 |
|
“NAZ Lifan” markalı avtomobilin sürücüsü Bakı-Sumqayıt yolunun paytaxta gedən istiqamətində hərəkət edib
Bakı-Sumqayıt yolunda sürücü avtomobili dövlət nömrə nişanı olmadan idarə edib.
Yol-xeber.az Oxu.Az-a istinadən xəbər verir ki, sürücünün avtomobili bu vəziyyətdə sürdüyünü əks etdirən fotolar sosial şəbəkələrdə paylaşılıb.
Belə ki, “NAZ Lifan” markalı avtomobilin sürücüsü Bakı-Sumqayıt yolunun paytaxta gedən istiqamətində hərəkət edib. Onun nəqliyyat vasitəsini dövlət nömrə nişanı olmadan idarə etməsi digər sürücülərin diqqətini cəlb edib.
Avtomobilin sürücüsü bu vəziyyətdə həmin yolda yerləşən “Ekologiya postu”nu da keçib.
Xatırladaq ki, bu halda avtomobilin cərimə meydançasına aparılması qanunla tənzimlənir. İXM-nin 96.1.2-ci bəndinə əsasən, nəqliyyat vasitəsinin dövlət qeydiyyat nişanları və ya onlardan biri olmadıqda, yaxud saxta və ya qeyri-standart olduqda və ya nəqliyyat vasitəsini başqa nəqliyyat vasitəsinə verilmiş dövlət qeydiyyat nişanı ilə idarə edildiyi hallarda avtomobil saxlanılır və cərimə meydançasına aparılır.
Söhbət qəsəbənin Fikrət Əmirov küçəsindən gedir
Sumqayıt şəhəri, Təzə Corat qəsəbəsinin yolları acıcanaqlı vəziyyətdədir.
Yol-xeber.az xəbər verir ki, bununla bağlı Oxu.Az-a şəhərin Təzə Corat qəsəbəsində (Novruz qəsəbəsi) yaşayan sakinlər tərəfindən göndərilən şikayətdə qeyd olunub.
Söhbət qəsəbənin Fikrət Əmirov küçəsindən gedir.
Sakinlərin sözlərinə görə, uzunluğu təxminən 400-500 metr olan küçə çox pis vəziyyətdədir:
“Küçədə açıq kanalizasiya lyukları var. Axşam saatlarında dəfələrlə bu lyuklara düşüb xəsarət alanlar olub. Yağış yağanda küçədə gölməçələr yaranır. Bu səbəblərdən də küçədə avtomobillərin, piyadaların hərəkətində şətinliklər yaranır. Təcili tibbi yardım maşını küçənin o başından, bu başına güclə gəlib çatır”.
Prezident İlham Əliyev əmək pensiyalarının indeksləşdirilməsi haqqında sərəncam imzalayıb.Sərəncamda deyilir:
“Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, Azərbaycan Respublikasında pensiyaçıların sosial müdafiəsinin gücləndirilməsi məqsədilə “Əmək pensiyaları haqqında” Azərbaycan Respublikası Qanununun 29.1-ci və 29.1-1-ci maddələrinə uyğun olaraq qərara alıram:
1. Azərbaycan Respublikasının Əmək və Əhalinin Sosial Müdafiəsi Nazirliyinə tapşırılsın ki, 2020-ci ilin 1 yanvar tarixinə 2019-cu il üzrə Azərbaycan Respublikası Dövlət Statistika Komitəsinin müəyyən etdiyi:
1.1. orta aylıq nominal əməkhaqqının illik artım tempinə uyğun olaraq bütün növ əmək pensiyalarının sığorta hissəsinin;
1.2. istehlak qiymətləri indeksinin illik səviyyəsinə uyğun olaraq fərdi uçot sistemində fərdi hesabların sığorta hissəsində qeydə alınmış pensiya kapitalı məbləğlərinin indeksləşdirilməsini həyata keçirsin.
2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin”.
Digər dövlət qurumları da öz sürücülərini belə proqramlara cəlb etsə, yaxşı olar
Bakı Nəqliyyat Agentliyinin (BNA) tərkibindəki Sürücü Təlim Mərkəzi ilə Təhsil Nazirliyinin Peşə Təhsili üzrə Dövlət Agentliyi birlikdə əməkdaşlığa başlayıb. Əməkdaşlığın məqsədlərindən birinin peşə hazırlığı ilə bağlı olduğu qeyd edilib. Məsələ ilə bağlı “MediaPost”a açıqlama verən yol-nəqliyyat eksperti sözügedən əməkdaşlığı yüksək qiymətləndirib.
Ekspertin sözlərinə görə, bu metoddan dünya təcrübəsində də geniş istifadə olunur:
“BNA-nın Sürücü Təlim Mərkəzi Azərbaycanda demək olar ki, ilk geniş şəbəkəli təlim mərkəzidir. Agentlik bu mərkəzdən maksimum faydalı şəkildə istifadə etmək üçün müəyyən addımlar atmağa başlayıb. Son illər Sürücü Təlim Mərkəzində aparılan islahatlardan sonra BNA artıq bir çox yeniliklərə hazırdır. Düşünürəm ki, bu təlim mərkəzindən kifayət qədər səmərəli istifadə etmək olar. Bunun üçün Təhsil Nazirliyinin də dəstəyi çox vacibdir. Dünyanın bir çox ölkələrində məhz bu cür təcrübə formalaşır. Məsələn, şirkətlər sürücülərin peşəkarlığına, onların daim nəzarətdə saxlanılmasına daha çox vəsait ayırırlar və bununla gələcəkdə yarana biləcək fəsadların qarşısını almağa çalışırlar. Amma təəssüf ki, bizdə istər dövlət qurumları, istərsə də digər özəl şirkətlər sürücülərlə işə o qədər də meyilli olmurlar. Nəticədə sürücülərin onlara vurduğu maddi zərərin sayı-hesabı olmur. Nəqliyyat vasitəsinin tez istismardan çıxması, hər gün qəzaların baş verməsi şirkətə böyük miqdarda zərər vurur. Daşıyıcı şirkətlər sürücü qeyri-peşəkarlığından yaranan zərərin illik həcmini hesablasalar, bunun əvəzinə Sürücü Təlim Mərkəzinə vəsait ayırmağın faydasını başa düşə bilərlər. Bu, həm təhlükəsizliyin təmin edilməsi, həm də daşıyıcı şirkətlərin imicinin yüksəlməsi deməkdir”.
E.Muradlı həmçinin əlavə edib ki, nəinki sərnişindaşıma xidməti ilə məşğul olan daşıyıcı şirkətlər, hətta digər dövlət qurumları da öz sürücülərini belə proqramlara cəlb etsə, yaxşı olar:
“Məsələn Pentensiar Xidmətin, Dövlət Yol Polisi, Post Patrul Xidməti əməkdaşlarının, kommunal təsərrüfat avtomobillərinin sürücülərinə, gənc əməkdaşlarına bu yolla təhlükəli manevrlər öyrədilə bilər. Dövlət qurumları özləri də nəqliyyat vasitələrini idarə edən şəxslərin peşəkarlığının artırılmasında maraqlı olmalıdırlar. Ümid edirəm ki, BNA sözügedən qurumlara bir-bir müraciət edərək onları əməkdaşlığa dəvət edəcək”.
Yol polisi əhaliyə müraciət edib, valideynləri diqqətli olmağa çağırıb
Son vaxtlar gənclər və yeniyetmələr arasında avtoxuliqanlıq edənlərin sayı artıb. Bakıda, Gəncədə və respublikanın digər bölgələrində onlarla fakt aşkarlanıb. Bunu nəzərə alaraq DİN Baş Dövlət Yol Polisi İdarəsi sürücülərə, valideynlərə avtoxuliqanlıqla bağlı müraciət ünvanlayıb. Yol-xeber.az-ın məlumatına görə, müraciətdə bildirilir ki, son günlərdə Azərbaycanda avtoxuliqanlıq edən gənclərə və yeniyetmələrə tez-tez rast gəlinir. Həmin gənclər valideynlərinə məxsus və ya icarəyə götürülən avtomobillərlə yollarda ictimai asayişı pozaraq digər hərəkət istirakçılarına təhlükə yaradır, bu azmış kimi qanunazidd hərəkətlərini videoya çəkib sosial şəbəkələrdə yayırlar.
Yol polisi həmin gənclərin və yeniyetmələrin valideynlərini övladlarına qarşı diqqətli olmağa, mümkün qədər onların sosial şəbəkə hesablarını nəzarətdə saxlamağa çağırır. Bundan əlavə, DYP bildirir ki, valideynlər şəxsi avtomobillərini sürücülük hüququ olmayan övladlarına etibar etməklə təkcə yol hərəkəti qaydalarını pozmurlar, onlar övladları ilə yanaşı digər şəxslərin də həyatı üçün real təhlükə yaratmış olurlar: "Yəqin ki, son günlər televiziya ekranlarında yayımlanmış yeniyetmələrin törətdikləri qəza görüntülərini hamı izləyib.
Gənclərimiz və onların valideynləri də bilməlidirlər ki, yol polisi nəinki yollara, eləcə də sosial şəbəkələrə nəzarət edir. Sosial şəbəkələrdə aşkar olunan bu cür faktlar dərhal DİN rəhbərliyi tərəfindən nəzarətə götürülür və avtoxuliqanlıq hərəkətlərinə yol verən sürücülərin şəxsiyyəti müəyyənləşdirilərək qanunvericilik çərçivəsində barələrində müvafiq tədbirlər görülür.
Son 2 həftədə respublika üzrə 12 avtoxuliqan məhkəmə qərarı ilə inzibatı həbs cəzasına məhkum olunub. Onların arasında sürücülük hüququ olmayan yeniyetmələr də var. Həmin şəxslərin valideynlərinə xəbərdarlıq olunub.
Yol polisi digər valideynlərin də bu məsələdə diqqətli olmalarını tövsiyə edir. Bu cür hərəkətlər cəmiyyətdə xoş qarşılanmır, ətrafdakıların həyatı təhlükəyə məruz qalır və ağır yol nəqliyyat hadisələri nəticəsində sizin övladlarınız da ağır xəsarət ala və ya dünyasını dəyişə bilər. Ona görə ağır fəsadlar baş vermədən valideynlər vaxtında övladlarının bu cür hərəkətlərinin qarşısını almalıdırlar. Əks halda yol polisi onlara qarşı daha ciddi tədbirlər görəcək.
İcra hakimiyyətinə gedirik bizi görüb arxa qapıdan qaçırlar
Binəqədi rayonunun Mədən 1, Korpus 15 adlanan ərazisində sakinlər uzun illərdir bərbad vəziyyətdə olan yoldan əziyyət çəkirlər. Minlərlə ailənin yaşadığı paytaxtın mərkəzi hissəsindən o qədər də uzaq olmayan bu yol ilk baxışdan gölməçəni xatırladır. Ərazidə yaşayan sakinlərin uzun müddət məsul qurumlara etdiyi həm yazılı, həm də şifahi çoxsaylı müraciətlərinə baxmayaraq, necə deyərlər, özləri deyib, özləri də eşidiblər.
Sakinlərdən biri vəziyyəti belə şərh edir: “Yol tapıb evdən çıxa bilmirik. İcra hakimiyyətinə gedirik bizi görüb arxa qapıdan qaçırlar. Bir neçə gün əvvəl millət vəkili seçilmək istəyən bir şəxs gəlib bizə deyir ki, mənə səs verin yolu düzəldəcəm. İndi neyləyək, düşək bir-bir kimə gəldi səs verək ki, yolumuz düzəlsin?”
Uzun illər sakinlərin müraciətlərinə laqeyd yanaşan rayon İcra Hakimiyyəti təssüflər olsun ki, problemlə bağlı müsahibə verməyə də laqeyd yanaşdı. Belə ki, İcra Hakmiyyətinin ictimai-siyasi və humanitar məsələlər şöbəsinin baş məsləhətçisi Kənan Kərimov problemlə bağlı açıqlama verməklə bağlı sualımıza cavab olaraq bildirdi ki, icra nümayəndələri olaraq mikrofon qarşısına keçib sizə müsahibə verməyə borclu deyilik.
Əgər istəsəniz, yalnız telefonla sizə məlumat verə bilərik. Müsahibə verməkdən imtina edən icra nümayəndəsi daha sonra telefon vasitəsi ilə bizə cavab yollayaraq bildirdi ki, sözügedən yolun təmir edilməsi rayon İcra Hakimiyyətinin yox, Azərbaycan Avtomobil Yolları Dövlət Agentliyinin işidir.
İcra nümayəndəsinin sözlərindən o da aydın oldu ki, sözügedən yol təmsil etdiyi qrum üçün maraqlı deyil. Əks halda uzun illər ərzində sakinlərin bu qədər müraciətləri qulaq ardına vurulmazdı.
Sonda isə gələk icra nümayəndəsinin səsləndirdiyi fikirlərə. Bəli, ölkə yollarının yenidən qrulması və təmiri işləri ilə bağlı Azərbaycan Avtomobil Yolları Agentliyi cavabdehlik daşıyır. Amma söhbət əsas yollardan gedir. Sözügedən qurumdan elə bir neçə gün əvvəl açıqlamada bildirildi ki, qəsəbədaxili yollar və küçələr Azərbaycan Avtomobil Yolları Dövlət Agentliyinin (AAYDA) balansında deyil. Həmin yolların nə üçün bərbad vəziyyətdə olması, təmir olunmaması sırf yerli icra strukturlarına aid məsələdir. (oxu.az)
Azərbaycan Respublikası Səhiyyə Nazirliyi və İcbari Tibbi Sığorta üzrə Dövlət Agentliyinin mətbuat xidmətləri birgə məlumat yayıb.
"Ölkə.Az"a daxil olan məlumatda görə, hazırda Kliniki Tibbi Mərkəzin yoluxucu xəstəliklər şöbəsində 6 nəfər qalır. Xəstəxanada olanların səhhətində ciddi problem aşkarlanmayıb. Həkim müşahidələri davam edir.
Bildirilib ki, karantində saxlanılan şəxslər Çinin koronavirus qeydə alınmayan şəhərlərində olublar: "Onların xəstə şəxslərlə kontaktı olmayıb. Azərbaycana tranzit aviareyslərlə İstanbul, Dubay və Moskva şəhərlərindən gəliblər. Xəstəlik alovlanan ərazidən gələnlər isə xüsusi ayrılmış tibb müəssisəsində saxlanılanılır. Həmin tibb müəssəsindən verilən məlumata görə, onların da səhhətində hər hansı bir problem aşkarlanmayıb. Karantin müddətinin sonunda onlar da evlərinə buraxılacaqlar".
Sabiha Gökçen aeroportunda baş vermiş insident səbəbindən bağlanması ilə əlaqədar “Buta Airways”in J2-9103 nömrəli reysinin sərnişinləri İstanbul hava limanına çatdırılacaq.
Bu barədə “Buta Airways” məlumat yayıb.
Qeyd edilir ki, Sabiha Gökçen aeroportundan Bakıya uçmalı olan sərnişinlər İstanbulun yeni hava limanına avtobuslar vasitəsilə çatdırılacaqlar.
Son illər bir çox dövlətlərdə yeni texnologiyalar ictimai nəqliyyatda da tətbiq edilməyə başlayıb. Belarusun bir neçə şəhərində artıq ictimai nəqliyyat bütünlüklə QR kod sisteminə keçirilib. Şəhərlərdə ictimai nəqliyyatda gediş haqqı elektron pul kisəsi vasitəsi ilə ödənilir. Nəticədə isə üstünüzdə plastik kart gəzdirmək məcburiyyətində qalmırsınız. Avropa ərazisində müxtəlif şəhərlərə səyahət edəndə onlayn əldə etdiyiniz bileti çap etdirməyə ehtiyac qalmır. Gedəcəyiniz avtobusa yaxınlaşırsız, əlində xüsusi aparat olan biri Sizə yaxınlaşır və telefonda onlayn və "pdf" formada olan QR kodunuzu skan edərək oxuyur və bununla da sizin gedişiniz təsdiq edilir.
"Ölkə.Az" bildirir ki, bu gün yayımlanan məlumata görə isə artıq İstanbulda da QR kodla ictimai nəqliyyat vasitələrindən istifadə mümkün olacaq. Bununla da istanbul sakinləri QR-kod skaneri olan smartfonları ilə avtobusa minəcək və "İstanbul kart"ı əvəz edəcək sistem ilə rahat ödəmə həyata keçirə biləcək. Yeni sistem "Yükləyin, quraşdırın, oxudun, keçin" şüarı ilə təqdim ediləcək.
Mütəxəssislər də hesab edir ki, bu sistem insanların vaxt və büdcəsinə qənaət etmiş olacaq. Əksər vaxt istifadəçilər plastik kartları daşımaqda unutqanlıq edə və yaxud kart balansını artırmağı yaddan çıxara bilir. Bütün bunlar isə insanların əhvalına mənfi təsir edir, həm də onların vaxtına qənaət etmir. Həmçinin belə tətbiqlər onların ictimai nəqliyyata ödədikləri vəsaitlərin təhlükəsizliyini qorumaq baxımından da faydalıdır.
Görəsən, ölkəmizdə də ictimai nəqliyyatda bu texnologiyadan istifadə mümkün ola bilərmi?
Bakı Nəqliyyat Agentliyinin Mətbuat (BNA) xidmətinin rəhbəri Mayis Ağayev bu sistemin Azərbaycanda da tətbiqi barədə açıqlama verib. Onun sözlərinə görə, son bir ayda BakıKarta inteqrasiya olunan avtobusların hamısında quraşdırılan kart oxuma aparatları bu sistemi dəstəkləyir.
BNA rəsmisi sistemin tətbiqinə gəlincə isə bildirib ki, bizdə də bu sistemə keçid istisna deyil. ted.az
Agentlik hüquqi və fiziki şəxslərə müraciət edib
Aqrar Xidmətlər Agentliyi hüquqi və fiziki şəxslərə müraciət edib. Avtosfer.az-ın məlumatına görə, müraciətdə bildirilir ki, Nazirlər Kabinetinin 1999-cu il 15 mart tarixli 40 nömrəli qərarı ilə təsdiq edilmiş “Nəqliyyat vasitələrinə və onların qoşqularına dövlət texniki baxışının keçirilməsi qaydaları haqqında” Nümunəvi Əsasnamənin 1.4-cü bəndinə əsasən Respublika ərazisində daimi və ya müvəqqəti qeydiyyatda olan, mülkiyyət formasından asılı olmayaraq hüquqi və fiziki şəxslərin traktorlara, həmçinin meşə və kənd təsərrüfatında istifadə edilən, siyahısı Nazirlər Kabineti tərəfindən müəyyən edilən bütün mexaniki nəqliyyat vasitələrinə və qoşqularına (yarımqoşqularına) dövlət texniki baxışı ildə bir dəfə həyata keçirilir.
Dövlət texniki baxışının məqsədi:
Nəqliyyat vasitələrinin texniki vəziyyətinin qüvvədə olan hərəkətin təhlükəsizliyi qaydalarının, normativlərinin, standartlarının tələblərinə müvafiq olmasına nəzarət etmək; nəqliyyat vasitələrinin mənsubiyyətini və digər qeydiyyat məlumatlarını dəqiqləşdirmək; nəqliyyat vasitələri ilə bağlı cinayət tərkibli hadisələrin və inzibati hüquqpozmaların qarşısını almaqdır. Həmçinin, dövlət texniki baxışı keçirilərkən sürücülərin müvafiq kateqoriyalı (altkateqoriyalı) sürücülük vəsiqələrinə və nəqliyyat vasitəsinə sərəncam hüququ verən müvafiq sənədə malik olmalarına, sürücülük vəsiqəsinin etibarlılıq müddətinə, nəqliyyat vasitələrinin sahiblərindən alınan dövlət texniki baxışının keçirilməsi ilə əlaqədar “Dövlət rüsumu haqqında” Azərbaycan Respublikasının Qanunu ilə müəyyən edilmiş məbləğdə dövlət rüsumunun ödənilməsi barədə sənədlərin olmasına nəzarəti təmin edilməlidir.
3.1. Nəqliyyat vasitələrinin sahibləri (səlahiyyətli olan şəxs), onlara məxsus nəqliyyat vasitələrini dövlət texniki baxışına texniki cəhətdən saz vəziyyətdə təqdim etməyə borcludur.
3.2. Nəqliyyat vasitələrinə dövlət texniki baxışı, nəqliyyat vasitəsinin sahibi və ya nəqliyyat vasitəsinə sərəncam vermək hüququ olan və qanunvericiliklə müəyyən edilmiş qaydada təsdiq olunmuş etibarnaməsi olan şəxs tərəfindən aşağıdakı sənədlər təqdim edildikdən sonra həyata keçirilir:
1) nəqliyyat vasitəsini idarə etməyə hüquq verən sənəd;
2) nəqliyyat vasitəsinin qeydiyyat şəhadətnaməsi;
3) “Dövlət rüsumu haqqında” Azərbaycan Respublikasının Qanunu ilə müəyyən edilmiş məbləğdə dövlət rüsumunun ödənilməsi barədə sənədlər;
4) Avtonəqliyyat vasitəsi sahiblərinin mülki məsuliyyətinin icbari sığortasının və sərnişin daşımaları xidmətini həyata keçirən avtonəqliyyat vasitələri ilə daşınan sərnişinlərin (şəhərdaxili və ya qəsəbədaxili daşınan sərnişinlər istisna olmaqla) fərdi qəza sığortasının “İcbari sığortalar haqqında” Azərbaycan Respublikasının Qanununa uyğun olaraq həyata keçirilməsini təsdiq edən icbari sığorta şəhadətnaməsi.
Yuxarıda qeyd edilən sənədlərdən başqa digər sənədlərin tələb edilməsi qadağandır.
“Yol hərəkəti haqqında” Azərbaycan Respublikası Qanununun 1 nömrəli Əlavəsi ilə istismarı qadağan edilən nəqliyyat vasitələrini idarə etməyə və onu vaxtında texniki baxışdan keçirmədən idarə etməyə görə nəqliyyat vasitələrinin sahibləri və ya sürücüləri qanunvericiliklə müəyyən edilmiş qaydada məsuliyyət daşıyırlar. Əks təqdirdə İnzibati Xətalar Məcəlləsinin 340.1-ci maddəsinə əsasən fiziki şəxslər əlli manat məbləğində, vəzifəli şəxslər yüz manat məbləğində, hüquqi şəxslər üç yüz manat məbləğində cərimə edilir.
Şəxs nəqliyyat vasitəsini texniki baxışdan keçirmədən idarə etməyə görə inzibati məsuliyyətə cəlb olunduqda, 20 (iyirmi) gün müddətində nəqliyyat vasitəsini texniki baxışdan keçirməlidir. Bu müddət ərzində şəxs həmin əməlin törədilməsinə görə təkrarən məsuliyyətə cəlb olunmur.
