 |
|
ABŞ-ın SEPAH-ı terror təşkilatları siyahısına daxil edərək digər ölkələri oraya qoşulmamağa səsləməsi Vaşinqtonun sanksiya siyasətinin davamıdır.
Bu sözləri Axar.az-a ABŞ-ın SEPAH-ı terror təşkilatı elan etməsini şərh edən “Baku Netvörk” Ekspert Şurasının rəhbəri, fəlsəfə doktoru Elxan Ələsgərov deyib. Politoloq bildirib ki, ABŞ məqsədi İran rejiminin əsas sütunlarından biri olan SEPAH-ı yox etməkdir:
“ABŞ-ın SEPAH-ı terror təşkilatları siyahısına daxil edərək digər ölkələri oraya qoşulmağa səsləməsi Vaşinqtonun sanksiya siyasətinin davamıdır. ABŞ və İranın Suriyadakı maraqları toqquşur. İran Rusiya ilə bir, ABŞ isə bəzi ərəb ölkələri ilə digər antiterror koalisiyasının üzvüdür. Bu iki koalisiya üzvlərinin terrora baxışları xeyli fərqlənir. İran və Rusiya Suriya rejimini və qanuni hökumətini dəstəkləyir, ABŞ isə müxaliflərə dəstək verir. Bu mənada ABŞ-ın İran siyasəti birbaşa Suriya ilə bağlı məsələlərdən qaynaqlanır”.
Ekspertin fikrincə, ABŞ-ın SEPAH-ı terror təşkilatı elan etməsi həm də bir növ İsrailə dəstəkdir:
“ABŞ Qolan təpələrini təsadüfən İsrail ərazisi kimi tanımadı. İsrail İranı Hizbullaha yardım etməkdə və Təl-Əvivə qarşı hərbi əməliyyatlar hazırlamaqda ittiham edir. ABŞ da İranı Suriyada İsrailə qarşı çıxış etdiyinə görə cəzalandırır”.
Politoloq SEPAH-a qarşı sanksiyaların ABŞ-la İran arasında hələlik ciddi hərbi qarşıdurmaya səbəb olacağına inanmır:
“Çünki ABŞ-ın İran İslam İnqilabı Keşikçiləri Korpusuna qarşı sanksiyaları yeni deyil. Ancaq gərginlik artarsa, vəziyyət hər an dəyişə bilər”.
Qeyd edək ki, ABŞ Prezidenti Donald Tramp İran İslam İnqilabı Keşikçiləri Korpusunu (SEPAH) terror təşkilatı elan edib.
Rəsmi Tehran da bu qərara adekvat olaraq ABŞ Silahlı Qüvvələrini terror təşkilatı kimi tanıyıb.
Venesuela hökuməti Amerika Dövlətləri Təşkilatını (ADT) tərk etmək qərarı verib.
Axar.az xəbər verir ki, buna səbəb ADT-nin Venesuela müxalifətinin lideri Xuan Quaidonun nümayəndəsini təşkilatdakı təmsilçisi kimi tanıması olub.
Qərarda deyilib ki, bu şantaj və gərginliyi artıracaq addımdan dolayı ölkə 27 aprel 2019-cu il tarixində təşkilatdan çəkiləcək.
2019.04.09. 09:45
İsrail parlament seçkisinə start verilib.
Axar.az xəbər verir ki, seçkidə 6,34 milyon seçicinin 10.460 seçki məntəqəsində yerli vaxtla səhər saat 07:00-dan 22:00-a qədər səs verəcəyi bildirilib.
Seçkidə əsas mübarizənin Likud Partiyası ilə mərkəzçi Kaxol-Lavan Bloku arasında gedəcəyi güman edilir. Belə ki, hər iki siyasi qüvvə baş nazir kürsüsünü ələ keçirməyə çalışır. Likud bu vəzifəyə yenidən Benyamin Netanyahunun, Kaxol-Lavan isə Baş Qərargahın keçmiş rəisi Beni Qantsın gətirilməsini istəyir.
Maraqlıdır ki, hər iki siyasi qüvvənin təhlükəsizlik və xarici siyasətlə bağlı mövqeləri demək olar ki, fərqlənmir, lakin daxili siyasət və ictimai həyata baxışda Kaxol-Lavan daha liberal mövqe tutur.
120 yer olan Knessetə (parlament) ümumilikdə 39 partiya və blokdan namizəd irəli sürülüb. İsrail qanunvericiliyinə əsasən, partiyaların parlamentə düşməsi üçün minimum 3,25% səs toplaması gərəkdir. Buna isə 39 siyasi qüvvədən 13-14-nün nail biləcəyi ehtimalı var.
Qeyd edək ki, Knesset tarixində indiyə qədər heç bir partiya parlamentdə yarıdan çox - 61 mandata sahib olmayıb.
***
Sağ blok Likud Partiyasının başçılığı ilə açıq-aşkar qələbə qazanıb.
Bu sözləri İsrail Baş naziri Benyamin Netanyahu Tvitter mikrobloqunda yazıb.
“Göstərilən etimada görə İsrail vətəndaşlarına təşəkkür edirəm. Bu gün axşam bizim tərəfdaşlarla hökuməti qurmağa başlayacağam", - deyə baş nazir bildirib.
Qeyd edək ki, Beni Qants da qələbə qazandığını elan edib.
***
“Ekzit-poll” nəticələrinə əsasən, Baş nazir Benyamin Netanyahunun Likud Partiyası ilə Kaxol-Lavan Blokunun səsləri təxminən eynidir. Amma hazırkı hakimiyyətin koalisiya qurmaq şansı daha böyükdür.
“Kan” teleşirkətinin seçki məntəqələrinin qarşısında keçirdiyi sorğuya əsasən, Likud Partiyası parlamentdəki 120 yerdən 36-nı qazanıb, Kaxol-Lavan Bloku isə 37 yerə sahiblənib. 12-ci və 13-cü kanalın sorğusuna əsasən isə Likud 33-37 yer ala bilər.
“Kan” Netanyahu koalisiyasının 64 deputat toplaya biləcəyini elan edib.
ABŞ dünyada terrorizmin yayılmasında lider rolunu oynayır.
Axar.az xəbər verir ki, bunu İran Prezidenti Həsən Ruhani deyib. Onun sözlərinə görə, Vaşinqtonun SEPAH-ı terror təşkilatı kimi tanıması ciddi səhvdir.
O, bu addımın SEPAH-ın İran xalqı arasında populyarlığını artıracağını bildirib.
Ruhani məhz ABŞ-ın Yaxın Şərqdə terrorizmin inkişafına yardım etdiyini deyib.
Seçkilər öncəsi İsrail Baş naziri Benyamin Netanyahuya hədiyyə verildi.
Axar.az xəbər verir ki, bu sözləri İran Xarici İşlər naziri Məhəmməd Cavad Zərif ABŞ-ın SEPAH-ı terror təşkilatı elan etməsini şərh edərkən yazıb.
“ABŞ regionda daha bir təhlükəli yanlış məcraya atıldı”, - deyə XİN rəhbəri bildirib.
Qeyd edək ki, ABŞ-ın SEPAH-ı terror təşkilatı elan etməsinə cavab olaraq İran Ali Milli Təhlükəsizlik Şurası da bu ölkənin Silahlı Qüvvələrini terror təşkilatı elan edib.
Birinci tur prezident seçkilərinin nəticələri mənim üçün “xəstə dərs” oldu.
Axar.az xəbər verir ki, bu sözləri Ukrayna Prezidenti Pyotr Poroşenko deyib.
Qeyd edək ki, Pyotr Poroşenko və şoumen Vladimir Zelenski seçkilərin ikinci turunda mübarizə aparacaqlar.
14 yaş özlüyündə psixoloji dəyişimin sevgi, əyləncə, özünütəsdiq, eqoistlik, fərqlilik, nəzarətdən qaçma, yasaqlara meyil və s. ən sərt qaydalarını uşaqlara yoluxdurur.
Kult.az xəbər verir ki, bu sözləri millət vəkili Fazil Mustafa 162 nömrəli tam orta məktəbin 8-ci sinif şagirdinin intihar etməsi ilə bağlı yazılanlara münasibət bildirərkən deyib. O, məktəblinin intiharında bir faktorların rolu olduğunu bildirib:
“Doğrudur, “günahkar kimdir” sualının cavabını hüquqi anlamda istintaqın gedişi müəyyən edəcək. Ancaq anlaşılan bir gerçək var ki, evdə də, məktəbdə də mənəvi mühit arzuolunan səviyyədə deyil. Əlbəttə, dünyagörüşü məhdud bir direktorun ifadələri "günah keçisinin" varlığı barədə ictimai təskinliyi qismən yaratmış oldu, ancaq yenə də bir sual açıq qaldı ki, bu direktor olmasaydı, intihar baş verməyəcəkdimi? Bu intiharda Nobel mükafatı laueratı Markesin məşhur "Gözlənilən bir qətlin tarixçəsi" əsərinin süjetini doğrudanmı xatırlamadınız? Uşaq məktəbə virusu ailədən daşıyır. Boşanmaların sayının artmasından, narkomaniyanın, alkoqolizmin, əxlaqsızlığın bir qisim ailələrin içində şaxələnməsi səbəbinə görə bu virusun uşaqlara necə yoluxmasından xəbərsizikmi? Eyni zamanda uşaq məktəbdən virusu ailəyə daşıyır. Savadsız direktor, məktəbə, bağçaya sadəcə iş yeri kimi baxmağa məhkum edilmiş ideyasız müəllim çoxluğundan xəbərsizikmi? Ailə başçısı ilə məktəb başçısı, habelə sinif başçısı bir çox hallarda uşaq üçün yaxşı və ya pis mənada oxşar obrazlardır. Azərbaycanda bu gün ailə dəyərləri də, məktəb dəyərləri də mənəvi kateqoriya olmaqdan çıxıb, statistik meyarlara calaq edilib. 2 uşaq, 100 manat müavinət, 4 repititor, 12 illik təhsil, 1-ci ixtisas, 450 bal və s.”
Millət vəkili qeyd edib ki, ailə ilə məktəb arasındakı uçurumun üzərindəki körpü özlüyündə elə intihar körpüsüdür:
“50 il öncə də, bu gün də fərqli ictimai-siyasi formasiyalarda təhsilə qeyri-ciddi yanaşan bir cəmiyyət özəlliyimizi hələ də dəyişməmişik. Bir intihar hadisəsi üzərindən nəticə çıxarmaq düşüncəsində deyiləm. Psixoloji səbəblər, məktəb yoldaşlarının lağlağısı, ailədəki psixoloji sarsıntı və yaxud şantajı da səbəb ola bilər. Hətta bəlkə də bu məsələdə ən günahsız "köntöy" ifadəsi ilə gündəmə gələn və işdən qovulan direktor ola bilər. Ehtimalları və ailələrdəki vəziyyəti bir kənara qoyuram. Çünki bir çox hallarda yaxınlarımızın belə arzuladığımız ailə qurmasına çox vaxt müdaxilə edə bilmirik. Ancaq müdaxilə edə biləcəyimiz bir sfera var, o da məktəbdir. Drektorlarla da, müəllimlərlə də çoxlu təmaslarım olur. Vallah, intellektual olaraq söyləmirəm, heç virtual olaraq da, vizual olaraq da xeyli hissəsi direktora, müəllim obrazına bənzəmirlər. Bu təyinatların doğru meyarını tapmaq lazımdır. Şagirdi intihardan saxlaya biləcək qüdrətə, təfəkkürə sahib direktoru, müəllimi kəşf etmək çətin deyil. Marsdan gətirmək imkanımız yoxdur. Ancaq savadlı, sağlam düşüncəli, gözəl əxlaqlı, ideyalı insanları məktəblərin, universitetlərin, peşə məktəblərinin, kolleclərin, bağçaların başına gətirmək Marsa uçmaq qədər çətin deyil".
Qeyd edək ki, 4 aprel tarixində 162 nömrəli tam orta məktəbin 8-ci sinif şagirdi Elina Hacıyeva özünü məktəbin 3-cü mərtəbəsindən atıb. Məktəbli çanaq sümüyünün sınığı, döş qəfəsinin, ağ ciyərin, yumşaq toxumaların əzilməsi diaqnozu ilə Klinik Tibbi Mərkəzinə yerləşdirilib. İki gün sonra xəstəxanada dünyasını dəyişib.
Litva vətəndaşı Skirmantas Strimaytis Vilnüsdən İtaliyaya uçan "Boeing 737-800” tipli təyyarənin yeganə sərnişini olub.
188 nəfərlik sərnişin daşıma qabiliyyətinə malik təyyarədə litvalı sərnişin İtaliyanın Bergamo aeroportuna iki pilot və beş bort köməkçisi ilə birlikdə uçub.
Turist şirkəti "Novatrus” məlumat yayıb ki, əslində təyyarə İtaliyadan Litvaya turist qrupunu gətirmək üçün göndərilib. Sadəcə boş uçmasın deyə turfirma yalnız bir tərəfə bilet satıb. Məhz həmin biletlərdən cəmi bir nəfər alıb.
Nərmin Bəşirzadə: "İnsanın aurasının, xarakterinin işinə çox böyük və birbaşa təsiri var”
Yenilikçi, məqsədli, enerjili və pozitivdir. Qarşılaşdığı uğursuzluqlara görə belə, həyata minnətdardır. Düşünür ki, uğur qazanılan nailiyyət, uğursuzluq isə öyrənilən dərsdir. Dəyişməmək isə bataqlığa aparan yoldur. Ona görə, insanın iki yolu var: ya inkişaf edib qabağa gedirsən, ya da yerində dayanıb geridə qalırsan. Həyat mübarizədir, yerində dayansan, kimsə səni ötüb keçəcək.
Müsahibimiz Macarıstanda dünyada enerji sahəsində qabaqcıl qurumlardan biri olan fransız "Şnayder Elektrik” şirkətində maliyyə eksperti və idarəçisi kimi çalışan Nərmin Bəşirzadədir.
Nərmin 1987-ci ildə fevralın 7-də Bakıda anadan olub. 160 saylı orta məktəbi fərqlənmə ilə bitirdikdən sonra 2004-cü ildə Bakı Dövlət Universitetinin (BDU) iqtisadi kibernetika fakültəsinə daxil olub: "BDU-də oxuduğum zaman təhsilimi ölkə kənarında davam etdirmək istəyirdim. Bakalavrı bitirdikdən sonra Macarıstanın paytaxtı Budapeştdə yerləşən Mərkəzi Avropa Universitetinin iqtisadiyyat fakültəsinə – magistratura pilləsinə qəbul oldum. Həmçinin, Corc Soros təqaüdünü qazandım. Təhsilimin ikinci ilində Macarıstanda "IBM” şirkətində təcrübə keçmək imkanı əldə etdim. Təcrübəni uğurla bitirdikdən sonra şirkət mənə vergi mühasibatı sahəsində iş müqaviləsi təklif etdi. Bu təklifi qəbul etdim və "IBM”də üç il çalışdım. Daha sonra karyerada irəliləmək məqsədilə məşhur fransız şirkəti olan "Şnayder Elektrik”də maliyyə təhlilçisi mövqeyində işə başladım. Artıq 6-cı ildir ki, bu şirkətdə maliyyə idarəçisi kimi çalışıram”.
– Nərmin xanım, təhsil, dünyagörüşü, dil bilikləri… Uğurlu karyera qurmaq istəyən insanda "bu xüsusiyyət mütləq olmalıdır” dediyiniz nüans varmı?
– Qeyd etdiyiniz nüanslar çox əhəmiyyətli və vacibdir. Bunlarla yanaşı, məncə uğurlu karyera qurmaq istəyən insan ilk növbədə gördüyü işi, çalışdığı mühiti sevməli, daim öz sahəsi ilə maraqlanmalı, yeniliklərə və çağırışlara açıq olmalıdır. Nə qədər təhsilli, dünyagörüşlü olsanız da, əgər yenilikçi deyilsinizsə, yerinizdə sayacaqsınız. Həyat hər zaman bizə fürsətlər verir. Onu görüb dəyərləndirənlər və görə bilməyənlər var. Əlbəttə ki, həyatın verdiyi şansların fərqində olmalı, ondan səmərəli istifadə etməyi bacarmalısan.
– Əcnəbi şirkətin maliyyə məsələlərindən məsul olmaq çətin deyil ki?
– Çox məsuliyyətlidir. İşimin çətinliklərindən qorxmuram. Çünki işimin çətin tərəfləri əslində onu mənim üçün cəlbedici edir. Çətinlik məndən dinamikliyi, daim təkmilləşməyi, üzərimdə işləməyi tələb edir. 183 yaşlı, enerji sahəsində qabaqcıl qurumlardan biri olan şirkətin maliyyə eksperti və idarəçisi olmaq mənə geniş şəbəkədə özümü müsbət tərəfdən göstərməyə imkan yaradır. Düzdür, çox məsuliyyətli işdir. Amma gördüyüm işi sevdiyim və daim müsbət tərəfdən baxdığım üçün qarşılaşdığım problemləri və çətinlikləri sevə-sevə həll edirəm.
– Özünüz də qeyd etdiniz ki, eyni şirkətdə pillə-pillə yüksək vəzifəyə qədər qalxmısınız. Sizcə, hansı xüsusiyyətiniz işinizdə uğur qazanmağa yardımçı olur və sizi diqqət mərkəzində saxlayır?
– Bəli, 6 il qabaq bu şirkətdə maliyyə təhlilçisi kimi işə başladım. İlk karyera yüksəlişini 3 ay sonra, maliyyə nəzarətçisi vəzifəsinə keçərək ya.adım. Ondan sonrakı rolum bütöv Qlobal Təchizat Sistemini ( Global Supply Chain) əhatə etməyə başladı. Beləliklə, ayrı-ayrı vaxtlarda Maliyyə Standartlarının İdarəetmə Departamentinin müxtəlif mövqelərində çalışdıqdan sonra, biznes prosesinin idarəçisi pilləsinə qədər yüksəldim. Bu 4 illik təcrübəmin məntiqli nəticəsi idi. Təcrübə ilə bərabər, məncə, insanın karyerada irəliləməsi üçün xarakteri də az rol oynamır. Mənim proaktiv, ünsiyyətcil, enerjili olmağım, işin detallarına maraq göstərməyim və olmağım bu pilləyə gəlməyimə kömək oldu.
– Hər uğurlu kişinin arxasında bir qadın var deyirlər. Amma uğurlu qadınla bağlı dillərə dastan olan fikir yoxdur. Adətən qadınlar üçün bu yol daha keşməkeşli olur. Sizdə necədir?
– İş karyeramı yalnız Avropada keçirdiyim üçün bu baxımdan problemlə rastlaşmamışam. Avropalılar işdə qadın, kişi ayırımı etmirlər. Burada heç zaman qadın kimi çətinliklərim olmayıb. Çünki işlədiyim iki şirkətdə də cinsiyyətindən asılı olmayaraq, insanlara eyni münasibət göstərilir. Bu şirkətlərin ən əsas prinsipi layiqlik üzərində qurulub. Bu da o deməkdir ki, hər hansı bir işin görülməsi, işə qəbul və karyerada irəliləyiş yalnız layiqlik prinsipi əsasında olur. Yəni sən həqiqətən buna layiqsənsə, qadın və kişi fərq etməz, istədiyin uğuru əldə edəcəksən.
– Karyera yolu daş-kəsəkli olur deyirlər. Yəqin ki, uğurla yanaşı uğursuzluqla da rastaşmısınız. Bu zaman özünüzü necə motivasiya edirsiniz?
– Təhlilçi olaraq, rastlaşdığım bütün maneələri, uğursuzluğumu təhlil edirəm. Bunu nə üçün yaşadığımı anlamağa çalışır və bir dərs kimi qəbul edirəm. Hər birimiz istər karyerada, istərsə də şəxsi həyatda səhvlər edir, ruh düşkünlüyü yaşayırıq. Ən güclü insanların da uğursuz günləri olur. Özümə təhlil etmək və nəticə çıxarmaq üçün vaxt verirəm. Uğursuzluğu qəbul edib sıfırdan başlayıram və irəliyə doğru gedirəm. Bir misal çəkim: hər həftə iş komandası ilə ötən həftə gördüyümüz işləri və gələn həftənin planlarını müzakirə etmək üçün görüşlər keçiririk. Həmin iclasda təkrarlanan bir şüar var: "Hər birimiz səhv edə bilərik. Biz səhvlərimizdən nəticə çıxarmalıyıq”. Bu, komandada əhval-ruhiyyəni qaldırır. Çünki hamı başa düşür ki, hər bir çətinlik müvəqqətidir və hər bir problemin öz həlli var.
– Pozitiv insansınız. Ümumiyyətlə, insanın aurası iş mühitinə necə təsir edir?
– İnsanın aurasının, xarakterinin işinə çox böyük və birbaşa təsiri var. Gümrah, xoş əhval-ruhiyyəli, yaxşı yumor hissi olan insan komandada xoş abı-hava yaradır. Belə insanlarla işləmək yaxşıdır və iş daha rahat gedir. Neqativ ruhlu insanla çalışmaq çətindir. Belə insanlar komandaya da mənfi auranı ötürür və gərginlik yaradır. Bu işdə verimliliyə də çox pis təsir edir. Dedi-qodunu, qeyri-səmimiliyi sevmirəm. Əlbəttə ki, bütün insanlar müxtəlifdir və kollektivdə hamı ilə dil tapmağa məcburuq. Xoşbəxtəm ki, hazırda işlədiyim kollektiv gülərüz və pozitiv insanlardan ibarətdir. Bu səbəbdən işdə özümüzü evdəki kimi rahat hiss edirik. Əgər işə sevərək gəlirsənsə, bu ən böyük xoşbəxtlik və uğurdur.
– İşlə bağlı riayət etdiyiniz xüsusi rituallarınız (totem) olurmu?
– Ən sevdiyim rituallardan biri iş gününə yaxşı qəhvə ilə başlamaq və iş yerinə birinci çatmaqdır. Adətən saat 7.30-8.00- da artıq ofisdə oluram, sakitlikdən istifadə edib emailləri yoxlayıram, cavablayıram və günümün planını qururam.
– İşinizin xarakterinizdə qoyduğu iz və ya dəyişiklik varmı? İşiniz sizi hansı istiqamətdə dəyişib?
– Karyeramın əvvəlində daha qapalı və utancaq idim. İnsanlarla ünsiyyət qurmaqda çətinlik çəkirdim. Uğurlu karyera qurmaq üçün biliklərini təkmilləşdirməklə bərabər, öz şəxsi keyfiyyətlərimin üzərimdə də çox işlədim. Artıq çəkinmədən ünsiyyət qurur və utancaqlığımın öhdəsindən gələ bilirəm. Ən əsası, həyatda mənə israrlı olmağı işim öyrətdi.
– İsrarlı olmaq, tutduğunu qopartmağı sizə işiniz öyrədib deyirsiniz. Bəs işləyərkən öyrəndiyiniz bu xüsusiyyət sizə nə qazandırdı?
– Mənə məqsədlərimə çatmaqda, arzularımın həyata keçməsində məhz israrlı olmağım kömək etdi. İstəmək, təkidlə tutduğun yoldan dönməmək mütləq səni uğura aparır. İstədiyimə nail olmaq üçün çalışıram və ruhdan düşmürəm. Əgər bir məsələ həll olunmursa, ondan vaz keçmirəm, alınana qədər çalışıram və sonda alınır. İstədiyini əldə etmək üçün utanmaq, çəkinmək, ruhdan düşmək olmaz.
– Riskləri sevirsiniz…
– Risk etməkdən qorxmuram. Əslində, hər bir dəyişiklik riskdir. Dəyişməmək isə bataqlığa aparan yoldur. İnsanın iki yolu var ya inkişaf edir qabağa gedirsən, ya da yerində dayanıb geridə qalırsan. Həyatda durğunluğu, stabilliyi sevmirəm. Əgər arzularımıza, məqsədlərimizə çatmaq üçün risk etmiriksə, bu stabillikdir. Stabillik də mənim üçün ancaq geriyə addımdır. İnkişaf üçün risk etmək lazımdır. Nəticə ya gözəl dəyişiklik olacaq, ya da öyrənilən dərs. Heç nə etmirik. Sonradan cürət etmədiyimiz addımlardan daha çox peşman olmamaq üçün risk etməliyik və o addımı atmalıyıq. Hər nəticəyə hazır olmaq lazımdır. Həyat mübarizədir, yerində dayansan, kimsə səni ötüb keçəcək.
– Nərmin xanım, ümumiləşdirsək, uğurunuzun sirri sizcə nədir?
– İlk olaraq, öz üzərimdə işləmək, nə olursa olsun, arzularımın arxasınca israrla getmək, uğursuzluqlarda sınmamaq, əksinə dərs çıxarmaq və böyük arzulardan qorxmamaq. Ən əsası isə, hər zaman ürəyimin səsinə qulaq asıram. Hər kiçik qələbənin belə qədrini bilirəm.
– Bir yerdə oxumuşdum ki, insan pozitiv yüklənmək üçün daim minnətdar olmalı, təşəkkür etməlidir. Hər kiçik qələbənin belə qədrini bilirəm deyirsiniz…
– Tam razıyam. Çalışıram ki, gündəlik həyatımda bu yanaşmanı vərdiş halına gətirim. İnanıram ki, əldə etdiklərimizə şükür edəndə, həyat bizə şükür etməyə daha çox səbəb verir. Pis nə isə baş verəndə özümü inandırıram ki, bu, daha da pis ola bilərdi, amma şükür ki, olmadı. Bunun qədrini bilirəm. Bir də ki, cəlbetmə qanununa (law of attraction) riayət edirəm, kiçik qələbələrin qədrini bilməyimin daha böyük qələbələr qazanmağımda rolu olduğuna inanıram. Ən əsası, həyatımda baş verən uğurlu, uğursuz hər şeyə görə minnətdaram.
Türkiyənin hakim Ədalət və İnkişaf Partiyası (AKP) İstanbulda 38 vilayətin hamısında səslərin yenidən sayılması tələbi ilə çıxış edib.
Bununla bağlı artıq MSK-ya ərizə ilə müraciət olunub.
Partiyanın sədr müavini Əli İhsan Yavuz Tvitter paylaşımında Böyükçəkməcədə keçirilən səsvermənin nəticələrinin isə tamamilə ləğv edilməsini tələb etdiklərini yazıb.