 |
|
Əsir və itkin düşmüş, girov götürülmüş vətəndaşlarla əlaqədar Dövlət Komissiyası və digər aidiyyəti dövlət qurumları tərəfindən Naxçıvan Muxtar Respublikasının Şahbuz rayonunun Ermənistanla sərhəd ərazisində əlverişsiz hava şəraitində məhdud görmə səbəbindən Azərbaycan Respublikası Müdafiə Nazirliyinin itkin düşmüş əsgərləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu ilə bağlı zəruri axtarış və araşdırma işləri davam etdirilir.
Bu barədə Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasından məlumat verilib.
Bildirilib ki, əsgərlərin Ermənistan ərazisində saxlanıldığının ehtimal edildiyi nəzərə alınaraq, onların azad olunmaları ilə bağlı aidiyyəti beynəlxalq təşkilatlara rəsmi müraciət olunub.
Məsələ ilə bağlı ictimaiyyətə əlavə məlumat veriləcək.
2020-ci ildən bəri Azərbaycanda mina qurbanlarının sayı 290 nəfərə çatıb.
Bu barədə Azərbaycan Xarici İşlər Nazirliyindən bildirilib.
Qeyd olunub ki, keçmiş təmas xəttindən uzaqda, bir müddət əvvəl Ermənistan istehsalı olan 2021-ci il üçün minaların aşkar edildiyi Laçın rayonunda növbəti mina partlayışı nəticəsində azərbaycanlı mülki şəxs xəsarət alıb.
"Ermənistan dəqiq mina xəritələrini təhvil verməlidir", - XİN-dən bildirilib.
Qeyd edək ki, aprelin 12-də Laçında daha 1 nəfər mülki şəxs minaya düşmüşdü.
Qərbi Azərbaycan İcması ABŞ-ın Dövlət katibi Antoni Blinkenə məktub yazaraq, Ermənistandan qovulmuş azərbaycanlıların öz vətənlərinə dinc, təhlükəsiz və ləyaqətlə qayıtmasına ABŞ-ın dəstək verməsini xahiş edib.
İcmadan verilən xəbərə görə, məktubda aşağıdakılar bildirilir:
“Qərbi Azərbaycan İcması Ermənistandan qovulmuş azərbaycanlıların hüquqlarını qorumaq üçün 1989-cu ildən bəri fəaliyyət göstərir.
Azərbaycanlıların kompakt yaşayan yerli əhali kimi mühüm mövcudluğa malik olduqları Ermənistandan qovulması 1991-ci ildə başa çatıb. Ermənistanın azərbaycanlılara qarşı həyata keçirdiyi misli görünməmiş etnik təmizləmə nəticəsində bu ölkədə bir nəfər də olsun azərbaycanlı qalmayıb.
Ermənistan bu ölkədəki Azərbaycan mədəni irsini sistemli şəkildə məhv edib. Mədəni və dini obyektlərin, o cümlədən məscidlərin, qəbiristanlıqların və digər müqəddəs yerlərin məhv edilməsi azərbaycanlılara böyük ağrı və iztirab verməklə yanaşı, beynəlxalq humanitar hüququ və insan hüquqlarını kobud şəkildə pozur. Bundan əlavə, son üç onillikdə Ermənistan azərbaycanlıların öz qəbiristanlıqlarını, mədəni irsini və müqəddəs yerlərini ziyarət etmələrinə icazə verməkdən imtina edib. Hərçənd, bu ziyarətlər sülh və barışıq üçün böyük əhəmiyyət kəsb edir. Azərbaycan mədəni irsinə qarşı bu qeyri-insani rəftar və onlara girişin qadağan edilməsi regionda gərginliyi daha da artırır.
Bu ədalətsizlik Ermənistanın hakim dairələrində cəzasızlıq hissi yaradıb, onları ərazi iddiaları irəli sürməyə, Azərbaycanın beynəlxalq səviyyədə tanınmış ərazilərinə qarşı güc tətbiq etməyə, işğalçılığa, kütləvi etnik təmizləməyə və insanlığa qarşı digər cinayətlərə daha da həvəsləndirib.
İstərdik ki, Ermənistanın bu haqsızlıqlarına son qoyulsun və onun nəticələri aradan qaldırılsın. Ümumdünya İnsan Hüquqları Bəyannaməsində, Mülki və Siyasi Hüquqlar haqqında Beynəlxalq Paktda və digər mühüm beynəlxalq aktlarda təsbit olunmuş geriyə qayıtmaq hüququna əsaslanaraq, İcma Ermənistandan qovulmuş azərbaycanlıların öz evlərinə təhlükəsiz və ləyaqətlə qayıtmasını, eləcə də qayıtdıqdan sonra fərdi və kollektiv hüquqlarının həyata keçirilməsini təmin etməyə çalışır.
Biz dinc, təhlükəsiz və ləyaqətli qayıdış konsepsiyamızı hazırlamış və dərc etmişik. Həmin sənəd BMT Təhlükəsizlik Şurasının, Baş Assambleyasının və İqtisadi və Sosial Şurasının rəsmi sənədləri kimi yayılıb.
2020-ci ildə Ermənistanla Azərbaycan arasında müharibənin başa çatması iki ölkə arasında davamlı sülhün əldə olunması üçün əlverişli zəmin yaradır. Lakin Ermənistandan qovulmuş azərbaycanlıların öz evlərinə qayıda bilməməsi, Ermənistanda monoetnik dövlətçilik siyasətinin, etnik təmizləmənin, irqi ayrı-seçkiliyin davam etməsi böyük ədalətsizlikdir. Bu vəziyyət davamlı sülhə nail olmaq üçün aparılan səylərə kömək etmir.
Biz Ermənistan və Azərbaycanın dövlətlərarası münasibətlərini normallaşdırmaq üçün davam edən səylərini yüksək qiymətləndirməklə və ABŞ-ın bu prosesi asanlaşdırmaq səylərini təqdir etməklə yanaşı, iki ölkə arasında bağlanacaq sazişdə azərbaycanlıların Ermənistana geri qayıtmaq hüququnun təsbit edilməsinin vacib olduğuna inanırıq. Bu, həm də iki ölkə arasında sülhün davamlı olması üçün vacibdir. Aydınlıq üçün qeyd etməliyik ki, geri qayıtmaq hüququmuzun təmin edilməsi Ermənistan və Azərbaycan arasında davam edən danışıqların uğuru üçün zəruridir. Lakin, bu danışıqların uğuru geri qayıtmağımız üçün şərt ola bilməz. Vətənində yaşamaq əzəli və ayrılmaz hüquqdur və Ermənistan Azərbaycanla münasibətlərinin xarakterindən və danışıqların necə getməsindən asılı olmayaraq bu hüququmuza hörmət etməyə borcludur. Ermənistanın Azərbaycanla siyasi fikir ayrılıqlarının olması ona etnik azərbaycanlıları qovmaq və onların geri qayıtmasına mane olmaq haqqı vermir.
Azərbaycanlıların geri qayıtması məsələsi barədə qərar verməyi Ermənistanın ixtiyarına buraxmaq son dərəcə ədalətsiz və yanlış olardı. Bu, insan hüquqlarının aliliyi ideyasına zidd olmaqla, Ermənistanın apardığı irqi ayrı-seçkiliyin qəbul edilməsi demək olardı.
Buna görə də, biz ABŞ-dan xahiş edirik ki, müvafiq siyasi və təhlükəsizlik təşəbbüsləri və sosial-iqtisadi yardım proqramları həyata keçirməklə Ermənistandan qovulmuş azərbaycanlıların dinc, ləyaqətli və təhlükəsiz şəkildə öz vətənlərinə qayıtmasına kömək edərək insan hüquqlarımızı möhkəm və ardıcıl şəkildə qorusun.
Nəhayət, bir daha qeyd etmək istərdik ki, bizim Ermənistandan təhlükəsiz və ləyaqətli qayıdış hüququmuza hörmət etmək barədə qanuni tələbimiz Ermənistanın ərazi bütövlüyü və ya suverenliyinə zərər vuracaq şəkildə yanlış şərh edilə bilməz. Biz beynəlxalq hüququn aliliyinə və dialoqun dəyərinə tam şəkildə inanırıq. Təcavüzkar separatizm və azlıqların hüquqları bəhanəsi ilə ərazilərin zorla ələ keçirildiyi regionumuzun daha geniş kontekstini nəzərə alsaq, bizim bu aydın mövqeyimiz alqışlanmağa layiqdir.
Bu müstəvidə, Azərbaycanın Qarabağ bölgəsinin erməni sakinlərinin hüquqlarını təmin etmək və öz ərazi bütövlüyü və suverenliyi çərçivəsində re-inteqrasiya etmək niyyətini bəyan etmiş və əməli tədbirlər görmüş Azərbaycan hökumətinin müsbət yanaşmasına istinad etmək istərdik. Biz hesab edirik ki, Ermənistan hökuməti Azərbaycan hökumətinin bu yanaşmasına bizim hüquqlarımızı təmin etmək üçün beynəlxalq insan hüquqları və humanitar hüquq çərçivəsində öz öhdəliklərini yerinə yetirməyə dair təşviqedici nümunə kimi baxmalıdır.
Əminik ki, Birləşmiş Ştatların qərəzsiz və hərtərəfli səyləri Ermənistandan qovulmuş azərbaycanlıların öz evlərinə qayıtmaq hüquqlarına hörmət edilməsinə yardım edəcək və bununla da insan hüquqlarının ümumbəşəri dəyəri kimi qorunub saxlanması və davamlı sülhün bərqərar edilməsi təmin ediləcəkdir.
Biz Ermənistandan qovulmuş azərbaycanlıların öz vətənlərinə dinc, təhlükəsiz və ləyaqətlə qayıtmasının asanlaşdırılması ilə bağlı məsələlərdə ABŞ-ın müvafiq strukturları ilə dialoq və əməkdaşlığa hazırıq”.
"Fransanın Avropa və Xarici İşlər Nazirliyinin Ermənistan tərəfinin 11 aprel tarixində Laçın rayonu istiqamətində yerləşən mövqelərimizə qarşı təxribatı ilə əlaqədar Ermənistanı dəstəkləyən 12 aprel tarixli bəyanatı reallığı əks etdirmir".
Bu fikirlər Azərbaycan Xarici İşlər Nazirliyinin Fransanın Avropa və Xarici İşlər Nazirliyinin aprelin 12-də yaydığı bəyanatına dair şərhində əksini tapıb.
"25 ilə yaxın müddətdə Azərbaycan-Ermənistan münaqişəsində vasitəçi olarkən Ermənistanın təcavüzünə və işğalçı siyasətinə qiymət verməyən, münaqişənin həllinə çalışmayan, Azərbaycanın işğala son qoyaraq münaqişəni təkbaşına həll etməsindən sonra ölkəmizə qarşı qarayaxma kampaniyası aparan Fransa bu bəyanatla növbəti dəfə qeyri-ədalətli mövqe nümayiş etdirib.
Üçtərəfli bəyanata və Fransa Prezidentinin də iştirakçısı olduğu Praqa görüşünün nəticələrinə uyğun olaraq Ermənistanı Azərbaycanın ərazi bütövlüyü və suverenliyinə hörmət etməyə çağırmayan, Azərbaycan ərazilərindən erməni silahlı qüvvələrini çıxarmağı Ermənistandan tələb etməyən Fransa tərəfinin birtərəfli əsasda yalnız Ermənistanın ərazi bütövlüyünə hörmət edilməsinin vacib olduğunu bəyanatda bildirməsi Fransanın ölkəmizə qarşı qərəzinin nümunəsidir.
Fransa tərəfini, Ermənistanı növbəti təxribatlara təhrik edən, revanşist qüvvələrə dəstək verən bu kimi bəyanatlardan çəkinməyə çağırırıq", - XİN-dən qeyd olunub.
Paşinyan hakimiyyəti öz avantürist siyasətinin real nəticələri ilə üzləşib, indi əgər, rəsmi İrəvan Rusiyanın təzyiqləri qarşısında KTMT kontingentini Ermənistana buraxarsa, bu, ABŞ və Qərbin kəskin reaksiyasına səbəb ola bilər... Əks haldasa, Avropa Birliyinin “təhlükəsizlik çətiri”nə olan ümidləri boşa çıxan Ermənistana qarşı Rusiyanın cəza addımlarının daha təhlükəli istiqamətlər ala biləcəyi qətiyyən şübhə doğurmur...
Cənubi Qafqazda hərbi-siyasi gərginlik artıq ən yüksək həddə çatıb. Hazırda yaranmış vəziyyət hər an başlaya biləcək daha genişmiqyaslı savaş təhlükəsinin ilkin əlamətləri kimi diqqəti çəkir. Üstəlik, mövcud situasiya Cənubi Qafqazda sülh prosesinə vasitəçilik iddiasında olan geopolitik oyunçuların göstərdiyi cəhdlərin uğursuz olduğunu, hətta iflasa uğradığını da təsdiqləyir. Və bu baxımdan, regional problemlərin istənilən halda, hərbi faktorların təsiri altında nizamlana biləcəyi qətiyyən istisna deyil.
Təbii ki, belə vəziyyətin yaranmasında Cənubi Qafqaza birbaşa aidiyyatı olmayan kənar güclərin rolu inkaredilməzdir. Belə ki, rəsmi İrəvanın “xaotik və sürüşkən siyasəti” ucbatından Ermənistan ərazisin nəhəng güclərin ziddiyyət məkanına çevrilib. Cənubi Qafqazda maraqları kəskin şəkildə toqquşan kənar güclər indi geopolitik mübarizəni məhz Ermənistan üzərindən aparmağa çalışırlar. Və Azərbaycan-Ermənistan sülh danışıqları prosesində həddindən artıq çox sayda vasitəçinin olması da əlavə gərginlik yaradır.
Məsələ ondadır ki, Cənubi Qafqazdakı sülh prosesində vasitəçilik iddiasında olan kənar güclər daha çox öz strateji maraqları üzərindən manevrlər edirlər. Ona görə də, vasitəçilik missiyasına iddialı olan ABŞ, Rusiya və Avropa Birliyinin maraqlarının kəskin toqquşması son nəticədə regional sülh prosesinə neqativ keyfiyyətdə təsir göstərir. Hər halda, 11 apreldə Ermənistanın hərbi təxribatları ucbatından baş vermiş sərhəd toqquşmasının regiondan kənar güclərin qarşıdurmasının təzahürü olduğu qətiyyən şübhə doğurmur.
Həmin sərhəd toqquşmasından öncə baş verən hadisələrə və siyasi proseslərə diqqət etdikdə, Ermənistanın son hərbi təxribatının səbəblərini təxmin etmək çətinlik törətmir. Belə ki, Azərbaycan və Ermənistan liderlərinin növbəti görüşünün gələn ayın ikinci ongünlüyündə ABŞ-ın dövlət katibi Entoni Blinkenin vasitəçiliyi ilə Vaşinqtonda keçiriləcəyi barədə məlumat yayılmışdı. Və bu, əsas gündəm mövzusu kimi intensiv şəkildə müzakirə edilirdi.
Təbii ki, Cənubi Qafqazda sülh prosesinə bağlı ən yüksək səviyyəli görüşün məhz ABŞ-ın vasitəçiliyi ilə keçirilmə ehtimalı Ağ Evin regionda geopolitik təşəbbüsü Rusiyanın əlindən alması anlamı daşıyırdı. Əgər, Kremlin iştirakı olmadan belə bir görüş keçirilərsə, Rusiya Cənubi Qafqazda oyundankənar vəziyyətə düşə bilərdi. Və nəzərə almaq lazımdır ki, bu, Rusiyanın üzləşdiyi ikinci analoji situasiyadır.
Bundan öncə - 2022-ci ilin sonlarında da oxşar vəziyyət yaranmışdı. Belə ki, Azərbaycan və Ermənistan liderləri Avropa Birliyinin vasitəçiliyi ilə Praqada görüşərək, olduqca önəmli anlaşmalara nail olmuşdular. Bundan narazı qalan Kreml regionda hərbi-siyasi gərginliyin artırılması ilə prezident Vladimir Putinin vasitəçiliyi ilə Soçi görüşünü reallaşdıra bildi. Bununla da Kreml Rusiyanın əleyhinə çevrilməyə başlayan regional proseslərdə geopoliotik tarazlığı qorumuş oldu.
İndi baş verən hadisələri də təxminən ötən il olanların təkrarı hesab etmək mümkündür. Kreml Ermənistan üzərindən hərbi təxribat törətməklə, iki ölkə liderlərinin Vaşinqton görüşü ərəfəsində Rusiyanın vasitəçilik missiyasını gündəmə gətirə bildi. Son məlumatlara görə, yaxın vaxtlarda Moskva görüşünün təşkili barədə ilkin razılaşma artıq əldə olunub.
Təbii ki, Ermənistanı silahlı təxribatlara sövq etmək üçün kifayət qədər ciddi mexanizmlərə sahibdir. Ermənistan generaliteti demək olar ki, tam heyətdə Rusiyanın nəzarəti altındadır və Kremldən gələn istənilən təlimatı yerinə yetirməyə hazırdır. Azərbaycan ordusunun iki sərhəd postu arasında mövqe tutmağa çalışan Ermənistan hərbçilərinə erməni briqada komandirinin şəxsən rəhbərlik etməsi də bu təxribatın əvvəlcədən planlaşdırıldığını biruzə verir.
Beləliklə, Kreml erməni generalitetini hərbi təxribatlara çəkməklə növbəti dəfə Rusiyanın maraqlarını ifadə etmiş oldu. Üstəlik, Ermənistanın hərbi təxribat törətdiyi ərəfədə müdafiə naziri Supen Papikyanın NATO qərargahında olması da maraqlı məqamdır. Rəsmi İrəvan hazırda Ermənistan ordusunun NATO təlimlərində iştirakı ilə bağlı məsələni müzakirə etməkdədir.
Rusiya Xarici İşlər Nazirliyinin rəsmi təmsilçisi Mariya Zaxarova isə son açıqlamsında Kremlin bu məsələ ilə bağlı Ermənistandan izahat tələb etdiyini vurğulayıb. Onun dediyinə görə, Rusiyanın patronajlığı altında olan KTMT-nın hərbi təlimlərini ləğv edən Ermənistanın NATO ilə təlimlərə qatılmaq niyyətinə düşməsi Kremldə çaşqınlıq yaradıb. Ona görə də, Rusiya rəsmi İrəvanın verəcəyi izahata uyğun şəkildə Ermənistanın davranışları barədə mövqeyini müəyyən edəcək. Və bu, Kremlin üstüörtülü şəkildə Ermənistanın təhdid olunması anlamı daşıyır.
Digər tərəfdən, Kreml erməni generaliteti üzərindən, bəzi məlumatlara görə, həm də baş nazir Nikol Paşinyanın razılığı ilə Ermənistanın törətdiyi təxribatlarla rəsmi İrəvana Avropa Birliyinin mülki müşahidə missiyasının əhəmiyyətsiz olduğunu da göstərə bildi. Belə ki, Ermənistan mənbələrinin iddialarına görə, Avropa Birliyinin missiya rəhbəri Markus Ritteri nə qədər dilə tutsalar da, onu silahlı toqqşmaların baş verdiyi bölgəyə aparmaq mümkün olmayıb.
İndi Kreml rəsmi İrəvandan KTMT müşahidə qrupunun Ermənistana göndərilməsi ilə bağlı tələblərin icrasını tələb edir. Halbuki bir neçə gün öncə rəsmi İrəvan KTMT təmsilçilərinin Ermənistana gətirilməsinin bir neçə dəyişməz şərtin qəbulu ilə əlaqələndirmişdilər. Üstəlik, həmin şərtlər KTMT hərbi təmsilçilərini Azərbaycanla toqqşmalara sövq edə biləcəyindən bu hərbi-siyasi alyansın digər üzvlərinin neqativ mövqeyi ilə üzləşmişdi. Və indi böyük ehtimalla Kremlin təzyiqləri ilə rəsmi İrəvan özünün avantürist şərtlərindən imtina etməyə məcbur olunacaq.
Göründüyü kimi, Paşinyan hakimiyyəti Ermənistanı çıxılmaz vəziyyətə salıb. Ermənistan ordusunun törətdiyi hərbi təxribatlar rəsmi İrəvana regiondakı status-kvonu dəyişməyə imkan vermir. Azərbaycan ordusunun “dəmir yumruğu” hərbi təxribatlar törədən Ermənistanı hər dəfə yerində oturdur. Avropa Birliyinin mülki müdafiə missiyasına olan ümidlər isə tamamilə boşa çıxmaqdadır. Üstəlik, rəsmi İrəvan Qərb və Rusiyanın çarpaz təzyiqlər altında qalıb.
Bütün bunlar onu göstərir ki, Ermənistan hazırda Paşinyan hakimiyyətinin avantürist siyasətinin real nəticələri ilə artıq üzləşməyə başlayıb. Əgər, rəsmi İrəvan Rusiyanın təzyiqləri qarşısında KTMT kontingentini Ermənistana buraxarsa, bu, ABŞ və Qərbin kəskin reaksiyasına səbəb ola bilər. Əks haldasa, Rusiyanın Ermənistana qarşı cəza addımlarının daha təhlükəli istiqamətlər alacağı qətiyyən şübhə doğurmur. Və bu, Ermənistanın çarpaz zərbə altında qalması deməkdir.(Yeni Müsavat)
“Azərbaycanın Ermənistanla şərti sərhədinin Laçın hissəsində irimiqyaslı təxribatın baş verə biləcəyini və ermənilərin buna hazırlaşdıqlarını iki həftə öncə bildirmişdim. Təəssüf ki, gözlənildiyi kimi oldu”.
Bu sözləri Oxu.Az-a Milli Məclisin deputatı Sahib Alıyev Ermənistanın ötən gün Laçında törətdiyi təxribat haqqında danışarkən deyib. O qeyd edib ki, birmənalı şəkildə bu hadisələrin arxasında Ermənistan rəhbərliyi durur:
“Bununla bərabər, Ermənistanı buna həvəsləndirənlər də məsuliyyət daşıyırlar. Axıdılan qanlar onların vicdanına yazılmalıdır. Söhbət həmin ölkələrdən gedir ki, onlar regionda gərginliyin qorunub-saxlanmasını özünün burada hərbi mövcudluğunun təmini kimi görən dövlətdən daha çox canfəşanlıq edirlər, Ermənistanı təxribata həvəsləndirirlər. Nə qədər paradoksal görünsə də, söhbət az qala bütün məsələlərdə bir-birinə rəqib gözü ilə yanaşan, halbuki Azərbaycana gəldikdə eyni mövqedən çıxış edən Fransa Avropası ilə fars şovinizminin tüğyan etdiyi İrandan gedir. Elə bu təxribatın Paşinyan hakimiyyətində daha çox “quzğun” kimi tanınan, Ermənistan Təhlükəsizlik Şurasının katibi Armen Qriqoryanın İrana səfərindən dərhal sonra baş verməsində də rəmzilik var.
Məhz İranın Ermənistanı revanşizmə həvəsləndirən təxribatçı hərəkətləri, açıqlamaları, eyni zamanda, Avropa İttifaqı missiyasının qonşu ölkədəki rəhbəri Markus Ritterin həddini aşan, düşüncəsiz fikirləri reallıq hissi heç də güclü olmayan rəsmi İrəvanı növbəti dəfə belə təxribatlara vadar etdi”.
Deputat təxribatların qarşısını qəhrəmanlıqla alarkən şəhid olan hərbçilərimizə tanrıdan rəhmət, doğmalarına səbir dilədiyini vurğulayıb:
“Yaralılarımızın isə tezliklə sağalmasını arzulayıram. Buna əminəm ki, Azərbaycan Ordusu bu təxribatların cavabını artıqlaması ilə verəcək, qarşı tərəfə bunun əvəzini necə lazımdır, ödətdirəcək. Məsələ ermənilərin budəfəki itkiləri ilə bitməyəcək”.
Xatırladaq ki, ötən gün erməni hərbi birləşmələrinin törətdiyi təxribat nəticəsində üç hərbçimiz şəhid olub. Qarşı tərəfin isə dörd hərbçisi məhv edilib.
Hər şeydən öncə bu mübarək Qədr gecəsində Vətən uğrunda canını fəda edən əziz şəhidlərimizə Allahdan rəhmət, yaralı qazilərimizə şəfa diləyirəm. Təbii ki, baş verən təxribat gözlənilən idi və Ermənistanın terror fəaliyyətləri artaraq davam edəcək. Çünki uzun müddətdir ki, təxribat törətməyə hazırlaşırdılar.
Bu sözləri Axar.az-a açıqlamasında Türkiyənin ölkəmizdəki keçmiş hərbi attaşesi, general Yücel Karauz deyib.
General Rusiyanın ikiüzlü siyasət apardığını, Ermənistanın hüquq tanımayan hərəkətlərini görməzdən gəldiyini bildirib:
“Burada bir tərəfdən guya sülhün əldə olunmasını istəyən, ancaq digər tərəfdən 10 noyabr tarixli üçtərəfli bəyanatın sülh müqaviləsinə çevrilməsinə əngəl törədən Rusiyanın sərgilədiyi mövqe diqqətçəkən məqamdır. Rusiya Müdafiə Nazirliyi və onun tabeliyindəki rus sülhməramlı kontingenti gün ərzində baş verən döyüşləri görməzdən gəlib. Rusiya MN-in bu gün yaydığı bülletendə atışma və Ermənistan təxribatı haqqında bir kəlmə də yoxdur. Əvəzində isə Xocavənddə iki dəfə atəşkəs rejiminin pozulduğu, lakin itkinin olmadığını qeyd ediblər. Rusiya bilərəkdən Ermənistanın aylardır sərhədə silah-sursat toplamasına, törədilən təxribatlara, onun İranla birgə çevirdiyi fırıldaqlara göz yumur. Bizi də buna inandırmaq istəyirlər”.
Yücel Karauz İranın da Ermənistana uzun müddətdir ki, hər cür dəstəyi verdiyini qeyd edib:
“İkinci əsas məqam İranla bağlıdır. İran 1992-ci ildən bəri strateji seçimini müsəlman Azərbaycan tərəfdən deyil, Ermənistan tərəfdən edib. Üstəlik bunu 40 milyona yaxın azərbaycanlının ölkə içərisində yaşadığını bilə-bilə edirlər. Görünən odur ki, hələ uzun müddət İranın mövqeyi dəyişməyəcək. 30 ilə yaxın işğal dövründə olduğu kimi, ondan sonra da Ermənistana hər cür hərbi, siyasi, maddi dəstəyi verməyə davam edir. Dünənki təxribatda Ermənistanın İran PUA-larından, silah və sursatından istifadə etməsi barədə məlumat yayıldı. Üstəlik toqquşmanın başladığı andan etibarən İranın müşahidə PUA-larının Azərbaycanla sərhəddə uçuşlar keçirməsini, SEPAH-ın Teleqram kanallarının döyüşlərin getdiyi ərazilər ilə bağlı xəritələr paylaşmasını qətiyyən sadə məsələ hesab etmək olmaz. Yəni Azərbaycan tək Ermənistana qarşı yox, həm də onun havadarlarına qarşı mübarizə aparır. Bundan sonra da təxribat və terror fəaliyyətlərinin davam etməsini, sülh müqaviləsinin imzalanmamasını istəyən dövlətlər, güc mərkəzləri və qruplar toqquşmalardan faydalanmaq üçün vəziyyəti daha da qızışdıracaqlar. Ermənistanın ordunu döyüş hazırlığı vəziyyətinə gətirməsi, mülki şəxsləri silahlandırması da təxribatların davam edəcəyindən xəbər verir”.
General Türkiyənin bütün hallarda Azərbaycanın yanında olduğunu vurğulayıb və Şuşa Bəyannaməsini xatırladıb:
“Əlbəttə ki, Azərbaycan heç bir halda şəhidlərinin bir damla qanını da yerdə qoymayacaq, bir qarış torpağını belə düşmənə verməyəcək. Türkiyədəki seçki prosesindən və dünyadakı qeyri-müəyyənliklərdən faydalanmaq istəyən güclər Azərbaycanın yalnız olmadığını bilməlidirlər. Can Azərbaycan heç bir halda yalnız deyil və olmayacaq. Türkiyə öz qardaşı Azərbaycan ilə sonsuzadək birlikdədir. Azərbaycanla bağlı kirli və qanlı planlar quranlar Şuşa Bəyannaməsini unutmasınlar. Onlar türk dünyasını da gözardı etməməlidirlər. Qarşılarında iki yol var: Ya normal dövlət kimi davranıb, sülh içində yaşamağı öyrənəcəklər, ya da 44 günlük Vətən müharibəsindəki kimi başlarına dəmir yumruq enəcək və tarixin zibilliyinə gedəcəklər!"
Azərbaycan Respublikasının Prezidenti İlham Əliyev Şimali Makedoniya Respublikasının xarici işlər naziri, ATƏT-in fəaliyyətdə olan sədri Buyar Osmanini Ermənistanın ötən gün törətdiyi təxribat barədə məlumatlandırıb.
"Dövlətimizin başçısı dünən Ermənistan-Azərbaycan sərhədində baş vermiş insidenti qeyd edərək, bunun Ermənistan tərəfindən məqsədyönlü şəkildə törədilmiş təxribat olduğunu bildirib.
Qeyd edək ki, Prezident İlham Əliyev aprelin 12-də Şimali Makedoniya Respublikasının xarici işlər naziri, ATƏT-in fəaliyyətdə olan sədri Buyar Osmanini qəbul edib.
Xatırladaq ki, aprelin 11-i saat 16:20 radələrində Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Azərbaycan Ordusunun Laçın rayonu istiqamətindəki üzbəüz mövqelərini müxtəlif çaplı silahlardan istifadə etməklə atəşə tutub.
Ermənistan tərəfinin təxribatının qarşısını alarkən Azərbaycan Ordusunun üç hərbi qulluqçusu Zalov Vidadi Nizami oğlu, Həsənov Elşad Qabil oğlu və Tağıyev Səbuhi Gündüz oğlu şəhid olub.
Azərbaycan Respublikasının Prezidenti İlham Əliyev aprelin 12-də Şimali Makedoniya Respublikasının xarici işlər naziri, ATƏT-in fəaliyyətdə olan sədri Buyar Osmanini qəbul edib.
Bu barədə Azərbaycan Prezidentinin Mətbuat Xidməti məlumat yayıb.
Azərbaycanın xarici işlər naziri Ceyhun Bayramovla ATƏT-in fəaliyyətdə olan sədri, Şimali Makedoniyanın xarici işlər naziri Bujar Osmani arasında görüş başlayıb.
“Report” xəbər verir ki, C.Bayramov həmkarını Xarici İşlər Nazirliyinin binası önündə qarşılayıb.
Hazırda tərəflər arasında təkbətək görüş keçirilir.
Sonra nazirlərin birgə mətbuat konfransı keçirəcəkləri gözlənilir.