 |
|
Sosial şəbəkələrdə maraqlı fotolar yayılıb
Sosial şəbəkələrdə yayılan fotolar insanlar tərəfindən çox böyük maraqla qarşılanıb. Yol-xeber.az xəbər verir ki, Səbail RPİ-nin əməkdaşları tərəfindən vətəndaşa qayğını və həssas münasibəti əks etdirən görüntülər əks olunub.
Həmin fotoları təqdim edirik:
Mingəçevirdə sözə-sənətə dəyər verən insanların xeyir-duaları ilə görkəmli şair-publisist, filologiya üzrə fəlsəfə doktoru, Əməkdar jurnalist Adil Cəmilin anadan olmasının 65 illiyinə həsr olunmuş yubiley gecəsi keçirilmişdir.
Azərbaycan Yazıçılar Birliyi Mingəçevir bölməsinin,Şəhər İcra Hakimiyyətinin və “Aşıq Şəmşir Mədəniyyət Ocağı” İctimai Biliyinin dəstəyi ilə Mingəçevir Dövlət Dram Teatrında düzənlənən tədbirin aparıcısı-AYB Mingəçevir bölməsinin sədri İsmayıl İmanzadə sözlü-nəğməli gecəyə qatılan ədəbiyyat sevərlərə xitabən demişdir:
Bir həzin nəğmədir Araz da, Kür də
Heç vaxt geri dönməz bu çağlar bir də.
A dostlar, bu axşam Mingəçevirdə
Nə çəmənə, nə də bağa gəlmişik.
Bitib tükənməzdir sevgisi elin,
Səsi-sorağı var hər ötən ilin.
Şairlər şairi Adil Cəmilin
Sənətindən söz açmağa gəlmişik –
Misra-misra saflaşmağa gəlmişik.
İlk öncə“Aşıq Şəmşir Mədəniyyət Ocağı” İctimai Birliyinin sədr müavini Həbib Misirov,Kəlbəcər rayonunun millət vəkili Cavid Qurbanovun və “Aşıq Şəmşir Mədəniyyət Ocağı” İctimai Birliyinin sədri Qənbər Qurbanovun yubiliyara ünvanlanmış təbrik məktubunu oxuyandan sonra özünün də xoş arzularını dilə gətirdi.
Yubiley gecəsinə qonaq qismində qatılan tanınmış şair Mirsəyyaf Zamanlı Adil Cəmili çağdaş Azərbaycan poeziyasının görkəmli nümayəndələrindən biri kimi dəyərləndirib, çıxışını bir şeirini söyləməklə tamamladı.
Azərbaycan Yazıçılar Birliyinin üzvü, tanınmış şair Elşən Əzim yubiliyarın vətən sevgisi, Qarabağ göynərtisi və əzəli-əbədi məhəbbətdən bəhs edən şeirləri barədə danışandan sonra, rəhbərlik etdiyi 35 saylı Kəlbəcər rayon köçkün orta məktəbin bir neçə şagirdi Adil Cəmilin düşmən tapdağı altda qalan torpaqlarımızın harayını əks etdirən şeirlərini əzbər söylədilər.
Yubiliyarla birlikdə paytaxt Bakıdan gəlib yubiley şənliyinə qatılan məşhur ədəbiyyatşünas alim, professor Şirindil Alışanlı Adil Cəmilin ədəbi yaradıcılığından bəhs edən çıxışı ilə hamıya unudulmaz anlar bəxş etdi.
Tədbirin ayrı-ayrı məqamlarında yubiliyar şairin “O gün”, “Duz həqiqəti” və “Qürbət qiyaməti” adlı şeirlərini obrazlı şəkildə canlandıran MDDT-nın aktyorları-respublikanın xalq artisti Ella Yaqubova, Nargilə Abdullayeva, Hüseyn Mustafayev, Vüsalə Quliyeva, Paşa Salmanov, Turqut Məsimli və musiqi hissə müdiri Elnur Rəsulov tamaşaçıların alqışlarına layiq görüldülər.
Bölgədə və onun hüdudlarından uzaqlarda tanınan Aşıq Dumanın ifasının ardınca yerli İcra Hakimiyyətinin rəsmisi Sahib Əliyev şəhər rəhbəri İlham İsmayılovun təbrik və xeyir-dualarından söz açandan sonra AYB Mingəçevir bölməsinin hədiyyələrini-fəxri fərman və şairin mingəçevirli rəssam Abdulla ---- tərəfindən çəkilmiş portretini yubiliyara təqdim etdi.
İndiki günlərdə ulu aşıq sənətinin görkəmli nümayəndəsi Ədalət Dəlidağlı isə alqışlara layiq görülən bənzərsiz ifaları ilə sözlü-nəğməli yubiley gecəsinə sözün əsl mənasında öz “damğasını” vurdu.
Şairin illər öncəsi məzunu olduğu şəhər 9 saylı məktəbin və 11 saylı tədris ocağının şagirdləri Adil müəllimin insanlara, o cümlədən gənc nəslə vətən sevgisi aşılayan şeirlərindən nümunələr söyləyəndən sonra, Azərbaycan Yazıçılar Birliyi Ağdaş bölməsinin sədri-şair Fəxrəddin Əsəd istedadlı həmkarının söz sənətinin yüksək dəyər kəsb etdiyini vurğulamaqla, ona yeni-yeni yaradıcılıq uğurları arzuladı.
Vaxtıyla Adil Cəmillə birlikdə şəhərin 9 saylı orta məktəbində oxuduğunu fərəh hissiylə bildirən Rizvan Mikayıllı, yerli yazarlardan AYB üzvləri Nəsib Bayramoğlu, Zümrüd Rəhimova və Mingəçevir Turizm Kollecinin istedlı qələm sahibi kimi tanınan müəllimi Əşrəf Əsgərov da çıxış edərkən yubiliyar sənətkarın bəşəri və milli-mənəvi dəyərlərə söykənməklə insanlara nəcib hisslər aşılayan poeziyasının təsir gücündən və ona yönəlik oxucu sevgisindən söz açdılar. İstedadlı gənc şair, Prezident mükafatçısı Səxavət Kəlbəcərli isə özünün qələmə aldığı yeni şeirlərindən birini söyləməklə hamını məmnun etdi.
Mingəçevir Dövlət Universitetinin müəllimi, filologiya üzrə fəlsəfə doktoru Flora Namazova Adill Cəmillə eyni gündə və eyni məkanda çeşidli mövzularda müdafiə etdikləri elmi işlərlə alim titulu qazandıqlarını fərəh hissiylə dilə gətirib, türk dilli xalqlardan olan qırğızlara məxsus “Manas” dastanının ölkəmizdə ilk tərcüməçisi və tədqiqatçısı olan həmkarını həm peşəkar qələm sahibi, həm də istedadlı alim kimi dəyərləndirdi.
Mingəçevirdə hamının saz havalarının mahir ifaçıları kimi tanıdığı Aşıq Qoşqarın və Aşıq Hikmətin balabançı Fərəcin müşaiyəti ilə Adil Cəmilin şeirləri əsasında təqdim etdikləri mahnılardan sonra, yubiliyar şairin qohumları adından çıxış edən Hacı Sərdar Xankişiyev sevinc hissini hamı ilə bölüşdü.
Sonda yubiliyarın özü çıxış edərək sazlı-sözlü gecənin təşkilatçısı olan AYB-nin Mingəçevir bölməsinə, şəhər İcra Hakimiyyəti və “Aşıq Şəmşir Mədəniyyət Ocağı” İctimai Birliyinin rəhbərliklərinə minnətdarlığını bildirməklə, tədbirə qatılan və ünvanına xoş sözlər deyən hər bir kəsə təşəkkür edib, bir neçə şerini oxudu. Və tədbir öncəsi sərgidə nümayiş etdirilən kitablarını avtoqrafla oxuculara bağışlayıb, onlarla birlikdə xatirə şəkilləri çəkdirdi.
Yaxın-uzaq ellərdə görkəmli şair-publisist, tərcüməçi və məhsuldar alim kimi tanınan Adil Cəmilin sənətini yüksək dəyərləndirən sənətsevərlərin qəlbində yubiley geçəsi al-əlvan çalarları ilə şirin xatirələrə çevrilib, yaddaşlarda iz saldı.
Cabir QƏDİMOV,
Azərbaycan Jurnalistlər Birliyinin üzvü
Bakının Abbasqulu Abbaszadə küçəsində aparılacaq təmir işləri ilə əlaqədar tətbiq ediləcək məhdudiyyətlərə uyğun olaraq 3 və 31 nömrəli marşrutların hərəkət istiqamətləri müvəqqəti dəyişdiriləcək.
Bakı Nəqliyyat Agentliyindən verilən məlumata görə, dəyişiklik aşağıdakı kimi olacaq:
3 nömrəli marşrut:
Parlament prospekti – İzzət Nəbiyev küçəsi – Mikayıl Müşfiq küçəsi daha sonra öz xətti üzrə.
31 nömrəli marşrut:
“İçərişəhər” metro stansiyası istiqamətində Badamdar şosesi – Mikayıl Müşfiq küçəsi daha sonra öz xətti üzrə.
Badamdar qəsəbəsi istiqamətində Mikayıl Müşfiq küçəsi – Badamdar şosesi daha sonra öz xətti üzrə.
3 və 31 nömrəli marşrutların hərəkət istiqamətləri müvəqqəti dəyişdiriləcək
Bakıda iki marşrut avtobusun hərəkət istiqamətləri dəyişdiriləcək. Bakı Nəqliyyat Agentliyindən (BNA) Yol-xeber.az-a verilən məlumata görə, Abbasqulu Abbaszadə küçəsində aparılacaq təmir işləri ilə əlaqədar tətbiq ediləcək məhdudiyyətlərə uyğun olaraq 3 və 31 nömrəli marşrutların hərəkət istiqamətləri müvəqqəti dəyişdiriləcək.
3 nömrəli marşrut: Parlament prospekti – İzzət Nəbiyev küçəsi – Mikayıl Müşfiq küçəsi daha sonra öz xətti üzrə.
31 nömrəli marşrut: “İçərişəhər” metro stansiyası istiqamətində Badamdar şosesi – Mikayıl Müşfiq küçəsi daha sonra öz xətti üzrə.
Badamdar qəsəbəsi istiqamətində Mikayıl Müşfiq küçəsi – Badamdar şosesi daha sonra öz xətti üzrə.
Azərbaycan polisi qış geyiminə keçib.
"Yol-xeber.az" report-a istinadla xəbər verir ki, bununla bağlı müvafiq əmr imzalanıb.
Əmrə əsasən, noyabrın 4-dən etibarən Azərbaycan polisi qış geyiminə keçib.
Qeyd edək ki, hazırda paytaxt və bölgələrdə polis əməkdaşları qış geyimində xidmət aparırlar.
“Toy karvanlarında avtomobillərin hərəkət pozuntusu ilə bağlı yüzlərlə fakt var”.
“Bu ilin əvvəlindən toy karvanlarında avtomobillərin hərəkət pozuntusu ilə bağlı yüzlərlə fakt var”.
Bu sözləri Lent.az -a açıqlamasında Bakı Şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi polkovnik Vaqif Əsədov deyib. Artıq Məhərrəm ayı başa çatdıqdan sonra toylar başlayıb və bununla əlaqədar yollarda toy karvanlarının yaratdığı tıxac da özünü göstərir. Cari ilin təkcə avqust ayında toy karvanlarının törətdiyi bir neçə qəza halı qeydə alınıb. Nəticədə 10-dan artıq insan yaralanıb. Bəs bu problemin aradan qalxması üçün hansı işlər görülür?
Milli Məclisin Hüquq siyasəti və dövlət quruculuğu komitəsinin üzvü deputat Tahir Kərimli Lent.az -a məsələnin mənəvi əsaslara söykəndiyini deyərək, sanksiyaların tətbiq olunmasının çətinliyini bildirib:
“Hüquq komitəsində bu barədə rəsmi müzakirələr yoxdur. Amma qeyri-rəsmi müzakirələr var. Bu məsələ hamını çox narahat edir. Şəxsən özüm də bu məsələyə dönə-dönə qayıdıram. Dəfələrlə qeyd etmişəm ki, hüququn ən əsas mənbəyi xalqımızın adətləridir. Toy məsələsi də adətlərdən olduğu üçün onu sanksiyalaşdırmaq, qanuna mindirmək çətin olur. Bir sıra dövlətlərdə buna sanksiyalar tətbiq olunub və ictimaiyyət bu sanksiyaları hüquq pozuntusu kimi qiymətləndirib. Amma gec-tez toy məsələsində bir məhdudiyyət qoymağa məcbur qalacağıq. Çünki əvvəlki dövrlərə nisbətən əhali artdıqca xeyir işlərin sayı da artır, yollarda gediş-gəlişdə problemlər yaranır. Bunun qarşısının alınması üçün yollar axtarırıq, ancaq biraz mənəvi çətinliklər yaradır, qınaqdan qorxuruq. Toy yiyəsi, şadlıq evi rəhbərliyi, gəlin maşını sahibi narazılıq edir. Dəfələrlə görmüşük, polis karvanından birini saxlayır, sürücü qayıdır ki, həyatda bir dəfə olur də. Belə hallar olur. Sizin də bu mövzunu aktuallaşdırdığınız üçün məsələni komitə rəhbərliyi ilə müzakirə edəcəyik. Məsələni nizama qoymaq lazımdır”.
Bakı Şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədov Lent.az -a danışarkən tələb olunan qaydaların düzgün yerinə yetirilməsini qeyd edib:
“Toylar başladı və artıq hər zamankı kimi bəy-gəlin maşınını müşayiət edən avtomobillərin kobud yol hərəkəti pozuntuları aşkarlanır. Bu da yol-nəqliyyat hadisəsinə, digər yol hərəkət iştirakçıların narahatlığına, süni sıxlığa səbəb olur ki, haqlı olaraq digər sürücülər də narazılıq edirlər. Toy karvanlarındakı sürücülərə üzümü tutub deyirəm ki, ətrafda yol polisi görmədiyiniz üçün elə bilirsiniz ki, sizə nəzarət edilmir. Əslində elə deyil. İlin əvvəlindən Bakı şəhər yollarına nəzarət edən kameralarda toy karvanlarında pozuntuya yol verən yüzlərlə sürücü aşkarlanıb ki, onlara da qanunvericiliyin tələbləri ilə cərimələniblər. Bir daha xəbərdarlıq edirik ki, toy karvanlarında bəy və ya gəlinin yaxın 5-6 adamı iştirak etsin. Həmçinin lüzumsuz olaraq, aşağı sürət həddini seçməyin, yolu bütöv tutmaqla səs siqnalları ilə yol istəməyin. Yol ayrıcılarında, svetaforda tələblərə uyğun hərəkət edin. Hər hansı avtomobilin kəsişmədə digər avtomobilin qarşısını kəsməklə bəy-gəlin maşınına yol etməsi kobud pozuntudur və sözsüz ki, inzibati tənbeh üçün şərait yaradır. Düşünürük ki, yol-nəqliyyat hadisəsi baş verməməsi və hərəkət edərkən ləngimə halları olamaması üçün bu tələblər yerinə yetirilməlidir. Biz də ailə quran gənclərimizi təbrik edirik, valideynlərə gözaydınlığı veririk. Xahiş edirik ki, tələblərimizi də düzgün yerinə yetirin. İnzibati tənbeh edilib-edilməməsinə baxmayaraq nümunəvi hərəkət nümayiş etdirin”.
Vaqif Əsədov həmçinin yol kənarında olan şadlıq evləri və dayanma-durma qaydalarını pozan sürücülərdən də danışıb:
“Yollara bitişik şadlıq evlərinin qarşısında dayanma-durma qaydalarına düzgün riayət edilməməsi hərəkətə mane olur. Buna görə də qaydaları düzgün izah etməyə çalışırıq. Yol hərəkətinin təşkili sırf yol polisinin funksional vəzifəsidir. Bu vəzifənin yerinə yetirilməsi üçün qanunvericilikdə müddəalar nəzərdə tutulub. Hörmətli avtomobil sahibləri, bunları inzibati tənbeh nəzərdə tutulması üçün demirik. Vətəndaş məmnunluğunun yaranması, hər bir hərəkət iştirakçısının təhlükəsizliyinin təmin edilməsi, onların ləngimədən hərəkət etməsi üçün bir daha xatırladırıq ki, bu tələblər düzgün yerinə yetirilməlidir. Adətən toy karvanlarında hansısa avtomobili saxlayanda yol polisi ilə sürücü arasında anlaşılmazlıq olur. Sürücülər bu məsələyə “bir dəfə olur də” reaksiyası ilə yanaşırlar. Ancaq toy karvanlarının törətdiyi qəzalar məlumdur ki, bəy də ölüb, gəlin də. Ömürdə bir dəfə olan bu prosesdə elə etmək lazımdır ki, kimsə həyatından birdəfəlik məhrum olmasın”.
Əmək və Əhalinin Sosial Müdafiəsi Nazirliyi tərəfindən “Xəzər” markalı daha 50 avtomobil müharibə və Çernobıl AES-də hərbi xidmətlə əlaqədar əlilliyi olan vətəndaşlara təqdim edilib
Əmək və Əhalinin Sosial Müdafiəsi Nazirliyi tərəfindən “Xəzər” markalı daha 50 avtomobil müharibə və Çernobıl AES-də hərbi xidmətlə əlaqədar əlilliyi olan vətəndaşlara təqdim edilib.
Avtomobillə təmin edilən vətəndaşlar sosial cəhətdən həssas qruplara göstərilən yüksək qayğıya, şəhid ailələrinin, müharibə əlillərinin, Çernobıl AES-də hərbi xidmətlə əlaqədar əlilliyi olan şəxslərin sosial təminatlarının gücləndirilməsi üçün həyata keçirilən ardıcıl tədbirlərə görə Prezident İlham Əliyevə dərin minnətdarlıqlarını bildiriblər.
Tədbirdə Əmək və Əhalinin Sosial Müdafiəsi nazirinin müavini Mətin Kərimli vurğulayıb ki, əhalinin sosial müdafiəsinin gücləndirilməsi sahəsində atılan ardıcıl addımlar dövlət başçısının siyasətinin mərkəzində vətəndaş amilinin dayandığını bir daha təsdiq edir. 2019-cu il ərzində təqdim edilən iki sosial paket nəticəsində ölkəmizdə minimum əməkhaqqı 2 dəfəyə yaxın, minimum pensiya 72,4 faiz, sosial müavinət və təqaüdlər orta hesabla 100 faiz artırılıb. Bu və digər sosial tədbirlər ölkədə sosial inkişafda ciddi irəliləyişləri təmin etməklə, cari ildə 4,2 milyon vətəndaşın rifah halının yaxşılaşdırılmasına mühüm dəstək olub.
Nazir müavini eyni zamanda müharibə əlillərinin və onlara bərabər tutulanların, şəhid ailələrinin mənzillə, həmçinin müharibə əlillərinin və onlara bərabər tutulanların, o cümlədən Çernobıl AES-də hərbi xidmətlə əlaqədar əlilliyi olan vətəndaşların avtomobillə təminatı işlərinin ildən-ilə gücləndirildiyini bildirib. M.Kərimli qeyd edib ki, ölkəmizin ərazi bütövlüyünün, müstəqilliyinin və konstitusiya quruluşunun müdafiəsi uğrunda döyüşlərdə şəhid olmuş insanların ailələrinə və bu döyüşlərdə sağlamlıqlarını itirirmələri nəticəsində əlilliyi olan şəxslərə 2018-ci ildə nəzərdə tutulduğundan 3 dəfə çox olmaqla 626 mənzil təqdim edilib. 2019-cu ildə azı 800 mənzil verilməsi nəzərdə tutulub, onlardan 174 mənzil artıq verilib. İndiyədək isə şəhid ailələrinə və müharibə əlillərinə 6828 mənzil təqdim edilib.
M.Kərimli avtomobillə təminat tədbirlərinin də ildən-ilə gücləndirildiyini deyib. Bildirib ki, bu il nəzərdə tutulduğundan 3,2 dəfə çox olmaqla 600-ə yaxın avtomobilin müharibə əlillərinə və onlara bərabər tutulan əlilliyi olan şəxslərə verilməsi nəzərdə tutulub. Onlardan yeni verilən 50 avtomobil də daxil olmaqla cari ildə artıq 427 avtomobil təqdim edilib. Bununla indiyədək həmin vətəndaşlara 6400-dək minik avtomobili verilib.
Tədbirdə ictimai birliklərin rəhbərləri Azərbaycanda sosial inkişaf proseslərinin, vətəndaş rifahının təminatı, həssas kateqoriyalardan olan vətəndaşlara qayğının artırılması istiqamətində aparılan işlərin ictimaiyyət tərəfindən rəğbətlə qarşılandığını vurğulayıblar.
Vətəndaşlar icra başçısına səslənib
Masallı şəhərinin mərkəzində "Bazar" və "Xan sarayı" adlanan ərazidə yol bərbad vəziyyətdədir. Yol-xeber.az xəbər verir ki, bu barədə vətəndaşlar sosial şəbəkədə video paylaşıblar. Yağan yağış isə onsuz da b\rbad olan vəziyyəti bir az da pisləşdirib. Belə ki, yolda yaranan çuxurlara su dolub. Bu isə avtomobil və sakinlərin hərəkətini çətinləşdirir. Videonu təqdim edirik:
Qiymətlərin artacağı ilə bağlı səslənən fikirlər yalandır”
Bakı Nəqliyyat Agentliyi (BNA) ictimai nəqliyyatda gedişhaqlarının artırılacaqğı ilə bağlı səslənən fikirlərə münasibət bildirib. Bakı Nəqliyyat Agentliyinin mətbuat xidmətinin rəhbəri Mais Ağayev bildirib ki, ötən gün “Xəzər TV”də yayımlanan “Hər şey daxil” proqramında kart sisteminə keçid tam başa çatandan sonra gediş haqqının ödənilməsində müəyyən fərqliliklərin ola biləcəyini deyib: “Yəni, bu, sadəcə fikir olaraq söylənilib, ortada heç nə yoxdur. Bir gün bəzi KİV-lər bu açıqlamaya istinad edərək guya marşrut avtobuslarında gediş haqqının artacağı ilə bağlı məlumatlar yayıblar. Qiymət artımı olacağı ilə bağlı əsası olmayan bu məsələ insanlar arasında ciddi narahatlığa səbəb olub. Bildirirəm ki, heç bir qiymət artımından söhbət getmir. Digər yandan qiymət tənzimlənməsi BNA tərəfindən yox, digər müvafiq qurum tərəfindən həyata keçirilir”.
Efirdə səslənən fikirlərin izahına gəlincə, M. Ağayev bildirib ki, məsələn, Türkiyənin İzmir şəhərində səhər 06:00-07:00, axşam 19:00-20:00 arasında ictimai nəqliyyatda tariflər 50 faiz azaldılır: “Bu ildən tətbiq edilən bu təcrübənin məqsədi pik saatlarda daha çox insanın məhz ictimai nəqliyyatdan istifadəsinə nail olmaqdır. Bizim də məqsədimiz insanların ictimai nəqliyyatdan istifadəsini stimullaşdıran bu cür təcrübələrdən istifadə etməkdir. Bir daha qeyd edirəm, qiymətlərin artacağı ilə bağlı səslənən fikirlər yalandır”.
Yol genişləndirilməlidir
Azərbaycan Prezidenti İlham Əliyev oktyabrın 31-də paytaxtın Yasamal rayonunda Şəfayət Mehdiyev küçəsinin Tbilisi prospektindən Landau küçəsinədək olan hissəsində yenidənqurmadan sonra görülən işlərlə tanış olub.
Yol-xeber.az xəbər verir ki, Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov görülən işlər barədə məlumat verən zaman Prezident İlham Əliyev Bakı-Sumqayıt yolundakı tıxac məsələsinə toxunub və bunun aradan qaldırılması barədə göstəriş verib.
Prezident İlham Əliyev: Çox yaxşı işlər görmüsünüz. Bakı şəhərinin bütün küçələri ən yüksək standartlara cavab verməlidir. Ona görə harada ki, problemli yerlər var, onların da siyahısını tutun və biz həm bu il, həm də gələn il onları da təmir edəcəyik. Mənə məlumat verilir ki, Bakı-Sumqayıt yolunda tez-tez tıxaclar olur.
Saleh Məmmədov: Bəli, böyük tıxaclar olur.
Prezident İlham Əliyev: Baxmayaraq ki, indi qatar da işləyir və vətəndaşların bir hissəsi qatardan istifadə edir, yenə də tıxaclar var. Ona görə baxın, bu yolu genişləndirmək üçün texniki imkan olmalıdır, layihə hazırlayın.
Saleh Məmmədov: Cənab Prezident, layihə hazırlayıb Sizə təqdim edərik.
Prezident İlham Əliyev: Biz o yolu genişləndirməliyik, lazımi vəsait ayırarıq. Bir də mən sizə göstəriş vermişdim ki, qəsəbədaxili yollar, Bakıətrafı qəsəbələrin yolları da abadlaşdırılmalıdır. Siz ilkin təklifləri göndərmisiniz, baxılacaq və müvafiq göstərişlər veriləcək, sərmayə ayrılacaq ki, biz Bakı qəsəbələrində bütün daxili yolları abadlaşdıraq. Torpaq yollar asfaltlanmalıdır. Bakı şəhərində, o cümlədən onun qəsəbələrində torpaq yol olmamalıdır.
