyasi dairələr Ermənistanı yeni savaş xofu ilə Rusiyanın orbitinə qaytarmaq niyyəti ilə müharibə proqnozlarında israr edirlər. Və nəticədə regionda hərbi-siyasi gərginliyin arxa plana keçirilməsi mümkün olmur.
Təbii ki, bütün bunlar rəsmi İrəvanın mövqeyinə və davranışlarına da ciddi şəkildə təsir göstərir. Paşinyan hakimiyyəti erməni toplumunun dəstəyini itirməmək, eləcə də, Qərbin narazılığını öz üzərinə çəkməmək üçün savaş ritorikasını uyğun davranmaq məcburiyyətində qalmış kimi görünür. Üstəlik, Qərbdən verilən dəstək, Fransadan və Hindistandan göndərilən silahlar da rəsmi İrəvanı savaş variantını növbəti dəfə sınaqdan çıxartmağa həvəsləndirir, hətta şirnikləndirir.
Ancaq Paşinyan hakimiyyəti həm də reallığın fərqindədir. Erməni siyasi elitası Ermənistanın növbəti savaşdan çıxa bilməyəcəyini də anlayır. Rəsmi İrəvan ABŞ və Qərbin Ermənistanı Azərbaycanla yeni müharibədə müdafiə edəcəyinə əmin deyil. Hətta Paşinyan hakimiyyəti Qərbin rəsmi Bakıya təzyiq mexanizmlərinin olub-olmadığına da ciddi şübhə ilə yanaşır. Və rəsmi Bakının indiyə qədər kənar təsirlərə qarşı müqavimət immunitetinin maksimum səviyyədə olması Paşinyan hakimiyyətində inamsızlığı artıraraq, xof yaradır.
Ona görə də, Paşinyan hakimiyyəti Ermənistanın gələcək taleyi üçün savaşın olduqca təhlükəli seçim variantına çevrildiyini anlamamış deyil. Bu baxımdan, rəsmi İrəvanın savaş ritorikasını gündəmdə saxlamaqla yanaşı, ondan həm də Ermənistan cəmiyyətini Azərbaycanla sülh sazişinə hazırlamaq üçün istifadə etməyə çalışması da qətiyyən diqqətdən yayınmır. Yəni, Ermənistanın gələcək taleyi ilə bağlı qəbul ediləcək qərarlarda hələlik qeyri-müəyyənlik hökm sürür. Və bu, Paşinyan hakimiyyətini eyni vaxtda həm savaş, həm də sülh ritorikasını sintez etmək məcburiyyətində buraxır.
Maraqlıdır ki, erməni siyasi elitası indiki situasiyada yeni savaşın qaçılmaz olduğuna daha çox inanır. Bu təhlükənin Ermənistan üçün faciəvi nəticələr vəd etdiyini nəzərə alaraq, savaşdan yayınma variantlarının qabardılmasına çalışır. Erməni politoloq Menya Soqomonyan isə hesab edir ki, Ermənistanın yeni savaşdan yayınmaq üçün heç bir şansı qalmayıb: "Ancaq müharibə başlandıqdan sonra nə Rusiya, nə də Qərb müşahidəçiləri Ermənistana kömək etməyəcəklər".
Erməni politoloq əmindir ki, böyük dövlətlərin öz maraqları var, onlar həm özlərinə lazım olanı edirlər, həm də "siyasi bazarlıq" aparırlar. Ermənistan kimi kiçik dövlətlər isə yalnız onlara icazə verilən çərçivədə davranmaq məcburiyyətində qalırlar: "Ona görə də Paşinyan hakimiyyəti yaxın vaxtlarda Azərbaycanla sülh sazişi imzalayacaq. Bu sənəd Ermənistanın kapitulyasiyasını və Qarabağın Azərbaycan ərazisi olduğunun rəsmi təsdiqini ifadə edəcək. Ancaq hətta sülh sazişinin imzalanmasından sonra belə, Ermənistan diz çökmüş vəziyyətdən çıxa bilməyəcək. Ermənistan öz dövlətçiliyini itirməyə məhkum edilmiş durumdadır".
Təbii ki, bu səbəbdən də, bəzi hallarda rəsmi İrəvan yekun sülh sazişinin imzalanması ehtimalını mümkün qədər sürətləndirməyə yönəlik cəhdlər edir. Halbuki, Paşinyan hakimiyyətinin bu mövqeyi qətiyyən sabit və davamlı xarakter də daşınmır. Çünki rəsmi İrəvan müstəqil mövqeyə malik deyil. Əsasən, Ermənistanın himayə edilməsini öz üzərinə götürmüş dövlətlərin və beynəlxalq qurumların direktivləri ilə hərəkət edir. Və bu baxımdan, Paşinyan hakimiyyətinin sülh cəhdləri ən yaxşı halda, tərəddüdlü məzmun daşıyır.
Bütün bunları nəzərə aldıqda, Ermənistan parlamentinin spikeri Alen Simonyanın "Yaxın 15 gün ərzində sülh sazişi imzalana bilər" açıqlaması o qədər də inandırıcı görünmürdü. Eyni zamanda, baş nazir Nikol Paşinyan da daxil olmaqla, erməni siyasi elitasının bu ilin sonuna qədər yekun sülh sazişinin imzala biləcəyi barədə iddiaları da reallıqdan uzaq qaldı. Və bu, rəsmi İrəvanın regional sülhə hələ hazır olmadığını göstərir.
Ancaq rəsmi İrəvan istənilən halda, sülh variantını aktual saxlamaqda maraqlıdır. Qarabağ mövzusunun birdəfəlik gündəmdən çıxarılması da bu məsələdə müəyyən əlavə imkanlar açır. İndi rəsmi İrəvan sülh sazişi qarşısında əsas əngəllərdən birinə çevrilmiş kimi görünən sərhədlərin demarkasiya və denaminasiyası ilə bağlı prosesdə Ermənistan cəmiyyətinin müqavimətini nisbətən zəiflətməyə çalışır.
Məsələ ondadır ki, Ermənistan parlamentinin spikeri Alen Simonyan bu məsələ ilə bağlı danışarkən, Azərbaycanla sərhədlərin müəyyən edilməsinin yekun sülh sazişinin imzalanmasından sonra da həll olunmasının mümkünlüyünü vurğulayıb. Onun fikrincə, adətən, belə proseslər illərlə davam edir və bu məsələ ucbatından yekun sülh sazişinin imzalanmasının gecikdirilməsi doğru olmazdı. Və bu, regional sülh prosesinin pozulmasında məhz "sərhəd xəritələri" faktorundan yararlanmağa çalışın Rusiyanın əlində qalan önəmli təzyiq mexanizmlərindən birinin sıradan çıxarılması məqsədi də güdmüş ola bilər.(Yeni Müsavat)
Heydər Əliyev Fondunun vitse-prezidenti, İDEA İctimai Birliyinin təsisçisi və rəhbəri Leyla Əliyeva instaqram hesabında Azərbaycan Respublikasının Prezidenti İlham Əliyevin doğum günündən paylaşım edib.
Dövlət başçısı ad gününü ailə üzvləri ilə birgə qeyd edir.
Azərbaycan Respublikasının Prezidenti İlham Əliyev və birinci xanım Mehriban Əliyeva Ağdam rayonuna səfər ediblər.
Dövlətimizin başçısı “AzərEnerji” Açıq Səhmdar Cəmiyyətinin 110/35/10 kV-luq “Ağdam” qovşaq yarımstansiyasının açılışında iştirak edib.
Ağdam rayonunun Xocalı rayonu ilə sərhədində yerləşən Şelli kəndi ərazisində “AzərEnerji” tərəfindən 110/35/10 kV-luq “Ağdam” qovşaq yarımstansiyası inşa edilib. “Ağdam” qovşaq yarımstansiyasına “Ağdam-1” yarımstansiyasından 10 kilometr məsafədə ikidövrəli olmaqla 110 kilovoltluq ötürmə xətti və bu xəttin üstündəki ildırımötürücü trosun içində 24 damarlı fiberoptik kabel xətti çəkilib.
Qeyd olunub ki, bu yarımstansiyanın Ağdamın Xocalı ilə sərhədində tikilməsinin xüsusi əhəmiyyəti vardır. Yəni, “Ağdam” qovşaq yarımstansiyası rayonun bəzi kəndləri ilə yanaşı, əsasən Xocalı, Əsgəran, Xocavənd, Ağdərə və Xankəndini ölkə enerjisisteminə qoşmaqla bərabər, həmçinin ehtiyat qida mənbəyi kimi regionun enerji təchizatında etibarlılığı təmin edir. Bunun üçün yarımstansiyada ehtiyat yuvalar da quraşdırılmışdı. Regionda suverenliyimiz bərpa olunduğundan yaxın vaxtlarda “Ağdam” qovşaq yarımstansiyasından Xankəndiyə 110 kilovoltluq ötürmə xətti çəkilərək 110/35/10 kilovoltluq “Şuşa” və “Füzuli” yarımstansiyaları ilə əlaqələndiriləcək. Bununla da ikitərəfli elektrik təchizatına nail olunacaq. Eyni zamanda, Xocalı, Əsgəran və digər kənd və qəsəbələrin 35 kV-luq elektrik təchizatı da “Ağdam” qovşaq yarımstansiyasından təmin ediləcək.
“Ağdam” qovşaq yarımstansiyasında 110 kV-luq açıq paylayıcı qurğu yaradılıb və açarların, ayırıcıların və digər texniki avadanlıqların açılıb-qoşulması, o cümlədən aktivlərin, proseslərin, resursların idarə edilməsi, qüsurların təcili aradan qaldırılması və başqa əməliyyatların proqram təminatı vasitəsilə avtomatik həyata keçirilməsi təmin edilib. Yarımstansiyanın yeni tikilən İdarəetmə Mərkəzində isə 35 və 10 kV-luq rəqəmsal qapalı paylayıcı qurğular yerləşdirilib. Bununla yanaşı, Mərkəz əks-qəza avtomatikası, mikroprosessor tipli rele mühafizəsi, avtomatika və idarəetmə panelləri, sabit və dəyişən cərəyan qurğuları ilə təmin edilib. Yarımstansiyada müasir tələblərə cavab verən mikro SCADA sistemi yaradılıb və “AzərEnerji”nin mərkəzi SCADA sistemi ilə sinxronlaşdırılıb.
Dövlətimizin başçısı “Ağdam” qovşaq yarımstansiyasını işə saldı.
Qeyd edək ki, buna qədər 2022-ci il fevralın 13-də Prezident İlham Əliyevin və birinci xanım Mehriban Əliyevanın iştirakı ilə “AzərEnerji”nin yeni tikilən 110/35/10 kV-luq “Ağdam-1” yarımstansiyası və onun yaxınlığında tikilən “Qarabağ” Regional Rəqəmsal İdarəetmə Mərkəzi istismara verilib.
Azərbaycan Respublikasının Prezidenti İlham Əliyev və birinci xanım Mehriban Əliyeva Ağdam şəhərində “İmarət” Kompleksində aparılan təmir-bərpa işləri ilə tanış olublar.
"Dövlətimizin başçısına və birinci xanıma görülən işlər barədə məlumat verildi.
Burada Qarabağ xanlığının əsasını qoymuş Pənahəli xanın və xanlıqda müxtəlif illərdə hakimiyyətdə olmuş hökmdarlar - İbrahimxəlil xanın və onun oğlu Mehdiqulu xanın qəbirüstü türbələri, həmçinin Mehdiqulu xanın qızı Xurşidbanu Natəvanın məzarı olub. Qarabağ xanlarının nəslindən olan digər görkəmli şəxslər də bu qəbiristanlıqda dəfn edilib. Lakin Ağdam şəhəri işğal olunduqdan sonra qəbiristanlıq da erməni vandalizminə məruz qalıb. İbrahimxəlil xanın türbəsi və Qarabağın sonuncu hakimi Mehdiqulu xan Cavanşirin qızı Xurşidbanu Natəvanın qəbirüstü abidəsi ermənilər tərəfindən dağıdılıb.
Prezident İlham Əliyevin müvafiq tapşırığına uyğun olaraq Pənahəli xanın sarayının yerləşdiyi “İmarət” Kompleksinin bərpa edilməsi üçün işlərə başlanılıb. Kompleksin bərpası ilə bağlı xarici mütəxəssislər tərəfindən hazırlanmış konsepsiya 2022-ci il oktyabrın 4-də dövlətimizin başçısına təqdim olunub və işlərə başlanılıb. Konsepsiyaya əsasən, kompleks Pənahəli xanın sarayı, türbələr və Qarabağ atları parkından ibarət olacaq, xanın sarayı bərpa edilərək interaktiv muzey kimi fəaliyyət göstərəcək.
Xarici mütəxəssislərin Ağdama səfərləri çərçivəsində sahənin inspeksiyası və çəkilişləri aparılıb, arxiv materialları araşdırılıb, beynəlxalq təcrübəyə əsaslanaraq bərpa və dizayn layihələri hazırlanıb. Kompleks ümumilikdə 3,3 hektar ərazini əhatə edəcək.
“İmarət” Kompleksindəki tarixi qəbiristanlıqda mövcud beş türbə qalığı tədqiqat sahəsinə daxil edilib. Türbələrin içi və ətrafı erməni işğalçılarının bu abidələrin daxilində qurduğu donuzçuluq təsərrüfatının tullantılarından və digər qalıqlardan təmizlənib.
Tədqiqat nəticəsində burada çox sayda müsəlman qəbirləri, daş abidələrin fraqmentləri - başdaşıları, sinədaşıları, antik dövr sütun bazası, antropomorf büt aşkarlanıb. Ərazidə xüsusilə kəllə və alt çənə sümükləri, çox sayda insan skeletinin fraqmentləri tapılıb. Onların arasında xan nəslinə aid olan qədim sərdabə tipli qəbirlər də yer alıb. Burada sovet dövründə dəfn edilənlərin qəbirlərinin böyük bir hissəsi vandalizmə məruz qalıb. Ərazidə aşkarlanan sümüklərdən DNT nümunələri götürülüb, qəbirlərin identifikasiyası üzərində araşdırmalar davam etdirilir.
Erməni işğalçılar tərəfindən məzarların sinədaşı və başdaşıları sındırılıb, bir çoxu müxtəlif məqsədlə istifadə üçün qəbiristanlıq ərazisindən çıxarılıb.
Kompleksin ərazisində arxeoloji tədqiqatların aparılması məqsədilə AMEA-nın Arxeologiya, Etnoqrafiya və Antropologiya İnstitutu bu ilin aprelində Ağdam şəhərinə mütəxəssislərdən ibarət elmi ekspedisiya göndərib. Tədqiqatlar zamanı tapıntıların foto və videoçəkilişləri həm fotoaparat, həm də kvadrokopterlə aparılıb. Tədqiqatlar nəticəsində müəyyən edilib ki, “İmarət” Kompleksinə aid olan tarixi qəbiristanlığın ərazisi 6 min kvadratmetrdir. Cari ilin sonunadək Kompleksin ərazisindəki tarixi qəbiristanlıqda arxeoloji tədqiqat işlərinin birinci mərhələsi yekunlaşacaq. Burada tədqiqat işlərinin ikinci mərhələsinə başlanılacaq.
Kompleksin tam bərpası üçün vəsaitin Qarabağ Dirçəliş Fondu tərəfindən ayrılması nəzərdə tutulur.
Azərbaycan Respublikasının Prezidenti İlham Əliyev Ağdam rayonunun Salahlı Kəngərli kəndinin təməlini qoyub.
Dövlətimizin başçısına kənddə görüləcək işlər barədə məlumat verildi.
Bildirildi ki, kənd tarixi ənənələri qorumaqla müasir üslubda layihələndirilib. Kəndin ümumi ərazisi 178 hektara yaxındır. Salahlı Kəngərli kəndində 1376 nəfərin məskunlaşması nəzərdə tutulub. Layihə üzrə kənddə ümumilikdə 418 fərdi ev tikiləcək.
Burada məskunlaşacaq əhalinin yaşayış yükünü nəzərə alaraq, məhəllələrin salınmasının birinci mərhələsi üçün 99 hektar torpaq sahəsi ayrılıb. Birinci mərhələdə kəndə 850 nəfərin köçürülməsi üçün 150 fərdi evin tikilməsi planlaşdırılır.
Diqqətə çatdırıldı ki, kənddə əhalinin məşğulluğunun təmin edilməsi üçün də hər cür şərait yaradılacaq. Burada əhali müxtəlif təyinatlı obyektlərdə və kənd təsərrüfatı sahələrində işlə təmin olunacaqlar.
Salahlı Kəngərli kəndində 480 şagird yerlik məktəb, 80 yerlik isə uşaq bağçası və digər sosial obyektlər inşa olunacaq.
Kənddə enerji daşıyıcılarına qənaət etmək məqsədilə alternativ enerjidən istifadə olunması nəzərdə tutulur.
Prezident İlham Əliyev Salahlı Kəngərli kəndinin təməlini qoydu.
Azərbaycan Respublikasının Prezidenti İlham Əliyev Ağdam rayonunun Baş Qərvənd kəndinin təməlqoyma mərasimində iştirak edib.
Dövlətimizin başçısına kənddə görüləcək işlər barədə məlumat verildi.
Bildirildi ki, kənd tarixi ənənələri qorumaqla müasir üslubda layihələndirilib. Kəndin ümumi ərazisi 476 hektardır. Kənddə 6057 nəfərin məskunlaşması və ümumilikdə 1495 fərdi evin tikilməsi nəzərdə tutulub.
Layihənin birinci mərhələsi üçün 202 hektardan çox torpaq sahəsi ayrılıb. Birinci mərhələdə kəndə 851 ailənin - 3703 nəfərin köçürülməsi planlaşdırılır. Bunun üçün bu mərhələdə 851 ev inşa ediləcək. Bu evlərin 170-i ikiotaqlı, 425-i üçotaqlı, 213-ü dördotaqlı, 43-ü isə beşotaqlı olacaq.
Prezident İlham Əliyev görüləcək işlər barədə videoçarxa baxdı.
Vurğulandı ki, kənddə əhalinin məşğulluğunun və istirahətinin təmin edilməsi üçün də hər cür şərait yaradılacaq. Burada uşaq bağçası, məktəb, kollec binaları, kollektiv istirahət və təhsil obyektləri, inzibati bina, klub icma mərkəzi, tibb məntəqəsi, aptek, mehmanxana, bazar və bir sıra xidmət müəssisələri yaradılacaq. Kənddə enerji daşıyıcılarına qənaət etmək məqsədilə alternativ enerjidən istifadə olunacaq.
Prezident İlham Əliyev Baş Qərvənd kəndinin təməlini qoydu.