 |
|
Yeni növ koronavirus (“COVID-19”) pandemiyasının yayılmasının qarşısını almaq və insanların sağlamlıq təhlükəsizliyini təmin etmək məqsədilə Azərbaycan Respublikası ərazisində elan edilmiş xüsusi rejimli karantin müddəti başa çatana qədər Bakı metropoliteninin fəaliyyəti Nazirlər Kabineti yanında Operativ Qərargahın müvafiq qərarları, tapşırıq və tövsiyələrinə uyğun təmin ediləcək.
Qurumdan verilən məlumata görə, qeyd edilənlər əsas götürülərək, metropolitendən aşağıdakı qaydalarla riayət edilərək, istifadə oluna bilər:
1.Bakı metropoliteninin sərnişindaşıma fəaliyyəti 14 sentyabr 2020-ci il səhər saat 06:00-dan bərpa olunur. Bakı metropoliteninin stansiyaları saat 06:00-dan 24:00-dək sərnişinlərin girişinə açıq olacaq.
2. Bakı metropoliteni gücləndirilmiş iş rejimində fəaliyyət göstərəcək.
3. Texniki imkanlar nəzərə alınmaqla, qatarların hərəkəti maksimal hərəkət qrafiki ilə təmin olunacaq.
4. Əlil arabalarından istifadə edən sərnişinlərin daşınması xidmətinin fəaliyyəti bərpa ediləcək.
5. “İctimai nəqliyyatda koronavirus infeksiyasının profilaktikasına dair metodiki göstəriş”ə uyğun olaraq, Bakı metropoliteni stansiyalarının ərazisində və qatarlarda mütləq qaydada tibbi maskalardan istifadə edilməli və sosial məsafə gözlənilməlidir. Tibbi maska taxmadan metropolitendən istifadə qadağandır! Sərnişinlərin diqqətinə çatdırılır ki, tibbi maska ağız və burun boşluğunu tam örtməlidir.
6. Tibbi maskadan istifadə olunmamasına görə müvafiq qaydada inzibati məsuliyyət tətbiq edilir.
7. Stansiyaların girişlərində sərnişinlərin tibbi maskadan istifadə etməsi tələb olunacaq.
8. Stansiyalara daxil olan sərnişinlərin hərarəti, seçmə qaydada olmaqla, müvafiq tibbi avadanlıq vasitəsi ilə yoxlanılacaq.
9. Sosial məsafənin qorunmasını, tibbi maskadan istifadəni, sanitar-gigiyenik qaydalara riayət olunmasını təmin etmək məqsədilə sərnişinlərin audio, vizual, statik məlumatlandırılması üsullarından istifadə olunacaq, stansiya və qatarlardakı oturacaqlarda məlumatlandırıcı işarələr qoyulacaq, zərurət yarandığı halda, sərnişinlərin rabitə vasitələri və səsucaldanlarla məlumatlandırılması təmin olunub.
10. Bakı metropoliteni stansiyalarında fəaliyyət göstərən apteklərə tibbi maska satışı üçün şərait yaradılıb.
11. Sərnişinlərin sosial məsafəni qoruması, metropolitenə təhlükəsiz və nizamlı daxil olmasını təmin etmək məqsədilə istiqamətləndiricilər qoyulacaq. Bunu nəzərə alaraq, sərnişinlərdən stansiyalara daxil olarkən tibbi maskadan düzgün istifadə etməklə sosial məsafə saxlamaları və təhlükəsizlik qaydalarına riayət etmələri xahiş olunur.
12. Stansiya və qatarların dezinfeksiya olunması əvvəlki qaydada müəyyən edilmiş qrafik üzrə təmin ediləcək.
Qeyd olunub ki, Nazirlər Kabinetinin “Xüsusi karantin rejiminin sərtləşdirilməsi ilə bağlı əlavə tədbirlər barədə” 3 iyul 2020-ci il 236 №-li Qərarı ilə Bakı metropolitenində sərnişindaşıma fəaliyyəti 4 iyul saat 00:00-dan 20 iyul saat 06:00-a qədər dayandırılmışdı.
Daha sonra epidemioloji vəziyyətlə əlaqədar olaraq Bakı metropolitenində sərnişindaşıma fəaliyyətinin dayandırılması müddəti Nazirlər Kabinetinin 17 iyul 2020-ci il tarixli 255 nömrəli Qərarı ilə avqust ayının 5-nə, 4 avqust 2020-ci il tarixli 278 nömrəli Qərarı ilə avqust ayının 31-nə və 29 avqust 2020-ci il tarixli 311 nömrəli Qərarı ilə sentyabr ayının 15-nə kimi uzadılmışdı. (modern.az)
Bakı Ağır Cinayətlər Məhkəməsində Ekologiya və Təbii Sərvətlər Nazirliyinin mənimsəmədə təqsirləndirilən keçmiş əməkdaşları – Nazirliyin Hidrometeorologiya Departamentinin direktoru olmuş Əkbər Həsənov, həmin departamentin baş mühasibi İlqar Hacıyev və departamentin digər əməkdaşları – Orxan Qasımov, Tural Hacızadə və Təbriz Əliyevin cinayət işi üzrə məhkəmə prosesi davam edib.
Keçirilən prosesdə zərərçəkmiş şəxs qismində 5 nəfər dindirilib.
Həmin şəxslər özlərini zərərçəkmiş şəxs kimi qəbul etməklərini, onlara heç bir zərər dəymədiyini bildiriliblər.
İ. Hacıyevin vəkili Ramil Məmmədzadə həmin 5 nəfər zərərçəkmiş şəxslərin siyahısından çıxarılmasını ilə bağlı vəsatət verib.
Hakim vəsatəti təmin etməyib.
Daha sonra vəkil R. Məmmədzadə bildirib ki, iş üzrə dövlətə dəyən ziyan tam olaraq ödənilib: “İş üzrə istintaq orqanı tərəfindən müvəkkilim dövlətə 151 min manat ziyan vurduğu bildirilib. Artıq həmin ziyan da tam ödənilib. Onun da digər təqsirləndirilən şəxslər kimi ev dustaqlığına buraxılmasını tələb edirik”.
Bu səbəbdən vəkil vəsatət verərək İlqar Hacıyev barəsində seçilmiş həbs qətimkan tədbirinin ev dustaqlığı ilə dəyişdirilməsi istəyib.
Vəkilin vəsatəti təmin edilməyib.
Məhkəmə prosesi sentyabrın 18-də davam etdiriləcək.
Xatırladaq ki, İlqar Hacıyev sabiq nazir Hüseynqulu Bağırovu günahlandırıb. O bildirib ki, sabiq nazir onlardan aldığı 451 min manatı qaytarmadığı üçün bu vəziyyətə düşüb: “O zaman Hüseynqulu Bağırov nazir idi və istədiyini edə bilirdi. Nazirin bir çox qeyri-rəsmi göstərişini yerinə yetirmişəm. Bu günə qədər susdum. Amma gördüm ki, artıq hamı öz canına yanır. Ortada qalan isə bir mən olmuşam. Bu işə görə məsuliyyətə cəlb edilənlərdən digər üç nəfərin nə günahı var? Onlar niyə cəzalandırılmalıdır? Daha susmaq yoxdur. Ya mən və digər təqsirləndirilən şəxslər bəraət alacağıq, ya da Əkbər Həsənov və Hüseynqulu Bağırov da həbs ediləcək”.
Qeyd edək ki, təqsirləndirilən şəxslərə qarşı Cinayət Məcəlləsinin mənimsəmə, vəzifə səlahiyyətlərindən sui-istifadə və daha bir neçə maddəsi ilə ittihamlar irəli sürülüb.
İttihama görə, 2012-ci ildən Milli Hidrometeorologiya Departamentində rəhbər vəzifələrdə – direktor və direktor müavini işləyən Ə.Həsənovun rəhbərliyi ilə təqsirləndirilən şəxslər Nazirlikdə şəbəkə quraraq külli miqdarda vəsaiti mənimsəyiblər. Belə ki, onlar əmək müqaviləsi bağlamayan işçilərin əməkhaqlarını ayrı-ayrı kartlara köçürərək ələ keçiriblər.
İş üzrə ümumilikdə 450 min manatdan çox zərər olub. İstintaq dövründə 300 min manat zərər ödənilib.
Təqsirləndirilən şəxslərdən yalnız İlqar Hacıyev barəsində həbs qətimkan tədbiri seçilib.
Zərərçəkən 27 nəfər də əmək müqaviləsi imzalanmayan, maaşları karta köçürülərək mənimsənilən şəxslərdir. / Modern.az
Səhiyyə naziri Oqtay Şirəliyev növbəti kadr dəyişikliyi edib.
“Unikal.org”un məlumatına görə, O.Şirəliyevin əmri ilə, Mahir Səfərov Azərbaycan Tibb Universitetinin Tədris Stomatoloji Klinikasının direktoru təyin olunub. O, bu təyinata qədər Stomotoloji Mərkəzdə çalışıb.
Qeyd edək ki, Azərbaycan Tibb Universitetinin Tədris Stomatoloji Klinikasının əvvəlki direktoru Alqış Səfərov öz ərizəsi ilə tutduğu vəzifədən azad olunub.
Əməkdar artist Tahir İmanov “Planet Parni İz Baku LTD” Məhdud Məsuliyyətli Cəmiyyətinin karantin qaydalarına əməl etmədiyi üçün inzibati protokol yazıldığı barədə yayılan xəbərə münasibət bildirib.
O, “Ölkə.Az”ın əməkdaşı ilə söhbətində məsələdən xəbərsiz olduğunu deyib.
“Bu barədə ilk dəfə sizdən eşidirəm. Məsələ ilə bağlı heç bir fikir söyləyə bilməyəcəyəm. Biz heç bir qayda pozmamışıq, hər zaman bütün qanunlara raiyət edirik”,- deyə o, qeyd edib.
Xatırladaq ki, bu inzibati xətaya görə, hüquqi şəxslər 400 manat cərimə edilir.
Qeyd edək ki, bu barədə məlumatı “Report” xəbər agentliyi yayıb.
Bu ilin əvvəlindən yaşa görə müavinət yaşının pensiya yaşı ilə eyniləşdirilməsi yaşlı əhalinin sosial təminat sistemi ilə əhatə olunmaq imkanlarını və bu sistemin əhatə dairəsini daha da artırıb.
Əmək Və Əhalinin Sosial Müdafiəsi Nazirliyindən "Ölkə.Az"a verilən məlumata görə, bu ilin əvvəlinədək və cari ilin ötən dövründə pensiya yaşına çatan, lakin pensiya hüququ yaranmayan 23 min şəxsə yaşa görə müavinət təyin olunub.
Beləliklə, həmin vətəndaşlar əvvəlki qanunvericilikdə nəzərdə tutulan yaş hədlərinə çatmalarını gözləmədən, daha erkən dövrdə yaşa görə müavinət hüququ qazanıblar.
Ümumilikdə, yaşa görə müavinətlə təmin olunanların sayı hazırda 100 minə yaxındır.
Mədəniyyət Nazirliyində yeni kadr təyinatı olub.
Bununla bağlı məlumat Nazirliyin rəsmi saytında dərc edilib.
Bildirilib ki, Mədəniyyət nazirinin birinci müavini, Mədəniyyət nazirinin vəzifələrini müvəqqəti icra edən Anar Kərimovun müvafiq əmri ilə Əliyev Cavid Fikrət oğlu Mədəniyyət Nazirliyinin Aparat rəhbərinin müavini – Hüquq və daxili nəzarət şöbəsinin müdiri vəzifəsi vəzifəsinə təyin edilib.
C.Əliyev son təyinatadək Dövlət Şəhərsalma və Arxitektura Komitəsində Müqavilələr və hüquqi layihələrin hazırlanması sektorunun müdiri vəzifəsində çalışıb.
Yeni tədris ilinin başlaması, karantin rejiminin yumşaldılmasından sonra iş yerlərinin açılması ilə ictimai nəqliyyatda yaranan hədsiz sıxlıq uzun müddətdir bağlı olan Bakı Metropoliteninin fəaliyyətə başlaması məsələsini gündəmə gətirib.
"Ölkə.Az" xəbər verir ki, Bakı Metropoliteninin mətbuat xidmətinin rəhbəri Bəxtiyar Məmmədovun BAKU.WS-ə verdiyi məlumatda metronun sentyabrın 15-dən fəaliyyətə başlayacağı ilə bağlı hələlik onlara rəsmi məlumat daxil olmayıb.
"Metropoliten bağlandığı gündən hər gün hazırlıq rejimində çalışır. Texnoloji proseslərə uyğun işlər aparılır. Lakin bunun sərnişindaşımanın bərpası və ya bağlı qalması ilə bağlılığı yoxdur. Nə vaxt qərar verilsə, o vaxtdan işə başlayacağıq".
Xatırladaq ki, ölkə ərazisində xüsusi karantin rejiminin müddəti sentyabr ayının 30-u saat 00:00-dək uzadılıb. Nazirlər Kabinetinin qərarı ilə Bakı Metropolitenində sərnişindaşıma fəaliyyətinin dayandırılması ilə bağlı qərar sentyabr ayının 15-i saat 06:00-a kimi uzadılıb. Metropoliten sentyabrın 15-də sərnişindaşıma fəaliyyətini bərpa edəcəyi təqdirdə belə aşağıda qeyd edilən müddətlərdə sərnişinlərə xidmət göstərməyəcək:
2020-ci il 19 sentyabr saat 00:00-dan 2020-ci il 21 sentyabr saat 06:00-dək;
2020-ci il 26 sentyabr saat 00:00-dan 2020-ci il 28 sentyabr saat 06:00-dək.
“Millət vəkili Vüqar Bayramov öz facebook hesabında paylaşdığı postda əlilliyin təyinatındakı çətinliklər, müraciətlərə imtinalar, o cümlədən Füzuli rayonu üzrə statistik məlumatlarda bir sıra yanlışlıqlara yol verib. Əslində, bu ilin 8 ayında Füzuli Rayon Mərkəzi Xəstəxanası tərəfindən əlilliyin qiymətləndirilməsi məqsədilə 217 şəxsə dair ümumilikdə 255 göndəriş (Forma 088) rəsmiləşdirilib. Onlardan 114-ü ilkin, 141-i isə təkrar göndərişlərdir”.
“Qafqazinfo” xəbər verir ki, bu barədə Əmək və Əhalinin Sosial Müdafiəsi Nazirliyinin (ƏƏSMN) İctimaiyyətlə əlaqələr və kommunikasiya şöbəsinin müdiri Fazil Talıbov bildirib. O, qeyd edib ki, bu göndərişlər əsasında 37 nəfərə əlillik dərəcəsi, 40 nəfərə isə sağlamlıq imkanları məhdudluğu təyinatı aparılıb, 18 nəfərə aid göndərişlər isə qiymətləndirilmə prosesindədir: “160 göndəriş üzrə müxtəlif səbəblərdən imtina qərarı verilib. Belə ki, həmin göndərişlərdə, stasionar müalicə müddətlərinin azlığı, müayinələr və ağırlaşmaların arasında uyğunsuzluğun olması, xəstəlik barədə mütəxəssislərin rəyinin qeyd olunmaması, funksional pozğunluqlar barədə məlumatın göstərilməməsi, diaqnozu təsdiqləyən müayinələrin tam aparılmaması, xəstəliyin başlanma tarixi ilə müalicə tarixlərinin ziddiyyət təşkil etməsi, xəstəliyin xarakteri ilə ümumtəhsil müəssisəsində təhsil almaqla bağlı məlumatlarda uyğunsuzluğun olması və s. səbəblərdən əlillik təyinatı aparılmayıb”.
F. Talıbov, həmçinin qeyd edib ki, əlilliyin qiymətləndirilməsi sahəsində şəffaflığın artırılması və əlillik təyinatlarında ünvanlılığın təmin olunması məqsədilə davamlı olaraq aparılan araşdırmalar nəticəsində indiyədək 6500-dən çox şəxsə aparılmış əsassız əlillik təyinatları ləğv edilib. Bu təyinatlar üzrə dövlət büdcəsinin illik qənaəti 30 milyon manata yaxındır. Uzunmüddətli dövr üzrə dövlət büdcəsinin qənaəti 700 milyon manatdan yuxarıdır.
“Bilinməlidir ki, ləğv edilən əlillik təyinatlarından 42 nəfərə dair göndərişlər məhz Füzuli RMX tərəfindən rəsmiləşdirilib. Belə ki, həmin şəxslərə rəsmiləşdirilən göndərişlərdə təqdim olunan məlumatların öz təsdiqini tapmaması, qeyd edilən diaqnozların şişirdilməsi, vətəndaşla bağlı digər elektron informasiya sistemlərində toplanan məlumatların ziddiyyət təşkil etməsi kimi faktlar müəyyənləşdirilib. Göndərişlərdə qeyd edilmiş məlumatların etibarlılığını ciddi sual atına qoyan bu kimi hallar Tibbi sosial ekspert komissiyalarını daha da diqqətli olmağa, eyni zamanda şübhəli, ziddiyyətli və tam təqdim olunmamış məlumatlar əsasında rəsmiləşdirilən göndərişlər barədə qərar verərkən daha ehtiyatlı olmağa vadar edir”, - deyə ƏƏSMN-nin şöbə müdiri bildirib.
F. Talıbov əlavə edib ki, bu kimi problemlərin aradan qaldırılması üçün göndərişin rəsmiləşdirilməsində əsas götürülən digər tibbi sənədlərin (epikriz, tibbi rəy və s.) elektronlaşdırılması zəruridir. Bu istiqamətdə Səhiyyə Nazirliyinin və İcbari Tibbi Sığorta üzrə Dövlət Agentliyinin gördüyü tədbirlər qısa müddətdə nəticə verəcək.
Xatırladaq ki, deputat Vüqar Bayramov ötən gün sosial şəbəkədə əlilliyin təyinatındakı çətinliklərlə bağlı ünvanlanan sorğuların ən çox edilən müraciətlər sırasında olduğunu, prosesin elektronlaşmasına baxmayaraq, müraciətlərin böyük əksəriyyətinə imtina cavabı verildiyini bildirmişdi.
Sabah, sentyabr ayının 12-i səhər saatlarından etibarən şəhərin mərkəzi və qəsəbələrdəki əsas küçə, prospekt və yollarda xüsusi kimyəvi maddələrlə növbəti dəfə əlavə gücləndirilmiş dezinfeksiya işləri aparılacaq.
Paytaxtın kommunal strukturlarından “Qafqazinfo”ya verilən məlumata görə, bununla əlaqədar maddələrin qəbul olunmuş müəyyən toksikliyini nəzərə alaraq sakinlərdən ciddi zərurət yaranmadığı təqdirdə qeyd olunan tarixdə küçəyə çıxmamaq xahiş olunur.
Bərdə rayonu, Alaçadırlı kəndində yaşayan Şəfa Quliyevanın evi qəzalı vəziyyətdədir. İki il əvvəl rayona yağan güclü yağışlar nəticəsində evin divarları çatlayıb, döşəməsi və damı uçaraq dağılıb. Maddi imkanı yaxşı olmayan ailə evin təmiri üçün aidiyyati orqanlara üz tutsa da, nəticəsi olmayıb.
Şikayətçi “Qafqazinfo”ya müraciətində bildirib ki, 8 il əvvəl çətinliklə tikdirdiyi evi artıq iki ildir ki, tamamilə yararsız haldadır: “İki il əvvəl rayonda güclü yağışlar yağdı, məhəlləni su basdı. Qonşuların həyətlərinə zərər dəydi, mənim isə evim qəzalı vəziyyətə düşdü. Çünki evin yarısı kərpic, yarısı yüngül konstruksiyalı materiallarla tikilib. Ondan sonra da zəlzələ, daşqın, güclü yağış evi lap yaşanmaz hala saldı. Artıq 15 gün olar ki, evdən çıxıb Bakıda yaxınlarımızın evinə yerləşmişik. Çünki ev hər an uça bilər, daha orada yaşamağa qorxuruq. Getməyə də başqa yerimiz yoxdur”.
Şikayətçinin sözlərinə görə, çətin şəraitdə yaşamaqdan həm özü, həm də uşaqları xəstəlik tapıb: “Özüm epilepsiya xəstəsiyəm, yoldaşım da bizi qoyub gedib. Nəmdən hər cür xəstəlik tapmışıq. Uşaqlarımın birinin sol böyrəyi işləmir. Özüm bu günlərdə əməliyyat olunmuşam, xahiş edirəm, bizə kömək edin”.
Ş. Quliyeva bildirib ki, evinin vəziyyəti ilə əlaqədar dəfələrlə aidiyyati qurumlara şikayət edib. Bərdə Rayon İcra hakimiyyəti başçısının müavini Vahid Qarayevin qəbulunda iki dəfə olsa da, ona bildirilib ki, büdcədə kifayət qədər vəsait olmadığına görə evi təmir etmək mümkün deyil.
Şikayətlə bağlı Bərdə Rayon İcra Hakimiyyətinə müraciət etdik. İcra Hakimiyyətindən “Qafqazinfo”ya bildirdilər ki, vətəndaşların şəxsi mülkiyyətində olan fərdi yaşayış evlərinin tikinti və təmirinə vəsait ayrılmır: “Təbii fəlakətlərə görə Nazirlər Kabinetinin təsdiq etdiyi parametrlər var. Məsələn, zəlzələ 6, 2 baldan yuxarı olmalıdır və ya küləyin sürəti 40 m/saniyədən yüksək olmalıdır ki, onun yaratdığı problemi Fövqəladə Hallar Nazirliyi aradan qaldırsın. Həmçinin yağıntının miqdarı ilə bağlı da belə həcm nəzərdə tutulub. Hazırda icra hakimiyyətinin balansında vəsait yoxdur ki, həmin evi təmir etsin. Onu ancaq qohum-qonşu yığışıb təmir edə bilər”, - İcra Hakimiyyətindən bildiriblər.
Gülnar Əliyeva
