 |
|
Rusiya sülhməramlıları Qarabağa gələndə etirazlar iki istiqamətdə səslənirdi. Biri “Rusiya ordusu girdiyi yerdən çıxmır” deyənlər idi. Onların hamısı olmasa da, çoxu səmimi şəkildə ölkəni düşünənlər idi. Digəri “Əliyev Qarabağı ruslara satdı” deyənlər idi. Onlar 44 günlük müharibədən öncə “Qarabağı heç vaxt almayacağıq” deyirdilər və müharibənin olması ilə səhv çıxmalarını Xankəndinin alınmaması və rusların gəlişi ilə kompensasiya etməyə çalışırdılar. İndi əllərindəki bütün kartlar çıxdı: Xankəndi alındı, separatizm ləğv olundu, ermənilər getdi, ruslar tərk edir.Etiraf etmək lazımdır: Əliyev daxildə siyasi opponentlərinin də, bu bölgədə maraqları olan və ermənilər üzərindən oyun quran güclərin də bütün “proqnozlarını”, gözləntilərini alt-üst etdi.
Azər Fikrətoğlu
Qarabağda müvəqqəti yerləşdirilmiş Rusiya sülhməramlı kontingentinin bölgədən çıxması prosesinin başladığı barədə məlumatlar var. Belə ki, dünən sosial mediada sülhməramlılara məxsus hərbi texnikaların Tərtərdə hərəkətini əks etdirən görüntülər də yayılıb. Lakin onların hansı istiqamətdə hərəkət etdiyi barədə məlumat verilməyib. Bildirilir ki, sülhməramlı kontingentə məxsus ilk heyət və hərbi texnika artıq Qarabağ ərazisini tərk edib.Qeyd edək ki, rus sülhməramlılar 10 apreldə Kəlbəcərdə yerləşən Xudavəng monastır kompleksini tərk edib. Hazırda Xudavəng monastrını Azərbaycan polisi mühafizə edir.
Erməni mediasının məlumatına görə, Rusiya sülhməramlılarının Azərbaycanın Qarabağ iqtisadi rayonundan çıxarılması mərhələli şəkildə həyata keçirilir. “News.am” saytı diplomatik mənbələrə istinadən məlumat yayıb ki, qoşunların çıxarılması eşelonla, Dağıstan vasitəsilə həyata keçirilir.
Yeri gəlmişkən, iki gün əvvəl Rusiya Dövlət Dumasının MDB işləri üzrə komitə sədrinin birinci müavini Konstantin Zatulin deyib ki, ermənilərin Qarabağdan çıxmasından sonra Rusiya sülhməramlılarının bölgədə qalması səbəbləri azalıb. Onun sözlərinə görə, Azərbaycan Rusiya qoşunlarının Qarabağdan çıxması məsələsini hələ qaldırmır: “İstəmirlər ki, Rusiya bunu məğlubiyyət və ya güzəşt kimi qəbul etsin. Bu gün Qarabağda sülhməramlıların qalması Rusiya və Azərbaycan arasındakı münasibətlərlə bağlıdır. Əslində isə erməni əhalisi qalmadığı üçün sual yaranır: bizim sülhməramlıların orada nə işi var?”.
Kreml Rusiya sülhməramlı kontingentinin Azərbaycanın Qarabağ bölgəsindən çıxarılmasını təsdiqləyib. Bu barədə Kremlin mətbuat katibi Dmitri Peskov bildirib.
“2020-ci il noyabrın 10-da imzalanmış Üçtərəfli Bəyanata əsasən, Azərbaycan Respublikasının ərazisində müvəqqəti olaraq yerləşdirilmiş Rusiya Federasiyası sülhməramlılarının ölkəmizin ərazisindən vaxtından əvvəl çıxarılması barədə hər iki ölkənin ali rəhbərliyi tərəfindən qərar qəbul edilib”. Bu sözləri isə Azərbaycan Prezidentinin köməkçisi - Azərbaycan Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev Rusiya sülhməramlılarının Azərbaycan ərazisindən çıxarılması barədə danışarkən deyib.
“Artıq proses başlanılıb, Azərbaycan və Rusiya Müdafiə nazirlikləri həmin qərarın icrası ilə bağlı müvafiq tədbirləri həyata keçirirlər”, - deyə H.Hacıyev bildirib.
Mövzu ilə bağlı AYNA-nın suallarını cavablandıran ehtiyyatda olan polkovnik, hərbi ekspert Üzeyir Cəfərov deyib ki, onsuz da Rusiya hərbçilərinin Qarabağda işi qalmamışdı:
- Rusiyanın ərazilərimizə sülhməramlı adı altında yerləşdirilən hərbi kontingenti nəhayət ki, ərazilərimizi tərk edir. İki minə yaxın rus hərbçilərinin çox az hissəsi bir neçə gün əvvəl Kəlbəcərdən, Xudavəng məbədi ərazisindən çıxarılmışdı. Ötən ilin sentyabrında Azərbaycanın keçirdiyi antiterror əməliyyatından sonra Qarabağ məsələsi bitdi. Hazırda ərazilərimiz tam şəkildə Azərbaycan Ordusunun nəzarətindədir və problem həll olunub. Qarabağda yaşayan ermənilər könüllü şəkildə ərazilərimizi tərk etdilər. Bundan sonra rus hərbçilərinin orada qalmasına nə ehtiyac var idi?! Antiterror əməliyyatından sonra Rusiya hərbi kontingenti elan etməli idi ki, artıq orada fəaliyyətlərinə ehtiyac qalmayıb, çıxıb gedirlər. Amma Rusiya sülhməramlı kontingentinin belə bir bəyanatı olmamışdı.
- Rusiya antiterror əməliyyatlarından sonra hərbçilərini niyə geri çağırmırdı?
- Antiterror əməliyyatından sonra Rusiya düşünürdü ki, Qarabağdan köç edən erməniləri zor gücünə də olsa, geriyə gətirə biləcək. Bunu daha əvvəl etmişdilər, 44 günlük müharibədə Qarabağdan Ermənistana getmiş erməniləri Rusiya Xankəndiyə qaytarmışdı. Könüllü gəlmək istəməyənləri də zorla Xankəndiyə, Ağdərəyə gətirmişdilər. Hətta ermənilərin sonradan Ermənistana getməsinə də ləğv olunan Laçın dəhlizində əngəllər yaradırdılar. Rusiya düşünürdü ki, 2023-cü ildə keçirilən antiterror əməliyatlarından sonra da bölgəni tərk edən erməniləri Xankəndiyə qaytaracaq. Lakin bu dəfə belə olmadı, erməniləri əraziyə qaytara bilmədilər. Sonra isə Üçtərəfli Birgə Bəyanatın müddəasına əsasən 2025-ci ilədək Rusiya hərbi kontingenti Qarabağda qalmaq niyyətində idi. Hətta iki həftəyə yaxındır ki, ruslar guya orada minatəmizləmə əməliyyatında Azərbaycana kömək etməyə çalışırdılar. Sual olunur, 2020-ci ildə Qarabağa gələn ruslar 2021-ci ildə Ermənistanda istehsal olunan on minlərlə minanın bölgəyə gətirilməsinə niyə göz yumurdular? Əksinə, separatçılara şərait yaradırdılar ki, o minalar Azərbaycan ərazisinə basdırılsın, ərazilər təhlükə mənbəyə çevrilsin. İndi minatəmizləyən, humanitar yardım edən olublar? Guya mina təmizləmək əməliyyatlarında iştirak etməklə fəaliyyətlərinin olduğunu, onlara ehtiyac olduğunu göstərmək istəyirdilər. Məqsəd bəlli idi, Rusiya hərbçiləri buradan çıxmaq niyyətində deyildilər. Maksimum çalışdılar ki, bölgəni tərk etməsinlər. Bu, Kremlin planı idi. Rusiya istəyir ki, Azərbaycan ərazisində hərbi kontingenti olsun, bununla hansısa təsir rıçaqları qalsın. Hətta Rusiya hərbçilərini 2025-ci ildən sonra da Qarabağda saxlamaq niyyətində idilər. Görünür Azərbaycanın tələbi və uğurlu diplomatik danışıqlar nəticə verib. Bu, rəsmi Bakının diplomatik uğurudur.
- Belə məlumatlar da var ki, Ağdamdakı Rusiya-Türkiyə Birgə Monitorinq Mərkəzindəki Türkiyə hərbçiləri ərazidən çıxarılacaq. Bu barədə nə deyə bilərsiniz?
- Yaxın aylarda Monitorinq Mərkəzi fəaliyyətini dayandıracaq. Bir neçə gün əvvəl həmin Mərkəzdəki Rusiya hərbçiləri oradan çıxmağa başlayıblar. Bu halda qardaş Türkiyə hərbçilərinin Ağdamda qalmasına ehtiyac yoxdur. Bu Mərkəz bölgədə olan vəziyyəti monitorinq etmək üçün yaradılmışdı. Bu gün onlar nəyi monitorinq edirlər? Ona görə də Rusiya və Türkiyə hərbçilərinin Mərkəzdə qalmasına ehtiyac yoxdur. Həm də bu, əlavə xərcdir. Yəni demək olar ki, Monitorinq Mərkəzinin də Qarabağda missiyası bitib. Əslində ötən ilin sentyabrındakı antiterror əməliyyatından sonra Mərkəz fəaliyyətini dayandırmalı idi.
Rusiya Sülhməramlı Kontingenti Azərbaycandan vaxtından əvvəl çıxarılır. Azərbaycan prezidentinin köməkçisi, Prezident Administrasiyasının xarici siyasət məsələləri şöbəsinin müdiri Hikmət Hacıyev və Rusiya Prezidenti Administrasiyası rəhbərinin müavini, prezidentin mətbuat katibi Dmirti Peskov bu faktı təsdiqləyiblər və şərh ediblər.Rusiya SMK-nin Qarabağdan çıxarılması haqda qərar Azərbaycanın və Rusiyanın ali rəhbərləri arasında razılaşdırılaraq birgə qəbul olunub. Bu, Rusiya hərbi bazasını, ümumiyyətlə rus qoşunlarını öz ərazisindən çıxarmağa çalışan Ermənistana da bir növ nümunə oldu. Rusiya hərbi kontingentini öz ölkəndən çıxarmaq üçün gedib Fransaya, başqalarına yalvarıb, bölgəyə gətirməyə ehtiyac yoxdur. Bu, Rusiya və Ermənistan arasında həll oluna bilən məsələdir. Ermənistan hələ Kollektiv Təhlükəsizlik Müqaviləsi Təşkilatından (KTMT) da rəsmən çıxmayıb. Rusiya ikitərəfli hərbi xarakterli müqavilələri də denonsasiya etməyib. Rusiya hərbi bazasının və Rusiya sərhədçilərinin Ermənistanda olmasını hüquqi baxımdan mümkün edən sazişlər də hələ qüvvəsindədir. Qalanı siyasi məsələlərdir və siyasi yolla həll oluna bilərdi. Azərbaycan aqressiv qonşusuna bir daha dərs verdi; sülh müqaviləsini də, sərhədlərin məsələsini də Bakı ilə İrəvan öz arasında birbaşa danışıqlarla, birgə qərarlarla həll edə bilər. Bunun mesajı da verilmiş oldu.
Bu qərar, bu proses - Rusiya qoşunlarının Azərbaycandan çıxarılması daxildəki skeptiklərə də bu mövzuda ayıldıcı mesajdır. Otuz illik danışıqlar zamanı skeptiklər cəmi bir məsələdə haqlı çıxdı: Ermənistan işğal etdiyi torpaqları öz xoşuna azad etməyəcək. Bunu dövlət də bilirdi. Güclü ordu quruldu. Hərbi yolla torpaqlar azad olundu. Demişdilər, prezident Əliyev bir-iki rayon ala bilsə, böyük işdir. Hamısını aldı. Deyirdilər, Şuşaya getdiyi kimi Xankəndinə də getsin. "Gedə bilməyəcək" dedilər. Amma İlham Əliyev Xankəndinə də getdi; bayraq sancdı, parad keçirdi, futbol oynadı, bayram tonqalı qaladı. Dedilər, nolsun, rus qoşunları orda qaldıqca, Qarabağ bizim sayılmaz; adı bizimdir, dadı rusun. Buyurun, bu da rus qoşunu! Qarabağdan çıxır. Həm də vaxtından qabaq.
Erkin Qədirli ağıllı oğlandır; düz deyirmiş: "Yaxşı işlər yavaş-yavaş görülür".
Amma görülən bu yaxşı işləri görmək də gərək. Neqativləri tənqid etmək normaldır. Bəs pozitivləri niyə təqdir etməyək?! Kim nə deyir-desin, tarixi hadisədir, çox ciddi uğurdur. Azərbaycanın Türkiyə və türk dünyası ilə birliyinə də doğru atılmış mühüm addımdır. Mən şəxsən təqdir edirəm.
Bahəddin Həzi,
Rusiya sülhməramlı kontingenti Azərbaycanın Qarabağ bölgəsini tərk etməyə başlayıb. Kremlin mətbuat katibi Dmitri Peskov bildirib ki, sülhməramlı kontingentə məxsus ilk heyət və hərbi texnika Kəlbəcər rayonundakı alban məbədi Xudavəng monastrının ərazisindən çıxıb. Hazırda Xudavəng monastrını Azərbaycan polisi mühafizə edir.Prezidentin köməkçisi Hikmət Hacıyev deyib ki, Rusiya sülhməramlılarının Azərbaycan ərazisindən vaxtından əvvəl çıxarılması barədə hər iki ölkənin ali rəhbərliyi tərəfindən qərar qəbul edilib: “2020-ci il noyabrın 10-da imzalanmış üçtərəfli Bəyanata əsasən, Azərbaycan Respublikasının ərazisində müvəqqəti olaraq yerləşdirilmiş Rusiya Federasiyası sülhməramlılarının ölkəmizin ərazisindən vaxtından əvvəl çıxarılması barədə hər iki ölkənin ali rəhbərliyi tərəfindən qərar qəbul edilib. Artıq proses başlanıb, Azərbaycan və Rusiya Müdafiə nazirlikləri həmin qərarın icrası ilə bağlı müvafiq tədbirləri həyata keçirirlər”. Qeyd edək ki, Rusiya sülhməramlı kontingenti 2020-ci il 10 noyabrda Azərbaycan, Rusiya və Ermənistan liderləri arasında imzalanmış üçtərəfli Bəyanatdan sonra Qarabağda müvəqqəti yerləşdirilmişdi. Rusiya sülhməramlılarının Qarabağı tərk etməsini Azərbaycanın növbəti siyasi-diplomatik qələbəsi adlandırmaq olar. Rusiya sülhməramlılarının Azərbaycan ərazilərindən çıxması bir daha sübut etdi ki, rəsmi Bakı ölkəmizin milli maraqlarını qətiyyətlə müdafiə edir. Bu məsələdə mühüm əhəmiyyət kəsb edən amil isə Prezident İlham Əliyevin çevik diplomatik məharəti Azərbaycanın milli maraqlarını tam şəkildə qoruması ilə bağlıdır. Prezident İlham Əliyevin vurğuladığı kimi, “Nəyi, necə, nə vaxt etmək lazımdır, bunu mən bilirəm. Yaxın tarix dəfələrlə bunu göstərib, həm siyasi müstəvidə, diplomatik müstəvidə, eyni zamanda, döyüş meydanında. Nəyi ediriksə, dəqiqliklə edirik”. Prezidentin söylədiyi bu fikirlərdə olduğu kimi, Azərbaycan xalqı daha bir əhəmiyyətli hadisəyə şahidlik etdi. Prezidentin yürütdüyü məqsədyönlü və inamlı siyasətin nəticəsi, Ordumuzun döyüş əzmi ilə Qarabağın bütün əraziləri tamamilə Azərbaycanın nəzarətinə keçdi. Xankəndi şəhərində 1919-cu ildən sonra ilk dəfə olaraq üçrəngli bayrağımız dalğalandı. Bu ardıcıl siyasətin sonunda Azərbaycanın siyasi hakimiyyətinin yürütdüyü qüsursuz fəaliyyətin nəticəsi olaraq Rusiya sülhməramlıları Qarabağdan çıxmağa başladı. Azərbaycan xalqı son illərdə tarixinin ən şanlı səhifələrinə şahidlik edir. Bu şanlı tarixə qızıl hərflərlə düşən səhifələr isə Qarabağın tamamilə işğaldan azad edilməsi, bu problemin gələcək nəsillərə ağrılı miras olaraq qalmadan birdəfəlik həll edilməsi oldu. Bu qərar həm də xaricdə və daxildə olan bəzi dairələrin səsləndirdiyi cəfəng “proqnozlar” və iddiaların əsassız olduğunu, bunu səsləndirənlərin siyasi savad və dünyagörüşünün kasadlığını, qərəzliliyini bir daha sübut etdi. Qeyd etmək lazımdır ki, Ermənistandan fərqli olaraq, Azərbaycan diplomatiyası Prezident İlham Əliyevin rəhbərliyi ilə hərbi əməliyyatlar dövründə olduğu kimi, müharibədən sonrakı bir il ərzində də Azərbaycanın milli maraqlarının qorunması naminə ardıcıl və qətiyyətli mövqe nümayiş etdirdi. İkinci Qarabağ müharibəsinin sonu kimi qəbul edilən və 2020-ci il noyabrın 10-da imzalanan üçtərəfli Bəyanat münaqişə tərəfləri arasında Qarabağda atəşin və bütün hərbi əməliyyatların tam dayandırılmasını, Ermənistanın işğal etdiyi ərazilərin ölkəmizə qaytarılmasını, gələcəkdə bölgənin sülh və əməkdaşlıq regionuna çevrilməsini nəzərdə tuturdu. Azərbaycanın 2020-ci ildə 44 günlük müharibədə tarixi qələbəsindən sonra dövlətimizin gücü və mövqeyi nəyinki regionda, o cümlədən beynəlxalq miqyasda daha da yüksəldi.
Azərbaycan Milli İstiqlal Partiyasının sədri Arzuxan Əlizadə "Şərq"ə açıqlamasında deyib ki, Rusiya sülhməramlı kontingentinin nəhayət Qarabağı tərk etməsi çox mühüm və xüsusi qeyd olunacaq tarixi hadisədir. Partiya rəhbərinin sözlərinə görə, bu qərarın qəbul olunması Azərbaycan dövlətinin növbəti uğuru və ölkə rəhbərliyinin düşünülmüş siyasətinin nəticəsidir:
"Tam olaraq əminik idik ki, Rusiya hərbi kontingenti Azərbaycanı tərk edəcək. Ən gec 2025-ci ilin noyabr ayınadək rus hərbçilərinin Qarabağdan çıxacağı proqnozlaşdırılırdı. Amma "sülhməramlı" adı ilə torpaqlarımızda yerləşdirilmiş hərbi kontingentin belə tezliklə Azərbaycandan çıxması kifayət qədər müsbət məqamdır. Prezidentin köməkçisi Hikmət Hacıyev rəsmi açıqlamada bildirdi ki, Azərbaycan və Rusiya rəhbərliyinin ikitərəfli razılaşması əsasında belə bir qərar verilib. 1992-1993-cü illərdə Müstəqil Dövlətlər Birliyində (MDB) ilk ölkələrdən idik ki, rus hərbi kontingentini Azərbaycandan çıxartmışdıq. Ardınca Qələbə RLS-də xidmət keçən rus hərbçilər uzaqlaşdırılmışdı. Ancaq 44 günlük müharibədən sonrakı vəziyyət nəzərə alınmaqla, 10 noyabr üçtərəfli bəyannamənin müddəasına görə, rus hərbçilər "sülhməramlı" adı ilə 5 il müddətinə Qarabağa yerləşdirilmişdi. Artıq Rusiya və Ermənistan tərəfi də etiraf edirdi ki, bölgədə situasiya və reallıqlar tam olaraq dəyişdiyi üçün rus hərbçilərinin torpaqlarımızda qalmasına ehtiyac yoxdur. Rusiya sülhməramlılarının orada qalması heç bir anlam ifadə etmirdi. Ümumiyyətlə, rus hərbi kontingenti sülhməramlı missiyasını yerinə yetirmirdi. Düzdür, zaman-zaman Qarabağda aparılan anti-terror əməliyyatlarına göz yumdular, müdaxilə etmədilər. Amma bu da Azərbaycan dövlətinin apardığı uğurlu siyasətin nəticəsi idi. Ötənlərdə bir xəbər yayıldı ki, heç bir işə yaramayan rus hərbçilərini mina təmizləmə prosesinə cəlb etmək mümkündür".
A.Əlizadə vurğulayıb ki, Azərbaycan Konstitusiyasına görə, heç bir xarici ölkənin hərbi kontingenti bizim ərazimizdə yerləşdirilə bilməz: "Sülhməramlı kontingent sadəcə üçtərəfli bəyanata əsasən, torpaqlarımızda müvəqqəti yerləşdirilmişdi. Ancaq üçtərəfli saziş hüquqi qüvvəyə malik deyildi, sadəcə altında Prezidentin imzası var idi deyə, bu məsələyə hörmətlə yanaşırdıq. Amma ratifikasiya olunmamışdı. Ümid edirik, daha doğrusu əminik ki, Azərbaycan ərazisində bundan sonra heç bir ölkənin hərbi gücü olmayacaq. Yeganə olaraq qardaş Türkiyənin hərbçiləri Şuşa Bəyannaməsinin müddəalarına əsasən, ölkəmizdə birgə təlimlər keçə, ortaq fəaliyyət göstərə bilərlər. Bu tarixi qərara görə, xalqımıza gözaydınlığı düşür. Son olaraq onu da qeyd edim ki, Rusiya hərbçiləri Azərbaycandan çıxsalar da, Ermənistanı tərk etməyəcəklər".
Xəbər verdiyimiz kimi, Prezident İlham Əliyevin müvafiq sərəncamı ilə Anar Axundov iqtisadiyyat nazirinə yeni müavin təyin olunub.
Anar Axundovun dosyesini təqdim edirik:
Anar Axundov 1975-ci ildə anadan olub.
1996-cı ildə Azərbaycan Dövlət İqtisad Universitetini iqtisadçı ixtisasi üzrə bitirib.
Əmək fəaliyyətinə Bakı Banklararası Valyuta Birjasında başlayıb, həmçinin bir sıra kommersiya banklarında çalışıb. 1999-2004-cü illərdə Azərbaycan Respublikasının Prezidenti yanında Qiymətli Kağızlar üzrə Dövlət Komitəsində baş mütəxəssis, şöbə rəisi və departament rəisi vəzifələrində işləyib. 2004-2006-cı illərdə Bakı Fond Birjasının Fond bazarının inkişafı departamentinin rəisi və İdarə Heyətinin sədri, 2006-2009-cu illərdə Azərbaycan İnvestisiya Şirkətinin icraçı direktoru olub.
2009-2014-cü illərdə “Bank Standart” QSC-nin İdarə Heyəti sədrinin müavini vəzifəsində işləyib. 2014-2022-ci illərdə Azərbaycan Respublikasının Təhsil Nazirliyində idarə rəisi vəzifəsində çalışıb.
2022-ci ildə dövlət başçısının Sərəncamı ilə Azərbaycan Respublikası Dövlət Neft Şirkətinin (SOCAR) Müşahidə Şurasının üzvü təyin edilib. Azərbaycan Respublikası Prezidentinin 2024-cü il 16 aprel tarixli Sərəncamı ilə Azərbaycan Respublikasının iqtisadiyyat nazirinin müavini təyin olunub.
Ailəlidir, 2 övladı var.
"Astana Ermənistan və Azərbaycanın sülh müqaviləsi bağlamaq istəyini alqışlayır". Bu sözləri İrəvanda səfərdə olan Qazaxıstan Prezidenti Kasım-Jomart Tokayev deyib. Qazaxıstan Prezidenti bildirib ki, Qazaxıstan mümkün qədər çox kömək etməyə və danışıqlar üçün platforma təklif etməyə hazırdır. Tokayev vurğulayıb ki, əsas məqsəd dost ölkələri bir-birinə daha da yaxınlaşdırmaq və sarsılmaz dostluq münasibətlərinə, sülhə və sabit inkişafa yol açmaqdır."İrəvanda səfərdə olan Qazaxıstan Prezidenti Kasım-Jomart Tokayev Ermənistanın Baş naziri Nikol Paşinyanla birgə keçirdiyi mətbuat konfransında Azərbaycanla Ermənistan arasında sülhə yeni bir platforma təklif edib. Əslində bu, yeni platforma deyil. Burada ilk odur ki, Asiya ölkələrindən də Cənubi Qafqazdakı problemin həllinə maraq daha da artıb".
Bu barədə Bizimyol.info xəbər portalına açıqlamasında Milli Məclisin deputatı Müşfiq Cəfərov danışıb. Deputat qeyd edib ki, Qarabağ problemi mövcud olduğu gündən həlli istiqamətində daima Avropanın rolu əsas olub.
“Əgər Cənubi Qafqazdakı iqtisadi tərəfdaşlıqlarda Avropa ölkələri kimi Asiya da iştirak edirsə, düşünürəm regionda olan hadisələrdə fəallıqları anlaşılandır. Həmçinin, bu vasitəçilik təklifi də yüksək dəyərləndirilməlidir. Çünki artıq Qərbin təhdidvari bəyanatları və ikilli standartları şablonlaşaraq öz əhəmiyyətini itirir.
Ümumiyyətlə, Avropa dövlətləri hazırda özlərinin bəyan etdikləri dəyərləri gündən-günə dəyərsizləşdirir. Bir haldakı vasitəçiliyini öhdəliyinə götürdüyü münaqişələrdə uzun illərlə heç bir naliyyət əldə edilmir və əksinə daha çox aqressiya nümayişləri görürük. Mən deyərdim ki, Asiya və Avropanın regionumuzdakı qeyri-sabitliyə münasibəti tam fərqlidir. Ümid edirəm ki, Ermənistan Qərbin uzatmağa çalışdığı zəruri sülhü gecikdirməyəcəkdir. Bu da yalnız Cənubi Qafqazdakı ölkələrarası əlaqələrə və bölgədə yaşayan xalqlara zərər verir”-deyə deputat əlavə edib.
Müşfiq Cəfərov vurğulayıb ki, Qərbin və ya müttəfiqlərin deyil, region insanının milli maraqları daha üstün tutularaq ortaq məxrəcə gəlinməlidir.
2020-ci il 10 noyabr üçtərəfli bəyanatına əsasən, Azərbaycanın Qarabağ bölgəsində müvəqqəti yerləşdirilən Rusiya sülhməramlı kontingentinin nəzərdə tutulan beş illik müddətdən əvvəl ölkədən çıxarılması prosesinə başlanılıb.
“Report”un məlumatına görə, bu barədə ilkin olaraq, müxtəlif media resursları və sosial şəbəkələrdə yayılan qeyri-rəsmi informasiya daha sonra Azərbaycan Respublikası Prezidentinin köməkçisi - Azərbaycan Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev və Kremlin mətbuat katibi Dmitri Peskovun müvafiq açıqlamaları ilə rəsmən təsdiqlənib.
Hazırda sosial şəbəkələrdə Rusiya sülhməramlı kontingenti və onun istifadəsində olan hərbi texnikanın Azərbaycandan çıxarılmasını əks etdirən çoxsaylı videolar yayılmaqdadır.
Prezident İlham Əliyev iqtisadiyyat nazirinə yeni müavin təyin olunması barədə sərəncam imzalayıb.
“Report” xəbər verir ki, bu vəzifə Anar Axundova həvalə edilib.
O, 1975-ci ildə anadan olub, 1996-cı ildə Azərbaycan Dövlət İqtisad Universitetini "iqtisadçı" ixtisasi üzrə bitirib, əmək fəaliyyətinə "Bakı Banklararası Valyuta Birjası" QSC-də başlayıb, sonradan bir sıra kommersiya banklarında çalışıb, 1999-2004-cü illərdə o vaxtlı Prezident yanında Qiymətli Kağızlar üzrə Dövlət Komitəsində baş mütəxəssis, şöbə rəisi və departament rəisi, 2004-2006-cı illərdə "Bakı Fond Birjası" QSC-nin Fond bazarının inkişafı departamentinin rəisi və İdarə Heyətinin sədri, 2006-2009-cu illərdə İqtisadiyyat Nazirliyinə məxsus "Azərbaycan İnvestisiya Şirkəti" ASC-nin icraçı direktoru, 2009-2014-cü illərdə “Bank Standart” QSC-nin İdarə Heyəti sədrinin müavini, 2014-2022-ci illərdə Təhsil Nazirliyində idarə rəisi işləyib, 2022-ci ildə dövlət başçısının sərəncamı ilə Azərbaycan Dövlət Neft Şirkətinin (SOCAR) Müşahidə Şurasının üzvü təyin edilib.
Ailəlidir, 2 övladı var.
Rəsmi Paris Azərbaycandakı səfirini geri çağırmaqla, hər hansı ciddi nəticə qazana bilməz, Makron hakimiyyəti əgər, Fransanın regional maraqları barədə düşünürsə, onda fransız diplomatla deyil, məhz Azərbaycanın hakim dairələri ilə məsləhətləşməlidir... Bundan öncə isə rəsmi Paris ilk növbədə ermənipərəst mövqeyindən imtina etməlidir, Azərbaycana qarşı düşmənçilik siyasətinə ciddi düzəlişlər barədə düşünməlidir, əks halda, Fransa Cənubi Qafqaza kənardan baxan küsəyən ölkə kimi qalacaq...
Fransa Cənubi Qafqazda “suyu bulandırmaq” siyasətini israrla davam etdirir. Üstəlik, rəsmi Paris məhz Azərbaycanı hədəf alıb. Fransa artıq bir neçə ildir ki, Azərbaycana qarşı düşmənçilik mövqeyini açıq müstəviyə çıxarıb. Bu Avropa dövləti Ermənistanın əsas beynəlxalq himayədarı missiyasını öz üzərinə götürüb. Və Cənubi Qafqaz siyasətini də məhz Azərbaycana qarşı yönəlmiş qərəzli planlar üzərində qurmağa çalışır.
Onu da qeyd etmək lazımdır ki, rəsmi Paris son vaxtlar Azərbaycanla münasibətlərin tamamilə korlanmasına yönəlik absurd addımlar atmağa başlayıb. Hətta Fransanın Azərbaycandakı səfiri Parisə çağırılıb və bunun məsləhətləşmə məqsədi daşıdığı vurğulanıb. Üstəlik rəsmi Paris onu da bildirib ki, fransız səfirin geri çağırılması Azərbaycanın Fransa ilə münasibətlərin korlanmasına səbəb ola biləcək addımları ilə bağlıdır. Və nə qədər qəribə də olsa, rəsmi Paris Azərbaycanın Fransa ilə münasibətlərini korlaya biləcək addımlarını örnək göstərməyə rhtiyac duymayıb.
Əslində, bu o qədər də təəccüblü deyil. Çünki rəsmi Parisin Azərbaycan tərəfindən Fransa ilə münasibətlərə zərbə vura biləcək daxranışlarına örnək tapması asan məsələ deyil. Hər halda, indiyə qədər münasibətlərin korlanmasına yönəlik addımlar rəsmi Bakı tərəfindən deyil, məhz Fransa tərəfindən atılıb. Hətta rəsmi Paris o qədər qərəzli mövqe tutmaqdadır ki, bu, digər Avropa dövlətləri tərəfindən də diqqətə alınmaqdadır. Hər halda, İtaliya Xarici İşlər Nazirliyinin Fransanı Azərbaycana qarşı davranışlarını, eləcə də, Cənubi Qafqazda sülh prosesinin pozulmasına yönəlik addımlarını sərt şəkildə tənqid etməsi rəsmi Parisə bəzi məqamları anlamaqda yardımçı ola bilər.
Bu baxımdan, rəsmi Paris Azərbaycanı nədəsə günahlandırmaq niyyətinə düşməkdən öncə Fransanın davranışlarına düzəliş etməsi olduqca vacibdir. Çünki Fransa son illərdə Azərbaycanla münasibətləri korlamaq üçün mümkün olan bütün addımları artıq atıb. Hətta Fransa parlamentində erməni separatçıların və terrorçuların uydurduğu qondarma “artsax”ın tanınması barədə qətnamə belə, qəbul edilib. Və bu, Fransa tərəfindən Azərbaycanın beynəlxalq hüquqla tanınmış sərhədlərinə qəsd olunması anlamı daşıyır.
Digər tərəfdən, rəsmi Paris BMT Təhlükəsizlik Şirasında Azərbaycana qarşı qətnamələrin qəbul edilməsi istiqamətində israrlı cəhdlər göstərib. Fransa sonradan həmin qətnamələr sayəsində Azərbaycana qarşı beynəlxalq sanksiyaların tətbiq olunmasını planlaşdıərdığını da qətiyyən gizlətmirdi. Eyni zamanda, Avropa Birliyində və Avropa Avropa Parlamentində Azərbaycana qarşı aparılan kampaniyanın, qərəzli qətnamələrin qəbul edilməsinin arxasında Fransanın olduğu da heç kimə sirr deyil. Və Fransanın, onun hakim elitasına daxil olan şəxslərin Laçın yolu ətrafında yaratdıqları “blokada şousu” da hələlik unudulmayıb.
Bütün bunlar azmış kimi, rəsmi Paris hazırda Ermənistanı ən müasir hərbi texnika ilə silahlandırmaq missiyasını da öz üzərinə götürüb. Hətta Fransa bunu qətiyyən gizlətməyərək, Ermənistana başqa ölkələrə satmadığı silahları vermək niyyətini də açıq şəkildə bəyan edirb. Yəni, rəsmi Paris açıq-aşkar Cənubi Qafqazda sülh prosesini pozmağa çalışır, Ermənistanı Azərbaycanla yeni savaşa hazırlayır. Və bütün bunların qarşılığı olaraq, rəsmi Bakının Fransanın pozucu fəaliyyətinə etitaz etmək hüququ var.
Göründüyü kimi, Azərbaycan-Fransa münasibətlərinə zərbə vuran bütün addımlar indiyə qədər Bakıdan deyil, məhz Parisdən atılıb. Ona görə də, indi Fransanın Azərbaycandan narazı qalmaq üçün heç bir əsası mövcud deyil. Əgər, rəsmi Paris belə əsasları olsaydı, bunu açıq şəkildə bəyan edərdi. Halbuki, rəsmi Paris bunun əvəzinə Fransanın Ermənistana tam dəstəyini növbəti dəfə ifadə etməyə üstünlük verib. Və bu baxımdan, Azərbaycan-Fransa münasibətlərinin belə böyük sürətlə korlanmaqda davam etməsinə görə birmənalı şəkildə ermənipərəst Makron hakimiyyəti günahkardır.
Nəhayət, rəsmi Paris birdəfəlik anlamalıdır ki, Fransa Azərbaycana qarşı belə qərəzli vasitələrlə təzyiq göstərmək cəhdləri ilə heç nəyə nail ola bilməz. Rəsmi Parisin ermənipərəst mövqeyi Fransanın Cənubi Qafqazdakı maraqları qarşısında əsas əngəl rolunu oynayır. Çünki Cənubi Qafqazda şəriksiz geopolitik iradə sahibi məhz Azərbaycan dövlətidir. Fransa özünün ermənipərəst mövqeyini, Azərbaycana qarşı düşmənçilik davranışlarını davam etdirdikcə, rəsmi Bakı bu dövlətin Cənubi Qafqazda hansısa hədəflərə çatmasına imkan vermək niyyətində deyil.
Bütün bunlar onu göstərir ki, rəsmi Paris Azərbaycandakı səfirini geri çağırmaqla, hər hansı ciddi nəticə qazana bilməz. Makron hakimiyyəti əgər, Fransanın regional maraqları barədə düşünürsə, onda fransız səfirlə deyil, məhz Azərbaycanın rəsmi dairələri ilə məsləhətləşməlidir. Bundan öncə isə rəsmi Paris ilk növbədə ermənipərəst mövqeyindən imtina etməlidir, Azərbaycana qarşı düşmənçilik siyasətinə ciddi düzəlişlər etməlidir. Əks halda, Fransa Cənubi Qafqaza kənardan baxan küsəyən ölkə kimi qalacaq.(Yeni Müsavat)
Qardaş Gürcüstanın milli futbol komandası Avropa Çempionatının final mərhələsinə keçidi təmin etdi. Çox gərgin oyun oldu. Yunanlar bu fürsəti gürcülərə vermək istəmirdi. Amma gürcülər aldılar.Bu münasibətlə öz Facebook səhifəmdə gürcüstanlı dostları təbrik etdim. Gürcü dilini bilmədiyim üçün təbriki rus dilində yazdım:
“Поздравляю всех друзей из Грузии.
Грузия - это Европа!”
Bilirəm ki, bir çox gürcülər indi rus dilindən daha çox ingilis dilinə üstünlük verir. Amma mən yenə də rus dilində yazdım.
Gözləmədiyim halda, bu təbrikim 2500-ə yaxın bəyənmə ilə işarələndi. 300-ə yaxın şərhlər yazıldı. Məsələ bunda deyil.
Tanıdıqlarımdan və Facebook dostluğumda olanlardan başqa, bir xeyli gürcü yazdığıma reaksiya verdi. Sözsüz ki, əksəriyyəti təşəkkür edir və bəyənirdi. Amma yazanlar arasında “Gürcüstan nə Avropa, nə də Asiya deyil. Gürcüstan Qafqazdır” yazanlar da vardı. Bu da bir yanaşmadır. Amma məsələ heç bunda da deyil.
Mənim bu təbrikimə reaksiya verənlərin arasında ermənilərin olması isə məni doğurdan da təəccüblədirdi. Ona görə təəccübləndirdi ki, şərh yazan, təbrikimi bəyənən ermənilərin heç biri ilə nə real həyatda, nə də Facebook üzərindən heç bir əlaqəm olmayıb.
Onlarla erməni mənim təbrikimə qoşulduğunu, gürcü dostları təbrik etdiyini yazdı. 100-dən artıq erməni bu təbrikimi bəyənmə ilə işarələdi.
Təsəvvür edirsiniz?
Bir azərbaycanlı gürcü dostları milli komandanın uğuru münasibəti ilə təbrik edir və onlarla erməni bu təbrikə qoşulur və fikrini yazır. Yüzdən artıq erməni bu təbriki bəyəndiyini ehtiva edir.
Bu, mənim çün gözlənilməz idi. Amma buna çox sevindim.
Uzun illərdir ki, Qafqazda baş verən qarşıdurmaları, Azərbaycan-Ermənistan münasibətlərini öyrənmək, sabah üçün nəticələr çıxarmağa çalışıram. Facebook təbrikim bu axtardığım sualların çoxuna cavab verdi.
Yuxarıda gürcü dostlardan bəzisinin yazdığı fikri əbəs xatırlatmamışdım: “Gürcüstan nə Avropa, nə də Asiya deyil. Gürcüstan Qafqazdır”.
Elədir ki, var.
Gürcüstan da Qafqazdır. Ermənistan da Qafqazdır. Azərbaycan da Qafqazdır.
Qafqaz üçün ən ciddi inkişafın yol xəritəsi məhz Qafqaz olmaqdır, həmrəylikdir.
Əminəm ki, bu həmrəylik olsa Qafqaz daha gözəl, daha əmin-aman, daha da inkişaf etmiş olar.
Sonda bir tarixi xatırladacam.
Bir neçə il əvvəl Azərbaycan ərazisində, bu gün Göygöl kimi tanıdığımız şəhərdə almanların məskunlaşması tarixini araşdırırdım. Tarixi faktları öyrənərkən maraqlı bir fakta rast gəldim.
Sən demə, Qafqaza köçən almanlar danışırmış ki, onların dini etiqadına görə, qiyamət günü xilas olmaq üçün dünyanın ən münasib yerlərindən biri məhz Qafqazdır...
Vəssalam.
pressklub.az