 |
|
Kür-Bakı magistral su kəmərində baş vermiş qəza səbəbindən paytaxtın Qaradağ, Səbail və Binəqədi rayonlarının bir hissəsində, eləcə də Hacıqabul rayonunun bəzi kəndlərində su təchizatı bərpa edilib.
Bu barədə oxu.az-ın sorğusuna cavab olaraq “Azərsu” ASC-nin Mətbuat Xidmətinin rəhbəri Anar Cəbrayıllı məlumat verib.
O bildirib ki, qəza baş verən Kür-Bakı magistralında qəza baş verən hissədə boru dəyişdirilib:
“Qəza aradan qaldırıldıqdan sonra paytaxtın 3 rayonunun bəzi ərazilərinə, həmçinin Hacıqabul rayonu üzrə abonentlərə içməli suyun verilişi ötən gündən etibarən bərpa edilib”.
Qeyd edək ki, mayın 2-də səhər saatlarında Kür-Bakı magistral su kəmərinin Qaradağ rayonu ərazisindən keçən hissəsində qəza olub.
Bakıda bəzi yerlərdə dönər və ayran 1 manata satılır. Əsasən metroların giriş-çıxışında bu qiymətə dönərlərə rast gəlmək mümkündür.
Maraqlıdır ki, toyuq ətinin kiloqramı 6-7 AZN, mal ətinin isə 14-15 AZN-ə olduğu təqdirdə dönərlər bu qədər ucuz qiymətə necə satılır?
Bütün bunları özündə cəmləşdirən dönərin qiymətinin 1 manat olması təəccüb doğurur. Qida təhlükəsizliyi üzrə ekspert Elsevər Fərzəliyev atv-yə bildirib ki, heç bir şəxs keyfiyyətli məhsulunu ucuz qiymətə satmaz: "Br çox hallarda bu tələr ölmüş heyvanların tələri olur".
Yol-xeber.az" xəbər verir ki, “Azərbaycan Dəmir Yolları” QSC-nin (ADY) yeni inkişaf strategiyasına uyğun olaraq proseslərin səmərəli təşkil olunması və avtomatlaşdırılması ilə əlaqədar dəmir yollarının ehtiyacları, işçi heyətinə olan real təlabat və kadr potensialının inkişaf perspektivləri yenidən dəyərləndirilməkdədir. Hazırda vakansiyaların əsasən daxili kadr ehtiyatı hesabına komplektləşdirilməsi, işə qəbul prosesinin tam avtomatlaşdırılması, eyni zamanda daxili və xarici təlimlər vasitəsilə əməkdaşların bilik və bacarıqlarının əhəmiyyətli dərəcədə təkmilləşdirilməsi istiqamətində zəruri tədbirlər görülməkdədir.
ADY-də işə qəbul Azərbaycan Respublikasının əmək qanunvericiliyinin tələbləri nəzərə alınmaqla Cəmiyyətin müvafiq sahədə daxili sənədlərinə uyğun olaraq müsabiqə yolu ilə həyata keçirilir. Müsabiqə prosesi müraciətlərin ilkin seçimi, namizədlərin test imtahanlarında iştirakı və müsahibə olmaqla 3 mərhələdən ibarətdir.
ADY-də avtomatlaşdırılmış işə qəbul sisteminin tətbiqində məqsəd müsabiqələrdə şəffaflığı və obyektivliyi təmin etməkdir. Belə ki, ilkin seçim mərhələsində namizədlərin göstəricilərinin vakansiyanın tələblərinə uyğunluğu sistem tərəfindən insan müdaxiləsi olmadan tam avtomatik şəkildə həyata keçirilir. Müsabiqə prosesi dövründə məlumat mübadiləsini operativ təmin etmək məqsədilə namizədlərə “sms” bildirişlər göndərilir. Test imtahanı mərhələsində isə imtahan nəticələri dərhal ekranda əks olunmaqla yanaşı namizədlərin birbaşa elektron poçt ünvanlarına da göndərilir.
Test mərhələsi Bakı şəhərində ADY-nin Test Mərkəzində, regionlarda isə qurumun müvafiq inzibati binalarında daşına bilən elektron cihazlar vasitəsilə həyata keçirilir. Müsahibə mərhələsində iştirak edən namizədlər müvafiq meyarlar əsasında qiymətləndirilir və proses video qeydiyyata alınır.
Əməliyyatların fasiləsizliyinin təmin edilməsi və vakansiyaların təcili komplektləşdirilməsi məqsədilə ADY-də daxili və xarici Kadr Ehtiyat Bazaları (KEB) yaradılmışdır. Müvafiq vakansiya üzrə müsahibəni uğurla keçən və ən yüksək bal toplayan namizədə iş təklifi olunur, daha az bal toplayan, lakin keçid balını toplayan namizəd(lər) isə KEB-ə daxil edilir. Müvafiq vakansiya yarandığı təqdirdə öncə daxili kadr ehtiyatı bazasına müraciət olunur, vakansiya(lar) komplektləşdirilə bilinmədiyi təqdirdə xarici kadr ehtiyatı bazasına müraciət edilir.
Qeyd edək ki, 2023-cü ilin I rübünə əsasən ADY-də elektrik və hərəkət tərkibinin idarəedilməsi sahələri üzrə vakansiyalara daha çox ehtiyac yaranmışdır.
Dövlət Məşğulluq Agentliyi ilə birgə əməkdaşlıq çərçivəsində 89 nəfər işsiz vətəndaş ADY-də təşkil edilmiş kurslara cəlb olunmuşdur. Onlardan 34 nəfəri hazırda ADY-nin müxtəlif strukturlarında çalışmaqdadır.
Ali və peşə təhsili müəssisələri ilə əməkdaşlıq çərçivəsində 2023-cü ilin I rübündə 67 ali və 25 peşə təhsilli gənclər ADY-nin işçi heyəti sıralarına qoşulmuşdur.
ADY rəhbərliyi tərəfindən korporativ sosial məsuliyyət proqramı çərçivəsində müharibə iştirakçıları, qazilər və şəhid ailələrinə daim xüsusi həssaslıqla yanaşılır. Belə ki, hazırda Cəmiyyətdə 53 şəhid ailəsinin üzvü, I və II Qarabağ müharibələrinin 829 iştirakçısı çalışmaqdadır.
ADY-də yaranan vakansiyaları mütəmadi olaraq www.career.ady.az saytından və korporativ sosial şəbəkələrindən izləmək, yaranmış suallarla bağlı isə (99412) 499 65 40 nömrəsinə və ya hr.recruitment@ady.az elektron ünvanına müraciət göndərmək mümkündür.
Aqrar Sığorta Fondunun əməkdaşları müstəqil sığorta ekspertlərinin iştirakı ilə bölgələrdə dolu, sel, subasma kimi sığorta hadisələrinin təsərrüfatlarını sığorta etmiş fermer və sahibkarlara vurduğu zərəri araşdırmağa başlayıblar.
Bunu trend-ə açıqlamasında Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsinin müdiri Vüqar Hüseynov deyib.
O bildirib ki, təsərrüfatları zərər çəkmiş fermerlərin ekspertlər hadisəni və onun nəticələrini qeydə alır, ilkin olaraq dəyən zərəri hesablayırlar.
“Araşdırmalar başa çatdıqdan sonra qanunvericiliyə uyğun olaraq sığorta hadisələri üzrə ödənişlər həyata keçiriləcək.Biz təsərrüfatlarını aqrar sığorta etdirmiş fermerləri öz əkin sahələrinə baxış keçirməyə və baş verən hadisələrlə bağlı Aqrar Sığorta Fonduna müraciət etməyə çağırırıq. Fermerlər Aqrar Sığorta Fondunun 1651 Çağrı Mərkəzinə zəng edərək müraciətlərini edə bilərlər”.
V. Hüseynov bildirib ki, respublikada aqrar sığorta mexanizminin tətbiqi bu kimi hallarda fermerlərə dəymiş zərərin ödənilməsinə imkan verir.
“Bu səbəbdən öz əkin sahələrini, meyvə bağlarını sığorta etdirmiş fermerlər dəymiş zərərə görə sığorta vəsaiti alacaqlar. təsərrüfatlarını aqrar sığorta etdirməyən fermerlər Aqrar Sığorta Fondundan zərərə görə kompensasiya ala bilməyəcəklər: “Gələcəkdə belə halların baş verməməsi üçün əkin sahələrini vaxtında dövlət dəstəyi ilə və sərfəli şərtlərlə sığortalamaq tövsiyyə olunur, bununla bağlı fermerlərə Fond tərəfindən müraciətlər, çağırışlar da edilir. Fermerlərimizi dövlət tərəfindən təqdim olunan bu dəstəyi dəyərləndirməyə dəvət edirik", - deyə V.Hüseynov qeyd edib.
Qeyd edək ki, dünən respublikanın bir çox rayonlarına dolu və leysan yağıb. Kənd təsərrüfatına ciddi ziyan dəyib.
Balıqların kürütökmə dövrü ilə əlaqədar 1 may 2023-cü il tarixindən ölkə ərazisindəki bütün su hövzələrində balıq ovuna moratorium qüvvəyə minir və sentyabrın 1-dək davam edəcək.
Bioloji Müxtəlifliyin Qorunması Xidmətinin rəsmisi Arzu Babayeva bildirib ki, qanunsuz balıq ovunun qarşısının alınması məqsədilə Daxili İşlər Nazirliyinin Su Nəqliyyatında Polis İdarəsi, Ekologiya və Təbii Sərvətlər Nazirliyinin Dövlət Ekoloji Təhlükəsizlik və Bioloji Müxtəlifliyin Qorunması Xidmətlərinin əməkdaşları tərəfindən ölkənin daxili su hövzələrində mütəmadi nəzarət tədbirləri həyata keçirilir və qanunsuz balıq ovu ilə məşğul olanlar barəsində qanunamüvafiq tədbirlər görülür.
Xidmət rəsmisi balıq ovu ilə məşğul olan bütün fiziki və hüquqi şəxsləri qaydalara əməl etməyə, qadağan olunmuş vaxtlarda, qadağan olunmuş alətlərlə balıq ovlamaqdan çəkinməyə çağırıb.
Azərbaycanlı ekofəalların ölkəmizin Qarabağ iqtisadi rayonunda faydalı qazıntı yataqlarının qanunsuz istismarına qarşı Şuşadan keçən Laçın-Xankəndi yolunda etiraz aksiyasını keçirdikləri ərazidə söküntü işlərinə başlanılıb.
Bu barədə “Report”un Şuşaya ezam olunmuş əməkdaşı xəbər verir.
Belə ki, artıq ötən gün dayandırılmış aksiyanın keçirildiyi ərazidə quraşdırılmış çadırların və plakatların sökülərək ərazidən daşınması həyata keçirilir.
Qeyd edək ki, Laçın-Xankəndi yolunda 138 gündür davam edən ekofəalların aksiyası ötən gün saat 18:00-dan etibarən müvəqqəti olaraq dayandırılıb.
Hazırda Azərbaycan Daxili İşlər Nazirliyi Daxili Qoşunlarının (DQ) hərbçiləri və polislər Laçın-Xankəndi yoluna nəzarəti davam etdirir.
2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb.
2022-ci il dekabrın 12-dən etibarən isə etiraz aksiyasının keçirilməsinə başlanılmışdı.
DİN-in Baş Dövlət Yol Polisi İdarəsi “2023 Formula-1 Azərbaycan Qran Prisi” ilə əlaqədar sürücülərə müraciət edib.
DİN-in mətbuat xidmətindən verilən məlumata görə, müraciətdə deyilir:
“Sabah başlayacaq “2023 Formula-1 Azərbaycan Qran Prisi” ilə əlaqədar bəzi küçə və prospektlərdə hərəkətin məhdudlaşdırıldığını nəzərə alaraq xüsusilə paytaxtın cənub qapısında yol hərəkəti təhlükəsizliyinin təmin edilməsi və nəqliyyat sıxlığının qarşısının alınması məqsədilə sürücülərdən xahiş olunur ki, cənubdan mərkəzə doğru, yəni "Azneft" və "Neftçilər" dairəsinə alternativ kimi Bakı-Salyan yolunun 14-cü kilometrliyindən Lökbatan dairəsi istiqamətində üçüncü kənar dairəvi yolla "20 Yanvar" və ya Yeni Yasamal ərazisindən keçməklə hərəkət etsinlər.
Eyni zamanda 20-ci sahə, Bayıl qəsəbəsində yaşayanlar isə qəsəbənin daxili yolları ilə Qurban Abbasov küçəsindən keçməklə Teymur Elçin, Mehdi Hüseyn və Lermontov küçələri ilə mərkəzə doğru hərəkət etmələri tövsiyə olunur.
Bununla yanaşı yol hərəkəti iştirakçılarından yarışın keçirildiyi müddət ərzində fərdi minik avtomobillərindən mümkün qədər az istifadə etmələri, şəhərin mərkəzi hissəsinə yalnız ictimai nəqliyyat vasitələri ilə hərəkət etmələri xahiş olunur”.
5 yaşlı uşaq I sinfə gedə bilməz. Onlar məktəbəhazırlıq qruplara qəbul ola bilərlər və prosesə avqust ayında başlayacaq.
Bunu Elm və Təhsil Nazirliyinin Ümumi və məktəbəqədər təhsilin təşkili və idarə olunması şöbəsinin müdir müavini Orxan Abbasov “Təhsil masası”nda deyib.
Nazirlik rəsmisi bildirib ki, məktəbəhazırlıq qrupuna cəlb edilən uşaq təhsilini elə həmin məktəbdə davam etdirərsə, sistem özü həmin valideynin övladını avtomatik qeydiyyata salır.
Qeyd edək ki, mayın 11-dən 2023-2024-cü tədris ili üzrə ümumi təhsil müəssisələrinin birinci siniflərinə şagird qəbuluna start veriləcək.
Gürcüstanın paytaxtı Tiflis şəhərində ermənilər qondarma “erməni soyqırımının ildönümü” ilə bağlı yürüş ediblər.
Yürüş zamanı ərazidən keçən azərbaycanlılardan biri avtomobilində uca səslə “Yaşa Azərbaycan” mahnısını səsləndirib.
Sosial şəbəkə izləyiciləri onun bu addımına “başına döndüyüm qardaş mahnı müşayiəti ilə sürünün içindən keçdi”, “oğuldur", "var ol, qardaş, halal olsun" və s. kimi oxşar şərhlər yazıblar.
Sabah Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Bu barədə Milli Hidrometeorologiya Xidmətindən məlumat verilib.
Bildirilib ki, mülayim cənub küləyi əsəcək və havanın temperaturu gecə 11-15° isti, gündüz 18-23° isti olacaq.
Atmosfer təzyiqi 761 mm civə sütunundan 758 mm civə sütununa enəcək. Nisbi rütubət 60-70 % olacaq.
Azərbaycanın rayonlarında hava, əsasən, yağmursuz olacaq. Lakin gündüz bəzi şimal və qərb rayonlarında arabir yağıntılı olacağı gözlənilir. Şimşək çaxacağı, dolu düşəcəyi ehtimalı var. Bəzi yerlərdə duman olacaq. Mülayim şərq küləyi əsəcək.
Havanın temperaturu gecə 11-16° isti, gündüz 23-28° isti, dağlarda gecə 4-9° isti, gündüz 13-18° isti olacaq.