 |
|
Vətən müharibəsindən sonra işğaldan azad olunmuş ərazilərə Böyük Qayıdış Proqramına uyğun olaraq ümumilikdə 987 ailənin (3932 nəfər) köçürülməsi təmin olunub.
Bunu Baş nazir Əli Əsədov dekabrın 5-də keçirilən parlamentin plenar iclasında çıxışı zamanı deyib.
O bildirib ki, ilin sonunadək əlavə olaraq 215 ailənin köçürülməsi gözlənilir.
Prezident İlham Əliyev Tailandın Kralı Əlahəzrət Maha Vajiralongkorn Phra Vajiraklaochaoyuhuaya təbrik məktubu ünvanlayıb.
Məktubda deyilir:
"Əlahəzrət,
Tailand Krallığının milli bayramı münasibətilə Sizi və Sizin simanızda bütün xalqınızı öz adımdan və Azərbaycan xalqı adından ürəkdən təbrik edir, ən səmimi arzularımı yetirirəm.
Bu xoş gündə Sizə möhkəm cansağlığı, xoşbəxtlik, işlərinizdə uğurlar, Tailand Krallığının dost xalqına daim əmin-amanlıq və rifah diləyirəm".
ABŞ-nin dövlət katibinin Avropa və Avrasiya məsələləri üzrə köməkçisi Ceyms O'Brayn dekabrın 6-dan 8-dək Azərbaycan və Rumıniyaya səfər edəcək.
Bu barədə Dövlət Departamentinin mətbuat xidməti məlumat yayıb.
Bildirilib ki, O'Brayn Bakıda “Azərbaycan və Ermənistan arasında ikitərəfli münasibətləri möhkəmləndirmək və sülhü dəstəkləmək məqsədilə Azərbaycanın vəzifəli şəxsləri ilə görüşəcək”.
Rumıniyada dövlət katibinin köməkçisi Moldova və Ukrayna rəsmiləri, həmçinin Avropa Komissiyasının nümayəndələri ilə görüşlə yanaşı taxıl ixracı ilə bağlı iclasda iştirak edəcək. Orada o, “qarşılıqlı maraq doğuran məsələləri müzakirə etmək” niyyətindədir.
Ermənistan eyni vaxtda həm ABŞ-a, həm də Rusiyaya xidmət edib, öz maliyyə-iqtisadi və hərbi-siyasi maraqlarını reallaşdırmağa çalışır... Ancaq rəsmi İrəvanın bu “paralel manipulyasiya”sından ABŞ və Qərbin yoxsa, Rusiyanın daha çox faydalandığı yalnız hansı tərəfin daha sərt reaksiya verməsiylə məlim ola bilər...
ABŞ və Qərbin Rusiya ilə qarşıdurmasında yeni maraqlı məqamlar ortaya çıxmağa başlayıb. İndi bu iki nəhəng hərbi-siyasi güc mərkəzi istifadə edə biləcəkləri bütün faktorları ön plana keçirtməyə başlayıblar. Belə ki, Ukrayna savaşında hazırda durğunluq mərhələsi yaşansa da, nəhənglərin qarşıdurması tədricən digər bir regiona sıçramaqdadır. Yəni, ABŞ və Qərbin Rusiya ilə hərbi-siyasi qarşıdurmasının ağırlıq mərkəzi tamamilə Cənubi Qafqaza keçirilmək üzrədir.
Maraqlıdır ki, bu nəhəng regional qarşıdurmada məhz Ermənistan geopolitik alət rolunu öz üzərinə götürüb. Rəsmi İrəvan ABŞ və Qərbin təlimatları və sifarişləri ilə israrla Ermənistanı Rusiyadan uzaqlaşdırma xətti tutub. Paşinyan hakimiyyəti hər imkanda Rusiyanı Ermənistanın bütün siyasi uğursuzluqlarında və hərbi məğlubiyyətlərində ittiham edir. Və hətta Rusiyanın patronajlığı altında olan qurumların toplantılarını boykot etməyə üstünlük verir.
Ancaq burada önəmli və qəribə məqam diqqəti çəkir. Belə ki, rəsmi İrəvan Rusiyaya ardıcıl xəyanət mövqeyi tutsa da, Kreml Ermənistana münasibətdə maksimum səviyyədə tolerant davranmağa çalışır. Hər halda, Rusiya tərəfindən Ermənistana qarşı indiyə qədər hər hansı radikal və prinsipial addımlar atılmayıb. Və bu, əslində, Rusiyanın qarşılıqlı münasibətlər ənənəsinə tamamilə zidd mövqedir.
Əksinə, Kreml təmsilçiləri, xüsusilə də, Rusiya prezidentinin mətbuat katibi Dmitri Peskov Ermənistanı dost və müttəfiq ölkə hesab etdiklərini bəyanlamaqda davam edir. Eyni zamanda, Kremldəkilər rəsmi İrəvanın yanlış yoldan geri dönəcəyinə inandıqlarını da qətiyyən gizlətmirlər. Bu baxımdan, mövcud situasiya istər-istəməz müəyyən şübhələr doğurmaya bilməz.
Ancaq bütün sirlərin nə vaxtsa, ifşa olunmaq kimi bir ənənəsi də mövcuddur. Son vaxtlar ortaya çıxan bəzi məlumatlar əslində, Kremlin Ermənistanın Rusiyaya qarşı xəyanətkar davranışlarına tolerantlığının arxasında gizlənən gizli və qaranlıq məqamları aydınlaşdırmağa imkan verir. Belə anlaşılır ki, böyük ehtimalla bəzi məqamlar heç də göründüyü kimi deyil. Və bir çox məsələlərdə həm Rusiya, həm də Ermənistan manipulyasiya ilə məşğuldur.
Məsələ ondadır ki, Qərb mərbuatında Ermənistanın Rusiyaya sanksiyalardan yayınmaq üçün gizli yardım göstərdiyi barədə məlumatlar yayılmağa başlayıb. Məlum olub ki, Ermənistan Rusiyaya qarşı sanksiyalardan külli miqdarda “qara maliyyə” qazanmağa nail olub. Ona görə də, Ermənistanın iqtisadi göstəriciləri real imkanlarını iki dəfədən çox aşıb. Və bu, beynəlxalq səviyyədə böyük qalmaqallar yaratmalı olan məsələdir.
Qərb mütəxəssislərinin iddialarına görə, Ermənistan Ukrayna savaşı başlandıqdan sonrakı dövrdə Avropa məkanından öz əhalisinin ehtiyaclarını on dəfələrlə üstələyən həcmdə elektrik avandanlıqları idxal edib. Üstəlik, Qərbdən idxal edilən həmin avadanlıqların Ermənistanın daxili bazarlarına çıxarılmadığı da məlum olub. Və bu baxımdan, idxal edilmiş malların hara “buxarlandığı” olduqca ciddi məqamdır.
Yenə də Qərb qaynaqları iddia edirlər ki, Ermənistan Rusiyaya qarşı sanksiyalardan faydalanmaq üçün “kölgə ixracı” sistemi yaradıb. Bu sistem bütövlükdə Avropadana idxal edilən qadağan olunmuş malların gizli şəkildə Rusiyaya ötürülməsinə xidmət edir. Bu “gölgə ixracı”nda Ermənistanın bir çox şirkətləri və biznes dairələri birbaşa iştirak edirlər.
Eyni zamanda, Ermənistanın bank sistemi də Ukrayna savaşının başlanmasından sonrakı mərhələdə Rusiya maliyyəsinin hərəkətini təmin etməyə uyğunlaşdırırlıb. Rusiya biznes dairələri Ermənistanda minlərlə müvəqqəti şirkətlər qeydiyyatdan keçiriblər. Ermənistan qeydiyyatlı həmin şirkətlərin üzərindən isə Rusiyanın xarici ödənişləri reallaşdırılır. Yəni, Ermənistan Rusiyaya maliyyə dövriyyəsinin mövcudluğunu qorumaqda da yardım edir.
Bütün bunlar onu göstərir ki, Ermənistan Rusiyaya ABŞ və Qərbin sanksiyalarından yayınmaqda maksimum səviyyədə yardım göstərir. Üstəlik, Ermənistanın “gölgə isracı” sistemi sayəsində idxal edilən malların bəzi detalları sayəsində Rusiya hərbi-sənaye kompleksi raket kompleksləri və digər hərbi texnika istehsalını da davam etdirir. Və məhz bu səbəbdən də, Kreml Ermənistanın siyasi xəyanətlərinə maksimum səviyyədə tolerant yanaşmağa üstünlük verir.
Bu baxımdan, hesab etmək olar ki, Rusiya-Ermənistan gərginliyi də böyük ölçüdə siyasi manipulyasiya xarakteri də daşıya bilər. Böyük ehtimalla ABŞ və Qərbin Ermənistanın “gölgə ixracı” sistemindən diqqətini yayındırmaq üçün Kreml rəsmi İrəvanın “kaprizlər”ini qeyri-adi səbrlə müşahidə etmək taktikası tutub. Və bu, indiyə qədər hər iki tərəfin maraqlarına tamamilə cavab verən manipulyasiya təsiri bağışlayır.
Təbii ki, ABŞ və Qərb də Ermənistanın “gölgə icracı” sistemindən xəbərsiz deyil. Ancaq nə qədər qəribə də olsa, rəsmi İrəvanın Rusiyaya sanksiyalardan yayınmaq üşün göstərdiyi yardıma elə bir ciddi reaksiya verilmir. Belə anlaşılır ki, ABŞ və Qərb Ermənistanın “gölgə ixracı” sisteninə sadəcə, “göz yammağa” üstünlük verilir. Halbuki, hər hansı başqa ölkə olsaydı, ABŞ və Qərb həmin dövlətə qarşı sanksiyalar tətbiq edərdi.
Ola bilsin ki, ABŞ və Qərb məhz bununla Ermənistanı “satın aldığına” əmindir. Yəni, Qərb Ermənistana Rusiyaya qarşı sanksiyaların pozulması hesabına “qaranlıq maliyyə qaynağı” qazanmasına şərait yaratmış kimi görünür. Əvəzindəsə, rəsmi İrəvan hər imkanda Rusiyanı ən ağır şəkildə ittiham edir. Ermənistan ərazisini ABŞ və Qərbin tam ixtiyarına verib. Qərb kəşfiyyatı Ermənistanda özünün olduqca rahat hiss edir. Eyni zamanda, rəsmi İrəvan Rusiyanın patronajlığı altında olan qurumların iflis olunmasına, onların deqradasiya mərhələsinə yaxınlaşmasına da öz töhfəsini verməkdədir.
Bütün bunları nəzərə aldıqda, Ermənistanın eyni vaxtda hər iki düşmən düşərgəyə xidmət edib, öz maraqlarını reallaşdırmağa çalışdığını düşünmək olar. Ancaq rəsmi İrəvanın bu paralel manipulyasından ABŞ və Qərbin yoxsa, Rusiyanın daha çox faydalandığı barədə danışmaq isə hələ bir qədər tezdir. Bu məsələ Ermənistana tərəflərdən hansınınsa nə vaxtsa, daha radikal reaksiya verməsindən sonra aydınlaşmağa başlayacaq.(Yeni Mwsavat)
Dekabrın 15-də Rusiyanın paytaxtı Moskvada Azərbaycanın xarici işlər naziri Ceyhun Bayramovun iştirakı ilə Xəzəryanı ölkələrin Xarici İşlər Nazirləri Şurasının iclası keçiriləcək.
Rusiyanın xarici işlər naziri Sergey Lavrovun sədrliyi ilə baş tutacaq tədbirə Azərbaycanla yanaşı İran, Qazaxıstan və Türkmənistan nümayəndələri qatılacaq.
Tərəflər Xəzər əməkdaşlığının inkişafı üçün prioritetləri vurğulayaraq, qarşılıqlı maraq doğuran regional məsələləri müzakirə etməyi planlaşdırırlar.
Xatırladaq ki, dekabrın 4-də Azərbaycanın xarici işlər naziri Ceyhun Bayramov Xəzəryanı ölkələrin Xarici İşlər Nazirləri Şurasının iclasında iştirak etmək məqsədilə Rusiya Federasiyasına işgüzar səfərə yola düşüb.
Azərbaycanla vasitəçisiz görüş çox böyük risklər daşıyır.Axar.az xəbər verir ki, bu sözləri erməni ekspert Qarnik Davtyan deyib.
O bunu belə əsaslandırıb ki, guya Azərbaycanın tərəfi gələcəkdə hərbi əməliyyatlara haqq qazandırmaq üçün bu platformadan istifadə etməsi mümkündür:
“Bunun üçün Ermənistanın üzərinə götürdüyü öhdəlikləri (güzəştləri) yerinə yetirməkdən imtina etdiyi əsas gətirilə bilər”.
Onun düşüncəsinə görə, Ermənistan və Azərbaycan razılığa gələrsə, Bakının səhəri gün İrəvanın öhdəliklərini yerinə yetirmədiyini deməyəcəyinə zəmanət yoxdur.
Davtyan da müharibə ehtimalı haqda manipulyasiyalara qoşulub və bildirib ki, düşmən (Azərbaycan - red.) Ermənistan hakimiyyətinin nəinki təslim olduğunu, həm də qorxaq olduğunu anlayıb və bu kontekstdə müharibənin özündən maksimum fayda əldə etməyə çalışacaq.
O iddia edib ki, Azərbaycan “daha yüksək tələblər” səsləndirir, məsələn, azərbaycanlıların Ermənistana qayıdışı və s.
Qeyd edək ki, Azərbaycanla birbaşa danışıqlardan qaçan Ermənistan vasitəçilərin yardımı ilə götürdüyü öhdəliklərdən yayınmağa, “yeni şərtlər daxilində” danışıqlar aparmağa cəhd göstərir. Həmçinin sürətlə silahlanmağa davam edərək, danışıqlarda müəyyən üstünlük yaradacaq yeni sərhəd toqquşmasına da hazırlaşır.
Rusiya ilə Ermənistan arasında münasibətlər əvvəlki kimi olmayacaq. Amma Rusiyanın Zaqafqaziyadan çıxması ilə bağlı nəticə çıxarmağa tələsməyə də ehtiyac yoxdur. Çünki bu region Rusiya Federasiyasının cənub bölgələrinin təhlükəsizliyi üçün xüsusi əhəmiyyət kəsb edir. Lakin o da həqiqətdir ki, Rusiyanın postsovet Avrasiyasının ən təlatümlü hissələrindən birində mövcudluğunun konfiqurasiyası dəyişir”. Bu fikirləri məşhur rusiyalı politoloq və beynəlxalq məsələlər üzrə mütəxəssis Sergey Markedonov sosial şəbəkədəki hesabında yazıb.Analitik hesab edir ki, İrəvanla Moskva arasında dialoqda bir növ aşağılama hissi var: “Belə ki, Ermənistanın Baş naziri Kollektiv Təhlükəsizlik Müqaviləsi Təşkilatının (KTMT) Minsk sammitində iştirak etmədi. Onunla yanaşı, ən yaxın silahdaşları - xarici işlər naziri Ararat Mirzoyan, həmçinin Təhlükəsizlik Şurasının katibi Armen Qriqoryan və Müdafiə Nazirliyinin rəhbəri Suren Papikyan KTMT-nin müvafiq struktur bölmələrinin iclaslarında iştirak etmədilər. Ermənistanın media məkanında isə KTMT-yə yumşaq desək, üstünlük verilmir. Söhbət həm ənənəvi mediadan, həm də sosial şəbəkələrdən gedir. Eyni zamanda, belə bir hiss var ki, İrəvan münasibətlərdə dərinləşən uçuruma hazır deyil. Ən azı indiki dövr üçün”.
“Rusiya Prezidentinin mətbuat katibi Dmitri Peskov bildirib ki, Nikol Paşinyanın Rusiyanın “şimal paytaxtı” Sankt-Peterburqda MDB-nin qeyri-rəsmi sammitində iştirakı gözlənilir. Bundan əvvəl Vladimir Putinin köməkçisi Yuri Uşakov da oxşar məlumat vermişdi. Hesab edirəm ki, məhz Peterburqda İrəvanın “Qarabağdan sonra” yanaşmalarında konfiqurasiya dəyişikliyi planlaşdırılır. Əgər Ermənistan rəhbərliyi KTMT-yə soyuqqanlı, bəzən də bilərəkdən nümayişkaranə şəkildə soyuq münasibət bəsləyirsə, deməli, Avrasiya İqtisadi İttifaqı ilə bağlı yanaşması fərqlidir”, - Markedonov vurğulayıb.
“Paşinyan Peterburqa gedib-getməyəcəyini bilmirəm, hələ qərar verilməyib, amma mənim şəxsi fikrimcə, Ermənistan bu sammitdə iştirak etməlidir, çünki biz Aİİ-yə sədrliyi öz öhdəmizə götürürük”, - deyə Ermənistan Parlamentinin sədri Alen Simonyan noyabrın 28-də bildirmişdi. Çətin ki, belə yüksək rütbəli dövlət xadimi bu vəziyyətdə sıradan bir bəyanat versin. Əgər İrəvan Moskvanın təhlükəsizlik zəmanətlərinə açıq-aşkar şübhə ilə yanaşırlarsa, o zaman Rusiya Federasiyası və Aİİ-dəki digər tərəfdaşlarla iqtisadi inteqrasiyanı nəinki saxlamaq, hətta bəlkə də dərinləşdirmək perspektivlərinə də açıq-aşkar skeptisizm var”, - analitik əlavə edib.
Politoloq qeyd edib ki, müttəfiqlər arasında münasibətlərdə hansı yeni konfiqurasiyalar yaransa da, köhnə problemlərin qarşısını almaq mümkün deyil: “Münasibətlərin şəxsi müstəvisinin əhəmiyyətini nəzərə alsaq, Rusiya Prezidenti ilə Ermənistanın Baş naziri arasında söhbət vəziyyəti sakitləşdirə və onu daha konstruktiv istiqamətə apara bilər. Amma yenə deyirəm, əvvəlki münasibətlərin bərpası mümkün görünmür”.
Müəllif: Turan Abdulla - Mənbə: AYNA.az
2023-cü il oktyabrın 17-də Pekin şəhərində imzalanmış “Azərbaycan Respublikasının Energetika Nazirliyi və Çin Xalq Respublikasının Milli Enerji Administrasiyası arasında energetika sahəsində əməkdaşlığa dair Anlaşma Memorandumu” təsdiq edilib.
Bu barədə Prezident İlham Əliyev Fərman imzalayıb.
Sənədə əsasən, bu Fərmanın 1-ci hissəsində göstərilən Anlaşma Memorandumu qüvvəyə mindikdən sonra Azərbaycan Energetika Nazirliyi onun müddəalarının həyata keçirilməsini təmin edəcək.
Azərbaycan Xarici İşlər Nazirliyi Anlaşma Memorandumunun qüvvəyə minməsi üçün zəruri olan dövlətdaxili prosedurların yerinə yetirildiyi barədə Çin Xalq Respublikası Hökumətinə bildiriş göndərəcək.
Prezident İlham Əliyev Suqovuşan‒Sərsəng su anbarı‒Qozlukörpü‒Kəlbəcər avtomobil yolunun yenidən qurulması ilə bağlı tədbirlər haqqında Sərəncam imzalayıb.
Sərəncamla səksən kilometr uzunluğu olan Suqovuşan‒Sərsəng su anbarı‒Qozlukörpü‒Kəlbəcər avtomobil yolunun yenidən qurulması məqsədilə Azərbaycan Respublikası Prezidentinin 2023-cü il 23 yanvar tarixli 3720 nömrəli Sərəncamı ilə təsdiq edilmiş “Azərbaycan Respublikasının 2023-cü il dövlət büdcəsində dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”nün 1.31.25-ci yarımbəndində göstərilmiş məbləğin 17,0 (on yeddi) milyon manatı Azərbaycan Avtomobil Yolları Dövlət Agentliyinə ayrılır.
Azərbaycan Respublikasının Maliyyə Nazirliyi bu Sərəncamın 1-ci hissəsində göstərilən məbləğdə maliyyələşməni təmin edəcək.
Azərbaycan Respublikasının Nazirlər Kabineti bu Sərəncamdan irəli gələn məsələləri həll edəcək.
Abşeron Rayon Mühafizə İdarəsinə yeni rəis təyin olunub.
Axar.az xəbər verir ki, bununla bağlı daxili işlər naziri Vilayət Eyvazov əmr imzalayıb.
Nazirin əmri ilə Hikmət Usubov Sabunçu Rayon Mühafizə İdarəsinin rəisi vəzifəsi vəzifədən azad edilərək, Abşeron Rayon Mühafizə İdarəsinin rəisi vəzifəsinə təyin edilib.
Qeyd edək ki, Hikmət Usubov hazırda Prezident yanında Təhlükəsizlik Şurasının katibi olan Ramil Usubovun qardaşı oğludur.