 |
|
Ukraynada müharibə davam edir və Rusiya Vladimir Putinin imperiya fantaziyaları ucbatından böyük itkilər verir. Rusiyanın Ukraynaya genişmiqyaslı işğalı zamanı 350 minə yaxın rus əsgəri öldürülüb və ya yaralanıb.
Qaynarinfo xəbər verir ki, bunu ABŞ-ın müdafiə naziri Lloyd Ostin Almaniyadakı aviabazada keçirilən Ukraynanın müdafiəsi üzrə təmas qrupunun (Ramşteyn-24) iclasının əvvəlində deyib.
ABŞ-ın müdafiə naziri əmin edib ki, "50-yə yaxın xeyirxah məramlı ölkədən ibarət koalisiya Ukraynanı dəstəkləmək üçün vahid və möhkəm qalacaq. Və bu gün biz Ukraynaya dəstəyimizi artırmaq üçün daha da səylə çalışacağıq”, - Ostin bildirib.
O əlavə edib ki, bu gün Ramşteyn formatında görüş dinamik bir vaxtda keçirilir. "Ukrayna döyüş meydanında təşəbbüsü ələ keçirməkdə davam edir. Ukrayna qoşunları hazırda Rusiyanın Kursk vilayətində əməliyyat keçirir. Kremlin işğalçı ordusu indi öz ərazisində müdafiəyə qalxır. Amma biz bilirik ki, Putinin qəzəbi dərindədir. Moskva Ukraynanın şərqində və xüsusilə Pokrovsk ətrafında hücumlarını davam etdirir. Putin öz qoşunlarını yenidən Kursk bölgəsinə yerləşdirəcək. Kreml Ukrayna şəhərlərini bombalamağa və Ukraynanın mülki əhalisini hədəfə almağa davam edir. Bu, insanı qəzəbləndirir", - Ostin deyib.
Eyni zamanda, ABŞ Müdafiə Nazirinin əlavə etdiyi kimi, "Rusiya Vladimir Putinin imperiya fantaziyaları ucbatından böyük itkilər verir”. Onun məlumatlarına görə, Putinin Ukraynaya genişmiqyaslı işğalına başladıqdan sonra 350 mindən çox rus əsgəri həlak olub və yaralanıb. 24 fevral 2022-ci ildən Ukrayna Silahlı Qüvvələri 32 Rusiya gəmisini batırıb, məhv edib və ya zədələyib. Ukraynalılar rusları Krımdan bütün vacib gəmiləri geri çəkməyə məcbur edib. Rəsmi bildirib ki, ukraynalılar Rusiyanın 97 döyüş təyyarəsini də məhv edib.
Respublikaçılar Partiyasından prezidentliyə namizəd Donald Tramp demokrat rəqibi Kamala Harrisi dəstəkləyən Vladimir Putinin sözlərinə necə reaksiya verəcəyini bilmədiyini bəyan edib.
Bunu Donald Tramp Nyu York İqtisadi Klubda çıxışı zamanı qaldırıb.
“Putin danışdı. Kamalanı dəstəklədi... Bu barədə dəqiq nə deyəcəyimi bilmirəm. Bilmirəm, incimişəm, yoxsa o mənə yaxşılıq edib”, – Tramp deyib.
Sentyabrın 5-də cənab Putin deyib ki, ABŞ-də keçiriləcək seçkilərdə Kremlin favoriti hazırkı prezident Co Bayden olub. "Bununla belə, o, prezidentlik yarışından imtina edib və vitse-prezident Kamala Harrisi dəstəkləməyə çağırıb. Kreml bunu edəcək", - Rusiya prezidenti əmin edib. Onun sözlərinə görə, xanım Harrisin ifadəli və əcaib gülüşü sanki hər şeyin yaxşı olduğunu göstərir.
Ağ Evin Putinə cavabında isə bildirilib ki, əgər Vladimir Putin ABŞ-dəki prezident seçkiləri ilə bağlı danışmağı dayandırsa, minnətdar olardıq.
Dünya şöhrətli azərbaycanlı professor Məsud Aşina miqren xəstəliyinin dərmanını tapıb. O, bu nəticəni bir qrup alimlə birlikdə əldə edib.
Musavat.com xəbər verir ki, bu barədə Avropa mediasında yayılan məlumatda bildirilir ki, hipofiz adenilat siklazı aktivləşdirən polipeptidin (PACAP) hədəflənməsi miqrenin müalicəsi üçün yeni bir yoldur.
Məsud Aşina 29 dekabr 1965-ci ildə Bakıda doğulub. Kopenhagen Universitetinin nevrologiya üzrə professor və baş məsləhətçisi, Beynəlxalq Baş ağrıları Cəmiyyətinin rəhbəri və İnsan Miqreni Araşdırma Birliyinin direktorudur.
Məsud Aşina dünyanın ən yaxşı on miqren mütəxəssisindən biri hesab olunur.
Onun vətənpərvər keyfiyyətləri də xüsusi qeyd olunmalıdır. Otuz ildən çoxdur Vətəndən uzaqda yaşamasına baxmayaraq, onunla əlaqəni heç zaman kəsməyib. Azərbaycanın ən kritik anlarında dövlətinin yanında olub. "YAŞAT” Fondunun işində yaxından iştirak edir. Məsud Aşina "YAŞAT” Fondunun Himayəçilik Şurasının üzvüdür.
Məhkəmə teleqramın təsisçisi Pavel Durovun 6 ay müddətinə Fransanı tərk etməsinə qadağa qoyub.
"Bu barədə "Paris Match" məlumat yayıb.
Qeyd olunur ki, Durov hazırda Parisin ən yaxşı məhəllələrində mənzil axtarır. O, bu həftənin sonunda yeni evə köçə bilər.
Xatırladaq ki, ötən ayın sonunda Parisin Le Burje hava limanında saxlanılan Pavel Durov 5 milyon avro girov müqabilində azadlığa buraxılıb. İş adamı 12 maddə üzrə cinayətlərdə iştirakda şübhəli bilinir. Ondan həftədə iki dəfə polis idarəsinə gəlmək tələb olunur. İddialara görə, Paveli 10 ilə qədər həbs gözləyir. Fransa Pavelin qardaşı, teleqramın əsl yaradıcısı adlandırılan Nikolay Durovu da axtarışa verib.(Axşam.az)
ABŞ-nin "NBC News" telekanalına müsahibə verən Ukrayna Prezidenti Volodimir Zelenski bəyan edib ki, onun beş bəndlik qələbə planı var.
Planın bəndlərindən biri də Ukrayna Silahlı Qüvvələrinin Rusiyanın Kursk vilayətində keçirdiyi əməliyyatdır.
Zelenski qeyd edib ki, öz planını hələ ABŞ Prezidenti Co Baydenə təqdim etməyib, çünki indiyədək Ukrayna Silahlı Qüvvələrinin Kursk vilayətindəki uğurunu gözləyib.
Kursk əməliyyatının əsl mahiyyətini izah edən Zelenski gözlənilməz etiraf edib. Onun sözlərinə görə, Ukrayna ordusu Qərbin diqqətini silah təchizatında, xüsusilə artilleriya mərmilərindəki çatışmazlığa cəlb etmək üçün qeyri-ənənəvi addım atmalı idi.
Zelenskinin fikrincə, Ukrayna Silahlı Qüvvələri öz məqsədlərindən birinə nail ola bilib və Rusiya ordusu Ukraynadakı cəbhələrdən 60 min hərbçini çıxarıb.
Dövlət başçısı bəyan edib ki, onun qələbə planı beş bənddən ibarətdir, lakin o, bu bəndləri daha ətraflı açıqlamaqdan imtina edib.
"Dördü bizə lazım olan şeydir, biri isə müharibədən sonradır", - deyən Ukrayna prezidenti əlavə edib ki, Qərb müttəfiqləri bu işdə kömək edə bilərlər.
Eyni zamanda o, etiraf edib ki, Rusiyasız sülhə nail olmaq mümkün deyil.
"Biz başa düşürük ki, Rusiya tərəfi olmadan bu müharibəni diplomatik yolla bitirmək çox çətindir. Və bütün ölkələr bizdən xahiş etdilər ki, ikinci sammitdə Rusiya Federasiyasının nümayəndələri də olsun. Dedik ki, biz bunun əleyhinə deyilik, gəlin plan hazırlayıb onları çağıraq", - Zelenski bildirib.(Oxu.az)
Polşa Prezidenti Andjey Duda ölkənin Baş naziri Donald Tusku Rusiya kəşfiyyat xidmətləri ilə əməkdaşlığı davam etdirməkdə ittiham edib.
Bu barədə TVN24 məlumat yayıb.
"Polşa Hərbi Əks-Kəşfiyyat Xidməti ilə Rusiya FTX arasında əməkdaşlıq müqaviləsi 2012-ci ildə imzalanıb.
Bu, cənab Baş nazir Tusk hakimiyyətdə olanda baş verib və o, bu sövdələşməyə razı olub. Polşa və Rusiya kəşfiyyat xidmətləri arasında bu əməkdaşlıq hələ də davam edirmi? Çünki belə görünür",- o bildirib.(axar.az)
Yaxın Şərqdə müharibənin coğrafiyası genişlənərsə, o zaman bölgədə yaşayan ermənilər atəş altında qalacaq.
Bunu “Nairi” İsrail Erməniləri İttifaqının rəhbəri Artem Çernamoryan deyib.
“Müharibənin Yaxın Şərqdə yaşayan erməni icmaları üçün təbii ki, çox ciddi nəticələri olacaq. Xüsusən də Livandakı erməni təşkilatlarını, qəzetlərini, təhsil mərkəzlərini və kilsələrini təhlükə gözləyir. Müharibə erməni icması üçün çox ağır zərbə olacaq", - o qeyd edib.
O əlavə edib ki, İsraildəki erməni icması sayına görə Livanla müqayisə oluna bilməsə də, problemlər eynidir.
Ermənistan dövlətçiliyini qurmaq yolu ilə gedir və bu işdə Avropa bizə kömək etsə də, Rusiya mane olur.
Bunu Ermənistanın hakim “Vətəndaş müqaviləsi” partiyasından olan deputatı Akop Aslanyan deyib.
Onun sözlərinə görə, Rusiya Ermənistanda öz hakimiyyətinin bərqərar olmasına nail olmaq, “Zəngəzur dəhlizi” adlanan ərazini əldə etmək və bununla da bütün məsələləri bağlamaq istəyir. “Rusiya Ermənistanı müstəqil dövlət kimi görmək istəmir. Avropa isə bizə bu yolda kömək edəcək. Bütün fərq budur. Bəziləri bizə kömək edir, bəziləri isə mane olur”, - o əlavə edib.
Rusiya ordusu sentyabrın 4-ü səhər saatlarında Ukraynaya növbəti raket və PUA hücumu həyata keçirib.
Əsas hədəf Ukraynanın Lvov və Krivoy Roq şəhəri olub.
Hücum nəticəsində əsasən dəmiryol stansiyanın ərazisində yaşayış binaları yanıb. Aralarında bir neçə uşaq olmaqla xeyli sayda ölən olub. Ölənlərin sayı artmaqda davam edir. Son məlumata görə ölənlərin sayı 10-a çatır. 25 nəfərin isə yaralandığı bildirilir. Onların bir çoxunun vəziyyəti ağırdır.
Hücum nəticəsində bir sıra istiqamətə qatarların yola salınmasında gecikmə yaranıb.
Krivoy Roq şəhərinə atılan raketlər şəhər mərkəzinə düşüb və nəticədə 10-dan çox çoxmərtəbəli binaya ziyan dəyib, 5 nəfər isə xəsarət alıb.
Ukrayna xarici işlər naziri Dmitri Kulebanın istefa vermək qərarına gəlib və o bununla bağlı Ali Radaya müraciət edib.
Bu barədə Ukrayna Ali Radasının spikeri Ruslan Stefançuk bildirib.
"Parlament ölkənin xarici işlər naziri Dmitri Kulebanın istefası ilə bağlı bəyanat alıb. Müraciətə qarşıdakı plenar iclaslardan birində baxılacaq", - spiker "Facebook"da yazıb.
Dmitri Kuleba 4 mart 2020-ci ildə Ukrayna Xarici İşlər Nazirliyinə rəhbərlik edib. “Ukrayinska pravda” mənbələrinin məlumatına görə, yeni xarici işlər naziri onun birinci müavini, aprel ayından departamentdə çalışan Andrey Sibiqa ola bilər.
Qeyd edək ki, sentyabrın 3-də Ukrayna prezidenti Zelenski öz ofisinin rəhbərinin müavini Rostislav Şurmanı işdən çıxarıb. Baş nazirin Avropa və Avro-Atlantik inteqrasiya üzrə müavini Olqa Stefanişina və reinteqrasiya üzrə baş nazirin müavini İrina Vereşçuk istefa veriblər. Daha üç nazir də istefa məktubu yazıb .