 |
|
Futbol üzrə Türkiyə millisinin üç mərkəz müdafiəçisinin dəyəri 140 milyon avroya çatıb.
Oxu.az xəbər verir ki, buna qədər klubları Türkiyə millisinin mərkəz müdafiəçisi Merih Demiral üçün 50, Çağlar Söyüncü üçün isə 60 milyon avro transfer qiyməti təyin edib.
Ötən gün isə Türkiyə millisinin müdafiəçilərindən Ozan Kabak “Liverpul” klubuna transfer olub. Futbolçu hələlik icarə əsasında çıxış edəcək. Lakin “Liverpul” yay transfer pəncərəsində türkiyəli gənc ulduz üçün “Şalke”yə 30 milyon avro ödəyəcək.
Beləliklə, Türkiyə millisinin şərəfini qoruyan üç mərkəz müdafiəçisinin ümumi transfer qiyməti 140 milyon avroya çatıb.
2022-ci ildə Qətərdə keçiriləcək dünya çempionatını azarkeşlər stadiondan izləyə biləcək.
“Qafqazinfo” xəbər verir ki, bu barədə FİFA-nın prezidenti Canni İnfantino açıqlama verib.
50 yaşlı funksioner DÇ-2022-də stadionların azarkeşlərlə tam dolu olacağını bildirib.
DÇ-2022 gələn il 21 noyabr-18 dekabrda Qətərin 7 şəhərində – Doha, Lusail, Əl-Vakra, Əl-Hor, Əl-Rayan, Umm-Salal və Mədinət əş-Şamalda təşkil olunacaq.
Türkiyənin "Fənərbağça" klubu futbolçu Mesut Özilin transferi üçün azarkeşlərin köməyi ilə pul toplamağı planlaşdırır.
Report xəbər verir ki, bu barədə klub prezidenti Ali Koç açıqlama verib. O, "Mesut Ol" kampaniyası başlatdıqlarını diqqətə çatdırıb: "Ən azı bir sms rica edirəm. Telefonu olmayan uşaqlar ata-analarından sms göndərmələrini istəsinlər".
"Fənərbağça" fanatları "Mesut Ol" kampaniyasına böyük maraq göstəriblər. Onlar MESUTOL yazaraq, 1907-yə 20 dəqiqə ərzində 35 000 sms göndəriblər. Bu qədər qısa mesaj qarşılığında 700 000 türk lirəsi (160 494 manat) yığılıb. Bu yolla 2 milyon avro pul toplanılması nəzərdə tutulub. Klub Özilin formasının satışından da pul qazanmaq niyyətindədir.
Qeyd edək ki, hazırda "Fənərbağça"nın borcu 520 milyon avrodur. Mesut Özillə 2023-cü ilədək rəsmi müqavilə bağlanılacaq.
Azərbaycanın idman gimnastikası üzrə qadınlardan ibarət millisinə yeni baş məşqçi təyin olunub. “Qafqazinfo” Azərbaycan Gimnastika Federasiyasının rəsmi saytına istinadən xəbər verir ki, yığma Belarusdan olan Olqa Barkalavaya tapşırılıb.
Barkalava təyinatı ilə bağlı təəssüratlarını bölüşüb. O, millinin məşq etdiyi zalla və gimnastlarla tanış olduğunu bildirib: "İdman gimnastikasının inkişafı üçün burada hər cür şərait var. Çox gözəl məşq zalıdır. Mənə göstərilən etimada görə çox minnətdaram və çalışacağam ki, Azərbaycanın qadın idman gimnastları Avropa və dünya arenasında güclü rəqabət aparmaq bacarığına malik olsunlar”.
Qeyd edək ki, Olqa Barkalava 22 ildir ki, qadın idman gimnastikası üzrə məşqçilik fəaliyyəti ilə məşğul olur. O, son 6 il ərzində Belarus millisinin məşqçisi kimi fəaliyyət göstərib.
Məşhur rusiyalı döyüşçü Həbib Nurməhəmmədov UFC prezidenti Deyna Uaytın onun idmana qayıtma ehtimalının olması barədə açıqlamasına münasibət bildirib.
Oxu.az xəbər verir ki, H.Nurməhəmmədov bu barədə “Sport24” nəşrinə danışıb.
“Bu qədər məşğul olmuşam, neçə illərdir idmandayam. Bu idman növündə demək olar ki, hər şeyə nail olmuşam. Heç kimlə döyüşmək istəmirəm”, - deyə 32 yaşlı H.Nurməhəmmədov bilririb.
O əlavə edib ki, hazırda peşəkar idmana geri qayıtmaq üçün heç bir səbəb görmür. Üstəlik anasını məyus etmək istəmir.
“Həyatda yanımda olan ən dəyərli şəxs anamdır, gəlin, məni anamı məyus edəcək şeylər vadar etməyə məcbur etməyin”, - deyə karyerasına başa vuran dağıstanlı idmançı vurğulayıb.
Keçmiş UFC çempionu Konor Makqreqor rusiyalı UFC döyüşçüsü Həbib Nurməhəmmədovun onunla döyüşməkdən qorxduğunu deyib.
Bu barədə o ESPN-ə müsahibəsində bildirib:
“Mənimlə döyüşməkdən qorxur. Buna dəhşətli dərəcədə əminəm. Ancaq onu günahlandırmıram. O gecə mən onun ən yaxşı, o isə mənim ən pis versiyamla mübarizə apardı”.
Qeyd edək ki, 2020-ci ilin noyabrında Makqreqor Nurməhəmmədovu fenomenal döyüşçü adlandırıb.
Əlavə olaraq bildirək ki, 2018-ci ilin oktyabrında irlandiyalı və rusiyalı arasındakı döyüş dördüncü turda Nurməhəmmədovun qələbəsi ilə sona çatmışdı.
Azərbaycan milli komandasının DÇ-2022-nin seçmə mərhələsində ilk ev oyununu keçirəcəyi stadion müəyyənləşib.
AFFA-nın saytı xəbər verir ki, Azərbaycan - Serbiya qarşılaşması martın 30-da Bakı Olimpiya Stadionunda keçiriləcək.
Qarşılaşma saat 20:00-da başlayacaq.
Fevralın 13-14-də Bakıda keçirilməsi nəzərdə tutulan Batut gimnastikası və Tamblinq üzrə Dünya Kuboku ləğv olunub.
"Ölkə.Az" Azərbaycan Gimnastika Federasiyasının rəsmi saytına istinadən xəbər verir ki, yarışın ləğv olunması dünyada yayılmış koronavirus xəstəliyinin Azərbaycan ərazisində yayılmasının qarşısının alınması, profilaktik və təxirəsalınmaz tədbirlərin həyata keçirilməsi ilə bağlıdır.
Bakıdakı Kubok ilə yanaşı Beynəlxalq Gimnastika Federasiyası İdman gimnastikası üzrə Dünya Kubokunun (Almaniya, 25-28 fevral) ləğv olunması, o cümlədən Akrobatika gimnastikası üzrə Dünya Kubokları (Rusiya -19-21 fevral; Portuqaliya - 5-7 mart; Belçika 9-11 aprel) və Aerobika gimnastikası üzrə Dünya Kubokunun (Yaponiya 24-25 aprel) təxirə salınması ilə əlaqədar qərar çıxarıb.
Qeyd edək ki, Bakıda İdman gimnastikası üzrə Dünya Kuboku (4 - 7 mart), Bədii gimnastika üzrə Dünya Kuboku (7 - 9 may), Aerobika gimnastikası üzrə 9-cu Dünya yaş qrupları yarışları (21 - 23 may), Batut gimnastikası və tamblinq üzrə 35-ci Dünya Çempionatı (11 - 14 noyabr) və 28-ci Dünya yaş qrupları yarışlarının (19 - 22 noyabr) keçirilməsi nəzərdə tutulur.
İtaliya A Seriyasının 16-cı turunda “Milan” “Yuventus”a 1:3 hesabı ilə uduzub.
Matçın icmalını təqdim edirik:
“Milan” – “Yuventus” 1:3
Qol: Kalabria, 41 – Kyeza, 18; 62. Makkenni, 76.
"Neftçi" klubunun sabiq futbolçusu Rafiq Əlizadə dünyasını dəyişib.
Bu barədə "Reoprt"a Futbol Veteranları İttifaqının sədri Oqtay Abdullayev məlumat verib.
Keçmiş hücumçu 72 yaşında Rusiyanın paytaxtı Moskvada qəflətən vəfat edib. O.Abdullayev Futbol Veteranları İttifaqı adından R.Əlizadənin ailəsinə başsağlığı verib.
Qeyd edək ki, Rafiq Əlizadə 1966 - 1972 və 1976 - 1982-ci illərdə "Neftçi"nin formasını geyinib. O, futbolçu karyerası ərzində komandasına penalti qazandırma bacarığı ilə də tanınıb.
R.Əlizadə futzal sahəsində də özünü sınayıb. O, 1991-ci ildə futzal üzrə SSRİ çempionatında Bakının "Neftçi" komandasının heyətində 4 oyun keçirib, 8 qol vurub, həmçinin futzal üzrə SSRİ yığmasının 2 dəfə formasını geyinib.
Mütəxəssis 1999-cu ildə tarixində ilk və hələ ki, sonuncu dəfə Avropa çempionluğunu qazanan futzal üzrə Rusiya yığmasının köməkçi-məşqçisi olub. Sabiq forvard 1992 - 2008-ci illərdə Rusiyanın "Dina" futzal klubunun idman direktoru, 2010 - 2017-ci illərdə isə maddi-texniki təminat üzrə vitse-prezidenti vəzifəsini icra edib. O, 2019-cu ildə Rusiya Mini-Futbol Assosiasiyası tərəfindən "İşinə sadiqliyə görə" medalı ilə təltif edilib.
R.Əlizadəyə 2019-cu ilin sonundan AFFA İcraiyyə Komitəsinin qərarına əsasən milli assosasiya tərəfindən xüsusi təqaüd verilib.
