 |
|
Türkiyəli aktyor Burak Özçivit həbs oluna bilər.
"Yol-xeber.az" baku.ws-ə istinadən xəbər verir ki, buna səbəb aktyorun "Kuruluş Osman" serialının çəkilişi zamanı işçi heyətini təhqir etməsidir.
İstintaq başladılaraq Özçivitin ötən il dekabrın 8-də çəkiliş sırasında işlətdiyi ifadələrlə bağlı müraciət araşdırılıb və proses başa çatdırılıb.
İrəli sürülən iddianaməyə əsasən, Burak 3 ay 15 gündən 4 il 1 aya qədər həbs oluna bilər.
Məhkəmənin yaxın günlərdə keçiriləcəyi bildirilib.
Türkiyənin reytinqli "Eşkiya dünyaya hükümdar olmaz" serialında İlyas obrazına həyat verən məşhur aktyor Ozan Akbaba Şuşaya səfər edib.
“Yol-xeber.az” xəbər verir ki, bununla bağlı görüntüləri aktyor Elşən Orucov sosial şəbəkə hesabında paylaşıb.
E.Orucov O.Akbabanı Cıdır düzündə salamlayıb və duyğularını soruşub.
Məşhur aktyor isə “Nə oldu, Paşinyan?” deməklə əhvalını izah edib.
Xalq yazıçısı Çingiz Abdullayevin “Birinci Qarabağ mhüaribəsi olmayıb” açıqlaması günlərdir cəmiyyətin müxtəlif təbəqələrində müzakirə olunur. Yazıçı bu fikirləri həmin dövrdə vahid ordunun olmaması ilə əsaslandırılsa da, onun dedikləri tənqid hədəfinə çevrilib. Hətta bəzi sosial şəbəkə istifadəçiləri bunu şəhid və qazilərə hörmətsizlik kimi qiymətləndirərək, yazıçıdan üzr istəməyi tələb ediblər.
Haqqında yazılan tənqidlərlə bağlı Ç.Abdullayevin münasibətini öyrənmək üçün ona müraciət etdik. Xalq yazıçısı Ölkə.Az-a açıqlamasında bu sözləri deyib:
“Münasibətim belədir: erməni ensiklopediyasında yazılıb ki, Dağlıq Qarabağ ordusu Azərbaycan Ordusunu birinci müharibədə darmadağın edib. Mən bununla razı deyiləm. Hesab edirəm ki, bizim ordumuz olmayıb, onlar bizi darmadağın etməyiblər. Amma şəhidlər, qazilər bizdə lap çox olublar. Nə silahımız olub, nə ordumuz, nə də hakimiyyət. Mən istəmirəm ki, yenə erməni mifi yaransın və qalsın. Əgər ordumuz var idisə, Xocalıda niyə yox idilər? Mən deyirəm ki, ermənilər ruslardan istifadə edib bizim torpaqlarımızı zəbt ediblər. Kim razı deyilsə, onlara nə deyim? Demirəm ki, şəhid olmayıb. Çoxlu şəhid olub, on qat çox olub. Amma bunu insanlar başa düşməlidir. Biz qonşularımızın mifini yaradırıq.
Onlar 30 il üzümüzə deyirdilər ki, siz alverçi millətsiniz, vuruşan millət deyilsiniz. Görün biz sizi necə darmadağın etmişik. Heç kim demir ki, bizim təyyarəmiz tankımız olmayıb. Onlar da Rusiyanın köməyi ilə gəlib torpaqlarımızı alıblar. Əgər bunu qəbul etmək istəmirlərsə, ar olsun”.
Qeyd edək ki, Xalq yazıçısı Çingiz Abdullayev Sumqayıtda oxucuları ilə görüşündə oxucularından “Birinci Qarabağ Müharibəsi” ifadəsini işlətməməsini xahiş edib:
“Birinci Qarabağ Müharibəsi deməyin! Bu müharibə olmayıb, yalandır. Ermənilər Sovet qoşunlarına pul verib, tanklarından istifadə edib bizim torpaqlarımızı alırdılar. Bizim ordumuz olmayıb. Xocalıya girən 366-cı alayda komandirlərin hamısı erməni idi. Əsl müharibə indi olub. 44 günlük müharibə ki, bizim müstəqil ordumuz olub, komandiri olub”,- deyə yazıçı söyləyib.
Aparıcı və prodüser Tarix Əliyevlə (Tolik) müğənni Cavanşir Məmmədov arasında qalmaqal yaşanıb.
"Yol-xeber.az" xəbər verir ki, aparıcının "Tarixin bir günü" proqramına qonaq olan sənətçi canlı yayıma bağlanan tamaşaçılardan birinə “Biz iki ildir, toylara gedə bilmirik, bəlkə, siz bizə kömək edəsiniz” sözlərini deyib.
Bundan sonra Tolik əsəbiləşib. O, Cavanşir Məmmədovun absurd sözlər söylədiyini və onun kifayət qədər maddi imkanı olduğunu bildirib. Aparıcı müğənnilərin vergi ödəməməsi məsələsinə də toxunub. O, Cavanşirə "Vergi ödəsəydiniz, indi “Rolls-Royce” sürə bilməzdiniz" deyib.
Daha sonra sənətçi Tolikin bu sözlərinə sərt reaksiya verib:
““Rolls-Royce” almaq üçün mən bağ evimi satmışam. Neyləməliyik? Acından ölməliyik? Mən “Rolls-Royce” sürməliyəm. Hətta üçünü birdən sürə bilərəm. Çünki mən 50 ildir bu xalqa xidmət edirəm”.
Xalq artisti Məleykə Əsədova sosial şəbəkədə yayılan videoya etiraz edib.
Axşam.az xəbər verir ki, aktrisa "7 Canlı" proqramında dediyi şeirin montaj edilərək, başqa səs salındığını bildirib.
Bu isə Əsədovanı özündən çıxarıb. Açıqlama yayan aktrisa "Videoda "yox" sözündən sonra bəzi şərəfsizlər əzizlərinin səslərini video ilə montaj edib. Bu, həm mənə, həm də Bəxtiyar Vahabzadəyə hörmətsizlikdir. Bununla bağlı tədbir görüləcək. Mənə maraqlıdır, bu videonun montaj olduğunu bilə-bilə niyə bəzi səhifələr də bu tərbiyəsizliyi paylaşaraq həmin şərəfsizlərə dəstək olurlar?" sözlərini söyləyib.
Qeyd edək ki, M.Əsədova görüntüdə Bəxtiyar Vahabzadənin "Kimdir mənim düşmənim?" şeirini səsləndirib.
İctimai TV-də yayımlanan 3D proqramında xalq yazıçısı Çingiz Abdullayevin təyyarə əhvalatı ilə bağlı ironik səhnəcik hazırlanıb.
Yol-xeber.az xəbər verir ki, verilişdə qonaq olan nənə və nəvəsi onlara hava limanında su verən şəxsə butulkanı qaytarmaq üçün gəldiyi təsvir olunub:
“Biz aereportda idik. Nəvəm su istəyirdi. Ora-bura baxdıq, bir yerdə su tapmadıq. Sonra da bir nəfər yaşlı kişi bizə su gətirib verdi. Nəvəm mənə göstərir ki, ay nənə, internetdə bu kişi haqqında pis-pis şeylər yazılır.
Biz su üçün nəvəmlə mağazaya getdik. Baxdıq ki, bu su çox bahalı sudur. Zəhmət olmasa, bu butulkanı su verən kişiyə qaytararsınız”.
Qeyd edək ki, Xalq yazıçısı paylaşımında İstanbul hava limanında nəvəsi yaşında uşağın ağlayaraq nənəsindən su istədiyini bildirib. Ç.Abdullayev nənənin çarəsizcə ətrafa baxdığı zaman onlara bir şüşə su verdiyini deyib. Xalq yazıçısı həmçinin həyatında heç vaxt özünü bu qədər rahat hiss etmədiyini yazıb.
Sosial şəbəkələrdə yazılan tənqidlərdən sonra Ç.Abdullayev paylaşımını sildiyini deyib.
Billurə
Yol-xeber.az kulis.az-a istinadən Asəf Zeynallı haqqında maraqlı faktları təqdim edir.
Asəf Zeynalabdin Zeynallı 1909-cu il 5 apreldə Dərbənddə doğulub. 1923-1926-cı illərdə Bakı musiqi texnikumunda, 1931-ci ildə Azərbaycan Dövlət Konservatoriyasının bəstəkarlıq şöbəsində, Üzeyir Hacıbəyovun sinfini bitirib.
1929-1931 illərdə türk (Azərbaycan) fəhlə teatrında musiqi bölməsinin müdiri və Azərbaycan proletar musiqiçiləri birliyinin sədri işləyib. Tofiq Quliyev və Qara Qarayev bir müddət onun tələbələri olublar. Azərbaycan musiqi tarixində ilk romanslar Asəf Zeynallının adı ilə bağlıdır.
Asəf Zeynallı milli romans, piano və simfonik musiqinin banisidir. Onun “Ölkəm”, “Sərhədçi”, “Çadra”, “Sual”, “Seyran” romansları milli vokal musiqimizin inciləridir. Piano üçün “Uşaq süitası” silsiləsi, “Çahargah” pyesi, violino və piano üçün “Muğamsayağı”, 2 fuqa, simfonik orkestr üçün “Fraqmentlər”, teatr tamaşalarına musiqi, xalq mahnıları işləmələrinin müəllifidir. Azərbaycan musiqi folklorunun toplanıb nota köçürülməsi və işlənməsi sahəsində böyük iş aparıb. “İbtidai not savadı” adlı dərslik tərtib edib.
***
O həmçinin türk (Azərbaycan) fəhlə teatrında oynanılan Cəfər Cabbarlının "Sevil", "Qayıdış", X. Nəzirli və S. Rüstəmin "Alov", A. Həmidin "Hind qızı", V. Kirşonun "Küləklər şəhəri" əsərlərinə musiqi bəstələmiş, "Uşaq süitası" əsəri ilə ilk dəfə Azərbaycan musiqi tarixində uşaq musiqisi repartuarının əsasını qoymuşdu. Asəf Zeynallı bir neçə Azərbaycan xalq mahnılarını nota alıb. Cəfər Cabbarlının sözlərinə bəstələdiyi "Ölkəm" romansı ən məşhur əsəri hesab olunur.
***
1932-ci ildə Asəf Zeynallı Bülbüllə birlikdə xalq musiqilərini toplamaq üçün Qarabağa ezam olunur. O, getmək istəmir, qalıb başladığı əsəri bitirmək istəyir, lakin sözünü dinləyən olmur. Səfər zamanı orada ağır xəstələnir. Qarın yatalağına tutulan bəstəkar müalicə almaq üçün Bakıya qayıdır. Xəstəxanada olarkən otağının divarına son simfoniyasını yazır və qardaşından əsərinin divardan kağıza köçürülməsini xahiş edir. Təəssüf ki, onun son vəsiyyətini heç kim yerinə yetirmir…
Deyilənə görə onun ölümündə erməni əli də olub. Bu barədə Asəf Zeynallının yazdığı məktub da var. Həmin məktubda o, ermənilərdən şikayətlənir. Ermənilər onu “şovinist” adlandıraraq, bəhanə gətirirlər ki, guya, o dərs deyərkən türk, yəni azərbaycanlı şagirdlərə - onların arasında Tofiq Quliyev, Qara Qarayev də olub - daha çox diqqət ayırır, ermənilərə yox.”
***
Asəf Zeynallı ezamiyyətdə olanda ona bir stəkan su verirlər. O, sudan bir qurtum içəndə deyir ki, su xoşuma gəlmir, yanından kimsə təkid edir ki, iç, heç nə olmaz, buranın suyu belədir. Həmin suyu içəndən sonra halı dəyişir. Bakıya gəlib xəstəxanaya düşür. Əlavə söz-söhbət olmaması üçün də ailəsinə deyirlər ki, qarın yatalağından ölüb.
***
Asəf Zeynallı 27 oktyabr 1932-ci ildə yaradıcılığının inkişaf etdiyi bir dövrdə, bu ağır xəstəlikdən dünyasını dəyişir və Çəmbərəkənd qəbiristanlığında basdırılıb, sonralar “Qurd qapısı” qəbiristanlığına köçürülüb.
***
Bəstəkarın qardaşı oğlu müsahibələrinin birində deyir: Düzü qəbrin köçürülməsi mənim yadıma gəlmir, onda uşaq idim. Asəf Zeynallı vəfat edəndə əvvəlcə Çəmbərəkənddə, indiki Dağüstü Parkda basdırılmışdı. O vaxt orda park salınanda bütün qəbirlər köçürüldü, o cümlədən də Asəf Zeynallının qəbri. Atamgil onun qəbrini gətirib indiki yerdə basdırdılar. O vaxt ora internasional məzarlıq sayılırdı. Müsəlman, xristian, yəhudi olsun, fikir verən yox idi. Həm də əmim basdırılanda o ərazilər bomboş idi. Atamgilin şəkli də var, qəbrin ətrafında dayanıblar, ətraf isə bomboşdur. Sonralar Böyük Vətən müharibəsi oldu, həmin yerlər müxtəlif millətlərin, əsirlərin qəbirləri ilə doldu.”
Asəf Zeynallının adı ilə bağlı qalmaqalı hadisə ötən ilin yayında baş vermişdi. Belə ki, Dirijor Mustafa Mehmandarov “Facebook”da dahi bəstəkar Asəf Zeynallının “Qurd qapısı” qəbiristanlığındakı məzarının baxımsız vəziyyətdə olmasını göstərən foto yayaraq bu sözləri yazmışdı:
“Heç inanmazdım ki, 23 yaşında dünyasını dəyişən, yaşayıb-yaratdığı o qısa zamanda milli musiqi tariximizə bir neçə gözəl və təkrarolunmaz əsərlər bəxş edib, bir neçə ilklərə imza atan görkəmli bəstəkarımız Asəf Zeynallının qəbri bu halda olsun. Biz dəfələrlə yuxarı dairələrə müraciət eləmişik. “Baksovet” də bizə yazıb ki, indi yazıçı, bəstəkar çoxdur, hamısını Fəxri Xiyabanda basdırmağa imkan yoxdur. Hardasa on il əvvəl belə deyiblər”.
***
Lakin, bəstəkarın ailəsi bildirir ki, pandemiya ilə əlaqədar olaraq onlar bir müddət məzarlığı ziyarət edə bilməyib. Qəbiristanda qəbirlərə qulluq edən bir kişi pulla bəstəkarın qəbrinə baxsa da, son dövrlər o, da xəstələnib yatağa düşdüyü üçün qəbir baxımsız qalıb.
Bir dəfə isə Asəf Zeynallının qəbir daşının üstündə bürüncdən barelyefi də oğurlanır. Bəstəkarın qardaşı oğlanları sonradan onun mərmərdən qəbirüstü abidəsini düzəltdirirlər.
***
Asəf Zeynallının adı birinci dəfə Üzeyir Hacıbəylinin təklifi ilə Azərbaycan Dövlət Konservatoriyasına verilib, lakin Üzeyir bəyin vəfatından sonra bəstəkarın ailəsinə təklif edilib ki, konservatoriyadan Asəfin adı götürülüb Musiqi texnikumuna verilsin.
Cəfər Cabbarlı ilə möhkəm dost olub, hətta tamaşalarının musiqi tərtibatını o verib. Cəfər Cabbarlı Asəfin ölümündən o qədər pis olub ki, üç gün dilinə çay-çörək dəyməyib. Özü də Asəfin cənazəsini aparanda adamlar Opera və Balet Teatrının qabağından keçirmiş. Teatrın orkestri balkona çıxıb musiqi ifa edib, yəni o cür ehtiramla yola salıblar.
***
Asəf Zeynallı ilə pianoçu Kövkəb xanım Səfərəliyeva bir-birlərini seviblər. Onlar bir sinifdə təhsil alıblar. Hətta Asəf hər dəfə Kövkəb xanım olan sinfə girəndə xanım ağlayırmış. Buna görə də Asəfin atası onu Kövkəb olan sinifdən çıxardır. Kövkəb xanımın da heç vaxt ərə getməməsi onların bir-birini sevməsini düşünməyə müəyyən əsaslar verir. Lakin, ailə üzvlərinin sözlərinə görə o, Leninqradda yarı alman, yarı rus olan bir qız sevirmiş. Onlar tez-tez məktublaşırmışlar.
Bu televiziya mövsümündə daha iki tanınmış sima yenidən aparıcılıq edəcək.
Onlardan biri aktyor Elməddin Cəfərov, digəri isə aktrisa Xəyalə Quliyevadır.
E. Cəfərov “Qısa qapanma” adlı şou ilə tamaşaçıların qarşısına çıxacaq. Veriliş həftədə bir dəfə ATV-də yayımlanacaq.
X. Quliyeva isə “Bir gün sizdə, bir gün bizdə” ilə aparıcı kimi efirə qayıdacaq. O, tamaşaçıları “Xəzər” TV-dən salamlayacaq. Sözügedən veriliş TV8-də yayımlanan “Yemekteyiz”in formatındadır. /Qafqazinfo
Aktyor Aras Bulut İynemli Türkiyə Cümhuriyyətinin qurucusu Mustafa Kamal Atatürkü canlandıracaq.
“Yol-xeber.az” xəbər verir ki, bu barədə jurnalist Ayşe Arman instaqramda bildirib.
O, layihənin “Lanistar Medya” tərəfindən hazırlandığını, ekran işinin rejissorunun Mehmet Ada Öztekin olduğunu bildirib.
Layihə 2023-cü ildə Türkiyə Cümhuriyyətinin 100 illiyi münasibətilə təqdim olunacaq.
Qeyd edək ki, A. B. İynemli tamaşaçılara daha çox “Öyle bir geçer zaman ki”, “Çukur” serialları, həmçinin “7. Koğuştaki mucize” filmindən tanışdır.
Koronavirusa yoluxmuş tanınmış jurnalist Elnur Əşrəfoğlunun vəziyyəti ağırdır.
Bu barədə “Yeni Klinika”dan məlumat verilib.
Bildirilib ki, Elnur Əşrəfoğlunun vəziyyəti ağır kritik olaraq qalmaqdadır.