 |
|
ABŞ-də son bir həftə ərzində COVID-19-dan xəstəxanaya yerləşdirilənlərin sayı 18,8%, xəstəlikdən ölənlərin sayı 21,4% artıb.
Bu barədə ABŞ-nin Xəstəliklərə Nəzarət və Qarşısının Alınması Mərkəzi məlumat yayıb.
Bildirilib ki, son bir həftədə ABŞ-nin 26 ştatında xəstəxanaya qəbullar artıb.
Cəmi bir həftə ərzində ABŞ xəstəxanalarına 15 minə yaxın COVID-19 xəstəsi yerləşdirilib.
İrəvan meriyasına seçkilərdən sonra Ermənistan baş naziri Nikol Paşinyan hökumətdə böyük “təmizləmə” aparacaq.
Bu barədə “Hraparak” qəzeti yazır.
“Bizim Nazirlər Kabinetindəki mənbələrimiz bildirir ki, ən azı beş nazir vəzifəsi ilə vidalaşacaq. Bəziləri əmək vəzifələrini lazımınca yerinə yetirmədiklərinə görə təyin etdiklər şəxslər narazılığa səbəb olub, bəziləri isə baş nazirin xəbəri olmayan korrupsiya sxemlərinə düşüb, belə deyək, yaxalanıblar. Seçkilərdən əvvəl onlara toxunulmur ki, hakim gücün reytinqi düşməsin.
Ötən gün yazmışdıq ki, bu siyahıya Ermənistanın ərazi idarəetmə və infrastruktur naziri Qnel Sanosyan da düşüb. Digər potensial namizədlər ətraf mühit naziri Akop Simidyan, ədliyyə naziri Qriqor Minasyan, əmək və sosial məsələlər naziri Narek Mkrtçyan və yüksək texnologiyalar sənayesi naziri Robert Xaçatryandır”, - nəşr yazır.
“Vaqner” özəl hərbi şirkəti qeyri-qanuni silahlı birləşməd idi və Yevgeni Priqojinin ölümündən sonra artıq mövcud olmayacaq”.
Bu sözləri Rusiya Dövlət Dumasının deputatı, general-leytenant Viktor Sobolev deyib.
“Vaqner” fəaliyyətini dayandıracaq. Döyüşçülər mülki şəxs kimi həyatlarına davam edə və ya Müdafiə Nazirliyi ilə müqavilə bağlaya bilərlər. Bu, qeyri-qanuni silahlı birləşmədir. Hansısa dövlətə tabe olmayan silahlı adamlar dövlətdə olmamalıdır. Nəticədə bu üsyana gətirib çıxardı. Biz vətəndaş müharibəsinin astanasında idik”, - deyə Sobolev bildirib.
Onun sözlərinə görə, Rusiya Müdafiə Nazirliyi ilə yalnız üsyanda iştirak etməyən muzdlular müqavilə bağlaya bilərlər.
Rusiya bu ilin sentyabrında Belarusla birgə keçirəcəyi “Qərb-2023” hərbi təlimlərini şəxsi heyətin və texnikanın çatışmazlığı səbəbindən ləğv edib.
Axar.az xəbər verir ki, bu haqda Böyük Britaniya kəşfiyyatı məlumat yayıb.
Digər bir səbəb kimi müharibə dövründə təlimlərin keçirilməsinə görə ölkə daxilində narazılığın meydana gəlməsi ehtimalı göstərilib.
Qeyd edək ki, bu yöndə sonuncu təlimlər ötən ilin dekabrında keçirilib.
Məşhur bir söz var: “Diplomatiya bitən yerdə müharibə başlar”. Bu gün Fransanın Azərbaycana qarşı apardığı siyasət bu aforizmi yada salır. Belə ki, Fransa prezidenti Emmanuel Makron son müsahibələrindən birində Laçın dəhlizi ilə bağlı məsələdə artıq diplomatik yolun bitdiyini bildirib. Belə çıxır ki, Fransa prezidenti Azərbaycana qarşı açıq-aşkar müharibə elan edib.Müharibənin bəhanəsi
Fransa özünün müharibə niyyətinə legitimlik donu geyindirmək barədə də düşünür. O, Laçın dəhlizi məsələsini yenidən BMT TŞ-nın toplantısına çıxarmaq və Azərbaycana qarşı sərt qətnamə qəbul olunmasına nail olmaq istəyir. Hər halda Fransanın dünyaca məşhur “Le Figaro” qəzeti bu barədə yazır. Nəşrin iddiasına görə, Fransanın təqdim etməyə hazırlaşdığı qətnamə layihəsində Azərbaycanın Laçın dəhlizinin blokadası səbəbindən aclıqdan ölmək ərəfəsində olan 120 minlik Qarabağ ermənisinə yardım göstərilməsi bəhanəsi yer alır. “2022-ci il dekabrın 12-də Azərbaycan ordusu Qarabağı bütün dünya ilə birləşdirən yeganə yolu bağlayandan bəri onun əhalisi, demək olar ki, yalnız ermənilər sınaqdan keçirilir”, - yazan məqalə müəllifi vurğulayır ki, Qarabağ sakinləri demək olar ki, hər gün Azərbaycan mərmisi altında, mühasirədədir və 3000 kvadrat kilometrlik əraziyə girmək, yaxud çıxmaq imkanından məhrumdurlar.
Qarabağ 2500 ildən çox imiş ki, erməni torpağıymış
Müəllif daha sonra xeyli irəliyə gedərək, Qarabağın 2500 ildən artıqdır ki, erməni torpağı olduğunu qeyd edərək yazır: “İki min il yarımdan çox tarixə malik bu erməni torpağı 1923-cü ildə Azərbaycan Sosialist Respublikasının tərkibinə daxil oldu. Qayğıdan, dərmandan, benzindən, yeməkdən, bəzən də işıqdan, sudan və internetdən məhrum olan, mütəmadi olaraq ətrafdakı azərbaycanlılar tərəfindən Qarabağa giriş-çıxışları əngəllənən erməni sakinləri ölürlər. Artıq bir neçə ölüm faktı qeydə alınıb: Artsax əhalisinin vəziyyəti bundan ibarətdir və onlar bu gün belə bir şəraitdə yaşamağa məcburdurlar”.
İlk həmlənin tarixi
Nəşrin iddialarından belə anlaşılır ki, Fransa Azərbaycana qarşı başlatdığı hibrid müharibəsində ilk addımı bu ayın son günlərində atacaq. Məqalədə deyilir: “Paris və Fransanın əsas regionları gələn həftə Ermənistana humanitar karvan göndərəcək”. Paris meriyası da nəşrin iddialarını təsdiqləyib və yük maşınlarının artıq Fransadan çıxdığını və sentyabrın sonunda Laçın dəhlizinə çatacağını bildirib.
Fransadakı Erməni Təşkilatlarının Koordinasiya Şurası (CCAF) isə “X” sosial şəbəkəsi vasitəsilə yaydığı bəyanatda daha dəqiq vaxt qoyub: “Humanitar yüklər sentyabrın 30-da, saat 12:00-da Laçın dəhlizində olacaq”.
Azərbaycan Fransaya qalib gələ bilərmi?
Bir sözlə, Fransanın Azərbaycana qarşı başlatdığı hibrid müharibənin ilk ciddi həmləsinin vaxtı belə müəyyənləşdirilib. Bəs, rəsmi Bakı bu hücuma hazırdırmı?
Əslində Azərbaycanın bu hibrid müharibəsində Fransaya qalib gəlmək şansları da az deyil. Rəsmi Bakının əlində iki güclü silahı var: beynəlxalq hüquq normalarının ölkəmizin xeyrinə olması və BMT TŞ-da təmsil olunan bir çox dövlətləri öz tərəfinə çəkmək potensialı.
Belə ki, 16 avqust tarixində BMT TŞ-da keçirilən müzakirələr zamanı Avropa ölkələrinin Zəngəzur dəhlizinə yerləşməsinin qarşısını almaq üçün Rusiyanın bizə daha yaxın mövqedən çıxış etdiyini hər kəs gördü. Rusiya böyük ehtimalla yenə eyni mövqeyini qoruyacaq.
Bundan əlavə, erməni mediasının iddiasına inansaq, ABŞ da həmin müzakirələr zamanı məxfi kulis söhbətlərində öz tərəfdaşlarına Azərbaycanın əleyhinə hər hansı qətnamə və bəyanatın çıxarılmamasına dair məsləhətlər və təlimatlar veribmiş.
Prinsip etibarilə, Çin də belə məsələlərdə adətən öz ağrımayan başına dəsmal bağlamaq niyyətində olmur. Çünki özünün də Tayvan kimi “Qarabağ problemi” var.
BMT TŞ-nın digər üzvü Böyük Britaniyanın da 44 günlük müharibə dövründə Fransanın bənzər təşəbbüsünü gözündə qoyduğu da bəllidir və yəqin ki, London yenə eyni mövqedən çıxış edə bilər.
Məlum olduğu kimi, BMT TŞ-da bütün qərarlar konsensus yoluyla qəbul edilir və Azərbaycan diplomatiyasının bu münbit şəraitdən faydalanaraq, Fransanın bəd niyyətini beşikdəcə boğmaq imkanları mövcuddur. Və yəqin ki, bu imkanlardan yetərincə istifadə də olunacaq. Ancaq onu da etiraf etməliyik ki, bu diplomatik uğurlar bizim öz qabiliyyətimizin nəticələri deyil. Hələ ki, bir çox ölkələrin maraqları bizimlə eyni nöqtədə birlədiyindən bəzi kövrək qələbələr qazana bilirik.
Fəqət erməni diplomatiyası gecə-gündüz dayanmadan əleyhimizə iş aparır və beynəlxalq arenada əleyhimizə rəylər formalaşdırır. Əslində Fransanın Azərbaycana qarşı planlaşdırdığı son hücumu da bu məqsədə qulluq edir. Bu isə gələcəkdə beynəlxalq birliyin mövqeyinin dəyişməsinə gətirib çıxara bilər və rəsmi Bakı öz tərəfdaşlarının gündəlik himayəsinə bel bağlamamalıdır. Atalar demişkən, “qonşuya ümid olanın şamsız qalma” ehtimalı da var.
Heydər Oğuz - ovqat.com
Separatizmdən əziyyət çəkən Kanada nədən erməni separatizminə dəstək verir?“Demokrat”ların tarixi səlib yürüşü siyasəti
Kanadanın xarici işlər naziri Melanie Jolynin (Mélanie Joly) Qarabağa Artsax deməyi Azərbaycan tərəfindən ciddi təpki ilə qarşılandı. Bu məsələ Kanada mediasında da diqqətini çəkib. Məsələn, mərkəzi ofisi Tarontada olan ingilisdilli “calgaryherald.com” saytı “Melanie Joly accused of undermining peace, supporting Azerbaijan separatists with 'unacceptable' comments
In a recent speech, Joly referred to the region as Artsakh, a term used by ethnic Armenians who want the area to secede from Azerbaijan” (Melani Joly sülhə xələl gətirməkdə, “qəbuledilməz” şərhlərlə Azərbaycan separatçılarını dəstəkləməkdə ittiham olunur
Joly son çıxışında bölgəni Artsax adlandırıb, bu termin ərazinin Azərbaycandan ayrılmasını istəyən etnik ermənilər tərəfindən istifadə olunur) adlı məqalə ilə çıxış edib. Məqalənin başlığında və yarımbaşlığında deyilən fikirlər xüsusi diqqətə layiqdir.
Məqalədə deyilir ki, Kanada da Ermənistanda fəaliyyət göstərən Avropa müşahidəçilərinə qoşulmaq üçün iki nəfər göndərmək fikrindədir. Guya bu qrup Azərbaycanla Ermənistan arasında müharibənin qarsısın alınmasında ciddi iş görür. Bundan başqa Melanie Jolynin Dağlıq Qarabağ məsələsini G20 (İyirmilər qrupu — 19 ölkəni və Avropa İttifaqını (Aİ) birləşdirən hökumətlərarası forumdur), G7 (Kanada, Fransa, Almaniya, İtaliya, Yaponiya, Böyük Britaniya və ABŞ; əlavə olaraq, Avropa İttifaqı (Aİ) “sadalanmayan üzvdür”) və BMT-də qaldırmaq fikrindədir: "Region, xüsusən də Artsaxdakı ermənilər real təhlükə ilə üz-üzədir", - Joli bildirib. “Biz Artsax məsələsini əlimizdə olan hər bir diplomatik vasitə ilə müzakirəyə çıxarmalıyıq”.
Melanie Jolyn 2021-ci ilin oktyabrın 26-da Kanadanın xarici işlər naziri təyin olunub. Bu xanım adından da göründüyü fransızdilli kanadalıdır. O da sirr deyil ki, Kanadada yalnız fransız dilinin rəsmi dil olduğu yeganə əyalət Kvebekdir. Fransada Beşinci Respublikanın əsasını qoyan Şarl de Qoll (1959-1969) Kvebeki Kanadadan ayırmaq üçün özü şəxsən 1967-ci ildə Kanadanın Montreal şəhərində “Vive le Québec libre!” (Kvebekə azadlıq!) şüarı səsləndirdi. Ancaq ingilisdilli Kanada, ABŞ və Böyük Britaniya əl-ələ verib Şarl de Qollun üzərinə elə yeridi ki, o, özünə bəraət qazandırmaq üçün min cür bəhanə uydurmalı oldu. Yəni nazir xanım belə bir keçmişi olan farnsızdilli Kandanın separatçı ruhunun təmsilçisidir.
Diqqət edin, bu xanım Ukraynada Rusiyanın müdafiə etdiyi separatçı “respublikalar”a qarşı çıxır. O, 2022-ci ildə Ukraynada olub. Kanadanın Ukraynanın ərazi bütövlüyünə verdiyi dəstəkdən danışıb. Deməli, Kanada Ukraynada Rusiyanın dəstək verdiyi separatizmə qarşı digər Qərb ölkələri ilə birlikdə eyni cəbhədə yer alır. Ancaq elə həmin Kanada Rusiyanın Cənubi Qafqazda dəstək verdiyi erməni separatizmini müdafiə edir. Haqlı olaraq ortaya belə bir sual çıxır? Separatizmin də yaxşısı, pisi var? Yoxdursa Kanada niyə belə ikiüzlü siyasət yeridir?
Kvebekdəki separatizmə toxunduq. Azərbaycanda Kanadanın bu bölgəsi xeyli məşhurdur. Ancaq Kvebek Kanadanın separatizmə meylli olan yeganə əyaləti deyil. Kanadada bizim az tanıdığımız xeyli separatçı hərəkatlar var. Məsələn, adların ingilis dilində təqdim etdiyim bu hərəkatlar oratadadır: Newfoundland & Labrador, Nova Scotia, Western Canada, Alberta, Manitoba, British Columbia and Yukon, Cascadia, Republic of Madawaska, Republic of Rathnelly. Bu qədər separatçı hərəkata meydan olan Kanada dünyanın o başından Cənubi Qafqazda erməni separatçılarına dəstək verir. Hansı məntiqlə? Demokratik yanaşma separatizmi rədd edir. Deməli, ortada başqa amil var. Bu amil xristian fundamentalizmi deyil ki? Bəs deyirsiniz ki, biz demokratıq? Belə çıxır ki, demokrat adı altında tarixi səlib yürüşü siyasətini davam etdirirsiz...
Təəssüf ki, nə Azərbaycanın xarici işlər naziri, nə də ki, Xarici İşlər Nazirliyi bu kimi məqamları Kanada rəsmilərinin diqqətinə çatdırmırlar. Niyəsini mən bilmirəm. Ancaq belə şeyləri mütləq vurğulamaq lazımdır. Hətta bu kimi faktların dilə gətirlməsi Kanadanın özündə də Azərbaycana simpatiya qazandırardı. Çünki Kanada separatizmin nə olduğunu hələ uzaq 1967-ci ildə yaşayıb. Xatırladım ki, Şarl de Qollun həmin çıxışı bütün dünyada geniş rezonans doğurmuşdu.
Dünyada 200-dən artıq ölkə var. Ən azı 180 dövlətdə separatizm bu və ya digər miqyasda mövcuddur. Keçən dəfə vurğulamışdım: Dünyanın ən varlı, ən demokratik ölkələri sırasında öndə gələn İsveçrədə belə 4 separatçı hərəkat var. ABŞ-ın özündə belə 10 separatçı mərkəz fəaliyyət göstərir...
Bir maraqlı məqam da var. Belçikanın xarici işlər naziri olan Xədicə Labib bugünlərdə ermənipərəst mövqe sərgilədi. Halbuki Gürcüstanın ərazi bütövlüyündən dəm vurmuşdu. Maraqlıdır ki, Belçikanın gələcək xarici işlər naziri 2021-ci ildə (o, 2022-ci ilinin iyunun 21-də nazir təyin olunub) işğal olunmuş Krıma Rusiyadan daxil olmuşdu. Vladimir Putinin qızı Katerina Tixonovanın təşkilatçılığı ilə keçirilən "Qlobal Dəyərlər" festivalında iştirak etmişdi.
Təqdim etdiyim xəritəyə diqqətlə baxın. Şimali Amerika dövlətlərindəki separatçı hərəkatların istək və arzuları bu xəritədə öz əksini tapıb. Gördüyünüz kimi, separatizm qalib gəlsə, Kanada, ABŞ, Meksika, eləcə də yerdə qalan ölkələr darmadağın olacaq.
Heç narahat olmayın. Separatizm təkcə Azərbaycanın yox, bütövlükdə çağdaş dünyanın problemidir.
Bir məqama da toxunmaq gərəkir: Kanadanın xarici işlər naziri Ukraynanın ərazi bütövlüyün tanıyır. Belçikanın xarici işlər naziri isə bir vaxt Krımı Rusiya ərazisi hesab edirdi. Yəni Qərbdə də əcaib işlər baş verir. Biz Azərbaycan olaraq Qərbin bu kimi yaramazlıqlarını bir-bir ortaya qoymalıyıq. Azərbaycan bu kimi arqumentləri ən yüksək tribunalardan səsləndirməlidir. Özü də son dərəcə qərarlı şəkildə.
Elbəyi Həsənli, Sürix
Çin prezidenti Si Cinpin Sincan Uyğur Muxtar Bölgəsinə səfəri zamanı bölgənin yerli hakimiyyət orqanlarından "islamın çinliləşməsini daha dərindən təşviq etməyi" tapşırıb.
Yerli hökumət nümayəndələrinə bu bölgədə qeyri-qanuni dini fəaliyyətlərə effektiv nəzarət etməyə çağırıb.
2022-ci ildən müsəlman uyğur türklərinin çoxluq təşkil etdiyi Sincanda səfərdə olan Si Cinpin muxtar bölgənin paytaxtı Urumçidə çıxış edib.
Terrorçuluq və separatizmlə mübarizənin gücləndirilməsini tələb edən Çin prezidenti qanuna hörmət prinsipi ilə ictimai sabitliyin artırılmasının zəruri olduğunu bildirib.
BMT və digər beynəlxalq insan haqları təşkilatları Çini muxtariyyətdə müsəlmanları təqib etməkdə və insan haqlarını ciddi şəkildə pozmaqda ittiham edir.
“Ermənistanın xarici siyasəti Cənub, Şimal və Şərqə yönəlməlidir”.
KONKRET.az xəbər verir ki, belə fikirlə erməni politoloq Qriqor Balasanyan çıxış edib.
O bildirib ki, İran, Rusiya və Çin İrəvanın əsas xarici siyasət istiqamətləri olmalıdır. Çünki bu üçbucaqda Ermənistanın bir dövlət kimi xilası var.
“Qərb beş il ərzində göstərdi ki, etibarlı tərəfdaş ola bilməz. Bu, Fransaya da aiddir. Çünki bu ölkə 2020-ci ilin iyulunda düşmənin 44 günlük müharibə zamanı istifadə etdiyi peykləri Azərbaycana satıb. Avropanın bizi qorumaqda marağı sıfırdır. Azərbaycanı qorumaq üçün isə çoxlu motivlər var. İlk növbədə bu mavi yanacaqdır, ona görə ki, qarşıda qış gəlir”.
Balasanyanın fikrincə, Azərbaycan öz siyasətini ardıcıl olaraq həyata keçirir.
“Dağlıq Qarabağ məsələsində anakonda üsulundan istifadə edir, qurbanı təslim olana qədər sıxır. Belə bir siyasətin məqsədi odur ki, hakimiyyət sadəcə təhlükədən qurtulmaq üçün hər şeyi verməyə hazır olsun”.
Eyni zamanda, Balasanyanın sözlərinə görə, Ermənistan tərəfdən heç kim Azərbaycanın planlarının həyata keçirilməsinə mane olmur.
“Ermənistan qurban mövqeyini tutub deyir ki, mənimlə nə istəyirsən et. Əliyev artıq planlaşdırılanın 70%-ni alıb, 30%-i qalıb, belə davam etsə, o, 30%-ni də alacaq. Çünki Əliyevin arxasında Qərb dayanır, ermənilər isə hələ də Qərbdən dəstək gözləyirlər”, – deyə ekspert qeyd edir.
Göründüyü kimi, revanşist ermənilərin sərsəm şərhləri davam edir.
Ukrayna müdafiə nazirinin müavini Anna Malyar cənub cəbhəsindəki Robotin kəndini rus qoşunlarından azad etdiklərini bildirib.
AA xəbər verir ki, Malyar cəbhədəki vəziyyətlə bağlı bəyanatı Ukrayna Müdafiə Nazirliyinin Hərbi Mətbuat Mərkəzinin sosial media hesabında paylaşıb.
"Robotin xilas edilib və qoşunlarımız qəsəbənin cənub-şərqinə doğru irəliləyir. Ukrayna ordusu şərq cəbhəsində Baxmut istiqamətində irəliləyişini davam etdirir. Keçən həftə orada daha 1 kvadrat km ərazi azad olunub",- deyə o əlavə edib.
Malyar qeyd edib ki, indiyədək Baxmut istiqamətində ümumilikdə 44 kvadrat kilometr ərazi geri qaytarılıb.
Türkiyə və Rusiya prezidentləri Rəcəb Tayyib Ərdoğan və Vladimir Putin arasında gözlənilən danışıqlar taxıl müqaviləsinin gələcəyinə böyük ölçüdə aydınlıq gətiriləcək.
Bu barədə “ria.ru”ya diplomatik mənbələrdən birldirilib.
Agentliyin həmsöhbətinin sözlərinə görə, Türkiyənin bütün müvafiq qurumları bu istiqamətdə iş aparır. Eyni zamanda bildirilib ki, proses BMT ilə koordinasiya olunur və bu qurum da danışıqlar prosesini izləyəcək.
Mənbə danışıqların konstruktiv olacağına və Qara Dəniz Taxıl Təşəbbüsünün işinin bərpası üçün imkanların açılacağına ümid etdiyini bildirib.