 |
|
Son zamanlar saxta investisiya və maliyyə təkliflərinin sayı xeyli artıb. Maliyyə fırıldaqçıları üçün əsas auditoriya isə sosial şəbəkələrdir.
Fırıldaqçılar gənc istifadəçilər, yaşlı nəsil, daha az maliyyə biliyi olan vətəndaşlar və ya iş axtaranları bu platforma üzərindən cəlb edə bilirlər. Onlar bu cür insanları tapmaq üçün sosial şəbəkələrin data analitikasından yararlanırlar.
Bəs görəsən, vətəndaşlar bu kimi təhlükələrlə qarşılaşmamaq üçün hansı nüanslara diqqət etməlidir?
Mövzu ilə bağlı Yenisabah.az-a danışan informasiya və kommunikasiya texnologiyaları üzrə ekspert Vahid Qasımov bildirib ki, hazırki şəraitdə bu kimi problemlərin önləyəcək hansısa tətbiq və ya proqram yoxdur:
"Bu kimi problemlərin qarşısını alacaq tətbiq və ya proqram mövcud deyil. Provayderlərin təhlükəsiz internetə qoşulması mövcuddur, orada isə trafik əvvəlcədən filtrasiya olunur. Amma təhlükəsizliyin əsas prinsipi odur ki, heç kim heç vaxt heç kəsə şəxsi məlumatlarını verməsin".
Ekspert qeyd edib ki, vətəndaşlar şəxsi məlumatlarını heç bir formada hansısa oyun saytında və ya mərc platformasında açıq şəkildə qeyd etməməlidir:
"Əgər adam öz əli ilə kredit kartının məlumatlarını mərc, kazino və ya başqa bir saytda daxil etsə, dələduzluqdan danışmasın. Təqsir özündədir. Vətəndaşlar mütləq şəkildə belə nüanslara diqqət etməlidir".
Xəzər dənizində suyun səviyyəsinin ildən-ilə düşməsi narahatlıq doğuran məqamlardandır. Artıq bu problemin həll olunması istiqamətində mühim addım atılır.
"Xəzər Xəbər" xəbər verir ki, Azərbaycan və Rusiya tərəfindən Xəzər dənizinin dayazlaşması məsələsi ilə bağlı ikitərəfli işçi qrup yaradılıb.
İşçi qrupun tərkibi mühüm dövlət qurumlarından ibarətdir.
İşçi qrup Xəzər dənizinin dayazlaşması ilə ələqadar tədqiqatlar aparacaq.
Həmçinin sahilyanı zonalara mənfi təsirləri azaltmağa yönəlmiş digər tədbirləri özündə əks etdirən fəaliyyət planı hazırlanacaq. Qeyd edək ki, hazırda Xəzər dənizinə tökülən çayların ən böyük hissəsi Volqanın payına düşdüyünə görə ilk olaraq işlərə Rusiya ilə başlanılıb. Gələcəkdə isə bu plan çərcivəsində digər Xəzəryanı ölkələr də prosesə cəlb oluna bilər.
Daha ətraflı videoda:
Bu gün müəllimlərin peşə bayramıdır.
5 oktyabr Azərbaycanda müəllimlərin peşə bayramı qeyd olunur.
Belə ki, 1966-cı ilin bu günü UNESKO və Beynəlxalq Əmək Təşkilatının birgə təşkilatçılığı ilə çağırılan konfransda müəllimlərin peşə fəaliyyətinin şərtlərini müəyyən edən "Müəllimlərin statusu haqqında" adlı ilk beynəlxalq sənəd imzalanıb.
1994-cü ildən isə həmin tarix UNESKO tərəfindən Ümumdünya Müəllimlər Günü kimi təsis edilib. Bu tarix, həmçinin, BMT-nin beynəlxalq və ümumdünya günlər sisteminə daxildir. Bu günün qeyd olunmasında məqsəd müəllimlərin cəmiyyətdəki mövqeyi, təhsil və inkişafdakı roluna diqqət yetirməkdir.
"Müəllimlər günü" hazırda dünyanın 100-dən çox ölkəsində ümumdünya səviyyədə, bəzi ölkələrdə isə müxtəlif tarixlərdə milli səviyyədə qeyd edilir.
Azərbaycanda isə bu gün 1993-cü ildən qeyd olunur.
ADY-nin Hərəkətin təhlükəsizliyi departamentinin müdir müavini Əsəd Məmmədov bu gün Qazaxıstanın Almatı şəhərində keçirilən “Nəqliyyatın Təhlükəsizliyi və Rəqəmsallaşdırılması üzrə V Avrasiya Forumu”nda iştirak edib.
Yol-xeber.az" xəbər verir ki, Forumda “Dəmir yollarının təhlükəsizliyinə daxili nəzarət proseslərinin rəqəmsallaşdırılması” mövzusunda təqdimatla çıxış edən ADY rəsmisi əməliyyatlarda təhlükəsizlik səviyyəsini artıran əsas daxili nəzarət prosedurlarını uğurla avtomatlaşdırlması barədə geniş məlumat verib.
Qeyd olunub ki, ADY-də mexaniki proseslərdən rəqəmsal sistemlərə keçid əməliyyatlar zamanı insan səhvlərini minimuma endirməklə yanaşı, təhlükəsizlik hallarının aşkar edilməsini və həllini sürətləndirib, hesabatlılıq və əməliyyat şəffaflığını artırıb və kağız əsaslı əməliyyatlardan asılılığı azaldıb.
Oktyabrın 5-də Bakıda hava şəraitinin yağmursuz keçəcəyi, rayonlarda bəzi yerlərdə fasilələrlə yağış yağacağı gözlənilir.
Bu barədə Milli Hidrometeorologiya Xidmətindən məlumat verilib.
Bildirilib ki, sabah Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Şimal-qərb küləyi gündüz şimal-şərq küləyi ilə əvəz olunacaq.
Havanın temperaturu gecə 14-18° isti, gündüz 21-26° isti olacaq. Atmosfer təzyiqi normadan yüksək 764 mm civə sütunu olacaq. Nisbi rütubət gecə 65-75 %, gündüz 40-50 % olacaq.
Oktyabrın 5-də Azərbaycanın rayonlarında bəzi yerlərdə fasilələrlə yağış yağacağı, şimşək çaxacağı gözlənilir. Ayrı-ayrı yerlərdə qısamüddətli leysan xarakterli olacağı, dolu düşəcəyi ehtimalı var. Axşama doğru yağıntılar tədricən kəsiləcək. Gecə və səhər bəzi yerlərdə arabir duman. Şərq küləyi əsəcək. Havanın temperaturu gecə 12-17° isti, gündüz 22-27° isti, dağlarda gecə 2-7° isti, gündüz 13-18° isti olacaq.
Sentyabrın 20-də təqdim olunan "iPhone 16" rəsmi şəkildə Bakıya gətirilib.
Milli.az məlumatına görə artıq "iPhone 16"nın satışları başlayıb. Bu barədə elanı məşhur elektronika mağazalarından biri verib.
Onların paylaşdığı görüntülərdə Bakıda, Nərimanov metrostansiyasının yaxınlığında "iPhone 16"ya görə izdiham yaranması əks olunub.
Görüntüləri təqdim edirik:
Müvəffəqiyyətsizliklərinə, təhsillərini davam etdirmək istəmədiklərinə və ya intizamsızlıqlarına görə hərbi qulluqçu hazırlayan xüsusi təyinatlı ali təhsil müəssisələrindən xaric edilən kursantlarla yanaşı xüsusi təyinatlı orta ixtisas təhsili müəssisələrindən xaric edilən kursantların da müddətli həqiqi hərbi xidmət keçmək üçün hərbi hissələrə göndərilməsi təklif edilir.
Bu, "Hərbi xidmətkeçmə haqqında" Əsasnamənin təsdiq edilməsi barədə" və "Hərbi vəzifə və hərbi xidmət haqqında" Azərbaycan Respublikasının qanunlarında dəyişiklik edilməsi barədə" qanun layihəsində əksini tapıb.
Sənəddə, habelə hərbi qulluqçu hazırlayan xüsusi təyinatlı orta ixtisas təhsil sisteminin təkmilləşdirilməsi, tələbələrin həmin təhsil müəssisələrinə daxil olmaqda marağının artırılması məqsədilə gizirlərin və miçmanların tutmalı olduqları vəzifələrin həmçinin hərbi qulluqçu hazırlayan xüsusi təyinatlı orta ixtisas təhsili müəssisələrini bitirmiş hərbi qulluqçularla komplektləşdirilməsi təklif edilir. Layihədə bir sıra digər dəyişikliklər də nəzərdə tutulur.
Layihə Milli Məclisin Müdafiə, təhlükəsizlik və korrupsiya ilə mübarizə komitəsinin bu gün keçirilən iclasında müzakirə edilərək parlamentin plenar iclasına tövsiyə edilib.
“Məlum olduğu kimi, Ölkə Prezidenti cənab İlham Əliyevin müvafiq Sərəncamı ilə 4 Oktyabr - Cəbrayıl Şəhəri Günü elan edilmişdir. Bu əlamətdar gün münasibətilə cari ilin oktyabr ayının 4-də cənab Prezident İlham Əliyev və birinci xanım Mehriban Əliyeva Cəbrayıl şəhərində inşa olunan yaşayış kompleksinin açılışında iştirak ediblər, yeni evlərə köçən şəhər sakinlərinə mənzillərin açarlarını təqdim ediblər.”
Bu sözləri mətbuata açıqlamasında Milli Məclisin deputatı Kamaləddin Qafarov deyib.
Millət vəkili bildirib ki, öz dədə-baba yurdlarına daimi yaşayış üçün qayıdan sakinlərlə görüşən dövlət başçsı tədbirdə çıxış edərək cəbrayıllıları və bütün xalqımızı bu böyük bayram günü münsaibətilə təbrik etmişdir. “Cənab Prezident bu gün həm Cəbrayılda, həm də bütün digər azad olunmuş ərazilərdə aparılan yenidənqurma işlərinin böyük vüsətlə həyata keçirildiyini bir daha diqqətə çatdırdı və bildirdi ki, bütün bu işlər bu torpaqlara buranın əsl sahiblərinin qayıtdığını göstərir. Çünki yadelli düşmən zəbt etdiyi torpaqlarda heç nə qurub-yaratmaz. Ermənilər isə 30 il ərzində bu əraziləri ancaq dağıdıb, talan ediblər. Dövlət başçımızın dediyi kimi, Cəbrayılda demək olar ki, cəmi iki bina qalmışdı. Orada da erməni hərbçiləri yerləşdirilmişdi. Bütün bunlar bir daha sübut edir ki, ermənilər özləri də bu torpaqların heç vaxt onlara məxsus olmadığını və bundan sonra da olmayacağını hamıdan yaxşı bilirlər.”
K.Qafarov daha sonra Prezident İlham Əliyevin bir çox Qərb ölkələrinin yürütməkdə olduqları ikili standartlar siyasəti barədə səsləndirdiyi ifşaedici fikirlərin əhəmiyyətini vurğulayaraq deyib: “Cənab Prezident hər zaman olduğu kimi, Cəbrayıl ictimaiyyəti ilə görüşü zamanı etdiyi çıxışında da prinsipial mövqe nümayiş etdirərək bəzi dünya güclərinin öz hərbi və iqtisadi potensiallarına arxalanaraq daha kiçik ölkələrin hüquqlarını pozmaq cəhdlərini sərt şəkildə tənqid etdi. Dövlətimizin başçısı Ermənistana bu gün də dəstək verən, onların işğalçılıq siyasətinə bəraət qazandıran bəzi Qərb dövlətlərini gözlərini geniş açmağa və erməni vandalizminin vəhşi əməllərinə diqqətlə baxmağa çağırdı. Bu gün Azərbaycan öz ərazilərini işğaldan azad etdiyi üçün, tarixi ədaləti və beynəlxalq hüququ bərpa etdiyi üçün, BMT qətnamələrinin icrasını təmin etdiyinə görə sanksiyalara məruz qoyulur. 30 il ərzində torpaqlarımızı işğalda saxlamış və bu ərazilərdə olmazın cinayətlər törətmiş, beynəlxalq hüququn bütün norma və prinsiplərini pozmuş, etnik təmizləmə siyasəti aparmış, Xocalı soyqırımını törətmiş, bütün şəhər-kəndlərimizi viran qoymuş Ermənistana isə milyard dollarlarla yardımlar edilir, bu ölkə yenidən silahlandırılır. Bu davranışlar əlbəttə ki, bütün işğal dövründə Qərb ölkələri tərəfindən yürüdülən ikili standartlar siyasətinin davamıdır. Əgər o dövrdə də ermənipərəst qüvvələr öz istəklərinə nail ola bilmədilərsə, bundan sonra artıq onların hansısa nəticə əldə edə bilmək ehtimalı yoxdur. Azərbaycanın öz maraqlarını, öz təhlükəsizliyini qorumaq və bütün xarici təhdidlərə dərhal layiqli cavab vermək gücünə sahib olduğunu artıq bütün dünya bilir” .
Maks Frans Quido Freyher von Telman (Max Franz Guido Freiherr von Thielmann) - alman diplomat, siyasətçi və səyyah. Onun 1875-ci ildə Leypsiq şəhərində yerləşən “Duncker & Humblot” çap evində “Qafqaz, Persiya və Asiya Türkiyəsinə səyahət” (Streifzuge im Kaukasus, in Persien und in der asiatischen Turke) adlı kitabı çap edilib. Kitabda gəzdiyi və gördüyü yerlər barədə ətraflı məlumatlar var.
"Bu barədə tarixçi alim Zaur Əliyev məlumat yayıb.
O bildirib ki, müəllif öz kitabında bir xəritə də təqdim edir:
“Xəritədə Azərbaycan adı xüsusi qeyd edilir, sərhədləri və şəhərləri açıq yazılır. Qarabağ, İrəvan, Naxçıvan və digər ərazilərin adı tam aydın şəkildə göstərilir. Xəritədə Ermənistan adına, təbii ki, rast gəlmək olmur. Bu xəritə ermənilərin “Azərbaycan adını Stalin qoyub” iddialarına tutarlı cavabdır. 1875-ci ildə nəşr edilən kitabda yerləşən bu xəritə erməni yalanlarını yerlə-yeksan edir”.
“Azərbaycanın 2020-ci ilin sentyabr-noyabr aylarında apardığı 44 günlük Vətən müharibəsinin gedişində hər bir kəndin, hər bir qəsəbə və ya şəhərin azad edilməsi bizi möhtəşəm Zəfərimizə doğru aparan mühüm qələbə idi. Bununla belə, II Qarabağ savaşının ən əhəmiyyətli günlərindən biri məhz 4 oktyabr tarixidir.”
Bu sözləri mətbuata verdiyi açıqlamasında Milli Məclisin deputatı Kamaləddin Qafarov deyib.
K.Qafarov bildirib ki, 2020-ci ilin oktyabr ayının 4-də Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev xalqa müraciətində Cəbrayıl şəhərinin işğalçılardan azad edildiyini bəyan etdi. “Dünyanın hərb tarixində ilk dəfə olaraq müharibənin birinci həftəsində şəhər, rayon mərkəzi azad edilirdi. Cəbrayıl əməliyyatının uğurla həyata keçirilməsi Vətən müharibəsinin sonrakı gedişinə də əhəmiyyətli təsir göstərmişdir. Cəbrayıl şəhərinin işğaldan azad olunması taktiki-strateji baxımdan çox böyük önəm kəsb edirdi. Bu parlaq qələbə Azərbaycan Ordusuna o vaxt hələ də işğal altında olan Zəngilan, Qubadlı və Laçın rayonları istiqqamətində uğurlu hücum əməliyyatları keçirmək üçün üstün taktiki mövqelərə çıxmaq imkanı verdi. Təsadüfi deyil ki, bu tarixi qələbədən bir il sonra, 2021-ci il oktyabrın 4-də Cəbrayıl ictimaiyyətinin nümayəndələri ilə keçirdiyi görüşdə Silahlı Qüvvələrin Ali Baş Komandanı İlham Əliyev bu günün bizim tariximizdə əbədi qalacağını xüsusi vurğuladı. Həmin tarixi zəfər günündən artıq dörd il keçir. Dörd ildir ki, Azərbaycan zəfər yolu ilə, dinc quruculuq yolu ilə inamla irəliləyir və öz nailiyyətləri ilə beynəlxalq aləmdə tutduğu mövqelərini möhkəmlətməkdə davam edir.”
Millət vəkili vurğulayıb ki, Cəbrayılın azad edilməsi uğrunda gedən döyüşlərdə Azərbaycan Ordusu ilk qələbələrini hələ 2016-cı ildə əldə edib: “Əlbəttə ki, Cəbrayılın azad edilməsindən danışarkən, həmin hadisədən dörd il əvvəl, 2016-cı il aprel ayında Azərbaycan Ordusunun keçirdiyi uğurlu əks-hücum əməliyyatlarını da mütləq xatırlamaq lazımdır. Ekspertlərin rəyinə görə, tarixə Aprel döyüşləri kimi düşmüş bu hərbi əməliyyat 1994-cü ildə atəşkəs haqqında sazişin imzalanmasından sonra baş vermiş ən şiddətli silahlı qarşıdurma idi. Şanlı Ordumuz Ermənistan silahlı qüvvələrinə, eləcə də Qarabağda yaradılmış qondarma separatçı rejimin qanunsuz silahlı birləşmələrinə qarşı apardığı həmin döyüşlərdə də inamlı qələbə qazanmışdı. Aprel döyüşlərinin nəticəsi olaraq Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və Cocuq Mərcanlı kəndi, Goranboy rayonunun Gülüstan kəndi, Tərtər rayonunun Qazaxlar kəndi və Tərtər rayonunun Suqovuşan kəndi istiqamətində yollar düşməndən azad olunmuşdu. Strateji yüksəkliklər işğalçılardan azad olunandan sonra Cocuq Mərcanlıya həyatın qayıtması artıq mümkün olmuşdur və bu, Azərbaycanın önəmli qələbəsi idi. Diqqətəlayiq haldır ki, Azərbaycan xalqının işğaldan azad edilmiş torpaqlara Böyük Qayıdışı da məhz Cocuq Mərcanlıdan başlamışdır”.