 |
|
Baş DYP İdarəsi Bakı Beynəlxalg Avtovağzal ilə birgə BDYPİ tərəfindən hazırlanmış “YOL HƏRƏKƏTİ QAYDALARI UŞAQLARIN GÖZÜ İLƏ” mövzusunda rəsm bukletləri sürücülərə eləcədə sərnişinlərə təqdim edib.
Həmin bukletlərdəki rəsm işlərinin əsas mahiyyəti hərəkət iştirakçılarının maarifləndirilməsi ilə yanaşı yol hərəkəti qaydalarına riayət olunması, sürət rejiminə nəzarət edilməsi, sürücülərin, eyni zamanda sərnişinlərin təhlükəsizlik kəmərindən istifadə etməsi və digər müxtəlif tövsiyyələrdən ibarətdi.
Baş Dövlət Yol Polisi İdarəsi əməkdaşları bir daha bütün hərəkət iştirakçılarını Yol hərəkəti təhlükəsizliyinin təmin olunması və baş verə biləcək yol-nəqliyyat hadisələrinin qarşısının vaxtında alınması məqsədilə xahiş edir ki, hərəkət zamanı təhlükəsizlik kəmərlərinin təkcə sürücülər deyil, sərnişinlərin də bağlaması mütləqdir. Unutmayaq ki, təhlükəsizlik kəmərlərinin bağlanılmaması təkcə məsuliyyət yaratmır, həm də qəfil tormozlama və ya hər hansı toqquşma zamanı sürücü və sərnişinlərin həyat və sağlamlıqlarına təhlükə riskini artırır.
Rayonlararası magistral yollarda təhlükəsizliyin təmin olunması şərtlərindən biri də avtomobilin texniki imkanlarından asılı olmayaraq sürət rejiminə ciddi əməl etməkdir.
Özümüzün və yaxınlarımızın həyatına dəyər verək – yol hərəkəti qaydalarına riayət edək !
Bakıda Prezident yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyilə "Çağdaş aşıqlarımızın poetik yaradıcılığında vətənpərvərlik və qəhrəmanlıq mövzusu" adlı layihə çərçivəsində "Aşıq Şəmşir" Mədəniyyət Ocağı Ictimai Birliyi tərəfindən çap olunmuş "İndi hünər meydanıdır" adlı kitabın təqdimat mərasimi keçirilib.
"Report"un məlumatına görə, tədbirdə qeyd olunub ki, kitab bir neçə gün bundan əvvəl nəfis tərtibatla işıq üzü görüb.
Kitabda hazırda yaşayıb-yaradan aşıqlarımızın qəhrəmanlıq və vətənpərvərlik mövzusunda şeirlərindən seçmələrin yer aldığı vurğulanıb.
Kitabı nəşrə hazırlayan və redaktoru, Əməkdar mədəniyyət işçisi Musa Nəbioğlu layihənin aktuallığından və əhəmiyyətindən söz açıb, gənclərin hərbi vətənpərvərlik ruhunun yüksəldilməsi üçün bu kimi layihələrin gələcəkdə də keçirilməsinin vacibliyini vurğulayıb: "Aşıq Şəmşir Mədəniyyət Ocağı" İctimai Birliyi yarandığı gündən mədəniyyətin inkişafında çox mühüm uğurlara imza atıb. Bu birlik hər zaman aşıq sənətinə xüsusi diqqəti ilə seçilib. Bilirsiniz ki, aşıq sənəti daha qədim tarixi keçmişə malikdir. Bu sənət həmişə qəhrəmanlığı tərənnüm edib və hər kəsi qəhrəmanlığa, mübarizəyə səsləyib. İllərdir müharibə şəraitində yaşayan Azərbaycan xalqı üçün qəhrəmanlıqdan bəhs edən sənət əsərləri əhəmiyyət kəsb edir. Torpaqları işğal altında olan xalqımız böyük bir qəhrəmanlığa susayıb. Ona görə də bu gün təqdimatını keçirməkdə olduğumuz kitabın ərsəyə gəlməsi təqdirəlayiqdir. Bu kitabda bizim yaşadığımız hisslər tərənnüm olunub. Hesab edirəm ki, gənclər arasında da vətənpərvərlik hissini artırmaq lazımdır. Bu kitab həm də bu missiyaya xidmət edir".
“Aşıq Şəmşir Mədəniyyət Ocağı” İctimai Birliyinin sədr müavini Həbib Misirov bildirib ki, aşıq sənəti bu gün Azərbaycanda kifayət qədər inkişaf edib: "Dövlətimiz tərəfindən də aşıq sənətinə hər zaman diqqət və qayğı göstərilib. Bu gün ölkəmiz həm də beynəlxalq əhəmiyyətli mədəni tədbirlərin keçirildiyi bir məkana çevrilib. Bu da dövlət başçımızın Azərbaycanda mədəni sahəyə göstərdiyi diqqətin və qayğının nəticəsidir. Bizim bu kitabı çıxarmaqda məqsədimiz qəhrəmanlığa, vətənpərvərliyə diqqətin artırılmasıdır. Bilirsiniz ki, Azərbaycan ədəbiyyatında qəhrəmanlıq dastanları xüsusi yer tutur. Elə buna görə də bizim Ictimai Birlik mütəmadi olaraq aşıq sənətinin təbliği ilə məşğuldur".
Əməkdar jurnalist, filologiya üzrə fəlsəfə doktoru Adil Cəmil isə aşıq adının hər kəsə verilməsinin əleyhinə olduğunu qeyd edib. Onun sözlərinə görə, bu ad müqəddəs olduğu üçün hər yoldan ötənə aşıq deyilməməlidir: "Bu gün hər yetənə aşıq adı verilməsi düzgün deyil. Təsəvvür edin ki, Aşıq Ədalətlə yanaşı, filankəsin də aşıq olması qəbahətdir. Mən Aşıqlar Birliyinə müraciət edirəm ki, bu məsələ ilə ciddi şəkildə məşğul olsunlar".
Tədbirdə çıxış edən Atatürk Mərkəzinin şöbə müdiri, şair-publisist Əkbər Qoşalı “Aşıq Şəmşir Mədəniyyət Ocağı” İctimai Birliyinin sözügedən layihəsini təqdirəlayiq hesab edib.
Tədbirdə Əməkdar mədəniyyət işçisi, aşıq Gülarə Azaflı Azərbaycan xalqının xeyli sayda şəhid verdiyini xatırladıb. Vurğulayıb ki, xalqımız öz şəhidləri ilə fəxr etməlidir: "Xüsusən də, gənc nəslin nümayəndələri şəhidlərimizlə fəxr etməlidirlər. Bu gün təqdimatına toplaşdığımız kitabda da əsasən qəhrəmanləq tərənnüm olunub. Biz arzu edirik ki, gənclərimiz qəhrəmanlıq dastanlarından ruhlanıb torpaqlarımızı yağı düşmən işğalından geri alsınlar".
G.Azaflı "İndi hünər meydanıdır" adlı şeiri səsləndirib.
Daha sonra Ağamurad İsrafilov və digərləri çıxış edərək bu kitabın xüsusilə də gənc nəslin vətənpərlik ruhunda tərbiyəsində mühüm rol oynayacağını vurğulayıblar. Çıxışçılar qeyd ediblər ki, aşıq sənətinin mühüm tərkib hissəsi olan dastançılıq - dastan yaratmaq və söyləmək ənənəsi bu gün də yaşayıb günümüzün reallıqlarına uyğun olaraq yeni-yeni dastanlar yaranır.
Bildirilib ki, çağdaş aşıqlarımızın poetik yaradıcılığında vətənpərvərlik və qəhrəmanlıq mövzusu” adlı layihənin də əsas məqsədi həm də diqqəti hazırda fəaliyyət göstərən aşıqların yaradıcılığında yer almış vətənpərvərlik və qəhrəmanlıq mövzusunda yazılmış şeirlərə və dastanlara yönəltməkdir. Həmçinin qeyd olunub ki, “Aşıq Şəmşir Mədəniyyət Ocağı" İctimai Birliyinin son illərdə mədəniyyətimizin inkişafı, xüsusilə də aşıq sənətinin təbliği və inkişafı naminə çox mühüm layihələrə imza atır.
Tədbirin sonunda ustad aşıqlar müxtəlif aşıq havaları üstündə qəhrəmanlıq və vətənpərvərlik mövzusunda şeirlər oxuyublar.
Qeyd edək ki, layihənin rəhbəri “Aşıq Şəmşir Mədəniyyət ocağı” İctimai Birliyi sədrinin müavini Həbib Misirov, kitabı nəşrə hazırlayan və redaktoru Əməkdar mədəniyyət işçisi Musa Nəbioğlu, məsləhətçi "Aşıq Şəmşir Mədəniyyət Ocağı" İctimai Birliyinin sədri Qənbər Qurbanov, rəyçi Əməkdar elm xadimi, professor Məhərrəm Qasımlıdır. Günümüzün ustad aşıqları Prezident təqaüdçüsü, Əməkdar mədəniyyət işçisi Mahmud Məmmədov, Prezident təqaüdçüsü, Əməkdar mədəniyyət işçisi Ulduz Quliyeva, Əməkdar mədəniyyət işçiləri Əhliman Rəhimov, Gülarə Azaflı, Solmaz Kosayeva, Ağamurad İsrafilov, Fətulla Əliyev, Sərdar Məmmədovla yanaşı gənc aşıqların da poetik yaradıcılığına müraciət olunan kitabda çağdaş aşıqlarımızın qəhrəmanlıq və vətənpərvərlik, Qarabağ müharibəsi mövzusunda yazdıqları şeirlərlə yanaşı bu mövzuda yaratdıqları dastan da yer alıb.
“ADY Express” MMC-nin yeni xidməti. Çən vaqonların buxarla yuyulması. Proses “ADY Express”-in, regionda yeganə olan, Biləcəri yuyucu–buxarlayıcı stansiyasında aparılır. Yuyulma, buxarlama, deqazasiya prosesləri avtolmatlaşdırılıb və ən qısa zamanda həyata keçirilir.
Xidmətlər:
Qara neft məhsulları daşıyan çən vaqonların, açıq neft məhsulları daşımaq üçün hazırlanması. Qara neft məhsulları daşıyan çən vaqonların, qara neft məhsulları daşımaq üçün hazırlanması. Açıq neft məhsulları daşıyan çən vaqonların, açıq neft məhsulları daşımaq üçün hazırlanması. Çən vaqonların buxarla yuyularaq təmirə hazırlanması.
“ADY Express” şirkəti həmçinin yerli stansiya xərcləri, vaqonların yola salınması, dəmir yolu qaimələrin sənədləşməsi xidmətlərini də göstərərik.
Azərbaycan Dəmir Yolları" Qapalı Səhmdar Cəmiyyətinin sədri, Milli Məclisin deputatı Cavid Qurbanovun seçiciləri ilə Millət vəkilinin tapşırığına əsasən mütəmadi olaraq görüşlər keçirilir və onların problemləri dinlanilir. Növbəti qəbul 08 Oktyabr 2019-cu il tarixində keçirildi. Qəbulu aparan Millət vəkilinin nümayəndəsi Həbib Misirov bildirib ki, müraciətlər əsasən iş və yaşayış yeri ilə təmin edilmə, müalicə-müayinə, ünvanlı sosial yardımın alınması, təhsil, mənzil-məişət şəraitlərinin yaxşılaşdırılması, qeydiyyat, sənədləşdirmə, hüquqi yardım və s. ilə bağlı olub. Qəbula gələn seçicilərin problemləri ayrı-ayrılıqda dinlənilmiş , onları narahat edən məsələlərin həlli istiqamətində müvafiq işlərin görüləcəyini bildirmişdir. Bildirilmişdir ki, bütün qaldırılan məsələlər diqqət mərkəzində olacaq, aidiyyatı orqanlara sorğular göndəriləcəkdir. Seçicilərin bir qisminin ərizələri baxılması üçün aidiyyəti orqanlara göndərilməsi qərara alınmışdır. Müraciət edən bəzi seçicilərin problemləri yerindəcə həll edilmişdir. Qəbulda 64 nəfər seçici iştirak edib.
Bildirilib ki, Millət vəkili Cavid Qurbanov daim Kəlbəcər rayonundan olan seçicilərin problemlərini diqqət mərkəzində saxlayır, onların problemlərinin həlli üçün əlindən gələni etməkdədir.
Ötən həftə Daxili İşlər Nazirliyinin Baş Dövlət Yol Polisi İdarəsinin təşəbbüsü ilə məktəblilər yol-patrul xidmətinin fəaliyyətilə yaxından tanış olmaq məqsədilə növbəti dəfə DYP-nin inzibati binalarına ekskursiya ediblər.
Qeyd edək ki, “Yol Polisimizlə bir gün” adlı tədbir «Azərbaycan Respublikasında yol hərəkəti təhlükəsizliyinə dair 2019-2023-cü illər üçün Dövlət Proqramı»nın məqsədlərinə uyğun olaraq Azərbaycan Respublikasının Daxili İşlər və Təhsil nazirliklərinin birgə əməkdaşlıq tədbirləri çərçivəsində həyata keçirilir.
Ekskursiyada Şəki, Quba, Mingəçevir, Lənkəran və Sumqayıt şəhər tam orta məktəblərinin yüksək təhsil və intizam göstəriciləri ilə fərqlənən bir qrup şagirdi və onları müşayiət edən təhsil işçiləri iştirak edib.
Məktəblilərə yol-patrul xidməti inspektorlarının xidməti fəaliyyəti, yol hərəkət iştirakçılarının rahat, fasiləsiz və təhlükəsiz hərəkəti üçün görülən tədbirlər, inzibati hüquqpozmalara, eləcə də cinayətkarlığa qarşı aparılan mübarizə tədbirləri barədə nəzəri məlumatlar verilib, xüsusi texniki vasitələr nümayiş olunub. İştirakçılara DYP-nin inzibati binalarında, stasionar postlarda və yol-patrul xidməti avtomobillərində iş fəaliyyətini canlı izləmək imkanı da yaradılıb.
Tədbirin keçirilməsində əsas məqsəd, yol hərəkəti təhlükəsizliyinin təbliği ilə bağlı təhsil müəssisələrində aparılan maarifləndirmə işlərini daha da gücləndirmək, eyni zamanda yol hərəkəti təhlükəsizliyinin təmin olunmasında uşaq və yeniyetmələri aktiv iştirakçılığa cəlb etməkdir.
Baş Dövlət Yol Polisi İdarəsinin təbliğat xidmətinin əməkdaşları tərəfindən avtomobil yolunu nəzərdə tutulmamış yerlərdən keçən, yerüstü və yeraltı piyada keçidləri olduğu halda onlardan istifadə etməyən piyadalara qarşı növbəti dəfə maarifləndirmə tədbiri həyata keçirilib. Bakı-Sumqayıt şossesində və Bakı şəhərinin müxtəlif küçə və prospektlərində keçirilən tədbirlər zamanı piyada təhlükəsizliyinin təmin edilməsi, mövcud piyada keçidlərindən səmərəli istifadə olunması, yol hərəkəti təhlükəsizliyinin təbliğində hərəkət iştirakçılarının özlərinin aktiv iştirakçıya çevrilməsinin təbliği tədbirin əsas leytmotivini təşkil etmişdir.
Tədbir zamanı yol hərəkəti qaydalarını kobud şəkildə pozan piyadalar DYP əməkdaşları tərəfindən saxlanılmış, barələrində inzibati məsuliyyət tədbirləri tətbiq edilməklə yanaşı hər biri ilə maarifləndirici söhbətlər aparılmış, onlara yol hərəkəti haqqında qanunun tələbləri, piyadaların hüquq və vəzifələri barədə müfəssəl məlumat verilmişdir. Yerüstü piyada keçidlərindən istifadə etməyən əsasən yaşlı piyadaların yolu təhlükəsiz şəraitdə keçmələri üçün YPX əməkdaşları tərəfindən adekvat tədbirlər görülüb. «Azərbaycan Respublikasında yol hərəkəti təhlükəsizliyinə dair 2019-2023-cü illər üçün Dövlət Proqramı»nın məqsədlərinə uyğun olaraq piyadaların maarifləndirilməsi istiqamətində tədbirlər davam etdirilir.
Ölkəmizi Belarusiya Respublikasının Bobruysk şəhərində keçirilmiş “Gənc Yol Hərəkəti İnspektorları”nın 47-ci toplantısında layiqincə təmsil edərək birincilik əldə edən “Yol Polisinin Gənc Köməkçisi” dəstəsinin üzvləri Daxili İşlər Nazirliyinin Baş Dövət Yol Polisi İdarəsinə ekskursiya ediblər.
“Qaliblərin” Baş DYP İdarəsinə ekskursiyası, «Azərbaycan Respublikasında yol hərəkəti təhlükəsizliyinə dair 2019-2023-cü illər üçün Dövlət Proqramı»nın məqsədlərinə uyğun olaraq, Azərbaycan Respublikasının Daxili İşlər və Təhsil nazirliklərinin birgə həyata keçirdikləri “Yol Polisimizlə bir gün” adlı layihə çərçivəsində baş tutub.
Ekskursiyanın keçirilməsində əsas məqsəd, yol hərəkəti təhlükəsizliyinin təbliği ilə bağlı təhsil müəssisələrində aparılan maarifləndirmə işlərini daha da gücləndirmək, eyni zamanda bu işdə uşaq və yeniyetmələri aktiv iştirakçılığa cəlb etməkdir.
Təşkilatçılar tərəfindən ayrılmış avtomobillərdə DİN-in Baş DYP İdarəsinin inzibati binasına gələn “Yol Polisinin Gənc Köməkçisi” dəstəsinin üzvlərinə ilk növbədə binanın struktur quruluşu, konfrans zalı, patrul avtomobilləri, xüsusi texniki vasitələr nümayiş olunub. Daha sonra ekskursiyaçılara Baş DYP İdarəsinin iş fəaliyyətini, o cümlədən Operativ Müşahidə Mərkəzinin, Növbətçi hissənin iş prosesini canlı izləmək imkanı yaradılıb.
Tədbir zamanı Baş Dövlət Yol Polisi İdarəsinin əməkdaşları tərəfindən “qaliblərin” çoxsaylı sualları cavablandırılıb və onlara müxtəlif hədiyyələr təqdim olunub.
Müşahidələrimiz göstərir ki, bir çox hallarda avtomobil sahibləri təmir və ya avtoyuma məntəqələrinin xidmətlərindən istifadə edərkən nəqliyyat vasitəsinin açarlarını da məntəqə işçilərinə verərək oranı tərk edirlər. Belə hallar isə bəzən həmin məntəqələrdə çalışan və adətən gənc, hərəkətlərinin məsuliyyətinin fərqinə varmayan bir sıra insanlara sahibi yanında olmayan nəqliyyat vasitələrindən qanunsuz istifadə etmək fürsəti yaradır.Müştərilərin etibarından sui-istifadə etməklə yanaşı, qanunvericiliyin də tələblərini kobud şəkildə pozaraq onlara həvalə edilmiş avtomobili qaçıraraq idarə edən belə gənclər tərəfindən bir sıra hallarda insanların həlak olması, yaralanması ilə nəticələnən ağır yol-nəqliyyat hadisələri törədilir.
Bununla yanaşı, bəzən xidmət göstərməli olduqları nəqliyyat vasitələrindən oğurluq edən, onlardan öz əmlakı kimi istifadə edən şəxslərə də rast gəlinir.
Odur ki, avtomobil sahiblərinə müraciət edərək tövsiyə edirik ki, təmir və ya avtoyuma məntəqələrinin xidmətlərindən istifadə edərkən mümkün qədər məntəqəyə yaxın ərazidə olmağa çalışın, avtomobilinizi təsadüfi deyil, tanıdığınız, məsuliyyətli, peşəkar insanlara etibar edin.
Unutmayın ki, bəzən etinasız yanaşdığımız bir hal sonradan bərpası mümkün olmayan fəsadlara yol aça bilər.
Bakı-Sabunçu-Pirşağı-Sumqayıt dairəvi dəmir yolunda aparılan yenidənqurma işləri ilə əlaqədar olaraq, təhlükəsizliyin təmin olunması məqsədilə Asəf Əsədullayev küçəsi ilə Qambay Vəzirov küçəsinin kəsişdiyi yerdə - 13-cü kilometrin 3-cü piketində (Sabunçu stansiyasının girişində) eyni səviyyəli dəmir yolu keçidinin yeraltı tunellə əvəz olunması prosesinə start verilib.
Bununla əlaqədar olaraq, avtomobillərin alternativ yollarla hərəkəti üçün hər cür şərait yaradılıb. Hazırda kommunikasiya qurğularının (telefon, qaz, su, kanalizasiya) köçürülməsi və svayların vurulması işləri aparılır. İstinad divarları hazır olan kimi tunelin qazılması prosesi həyata keçiriləcək.
Bu tunelin tikintisi təhlükəsizliyin təmin olunmasında mühüm rol oynayacaq. Bilirsiniz ki, bu dəmir yolu keçidindən çoxsaylı marşrut xətləri keçirdi. Günün pik saatlarında, qatarların hərəkəti zamanı, avtomobillər xeyli müddət yolun açılmasını gözləməli olurdular. Tunel istifadəyə veriləndən sonra bu problem də aradan qalxacaq.
Qeyd edək ki, yeraltı tunelin uzunluğu 262 metr, eni isə 15 metr olacaq. Tuneldə avtomobillərin hərəkəti üçün 3 yol ayrılacaq. 2-si Bakıxanovdan Sabunçu istiqamətinə, 1-i isə Sabunçudan Bakıxanov istiqamətinə gedəcək.
İşlər sürətlə davam edir. Tunelin inşası başa çatanda, Bakı-Sabunçu-Bakı istiqamətində elektrik qatarlarının Sabunçu stansiyasınadək hərəkətinin tam bərpası haqqında vətəndaşlarımıza məlumat veriləcək.
Daxili İşlər Nazirliyi rəhbərliyinin göstərişinə əsasən, yeni dərs ilinin başlanması ilə əlaqədar sentyabr ayının 15-dən etibarən respublika ərazisində “Diqqət, uşaqlar” adı altında təhlükəsizlik aylığının keçirilməsinə start verilib.Aylıq çərçivəsində həyata keçirilən maarifləndirmə və təbliğat xarakterli tədbirlər isə öz müxtəlifliyi ilə fərqlənir. Baş Dövlət Yol Polisi İdarəsi tərəfindən davamlı olaraq aparılan təşviqat işinə bu dəfə ölkəmizi beynəlxalq toplantılarda layiqincə təmsil edən “Gənc Yol Hərəkəti İnspektorları” dəstəsi də qoşulub.
Belə ki, yol hərəkət iştirakçılarının təhlükəsizlik qaydalarına bəslədikləri münasibətə, ələlxüsus piyada qismində yol hərəkətində iştirak edən həmyaşıdlarının yollarda üzləşə biləcəkləri təhlükələrə biganə qalmayan Yol Polisinin Gənc Köməkçiləri, DYP-nin stasionar postlarında Baş Dövlət Yol Polisi İdarəsi tərəfindən sürücü və piyadalara xitabən hazırlanmış tövsiyə xarakterli bukletləri sürücü və piyadalara təqdim ediblər.
Uşaq və yeniyetmələrin yol hərəkəti qaydalarına həsr etdikləri rəsm əsərlərindən qaynaqlanan və üzərində yol hərəkəti iştirakçılarının maarifləndirilməsinə, o cümlədən yolayrıclarında, piyada keçidlərində təhlükəsizlik qaydalarına riayət edilməsi, motodəbilqədən və təhlükəsizlik kəmərindən istifadə vərdişlərinin aşılanması, sürət rejiminə əməl olunması və s. bu kimi qaydalara həsr olunmuş bu bukletlər, eyni zamanda cəmiyyətdə yol hərəkəti mədəniyyətinin daha da inkişaf etdirilməsinə xidmət edir.
Təsadüfi deyildir ki, bu formatda keçirilən maarifləndirmə tədbirləri və yayılan təbliğat materialları yol hərəkəti iştirakçıları tərəfindən olduqça müsbət qarşılanır, uşaqlar tərəfindən çəkilmiş rəsm işlərinə böyük maraq göstərilir. Biz də inanırıq ki, “uşaq dili” ilə deyilən tövsiyələr böyüklər tərəfindən unudulmaz.
Baş Dövlət Yol Polisi İdarəsi bütün hərəkət iştirakçılarına təhlükəsiz yol arzulayır və yol hərəkəti qaydalarına əməl etməyi xahiş edir.